You are here: HomeArticlesGeneralINDIAN SPECIAL FORCES: Para Special Forces commandos

INDIAN SPECIAL FORCES: Para Special Forces commandos

Written by  Ding Khuptong Published inGeneral Thursday, 08 December 2016 00:56
INDIAN SPECIAL FORCES: Para Special Forces commandos

-          Ding Khuptong

 

Khovel gam tuamtuam te’n Special forces i chi hiam ahihkeileh, Commando a chih sek uh a kineih tek bang un, India in leng Commando tuamtuam hunkhop a neihte lak ah US Special Forces Navy seals te toh tehkak a om Para commando te minthang diak in, tamveitak leh zat in omta uhi. Para Commando kichite ahihleh Indian army nuai a Parachute Regiment chia leng theih in om ua, a nasep tangpi uh ahihleh operation tuambiik, direct action, salmat hutkhiakna, counter-terrorism, unconventional warfare, special reconnaissance, foreign internal defense, counter-proliferation, counter-insurgency, seek and destroy leh personal recovery khawng ah zat in om sek uhi.

 

KIPHUHKHIAK DAN:

Para commando te ahihleh October 1941 kum a kiphutkhia hi ua, khovel pumpi a airborne units omte lak ah a kumlui pen pawl a genkhak ahih ban uah, kidoupi nihna omlai in, India sepaihte lak ah leng lenna a pan tawmkhe thei sepaih om ding deihna in,  50th Indian Parachute Brigade kichi 27 October 1941 a phuhkhiak in om hi. Parachute brigade a theih a hihnung un, British 151st Parachute Battalion, leh British Indian Army 152nd Indian Parachute Battalion banah 153rd Gurkha Parachute Battalion toh gawmkhawm a hong om in, 1952 kum in Parachute Regiment tuam mawngmawng dinkhiak in hong om a, Unit tamtak a seh khen in leng om uhi. 

 

INDIAN ARMY PARA COMMANDOS:

Parachute Brigade phuhkhiak a om nung in, 1944 kum in 50th Indian Parachute Brigade te 44th Airborne Division ah training neiding a sawllut hi ua, India in zalenna mudek phialta ahihman in, tua 44th Airborne Division pen Batallion 3 a khen a om in, 1 PARA (Punjab), 2 PARA (Maratha) leh 3 PARA (Kumaon) chia khenzak in om uhi. 1947 leh 1948 a India in zalenna a muhphet in India leh Pakistan kidouna om hun ah Jammu and Kashmir a operation bawlding in sawl in om ngal ua, tua Para commando te Shelatang, Naushera, Jhangar leh Poonch a Pakistan sepaihte toh kibeihna ah a hihhoih ziak un Battle honour tamtak leng piak in om uhi.

 

April 15, 1952 in Parachute Brigade a om Batallion 3 te a Infantry battalion ua pan lakkhiak a om in, Parachute Regiment ah koih in om nawn uh a, huainung tuni tan in Batallion 10 suah a om in, 2 PARA te  Mechanised Infantry Battalion ah koih hi ua, 21 PARA (Special Forcetec ahihleh Maratha Light Infantry apan dinsuah in om uhi. 1965 kum a India leh Pakistan kidoupina om hun in, Army nuai a Infantry Unit tuamtuam apan kaihkhawm a om sepaih tamtak te commando chikhat phuan in, Pakistan toh kikap tuahna ah makaih sak hi ua, Major Megh singh makaihna ahihman in, a min ding un Meghdoot force chia minloh in om uhi.  Pakistan toh galpi a a hihhoih ziak un, India solkal in Lt Col Megh Singh kiang ah a utleh Commando Unit dinsuah theiding in phalna pia uh a, himahleh buaina neuhneuh om ziak in, Commando Unit bawlkhiak ding thu Parachute regiment mohpuakna piak a om in July 1, 1966 kum in 9th Battalion (Commando) dinkhiak in om hi. Himahleh hiai hun in,  Meghdoot Force te beisak hinai lou ua, tamlou Gwalior ah omsak in om uhi. June 1967 in Meghdoot force te Unit nih a khenzak a om nawn in, Unit nihnate 10th Battallion (Commando) chia minloh in om uhi. 10th Battalion te dinsuah ahihnung in,  Western Desert lak teng amau etkaina nuai ah koih in om a, 9th battalion te ahihleh India mallam pang tanggam lak enkai ding a mohpuakna piak in om uhi. 1969 kum in, tua battalion nih 9th leh 10thBattalion te a min uh khek a om in, a min thak ding un, 9 leh 10 Para (Commando) battalions chih zat in om hi.

