You are here: HomeColumnsR SangaManipur Singtang Mite: Electoral Politics - III

Manipur Singtang Mite: Electoral Politics - III

Written by  Dr Sanga R Laingek Published inR-Sanga Thursday, 18 August 2016 00:43
Manipur Singtang Mite: Electoral Politics - III

Dr Sanga R Laingek

 

Thupatna:

Sehkhen nihna supzopna in Manipur Singtang Mite: Electoral Politics kichi thulu a nei in sehkhen thumna gelhnawn le’ng i chi ahi. Electoral Politics chih i gen chiang in, Manipur State toh kisai biik in gen le’ng MLA Kitelna February/March, 2017… vel a hong omnawn pah diing toh kisai ngaihsutna giltak a suangtuah kisam petmah ahi chih mipite in chiamteh tinten diing in i kihasuan hi. Kitelna hun a atuhsawm, ‘Intending Candidates’ mite a diing a bang pentak sem a, awlmohna nei a MLA kitelna-tuhsawm uh hi hiam chih kitel sitset a atheihchet uh deihhuai i sa bok hi. Uthuai sakthoh mawk in, hihsuk ek mai, tup kichian lua zong nei khol lou a Kitelna hiven – Candidate di’a chitna nei kisa, ahihke’h thuneihna deih ziak leh sum-le-pai deihtaakna ziak a kitelna-tuhsawm chihdan mi hunkhop om ngei diing in gintakhuai hi. Mi kimkhatte leuleu lah atuhsawm midang kua hiam khat in sum tam huntawk a aleikhiak diing ngak a ‘thaangkam’ a kinei zong om khamoh lou diing un gintakhuai zawmah lai hi.

 

MLA Tuhsawm Mite Theihtuak:

Manipur kivaihawmna paizia ‘Territorial Council’ kitelna aom akipan Union Territory & Statehood Manipur in angah nung, tunitan dong Phaijang leh Singtang gam (Valley & Hills Administration) atuam ana omtouden hinapi in theihna leh theihkakna taksap ziak a Tribal MLAs teelching a ana om zel, khat peuhpeuh in India Daan Bupi in thuneihna apiaksa nasan zang lou diing a amit uh hihmial a om in, abilte uh hihngawng a om in, Manipur Ministry sung ah dinmun saangtak ‘Cabinet Minister’ or thuneihna deihluatna ziak in India in Independence angahnung tunitan kum 70 velbang paita; Manipur Statehood ngahnung kum 44 bang painawn diing hita, Hill Areas Committee thuneihna lian leh saangtak zat mai diing pen ngeingaih lou in koihdap a om in – thuneihna nei lou toh kibang a kikoih in tunitan Tribal MLAs tengteng om zenhouh uhi...!!

 

  • Hill Areas Committee (HAC) Order, 1972 – June 20, 1972 ni in India President lui, Shri. VV Giri in India khua-le-tui hihna anei mi, tangpi-tangta theih diing in India Parliament ah hiai HAC Order, 1972 kichi, Manipur Hill Areas huapsung a Singtang (Tribals) mite a ding biik, atuam kivaihawmna chikhat ana puangkhia hi. Hun paisa saupi suikiik lou in, Kum 1972 akipat a zat leh zuihtouh nilouh diing a om, HAC Order pen ahi diing bangtak a bangziak a zat a om ngei lou hi hiam chih ngaihsuthuai petmah ahi hi. Manipur Ministry ah tanvou deihna ziak in HAC pen poimohngaih het lou a Tribal MLAs tengteng in tunitan anelhsiah ziak uh ahi hi.
  • India Daan Bupi Khenpi 371C-na in Manipur Singtang gam ah singtang mite a diing in tanvou thupitak (special provision) hon pia hi. HAC Order, 1972 – Clause 9-na dungzui in HAC in hoihtak a naa aseptheihna diing in ‘special responsibility’ Governor khut ah thuneihna tuambiik piak in aom behlap lai hi. Governor in amah mimal thuneihna zang in hiai mohpuakna tuambiik piak ahih dungzui in Hill Areas Administration (Singtang Gam Kivaihawmna) toh kisai HAC Order a kipiate khempeuh amah thuneihna tuambiik zang a semkhe geihgeih diing a mohpuakna tuambiik (Special Responsibility) piak a om ahi hi. Manipur State Council of Ministers paikan a ahihtheih ahi chih chiamteh diing a thu poimoh petmah ahi. Huaiziak in Cabinet Minister dinmun Tribal MLAs-te a di’n etlah luatna diing om lou hi. HAC Chairman pen Hills Chief Minister dinmun leen himai diing a, Vice-Chairman pen Hills Deputy Chief Minister dinmun himai diing a; Tribal MLAs dangte Department tuamtuam ah Incharge (Mohpuakna) kihawmle uh Minister dinmun leen vek himai diing uh ahi.

