You are here: HomeRSS FeedsThe Lamka Post

The Lamka Post | November 9, 2013

Saturday, 09 November 2013 15:07

ZFC in All India CMs Gold Cup a di’n Sikkim zuan
LAMKA, Nov 8: 7th All India Chief Minister’s Gold Cup November 12 - 22, 2013 kikal sung, Namchi Ground, Jorethang, Sikkim a tel ding in Zomi Football Club (ZFC) in tuni zinglam dak 6:30 in Lamka nusia in Sikkim zuan in kuankhia uhi. Amaute khakkhiakna ADC Chairman Langkhanpau Guite in nei a, Pastor H. Jamkhanpau in amaute a ding in thumsakna nei hi. Hiai a kuante ahih uh leh ZFC Player 17 leh Official 5 hi uhi.

 

Hiai hun a Langkhanpau Guite, Chairman, ADCC in a thugenna ah games spirit neitak a kimawl ding in hasuan a, mite ettontak ahih ngei uh a deih sak thu gen in leh, vualzawlna toh damtak a a hong tunkik uh a deihsak thu gen hi. Tournamnet ahihleh November 12, 2013 in kipan ding a, opening match ah ZFC leh All India SAI toh kimawl ding uhi.

 

 

CDSU in theihsakna bawl
LAMKA, Nov 8: Churachandpur District Student Union (CDSU) in tuni a thusuah a bawlna ah a paisa June 30, 2013 nitak a police station luhna toh kisai a si leh liamte panpihna ex-gratia sum ding manfelta in amau mimal bang account ah thunlut ahihtak dan taklang uhi.

 

 

Hiai toh kisai in liamna tuakte damdawi mante, a damdawi lakna uh, District Hospital kong a Grace Medico neitu kiang a kipiak chiat ding inleng theihsakna bawl ngal uhi. Huai ban ah, hiai thil toh kisai, CDSU in mohpuakna nei nawnlou ding hidan inleng taklang ngal uhi.

 

 

World Disable Day a ding Role Play zohsiang hita
LAMKA, Nov 8: Kum bangzah hiampaisa apan, kum teng a December 3, World Disable Day a a kizat dungzui in tukum inleng zat hinawn ding hi.

 


Hiai ding toh kisai, Liliance Fonds te sponsored na leh, District Social Welfare, CDDU, FCC, Imphal, CCI, SSA/CCpur leh People Advance in Social Service (PASS) te saina in zan, November 7, 2013 apan mun tuamtuam ah “Break barriersm Open doors: For an inclusive society for all” chih thupi a zang in, awareness campaign dan in role play nei uhi.

 

World Disable Day a ding Role Play zohsiang hita

 

Zan in school tuamtuam 6 ah nei ua, tuni’n leng school dang 6 mah ah nei nawn uhi. Hiai awareness campaign dan a role play a neih uh ni bangzah hiam khawl in, November 27 in pan nawn ding ua, huai hun ah, role play hinawn lou in street play dan in nei ding ua, mun tuamtuam mun 9 ah nei in zousiang ding uhi.

 


Hiai role play a neihna uah, pianken a vualpha loute koihdap louh a, amaute midang toh kibang a koih a, ‘person with disable’ te a dia leng kong hon ding ahihdan lahna nei uhi.

 



Miss Kut, 2013, Lingjanei Kipgen in Lodestar Public School etkaina nuai a Lodestar Children Home vehna nei a, home a om panpih poimawh naupangte kiang ah puan hawm hi.(UNA)

 

EE apan SE in kaisang
LAMKA, Nov 8: Mr. Velngulmuan, IRSE in hun bangtanhiam Jiri-Imphal Railway Project nuai a Executive Engineer (EE) a sepnung in November 4, 2013 in Superintendent of Engineer (SE) Northern Frontier Railway dinmun len ding in kaisang hi’n thutut kingah hi. Amah ahihleh, Dr. H. Kamkhenthang leh Mrs. Thongzaniang, Paite Veng, Imphal tapa upapen ahi.

 


Hill House Counting om ding
LAMKA, Nov 8: SDO/Ccpur apan thusuah kimu in a taklatdan in, Churachandpur sub-division sung a inn simna pat hipahta ding hi'n taklang hi. Hiai inn simna (Hill house counting) neihna ding toh kisai a official/lambu-te village authority chairman/chief banah a kisaipihte'n hoihtak a, ana kithuahpih a, hihkhelh omlouhna ding a inn omzah diktak mah ana chiamtehsak ding in ngetna bawl hi.