 

1978 kum in 1st Para te India gamsung a tactical reserve ding a kikoih Special Force te lak ah namkip masak pen in om ua, a kivaipuakna uh Chief of Army Staff Unit leh GOC-in-C Eastern Command Unit theihpihna ahihban ah, a tuung in 1 PARA (PUNJAB) chia theih himahle uh 1978 kum in 1 PARA (special forces) chia khek in om hi.

 

GALPI MUN A ZAT A OMNATE UH:

1971 Indo-Pakistan War:

1971 kum a India leh Pakistan a kidou hun in, Para commando apan mi 6 Pakistan gamsung Km 240  a thuuk ah va lutsuk in, Indus leh Charchao ah Pakistan sepaihte va bei mahle uh, a tamzaw mat leh thah in ana om uhi. Bangladesh ah 50 (independent) Parachute Brigade nuai apan lakkhiak a om  2 PARA (airborne) te Dhaka khopi kiang a Mymensingh District a Poongli Leipi kituhna ah zat hi ua, a nasep uh leh a tupguhna ziak ua, lohchinna thupitak a ngah ziak un, India sepaih Dhaka khopi lut masapen a chiamteh ahihban uah, 2 PARA te Battle Honour of Poongli Bridge leh Theater Honour Dhaka kichi khuksak in om uhi.

 

Operation Bluestar 1984:

1984 kum a Punjab state sung a Sikh helpawlte a hatlai un, Para Commando (Special Forces) te zat in om uh a, Operation Blue Star chih min zang in, Punjab state sung a Golden Temple a Sikh helpawlte beiding a sawl in om uhi. Huai hun in Para (special forces) apan mi 80 in hiai Temple luhding uh chih hi amun khatn ngial tuinuai lutsiam te ngaiding chih ahi hi. Himahleh tua Temple sung a helpawlte omzah diktak hisap khelh ziak in, a thiltup uh lohsam uh a, tuinuai lutsiam te zatding chihthu ah diver mission leng a lohching louh ban ah Golden Temple luhkhiak zoh hipah lou hi. Himahleh Kuhkal tak a Para commando te a pan ziak un, dakkal bangzah hiam kikaptuahna nasatak om nung in, Golden Temple apan Sikh helte nohkhiak in om uhi.

 

Sri Lanka 1987:

1980 kuam a beidek kuan in, Operation Pawan chih min zang in Para commando te Sri Lanka lutsak in om uhi. Para te lutma in, Indian Peace Keeping Force (IPKF) dia kuan te’n LTTE helpawlte koikoi a kibu uh hiam chih ginatak a a theihlouh ziak un, Operation Pawan lohsam mandek mahleh Para Commando te a huntak a zat man geih a om ziak un, Jaffna Penisula teng laksak a om in, LTTE helpawlte gammang ah nohkik in om thei uhi. Sikh Light Infantry te banglou tak in, a lak ua semte khat in zuausan in, LTTE te omna sung ah pilut khak in om mahle uh,  dakkal 24 sung mi 6 in a sihma tan un LTTE te bei uh a, reinforcement a tun kik tan in, a siluang uh leh a kaplupte uh chihlouh ngal a kikaptuahna mun uah muh ding omlou hi.  Tuabang a Jaffna khopi luhna a lohsap nung in, November 1987 in 10th PARA te Helicopter apan kikhaikhia in, Jaffna apan Km 18 velding a gamla a om Moolai ah LTTE te munpi nasatak in va bei uh a, huai ah LTTE helpawl a tel mi 200 val a kaplup ban uah, LTTE te galvan koihkhawmna munpi leng luhkhia uhi. Tuabang a galmun a a hihhoih ziak un, 1st PARA te 1988 kumbul in India ah kiksak in om ua, amau thakheng ding in 9th PARA Special Forces te sawllut in om uhi.

