You are here: HomeArticlesGeneralJACAATB Heutute, Mipite Leh Politics Maban Ding

JACAATB Heutute, Mipite Leh Politics Maban Ding

Written by  Luna Guite Published inGeneral Saturday, 20 May 2017 01:03
JACAATB Heutute, Mipite Leh Politics Maban Ding

Gelhtu : Luna Guite

 

JACAATB heutute leh Govt.of Manipur in kilemna abawl tungtang uah mipite’n deih khop kei mahle hangleng, i pomsiam ngai in ka thei hi. Aziak ahihleh, JACAATB a i heutute uh Political Leader hiam, Political Party ai-oh hiam hilou ua, nambil/nambing leh NGO makai  khawng hi in, awlmohna ziak a pitu tanvou ana pom bang uhleng hi thei hi . Huai mai hilou in, i heutute ( JACAATB) lak ah Govt.servant bang om hi taleh, amau a ding in pressure piak ek or phut ek rem lo thei ahi, chih theihpih kawm a, a sakap uh neu in lian taleh, mipi’n i pomsiam phot ua;  a sang a lianzaw bang chi’n mipite lungtunna tan salu, i mi-le-sate i puakthei diam, chi a ngaihtuahna i zat uh poimohta hi lou hiam?

 

Bangchi tel a tunitan a mipite’n a lungngulh uh mulou leh, gam-le-nam tungtang a lungkim theilou lailai uh hiam? Hiai dotna poimohtak, adawnna bang zah hiamte lak a khat tuh : eilawi lak ah Politics a chii lelle akituh nailouh ziak ahi, chi ni. MLA leh MDC te politician kichi zenpi in, mipi itna leh  mipite khual luatna ziak hiam a heutu hihna  dinmun na pom-ngamna ziak sangmah in, bangbang hiam vanzat-a-zang a MLA ching khawng himai mah uhi. Etsakna ding in: Churachanpur Constituency ah tutung in BJP MLA i nei uhi. Ahihleh, Churachandpur A/C sung ah BJP in member bang zah anei ua le or Unit bangzah anei ua? Lalu Prasad Yadav intuh RJD party hat taktak lai in, RJD member teng in chiang tawi vek di chi a, member teng in chiang  keng suausuau mai uhi. Ahihleh, Election lai a Party  Official Candidate  te’n MLA compaign lai in a omna party un, “ I party member leh party supporter teng in chiang ken di” chile uh, chiang tawi  ngam i om diam? Candidate pa na-ngawn dakkal tawmchik paita akipan a NPP,BJP.INC or KJP chih khawng kihi maimah hi. I omna Party in bang policy or manifesto/tup-le-ngim  a nei ua? A manifesto, a party tup-le-ngim uh, ei Manipur Non-Naga Tribalte a ding in a zuihtak na hiam? Amau ngim leh ei ngim akituak na hiam? chih tanpha leng kuaman ngaihtuah seselou uhi. I MLAte tung a mipi’n thu kineikha peuhmahlou hi. A MLA hih na bang uhle, amau mimal hatna a asualkhiak uh hi a; adiktak in, mipite’n “Na MLA hihna uh kitawp un” i chih lai a akitawp utlouh bang uhle, siamtanhuai simthou uhi. En ve, NPF MLA  4 tak banghang a kitawp uhiam i chih leh, Party Official Candidate ding a, a party un aseh uh ahihziak hi. MLA ching ding a party in theihtawp a a campaign pih uh ahih ziak un mipite’n a MLAte uh tungtang ah thuneihna sang tak nei ua; amau, a MLA te’n le mipite aa dan in kingai  uhi.

