You are here: HomeRSS FeedsThe Lamka Post

The Lamka Post | March 07, 2017

Tuesday, 07 March 2017 16:13

‘Economic Blockade’ BJP-te patkhiak ahi: MPCC President

IMPHAL, Mar 6: Manipur Pradesh Com­mittee (MPCC) Presi­dent TN Haokip in BJP-te thukkikna dan a, tuni Seppatni nitak­lam a Congress Bhavan, Imphal a thuthaksaite kiang a, a gendan in, BJP kichi nampai leh kikhen­zak ding deih party leh state a namkal muanna suksiat sawm a panla ahi uh chi’n gen hi.

 

MPCC President in a gendan in, state mipite tung a haksatna liantak tuntu economic blockade pailel leng BJP-te patkh­iak ahi chi’n gen hi. PM Modi in Imphal a elec­tion campaign a hong neih lai in ‘BJP in thu­neihna a luah leh, ni 3 sung in economic block­ade lakhe ding’ chi’n gen a, hichibang a PM khat in kampau a neihna ziak dong hi. State Congress president in a genzelna ah, BJP in thuneihna a luah leh ni 3 sung eco­nomic blockade lakhe ngal ding uh hidan a PM kampau in BJP leh mipite tung a haksatna liantak tuntu UNC kal a kizopna hoihtak om chihna hi­mailou ding hiam chi’n gen hi.

 

Congress party in thuneihna luahkik nawn ngei ding ahi chi a chiam kawm a, TN Haokip in a gendan in, kum 15 sung in, Con­gress party in doudalna leh puakgik nasatak nuai ah state khantouhna ding in naktak in nasem­khia chi’n gen hi. A paisa kum 15 sung in, ni sat ni, vuahzuk ni leh meipi a kai ni tamtak palsuak in om a, huchi kawm pipi inleng state khantouhna ding in kong bangkim ah panlak in om chi’n gen hi. BJP in mipite tung ah haksatna chi tuh a, mi tamtakte tung ah policy khenkhat sum note sihsakna,Manipur a economic blockade leh thil dangdangte pansan in khitui tamtak luang­sakta chi’n gen hi. BJP in a sepkhiak develop­ment tamzawte UPA government hunlai a kipankhinsa ngen ahi a,BJP government in min khekna kia sem­suah chi’n TN Haokip in gen hi. March 11 chiang in bangkim chiangvek ding chi’n gen a, con­gress party nungthuap tengteng tung ah leng kipahthu gen hi.

 

 

Manipur polls 2017:

2nd phase campaign hunchiam beita

IMPHAL, Mar 6: Manipur assembly elec­tion 2nd phase a ding campaign hun tuni nitak­lam dak 3 beita hi. March 8 a vote khiakna om ding ah seat 22 om hi. Mani­pur in House ah member 60 nei a, huai lak a 20-te Scheduled Tribes (ST) te’ a ding a koihtuam ahi.

 

Hiai campaign hun ah Congress leh BJP in Manipur issue, economic blockade, ‘Framework Agreement,’ unemploy­ment, “anti-tribal bills”, Inner Line Permit (ILP) leh Manipur tungtang thu tampi ah kidemtuah uhi.

 

Seat 22 omlai ah can­didate 98 om ua, huai ah numei 4 tel uhi. Manipur Election Watch leh As­sociation for Democratic Reforms (ADR) dungzui in, state assembly elec­tion 2nd phase a candi­date 29-te crorepati hi uhi.

 

Manipur ah Con­gress in a kizom in term 3 lenta a, 2012 election ah seat 42 luah hi. BJP in Manipur ah lampi sial sawm in panla lel hi.

 

2nd phase a mipi’ bil­doh leh ngaklah mahmah ahihleh Chief Minis­ter Okram Ibobi Singh leh right activist Irom Sharmila-te Thoubal con­stituency a, a kimaituah na ding uh ahi. Thoubal ahihleh Chief Minister Ibobi Singh khotualna hi a, March 8 in vote khiak­na om ding hi. Sharmila in BJP candidate, L Bas­anta Singh leng maituah ding hi.