 

9th PARA te Sri Lanka a lutnung uh, June 1988 a India kik ding uh chih himahleh, a hun behlap a om in, tuipi zul a om Mullaittivu gei a gam nawnlak ah LTTE te munpi beihsak in om ua, huai ah LTTE te galvan tamtak laksak a om ban uah, tua mission pen lohching mahmah in, Sri Lanka a India high commission vengtu ding in Commando apan mi 12 koihdet in om uhi.

 

Operation Cactus 1988, Maldives:

Indian Ocean a om tuikulh gam neuchikte lak a khat Maldives ah November 1988 kum a, PLOTE mercenaries (galvan a sumdawng pawlkhat) te’n Maldive vaihawmna thagum a laksak ziak un, India in tua thautawite beiding in Para commando apan mi 60 sawllut hi. Tua commando sawllut a omte lak ah 6 Para te 4 November 1988 in Indian Air Force in a zat mihing leh van puakna dia kibawl IL-76, An-32 leh An-12 transport aircraft zang in Maldives gamsung mun tuamtuam ah seh thum kisuah in, lenna apan kikhaikhe suk uh a, team khat in Maldives President damtak a va hunkhia in, khat te’n lenna phual a thuneih khum ban uah, team dangkhat in NSS headquarter a Maldive sepaih mat a omte hunkhia uhi. A nung in, 7 Para & leh 17 Para Fd Regt apan sepaih bangzah hiam Maldives ah koih in om ua, Maldives thuneihkhum sawmte longpi zang a kihep khiak sawm uh ahihdan Indian Navy in a theih ziak in, tuipi tung ah operation nasatak 6 Para leh 17 Para Fd Regt in nei in, huai ah kuamah si leh liam omlou in Mercenaries-te that vek uhi.

 

Kashmiri hostage-taking, July 4, 1995:

Galpi tuamtuam omnate a Para Commando te zat ahihnung un, 1995 kum in Kashmir ah helpawlte’n a pimang uh gamdang apan khualzinmite hutkhiakna ah leng zat in om uhi. Hiai thu ahihleh 1995 kum a Pakistan tawsawn helpawl Al-Faran kichite’n gamdang apan khualzinmi 6 Anantnag district isung a a pimang uh hutkhiak sawmna hi a, July 4, 1995 in tua South Kashmir a Anantnag District ah helpawlte kibukna mun Para commando te’n buluh mahle uh salmat te lak a khat ngawngtan sa a muh chihlouh midang muh hilou a, ahihhang in, Al-Faran helpawlte makai Abdul Hamid Turki leh midang 4 thah a om in, tua helpawlte sulnung tuni tan zak in om nawnlou hi.

 

1999 Kargil War:

1999 kum a India leh Pakistan in Kargil war a neihlai un, India in Parachute Batallion 10 a neih lak ah battalion 9 te Operation Vijay a ding in Kargil ah sawllut in om ua, tua Para Commando battalion 9 te zang in India in  Mushkoh phaizang a om Pakistan sepaihte nohkhe thei in, 5 PARA te ngial in, Batalik kichihna mun a luhkhiak zoh ziak un, a hangsanna uh leh a kipiakzohna uh theihpihna in COAS Unit Citation tanpha piak in om uhi.