 

Manipur Assembly in Anti-Tribal Bill ahon pass tungtang a mipite chezia ngaihtuah kik dih le; hiai in revolution khat piangsak hi. Mipite’n a leaderte uh lak ua kipan kum tamtak lamet lian taktak  na neita ua. Hiai a lamet sekte uah gahsuah muh ding tunitan aa neilou in, leaderte ah beidongta uh ahi chih kilang chian mahmah hi. Huchih naklai a, Anti-Tribal Bill in hon deng zomah a, mipi beidongt’en amau siam bangbang leh, atheih dandan ua dou uh hi pen hi. Beidotna kokhuk lou-ngal tan ding nei nawnlou a kithei mipite a ding in,  hinna in manphatna nei nawnlou hi.

 

Ahihleh, i mipite uh kimansa/kipeihsa hita ua. Gam-le-Nam vei taktak i hihleh, mipite belh taak taktak ding bang vaisai ding  i hia le? Belhtak leh vai taktak saitheihna ding in, I maban uah I deihtel theih chi nih(2) anuai a bang in hong kilui khia hi:

1. Regional Political Party thak khat phuh khiak.

2. Regional Political Party omsa khat zop.

 

A khatna: mahni a, eite mahmah in I phuhkhiak Regional Party khat neih tuh ut-huai in, deih huai mahmah hi. Ahihhang in, Political Party phuhkhiak i chih thil namai hilou hi. Non-Naga teng huapzou Party a hih ngai a; Tribe tuam tuamte’n i pom theih ding uh leh,  neitu tantang a i pomsiam ding uh ngai hi. I theihsa mah bang in, eilawi President hiam a i om chia kineisak tak a zui nainai; midang hong hih chia kimikhual sak mawkte i hi sim ua. I kitawp san zeuhzeuh mawk leh bel, koitan mah kitung zoulou ding hi.

 

Anihna pen ahihleh, Tualtou Political Party ngelngetsa leh phungchingsa  zop ahi hi. Unit, Block, Sub-Head Quarter, Head Quarter nei khinsa, administration hoih tak a kivaipuaksate vazop ahi hi. Hiai ding in, ei kinaih pihpente bel Mizoram a Regional Partyte hi ua: etsakna ding in - MNFte bang zom dek hita lehang, Kukite bang MNF movement lai a ana hahpan mahmah bangzah hiam ana om uhi. Unau Hmarte chile hang, tangnel mahmah ding uhi. Ahihkeileh, ZNP bang leng zop theih hi. Koi party zom lehang i lungrual in, I kithutuak  thei pen ding uale?

 

Huanah, 6th Schedule bang leng, ei Manipur singtang gam ateng Non-Nagate a ding a tuh, tu dinmun a ding in hoih mahmah hi’n ka thei hi. I MDCte bang unle, Mizoram Dist.Council,  6th Schedule nuai a om thumte(3) bang hong zir chiang le uh; zil ding, sin ding tampi aneih ngei uh ka gingta hi. Tuni tana Churachandpur bang, Lamka a i khek zohlouh lai un, a mau (District Councilte’n) tuh Saiha bang SIAHA; Chawngte bangleng  KAMALANAGAR in akheng geihgeih mai uhi. A tuam a Lamka District bawl sawm sang in (Churachandpur tangzou nawnlou a houh kithei i hi hiam?) ‘Churachandpur’ - eite a hisa ahih na bang a, Lamka hong hi mai ding hilou hiam?   

 

Hiai atung a ngaihdan hong kisungkhete ahihleh, awlmoh man a, tua I omdan bang nilnel ua omdet thil hitheilou leh, mipi mahmah inle pomthei nawn mahmahlou hi a ka theih ziak a ka hon luikhiak ahi hi. Huaiziak in, Politics toh kisai in I lungsim ngaihtuahna uh zang taktakta ni hang in, omze nei in, manohna lam tumta nei thei ding in lungsim ngaihtuahna zangtheite chiang bek in, Pathian honpiak I khuak uh zang taktakta ding in ka hon chial nuam hi. 

 

(Hiai Article gelhtu Ngullunpau Guite aka Luna Guite ahihleh, Lunglei khopi laizang Chanmari ah a term nihna ding in VC member hilel  a; MNF party worker ginom khat ahi hi)

Read 1009 times
Login to post comments