You are here: HomeColumnsKimbawi' PaA Lunglenhuai Khrismas Aizawl Ah

A Lunglenhuai Khrismas Aizawl Ah

Written by  Kimbawi’ Pa Published inKimbawi' Pa Sunday, 27 December 2015 18:02
A Lunglenhuai Khrismas Aizawl Ah

(A Blue Christmas in Aizawl-2025)

Kimbawi’ Pa


Khrismas leh Kum Thak lop hun nuamtak mai a Shillong a zang zou in Aizawl lam a suan in ka om uhi. Mahni mi leh sate’ omna mun, biak-in le neihna mun ka chi a, ka phur mahmah hi. A mun chu a nuam ngei mai, himahleh ka in luahna uh biakin toh a kigamlat ziak leh motor (taxi/Bus) paidan a buaihuai ziak in kikhop chihte thubaih ana hi het kei hi. Kha khat a sawm-a-khat (tithe=1/10th) pe dia ka kikhop zoh leh hat ka kisa mahmah mai hi. Shillong khawng a Lapalang a kipan a Police Bazar tan mi khat a Rs. 20/- a pai theihna ahi. A taxi ua i va tuan nak leh Rs. 20/- ahi mai. Ka omna veng ua kipan a biak-in tan taxi a paina di’n kuan leh kik in Rs. 400/- khawng ahi zel hi. A kikhai mahmah hi.

 

Hiai bang mun a om ka hihziak un ka zi leh tate lungleng lou di’n ka hilh vel a, kei le koilam hiam a kihih lungleng lou di’n ka kikoih hi. A hun a hong nai deuhdeuh a, Khristian Gam kichi ngam in khawlai khawng a hon chei ua, lampi dung teng vak chi tuamtuam in a hong vak maimah a, lampite a phiatsiang ua, December 23 & 24te Zodin a kipan a Chandmari tan ‘No Vehicle Zone’ achi ua, ZL 10.00 a kipan NL 3.00 tan a puang uhi. Motor tai lou in mihing chu ‘thantaw a sakhi om’ bang mai in ka kipel motmot mai uhi. Mipi zaw a sah mahmah.

 

Lungleng lou di ka chi a, ka zi leh tate bang hichi’n ka nem hi. ‘Shillong ah Khrismas va mang lele mikhual thou di; in lam ah va mang lele mikhual thou di, huai kia hilou a Lamka lam bang a Khrismas kizang lou dia, lenkhawm le omlou di, chih ahi’ chi’n ka gen hi. A tak mah le ahi. Koi mun ah om mahle’ng mikhual hi vek di ka hi uh. Lamka a ka in lah mi luah sak zawmah!

 

Aizawl zaw a na buaihuai deuh mah hi. Nidang a ka gelhna ah Aizawl pen Village Council a kipua, tu’n Local Council achi ua, Aizawl City Bus a chih uh dik deuhta in ka thei hi. Khrismas biakin kai dia pai na dia City Bus omlou, taxi lah vang mahmah, Khrismas a biakin kai thei lou ka hi himhim ta uhi. Ka nupa un biakin kai theihdan a om hiam, chih Kulikawn tan ka va en ua, haksat chi sim mahmah, ka chi phet hi. Aizawl a tua omdan ahihleh Khrismas leh Kum Thak lop chihte a kikhop baihlam hetlou di a bang hi.

 

Nidang deuh a i lenkhawm late uh Lalsangzuali Sailo leh Siampuii Sailo in a sakte bang a hon lungleng sak di la zak di a om kei hi. Khrismas la, cable TV khawng a ahon playte ulah phuahtawm petmah, chih di hia, zawlla rong belh simsim a tam mahmah hi. ‘Khrismas nang nen’ chih vel khawng leh a dang huai bang rong belh ahi nengnung a, ka ngai peih khol kei lai hi. Cable Tv a Pathian thu sermon khawng lah kingaikhe peih tuan lou lai, hun zatdan a kunuk mahmah hi.

 

A tung a ka gen bang in veng tuamtuam in a veng uh chei a hah bawl mahmah uhi. Huai le a solkal in veng chei kilawm pente’ kiang a kipahman piak a chiam lai hi. Mimal in amau in a chei ban uah saptuam in khawlai lampite a chei thazoh mahmah uhi. Halpuak (cracker) hal a kham ua, hi kei leh a thawm na mahmah hi’n a gen uhi.

 

Aizawl a Khrismas ka zat masakna kum ahi a, a hun hong tun chiang a ka om didan ka suangtuahna toh a kibang het kei hi. Khrismas hong hileh Aizawl om didan ka ngaihtuah masakdan in lenkhawm khawng siam ua, nuamsa ua, alang-alang a kipan a lenkhawm thawm in hon tuam dia, ka inkuante a lungleng law kha di uh, chih ka lauh ahi. Himahleh lengkhawm thawm a om kei himhim hi. Lamdang ka sa!

 

Amau hihdan in Khrismas ni in ankuang a lui kei ua, a zingchiang (Dec.26) in a lui uhi. A ankuanglui ni bang ua lengkhawm thawm dim mai di ka sak leh a daih in a dai lai zawmah hi. Lamdang ka sa petmah hi. Hiai ka gelh lai khawng a dakdak mai di ka kisak leh hi mahmah lou.

 

Hong kik zual di. December 24 zan pen ‘urlawk zan’ a chi ua, mahni angmasialna a dim samta ahi di ua, inkuan chih in amau in ah aksa khawng a pum a emmim in a zang mai uhi. Sangman/Tanghou, nektheih, adg. Amau inkuan in a ne uh ahi mai.

 

Lungtang a Khrismas tuh sa a om a kihihziak ahi dia hiai bang hun, u leh nau, nu leh pa leh lawm-le-vualte toh zat bel kiut mahmah ahi. A mun in hon zil lou a, om didan dang a om louh chiang a hiai bang a hak dii-diai zen a et liam mai ngai zaw ahita ve. Hiai bang a kei leh kei ka kingaihtuah lai in Lamka lam a omte k’on ngaihtuah sawn lai hi. Bethlehem lungsim sang in kei mahmah in le thangpaihna lungtang ka pu a, khatna (bitterness) in a hon tuam hi. Ka ngoh di lah ka thei kei. I palaite uhia? I heutute uh? JAC makaite? Or Pathian? Or mipite? Or kei? Or nang? Ivek un?

 

Inkuan kim leh lawm leh vualte toh Khrismas 2015 zang di himahle’ng kei zaw ka ngaihtuahna a liam khin himhim hi. Lamka a ka mi leh sa pih hiaizah in Manipur solkal’ khut a hiamgam tak a sihna a tuah uh, tuni tan a aluang un ka mi leh sate’ a dia gen a neihlouh na ka sa mahmah hi. Manipur a i palaite uh a daih dide nung ua state dang a kipan MP bang i sik i tang ua Parliament a kikou di om, kipahhuai petmah. Hilele ei lam i ki-et leh khasiathuai petmah ka sa hi. Ka minam hihpihte aw, i maban ua bangchi kalsuan di? Heutu hia i zon di uh, makai? A hon it a hon makaih di mihing poimoh ka sa mahmah hi. Huai di’n bangchi’n pan i la di ua, chih a na ngaihtuah di’n ko’n thukhak ahi.

 

Koi mun peuh ah om mahle’ng ka gam a dam kei leh kei ka liam a; ka gam in natna a vei leh ken le ka vei hi. Ka gam, nang leh kei kichimat ka hi aw. Na ka sa a, a damdawi di a om kei tadih. Bangtan lametna toh om lai di?

Read 549 times
Login to post comments