 

Polling station 1151 a voter 10,79,369 te’n, Lilong, Thoubal, Wang­khem, Heirok, Wangjing Tentha, Khangabok, Wa­bagai, Kakching, Hiyan­glam, Sugunu, Jiribam, Chandel (ST), Teng­noupal (ST), Phungyar (ST), Ukhrul (ST), Ch­ingai (ST), Karong (ST), Mao(ST), Tadubi (ST), Tamei(ST), Tamenglong (ST) leh Nungba (ST) constituency-te ah po­litical party tuamtuamte’ maban ding gelsak ding uhi.

 

Congress leh BJP in candidate 22 tuak nei ua, CPI in 2, Trinamool Con­gress in 6, NCP in 1, recognized par­ty candidate 12, unrec­ognized party candidate 24 leh Independent can­didate 24 te 2nd phase kitelna ah kitaiteh ding uhi.

 

Hiai hun a Con­gress candidate tallang mahmahte ahihleh K Meghachandra, M Ok­endro, Th Debendra, D Korungthang, Victor Keishing, Preshow MK Shimray, DD Thaisi, Ab­dul Nasir-te hi uhi.

 

Naga People’s Front (NPF) Manipur Unit President Awangbow Newmai leng 2nd phase kitelna ding ah tel hi.

 

2nd phase kitelna ding a BJP candidate tal­langte ahihleh L Basanta, SS Ollis, Sword Vasum, Paojelet Touthang, Fran­cis Ngajokpa, Z Kikhobou Newmai, Samuel Jendai, Adim Pamei leh Vunza­gin Valte hi uhi. Vote simna ahihleh March 11 in om ding hi.

 

 

Mar 11 zingkal dak 8 in vote sim ding

LAMKA, Mar 6: R Sudhan, Returning Officer, 58-Ccpur (ST) AC leh 59-Saikot AC in tuni a theih­sakna a bawlna ah, Conduct of Elections Rule, 1961 Rule 51 dungzui in, March 11, 2017 zingkallam dak 8 a kipan in 58-Ccpur (ST) AC leh 59-Saikot AC a vote simna Hall No. 1, Ground Floor, DTC Hall, Tuibong a kipan ding hidan in taklang hi.

 

 

ZRO, JAC-AATB, NPP, BJP leh candidate tuamtuamte’n mohpaih thu puang

LAMKA, Mar 6: Lamjang khua a om Mr. Thangmuansang s/o Ch­ingpam leh Mr. Thang­suanmung s/o Ning­khochiin of Lamzang, kilawmloutak a innlum a pan pikhia a, a soisakna tung uah Zomi Re-unifica­tion Organisation (ZRO) in poisa leh mohpaihna sangpen a mohpaih ahih­dan taklang hi.

 

Huai ban ah ZRO/ ZRA min suang a hiai bang a gamtangte enliam maimailou ding ahihdan taklang kawm in ZRA/ ZRO minsiatna ding a thu­vektute leng nouneltak a suichet hiding leh kichetna diktak a om keileh a tung ua thiltung bangbang moh a kipuak uh ngai ding hi’n taklang uhi.

 

Hiai thiltung pen election toh kisai ahihziak in, a kisaipih khak party-te’n amau kal a kihoulem a sufel ding in ngen ua, maban a thusia-lasia khatpeuh om chiang a thudik kanchian masa­lou a ZRO/ZRA tangtak a mohsak a omsek pen leng chimtak huaisa mahmah­ta uh ahihdan Ministry of Information & Public Re­lation, ZRO in taklang uhi.