 

Ref. The Governor shall have special responsibility for securing the proper functioning of the Hill Areas Committee in accordance with the provisions of this Order and shall, in the discharge of his special responsibility, act in his discretion (HAC Orders, 1972 Clause 9).

 

  • Manipur Autonomous District Councils leh Village Authority kivaihawmna pen Hill Areas Committee thuneihna nuai ah koih in om hi. Huaiziak in HAC pen Manipur Singtang gam toh kisai khempeuh State Level a Daan bawlna (Legislature) saangpen ahi hi. HAC Members tengteng pen Legislators ahih chiat ziak un Legislative Power kichi apianken a HAC in neikhin ahi hi. Hill District Level ah Daan bawl theihna pen District Councils in thuneihna anei uhi. Tua bang zel in Hill Village Level a Daan bawlna toh kisai Village Authority in thuneihna anei leuleu hi.
  • Kum 1972 akipan tunitan HAC in Singtang gam kivaihawmna diing toh kisai bangzah himhim Daan abawlkheta de aw…!! (e.g., (a) The Manipur Hill Land Settlement and Records, (b) The regulation of practice of Jhum or other forms of shifting cultivation, (c) The use of any canal or water course for purposes of agriculture, (d) The management of any forest not being a reserved forest, etc., etc. chihte baan ah adang tampi zong Daan bawl diing kul-le-poimoh om peuhmah di’n uphuai hi…).
  • Rules of Procedure and Conduct of Business In Manipur Legislative Assembly pp. 86 (Ninth Edition, 2014):

Section 218. Chairman and Vice-Chairman: The Hill Areas Committee shall elect two members of the Committee to be respectively Chairman and Vice-Chairman thereof and so often as the office of the Chairman or Vice-Chairman becomes vacant, the Hill Areas Committee shall elect another member to be Chairman or Vice-Chairman as the case may be.
Section 219(1). The Chairman of the Hill Areas Committee shall be elected by the members of the Hill Areas Committee from among themselves on such date as the Governor may fix for the purpose and the Secretary shall send to every member the notice of this date:
Provided that the date so fixed shall not be beyond 30 days from the date on which the House first meets in case3 of vacancy at the beginning of a new Assembly and 15 days from the date of occurrence of the vacancy occurs at any time during the term of the Assembly.

 

# Hiai omzia bel HAC Chairman & Vice-Chairman diing Hill Areas Committee in amau sung ah akiteel diing uh ahi chihna ahi hi. Manipur Chief Minister in hoih asakdan leh amah deihdan a hiai pen Chairman/Vice Chairman ahih diing ahi chih geen diing leh HAC Members-te kiang ah thupiak bawl diing in thuneihna neipha baan het lou ahi chih Tribal MLAs teng in chiamteh chiat uhen chi in deihsakna thuchah i bawl ngal bok hi. Cabinet Minister tangzou lou kua hiam khem lungdamna diing a HAC Chairman/Vice Chairman ahih diing hi het lou – baan ah, Ruling Party akipan mi ahih teitei diing chih zong om mahmah lou hi. Opposition Party akipan HAC Chairman/Vice Chairman hile uh Singtang gam kivaihawmna paihoih theipan diing in uphuaizaw hi. Manipur Ministry ah dinmun deihluatna diing aziak-asan om lou ahihlam HAC Members kuapeuh in theisiam chiatle uh i deihsak mahmah hi. Singtang gam atuam kivaihawmna bulpatna diing in hiai HAC ahun tawk mahmah hi.

