You are here: HomeArticlesGeneralZoudawn Hinkhua

Zoudawn Hinkhua

Written by  ZM Tonsing Published inGeneral Saturday, 27 May 2017 11:55
Zoudawn Hinkhua

~ ZM Tonsing

 

Ak masa khuan in Chingnu leng a lupna a kipan in thoukhia hi. A lukham zul a umta a tuibuk kamkhat hiam a muamzoh in, meitoh diing in kisa ngal hi. Vutlak a mei-am tamlou om likliakte thaikhawm in, singthem bangzah hiam toh tua mei-am mutlong zang in mutkuang hi. Huchia mei tohkhin thuktung a zing ann bel a suanzoh in, tuithei bangzah hiam seng a pua in tuitawi ding in luilam ah kuanpah vengveng hi. Tuitawi a tun kiik chiang in thuktung a, a ann bel suan ana chiak bilhbilhta ahihman in antang nou bangzah hiam kha a, khintung a vaidoh a ann hum a hakgamte loh ah sungkhia hi. A ann huan atui a kantak in meipang ah vutdul lak a hei diing in a ann bel tungkhia a, huchi'n a lawipa Siampu va phawng hi.

 

Siampu leng thoukhia in meikiang ah hongtu a, a tutkawm in a dumbawm a dum leh laithem lakhia in lehkha zialpah ngal hi. Tua lehkhazial a tepkhut laihlaih kawm in khinpi tung a kok lianlou sung a ankamhou lakhia in meh ding in huan hi. Ann leh meh a huan kawm in senggan a, a vangkim in buhbel heikual zel hi. Aman ann leh meh a huansung in sumtawng ah a lawinu Chingnu in sum ah suk zang in ann suging dupdup hi. A annsukte hong taisim chiang in lohpi zang in a vaite sepkhia a, tua a vaite vaidohna in doh hi. Ann hum leh anntak te hoitel in buai petmah hi. Akgil a akte a khah leh a ann hawi va subuai mahmah ahihman un tua akte akchiang toh kipat in hawl nilouh hi. Tua kawmkal ah, buhbuk tung a ak bubah a akpi oplai hong lengkhia a, a vai nelte bang khu phulphul zozen hi.

 

Siampu in leng ann leh meh a huan zoh in belpuansia tui a diah suk a, huai bel puansia vut ah toih in belte nawt hi. Belte a nawt khit in pangkhang a belvalh tung ah belte tunggaih a, khindang a sahou bangzah hiam vutkawm a phual in malta meh di'n bawl hi. Tua zoh in a khedap sete uh vuttem zang in thuap a, tua teng banah bangkhang ah suangtat zang in tempawngte tat ngiatngiat in ama khom in buai veve hi. Huchi'n Chingte leh Thangboi ngeileng zingkal hongthou ta uhi. Chingte in a nu nnasep, annsuk va panpih hi. Thangboi in leng khindang a phazah a a sailim hakte a keuna hiam chih a etzoh in vok ann pe ding in konglam ah vok ann bel dompawt pah kuihkuih hi. Kongtual ah vok ann kuang khenging kauhkauh ahihman in a vokte uh leng ann ne ding in hong taipah latlat uhi. Thangboi in vok ann a piakkawm in a vokte uh a zualna ding in chiangkang zang in khuat muatmuat hi. Huchia amau' nna chiat ahon zohtak un ann nek hun hita hi.

 

Ann anekma deuh un Chingte in a innsakte uh meh va khol hi. Kuangpi ah ann hon thuk ua, alai ah mehpok hon sung uhi. Ann a nekkawm un Chingnu in nahtangteh zang in sunchia loulam a a sun ann d’uh tun a, gawlawng lianlou ah mehleng thun ngal hi. Ann ahon nekzoh chiang un sumtawng a a nnasep vante uh anitluat ziak a vot dekduk zozente, amau a chiat la in hon silhpah siausiau uhi. Chingte' nu Chingnu ahihleh dum, pat leh malta zut di a om ziak in loutul lam ah kuan a, Thangboi leh apa Siampu bel lou vatna di lam enkhe diing in betang thang leh sakuh thang tamlou sakhaupi a kuah in leh, tupi thau toh kuankhia uhi. Chingte ngeileng dainawl a singkang zong ding in sengvang sung a heipi khat pua in kuankhia a, inn kongkhak a ana kihong louhna di’n singbong khat in a kongkhak uh delhkhum maimai hi.

 

Chingte bel singpo maimai ahihman in tungkik pah a, a singpuakte singhon a a lepzoh in inn hahsiang pah vitvit nawn hi. Khintung a hakvang a malta a hakte uh leh sumtawng a dum omte innkong a malta tau tung, nisa lak ah phoukhia hi. Tua banah buhbuk sung a annhum bangzah hiam leng phoukhe lai hi. Tua teng ahihzoh in phaitam, nisa nuai ah helhhawt zang in pat hon hek a, a helhhawt a ging chuakchuak man in meisak a sathu-um sung a sathu tamlou helhhawt' bil a ahon tatleh tua a helhhawt pen zatnop tuan mahmah hi.