 


ST/SC Scholarship exam om ding
LAMKA, Nov 8: Government in ST leh SC student, Class VI leh Class IX sinlelte a dia scholarship apply theih ahih dungzui in district level a ding in committee khat phuhkhiak in om hi.

 


Hiai committee a District Supervising Officer ding in Joseph Lalrothang, ZEO/CCpur guan in om a, District Liasion Officer ding in Pumshong Hangshing guang uhi. Centre Superintendent ding in T. Hanglamthang, Headmaster, Phungkhothang Government High School guan in om a, Asst Centre Superintendent ding in Lalthiangzou, Asst Headmistress, Rengkai Govt H/S School guan in om hi. Hiai scholarship a ding in candidate mi 777 om ua, Class VI a ding mi 360 banah, class XI a ding mi 417 om in, amaute’n a hongtung ding November 24, 2013 in Phungkhothang Govt. High School leh Rengkai Govt. Higher Secondary School te ah exam ding uhi.

 

Thanlon Medical Assessment Camp zoh hita
LAMKA, Nov 8: District Intervention, Integrated Education for Disable (IED), SSA, Churachandpur saina in apaisa November 4, 2013 in TD Block 3 ah, Children With Special Needs te a ding in District Level Disabled Medical Assessment Camp neih a ompen tuni’n zousiang uhi.

 


November 4 in Samulamlan TD Block ah assessment camp nei ua, November 7, zan in Thanlon TD Blcok te a ding in Songtal ah nei uhi. Official lam apan thu kimu dan in, Thanlon TD Block a disable assessment camp a neihna uah Dr. Chiin Guite, Eye Specialist in makaih in team 12 kuan ua, hiai ah khozakna, kho muhna leh a dang dang a buaina nei mi 23 mukhia uhi. Tuni’n, Henglep TD Block te a ding nei nawn in zousiang uhi. Medical Assessment Camp neihna hun ah district apan team 12 a kuan ban uah, Imphal a pan, SSA a Intervention Co-ordinator bangzah hiam inleng zui uhi.

 

 

Oct sung in gari thak 164 in kibehlap
LAMKA, Nov 8: Churachandpur District sung ah kha lui Oct. 2013 sung in gari tuamtuam leithak 164 in kibehlap zou hi’n District Transport office apan thutut kingah hi. Gari tuamtuam lei thak teng in District Transport office ah registration bawl ua, huaite lak ah pei nih nei Bike/Activa tampen lai hi.

 


Gari tuamtuamte ahihleh Motor cycle bike/Activa 119, Auto 16, Car 19, Taxi 1, Taxi Cap - 1, Truck 5, Jeep 1 leh a dangdang 2 pha uhi. April 2013 to Oct. 2013 sung in gari thak 968 pha zou a, huaite ahihleh Motor bike/Activa 780, Auto 50, Car 116, Taxi 1, Taxi cap 1, Truck 12, Jeep 6 leh a dangdang 2 pha hi. October 2013 sung in revenew collection in Rs. 14,77,752/- mukhia ua, April 2013 to October 2013 sung in Rs. 77,01,139/- mukhia uhi.

 

 

60th All India Co-operative week zang ding
LAMKA, Nov 8: 60th All India Co-operative week zatna hongtung ding Nov. 15, 2013 in CCPur ah programme thupitak zang ding ua, tutan in detail program bel om nailou hi.

 

 

M. Chungsei Haokip Accident thu ah JAC kibawlkhia
LAMKA, Nov 8: M. Chungkhosei Haokip, Ex. Minister kal paita November 1, 2013 nitak dak 6:20 vel a Activa a tailai Tuibuang Oil Pump kiang a amah tenna inn lut dia kisalai a nunglam apan car hattak a tai in phukha in taisan hi.

 


M. Chungkhosei ahihleh lamlian tuang kidenna in a lu leh om lak naktak a liam in Lamka Damdawi inn puaktung ahihnung nitak mah in Shija Hospital Imphal ah refer in om hi. Hiai thu ah Nov. 2 zingkal dak 8:00 in Chungkhosei inn sung mite leh KKL, KSO te’n gari phukhatu kipuang ding a ngen ua himahleh kuamah kipuang a omlouh ziakin zonkhiak sawm in panla uhi.

