You are here: HomeArticlesGeneralNungak Melhoih Ngaihzawng!

Nungak Melhoih Ngaihzawng!

Written by  ZOL Titbits Published inGeneral Sunday, 06 November 2016 02:14
Nungak Melhoih Ngaihzawng!

:- ZOL Titbits

 

Bangziak a nungak melhoih leh fel mahmahte lak a ‘lengkul’ ahunkhop om thei ahi ding uh? A melhoihna uh leh a etlawmnate un ‘Luv’ lampang ah amau panpih khollou ahi diam?

 

Hiai atung a dotna nihte’ dawnna na theihtheihna ding in, nang leh nang hong kingaihtuah kik sin mah dih. Bang zah vei tak ahia, nungak melhoih leh deih-huai na sak mahmahte vahel a, na vaneel dek chiang a, phulou kisa a, hon na nawlkhin ding a kingaihtuah a na tawp kik zel? Tangval dangte leng nang bang thou ahi uhi. Nungak melhoih leh deihhuai taktakte ‘nungak senior’ ahong suahna san uh huaiziak hi pen hi. Nungak melhoihte toh kisai in khovel ah ngaihdan diklou tampha peuhmah hi!

 

Huan ah, melhoihte’n mite ngaihsak loh tangpi ua, thil lian tham hikhollou ah, koimun peuh ah lamzang tangpi uhi. Huaiziak in, atangpi thu in kimuan-ngamna/confidence nei zodeuh ua; khovel leng a vaak zawng (bright side) in enzaw deuh uhi. Huan ah, amel leh pian zia un a chit himhim ziak le zaw ahi kha dia - a lampai, khohei dan himhim uh leh, a chet vel dan uah leng, midangte banglou deuh a ‘U’ biikna riau khat nei uhi. Hiaite ahihleh, apotham ahi a, a sung-gil taktak ah bel nungak dangte mah bang thou uhi. Huan ah, hiai a chet zia(body language) un kisaktheihna kengtel zenzenlou hi.

 

Amasapen in, nungakte – melhoih leh melhoihlou a khen ding hilou uhi. Aziak ahihleh, nungak tengteng melhoih vek ua, a melhoih dan uh kibanglou himai hi. “Mel hoihna zaw a entu mit a om ei lim ve” mi tate’n na chi uhi. Nungak khat a melhoih ziak mai a nang hon simmoh ngal ding ahi chihna leng om zenzenlou hi. Huaiziak in, tangval dangte’n gal-et a duhthu asam lai un, vanaih in, vaneel le chin, mi hampha pa olsam tak a suahtheih mai hi.

 

Anihna ding in, nungak melhoih leh lun mahmah khat (hot girl) toh na kingaihzawng khak zenzen chiang un, mahni kisitna pan hong piangkhia - thikthusia leh hazatna in na kaal thu uh hihse sak ken. Tangval tampite hinkhua, thikthusia in pi in - amah hinkhua leh nungak hinkhua haksatak in koih sek uhi. Khenkhatte bang in houh, amau thikthusia lungsim pan hong piang khia limsiam in, tangval dang tampi toh kop ding khawng kisa in “Paal chih naubang na oih lai ah na…”/ “Zalai vangkho’ lanu…….” chipeuh in la bang na phuah khum dupdup uhi!

 

Nungak melhoih tak khat toh na kingaihzawng ua; noute geel - maban limchitak nei a, itna lampi nuam leh maamtak mai a na kitonkhawm uh deihna ziak in, hiai anuai ah nang hon panpih a, hon makaih thei dia gintak thuhilhna tamlou hong kilui khia hi.

 

Amah Muang In:
Tangval tengteng in nungak melhoih deih chiat uhi. Ahihziak in, huchi bang ngaihzawng a neih khak zenzen chiang un, “A taktak ahi de aw, hon it taktak mah diam aw” chih, amau leh amau kiguk dot kik in, ginlelhna in pumdim khonung uhi. Ama muhlouh leh theihlouh kaal a angaihzawngnu midang in na ‘try’ a, na ‘zaalbawl’ mahmah ding khawng in limsiam sek uhi. Kingaihzawng or relationship kichi himhim ahihleh, ‘kimuan tuah ngamna’, ‘kigintak tuahna’ ah ki-nga pumlum hi. Na ngaihzawngnu thil hilou leh, hitheilou ding tanpha a na muanmoh gige leh, muan-ngam dan kisin inla; huai ahihkei leh, na girlfriend na taan hak kei ding chihna hi mai hi.

