You are here: HomeArticlesGeneral‘Kavan’ Pozoulou Himahleng ! .

‘Kavan’ Pozoulou Himahleng ! .

Written by  jamin H vualnam Published inGeneral Saturday, 13 May 2017 00:57
‘Kavan’ Pozoulou Himahleng ! .

-jamin h vualnam

 

Kumkhat leh a kim bang innlam (Lamka) pailou a India khopi leh sumdawnna munpi Mumbai a ka khosak nung in ngaklah mahmah a Pianna Vangkhua, tuun-leh-zua, chiin-le-tuai vabang lenga, ngabang abualna zuandia ticket kalak ni tuang hongtung petmah hi. Paipat na’ng ahihtoh kilawp petmah kahi ngeidia, zinpaak ding leh bangbang hiam kalei neuhneuh ziak hinteh; Chatrapati Shivaji International Airport a chek-in kabawl-leh ‘Kavan’ (luggage) mikhat in apuak theihzah khengval a gikzaw hongpha keihkuih tel hi. Seel  15kg valteng kapuak ut teitei leh apuakman ding atuam a Rs.4000/5000 liau angai maimah hi. Puakvek dia lah tampi seenbeh ngai (sum neideuh hile bel poilou lua), puaklouh dialah pammaih leh tampi seeng a ilei hizel. Ka nervous toh hehtha suah toh lungkham toh chihngaihna theilou in a nawlkhat ah kading deenduun hi. Deihkhop a kikou khiak ek-ek a kah tuaituai bang uthuai petmah himai. Dak-kal leh minute te’n, kei chihman a hon hungaih tuanlou ahihman un, ka-omna a nehnou tak a dindet in bangmah vaivenna honpelou ding ahihman in a lampi ding ngaihtuah a kei-le-kei kakisai mengmeng tuh alou theilou ahi tamai.

 

Counter kiangnaih a vading in midang check-in bawlte leh avan (luggage) neihdan uh, a paina’ng agente uh kava ngaikhia hi. Hun sawtlou kadin nung in; Lianlolou, sanglolou leh vom-mamsim, ahihziak a kisaphut thit-thet leh teimel deuhmai; akicheidan, gamtat khohei leh sam-metdan et in michitak, mipiching huntawk leh neelhuai lomlom hilou, ahihziak a treirawl a phevelvul hilouding mikhat counter lam manoh a hongpai kamu hi. Hong naihdeuh tak in amelput in ei, north-east mi leh sa ahihdan akilang hiaihiai a kadiip bang phu-zot in kathei hial hi. Mitphelou zen a kana et-et lai in Tuapa’n, van (luggage) aneih louhdan, ataklam liang a laptop kuah, veilam bil a phone ngaikhekom leh awl-awl a paukom a hong naih hiaihiai kamuh in; kipahna leh hih heuhau nakhat kananei a, lungmuan nariau khat kanei ri-ngawt hi (laptop chihlouh vandang neilou aih chia). Kamelh nilouh a, counter a akihouna uapan in; amin leh apainang katheih tak in kachihum hongthou sungsung hial hi. Buaisia kahihman in, zahta’kna toh, kisuanlah toh, zumhuai mahleh aw ling pipelh sim pi’n: Ulian ! (den a Suanlian akichih uh meilet ngal) nangle’ng Imphal chiang di maw ? Nang kia maw ? Van nahau hia ? Keichauh hiing a kapai patna’ng ahih toh van/luggage hausim ing a, I kiton theidiam? Kho-ul kaizen a k’onchi bangzaw, kisan tiaituai phetsam. Paulou in hon-en giugeu a, atop in Nang koichiang paidi? Koi a bangsem? Innlam a bangveng a om? Bangchi’n kongsam dia le? Honchi bangtuh naihphei a pumkoi a kikou khiat vongvong bang uthuai himai. Huaiphet in aman (Ulian in), koiteng a navan chih toh amah adan a gen in baihlam tak in kasaithei uhi. Kenleng anung ah, nungak-le-tangval kinuaksan hileh kilom in kazui nalhnalh a, lenna sung ah kitengthak dingte bang in katukhom chetchat uhi.

 

Huihkhua sangtak a kalen lai un, Moi (Momoi) Mumbai a na omna asawtta hia? Bang nna a nasep? chih leh introduction tuamtuamte kidong in houlim honpatpih hi. Mibang a naaknuai kamsiam chihte kei a ahihlouh man in hondotnate ahibang in kadawng chiatchiat veve hi. Kolkata Airport a connecting flight nei kahihman un, Ulian in feltak leh thovengtak in hon makaih chatchat a, buaina bangmah omlou in maban kale’ng nawn uhi. Kolkata leh Imphal kikal a gamlat louhziak hia, ahihkelah gending athei ka-omlouh ziak uh ahizodiam a, banghun chia Mumbai a kiknon ding chihleh ka phone number tuak uzaw kipeman hamham in Tulihal Airport (Imphal) kongbawh guaiguai uhi. Kitondia kihousa mah bangin Airport apan kitonkhom in kou Innlum tuak (Lamka) dam in katung ua Pathian pinate leh makaihnate kipahhuai sa in lamdang bang kasa sonson hi. Nitak hongsawt dekta a, lampaina tawlsim kahihtoh ihmupah hit-hit ding kakisak leh ka ihmuthei zok-kei a, tuni a kalawmpa Ulian ka ngaihtuah khakha hi. Ameel zaw ahoih lua chih a gending hikei, himahleh amihinzia, omdan, kampau leh a cheetdante kamitkha ah akilang dundun a, apautam louh ziakin mi ngaihhuai mahmah ahihdan mitkha ah kilang dundun hi. Huchih sung a ihmu kahingei dia, ka khanloh in ni ana sang loman hi.