 

Huailou in, Joint Ac­tion Committee Against Anti-Tribal Bills (JAC) in 11th Manipur Legisla­tive Assembly elections first phase siangthou leh thovengtak a neih ahi­htheihna ding a tribal sung a saptuam leh pawlpi tua­mtuam ban ah JAC pan­lakna kithuahpih mipite tung ah kipahthu gen hi.

 

Zan nitak a Lamjang kho mi 2 soisak a omte thuakpih thu taklang kawm in hiai thiltung toh kisai a kigolhte leh tulel a Manipur singtangmite lak a kipumkhatna a po­imoh laitak a hiai bang a dankalh a gamtatna ding a lemgeltu mohpaihna sangpen a mohpaih ahih­dan taklang uhi. Manipur Govern­ment leh pawlpi tua­mtuam in singtangmite dikna leh hamphatna a nelhsiahsak uh singtang mipite’n enkhe mailou a, tualsuak singtangmite’n mahni a kivaihawmna a ngahna ding ua pang­khawm a panla zaw ding in JAC-AATB in ngen hi.

 

Tuaban ah, 58-CCpur AC a NPP Election Agent in thusuah a bawlna ah, Thangmuansang leh Thangsuanmung soisak­na toh kisai in khut khat­ute naktak a mohpaih uh ahihdan taklang hi. Hiai thu ah NPP in kisaikhak­na a neikei a, hiai bang a gamtangte thuneitute’n mankhia a dan bang a vai­hawm ahih theihna ding a naktak a panla hizaw dan in taklang hi.

 

Central Election Committee for BJP 58-CCpur, AC in thusuah a bawlna ah mi 2te ganh­ing kisoisak bangmai a soisak a ompen mohpaih­na sangpen a mohpaih uh ahihdan taklang kawm in pawlpi’n thusuah a bawl dungzui in hiai a kigolh khate tung a a kituahpih bang uh gawtna peding in ngen uhi.

 

Hiaite ban ah, CT Lian Central Election Committee leh Paukhan­suan Election Commit­tee te’n leng hiai thil tung mohpaihna sangpen a mohpaih in migiloute a kituahpih bang gawtna pe ding in ngen uhi.

 

 

Manipur HC in ‘UNC economic blockade’ dan kalh chi’n puankhum

IMPHAL, Mar 6: March 3, 2017 a Chief Justice RR Prasad, N Ko­tiswar leh Kh Nobin-te maikaih Manipur High Court full bench in thu­pukna a bawlsa dung­zui in, tuni Seppatni a, Manipur High Court in, thukhenna khat a bawl­na hun ah, United Naga Council (UNC) in a to­sawn ‘economic block­ade’ pailel ‘dan kalh’ chi’n puankhum hi. Tua toh kiton in, HC in state thu­neite DGP, IGP leh IG ban ah GOC of Assam Rifle-te kiang ah, state a niteng van poimohte thovengtak a laklut a hi­htheihna ding a panla ngal ding inleng theisak hi.

 

High Court in a tak­latzelna ah, state govern­ment inleng a poimohleh, highway dung a buaina om theihna ding munte ah, 144 CrPC koih ding in panla ding chi’n gen hi. A paisa kha 3 vel a kipan in, Manipur High Court in UNC tosawn economic blockade thubuai toh kisai enkai hi. Manipur HC inleng Centre kiang ah, high­way dung a venbitna peding a Manipur a se­curity company 72 sawl­lut ding in ngen hi. UNC in blockade pansan a mipite tung a haksa li­antak tun a,politics a tup leh ngim a neihte uh tangtun ding a pan a lakte uh state deihdan hi ngeingeilou ding a, state a khantouhna nasepnate leh masawnna dingte daltu lianpen hitou den ding hidan in Court in ngaihdan nei hi.

 

Ibobi government in district thak 7 a bawlkh­iak deihlouh lahna in November 1, 2016 a ki­pan in UNC in Imphal- Dimapur road (NH-2) leh Imphal-Jiribam road (NH-37) dung ah hun­chiam omlou economic blockade pankhia hi.