 

Operation Khukri 2000, Sierra Leone:

2000 kum in leng Africa gambuppi sung a gam neuchik khat ah UN in peacekeeping force dan a a sawllut Gorkha Rifles te Revolutionary United Front (RUF) in ni 75 sung a umkual ziak un, India solkal in New delhi apan Lieutenant Colonel Harinder sood makaih in Para Commando 90 velding India sepaihte hunkhe ding in sawl a,  huai ah Revolutionary United Front (RUF) helpawlte 2000 apan 5000 kikal velding a tam himahle uh, Indian Special Force te panlakna ziak in, helpawlte lak ah a tam zaw a ki-surrender kia uh hilou in, hawldalh uh a, tua Sierra Leone buaina vengsak thei uh hin kigen hi.  

 

Operation Summer Storm 2009:

April 11, 2009 in Manipur a om Indian army nuai a  57 Mountain Division in Loktak Lake a helpawl tamtak om uh ahihdan report a piak dungzui in, Para Commandoes pawlkhat  para-military Assam Rifles leh State Police pangkhawm in, ‘Operation Summer Storm’ chih min zang in, Loktak Lake leh Bishnupur District sung a om Keibul Lamjao National Park lak teng operation khauhtak bawl uh a, huai ah tua operation in ni 10 sunglel daih himahleh Loktak Lake tung pansan a nei People’s Revolutionary Party of Kangleipak (PREPAK) a tel mi 129 kaplup a om ban uah, helpawlte camp 5 suksiat sak dimdem a om in, AK 47 leh 56 rifles kigawm 69 matsak ahih ban ah, Rocket Launcher 48 muhsuah a om in, puakthei tamtak muhkhiak hi a, himahleh hiai operation ah Para commando te si leh liam kuamah omlou uhi.

 

Ongoing COIN Operations in J&K and Eastern States:

Paratroopers leh Para Special Forces te’n ahihleh gal omlouh hun in leng Jammu and Kashmir, Assam leh North east a om state khenkhat ah helpawlte beiding in zat hi ua, a khenchiang in Army nuai a commando pawlkhat Rastriya Rifles te toh operation leng neikhawm zelzel uhi.  1990 kiimlak vel in Paratroopers leh Para Special Forces te helpawlte beihna ah nasatak a zat in om pan uh a, Para (SF), Paratroopers (Airborne), NSG Rashtriya Rifles nuai a special unit te toh kithuah in a diak in Kashmir a helpawlte beihna ah zat in om uhi.

 

Counter insurgency operation in Myanmar 2015:

2015 kum a Myanmar gamsung a helpawl tuamtuam omte lak a khat NSCN (Khaplang) leh KYKL kithuah te’n Chandel District sung munkhat a Dogra Regiment te ambush bawl a mi 19 a thah nung un, Intelligence te huhna tel in 21 Para Special forces te’n India gamgi kantan in Myanmar gamsung a om helpawlte camp buluhna nei ua, huai ah helpawlte camp poimoh mahmah nih suksiat sak uhi. Tua operation ahihleh Myanmar leh India gamsung a om Nagaland leh Manipur gamgi zul mun nih a neih a om hi a, tua operation ah 21 Para Special forces apan commando 70 kihel uhi. Helpawlte camp buluhna a tel Commando te’n assault rifles, rocket launchers, grenades leh night vision goggles zang in Air Force lenna Dhruv helicopter a tuang in khovak ma in Myanmar gamsung lut uh a, Myanmar a tunnung uh Km 15 val khevuak a gammang lak a a pai nung un, helpawlte Camp tung inminute 40 sung in helpawlte camp nih suksiat sak in, India hong lutnawn uh a, helpawl a tel mi 158 that uh hin Army in taklang uhi.

 

Organization:

Parachute Regiment in ahihleh tulel in Special Forces 7 nei in, Airborne 6, Territorial army 2 leh Counter insurgency a zatding Rastriya Rifles battalion khat nei uhi.  Parachute Regiment in Special forces a neihte lak uah Para Special Forces te nasep ahihleh (mi tawmchik a khenchiang a, mimal khatvuak leng hithei) galmun a galte thah ding chih hitop a, Paratroopers (Airborne) te nasep ahihleh a lompi a kizui in, a lawmte uh galmun a omte huhna piak chihte hin kigen hi. Parachute regiment in ahihleh tulel in a sung a sepaih 4500 vel nei ua, huailak ah Paratroopers (Airborne) kichite tamzaw in, Para Special Forces te ahihleh 1200 lel pha uh hin gen uh a, himahleh a hihna uh leh a melpuak uh mipi lak a lahkhiak a om ngeilouh ziak in, tuasang a tamzaw ding ua gintak in om hi.  