 

Nitamlou nung leh gintaklouh pi’n Ulian (Suanlian) hongpawt zenzen a lamdang bang kasahial hi. Kipahnatak khat neimah leng a lehlam ah kisuanlahna, kizumpihna leh zahtakna banghiam khat om abang a ka-om dingdan theilou in kanuih khong asuak thep-thup hi. I kamsiam louhtoh gending itheihlouh zawkmah toh achang in phunlou paulou in katu bekbuk uhi. Ka nu-le-pa kikhomtop hongpaita ua experience neikhin chihmah, gending leh houlim dan hongpai hoih vanglak a, kong kitonkhak dante uh gen in kanui zaizai uhi. Kei gendia kilomzaw himahleh kanu’n; Lian, nangfel ziak a Momoi, thomhaulou, lamzangtak leh se’n-le-pai omlou a hongtung thei ahi a kakipak petmah uh. Naman lemchang chiah khatveibe’k ann nongnek ding ahi achih tak in keileng thumu kisa in, eimahve Ulian, nangvang a haksatna omlou leh liau-le-seen omlou a innlum hontut naih chia nong nek teitei di himai. Paulam bawltheih louh naman hunding hontheisak in aw, kahihtheih sun uh ahi kachi heuhau hi. Ulian in eh! Nitak a sawtdekta kana paiphot ding chihtoh din athuah hi. Kenleng kongpi/gate chiang kakhak komin, Ulian nafel-lua kou inn khong ah nongpawt ut a kakipaklua, eh! chikchiang a ann nongnek di, alou theilou ahi aw chihleh poi nasak keileh hongpawt zelve. Chilelah  kuahiam aheh diban ah ei kiang sang a utzawkna omdi aih chia maw he.he.he… chia chiamnuih komin ihmutlim kaki chituah uhi.

 

Nitak khat Ulian in hon phone a, kakihou uleh kadang bang hong-awk sim zomah hi. Moi, na inn ua ann-nek utlou kahikei a ka leave/suty atomluat man a hong ne manlou kahi. Damleh zingchiang in Mumbai a painon som ka hi, Nang la banghun a sawm? kitonthei nonlezaw maw, nangtoh ikiton leh nuamlua hi a. Chile lah ei, utmahleng nangbang in ikitonkhak nondi huphulh petmah nahihmel kuan athei a, ahihkelah kuahiam toh kitondia kigenlem khin nahikhamoh di uhia maw? Damleh huailam nongtunkik chiang in poi nasak keileh kimuh isawm keidia mawle chihtoh, mangpha, ihmutlim chi’n phone tungton a kakihouna masapen uh kazou uhi. Lampi a hon makaih dan leh panpih dante mitkha ah abanban a hongsuak dundun ahihman in. Kenleng kahih theihsun message, romantic sim a gelh in kisuanglah leh diipkosa in sih-le-sih, dam-le-dam chi’a kakhak zohin ka ihmu hi.    

 

Khakhat vel Zogam huihkhi dik-kom a sepding bawlding zong a asuk atou a idiandian hangin, daikilkal a mi chihmahtak, mi lah neilou, sum lah nei tuanlou ihih chia sepding bangmah kokeklou a suak hi (govt gentaklouh private aleng). Tua ahihman in khosakna azia a omdeuh khak leh chihman in ut-leh-utlouh thu hilou in, Mumbai katung kiknon hi. Kasepna ngeimah a kavapai leh khakhat val absent nahihziak in nata’ng ding midang kalata uh hon nachihsan maimah uhi. Kabuaidan leh thil-omdan kagen nung inleng vailak zunthak a bang maimah a kabuai petmah hi. Ngalhapaksa tumkiklou e chih bangdeuh in, sepna dang kazongdia kathonkik kei himhim ding chia kihanthon in, aguuk takin kagenthei mahmah hi. Khakhat vel asuk atou a kadian nung in bangmah kamutuan kei, huan kasum neihteng lah beita, lawmte’ pangbel himahleng hongsawt chiang in anuam chiahlou thil tuamtuam hongtam hi. Innlam a paikik ding chileng lah ka bahara ding nasan neinonlou phetlou a hul kiuhkeuh kahih manin kalung akham mahmah hi. Innlamte’n  lah kei ah kikepna lianpi nei ahih chiang un, bahara ding leh nget thil hithei vuallou hong suak sonson hi. Huchih hunin kanumei hihna period in hongpha zomah a, alampi ding omlou ahihman in nidang a inu, ipi te’n ana hihdan un puansethem peuh zangin kakidal maimah ta hi. A chang in gilvah laivah a neklouh hun atam a, huan imit natom ahibang a hah ngamlouh hun atam hi. Zat-tawmding tamlou ngenzel mahleng azihzeh a dia amauleng kidaihlou ahihman un khitui nulna in kabawkgai ahipen mai. Katha leh lungsim tengteng sikhin toh kibang in nidang kabang zounon kei, vulniingniang a vuahpi, huihpi zupahding kabang dedu maimah hi. Akhenchiah kataksatung a munpoimoh lianlou tuamtuamte, siangthou leh limchi a kuaman apaak aloh ngeilouh leh agimnatom anapkhak nailouh te uh vanzat manpha a taaksap awng huding leh asumpidia zatsukmai lung-gulhtha a suah ngoihngoih hun atam hi. Huan tulai mite’ thansak; khauhual hiam puanthem lianlou atoulam a oh geigoi a khovel nutsiat mai bang ngaihtuah na ah honglang dundun thei hi. Himahleh tuabang hial dia kakiphal-louh ban ah kakisiamtan theikei a, kasisan inle’ng a ngam hial keizel. Pathian inleng huaibang dia honsiam leh bawl kahihlouh man in, haksa thuakzou lou a kisih hialtaak lehleng thupi in manpha kasakzawk ziakin kikep siangthou katum tinten zohi.

 

Pathianni khat lupnatung a kakidiik nilouh leh, Ka phone hong ging a ka-etleh, Ulian (Suanlian) ana hi a peihlou sasa a saulou kakihou zoh un; Moi, bangchi e? damlou maw? innlam a omlai maw? chi’n lamdang sakmel deuh in hon dong hi. Kenleng, Mumbai kongtun nung khakhat valta eive. Dam-mah ingh, tulai hita’n toh ka-om anuam chiah kei a chi’a ka dawn leh; huchidi neimah ve, Innlam guu leng lungsim a thak lolai ding ahih chia chi’n honchiam nuih zomah hi. Kalungsim leh ka omdan theikei na mahmah chia maw chih ngaih tuah komin, huchidan le hikhang eeii, nang gintak kibang kei ve aw  chi’n ka dawng non hi. Huchi a hihleh kongpawt theidiam? naphal hia? apoina omdiam? hon chi non a, kenleng mawkmawk eive! na nungaknun hontheileh hoihlou ding ahi. Kuamah sukbuai ka-utdan leh ka deihdan leng ahi kei himhim chi’a nuikom in ka dawng nemnum hi. Khaih, aheh ding mahmah neikhang ei, nangpetmah naheh ngal keileh chi’a hondawn zoh in, kachih taktak eive Moi, ana om ou chi’n a phone a koih daih hi. Ash ! bangchih di ade aw, honghoh taktak de aw, anak zumhuai di e.e.e. kadinmun honthei leh honthu laak kei mah di. Nidang hundang deuh be’k hileh zaw, ash! hongpawt taktak bang hileh….. ah bang! honchiam nuih maimai hinteh, chile lah gintakhuai simzel a, bang achide aw….Chi’a kaki ngaihtuah nilouh sung in kongkhak hong kikiu petmah a, eh ! ash ! ash !…di’p phuli-lit leh omdidan theilou zen a kavahon leh Ulian ana hipetmah hi.