 

 

Kuki helpawlte Kang­pokpi ah kikaptuah

KANGPOKPI, Mar 6: Tuni nitaklam in Kang­pokpi district sung a om Kuki helpawl hidia muanmohte kikaptuah uhi.

 

Thiltunna mun ahi­hleh Kangpokpi district, Gamnom-Sapermiena Police Station a kipan km. 18 vel a gamla a om Khengjang khosak hi a, nitaklam dak 4:30 vel a thiltung ahihdan thusuak in taklang hi.

 

Kuki Revolutionary Army leh Kuki National Front (KNF) te hidia muanmoh in om uhi. Pawl 2 te ahihleh Centre leh Manipur Govt. nuai a Suspension of Operation (SoO) nuai a om hi uhi.

 

ECI thupiak dungzui in, helpawl SoO nuai a omte, Manipur assembly election sungteng pawt khe lou a, a camp ua om dia thupiak hi uhi.

 

Khengjang khomip­ite’ gendan in, dakkal 1 sung khawng kikaptuah ua, huai ah puakthei thil leng zat in om chi uhi.

 

 

DM in Section 144 CrPC puang

LAMKA, Mar 6: R Sudhan, District Magistrate, Ccpur in tuni, March 6, 2017 a ‘order’ a suahna ah, SP/Ccpur a pan theih­sakna dungzui in, Lamka khopi sung a bik in 58-Cc­pur AC sung ah election zoh a dan leh thupiak din­mun in siatlam a manoh ban ah lemna leh muanna kise thei dinmun a om hi’n taklang hi. Tua toh kiton in thagum suahna leh thil deihhuailou omkhak ding venna in Section 144 (2) of Code of Criminal Proce­dure (CrPC) 1973 puang hi.

 

District Magistrate in tuni nitaklam dak 4 a Lamka khopi sung a bik in 58-Ccpur AC sung a Sec­tion 144(2) CrPC a puan toh kiton in thuthak om nawn masiah Lamka khopi sung ah mun khat a mi 5 sang a tamzaw omkhawm phallouh leh galvan leh hiamhei tawi a vakkhiak phal hilou ahihdan taklang hi. Himahleh hiai thupiak in security force leh law enforcing agency-te huamkhalou hi.

 

 

SSPP-GHQ in Exe Com­mittee a pan tawpsak

LAMKA, Mar 6: SSPP/GHQ President Li­anzapau Samte in tuni, March 6, 2017 a theih­sakna a bawlna ah, “11th Manipur State Assembly Election 2017 ding toh ki­sai a SSPP Exe Commit­tee khatpeuh a hihna nei peuhmah khentuam nei a kipei theilou ding leh political party khatpeuh a tanvou nei theilou ding leh tuabang a kipei nuam a om leh ki-awngsutna a piaklut ding” chih theih­sakna kibawl hi

 

Himahleh hiai thu­suah palsat a electoral politics a, a langtang a ana kipei leh mi pimang­na case a minloh khak a om Mr Thangsuanlal leh Thangkhanlun, Siamsin­pawlpi Ki-ukna Dan Bupi a Article 5(iv) pansan in SSPP/GHQ a Exe Com­mittee member a hihna uh leh pawl dangdang a SSPP palai ahihna ua pan tuni, March 6, 2017 a pan tawp­sak ahihdan uh taklang hi.

 

 

25 AR-te’n KNA cadre 4 man

LAMKA, Mar 6: Police a pan thutut kingahdan in, March 3, 2017 nitak dak 8:20 vel in 25 BN Assam Rifle-te’n Sangaikot Mobile Check post ah KNA cadre 4 leh galvan mankhia ua, amaute March 4, 2017 zinglam dak 2:30 in Po­lice ah pekhia uhi.