 

Indian paratroopers a lut tengteng ahihleh amau deihtelna ziak a volunteer a lut hi ua, himahleh khenkhatte bel Para regiment a telding lakna neih ahihchiang in Fresh recruitment tungtawn in lut uh a,  midang khenkhat ahihleh Army a lutsa Unit tuamtuam apan lut hi uhi. Parachute Regiment nuai a Para Troopers a lutding peuhmah kha 3 sung etkhiak masak hi ua, Para Special Forces a lutdingte ahihleh kha 6 sung etkhiak hi uhi. Ahihhang in, Para special forces a lutna ding in, Para troopers a etkhiakna leh training bangkim a zoh masak uh ngai hin gen uhi. Para Special forces te Training ahihleh khovel pumpi a haksapen leh gentheih huaipen hidan a chiamteh hi a,  ihmu lou a hun sawt pipi om, gawtna haksatak maituah ngapna, gentheitak a mahni a khosak theihna leh taksa kisoisakna banah lungsim lam kithununna chihte a palsuak vek uh ngai hi. Tuabang a Training leh kilakdan a haksat luat ziak in, Para Special Forces a lutding a test neih a omte lak ah 10 percent te kia training paisuak zou in, Para Special forces a ding in laklut hipan phet uhi.

 

Training:

Para Special Forces a training hunsung ahihleh kum 3 leh a kim khawng lut zou in, khovel pumpi a training hun sawt lut pen a chiam teh ahih ban ah, training a zohnung nangawn un leng basic leh advance traing neitou den lai uhi. Para Special Forces te ahihleh helpawlte camp luhding dan, mi buluh hun a suahtak ding dan leh huihkhua tungtawn hin tuitung hileh galmun a om dingdan bangkim sinsiam sak hi ua, training sung in Para special forces a semdia training peuhmah in, free-fall course a velh suak zoh uh a ngaih banah, tang sangtak feet 33,500 tan a sang apan 50 vei a tawmkhiak zoh uh ngai hin kigen hi. HALO (High Altitude Low Opening) leh HAHO (High Altitude High Opening) techniques chihte a zil ban uah, tua HAHO zat theihna ding in  HAPPS (High Altitude Parachute Penetration System)/AMX-310 kichi parachute zang a tawmkhiak chihte a siam vek uh ngai hi.

 

Tuitung a khosak dingdan sinna toh kisai in, Commando te India Navy nuai a Naval Diving School, Kochi ah tuinuai lutdan zilding a sawllut hi ua, Special forces dangte bang in Para special Forces te ahihleh leitual, tuisung leh huihkhua a om thei ding a sinsiam sak hi uhi.

 

Para Special Forces te a training khitnung un leng zingkal teng in km 20 tan a taitung gige uh ngai a, Infiltration, exfiltration, assault, room leh building luhdan, thuguk kaihkhawm dan, patrolling, ambush tactics, counter-ambush tactics, counter insurgency, counter-terrorism, unconventional warfare, guerilla warfare, asymmetric warfare, buluh leh hihsiat, martial arts training, tactical shooting, stress firing, reflex shooting, buddy system drills, close quarter battle, tactical driving, advance weapon courses & handling, sniping, demolition training, survival skills, linguistic training, logistic training, trade-craft training chihte intelligence agency tuamtuam toh pangkhawm in niteng a sinsak in om uhi. Training hunsung mah a thaukap dan kizilna ah thautang taktak zat a om gige ziak in, a khenchiang in sihna tanpha tunkha sek hin gen uhi.  