 

Bangbang hiam kahoulim lai un Ulian in hon-en en a atop in; Moi, na damlouh mel ve? A’ihkeh nungkaih veilai nahi hia le? Chile lah keibang hongpawt tel hive’ng kua a nguai lou mah dia chi aw? (nuikom in). Bangmah chikeng, nangbang nongpawt leh kihalh huaihuai hizomah ei chi’n kaki-iim teitei hi. Mipilvang chihmah tak, naki-iim na a namel in lah hon support teuhlou chu bang chi hita di? Banghiam lungkhamna, haksatna leh buaina nanei tawkdi, na nuih lel in leng nangnui nabang kei. I lungkhamna leh puakgik khong ilawm-ivual kiang a igen leh adan omdeuh eive, nangkia a na sialpi vuahthuak nilouh bang phatuam di eita chi’n hondong teitei a. Ulian, gending leng zumhuai in zahlakhuai lona a chihtoh kadinmun leh ka-omdan teng abul-abal, anen-aham in kahilh sipsip hi. Kuamah apauzosam omlou a ki-entuah gaih zelin nuailam kaki-etsiak zel ua, Ulian in; Moi…moi, lungkham ken, alampi hoihzaw hong-om nading ahi, ei a dia thilhoih banghiam khat in hon nungdelh utman hikhading ahi, chi’a hehnep theih dandan in hon genpih nilouh hi. Moi, mibang a tampi leh sepna sangpi nei hikei mahleng, Pathian’ hoihna ziakin khateng a muhnanei hisamveng lungkham koh. Kamihinpih kasapih kachipih kakhopih lungkham mangbang a khitui naptui nuul a maimual, amel-apuam leng kilangzou nonlou bangchi’n kakitheih mohbawl theidia chi’n honkhamuan a kamit ah kipahna mit-tui hongpawt hial hi. Kapoimoh zah sum honbasak a, sep-le-bawlding mu-ngei ding ka hihdan kamit en kilkel komin hon-gen beh sonson hi. Kisuanglah leh zumhuai samahleng lampidang neilou kahihman in mit-tui kai niau-nuau a nui teitei in kipahthu kidiik suihsuih komin kagen bialbual  hi.

 

Tuanung thathak la in sepding nna muhteitei tum in kakisaan mahmah a, gim leh tawl-lam leng phawklou zen in kahihtheih top kasuah zel hi. Himahleh khakhat nung a kasum abeinon tak in katuah ngeimah, kaphu’t ngeimah paltou nonding kahizel vemaw chi’a kikhasiat in kakap khaveu hi. Akhenchiang in Pathian bang ngohbawl in, hichi lomlom a genthei leh liangvai, lungkham leh mangbang a om-ing a kathumnate dawn a a omlouh, Pathian le’ng omlou ahitel diam maw! chi’n kaphun khanak hi. Lohngaihna theizoulou leh kitamkham dimdem kahihtak manin nelou dawnlou a sun-le-zan hunte khituitoh k’onzang maizaw, lungsim leh taksa in athuak diak a kakeniam hulhul mai. Ulian kiang ah sum ki-ngen nawn lezaw hon-nial lomlom loudi hiven, himahleh tanau laina leng hilou, kuate hiam dan a anungaknu leng kihisamlou, meltheih diale theih maimai petmah hizomah a…huihaaaa, lungkham huai chihlouh gendi atawmtel mai. Utleh! a suaksuak hiheh! Chi’n Ulian (Suanlian) ka missed call a, hon phone takin aw li’ng pipelh kom in; Ulian, zumzoulou, kisuang lah zoulou kahimai, hehpihtak in hontheisiam in aw. Thilkilom leh hoihpen leng ahikei, midang leh nasungte theihdin leng azumhuai in anuamhet keiding chihleng kathei, midangte kikupna leng ahitham ding, mite muhsoihna ahihding ban ah lawm-le-vual lak a maizumna leh zahlaakna leng ahitham ding. Himahleh bangkim theitu ‘Pathian’ in honthei veve ding hiven. Poi nasalonadia n’onhehpihna liauliau in Na Inn ah kong omzual dia, sep-le-bawl, nek-le-tak bangkim inn nna kanasem dia  alemchang masapen in innlam (Lamka) kapai maiding. Ka omdingdan leh kinepna bangmah ka theizou non mahmah kei, kalampi teng a bing gaivek ahita. Sisuk in hiai leitung ah omnon kei leng kei a di’n navaak huai zoleh kilom, nang mahmah leng honsubuai nonlou di ing a thoveng khat suak zomailou di kadiam maw!!!! Hiaibang teng thuak a paldia bang achia Mumbai a hongpai sese kahia, vaangsia kakisa lua, kei a di’n hinman omlou ahimai kachisuk zialzial mai hi. Aman (Ulian in), Moi bangchidan e! bangthu a nagen? sepna hoihpi mukhin thamta a, chikchiang in alopna ann nedia chialin ka-om de aw chia duhthu kisam den a. Ahimhim in bang chidan neita honchih tak in, kenleng katung simthu khaubang kasutpih ngiatngiat non hi. Huchi’n Ulian in neptheih dandan in hon-nem a lungkham lou leh kingaiselou ding, bangkim a honpanpih dia mansa ahihdan hon-hilh hi.

 

