You are here: HomeArticlesGeneralNatna Lauhuai 5ytE Virus

Natna Lauhuai 5ytE Virus

Written by  Dr Thangminlun Mangte Published inGeneral Friday, 03 March 2017 00:58
Natna Lauhuai 5ytE Virus

By: ~ Dr Thangminlun Mangte, Local Pastor, EBCC, Bangalore

 

Khovel khantouh ziak chihding ahi diam, ahih keileh mipil leh siam a tamluat tak ziak ahi zaw diam, bangziak pentak ahi dia khovel ah natna chi tuamtuam leh thilmak chi tuamtuam kibehlap a apun hulhul theih. Abik in natna kumlui mahmah "CANCER" nangawn leng khovel pumpi ah misiam hiai banga tam om mahleh hihbei chihthu zak hinai hetlou, a zak nop huai hetlou dang khat nawn ahih leh AIDS toh kisai a dam siang nading a damdoi geih muhkhiak taktak om nailou mah bang. Huaite banah akal ah khosik natna chi tuamtuam: Chikungunya (CHIKV), Ebola (EVD), Swine Flu (H1N1), Dengue leh a dangdang ana omtei gun.

 

Hiai natna chi tuamtuam igente a mawlchik a gen in leh a tangpi a i theih dan in KHOSIK chile agenkha vek maiding in ka gingta hi. Himahleh a veitute veidan bel akibang vek kholkei ding, aziak ahih leh, kei veikhak Dengue kia lel leng kei veidan leh midangte veidan a kibatlouh ziak in. Khenkhat ten lu nasalua in puakkek ding bang chi zezen uhi. Khenkhat leuleu inlah guhtuah teng na, chi teng pumnat chih leh a symptom tuamtuam in kigen thei zel hi.

 

Khosik natna igente bel a tunga igen 5ytE V banglou takin kum teng in amau hun chih omdeuh mah bangin honglang theizel uhi. Times of India 24/2/17:3p, ngei ah H1N1 (swine flu) toh kisai hong kigenkha nawn hi. Tukum 2017 adinga ni 54 vel paipan mahleh nikum 2016 sunga hiai natna veite (mi 110) sangin Karnataka sungah (mi 344) tam in veizaw chih thudik kigelh simtheih hi. Huai bang ahih in tuh thuneitu leh mohpawtu ten hiai bang natna laka pan mimal te kiven/suahtak theih na ding a pan naktaka a lak uh ngai ding chihna suak hi.

 

Hunpaisa tawlkhat bang houh EVD hong ki hahgen mahmah in mi nautang patausak mahmah hi. Huai hun lai in lawmte khat in hon sms a, Bangalore ah EVD natna mukhia uh kichi thu kana za a ataktak hia? chin hon dong kha hi. Tawlkhat teng hong ging mah a, khualzin leh hong zin dingte Airport ah etchetna nasatak a ana neikha ngei uh chih ahi hi. Natna kichi peuhmah natna hoih chih omlou in, avek in deih huailou hikhin pah a, hinapi in i lauh deuh leh bildoh deuh pawl ana om a, lauhlouh deuh leh ngaihzam deuh pawl bang leng om veve hi. Amaute sepdan leh hatdan/kin dan gending omchiat a, pawl khat sung lam apan a om lai in pawl khat pawlam (skin) a kipan bang leng ana om thei veve zel hi.

 

Natna lamkia genlouh khovel ah Pathian thupina chi tuamtuam in kilang zel a, hong kilang zomzel laiding hi. Times of India: 23/2/2017:1p, ah Leitung chia alian ding Planets dang 7 Aksi lam telsui ten musuah thak uh ahihthu Kenneth Chang apan thusuak in gen hi. Hiai planet min dingin Trappist-1 chih pia uhi. Agintak dan un hiai te ah mihingte ading in hintheih/ten theih leh kilawm chi uhi. Ei Planets simkhak lai in bel 9 phasak uh a (Mer ~ Plu) himahleh ahon sui thakthak chiang un Pathian thilsiam te khat khit khat in hon muhbeh zel uhi. Hiai thu hiaizah hileh.

 

I gennop tak bel, kumte paizel in mipil leh siam tam hiaihiai chih thudik selvual louh ahi. Eimi sung leltak ah leng nidang toh teh dingin BA (Graduate) lel leng kum tengin tampi a ki behlap zel hihang. Hichibang a mi pil leh siam pung hulhul leh iki behlap hulhul lai in hiai natna 5ytE V in bang chibanga mite sukha hiam? Bang chi sukdam theih ding hiam? A damdoi ding a bang hoihpen ding hiam? chihte tel taka suiding ki tam nai phalou hikha ding in ka gingta hi. Hiai tuh India gam sung state tuamtuam ah a hii leng in mi naktak in nokkha sek a, akhol diak in ei omna Manipur state in kithuak kholdiak a diam kachi hi.