 

Minister dinmun deih a thuneihna kituh Tribal MLAs paidan ana hihkhaak nilouh ziak in HAC ahi diing bangtak in paithei lou ahi lel hi. Phaijang mi MLAs tengteng in HAC ahi bangtak a akizat diing lau law petmah uh ahihman in Tribal MLAs bangzah hiam Minister dinmun pia in ana kamhum zel ziak un Tribal MLAs atamzawte Setan thaang a awk nilouh ahi leltak uhi. Huaiziak in National Political Party Ticket deihhuai lou lua ahihlam phawk chiat di’n ‘Intending MLA Candidates’ kuapeuh kiang ah thuchah poimoh i khaak hi. Tualsuak Political Party poimoh petmah ahita chih mipite’n zong chiamteh chiat ni...!! Hill Areas Administration ahi diing bangtak a Kivaihawmna apaitheihna diing in HAC neukoih lou in pibawl mahmah diing ahihlam michih in chiamteh ni.

 

Gam-le-Nam Itna:

Manipur Electoral Politics pen ‘Thilgeel’ (Policy), tup-le-ngim mumaltak nei a Election tuhsawm mi kua a om a…?? Nambing, pau-le-ham dungzui a kikhenna uanglaw mahmah, tua baan ah, ‘denominational churches’ pansan a nei leh MLA chintheihna diing tan geih a lungsim suangtuahna nei, abaan saupi lunggeel a neibaan lou, Gam-le-Nam Itna anei lua mahbang a kisa beemten mi bangzah hiam hong pusuaknawn ngei diing uh ahi ngal a...!!

 

Zapi huap a suahtakna leh zalenna singtang mite in i ngahtheihna diing tup-le-ngim pipen a nei, MipiVaihawmna ahih toh kiton a ei-le-ei, atuam, mahni kivaihawm theihna diing tup-le-ngim a nei mi kizen koi ah aom dia…? MipiVaihawmna ah bel kuamah kiphutluih theih hi lou a, mahni mimal deihtelna pen kizahtaksak kisam ahihna ah hun paisate enkiik a, leitung vai ah mihoih, gam-le-nam itna diktak anei mi kua hi hiam chih enchian detdet masa a; Mailam galdot kawm a ‘Kitel-hun’ a i mi teel diing theihtel mahmah kisam petmah ahita hi.

 

Leitung vai toh kisai Tribals-te mailam paizia diing ‘Electoral Politics’ toh paikhawm ahihna ah koilam nga a kalsuan diing? Eite ut-le-ut louh thu hi het lou in, ahun hong tung dek zel ahihman in ‘Election’ maituah ngei di’n i kigingta hi. MipiVaihawmna ah bel Palai kitelkhia a; Daan Bawltu diing mipi sik-le-tang a gensaktu aom ngeingei kisam ahihman in tua Palai diing mite pen mipite deihtelna a kinga ahi chih kiteltak a theihsiam poimoh petmah hi. Palai telching ahong hihnung chiang ua gam humbitna nasep poimohngaih masa leh nam makhua khual a nasem kua aom a? Atelchingtu mipite ngeingaih lou leh nelhsiah a, mahni mimal angma kia khual thei hun phet MPs, MLAs & MDCs telching ahih chiang un mipite’n kiphunsan souhsouh a, gensiat nilouh pen aphattuamna om lou lua ahihman in hun hong tung diing Kitelna khat peuhpeuh ah chu pilvang chiat theita le’ng hoih peuhmah diing in uphuai hi. Sehthoh mah hoih hia; ahihke’h Telthoh hoih diing maw…? Sia-le-pha theihna siang anei mi piching ngen in kitelna ah zalentak a letme (vote) khiak chiat diing ahi thei taktak nadiam?