 

Nitaklam ninem tak in ann huan di'n kisa pah hehu nawn hi. Chiang sung a loutul meh tamlou hon mal in, ann leh meh hon huan hi. Ann a huanzohma deuh in a nau Thangboi leh apa vai hongtung ua, suaklu tamlou leh thang a awk vagik hon pua uhi. Thangboi leh apa'n tua vagik a sem sung un Chingte a nu dawn ding in khomual lam ah kuan a, huaituh vaidawn kichi hi. Saulou a pai nung in lampi ah anu chiangsiat zen a van pua toh hong kituak ua, anu vanpuak bangzah hiam ama seng ah khenkhia in huchi'n zangkhaitak in inn hongtung uhi.

 

Nitak hong hi a, meivak gina lah omlou ahihman in taptung a, a meichih vak uh leh phutuan zang in amau nna chiat ahon sem nawn uhi. Chingte in bel tangval lengla nei a, Thangboi ahihleh 'haam' ah giak hi. Papi lengla le bangzah hiam nei ahihman un tuate toh Thangboi' pa Siampu, louvatna dimun kikum in buai mahmah ua, tua kawmkal ah Thangboi' nu'n bel tuanglai ah buk tepkawm in leh mui zang in khaukhek daldal hi. Sun a Chingte in balke leh kawlkai ahuante banah miim leh kanpuak khawng kang in a lenglate uh toh nekhawm nainai uhi. Zoudawn ah bel nitak ihmut kal chihlouh hun-awl om mahmah lou hi.

 

Sunchiang in Thangboi leh apa lounuai vat in kuanden ua, louvat ahong pai chiang un singlukham di hon pukawm zel uhi. Chingte leh anu bel singpua banah a vangkim a loutul hoh in buai den uhi. Pata te'n lounuai vat ahon zoh chiang un loutung phuknawn ua, huchi'n lou vat ahon zoukhong uhi. Louvat zou chihman a awltheih hituanlou ahihman in, inn van di khol in buai veve uhi. Vuahzuk lah kipan nailou ahihman in tapphou nisa khauh mahmah a, luidung a tuiluangte kang dekdek ahihman in ngaden di khawng in kuanzel uhi. Meh bangle ahak laitak ahihman in sihzoupok, bal, maisan, maipuang ah mehhou khawng meh gige mai uhi.

 

Hunte hongpai zel in louhal honghun a, huaini in tuh louhal a kuanlou peumah inn om khipkhep uhi. Mei-ek leng in inntung a peh khak di veng in inntung ah tuibel toh kigingsa in om ua, tua mei-ek lengte tui in buakmit tawmtawm uhi. Pasal hatlai te louhal ziak a gamkang phelh ding in kuan ua, khenkhat leuleu sa kanglum zong in buai mahmah uhi. Hiai louhal zohlak vel in naupangte'n nitak khomui zul chiang in innkiim ah meisem in matthe samsek ua, tualou in mautawn zang in bak vai veuhveuh sek uhi.

 

Louhal zou, Zoudawn a nnasep kipan taktak di hita ahihman in lou nnasepna a zat ding tuzat-heizatte seek in papite buaithei mahmah uhi. Hiai tuzat-heizatte a seekna mun uh 'Pumbuk' kichi hi. Sunchiang in papite pumbuk ah sikseek in khotang leh gam-le-nam vai khawng houlim kawm in nuamsa thei mahmah uhi. Pumbuk kichi pasalte omna deuh ahihman in numei sikseek dia a pai khakleh pasal neinawnlou, meithai chihna hi a, ama a seeksak masa uhi. Tuamah bangin, lui a pasal a va paikhak leh zi nei nawnlou, pagong chihna ahihziak in amah tui pe masa uhi. Huaiziak in, ipu-pate'n "Pumbuk ah numei vualzou; luimun ah pasal vualzou" chih paunak a nanei hial uhi. Khosung ah pumbuk nih leh thum bang om thei a, tua pumbuk neitu pen 'siik supa' kichi a, pawltak hun chiang in siik supa kiang ah pumkai teng in 'pum ann' pekhawm zel uhi.

 

Lou nnasep, mangtom kipanta ahihman in zingkal baih taktak in mangtom di'n kuan ua, loulai a sing kanglou te munkhat a sekhawm in tuate 'mang' kichi hi. Tua mangte a khonung in hal nawn ua, tua a mang halna mun uh alei kanghoihse ahihman in huaimun ah bal khawng tuh uhi. Mangtom kawmkawm in Thangboi leh apa bel bukbawl in buai mahmah ua, lounawl a gova te khawng bukvan dia pua in, buk bawl uhi. Siikkilh chihkhawng omlou ahihman in tuate tang in naang zang uhi.