Ngeinabang in  ziingkhua hongsuak zel a, himahleh kei adi’n bel aniim ngei in a niim veve hi. Tukvelh a dak-kom a banglouteng ka ngaihtuah nilouh leh kongkhak hong kikiu a peihlou pipi a kava honleh Ulian ana ding chetchat a. Moi, lungkhamken chihtoh kisa inla hiaimun ah vahoh mahdih chi’n address khat honpia hi. Bangmah kihousau manlou in asakhau apan sum, kazat-tomdi piaktoh honthuah a, awl in kihouni chi’a a kinunghei kom in nadau va-en himhim in aw chi’n office lam azuan hi. Apainung a ki-ngaihtuah in, banglampang ade aw, bang achi de aw, hohlouh maidi ade aw chi’a kabuai nakhop hong suakzel hi. Kinepna neilou sasa in, thuman lohchinna chi hive un chihtoh peihlouh kompi’n kava kuan nalhnalh a, amun katun in kahuphulh sangmah in nopchi leh changkang kasa a kahahdam deuh hi. Interview kazoh in lungsim zaangkhai zo-in kalampai bang nuamtuan in kathei a, inn katung baih zezen hi. Nitak in Ulian in hon phone a honhehpih leh awlmoh louhman hilou a amah kavabelh dingbel lemsalou leh thil hitheilou ahihdan hon hilh kom in, apoimoh danzil a sum-le-pai a hon panpih zoding ahihdan honhilh hi. Ihmulou leh lungkham a kangaihtuah chiang in, Ulian in hichi tel a honpanpih a hon awlmoh hampha leh vangpha kakisa a, alungsim pichindan mi atheihsiam dan leh a kipiakzoh dante’n hon nehnousak khanak hi. Akhenchiang in azi diing penpen tuh mihampha leh nuamsa ahihding ban ah hazaat tha lamlam bang hon suangtuah sak dundun hi. Ni-le-khate suakzel ahihman in keileng muntuam leh office tuamtuam pha a dau-en in kahihtheih dandan in kakuan khezel sam hi. Nikhat, gimhuai kasak ziakin koimah hohlou a kasun lup leh phone ging in honphong a mit nuai phiaiphuai kom a Hallo! kachih leh sappau in; Is it, I’m I speaking to Miss Momoi? hong kichi a kenleng; yes, its me Momoi speaking chi’a kadawn leh; tumadeuh a Ulian in honkokmuhna office apan leh ka interview na a lohching kahihdan honhilh hi. Tuabang goodnews kazak leh kipahna a dim in kachimul bang hongthou sungsung hial a, nitak ann ding kahuan khinbaih hial hi.

 

Kasepna nuam sasim kadiam ah, theihlouh kalin training zou a regular tak in kakai panta hi. Huchih sung in khaloh leng bangzahvei hiam kalata a kipahna lianpi toh hinkhothak awl-awl in kaneithei pianpian ta hi. Nikhat Ulian kavamu a kamsiam theihtop suah in Ulian tung a kakipahdan, hon panpihna leh awlmohna te gentheih dandan a genin hon sum batsakte kipahthu dang-awk zen a gen in kadinthei ta hi. Hunte paizel a, sep-pihte hi’n office bouruak hitaleh kuapeuh anuam un athadam huai petmah hi. Huchi’a hun tamzaw leh niteng phial a ko’ng sepkhawm chiang un ‘Kougel kaal ah Life-Line’ chihdan deuh hongpiang simsim hi. Aman, hoihtak in hon care leh awlmoh hi’n kathei a, banghiam haksatna leh buaina kaneih hun in leng hon saifel sak pahpah hi. Kadam liai leh office kailouh ding hi ka satheikei a, kithalopna leh taimakna ka neihloh hial abang ta hi. Akhenchiang in Pathianni bang dongkholh kasakton a om a, niteng a amah kamuh a kakihou zel un lungsim damna leh nopsakna lamdangtak hon tun hi’n kathei hi. Tuaziak mah leng hi’nteh sepna ah gin-om, kuhkal leh chitak in kapang ngitnget a, ahihziak in huchi lomlom a thatawlna leh gimna in kanei tuankei. Huchibang a hunte k’onzat touhsung un koutegel kal ah ITNA chiibang kituh in akhang hoih mahmah a, nuam kasa vanglak uhi. Huchih sung mah in akum asim bang hong pailiam man a, kenleng promotion mu in hinkhua azia om-gopta chihding ahi phot. Amah lah fel, melsehetlou, pian-nalh leh duangching, pilzomah mi theisiam nalai, chituam nariau khat nei ahihchia tuateng ziakmah h’inteh amah; ngai, khelah leh lung-gulh a Itna simthu khaubang kasu’t khom theih uh. Kuadang hikei, ka office ua Boss/Manager pa Mr. Pritam hi veh. Ka kaal ua itna zam khang deuhdeuh in lian tultul a, nikhat kamuhlouh hun a leng nguai sukpah kahita mai. Branch enkaitu ahihman in, meeting a buai ahihlouh hunin, khopi tuamtuam a azinban ah gamdang/fereign aleng zinmun lua ahih chiang in kei adi’n thomhauna leh tangkhat kisakna in honbawm zel hi. Avangkim in Ulian in hon phone kauh zel a, kakal uah bel kizopna guizam a omkei, himahleh kenbel veinavuat sim huaipek a kana neihsa chihman thu ahi lel.

 

Pritam toh kakizopna uh  thu’klut a kip deuhdeuh ahihtak man in, zinkhiat nang ahauh toh kimuhlouh hun atam man in kahehtha suak a kakinak hun uh atam mahmah. Huchih hun in official leh bussiness vai ahihdan paulam leh genpen in anei a kaning akitel thei petmah hi. Tuabang komkal ah ka kingaih nung uh kumkhat bang phatheita ahihman in kakimaingal ua (ase lam bel hilou), thuukzaw sem a ngaihna kanei gawpta hi. Hun-awl kaneih chiang un, kithuah a pawtkhom in cinema bang ka-en munsim ta ua, amah kia a inn nuampi leh kidaih mahmah, neih-le-lam aleng kuamah englou ahihdan katheih hi. Mipiching leh om hiauhiau, pautam zelzul lou lah gending thei veve, neelhuai in ngaih huai mahmah mi ahi. Nikhat kou office/branch in semhoihpen hihna award kasang ua, alopna in staff teng in party kanei zaizai uhi. Alaam toh akham toh kachiau vengvung phet ua, keileng kisu’m leh pilvang tak in anawlkhat ah kana kisawi liing nalhnalh sa’m hi. Lawmte’n, Beer dondi’n hontah nilouh mah le uh kanawlkhin zel a, atop in Pritam, hongpai a Moi, hundang nidang zaw thutuam tunibe’k beer nadawn kei leh kuamah lungkimlou ding ahi chihtoh piak honthuah nilouh hi. Nawlkhin zel mahleng ka Tangval ngaihzawng leh Boss pa hial nialzoulou in mit sizen in kavalh gu-gulh hi. Dawn-ngeilou chihmah, khamsim kahidia, nui heuhau kom in ka omdan teng nuam kasa mahmah seusau hi. Midangte zoh a anunung pen in kapai ua a Honda City Car sung a tuang in kataikhe henhen uhi. Car sung a katutmuang ziak adiam ka beer dawn kakham deuhdeuh a, inn a paithei vual kahihlouh ban ah lawmte’ theih ka utlouh man in ka tangvalpa’ inn lam kazuan daih uhi. Kalungsim in Boss pa inn kidaih hilelven room tuam tuak ah kalumd’ua buaihuai kenteh chih ka ngaihtuah sungin inn katung uhi. Kihahsiang a mai ka phiat leh kahalh a, kadang ataak tentun taget hi. Sofa nip thihthiah tung a katutkoi ngehngah leh Boss pa glass nih toikom in hongtu a, khat honpia in aman khat akidawn hiau hi. Dangkeu chihmahtak dong selou a kadawn khutkhut leh khumsim khasim valhnop ta zozen. Kaduhbeh kachih leh glass khat honpenon a kagaih in kahi bengbung a kahi mialmual hi (zu chikhat dawn chu kahi peuhmah a).