 


Tuni tan a gari phukhatu muhkhiak ahihlouh ban ah kipuang a omlouh ziak in tuni zingkal dak 9:00 in Tuibuang a Chungkhosei inn ah Joint Action Committee phutkhia uhi. Hiai JAC ah KIC apan in Danial Gangte, KSO apan in TL Haokip, KKL apan in Kamthang ban ah Chungkhosei innsung mi apan mi 2 Paokai Haokip of B. Vengnuam leh Jamkhosei of M. Songgel member hi uhi.

 


JAC makaite’n a gen dan un, a phukhatu Alto Car ‘white colour’ hi’n gen ua, a kin thei lam a ki-surrender ding in ngen ua, a ki-surrender leh ngaihdam hiding a, huchi hilou a matkhaik ahih leh action lak hiding in taklang uhi. Chungsei ahihleh tuni tan in Shija Hospital ah etkol a om in a dinmun lauthonghuai hi’n gen uhi. Gari phutu thei kuapeuh in mobile number 9612381261/ 8729907981 ah hilh ding in ngen ua, hiaibang hilhtu kiang ah kipahman (re-ward) piak chiam uhi.

 

 

ANM training dingte’n regular class panding uh
LAMKA, Nov 8: Lamka a Female Health Workers Training School ah kum bangzah hiam ANM training ahihlouh nung in tun ANM training kipan nawn ding hi. Tutung in ANM training ding in students 30 la ua, huaite’n hongtung ding Nov. 11 apan in regular class pan ding uhi. ANM course kum 2 sung training ding uhi.

 

 

Folk Dance & Music Festival nei ding
LAMKA, Nov 8: Manipur State Dance & Music saina in hongtung ding Nov. 15, 2013 sunnung dak 3:00 in Hiangtam Lamka YPA hall ah “Folk dance & Music festival” nei ding ua, Chairman, ADCC chief guest apang in hongkhe ding hi. Folk Dance & Music festival ah State 10 apan in Artistes tuamtuam in present ding uhi. Huaite ahihleh artistes of Nagaland, Assam, Arunachal Pradesh, Meghalaya, Tripura, Manipur, Sikkim, Mizoram, Andra Pradesh leh EZCC, Kolkatta apan hong kuan ding uhi.

 

 

DC/CCpur in a Home State zuan
LAMKA, Nov 8: Jacintha Lazarus, IAS, DC/CCpur in tuni’n Lamka apan Imphal ah paisuk in tuni mah in Imphal apan in a Home State Tamilnadu zuan in zinkhia a, Nov. 11, 2013 ni’n Lamka hong tung kik nawn ding hi.

 

 

VPC Leilon block election nei
LAMKA, Nov 8: Vaiphei Peoples Organisation (VPC)/GHQ makaih in zan in VPC Leilon block election nei uhi. Hiai hun ah kum 2013- 2016 sung Leilon block makai ding tel uhi. Telching a omte ahihleh, Chairman - Lunneimang Vaiphei of Leimakhong, Vice Chairman - Kaithiandam of Nahkhojang hi uhi.

 


Telching a omte Khatkhotong Baite, President, VPC/GHQ in kichiam sak a, huai zawh in Rev. Haulalven in thumsakna nei hi. Office bearer luileh thakte’n Nov. 15, 2013 ma in charge kipe ding uhi.

 

 

Baby show om ding
LAMKA, Nov 8: District Family Welfare Office (DFWO)/CCpur saina in hong tung ding Nov. 11, 2013 sunma dak 10:00 in Hospital Campus ah Baby show om ding hi. Huai ah khatna apan thumna tan kiang ah prize kilawm huntawk peding ua, Consolation prize leng om ding hi. Huai a tel dingte’n naungek toh kisai lai poimohte a tawi uh ngai ding hi. Hiai a ding in application form chih hawmkhiak hilou ding a, huai mun ah min khum in fill up theih ngal ding hi.