 

Mangtom zou buhtuh ahon panpah tiptip uhi. Buhchi lak ah tangmai, mazel, dawnpawl chihleh haichi tang tuamtuam hel in, ‘bawmta’ sung ah thunkhawm ua, tua bawmta pen a kawnglak ua khih in buhtuh uhi. Vaimin, taang, chihleh haichi khenkhat bel atuam in tuh thoh ua, malta ahihleh pawithoh uhi. Maulak leh govalak, banah gamtak lak khawng ah malta hoih nuamse chi uhi. Belawi, mehnal, tangkha, begul chihte tungtun leh bukgei khawng ah tuh tangpi uhi. Huchi kawmkal ah inntung di bi-att hunta ahihman in Thangboi leh apa'n bi-att ua, Chingte leh anu'n lou nna sem uhi.

 

Buhtuh zohnung sawtlou in louham khoh kipan ngal hi. Vuah bangleng zu panpan ta ahihman in haichi tuamtuam leh loupa tuamtuam khawng pouta a, haichite hawi in loupa te khoukhia uhi. Louham khouzou louthual khounawn ua, louthual bel nihvei-thumvei bang khohtuan ngai a, buh leh haichite in loupa dangte a dep zohma khohkhoh ngai hi. Louthual bangzah veihiam khohzoh chiang in lou-phuai chih om lai hi. Lou nnasep bel sunkhua a nnasep ahihman in gilkial mahmah a, huaiziak in anntun posek uhi. Sunchiang in buk a sawnkhiat tung ah sun ann nezel ua, a niinte uh nindawl ah paizel uhi.

 

Khenkhat lou khohzohlouh khak di lau in lougiak zen in pang uhi. Khenkhat in bel ak pum khat-le-nih khawng gou in ‘thachial’ ua, huchilou lawmta bangzah hiam leng 'kilawm' in kuankhawm naihnaih uhi. Hiai loukhoh hunlai in bel louma a piang haichi tuamtuam nek di tam a, kuapeuhmah taichiat uhi. Tangvalte bang tangmai tawkha lawn khawng in kidem sek uhi. Lawmta hiam ahihkeileh nungak-tangval kingaizawng khenkhat te'n alou lampi kathuamte uah tangmai khawng a min gelh in kikoihsak zel ua, huaituh 'sawlseh' kichi hi. Huchilou in, lam kathuam ah sawlbawk khawng in kisawl seh ua, huaipen 'ka na paikhinta uh' chihna ahi hi.

 

Khosung a naupang te'n le amau khom in nuamsa thei mahmah uhi. Sunchiang in zawiboh, kelkum tou, kibukteih siakneih, kangtalai tuan chihkhawng in hun zang uhi. Sun ann nek hun chiang in ann tawikhawm in ne nainai zel ua, huaipen 'annkum' kichi hi. Nitak lam vailamthe khawng a ham chiaichiai chiang in vaidawn diing in kuan naihnaih sek ua, khomual ah anute uh toh kituak in anute un tangmai, dawnpawl, mazel chihte khawng apuak chiang un kipak mahmah uhi. Khenkhat te'n lampi a pai kawmkawm un lamnawl a bigai leh sialluai gai khawng atate uh a di'n doksak sek uhi. A tangpi in vaipai chiang in nupite masa ua, anung ah papite'n zui uhi. Naupangte’n a nu/pate uh gamkuanna khawng  zuih a sawm chiang un “tawlnou k’on puakna di” chi’n kikhemkhe zel uhi.

 

Loukhou zou 'phavang awllen' kichi om sam mahleh awl taktak chih om theilou hi. Thangpu te'n bel phavang lai, hun-awl neihsun chi'n inn bawl kisiak mahmah uhi. Huchi kawmkal ah khenkhat in a kumnawn lou d’uh phavang vat uhi. Phavang louvat te a leikol in baihdeuh chi ua, ngaina uhi. Chingte leh anu'n bel a vangkim in loulam va pha zel ua, huaipen 'phavang louveh' chi leuleu uhi. Huailou in, puanpi bawlsawm in apat heksate uh Chingte' nu'n a lawm nupi bangzah hiam zawnkhawm in innsung ah patthal in pat kapzan ua, tua kuante buhman nekpih nainai hi.