 

Kakihoukom un Boss in hon-naih hiaihiai a, atop in kaliang ah honkawi in kasam a zuut hauhau a, hon-itdan, hon ngaihdan, melhoih honsakdan leh kei tel-lou a bukimlou ahihdan kabil ah honhuau siausiau hi. Meng chiichiai chihmahtak mit-hah leeng diidiai kawm a, a mai en in kanui seihsaih hi. Huaitak in kawibelh toh kabiang  kiss tuaituai a thuah a,  kenleng, uau! chihtoh melh deudau kathuah lel hi. Baan-nei sa ahingei dia kamuuk kiss dia hongkisak tak in, hei!..what you doin? No.no.no…how dare you! chihtoh a nawllam ah kakikhin san hi. Hon-naihphei a Moi, I’m sorry! chihtoh kakhutte len in a simtonton a, bangbang hiam agen mualmual nilouh hi. Sawtlou nung in, ihmut suak, kalum ut chihtoh bedroom kanaih a, lupna tung kakiden nageih leh lupna kipei duaiduai in kathei hial hi. Pritam leng kakiang a lum ahihdan katheih in, khophawklou kakineih hi. Awlchik in honkawi a, akhenchiah kasam, kabiang, kamuk leh kabilte zut in abuai thei petmah hi. Lampi omtuak sa ahingei dia, akhut koihna leh gamtatna niamkiak in ka-aangneem hongtung suk a, huan keniam hiaihiai in ka-kongbom leh kaphei chiang atungsuk hak hetkei a, a khut-te kalu apan ka pheipi kikal teng ah akileh hehu tamai hi. Huchih komin in kapuan angkilh phelkhin ka aangneem a cheetzek a hun-nuam zat asawmtak in; Boss!!! What the hell are you doing?! Stop doing and move away! Chihtoh tut-touh kathuah hi. Huaitak in Pritam in; Oo! Sweet heart, bang eita, nang hon-ngailou maw? come on, chi’n honkaipuk a, Bang kagen e! kon-ngaihlam natheihsa hilou maw? chi’n katutou non hi. I love you so much, I wanna hug you darling…chi’n honkai puksuk non a, Honpombelh a lup-pih tumin honbuan nilouh hi. Keileng kipek-khia a lupnagei a chair a tukom in; Nang kua kisa e? Bangziak a hiaibang thil hihsawm? Koi a phalna mu neita? Kei nazi honsa maw? kachih san zialzial leh; Nangmaw ka ngaihzawngnu nahi, Kei na ngaihzawngpa maw non luppih utlouh? honchih tak in kenleng; Pritam, Pritam, nachidik, eigel ikingai mah, ahihziakin lupkhom ding chihna ahituan kei chih thei oh. Eh! vial mahmah, ka-ngaihzawngnu kalup-pih theih keileh bang phat-tuamna om eita? Nang bang kisa, kakhutsung a om nahihlam nakithei hia? honchih takin kaheh petmah a kakiseel ek-ek uhi. Tua nasepna, promotion huntomchik sung a namuhdan, hiaitan natunna dia kua a mohpotu? Ken hiaitan a hondomsang ing a, nang kei adi’n bang piak non neita a? kalung-gulh leh utnate mo non sukbuchin sak utlouh? Honchih tak in; Kalungtang temta a dawt abang a, Eh ! numei chihleh north-east mi chi’n non nuaisiah vial maw? Honzahtak mah ingh, kipah-huai leng kasa, ka heutupa nahihna ziak kia in. Tuabang nachih leh kua dinmun a deengdel zaw a, iki en di chu, na ngap tantan kapang ahimai (company/corporate policy acts, rights and duties, sexual harrasement/abuse/threads etc pansan in). Huchi’n room dang ah kalut a kongkhak kisung kalh in ka ihmutsan hi. Zingkal kapaidek leh a phone aging nilouh a, kava-et leh anakisil a, kenleng aphone la a ka-etleh!!!….babare...kataresei aw….maizen…Oh my God!!! Toupa!!!. Zi-le-ta neilel ahihdan kathei a, kindeuh a pawtsan in; Boss kanapai, tuni sick leave kala ngal, chih sms in kahilh hi. Lampi a kangaihtuah leh, e he he…e..e.. office vai a zindeuh gige pa kha, kaman chiang kilkel ta ve, sala! Chi’a ka phunphun nalam in inn katung baih zozen hi.

 

Huaini akipan kakaal ua ITNA guizam akitat ahi ta, office kaizel mahleng hindan, khosakdan leh omdan akilam dang hiaihuai na a, pona leh nguai in ka-om kholkei, lehlam ah thovenna khat omzo a bang. Himahleh Pritam kamuh chiah kahehtha asuak a, thangpaihna chikhat kanei veve hi. Tua komkom in sepna dang kazong zel a khanih nung in a hoihzaw ah  kaki tuansan pah hi. Ulian toh kithuzak zeuhzeuh kahihman un, nuamtuam leh khamuan huai kasa veve a, nidangsang mah a kimutamzaw leh kihoutamzaw a hunte kongzat sung un ka kaal uah ‘Green Signal’ awl-awl a kikhung hi’n kamu. Hun bangtan hiam nung in, kipoimoh tuahna leh ki khiatlah tuahna chiibang ana kituhtuh ahingei dia, theihlouh kal in kana kingai lokhin uhi. Ka ngaihtuah thakchiang in aman, (Ulian in) hunsawtpi hon-na en khiakhia ahihdan kathei khonung a mi pilvangtak ahi chih ka theih beh deuhdeuh hi. Ahitak in chileng kakitheih tung uapan veina leh a riau khat om kachih sim mah, numei in vapat hial ding hi kasaklouh man a hiaibang teng tuakman hi’n kakithei hial hi. Hun awl kaneih chiang un kakithuah khial kei ua nuam kasak ban uah kakipak tuak mahmah uhi. Nikhat Ulian in kasepna lamthu hondong a, kenleng mundang a se’m kahihdan kahilh leh akiguih hial hi. Lamdang sak chideuh in; kasepna lui a ka Boss pa uh (Pritam), Bangalore a omlai ua aseppih lui ahihdan leh amah, Ulian’ kokmuh ziak a kasepna Pritam in honpia ahihdan honhilh sonson hi. Huchihtak in Pritam’ kampaute kabilkha ah hongsuak a kahehtha asupuang thakthak hial a, oho! maizen!...Pritam toh kakisai tu’ng ua Ulian theisak hileng zaw, hiaibang teng tuaklou leh palkhalou mah ding hiveng kachi lungsim hi. Huchi ahihleh Pritam hinkhua leh atanchin khong nathei thoudi maw? chia kadot kikleh Ulian in, asipsip in zo theikeng, himahleh theihnachiang kanei veve. Mi fel, pil leh polhnuam ahi a, zi-le-ta aneihban ah asungkuante Secunderabad ah om ua, amah kia Mumbai a khosa ahihdan bel kathei chi’n dawnna honpia hi.