 

Mat a om KNA cad­re-te ahihleh Sgt. Mang­khup Tungdim (45) s/o Tongchinthang of Ka­mdou Veng; Sgt. Lunk­holen Haokip (30) s/o Ngamkholun Haokip of Bijang Ccpur; Sgt. Thangtinlal Khongsai (30) s/o Thangjang of Sangaikot leh Pvt. Kam­minthang Haokip (24) s/o Jangpao of Zalenmun hi ua, amaute a pan in AK -56 rifle 2, a tang 142 leh magazine 2, 9mm pistol 1, a tang 6 leh magazine 1 leh Bolero MNO5A/4868 mankhia uhi.

 

Amaute ahihleh zan in Court ah dingsak ua, court in Police custody a ni 10 sung om ding in the­isak hi. Hiai thu ah Police in FIR No. 13 (3)2017 CCP PS, U/S 400/34 IPC & 25(1- C) A Act chiamteh uhi.

 

 

Mi 2 pimangtute lak a mi 2 police in man; YPA in ni 2 sung hun pia

LAMKA, Mar 6: Police a pan kizadan in zan, March 5 nitak dak 8:30 vel in meltheihlouh muktuam pasal 5 vel in Lamjang kho mi 2; Thangmuansang (27) s/o (L) Goukhansuan of Lamzang, tulel a EBC HQ Dorcas Hall a Dak Runner leh Thangsuan­mung (18) s/o (L) Zamkhanpau of Lamzang, Lamjang khosung a pan pikhia in Gypsy in pua ua, Lingsiphai khokhung ah nakitak a, a soisak nung un taisan uhi.

 

Thutut kingah dan in, vangphat huaitak in soisak a omte Lingsiphai tan liam-le-bai kawm in tungthei ua, huai ah inn khat a lut in panpihna ngen ua, huai apan phone tungtawn in a innkuanpihte uh thuzak thei in, Lamjang puaktung in om uhi. Lamzang a pasal nih pi­mang thu in zan nitak in Lamka khopi sung leh a sehvel zelsuak ngal a, 58-Ccpur AC sung a candidate-te ban ah mipi tamtak in Lamjang khua kidelhhuan uhi.

 

Hiai hun ah Young Paite Assn (YPA) GHQ leh Tuailai1434Pro makaite panlakna in buai­na huaisetak omthei dinmun himahleh thil dei­hhuailou bangmah tunglou in om thei hi. Hiai bang a mohna neilou nautangte pimang a, gan­hing bang a hehpihna bei a kisoisakna mohpai­hna leh mi pimangtute kipekhe ding a phutna in YPA-GHQ in tuni, March 6, 2017 zingkal dak 7 a kipan nitaklam dak 5 tan Lamka khopi sung ah ‘Total Shutdown’ puang uhi.

 

Hiai thiltung toh kisai in SP/Ccpur makaih in District Police-te’n naktak a panla in tuni sun dak 12 vel in Khomawi ah mi pimangtute lak a mi 2 - Thangsuanlal (31) s/o (L) Goukholian of Elim Veng, New Lamka, Thangnem Street leh Thangkhanlun Samte (31) s/o Lalzahau Samte of Beaulahlane, Central Lamka mankhia in Moirang Police Station ah koih uhi.

 

Mi pimangtute lak a mi 2 matkhiak ahih uh toh kiton in SP/Ccpur in amah office cham­ber ah thuthaksaite sam in thil omdan taklang hi. Hiai hun a SP/Ccpur in a genna ah, mi pi­mangtute lak a mi 2 matkhiak a omta ahih­man in amau tegel tungtawn a midangte leng matkhiak hipahta ding ahihdan gen in mipite’n buaina bawllou ding in ngen hi. Huai ban ah hiai thu ziak a buaina huaise zaw omlouhna dia kuapeuh in panla ding leh hiai thiltung toh ki­sai police khut a mohpuakna pe ding in ngen hi.