 

5ytE V kichi leng atung a natna kigente adiak in CHIKV, H1N1, Dengue AIDS te dan danin kiloh sawn theih natna ana hi a, kiloh leng baihlam kholdiak a gen in om hi. Himahleh a symptom ahihleh a dangte a toh kibanglou hi. Hiai natna dangte bel igensa bangin luna, chi pumnat, khosik sang, luaksuak leh a dangdang in suak thei a, himahleh 5ytE V leuleu ahihleh ki huatna, ki chimtakna, iplahna, muhdahna leh ki thulak tuahlouh na bangin suak khethei mawk hi. Huaiziakin, hiai natna tuh a chi tuam mahmah natna 5years Term Election Virus ana himaimah hi.

 

Hiai virus in asuk khak leh a veikha miten kum 3 tan khongin damlam hon manoh in, huai huna kituak chiahlou te bangle hong kituak nawn dek panpan ta chih chiang in kum 4 hong chingin, a kum 5na a election om nawn ding ahihziak in a huzap hong kipan nawn manzel in damna leh damsiang na ngahdek pan kiangkiang lah damsiang manlou in honlap manzel hi. A nawk khak vanglak, inkuan, tanau laina, inveng ipam ki tuahlouhna, banah nam sung leh Saptuam sung nangawn hawi a omlou in hon nawk kha petmah sek hi. Abikin, Saptuam khat ah bekhawm kichi te nangawn leng lungsim munkhat ah bekhawm thei nawnlou, Biakin sung khat ah bekhawm hinazen pi lungsim kigamla thei mahmah, kihou tuah khakding bang lau tuntun pawl bang leng hiai natna ziakin omthei hi.

 

Pathian vualzawlna toh South Korea ah ka omsung in kitelna tuamtuam bangzah vei hiam anei man uhi. Huai hunte ah party tuamtuam in lamka bom khong ah campaign bawlkhawm in mi bangzah zah hiam ding uh a, party tuam himahle uh kizom diudeu in ding thei zel uhi. Ading khom lou te leng lampi lehlam tuak ah dingin mipi hongpai te kiangah hiai party ah vote peni aw... chi'n kamsiam tak in ana genzel uhi. Eilawi toh teh dingin tuh 5ytE V pen amau sungah lutthuk zoulou chihding ahi diam, ahihkeileh amau pilta vet un hiai virus pen treat dingdan musuah ta uh chihding ahi ding. Hiai bang hun eilak ah, i insung, veng sung leh namsung ah ahong tun a, hiai virus ziaka i Khalam hinna hihliam a a omlouh ding tuh lunggulh huai mahmah leh ka thumna ahi.

 

Hiai virus hih chimit na ding leh ilak apan hawlkhiak a aom theihna ding lampi omsun hia katheih te lakah tamlou hon share leng: 

 

  1. I tanga pang dinga itel dingte apan mimal in lamet tuam neikei leng.
  2. Mipi tanga pang dinga kisa ten diktaka sep leh mimal hamphat na ding sanga nam a ding  pibawl zaw leng.
  3. Ei mimal leh inkuante tungding ding lel, beh le phung khat lel heutu ding neih sawm kei le.
  4. Teltu ten i kumpi/chief guest ding hilou in i sik le tanga vaihawmna mun ah pang ding tel le.
  5. Pathian lau heutu ineih theihna dingin Pathian lauhna toh teltu ten telpah leng.
  6. I telkhiak ding palaiten hon bawlhoih ding leh khem lamdang vek ding ua omlou in, ei mah mimal chiat in ki bawlhoih pah zaw le.
  7. Mimal, inkuan, Pawlpi tuamtuam te leh Saptuam ten mihing et a hoih heutu kibawl zawlou in Pathian honpiak ding heutu ngen in hahthum in thum leng. Huchilou a thauvui thautang, tha gum leh mahni deihtelna tellou a phutluih a heutu ding tunkhiak thohte hilou in.

 

Hiai teng louleng 5ytE V toh kisai gending tampitak a omlai ding, himahleh i genseng kei ding hi. Huaiziakin, hiai natna i veikhak ma in kiveng ni. I inkuan sung ah hiai natna a honglut vanglak leh zaw a hawlkhiak nawn ding thubaih hilou ding hi. I in sung ah hiai natna vai hawmsak lou dingin Pathian thil bangkim hihthei khut ah kitulut thak chiat ni. Huaiziakin, tukum apan hiai natna in i insung, veng sung, nam sung leh Saptuam sung a neksiat louhna dingin nang leh ken panla in hiai natna doukhawm ni chi in Toupa min in ka hon chial hi.

Read 489 times Last modified on Friday, 03 March 2017 01:11
Login to post comments