 

Ulian toh kakingaihna uh ani akha leng tamta ahihman in, ka kaal uh hoih semsem, kipdeuhdeuh in haat semsem a, kakituak mahmah uhi. Huchih lai in, Ulian in taksa damlouhna (serious bel hilou) ziakin office kaitheilou, Damdawi inn a om a innlamte sapsuk hialdia damlou bel hikeimahleh bangmah sempeihlou a haksa sadeuh ahi chih achiang. Tuaziak mah in nuam salou, kisuanglah leh zumkom pi in; Ka-it Moi, Momoi, ni bangzah hiam hongom maive? neek-le-taak bawlman nachih leh leng i ngaihtuah na ke, kihua, kituaklou leh kimudah chih le hisamlou hive hang? zumhuai in kilom kei mahleh, poi nasa lo diam? Nuisim lah chitaksim in hon chi dengdang a kenleng; Tu le tu adi’n lem kasathei kei, kiteng a nupa hinai loupi bangchin tangval khatkia om kiang ah ka-omthei mahmah dia.!. Nang leng poi nasaksa hilou amaw kachih san gaih hi. Aman leng himah e, k’on theisiam, ahihziak in huailai leh tuhun kibang nonlou pi kachihman thu lel hi. Honphut teitei zaw hikeng, nangthu hi, honchi non a, kenleng; kei thu hileh zaw sawtpek a hong-om khin tading hiveng, tunzaw nangthu hitalou di? Nangziak a hichitan kidam a sep le bawlding kimu hiven, Nang order nonpedia, ken tua order sepsuahna nna konsem di chuuuu chih toh nuih seusau kathuah hi (Adiktak in, kahihtheih tawk a panpih kalung sim a omdensa mah hi, kachiam nuih ut himhim chihman thu). Ulian leng damta a omsuakding hithei nailou ahihchiah paisan phawt kasawm leh Ulian in; huchiding ahihleh tuzan giaklai inla zingchiah napai na di. Eileng kidamta hiven, nuamdeuh in nikhatbek ikithuah lai keidia chi’n honkhou teitei hi. Sunhun in Multiplex ah cinema ka-en ua, shopping mall a hun zang cheuh in nitakmeh ding kaleizoh un innlam kazuan uhi. Kihahsiang zou a tawldam in, nitak ann ding manmoh hetlou in kabuat saih hiauhiau a, Ulian in leng kasepte awl-awl a honsep-pih tit-tit komin kakithoh gaih gaih ua,  nuam kasa mahmah uhi. Huchih komkom in Ulian in; Moi tuni chu kipahhuai lua ahih chia Beer idawn himhim ke maw, nidang a dawnlou himahleng, kipah etsak na’n? chihtoh sun honthuah gaih hi. Huchihtak in ka-ngaihtuahna ah ka party ni-uh honglang a, kenzaw kadeih dahmai kachihleh Ulian in, banga chia eita? Dawn-ngeilou maw? dawn-ngamlou hizaw? Bangteng hileh tunichu keimin in idawn himhim ke maw? zongsang kei peuh leng khatvei sunsun ken a moh kapona di chi’n honpe gaih hi. Awl-awl a kihoukom leh ki khelah tuak in kadawn nilouh ua, ann nekhin tukhom helhal  a Tv –en in kaliang tuak uah ka kingai tuah ngeihngaih uhi. Si’ngdang paldang eenglou a kaki ngaihma ua omdante gen a nui cheemchaam kom a kaki melh tuahtuah uleh lup anahun man hi. Nidang banglou leh gintak louhpi’n Ulian in; Moi, tuzan chu giahtuam chihte phallouh, freedom himai chih toh kua room ah ? hon chi gaih a, kanui lel hi. Bang ahi, hai paupau keidih chihtoh nidang a kalupna room a kalut gaihleh; e nang room mah utzaw maw chi’n honzuilut a kenleng, hemhom eive. Nang room ah kipai inla nuamtak in va ihmu hit-hit ou chihtoh thakhat a abiang kiss chat in kasawn pawt a kongkhak kakalh daih hi. Ihmu theilou in, hun paisate ka ngaihtuah a, Ulian mah leng a lungkim chiah kei chihte ka ngaihtuah nilouh hi. Lungkimlou a hon nutsiat khakding bang kalau thepthup a, lah a lungkimna bang a omding leng hi kasathei tuan keizel. Kisiamtan lou lah kisiamtan zel in ka om a kagukbuai mahmah non hi. Atop in kongkhak kalhna kava hong khiankhian a, ahi hi hitave chi’n lumnon mahleng ka ihmu tuankei.

 