 

Midangte Ngaihsak Ken:
Na pawtkhawm uh hiam, na kiton khawm chiang un, mite’n na kiang a pai nu en hawk-hawk ding uhi. Ahihziak in, bangmah in sim kenla, ngaihsak nuam dah mai in. Na girlfriend in pasalte ngawngkilhna kolong sakthei ding khop a a lutang uh kiheisak vutvut maimah ahi, chih ahihleh, thudik omsa bang ahi hi. Ahihziak in, tangval hiaizah zouzai lak a, aman nang hon tel hi. Huaiziak in, kipak in, nuam lechin hisuk mai hi. Na ngaihzawngnu akichei chiang in, huai lamkiang khawng a en hek-hawkte adia kichei hilou in, nang a ding, nang lungkimna ding a kichei-a-kizun ahi chih thei in.

 

Na Thikthusia Bumlum In:
Ngaihzawng melhoih neih himhim in buaina leh haksatna bawllou a, na thikthusia in buaina leh haksatna hon tun hizaw hi. Huaiziak in, tangval dang te’n na ngaihzawngnu a houpih uhiam, a ngaihsak chiang ua, na thikthu a siatluat leh, na lungsim khawltawldam sak inla, na lungsim thunun dan kizil in. Milak khawng a kilang tuam lua leh, deihhuai tuntun mah ahih mawk chia, na girlfriend mite’n enlou theilou mah uhi. Huai hih, nang khaam theih vual leng hilou hi. Ahihziak in, huchi bang nungak in, a itna tengteng nang hon kemsak khilkhial ahi chih thei in, kisathei viau lechin himai hi!


Na Lungsim Honkamte Genpih In:
Na girlfriend in, mite’n amah ngaihsak tuam uh ahihlam bang leng kithei khollou in, nungak tengteng mi’n huchih vek bang uh sasim gige maithei hi. Huaiziak in, na lungkim theilouhnate –aziak ding a ngaihtuah chiang in, “Amah adia ginom ing a, a hehna ding le gen ngei hetlou ing a, bang ziak a hon heh sansan mawk ahi de aw”, chih khawng lungsim na’ tuntun kawm in ngaihtuah tuah mai thei hi. Hunlem tang ah na lungsim hon kamtu(your insecurity/worries) genpih inla; ahihziak in, a mohsa zawng in thil genhet ken. A mel-le-puam amah kibawl tawm hilou a; huaiziak a, amah mohsakna dia zat chi zong hilou hi. Huai mah in nang leng hon hiip na hi zaw hi. Na ngaihzawngnu kiang ah, na thikthusiatna ziak hoihtak in hilh lechin, nang a dia a ginom dan akan-a-val deuh zek a honlah akul leh leng hon lak in, thil khenkhat ahilou lam a na ngaihlouhna ding in, akulna mun ah hon hilh chian zel ding hi.

Numei/nungak leh naupang kibang sim uhi. Nu-le-pa tampite’n atate uh deih zawng a leisak theilouhna ziak uh, alei na ding sum a neih zohlouh ziak uh ahih lam gen ngamlou in, zuauthu peuh in naupang khem maimah uhi. Ahihziak in, a sum neihlouh thu uh imlou a naupang ahilh chiang un, atate un “Ahihleh, sum I neih chiang un hon leisak in aw” lungkim tak in chisuk mai uhi. Huchimah bang in, numei/girlfriend te kiang ah pasal/tangval tampite kihong ngamlou ua; huai in, akullou buaina piangsak khanak hi. Na lungsim a na vei, zumhuai na sak penpente leng na girlfriend hilh lechin, huaite ziak in nang hon simmohlou in, hon it deuhdeuh zaw ding hi. A kiang a na lungsim sungnung pen a na veite, aw ling delhdelh leh mittui dai deuh mai a na gen chiang in, nang toh teek khawm lung-gulh deuhdeuh ding hi!

 

Mi maimai hi Deksuailou:
Et dan chi tuam deuh in na dinmun I en ding hi. Kholak hiam, kongzing hiam a na ngaihzawngnu toh na kiton khawm chiang un, mite’n na tonpihnu en masa ding uhi. Huai khitchiang in, a tonpihtu, mi vangpha pa kua ade aw, chi in enna mit toh nang hon en vengveng nawn ding uhi. “Nungak hichi bang a melhoih itna lohkhe zou ahih chiang in, ‘mi khat’ zaw hi peuhmah ding eive” hon chi ding uhi. Huan ah, na girlfriend lungsim tak thei le chin, mite ngaihsak a loh luat khawng ninhuai salua bang leng na himai thei hi.


Thutawpna:
Hiai thu-le-la tawpna ahi; na girlfriend (with an apology to King Solomon)
– a sakmel etlawmnou ziak kia hiam,
- a duang tunsang tumsing bangte ziak hiam,
- a besam mittaihuai tak ziak hiam,
- a nunkhum grep bawk bangte hiam,
- a naksuk naaktouh hu epul gimsi bangte ziak hiam,
- a kam ningzu khumpen bangte ziak hiam, ahihkeileh,
- a pheiphungsuan lungtaihuai takte ziak kia mai hilou in: amah mah, amah diktak(personality), amah ahihna ziak a it leh deih na hihlam theisak in.

Read 972 times
Login to post comments