 

Nitak hun a khosak dingdan leh galvan kepdan toh kisai kisinsak hun ah, vangik Kg 60 a gik leh thautang tamtak Km 20 a gamla tan puaktung sak hi ua, kalkhat in Kg 65 a gik pua in mel 50 a kipan mel 80 kikal nitak hun chih omlou in thakhat khat in paitung sak hi uhi. Tua training haksa taktak behlap tu ding in, Commando te Indian Army nuai a school tuamtuam honkhiak a omte ah sawl a om in, huai ah tanggam haksa taktak a khosak ding dan leh mun khatpeuh a gal om hun a om ding dan sinsak in om lai uhi.

 

Para Special forces te Training a zoh dek kuan un Belgaum, Karnataka a om Junior Leaders' Commando Training Camp, Parvat Ghatak School (for high altitude mountain warfare) Tawang Arunachal Pradesh; Desert warfare school, Rajasthan; High Altitude Warfare School (HAWS), Sonamarg, Kashmir ban ah Vairengte, Mizoram a om Counterinsurgency and Jungle Warfare School (CIJWS) ; Indian special forces training school, Nahan, Himachal Pradesh ah training neihsak hi uhi. Tua a tung a school taklat a omte ahihleh gam tuamtuam apan sepaih tamtak te training na mun ahihziak in, tua training school a training khinsate’n sepaih dangte sang in siam tungtuanna nei uh hi’n gen uhi.

 

Para Commando te siam tungtuante lak a khat ahihleh SHBO (special heli-borne operations) leh kidouna lenna Cheetahs, MI-8/MI-17 or HAL (Dhruv) helicopters chihte pansan a operation a neihtheih vekna uh ahi hi.

 

Joint exercises with other nations:

Para special forces te’n ahihleh gam tuamtuam apan sepaihte toh leng joint exercises ana nei ngei uh a, VJRA PRAHAR chih min zang in kumteng in US special Forces te toh Joint Exercise neikhawm zel uh a, Russia toh INDRA series kichi neikhawm in, Bangladesh toh operation sampriti chih min zang in Joint Exercise kumteng in neikhawm gige uhi. Huaiban ah, Israel Special Forces te toh leng Joint Exercise a neihkhawm ban uah, UK infantry Unit, France, Mongolia, Kazakhstan, Uzbekistan, Kyrgyzstan, Myanmar, Nepal, Maldives, Seychelles, Singapore, Indonesia leh Thailand toh a changchang in Joint Exercise neikhawm den uhi.

 

Vanzat khenkhatte:

Para Special Forces te’n ahihleh Operation a neihna mun ding uh dungzui in a vanzat uh leng kheng uh a, himahleh a vanzat tangpite uh hiai ah i taklang ding.

 

SMALL ARMS:

Pistol Auto 9mm 1A Semi-automatic pistol

Glock 17 9mm Semi-automatic pistol

Beretta 92 9mm Semi-automatic pistol

Heckler & Koch MP5 Sub-machine gun

Micro Uzi 9mm Sub-machine gun

IWI Galil Assault rifle

IWI TAR-21 Tavor Assault rifle

M4A1 Carbine

MPi KMS-72 East German made side-folded Kalashnikov rifle

PM Md.90 Assault rifle

VZ. 58 Pi Assault rifle

SVD Dragunov Semi-automatic sniper rifle

IWI Galil Sniper Semi-automatic sniper rifle

Mauser SP66 Bolt-action sniper rifle

PKM General purpose machine gun

Uk vz. 59L Light machine gun

MG 2A1 General purpose machine gun

AGS-17 Plamya Automatic grenade launcher.

C-90-CR-RB (M3) Disposal rocket launcher.

RL MkIII 84mm Recoilles rifle

B-300 Shipon 82mm Rocket launcher

 

PARA (SF) TE PUAKVIALNA A KIZANG KHENKHAT:

C-130J Super Hercules tactical transport aircraft

HAL Dhruv utility helicopter

All Terrain Vehicles

HAL Cheetak utility helicopter

Read 1124 times Last modified on Thursday, 08 December 2016 01:02
Login to post comments