 

Phavang lai in papi leh upa lamdeuh khenkhatte khuaibu, a diak a khuaingal bu zong in vaksek uhi. Khilpi naine khuaingal-te sa vatah zel ua, tua khuaingal te'n sa ava nekchiang in akmulkang in khihzel uhi. Tua khuaingal te'n akmulkang a lenpih chiang un gamla pipi khawng ah le kimu ban a, huchi in khuaingal kua muzel uhi. Khuaibu khawng amuh chiang un chiang/sing khat khawng in kawk veuhvauh ua, huaituh 'hawisa, aneitu om' chihna hita a, midang in hawithei nawnlou hi. Zoudawn ah bel diktatna mah a thupipen hi gige hi.

 

 

Phavang hongbei a, buhlaak hun hi nawn leuleu hi. Buhlak hun in bel gamsa leh vasa tuamtuam buh nese thei tamlua ahihman in kuapeuh in awlmoh chiat hi. Loulian deuh nei khenkhat te'n buhlak chiang in vokgou in 'thathot' lazel uhi. Thathot lak ahihchiang in akuanteng in inntekte buh ding puaksak ua, nitaklam chiang in inntekte' inn ah ann nekhawm uhi. Atangpi in lou nnasep chiang in a tawlam akipat a khunglam man-oh in nna kisem mahleh buhlak chiang in akhunglam akipat loutaw lam man-oh in nna kisem daih hi. Kawite zang in buh ki-att a, lom lian loulou a kikoih tiltel in huaite 'buhphal' kichi hi. Huai buhphalte loulai ah bangtan hiam nisa ah kihai keu hi.

 

Thangpu' pa Siampu bel sabeng-ngabeng chihkhawng lunglut a, alunglut ziakmah in mat leng manthei viau hi. Loulai a buhne ngalte khawng tang a, tua ngalte thau in kaplum zel hi. Huaibanah, gumthang, pial, mankhawng leh vasa thang tuamtuam khawng kamsek hi. Huan ah, sazawi khawng ah le 'thau-kal' kamzel hi. Thangpu' pa bel a unau ua alianpen hilou ahihman in, sa, kheli nei, a liandeuh a mat chiang in a mau inn tunlou in, a u pa' inn (inn pi) tun a, hiai pen ute zahtak etsakna ahi hi.

 

Buh-at zoh chiang in buhkhet kipan nawn a, buhphalte sengzing sung ah buhtangte a kiatna ding in khen ek-ek uhi. Tua buhte buk innka maupek liantak kigan tung ah koihkhawm uhi. Tua a koihna mun uh 'phual' kichi hi. Huanah, buhsi te huih in a mutmang theihna ding in 'paallam' kibawl a, tua pallam a kipan in buh kikhisiang hi.

 

Buhpuak hun ahihchiang in lou gamla neite'n lamkal ah sekbuk mun khat-le-nih khawng ah bawl ua, huaite ah buh sekzel uhi. Thangboi-te' lou bel a gamlat luatlouh man in sekbuk bawl ngailou a, tangtak in inn tan potung ziauziau thei ahihman un kizen sa mahmah uhi. Huchi'n a kumkhat nnasep uh lohchingtak in zou uhi.

 

Thangpu' pa Siampu ahihleh a khosung ua tang-au ahi hi. Zoudawn ah bel hausa' gam leh hausa' vaihawmna nuai khosa uh aman un hausa thu kuaman sellou uhi. Khosung mi kuahiam in sa, kheli nei amat leh hausapa aliang pia ua, pawltak hun chiang inleng ‘Buhsun/Tangseu’ chi'n kho mipite'n buh pekhawm zel uhi. Khosung mi kua hiam om dan hoihlou omleh hausa in gam thei a, huanah, khosungmi khenkhat kitheisiamlou om leh hausa' mai ah kihek zel uhi. Hausapa leh a khawnbawl upate'n khosung hahsiang di, zin lampi vat di chih leh thil tuamtuam khosung mipite hih dia poimohte tang-au kikousak zel hi. Hiai tang-au te bel lou telhun a telbaih leh nnatang khawng awl uhi.

 

Zoudawn ah bel insak-inkhang leh khosungmi ki-itna leh kinek ngaihna om a, meh chituam deuh neihni khua in kikhol chipchip sek uhi. Phavang ahihkeileh awllen hun deuh khawng chiang in huangvulh-gantate khawng gou in insak-inkhang leh tanau-laina teng khawng in nekhawm nainai ua, huai in ki-itna leh kingaih natna pungsak hi. Huanah, sihni-manni tuahhun a khopi dan kithuzakna baihlam lou ahihman in, khokim-khopamte hilh diing in mi sawlzel ua, tuate 'khualtai' kichi hi. Sihna khawng ah tanau-laina kia mai hilou in, khosung a nungak-le-tangvalte'n khamuanna in inntekte giahpih khipkhep uhi. Hichidan a kigiahpih ahihchiang in sisuun inkuante a di'n khamuan huai in, tawldam huai mahmah hi.

 

 © ZM Tonsing / 05262017

Read 240 times
Login to post comments