You are here: HomeColumnsR SangaAmulkimhuai Mei-Kaang : Inn-le-Lou

Amulkimhuai Mei-Kaang : Inn-le-Lou

Written by  R.Sanga Published inR-Sanga Friday, 20 March 2015 21:24
Amulkimhuai Mei-Kaang : Inn-le-Lou

 

~ By : R. Sanga

 

Thupatna:

Khua-khaal, sing-le-gua keu setsuat mai; gam keu gawp, kaang-mei patau lauhuai petmah ahi chih theihna kichian neih hun laitak ahi. Athu a theih lel hi lou in, ataktak a thei leh ana tuakkha mite a diing in mulkimhuai petmah hi. Tualsung thukizakna, “The Lamka Post,”  March 17, 2015 Issue ah hiai anuai a bang in thuthang lakkhawmte lak a kigelh khat ka simkha hi:  

 

March 16: Bethel Veng, New Lamka ah March 16, 2015 sunma dak 11 vel in T. Chingliankim w/o (L) Damkhopau Inn mei in kang a, a inn vengte’n ahuntak a atheihkhiak man ziak un thupi lua kangse man lou in mipi’n phelhmit man uhi. Hiai Inn kang ah TV (Thom­son), stablizer, parda, Bible ban ah naupangte laibu bangzah hiam kaang sia hi….

 

Inn neitute in hiai bang tuahsia atuahna uah ka thuakpih thu puang in; vangsia-vangpha ahi ve ua maw hon chisak hi.

 

Mei-Kaang Mulkimhuai:

Tangpijawl, Singngat leh Pearsonmun khawkhung ah kum 2008 akipan tunitan Zohuan bawl in Lemongrass Steam Distillation Unit thum koih in om lellel hi. Haichii tuamtuam chiing in hiai Zohuan sung ah nasem niteng a kuan gige in innkuan hunkhopte a diing a neekzonna hoihtak suak hi (e.g., Lemongrass, Sandalwood, Teak, Kwava, Sweet Organge, Chinese Teak, Jawngtah, etc., etc). Niteng neektawm zong mite a diing a kilohna baihlamtak a ngahtheih ahihna ah mi tampi in phattuampih petmah uhi.

 

‘A.’ Tangpijawl Zohuan-Kaang: 

Kum 2013 February kaltawpna in Tangpijawl Zohuan 100 Acres kimkot mulkimhuai deuh mai in haichii tuamtuam hing dipdip kaangtum a, asum a tuat in tawm het lou diing hi. Singnou suanhingsa ngen:

 

(i)  Sandalwood kung 1,500 vaal;

(ii) Teak kung 1,000 vaal; leh

(iii) Lemongrass 45,00,000 saplings pichingsa ngen kangtum dimdem hi.

 

Mei-kaang hong kipatdan hoihtak a suichet ahihnung in gamvaak (sabeng) mithum (hunters) in gam haal uh, huihnung hat deuhdeuh in mei-ek leh meikuang kithuah in Zohuan laizang tukha ahihman in amulkimhuai mei-kaang patauhhuai lua hong suak in haichii manpha tam huntawk hun sawt lou chik sung in kaangtum dimdem hi. Gamvaak mithumte chiangtak a theihkhiak himahle uh tunitan kuk-e-kaak e chih himhim om lou; hon thuzaak lou in om dildel lai uhi. Lamdangtak ahi…!!

 

B.’ Singngat Zohuan Mei-Kaang:

March 12, 2015 ni in lamdangtak mai in Singngat Zohuan mulkimna bei mei-kuang in kaangtum dimdem maimah hi. Lou haal hiam, Sabeng mite hiam in gam haal ziak hiam a hiai Zohuan hong kaang ahi chih kiteltak a theih in om nai kei mahleh suizuina nasep paitou lellel ahihman in theihkhiak ngei lamet ahi hi. Hiai Zohuan Mei-Kaang in anuaisiat haichiite hiai anuai a bang ahi:

 

(i)   Lemongrass 5,00,000 saplings pichingsa ngen kangtum dimdem hi;

(ii)  Sandalwood kung 750 vaal;

(iii) Sweet Orange kung 1,500 vaal;

(iv) Chinese-Teak kung 250 vaal;

(v)  Pine-Tree kung 2,500 vaal;leh

(vi) Jawngtah kung 1,350 vaal kaanglum gai vek hi.

