You are here: HomeArticlesGeneral‘Sex’ Tellou A Pasalte’ Lungsim Zohdan: (numei/nungak hilaite’ a diing biik in)

‘Sex’ Tellou A Pasalte’ Lungsim Zohdan: (numei/nungak hilaite’ a diing biik in)

Written by  jamin H vualnam Published inGeneral Wednesday, 22 March 2017 22:52
‘Sex’ Tellou A Pasalte’ Lungsim Zohdan: (numei/nungak hilaite’ a diing biik in)

-jamin  H  vualnam

 

Numeite, adiakin Nungak hilai te’n i ngaihtuah khelh leh hihkhelh veu uh, huaimah inazatkhak vuatsek utuh ‘SEX’  ahi chileng dik mahmah din gintakhuai hi. Pil kisa leh bawlthei kisadeuhten Pasal/Tangval adeih leh khiaklahte uh  tan/neih nading ahihnak leh chih ngaihdan nei a ataksa uh phahkhevek pawl ki om hi. Tuabang nungak te’n, pasalte (tangvalte) bang tuh Uital bangmai ahi ua, ikihonzek nak leh sa-free chaan/khah uttuanlou ahih chiang ua, atoptop a kivualzou/kitangzou mai aka chih paipih pawl kitam mahmah ta hi. Alohching leh hihfuh khenkhat om mahleh a fail a lohsam tampi leng omta a, amau ading in mahni kituisabuah suak phet  uhi. Tuabang gamtatna in hoihlam sang in siatlam tuntam zaw a, huaimah leng Khristian te adia thil hoihlou topkhok ahi hi. Tua ahihman in huchibang ngaihdan leh paidan lungsim  neite adia lampi hoihzaw, siangthouzaw leh dikzaw a, a deih te-tet uh leh a lung-gulh pente uh lungsim zohtheihnang  lampi tamlou taklang zual leng a phat-tuamna om khamoh lou ding hi (sex tellou in).

 

i. Na thuguuk hilh zelin: Amah tua pasal/tangval namuan a nagintaak dante theisak zelzel in. Nahun paisa a natanchin kuamah nahilh ngeilouh, atheih a apoinaang omlou nachih thute hilh cheuh zel in. Huai in amah namuandan leh nagintak dan alangsak dia, huchi hileh nachih simsim pa (tua tangval) pen nanglam ah hong awn-nai hiai hiai lel ding hi.

 

ii. Avangkim in nuisak zel in: Anuih theih nang lampi zong inla kidamhetlou a nuihsak tum in. Nakiang a kipak leh lungkim a a nuih laihlaih theih leh hunhaksa, thawmhauna leh tangkhatna a tuah hun in nang hon ngaihtuah in a hon lung gulh vungvung ding. Huaimah in nanglam a puukdia a khetaw a sathau nuhsak nahi mai hi.

 

iii. Nek-le-taak bawlsak zel in: Atangpi in pasal te’n nek-le-tak a ngaina vanglak ua, nek taak bawlsiamte a ngaina tangpi uh. Athupi leh mantam hita sekeh, na neih bangbang siamneel tak in bawlsak zel in. Tua in naki piakzohna leh nakhualdan a genchiang huntawk. Huchi hileh nanglam a puukdia lampi sialden nahi maimah ding.

 

iv. Midang a lawmpolh phalsak in: Pasal/Tangval tangpi te’n a lawmte uh pasal/numei a ngaina tangpi ua, a lawmte toh kithuah khom a hunzat leng a ngaina uh. Alawm avual toh kithuah a kikholh phalloute a ngaina in a awlmoh kei uh. Huaiziak in amah chauh hilou in a lawm dangte leng lawmbawl inla amaute leng hunpiak dan siam in. Ahuchih keileh buaihuai, ninhuai, thopikhuai leh dongkholh phet honsa maimah kha ding hi.