Moi, Momoi, kongkhak hongve! en h’on kingai lua ahih bang, chi’a bangbang hiam gen in ading nilouh hi. Keileng azalou leh awlmohlou kineih in ka lup ngei in kalum veve hi. Kongkhak kikalh louh lam a theih in honglut a, kisuang lah sasa in hong lumsuk petmah a, awlchik in honkawi a, kasam, kabiang, kabil leh mun tuamtuam khoih in azut nilouh hi. Ka-it leh ka ngaih mahmah in honzuut nilouh chiang in ki-iim theilou kahi ngeidia ka kawiphei gaih a a kiguih zozen hi. Awl-awl in honmai nilouh a, himahleh kenbel atoptan tunpihlouh katum gu thouthou hi. Puankawm a thomneilou leh kiho hetlou a kakibuan nilouh chiang un dalzoulou a zulkhephial kahihman in a haksa a omdingdan kabuai a, kalauthong mahmah hi. Atop in Ulian; ikiten chia di’n limsit mahmah maini, tun ana maleep leng ikiten chia piakding dang neituanlou kahih chia, banghiam dan in ngai kenla hon theisiam in kachi nilouh hi. Aluhlul petmah a kagente abil ah alutkei himhim, phunlou paulou in hon buan veve hi. Huchih tak in keileng kisuanglah leh gitlouh huai kasakman in kagil tunglam teng free offer kapia a, himahleh gamniam lam a mualnih kal a tuikulh gam ah LOC khauhtak in ka khung thouthou hi. Ki-it ki-ngai chihman a utdan teng a gamtat louh theihpen pichinna khat ahihban ah, lohchin na leng ahi. A utlou bilbel leh lung-gulhna neilou kahi hetkei, hon-it hon ngailou hilou kahi, tuanak sang a k’on it k’on ngaih luat man leh nang ading kachihman a hi zaw. Denchiang a kipak leh nuam sading nang mah nahi Ulian, kuadang a hilou in nang a mah kahi, apuamlai in zaw loudah mahmah maini, amin chia akhumdan leh limdan itheih nang in. N’on it a, n’on hehpih a, n’on ngaih taktak leh gamgi/LOC kantan louh ahoihpen ahiphot chi’a kapan teitei leh zaw, alohmoh veve hi. Piching tuak, khat-le-khat kibuan nana na, ipang taktak zaw, pasal hitawk le uleng a gamtang theituan kei uh chih kachiang petmah hi. Lohngaihna theilou leh lungkia ahi ngeidia, awl a kiheikhia in lupna nawl langkhat ah a siiklup beibai a, kenleng a nunglam apan kawiphei in ka ihmu thei khong khong uhi.

 

Zingkal a ka-etleh room khatpen ah ana nakpuak daldal lai a, singpi limdeuh leh break-fast kabawl zoh in, kisuanglah sim, zahtaksim ahihziaka neemtak leh kamsiam theihtop zang a Ulian kavaphot leh paulou in hongthou liailuai a, a guk in kanuih san heuhau hi. Tuanung sang a omdan hongtuam a, ka ki thuzak gina hetkei ua, kihou sunsun inleng hon hih gaih-gaih a a om nengnang hi. Ni bangzah hiam beita mahleh, Ulian in hon limsak ngellou a a om nilouh chiang in ka-omdan a nuam thei kei a, ka ngaihtuahna a om muangthei kei. Alung gulh ka hihpichin saklouh ziak ahi chihleng kathei a, poi samah leng aleh lam ah hih hoih hi’n kaki thei veve a ponalou leh veilou om in ka-om lenlan hi. Keibel kilamdang tuanlou in ka-om a, kisuanlah toh thuah in Ulian ka-ngaihna a pung in a khang hatzaw a bang maimah hi. Akhen chiang in lunglen huai leh thomhau tha bang hongsuak vungvung a, ahihziak in Ulian toh ka kaal uh kitanlou ahihman in, huai in hon khamuan veve hi. Huchih lai, nikhat Ulian in hon phone a, gennop poimoh nei ahihdan leh, tulai pauleng; face to face a kihoulem kulding ahihdan, ani,  ahun leh amun ding gen in phone a off gaih hi. Bangthu ahi de aw.aw.aw. naak lungkimlouh lua hi’n temaw, maban chu kikhen ding chih higeet ven chin! Utleh honkhen leh la hi, khenkelah hoihsem, paulam lemchang di nei hilel ve’n bang kaloh thei tuan dia, athu aka, pasalte mahmah le buaihuai bialbual mah uteh.! Kasianthouna ka letkip ziak a ka-it leh ngaihte’n hon nusia a samgibang ki-khen veu, chimtak huai kasa ve. Innten louten, khosakna alah liangvai leh genthei, nungak-tangval kaal a lah huchibok, bangtan paltou a banghun chia thoveng ding kahitel diam maw!!! Akhen chiah a hoihlam kipia in kikhamuan zel mah leng, Ulian in phone a honhoupih dan leh ahih gaihgaih dante’n patauhna leh diip-homna mitkha ah alang tamzaw himhim a, omkichian theilou leh laklohtak in ka-om bialbual zel hi.

 

Ahun leh ni hongtung a, kikhenna thu gendi aphur huai louh toh, I utpenleng hilou lai, hohlouh kasawm a lah hi kasathei keizel a, kabuai toh kalit toh, diipkuat toh kapumliin hial hi. Atop in sihnang lah hizenlou a chi’a lungtang khauhsak in linpipi in, itpen leh ngaihpen samgi bang khendi’ng chihtel chi’a ngaihtuah kom a amun katung phial bangzaw. Thilnuam ahikei himhim a, om dingdan ahaksa in a gentheih huai a, kasung kalaiteng kihot in alin in kaling a, kadiip in hon phulitlit hial hi. Bang ka gen de aw, bang ka chi om de aw aw aw, san tuaituai leh kho-ul a pumkawt in gamla lou a Ulian tu ka naihphei duaiduai hi. Akiang katun in tutleng tulou zen a, thangpai deuhmai in; phone a gentheih louh hia? Bangthu eita? kachih sawksawk leh; Moi, kabeng ngong hial lou eive, nangle nong khauhpai ngei e! hongtu phot ngalve chi’n kakhut ah honkai a. Kenleng kakhut satkhia in, tutkhomkhom le ngaikei, nagen nop genlel leteh himai kachih suk zialzial leh lamdang sakmel takin; Moi! kuatoh hong kisuheh malam neita? Nakinoh chive! Ngaklah lua maw? ahihkei leh keitung a hehna leh lung kimlouhna nei na maw? awlchik in honchi hiauhiau lel hi. Numei chih mahtak, bang kalung kim namah dia, nang hile te leng nuam sa in nanui tuan dia hia?! aw lingzen a kachih loihloih leh; Bang eita na lungkimlouhna leh nuam salou a katung a nahehna? Chi’a Ulian in hon dotnon leh, athu ala omlou pi, kei ngaihtuahna lel ahihdan kathei thak a, kahnuih pepulh kom in, ‘bangmah’ chihtoh akiang ah katusuk nalh hi.

