You are here: HomeColumnsKimbawi' PaMi Vantang

Mi Vantang

Written by  Kimbawi’ Pa Published inKimbawi' Pa Friday, 28 August 2015 01:46
Mi Vantang

~By: Kimbawi’ Pa

 

Mihing piansualna nei lou a piangte mi vantang hi’n ka koih mai hi. Hih le ahi tangpi deuh uh. Himahleh mi vantang chiatchiat i kikhai thei mahmah uhi. Khawsakna toh kisai a niam mahmah khenkhat mi vantangte’ tung a a kuhkalna ziak un a leng mai uhi. Huailou in, mi vantang tung a leng dia kilawm tampi mihai suak ka theih a tam mahmah zel hi. Pathian in hiai leitung i hinkhua di uh a hon sehsak i zatdan uh a lamdang thei mahmah hi. Hiai ka thugelh tuailaite’ a dia ka gelh deuh ahi a, kibawlna dia a zang thei a om leh ka kipak mahmah di hi.

 

Khawng kidek deuh di a koih nung a ka gelh ahi zawmah hi. Hilele a gelh peih nawnlou a kikoihdap mai a hon koih na om khak di uh khualna a hiai thu gelh a hon post hamham ka hi.

 

Tuailaite ngim deuh a ka gelh himahleh, Mizoram a om ka hihman in Mizoram Paite pau meuh in gen leng, ka ta tuailaite phei in chu a sim teuh sin kei uhi. Amaherawhchu mi dang in a sim khak uleh, chih ka ngimna ahi.

 

Aizawl ka lut tung ua, SSPP Aizawl Headquarters conference a neihna uah ka va kihel sam hi. Report le zogam.com leh zogamonline.com ah k’on gelh ahi. Huai ah doctorate degree la 5 om in ka thei a, Mizoram Civil services a lohching 5 vel mah a om uhi. Ka kipak mahmah hi. Ka kipahpih lailai hi. Huaite kia hilou in All India Services khawng hi zawmah leh ka kipahna a lian diak lai di hi. Mizoram mite himhim in central service a ngaihsak kei ua, ei mite bek in ngaihsak le uh chih ka gen masa ut lai hi.

 

Ei, Paite mite’ lak a mi vantang nih, a hi a ka ngaihte’ tungtuang k’on gen masa di. College kai a lecture ngaikhia a guidance neilou mi nih Civil Services gelhching k’on taklang di. Chinkhenthang Hanghal in college kai hetlou in IAS a gelhching a; Vungzamuan Valte in college kai hetlou in IRS (CBEC) a gelh ching hi. Tua Mizoram leh Manipur khawng a All India Services leh State Civil Services khawng gelhchingte college leh University hoih taktak a kai khawng hi di un ka gingta hi. Mi vantang, mi dangte tung a leng di, chih sehkholh a om tuan kei hi. Mahni a kuhkal a deihna toh pan a ngai, chih theih di’n a hoih hi.

 

Kigen tel khanglang le’ng, ka sepna lian kei mahleh ka school kaipihte’ lak a ka lawmte’ tung a leng pawl ka suak maimah hi. Lawmte’ laibu khel kawm a school kai a lai sim khat ka na hi sam hi. Himahleh a hun tak ah Pathian in hiai tan a hon pi a, ka kipak hi. Khawsakna di toh kisai in ka piangthak kha a, huai in hon tawsawn mahmah hi. Pawl 10 exam khin, singtang lou na va sem, pass lou zawmah, nihvei compartment mu, exam thak le tum nawn lou pa ka hi. Himahleh singtang lou na ka va sep a kipan in kei leh kei ka kithei a, thagum neilou, kawngna nei zawmah, laisim a solkal na khat ka sep kei leh zi leh ta genlouh, kei leh kei le kivak zoulou di ka hihdan ka thei a, pawl `10 pass in LDC ‘Staff Selection Commission saina nuai ah All India Radio Imphal ah ka mu hi. Himahleh huai sepna niam sa in BA ka va exam nawn a, huai a pass in graduate post, tua ka sepna ka mu hi. Gazetted Officer ngei di’n ka kikoih ngei kei himhim hi.

 

Ka gen ut pen ah k’ong lutta dia, Abraham Lincoln i thei vek phial sim di uh. A tanchin tam gen a ngai kei di. ‘From log house to white House’ a chih pa uh ahi. A tuailai lai in laibu sim di a nei kei a, a inkiangte’ uh Bible a khel sek hi. A inkuan kivakna uh singtum (log) zuak khawng ahi. Tuikuang zap khawng leh dak hawm khawng in a kiloh lai hi. Hiai bang mipa a tupguhna toh hong pang a, Amerika President di’n a hong ching mawk hi. A tom lam in.

 

Amerika mite’n ngaisang law mahmah uh a hihziak in mi khat a mel a tak a muh himhim a ut hi. Gamla pi a kipan in a mel muh sawm in a naih vengveng a, a tak a Abraham Lincoln a muh hial chiang in a ngaihdan kikheng ahi ngei di, ‘Mi vantang mah eive’ a chi lel, achi uhi. A lamdanna di a mu kei. A minthanna ziak a mihing’ mel pulou hial dia gingta ahi peuhmah hi.

 

A tung a ei mite’ lak a mi vantang, mi tung a leng ka taklat nihte le mu le uchin mi vantang thou ahi uh. A melpuak uh le a lamdang tuan kei. Khenkhatte bang in Pa Khen (Chinkhenthang Hanghal) bang mel et in a simmoh kha di uh, chih ka lau zawmah.

 

Abraham Lincoln le hai khollou ahi dia, a va zongpa’ thugen mediate’n a dong ua, a muhdan a gen hi. Huai thu newspaper a kisuah a muh tak in Abraham Lincoln in ‘Pathian in mi vantang mah deih ahi di. A mihing bawlte’ lak ah mi vantang a tam pen’ achi, achi uhi. Mizoram a om chih mah, Lincoln ngaihtuahna a zau khawp mai. Mizoram a om khak kisaktheihpih mah ka bang dek, ka ut teuh kei.

 

A tung a ka gen Pa Khen leh Vungzamuan Valte-te’n a na zadah kei le uh ka chi hi. Tu kum 2015 UPSC result suak ah ei mi kuamah a kimu kei in ka thei. Sub-ordinate services SSC ah kuate min a kilang dia, chih kithei lou.

 

Tuni chiang a mi vantang i chihte uh Lamka khawng a addict-te hita uhia, chih bang ka ngaihtuah maimai hi. Ei mite mi nungdelh a pang gige di maw? Rehabilitation Centre a khum hial ngai loute i lak ua mi vantang hi maimahta uh ahi diam? College/University hoih taktak a kai thei dia nu leh pa neite bangziak a thadah ihi di uh? I Society uh bawlphat ngai hi’n i thei uhia? Ngai ahi.

 

Mi vantang khat mi vantang’ tung a len di thupi in i nei di uh.

Read 655 times
Login to post comments