 

 

46BN AR mun ah 7th BN AR te hong pai
LAMKA, Nov 8: Headquarter Veng a om 46BN Assam Rifles tengteng tuma zek in Nagaland ah kisuankhia ua, amau mun a om ding in Nagaland apan in 7th BN Assam Rifles te hongpai uhi. Tulai in Nagaland apan in 7th Assam Rifles tamtak nek leh tak leh van zat tuamtuam uh gari tamtak zang in niteng in hong kinawn uhi. Sepaih tamzaw Lamka hongtung ta ua, hongtung nailou leng hunkhop omlai hi’n gen uhi.

 


Miz Assembly polls Expd ding 40% in khang
Aizawl, Nov 8: Member 40 omna, Mizoram state in November 25 chiang a state legislative Assembly election a neih hun a dangka Rs 24.30 crore vel seng dia tuat hi a, hiai pen Mizoram state khangthu a election expenditure teng lak a, a sangpen a chiamteh in om hi.

 


State Election department official-te a kipan thusuak in a taklat dan in, 2008 kum a Mizoram in Assembly election a neih hun in Rs 14.55 crore vel ana zangbei zou a, himahleh tu in bel 40.11 percent a tamzaw bei zou dia tuat in om hi. Tutung Assembly elections hun a 24.30 crore zatbei kiuhkeuh ahihleh Assembly segment khat a dia sumsen zah Rs 60.75 lakh tungzou ding chihna ahi.

 


Tuabangkal ah, February 14, 2013 a Tripura Assembly polls ah bel seat khat ah a tampen in Rs 33.33 lakh lut a, hiai state in seat 60 nei a, tua ahihleh a vek a kigawm in 1999.8 lakhs vel ana zangbei chihna suak hi.

 


Mizoram University Political Science department a kipan professor khat in a genna ah, mipite’n election hun a government ginalou a tel uleh elections ah sum tamtak lut ding a, election hun a sum lut dan in maban a government vaihawm dingdan muhkholh theih a lakkhia ahi chi hi. (PTI)

 


Border fencing thu CM in press conference sam
IMPHAL, Nov 8: Manipur Chief Minister Okram Ibobi Singh in tuni in thuthaksaite leh party tuamtuam a makaite mai ah border fencing issue toh kisai thuchian puangkhia hi. Ibobi in a genna ah, Forest Conservation Act, 1972 pansan a Ministry of Home Affairs kiang a Indo-Myanmar Border Fencing bawlkhiak theihna ding clearance pedia state Board for Wildlife and Sanctuary a kipan ngetna a om ziak a clearance bawl a om ahi chi hi.

 

Border fencing thu CM in press conference sam

 

CM Bungalow a thuthaksaite toh houlim hun a CM in a gen zelna ah, Indo-Myanmar Border Fencing issue toh kisai a Manipur state sung a party tuamtuamte’n memorandum a piakkhawmte uh India Prime Minister, Home Minister leh External Affairs Minister-te kiang a thot dia final draft leng bawzoh hita chi hi.

 


Clearance toh kisai a dotna a hilhchetna ah, state Board for Wildlife and Sanctuary a kipan ngetna ziak a Ministry of Home Affairs kiang a Indo-Myanmar Border Fencing bawl theihna ding clearance bawl hi a, state Board for Wildlife and Sanctuary inleng Forest Conservation Act, 1972 pansan a ngen hi’n gen hi. A gen zomzelna ah, hiai fencing bawl theihna dia thuneitu Manipur government kia hilou a, Ministry of Home Affairs tung ah leng kinga lian mahmah hi. BJP in media tungtawn a government mohsakthu a mawk taklat det pen thil paidan a theihsiam louh ziak hizaw a, bangteng hileh re-survey bawlna dia ngetna memorandum tuamtuamte Central Government kiang a piaklut pah hita ding chi hi. Party tuamtuamte’n ngetna a bawlte uh state leh central government lam a kipan soiselna thu khat mah leng omnailou a, party-te deihna government in nial ding hia chih leng theih hinaikei mahleh BJP in bel thil paidan theisiamlou a government tung ah ngohna tuamtuam bawl hi’n Ibobi in thuthaksaite kiang ah gen hi.