 

SP/Ccpur in thuthaksaite a kimuhzoh in YPA-GHQ makaite leng sam a, mi pimang­tute lak a mi 2 matkhiak a omta uh ahihdan gen in hiai thiltung toh kisai a kigolh midangte leng matkhiak hipahta ding ahihman in mip­ite thangpaihna leh sousanna bengdai ding in ngen hi. Tua toh kiton in YPA-GHQ makaite’n leng SP/Ccpur kiang Lamjang khomi nih pi­mang leh soisakna toh kisai a kigolh midangte leng ni 2 sung ngei a mankhe ding leh hiai thil­tung toh kisai a lemgeltu leng mankhe ding in ngen uhi. Huai ban ah hunchiam sung a mat­khiak ahihkei uh leh kiphinna khauhzaw pat­khiak hiding a, huaiziak a thil deihhuailou tung a om leh YPA-GHQ mohna hi­lou ding hi’n theisak uhi. Hiai thu ah Police in FIR No. 14(3)2017 CCP PS, U/S 365/34-IPC & 25(1- C) A Act chiamteh uhi.

 

Tuni a ‘Total Shut­down’ sung in mipi tam­tak Elim Veng, New Lamka leh Beaulahlane a Thangsuanlal leh Thang­khanlun Samte’ tenna inn mun ah va pai in lungkimlouhna va tak­lang ua, mipi sousangte’n a inn tanpha uh suksiat­sak sawm mahle uh mi inn luah a khosa ahihban uah Pastor leh Saptuam Upate ban ah YPA Val- Upate’n mipi sousangte naktak a, a khouh ziak un thil deihhuailou bel tung­zenlou hi.

 

Hiai toh kisai mah in tuni sunnung dak 2:30 in New Lamka YPA Hall ah mipi paikhawm in meeting nei ua, huai ah YPA makaite leh Tuailai1434Pro makaite’n thugen ua, mipite’n heu­tute vaihawmna ngak hamham ding in mip­ite ngen uhi. Hiai hun a paikhawm mipi tamzaw deihna bang in Police in mi pimangtute ni 2 sung a, a matkhiak teitei ding leh hiai thiltung toh kisai a lemgeltu leng matkhiak a, dan toh kituak a gawt­na piak ding in thukim uhi.

 

 

Sharmila in door to door campaign nei

Imphal, March 6: AFSPA zukkik ding ngen a kum 16 sung an ngawl­na khawlsan a politics zom, Anti-APSFA crusad­er Irom Chanu Sharmila in tuni’n Thoubal Assem­bly constituency ah door to door campaign nei hi. March 8 a Manipur poll phase 2na ah PRJA can­didate Sharmila in Thou­bal Assembly constitu­ency ah CM Okram Ibobi Singh kibeihpih ding hi.

 

 

Sesawng ah inn 1 kangtum

AIZAWL, Mar 6: Tuni nitaklam dak 2 vel in, Sesawng Venglai a om, Pu Khuma inn kang a, innsung van lakkhiak man omlou in kangtum hi.

 

Innkat lai in, inn ngaktu kuamah omlou a, innkatna ziak theih hilou hi. Innkang a theih phet un, khosung mipi’n phel­hmit sawm in pan nasa­tak in la mahle uh, mei­kuang a hatluat ziak in phelhmit zoulou uhi. Hiai toh kisai in si-le-liam zak ding omlou hi.

 

Khosung mipite’n tuahsiatna tuakte panpi­hna nna tuni in pan ngal uhi.

 

 

BJP in Manipur Govt bawl ding: Hemanta Biswa

IMPHAL, Mar 6: Assam Finance Minister Hemanta Biswa Sharma in tuni a, a genna ah, 11th Manipur assembly election a BJP in hatpen (absolute majority) hi­hna ngah ding leh Mani­pur a government thak bawlkhe ding hidan in gen hi.