 

v. Naphawkdan leh naveidan langsak in: Movie/film hiam banghiam thil khasiat huaitak na etlaite uleh banghiam hun haksa natuah hun in khasia leh thomhau takin kapsuk zialzial mai oh. Numei lungkham leh khasia’ mit-tui pawt/luang in power aneitam khop mai. Lungsim siangthou leh hoih, deihthoh huaitak  suknat baihlam tak nahi chih atheih nang in. Pasalte  ki pasalsak phenphan mah le uh, tua na mit-tui a luanziak in honheh pihna uh alian semsem dia a honduat sawt ding ua, mokmai in ahon pawng nutsiat kholkei ding uh.

 

vi. Pilsiamtak, omdanhoih, zahtaak theih din om in: Nek-khawmna ah hi’n, bazar nakai na uleh kholak ah, koihiam a kithuah khawmna hunte leh midanglak a na om chiang in/un, omdan siamtak leh zahtaak theihdin om in. Amah (na chihpa) leh alawm leh vual adia nuam moh leh zumhuai hilou, lah aneel a neelhuai a amah (nachih simsim pasal/tangval) ngaihsak mahmah in om in. Huchi hi leh a guuk in nang a honsuang mahmah ding. Aziakbel miteng  in midang toh omchiang a izumpih leh zahpih theihdia omte nuam moh leh zahlakhuai kisa a, tuabang a omte kuaman kingai hetlou ahi.

 

vii. Asungkuante ngaihpoimoh pih in: A changchang in nang aa lamte kia awlmoh lou in ama sungkuante leng bang achi ua, a hoihzel uhia chia kan zeuzeuh a ngai. A sungkuante ngaihpoimoh pih inla, a sungkuan leh tanau lainate’ kizopna, kinaina leh kitanauna zahtak pih/sak in. Nahuchih ngeingei leh hon ngaihlouh chang om zeuh mah leh, a taktak in naakpi a hon-ngai a hon khelah petmah ding ahi. Huchi in nanglam a awn-awn mipa pen, nang adia nakhebul a hong puuk heuhau maimah ding eingal ve.

 

viii. Kam tomlua/tamlua hilou paunuam leh polhnuam in: Nungak khenkhat te’n gentuak leh tuaklou khensese lou, ut-teng leh lungsim a omteng baan geen zeelzuul uhi. Kam (mouth) vangtah chih man a tuahteng phihkhiat mengmeng louh a, gending leh genlouh ding khensiam kisam mahmah hi. Kamtomlua a pau ngeilouh bikbek chih leng hoihlou zel a, kamtamluat leng diktuanlou hi. Mi houpihdan ahun leh mun, athu-le-laa zil a siam leh paunuam a polhnop hihding. Thulimlou leh thilhouchik a heh a muk puak pahpah louh, ahihziak a a hehtheilou bel hih tuanlouh ding. Tuabang a omdan leh kampaute nang apan ahongsuah a na phoukhiak chiang in tua na chihsimsim pa’n hon ngaina a, nakiang a om khelah tuntun a a lungsim teng luahkhin dimdem hilel ve te aw.

 

Tuabang teng a nahih a nazuih vek ngeingei leh na deihpen leh na khiatlah tuntun Tangval/Pasal tuh nang a hong hiziang ding ahi. Nataksa leh na pumpi kahiang tuamtuamte a pasal/tangval zol a hih huanhuan a mitsah gaihgaih a ngainon kei ding. Huchi hileh nang leh amah na kipak dua, huan na kaal uh leng chidam in Nupa hinkhua nazang touzel ding uh. Huaimah lah a siangthou, adik leh ahoih a nachih simsim pa’ lungsim na zohna hong himai mah aka hia. Huai tuh Toupa’ deihdan leh Khristian te’ hihding mah ahi ngal a. Apil kiukiau, ahoih mahmah, puang phitphet leh duang kikhai a limchisitset Nungakte, tuadan din pan hongla himhim ua, nahih khial in na thangkam ah tua navei a nalungsim tengteng luahtu ‘TANGVAL’ a hong awk kei na hiam…(huaituh, nataksa a nathilhoih neihte (sex) zang sese lou a nalung gulhpen na ngah/tan theihna lampi hoihpen ahih kha…)

Read 923 times
Login to post comments