 


Border fencing in a sukkhak ding gam leh khua neitute panpihna dia Ministry of Home Affairs in dangka Rs 503.68 crore a luikhiak pen government a lutlou chihthu toh kisai Ibobi in a gen nawnna ah, hiai sum pen concerned implementing agency-te kiang ah piakkhiak hizel a, a kal a government in teng khat leng nemanglou ahi chi hi. (NNN)

 

 

NSCN-IM helpawlte mizat 2 mat in om
Imphal, Nov. 8: Imphal West District Police Commandos pawlkhat in apaita November 6, 2013 zan dak 10:30 vel in Thangmeiband Tharon a om Namching Gangmei inn apan NSCN-IM helpawlte mizat 2 (nih) mankhia uhi. Matkhiat a omte bel Kuituanang Panmei (23) s/o (L) Tongomang Panmei leh Ganglanang Gangmei (36) s/o Namching Gangmei hi ua, amaute bel Tharon Thangmeiband khomi ngen hidan in kigen hi.

Kum 63 a upa nupi khat sisa in kimukhia
Imphal, Nov 8:  Tuni in Napet Palli a innluah a om kum 63 a upa nupi khat Chandam Momon Devi w/o Ch. Ibocha kichi amah pindan sung ah sisa in muhkhiat in om hi. Chandam omna diktak bel Ikou Bazar hi a, a pasal toh a kikhen nung un hiai mun ah kum sagih bang khosata a, a inn neitu min Asoibam Naba kichi hidan in thutut kingah hi.

 


Thu kingahdan in, Chandam tanu Ch. Bala Devi in tusun dak 12:30 vel in a nu kimuhpih ding a a hohna lam a vatuakkha ahi kichi hi. Misi pen bel amah pindan sung ah mi thah hileh kilawmtak a muanmohhuaitak a sisa a muhkhiak a om ahi. A lutang lak ah liamna om ban ah a taksa leng kise panta ahihna ah a sihna leng ni nih hiam ni thum hiam paisa hita ding in muanmohhuai hi. Hiai thu theih ahihphet in Lamlai Police-te’n a luang hong lakhia ua, JINMS a misikoihna mun ah koih uhi.

 

 

Naga tour team-te sensitive area lut uh
IMPHAL Nov 8:  All Naga Students Associan, Manipur (ANSAM) in ‘My Land my Identity, Walking the Peripherals’ chih thupi pansan a khualzinna a neih second phase na ah Saikul Sub-division, Senapati district lutta uhi. Hiai area ahihleh state sung a district dang teng sang a sensitive zaw ahihdan leng taklat in om hi.

 


Gamleitang tungtang lungkimlouhna leh khovel pianken hamphatnate zar zoh ding bangtak a zoutheilou dia State leh non-state agency-te a kipan Naga mite’n vauna a ngah mun luat ziak ua lungkimlouh lahna dia student pawlpi in hichibang khualzinna ana pat hidan in ANSAM a kipan thusuak in taklang hi.

 


ANSAM president Seth Satshang in thuthaksaite kiang a, a genna ah, hiai toh kisai in student pawlpi in a khualzinna lam ah mi tuamtuam houlimpih khinta a, tuni chiang in Naga mite’n rights, land leh resources chihte a hamphatna neukhah i neihte ahihleh hun paisa a nakpitak a i panlakna ziak ahi chi hi. Tua mah bang in maban ahleng Naga mite’n i tan ding bangtak tang a, i hamphatpih dingte bukimtaka i hamphatpih theihna ding in ANSAM leh organization tuamtuam pangkhawm in theihtawp suah hiding chi hi.

 


Mun tuamtuam a kipan kikaikhawm, President Seth Shatshang makaih a khualzin ANSUM member 30te’n Senapati district sung a om, Tunoupokpi village ground ah kikhopkhawmna nei ua, huai hun ah Rev. H. Apila, Executive Secretary, Thangal Naga Baptist association (TNBA) in vualzawlna thumna toh maban kalsuan ding in khahkhia hi.

 


ANSAM in tuni chiang a, a phaknasa, Makeng/Seijang village ahihleh Kuki community luahkhum hi a, hiai toh kisai ANSAM thusuak in a taklat dan in, Makeng village ahihleh Kuki-Naga kal buaima in Thangal miten ana luah ua, tulel in hiai khua ah innkuan 70 vel khosa uhi.