 

Hiai thu ahihleh Hemanta in tuni a BJP Manipur Pradesh of­fice, Nitaipat Chithek a thuthaksaite kiang a, a gen ahi. Hiai hun a Hemanta in a genna ah, BJP leh NPF in kizopna neilou leh BJP in NPF zohkhiak sawm a panla ban ah Manipur assem­bly election second phase om ding a Hill Area a BJP in NPF zou ding ahihdan gen hi. Huai ban ah NPF ahihleh Ibobi govern­ment toh kibang ahih­man in 11th Manipur as­sembly election a NPF in seat khat a leng vualzoh­na ngahlou ding hidan in gen hi.

 

Hemanta Biswa Sharma in a genzelna ah, BJP in Chief Minister Okram Ibobi Singh gov­ernment phukpai ding leh huai mah bang a Ma­nipur state sung a khan­touhna nasep daltu lian pen leh state sung a thil tuamtuam a buaina tuntu NPF leng zoukhe lai ding hidan in gen hi.

 

Huailou in, BJP chief ministerial candidate tungtang Hemanta in a genna ah, March 11, 2017 a election result puankh­iak ahihnung March 12 chiang a BJP Manipur in BJP National makaite toh meeting a neih zoh chiang ua Chief Minister ding guang pan ding uh hidan inleng gen hi.

 

 

Tamenglong district a ding polling per­sonnel leh security-te thotkhiak in om

IMPHAL, March 6: Tuni Seppatni in huihpi toh kithuah vuahpi nasa­tak zu mahleh, March 8 a Maipur poll second phase a ding a Tamei leh Nungba Assembly constituency a duty ding in, Tamenglong headquarters a kipan in polling personnel leh po­lice security-te sawlkhiak in om uhi.

 

Tamei A/C a poll­ing station 82 lak ah, 52/1-Makuilong, 52/2-Lemta, 52/22-Ka­tiang, 52/23-Katangam leh 52/62-Puram a poll­ing personnel leh police security-te thotkhiak in om uhi. Nungba A/C a ding in, polling station 42 lak ah, polling sta­tion 4- 54/39-Sempat Gangte, 54/40- Tuiphai, 54/41-Gallen leh 54/42- Chongmun-te ah thot­khiak in om uhi. A vek in polling personnel 50 te’n amau polling station ding chiat uh manoh ding in Tamenglong headquarter nusia uhi.

 

 

Numei thangbawl FB Fake Account zangtu pasal 1 mat in om

Imphal, March 6: Cyber Crime Unit, Imphal West in social networking site facebook a fake account zang a nungaknou vuaktanglem bawltawm khat koih a, suminsetu fake account user Paokai Haokip (24) years s/o (Late) Khaihao Haokip of N. Zalenphai Village, Churachandpur mankhia uhi.

 

Police thusuak dung­zui in, hiai thu toh kisai a February 23, 2017 a com­plaint ngah a hih dung­zui in Cyber Crime Unit, Imphal West-te’n IPS U/S 354-D/506/500 IPC & 67-A IT Act pansan in thubuai chiamteh in suizui ngal uhi. Suizuina a neih sung un, ngawh a om in IDEA number zang a, a bawl fake Face­book account a thu hai­huai taktak koihkhia a hihdan theikhia uhi. Zan Pathianni nitaklam dak 5 vel in Cyber Crime Unit, I/W-te’n a tenna inn a kipan in, SIM Card toh kithuah mobile handset 1 toh mankhia in, OC IPS khut ah pekhia uhi.

 

 

Lok Sabha Speaker lui Rabi Ray mualliam; PM leh LS Speaker in sunthu puang

Cuttack, Mar 6: Upatna lam toh kisai a natna tuamtuam ziak a ni bangzahhiam sung ki-enkol so­cialist makai minthang leh Lok Sabha speaker lui Rabi Ray(91) tuni Seppatni in Cuttack Hospital ah mualliam hi.