 

Kitelna toh kisai in ‘National Political Party’ tuamtuam kisingsa naak mahmah uh ahihna ah, Manipur singtang mite tulel dinmun ah bit zou takpi uh hi hiam ahihke’h delthawng lua hi hiam chih ngaihsuthuai petmah hi. Mipi ai-oh Palaite ah kinga liuliau ahi chi le’ng i genkhial lua di’n gintakhuai lou hi. Manipur – Hill Areas Committee Order, 1972 thutuun dungzui in atuam kivaihawmna bulpat theih ahihlam Tribal MLAs kuapeuh in theisiam a, awlmoh pipen a nei, Gam-le-Nam a di’a kipumpiak Palai 12 lel kinei hile bel tua dinmun akipan ahoihzaw leh dinmun saangzaw ah mipite kilamtou thei diing hi hangh.

 

HAC Order, Clause 6-na ah (Development Plans): Hiai anuai a bang in kigelh hi:-

  • Before the Five Year Plan and Annual Plans of the State are finalized by the Government of the State proposal in this behalf, which shall show separately the Plan Schemes and the rest of the State, shall be placed before the Hill Areas Committee and the views of the Committee shall be taken into account before the Plans are finalized.
  • The government of the State shall forward to the Hill Areas Committee quarterly reports showing the progress of implementation of the Plans relating to the Hill Areas.

 

1972 akipan kum 40 vaalzen paita mahleh tunitan HAC Order, 1972 pen ahi diing bangtak a zat leh zuih in om lou nilouh hi. Five Year Plan & Annual Plans toh kisai Phaijang leh Singtang (Plain & Hills) gam atuam vilvel a kikhen a ‘Plan Schemes’ Hill Areas Committee in bawlfel diing a thuneihna piak a om hinapi in bawl ngei lou in Kum 44 khawng mipite khava leh giautautak in hon koih nilouh louh uhi. Tribal MLAs thuneihna ahihke’h Hill Areas Committee in athuneihna pen amau mah in nelhsiah leh palzut uh ahihman in…Mipite’n bang i genta diing uale? Government of the State (Manipur) in Hill Areas huapsung ah hiai Plan Schemes nuai a sum zatna toh kisai ‘Quarterly Progress Reports,’ HAC ah apiaklut zel diing kichi hinapi in, “Plan Schemes” bangmah himhim guanlut a om ngei mahmah lou ahih maimah chiang a, tunitan Manipur Sorkar in apiaklut diing bangmah om lou suak hi. Kua mohna hi peuhmah diing hiam? Mipite maw…ahihke’h HAC Members-te maw….?? Khanloh hun petmahta hi. Thou ni, thou ni…!! Hill Areas puahphatna diing Manipur State Budget ah kiguanglut ngei lou ahi chih achian a, i muan mahmah Tribal MLAs & Ministers kum 40 vaal bang nei gige sam hangh a, tua koilam nga a, bang hih a, bang seem a, February/March, 2017 vel a ‘MLA ‘Election’ hong omnawn hitaleh dinmun ngeimah ah tusuk zel diing maw…!! Gam-le-Nam it mite nasepdan hichi diing mah ahi diam?

 

Thukhupna:

  • Tualsuak Political Party poimoh petmah hi. National Political Party ah Manipur Tribals mite a diing in kinepna diing bangmah aomta kei chih ‘Tribal MLA Intending Candidate’ kua peuh in chiamteh thei chiatle uh i deihsak petmah hi.
  • Hill Areas Committee in asep diing bangtak a asep theihna diing in ahi diing bangtak leh diktak in Tribal MLAs 19 + 1 = 20 in amau sung ah HAC, Chairman & Vice Chairman siangthoutak in kitelta mahmah uhen i chi ahi. 
  • HAC Chairman & Vice-Chairman Ruling Party akipan ahih teitei diing chih bangmah om lou ahihman in, HAC in Singtang mite a di’a hoih leh khantouhna nasep ahi diing bangtak a asepkhiak zel theihna diing in Mipite in MLA Kitelna aom chiang in pilvangtak a mipi ai-oh, Palai diing mite telching di’n khanglou chiatta ni.
Read 477 times
Login to post comments