 


1990s namkal buaina ziakin Thangals mite Senapati district headquarter kim ah kisuankhia ua, amaute T. Ngaihang, Makeng Cheijinba leh Karong Mankeng chihte ah kikhenzak uhi. Hichibang a Thangals mite’n a taisan nung un Kuki miten hiai khua luah nawn ua, tuanung in a khomin leng Seijang chin khek uh chi hi. Hiai Seijang khang tangthu ahihleh Thangal Anlienao Jonlong (TAJ) president K. Gongrisim a kipan laksawn hi’n leng ANSAM thusuak in taklang hi.

 


Tour team in Senapati district sung a om, Mapou Thangal village leng veh a, tuazoh in Tangkhul mite khosakna Mapou Khullen khua lut nawn a, huai khua ah khosung makaite’n tour team-te a ding in vualzawlna leh maban a kalsuanna ua lamzang sem ding in thumna ana neihsak uhi.(NNN)

 


ROTO in state project huamlou ding
IMPHAL, Nov 8: All Tribal Student Union, Manipur (ATSUM) in November 11 nitak zankim a kipan ROTO (Reckoning of the Other) chih minvuah a state government tung a lungkimlouhna tuamtuam a neihte ziak a kiphinna pat nawn ding in zan in thusuah bawlta uhi. Hiai toh kisai in National project leh state project nasepnate khawlsak ding chih himahleh state project nasepnate khahkol hiding in tuni’n thusuah bawl nawn uhi.(NNN)

 

 

ICFAI University Mizoram in 2nd Convocation ceremony zang
Career kichi deihtelna leh chouna ahi: Governor
AIZAWL, Nov 8:  Mizoram Governor, Vakkom Purushothaman in tuni a ICFAI University Mizoram second Convocation ceremony a uap hun a, a thugenna ah, mihing hinkhua ah career kichi amah a beimai ahikei, deihtelna leh chouna (challenge) kichite a om a, deihtelna tungtawn in society khat a dia banghiam thilhoih sepsuahna dia vanzat leng ahithei. Mihingte hinkhua bel siamsinna, nekzonna leh a bul a kiknawnna chihte a beimai ding ahi chi’n gen hi.

 


Governor in a gen zomzelna ah, career zuih ding tuamtuam; business ahihkeileh bureaucracy, teaching ahihkeileh technical profession, manufacturing ahihkeileh marketing chihte na tel maithei, himahleh politics a kipan private activity a kiknawnna, innsung mohpuakna, khotang, leh gam leh nam chihte bel na teltuam theih hetlouh a nang hon zui gige dingte ahi uh chi hi.

 


Khakkhiak ding student-te a dia governor in a gen nawnna ah, tulai khovel masawn hattak delhphak sawm a panla student tamtakte mai a thugen dia seh a ka om ziak in ka kipak petmah a, khahkkiak ding student-te ka hon kipahpih petmah, noute’n na hinkhua ua thil lauhuai leh dipkuatna na tuahte uh hon tawsawntu dia na zat ua, haksatna na tuahte uh kisinsiamna dia na zat ua, risk natuahte uh gah kilawmtak suang thei dia na bawl uleh tua nung chiang in makai muanhuaitak na hongsuak ngei ding uh chi hi.

 


Governor in a huntan pen Mozoram state tungtang genna dia hunlem a la in sate sung a nekzonna tuamtuamte leh sum leh pai dinmun leng saulou in gen hi.
Vice Chancellor The ICFAI University Mizoram, Prof. J P Ramappa inleng University tulel dinmun leh hun paisa a masawnna a neihte pulakna nei a, hiai hun a thu manphatak gentu Governor tung ah leng kipahthu gen ngal hi. Tuni a 2013 batch graduating ceremony ah student 82te pahtawina khuksak in om uhi. (NNN)

 


ATSUM saina in CAUCUS 2013 om ding
Imphal, Nov.8:  All Tribal Students’ Union, Manipur (ATSUM) vaisaina nuai ah zingchiang November 9, 2013 in Hotel Imphal, North AOC ah Caucus 2013 kichi neih in om ding hi. Caucas 2013 kichi pen ATSUM a ding a 4th Academic Program hi a, Kuki Students’ Organisation, Imphal in intekna la ding uhi.

 


Caucus 2013 thupi Endeavouring for a Peaceful chih hi ding a, hiai program zatna ah Chief Guest in Pu M. Okendro, Hon’ble Minister (Edn. & CAF/PD) pang ding a, Guest of Honour in Dr. J. Suresh Babu, IAS, Principal Secretary Education (S) & Home pang ding hi. Program honna zinglam dak 9 apan 11 kikal in om ding a, huaizoh chiang in suuna om ding hi. Houlimna hun pen hunpi thum in kikhen ding a, huai hunte ah resource persons mi thum in hunzatna nei ding uhi.