 

Rabi Ray ahihleh November 26, 1926 in Khurda district, Odisha a Bhan­ragarh khua ah piang a, January 1979 a kipan January 1980 sung Morarji De­sai ministry ah Union minister of health and family welfare in pang a, kum 1989- 1991 sung in 9th Lok Sabha Speaker in pang hi. Kum 1991 in Kendrapada, Odi­sha a kipan in 10th Lok Sabha member ding in telching in om nawn hi. Com­mon Wealth Speakers Forum Chairman lui leng ana hi hi.

 

Chief Minister Naveen Patnaik in Ray sih sunthu puangkawm in, veteran socialist makai suanhuaitak khat ahi chi’n gen hi. Lok Sabha Speaker khat a hihna dungzui in, Mr Ray in Inpi a gamtat kho­hei dingdan hoihtak leng phutkhia chi’n gen hi. Prime Minister Narendra Modi inleng Lok Sabha Speaker lui Rabi Ray si­hna toh kisai a puaknat thu gen hi. Makai kipumpiak leh MP zahtak huai mahmah khat ahi chi’n gen a, sunthu leng puang hi. Lok Sabha Speaker Sumitra Mahajan inleng Lok Sabha Speaker lui Rabi Ray sih sun petmah a hihdan gen hi.

 

 

 

 

 

 

NEWS TOMKIM

 

PS a complaint omte enchian

LAMKA, Mar 6: Tuni’n DC/CCPur office ah RO-te makaih in March 4, 2017 a 11th Manipur assembly election first phase a 55-Tipaimuhk AC sung a complaint omna 55/25 Patpuimun, 55/28 Parbung A, 55/24 Purpui leh 55/18 Thingpuikuol a thil omdan hoihtak in enchian uhi. Hiai hun ah polling booth sung a Mobile Video hoihtak in en ua, complaint toh kisai a chetna muh ahihlouh ziak in ahi bangbang in paisuak hi. Huailou in, 56-Thanlon AC sung a polling station 14 a pan complaint omte enchian ua, hiai thu ahihleh hiai thugelh ahihtan in bang thutanna om hiam chih theihchet hinailou hi.

 

 

UTLA Gen Secy kaplup in om

LAMKA, Mar 6: Muanhuaitak a pan thutut kingahdan in, Thanlon Sub-Division sung a om Songsang khua ah UTLA General Secretary Haupu Singsit @ Abunidar (52) h/o Hoihnu Singsit of Tuijang village, Ccpur kaplup in om hi. Haupu Singsit’ luang paw ding in tuni nitaklam in KKL leh KSO makaite’n Lamka nusia in Songsang zuan uhi. UTLA General Secretary ahihleh March 4, 2017 a 11th Manipur assembly election first phase neih a om a Thanlon AC a candidate khat a dia vote capture a sawm pen UTLA cadre leh mipite’n lem a saklouh ziak ua kaplup a om hi’n thutut kingah hi.

 

 

Pimang leh vuakliam a omte ki-etkolna Govt in pe ding

LAMKA, Mar 6: Tuni nitaklam dak 5 in R. Sudhan, IAS, DC/ Ccpur makaih in YPA-GHQ makaite’n zan nitak a pawl khat in Lamzang khomi pasal 2 a pimangnung ua a soisakliamte uh tulel a Lamka Damdawi Inn a etkol a omte veh uhi. Hiai hun a DC/Ccpur in a genna ah, pimang leh vuakliam a om tegel damdawi inn a etkol a omsung ua senna om tengteng Govt in piaksak ding leh Govt leh private a sepna nei ahih ua leleng a seppeihma tan uh a nitha uh hisap a piaksak hiding hi’n gen hi. Huai ban ah mi pimangtute lak a mi 2 matkhiak a omta ahihman un, hiai toh kisai a kigolhkha midangte leng YPA-GHQ in ngetna a bawl bang a ni nihsung a matkhiak hiding chi hi.

 

 

 

 

 

 

…for more detail : here