 

 


 

Zohuan a nasemtute in meilam khenna nasep seem in naktak in January akipan February, 2015 sungteng hahpan mahmah uh hi ven; huihnung leh meikuang pen zahngaihna bei ahihchiang in meilam khen in omzia nei lou asuak maimah hi. Tui zawlna (water-pipe) nangawn bangzah hiam kaangsia in, Distillation Unit khat pen umna daai leh a taudoh zong kaang zawmah lai hi.

 

 

Kum sagih (7) nasep nikhat thu a mei in kaangtum chih tel lawmlawm, ka ngaihtuah chiang in naa ka sa tuntun hi. Hichibang thilhih hoih lou, gam haal zongsang kuamah peuh kingaihtuah  thak a, Kristian khat peuhpeuh thilhoih hih diing a Krist a siam i hihlam kiphawkthak a, tunung-tubaan gam haalnawn mahmah lou diing in ka ngen in ka theisak hi. Lemongrass kia hi lou, haichii dang tampi kaangtumte pammaih lua petmah himai…!!

 

Neekzonna taktak diing a zattheih zong hi lou, om chimthawina chihdan a gam-vaak a, Sakhi hiam ahihke’h gamsa khat peuhpeuh mat utna ziak a singkung mantam taktak, haichii dang manpha lualua leh Zohuan haaltum a om pen kei aneitu, mimal manna kia hi lel lou in, Innkuan tampite kingakna nawngkaisak uh ahihman in; huchibang mite a diing in Toupa Pasian kiang ah thumsak chiat ni chi in simtute tengteng ka hon chial hi. Sakhi pumkhat in Vai-Dangka Teeng sang-nga/sang-guk kaan man zou di’n ka gingta kei hi. Theisiam hile uh hichibang in gam ahaal ut lailai diing un ka gingta kei hi. Gam mawk haal nawn lou diing in kihanchiam tek ni. Lou haalte leng pilvang ni.

  

 

Thukhupna:

Singngat khawkhung a Zohuan vangsiatna March 12, 2015 ni a thiltung ziak in lungzing leh mangbang in ka om a, ka dah mahmah hi. Himahleh, Toupa’n ahoihzaw hon pethei gige ahi chih ka phawk a, dah luat ziak in ka nu-ui top maita ve…!! Atung a Zohuan limlakte ka en a, meivu leh meikaangte lei hoih leh lei mantam hong suakleh chih ka deihthusam ahi.

 

Nasemtute lak a khat, M. Thangliankham Guite, Farm Manager leh alawmte in atheihtawp uh suah in meikaang phelh in nitangtum in abuai petmah uhi. Niteng a Zohuan a nasem a kiloh tua ni in mi hunkhop kuan uh a, amaute tengteng in zong panpih mahle uh meikuang haat lua ahihman in kintak a phelh zou mai lou in Farm Manager, M. Khampu Guite kiliam in abil leh asam meikuang in hul/kaang kha zawmah lai hi. Poi lua chih louh ngal agendan diing ka thei zou kei…!

 

Manipur State Sorkar in bildoh henla, hichibang a gam amawkna a haal chihte himhim om nawn mahmah keileh deihhuai lua hi. Zohuan kia hi lou in khawsung khat pumpi nangawn nikhat thu a kaangtum vek thei ahi chih thei in, michih pilvang chiat mahmah le’ng i chi ahi.

Read 697 times Last modified on Saturday, 21 March 2015 15:24
Login to post comments