 

 

Bank employee-te’n kiphinna pan
IMPHAL, Nov 8:  Manipur state government in Manipur State Cooperative Bank Ltd nuai a Executive Officer office ding a lak utlouh ziak a thangpai in Manipur State Cooperative Bank Ltd employee-te’n tuni in kiphinna pan ua, government mai a lungkimlouh lahna dia nasep khawlsan uh ahihdan thusuak in taklang hi.

 


Employee-te a kipan thusuak in a taklat dan in, Executive Officer khat lakna ding toh kisai in national leh local daily newspaper-te ah kumlui in advertisement ana kitaklang khinta a, tua dungzui in candidate mi 8te lak a chitna neipen khat telkhiak in om hi. Aman hiai post lettheihna dia chitna poimawh tuamtuamte leh RBI in a ngiat bangkim neivek ahi chi uhi. A taklat zomzelna uah, Manipur government in hiai appointment process pen tuni tan a lettang lai ziak in MSCB a dia Central in dangka Rs 41.62 crore sanctioned a bawl leng tuni tan in luikhiak theih hinailou chi uhi.

 


Employee-te’n ahihleh tukum August 19 in Central government kiang ah chitna kichiantak nei officer khat bank Executive Officer a guang dia ngetna ana bawl khinta uh hi’n thusuak in taklang hi. (NNN)

 

 

Mizoram ah Swine fever kithehzak
AIZAWL, Nov 8: Mizoram state sung a vokte lak ah ganhing natna ‘Swine fever’ kichi kithehzak a, state sung a vok tamtakte’n hiai natna hileng mankha uh ahihdan tuni thusuak in taklang hi.

 

 

Thusuak in a taklat dan in, Mizoram state a vok khoite’n ahihleh Myanmar a kipan vok tam taktak lalut zel ua, tua dungzui in Myanmar a kipan vokte’n state sung a hichibang natna hii hon pawlut uh hidan in thusuak in taklang hi. Mizoram state government in hichibang report a theih phet in thuthak suahkhiak ahih mateng Myanmar a kipan vok lalut nawnlou ding in thusuah bawl ngal hi. (NNN)

 

 

HW ‘gang’ member 4 matkhiak in om
SHILLONG, Nov 8: Ni bangzahhiam paisa a East Khasi Hills district, Sohiong area a meihol pua truck driver khat gun-point a suamtu highway gang member 4te zan nitaklam a matkhiak a om uh ahihdan thusuak in taklang hi.

 


District Superintendent of Police (City) Vivek Syiem in tuni a thuthaksaite kiang a, a genna ah, ni bangzahhiam paisa a hiai highway gang member-te gamtatna toh kisai naktak a suizui ahihnung zan nitaklam in mi 4 matkhiak in om ua, midang khat omlai dia gintak himahleh a omna theihzoh hinailou chi hi.

 


Matkhiak a om mi 4te ahihleh, kum 31 a upa, hichibang thil gilou sem dia plan posuahtu, Pynshai Rani, Halgis Lyngdoh (48), Rukmon Gurung (33) leh Bankerlang Khardewsaw (22) chihte hi ua, amaute kumlui in leng suangkulh a khum himahle uh sawtlou nung a bail khiak in om uhi. Highway gang-te heutupa, Rani ngial in hichibang gamtatna ziak a case 6vel neita ahihdan leng Vivek Syiem in gen hi.

 


Thusuak dang in a taklatna ah, November 3 ni in coal truck driver Dewansing Mawlong leh handyman Kitboklang Mawlong-te suangmeihol paw ding in Shillong a kipan Nongstoin zuan in tai ua, Shillong khopi a kipan gamlalou a tun un thau leh temta tawi mi bangzahhiamte’n a mai uh puan a tuam in ana suam ua, sumtang Rs 69, 320/- laksuh uhi.