 

Huchi’n, Ulian in; Moi, nalungsim loulam ahih leleng hehna leh thangpaihna a lalou ding leh kimuhsoihna, kimelmak na a nalaklouh k’on ngen masa hi. Hiphut leh lamdang leng nasamai thei, nagintak louhdan leng ahithei a, huan nazaknop louh penleng hikhathei ahihman in, tuabang ahih lehleng na ngaihdamna k’on-ngen masa hi. Moi, sepna leh nnasep neiteita a, ikumte bangleng tam hiaihiai ahihtoh, apantu leh atopna leng kihituan lou dia, mite hihlouh leng hisamlou hiven.!.. Patauhmel deuh in bang eita! chi’a kana pautuh gaih leh; za-ut taktak maw ! poi saken aw leh? Honchih non chia’n ka lungsim abuai deuhdeuh zel hi. Atop in Ulian in; Moi, ikiteng tamai aw? Lem nasak leh tunitak mahmah in Innlamte singpi khai di’n kasawl ut, I’m serious, chih taktak ahi. Honchih tak in kamit apan kipahna leh khasiat na mittui kabiang ah hong luang zungzung a gending penle theilou in kaki diik suihsuih hial hi. Kei ngaihtuah dan honghih louh tak in, kachimul hong thou hial a kalu aktuam chia pha mah abang a kaki suanglah hial hi. Kenleng, Ulian, kei leltak NAZI dia non deih kakipak lua, himahleh denchiang a kisik a hontel khial khading hive teh aw! Ulian in; akum asim kangaih tuah khin a, nanglou ngal kamit tun-na leh khiaklah omlou ahi. Kei adia Toupa’ honpiak nangmah nahi chih ka chiang a kisik nangleh telkhelh nang k’on mu kei chi’n hon dawng miatmiat hi. Kenleng Ulian; kei, Kol leh vaite lak leh Mumbai khopi a khosa leh kiloh a om, kuaman hon thusimlouh kei ngal ve. Adiak a tangvalte’n India khopi tuamtuam a numei omte, ZI ding gentaklouh a mimuh louhte lak ua telkha kahih lam theilou maw? na kisik ngeingei di, na hai lua? kachih leh; numei teng huchivek lah hilou a, a thulimlou a omleh athulim leng a om veve chih kachiang. Nang kon-itna leh ngaihna guitung lou a khaubang atan ding kaphal theikei a, nangtoh khenlouh simthu lel a mawngsing bang tulpih a, anglai naubang honpom kumkhua nuam kahi. Upate’n khausau kikai-awk chi uh ahih bang. Nangkam ngei a nachih bang bang kazak nop man a k’onsap mah nahi. Ahaksa anuam leh bangkim nangtoh thuak-khom a hinkhua zangkhom ni nachih leh a chiamteh nang in, Bang a!? Tuachu bangkim nang khut a om hita mai chi’n kamit ah hon en kilkel hi. Dawng non sese lou a siik-hip (magnet) bangmai in Ulian muk leh kei muk akintheipen in kasutuah chenchen a!, a namkip kahi ngal mai uh.

 

Anuam leh haksa, sihnalou ngal bangmah dang in akhenlouh ding, suan le pak nei a loubang tulkhom dia lung kihual leh chiam pellou dia, ‘Katong chiam ni uh tuang hongtung petmah hi’. Tuabang hunhoih leh hamphatna tang a lungtuak simthu Toupa’ min leh mipite theihpih na a kaki khutsuih un, kipahna mit-tuite adai in kanehnou petmeh hi. Tua nitak nana nachu…ngaklah leh limchi a, a nuamthei pending leh mangngilh loudia ka sianthouna, ka-it leh ngaihpen adia luikhe di’n kaki manta. Ulian, tu’n na-utdan leh deihtok in, kibuan sese ngailou d’in bangkim a phalna k’onpeta! LOC leng lak-khiat ahi ngal, chihtoh opening ceremony kapan khitkhit uhi. Kougel ban ah Innkuan nihte kal a kizopna leh lainatna zomkhomtu kahih ban uah, kasepna lamtuak ualeng hamphatna leh kipahpihna Toupa’ min in hong luanglut a, Sen-le-pai (expenditure) tengteng, kei sepna official thusuak a pan in hontum vekding ahihdan katheih sonson in Toupa min kaphat lou theikei. Huchih lai in, Ulian sepna lamte’n leng kipahpihna thilpiak in latest model Car nalhtak honpe lailai bang uh kipakselua gending theilou in ka-om heuhou hial uhi. Kituak leh nupa hinkhua nuamsa a kakipah man uh adiam, theihlouh kal in kum tampi anabei a, huan Pathian vualzawlna Tu leh Ta toh sungkim houlung tuak in ka khosa touzel uhi.

 

Hunpaisa a ka palkhak leh kaphut khakte ngaihtuah kom in Ulian, nang non nadeih a ‘NAZI’ kana hihkhak kaan a kipahna kaneih lam kathei naikei. Akhutban khamkom a kachih tiautiau leh, eimah voi, keileng hampha leh neifuh kakisak dan, k’ontel khial keiding kachih nathei hia chi’n Ulian in hon dawngkik hi. Moi, thilkhat ko’n gen aw; Huaizan a ikibuan nilouh nitak natheilai hia? Bang ngaihdan nanei himhim? Bangziak a naphal louh bilbel eita? (nuikom nunulh in). Aziak nathei tavoi, khemkhem eive kachihsan lel a, aman; Huai nitak a phal a honkipolhpih hi ngeingei le te maw, ken honkitenpih hetloudi hithe-thup keive. Ahimhim a atumtinten kahihlouh pi, mibang chimi ahihiam chi’a k’on lungsim-etna, k’ontheih chiang nopman a alim kineih lel kahi. Tulai nungakte maw, theihchet louh leh hoih sakman lel a Zi dia m’in telkhial veu un chin, huan amau mah leng kiselsiam veve ahih chiang ua. Huaiziak takmah a hon deih tinten ing a, tua hon neipetmah kavele, poi nasa lua hia? he.he.he. Kenleng, Aw!!! tuadan hi maw? napil ngei e, neuchik hileh hihkhial ding kahilim vele!  Sepna neilou a lungkham mangbang a ka omlai a kithah mai kasawmte, kataksa leh sapumte zuaksuk a, a sumpidia zatmai katup lainite ka ngaihtuah chia’n, Toupa’n kei a dia panpihtu leh hehnemtu dia honna sep kholkhin ahimai mah vele!. Huan, Innlam kapai lai a kavante (luggage) pozoulou himahleng, Toupa’ panpihnate ziakin, Itna leh ngaihna gute (poision), ze-etna leh khelhna vante kapozou in kadouzou hi. Tuaziakmah in tun, agah kalouta a, kipak, nuamsa, lungkim, khamuang leh tawldam in Khristian Innkuan diktak katungding thei uhi. Huchi’n, kakiten champha uh a ‘Golden Jubilee’ tanpha lawmkhin thei a hon makaih Toupa’ min phatkom in, “Kavan  pozoulou himahleng Itna ka pozou” chi’a ka hinkhua’ puankhiat na kanei khongkhong ta hi..

 

(: lungsim a suak dandan phuaktom a gelh ahi, min kibang te’n theisiam ni- jamin h vualnam)

Read 434 times
Login to post comments