 


Kumlui November 22 ni inleng Rani tel in highway gang member 4 matkhiak im om ua, amaute ahihleh East Khasi Hill District sung mah a national highway a tai garite suamtu a ngoh in ana om khinta uhi. Zan nitaklam a matkhiak a om mi 4te a kipan thau khat leh mobile phone gukthoh 5 muhkhiak in om a, himahleh thau pen bel a lem (toy gun) ana hi a, hiaite banah gang member-te’n a zat uh local taxi (ML 05 E 9966) leng muhsuah a om ahihdan police SP a kipan thusuak in taklang hi.

 

SP in a gen zomzelna ah, hiai gang member-te matkhiak hilou hile uh maban ah hichibang sual gamtatna tamtak omlai dia gelkholhsa nei ua, amaute national highway a tai gari-te tup pipen in nei uhi. Mi 4te ahihleh Indian Penal Code (IPC) (daicoity) section 395 dungzui a matkhiak hi ua, police custody ah ni 6 sung hun zang phot peuhmah ding uh chi hi. (NNN)

 

 

Tuni Thupi


Ahihhang in, huailam thu ah zaw theh tawm in a at tawm na ding, theh tam in a at tam na ding hi. (2 Korinth 9 : 6)


Editorial


Hiamgamna leh Manipur


Jammu & Kashmir banah India gamsung a hiamgamna (terrorism) thiltung tamna pen Manipur ahi mai diam chihtheih ding phial in tukum sunglel inleng Manipur ah bomb puak 12 vei mahmah omta hi. Tukum sung a Manipur a bomb hihpuak a omte a tung in Manipur pawlammite tupna deuh leh security force-te tupna ahi de aw chihtheih di'n om mahleh tunaizek a thiltungte a kipan in khentuam omlou a hiamgamna nasep omman in bangtupna hiam chihding in om hi.

 


2013 Indian Republic Day in Manipur Rifle Complex leh Imphal khosung Konung Mamang Leikai ah bomb puak om a, sihna leh liamna tuak bel omlou hi. March 15 in Imphal- Moreh road a Mongjang khokiang a Assam Rifle patrolling paite beih ahihna uah sepaih 4 liam uhi. March 22 in Thoubal District sungYairipok Heidroipokpi area a 15 Assam Rifle pawl bomb toh beih in om ua, huai ah sepaih 2 in liamna tuak uhi. May 4 in Imphal West district sung Chingmeirong a bomb puak ziak in nnasem a om Non-Manipuri mi 5 liam uhi. May 21 in Thoubal district a Pallel Police Commando Complex kiang ah bomb hihpuak hinawn a, a liam bel omlou hi. June 27 in Imphal West district Uripok Tourangbam Leikai a bomb puak ziak in non-Manipuri mi 2 a sih banah midang 3 liam hi. August 10 in Chief Minister O Ibobi Singh tenna inn gei ah bomb puak mahleh liamna tuak omlou hi. August 15 a Indian Independence Day lopna ding mun Moirangkhom Petrol Pump kiang ah bomb puak a, liamna tuak bel omlou hi. September 13 in Imphal, Nagamapal area a bomb puak ziak in Manipur pawlammi 9 si a, 4 liam hi. October 29 in Bheirodan Hindi High School kiang Market area a bomb puak ziak in mi 5 liam a, gari khat kisia hi. Hiai mun bel Manipur CM tenna mun a kipan km 1 vel a gamla ahi hi. October 30 in Imphal West district sung Yaiskul area a bus stand/ station kiang a bomb puak ziak a driver nih in sihna a tuah banah midang 3 liam uhi.November 6 in Thoubal district Pallel police station akipan metre 200 vel a gamla mun a bomb puak ziak in non-Manipuri mi 1 si a, midang 6 in liamna tuak uhi. Hiai ni mah in North AOC ah Imphal-Guwahati passenger bus seat No. 21 nuai ah bomb hattak khat muhkhiak in om hi.

 

 

Hiai bang a hiamgamna thiltungte ziak in state sung mipite a ding in muanna leh bitna om nawnlou hi'n kilang hi. October 30 a bomb puak ziak a gari hek a nekzong Manipur mi mahmah 2 in sihna a tuah hun ua, mipi paikhawmte'n "Poikhoihlou leh mawhna neiloute thahna in, na deih uh hon petuan ding hiam?" chih dotna a bawl bang un, lungkimlouhna leh deih ngente'n leng mihing hinna a manphatdan thei a, mawhna neiloute sisan zang a deih nget tawpsan deihhuai hi.