You are here: HomeArticlesGeneralA Chihleh ‘Paite’ Pau Nathei Hia Leh !...

A Chihleh ‘Paite’ Pau Nathei Hia Leh !...

Written by  jamin H vualnam Published inGeneral Wednesday, 07 June 2017 00:52
A Chihleh ‘Paite’ Pau Nathei Hia Leh !...

jamin h  vualnam

 

Mihingte mel-le-puam ituam dungzui un, duh-le-deih leng a tuam a, nek-le-tak tuam in, khosakna leh innten-louten nasan kibangkim lou a lungsim leh ngaihtuah nate leng tuam siuhseuh hi. Tenna mun-le-mual tuam a, lum-le-vot leng kibang hetlou hi. Silh-le-ten ban ah gamtat khohei natawm kibanglou in, pilna siamna leh theihna te leng tuam tiltel hi. Huchibang ahihman in, pau-le-ham (language/dialect) leng tuamchiat a, akibang sun te leng akaih, agin leh awphawi omtuam sonson hi. (Etsakna’n: Paite pau ah leng; lousau, bukpi, lamzang pau/kaih leh adang dang). Beh-le-phung sang mah in pau-le-ham in mite kinaisak in ki-tanauna, ki-itna, pankhomna leh kituahna hontun zaw hi a theih in om hi. Huan mahni paukia theih sang in pau tuamtuam siam a theih hoihzaw leh manphazaw ahihban ah lohchin huaizaw hi. Huaiziak in pau-le-ham nakpitak in poimoh a, huan nakpi tak mah a kepbit kul in kisam hi. Tuabang ahihman in pau-le-ham kepbit a hatsak semsem ‘EITE’ adi’n kisam in poimoh kholdiak hi. Abeh/phung dan a Guite, ahihziak a anam dan a ‘Paite’ leh ‘Thadou/Kuki’ bangziak a omthei ichih leh apauzat (language/dialect) ziak uh hipen ding hi. Huchilou hileh ‘Guite’ kichi; ‘Paite’ ahihkei leh ‘Thadou/Kuki’ khat zosam sam hivek/hikhin pah mailou di adiam? Beh-le-phung hilou in Pau-le-Ham in kimelmak na leh kituahlouhna, samgibing khenna hontun hizaw ahidiam chih uthuai abang. (Etsakna: Hangshing/Guite : ichih Paite leh Thadou/Kuki pau zangte lak ah om tuaktuak, huchibang in, Valte/Khuptong : ichih Paite leh Mizo/Lushei pau zangte lak ah leng). Tuabang dan ahih intuh, beh-le-phung sang mah in pau-le-ham in thil tam genkha zaw in poimoh zaw suak himai lou ding adiam? Chih theih hi.

 

Aizawl khopi a skul a sem khat (teacher) toh kihouhou atop a aman; Nang koi apan? Bang mi? Bang beh? chin hon dong a ken leng: Manipur, Lamka a pan kahi a, Paite nam kahi, kabeh a hihleh Vualnam te kahi chin ka dawng miahmiah hi. Huaitak in tua Teacher in; Achihleh Paite pau nathei hia leh? chi’n hon leh dotnon a kenleng; lamdang satak leh hehtha suaksim in, Bangziak a paite pau katheih louh di! Paite te hiveng kachih san gaih hi. Paite pau nathei hia leh? Kichih himhim, Paite kaki chih ngal leh chi’a phun mulmul komin lampi ah ka ngaihtuah nilouh hi. Tuanung sawtlou, Dawr liansim khat a valut non, mi nih ana om ua ka kihouzel ua leh khatpen in: Nang koi apan? Bang mi? Bang beh? Chi’n hondong leuleu a kenleng; Manipur, Lamka a pan kahi a, Paite nam kahi, kabeh a hihleh Vualnam te kahi chin ka dawng lat hi. Huaitak in aman; alawm kiang ah, amahleng Eimi eivele achiphei gaih a, huaizoh in ka kiang ah, Achihleh Paite pau nathei hia leh? hon chi taget hi. Lungkim chiah lou in, Paite hiveng bangziak a Paite pau katheih louh di maw? Nou theilou uh maw! kachih behlap daih hi. Tuabangteng kazak in ngaihtuahna saupi hon guan a, bangziak a Paite pau nathei hia leh chih dotna hon dong uh adia le? Ngaihtuah ding tampi leh kivel nang tampi hiai dotna in hon dong hi’n ka mu. Mi’n ana genzel uh, Eimi nam mangthang tampi, Mizoram kia hilou in muntuam leh gamtuam ah tampi ki-om ahi achih te uh kamit leh kabil mahmah in kamu a kachiang taktak ta.

 

Nek-le-tak zonna, nnasep na leh thil tuamtuam ziak in mundang, gamdang leh midang sadang lak ah teng in khosa khamoh kei ni. Tuabang te khantouna leh masawn na hizaw ahihman in hoih lua. I omna, sepna leh namdang sadang gamdang leh mundang ah Zi leh Ta leh Tu ineikha leng ahi maithei a poituan kei. Huan i-omna, sepna, tenna nam leh gamte pau-le-ham leng itheih kia uh hilou a isiam ding mah ahi. Huchi komkom a keimah pianpih nam leh pau-le-ham ka nelhsiah a ka theihlouh pen thil zumhuai ahih ban ah, mi chavaih leh a mangthang ding kahi chihna hi lel hi. Muntuam, gamtuam leh namtuam lak a piang a khosa leh khanglian hi sawmvei mahleng, ka pianna Nu leh Pa’ pau-le-ham katheih louh hunhun a mangthang kahih dan phawk thak deih huai mahmah hi. Ka omna khosakna leh tenna mun ah kachipih mipih sapih leh nampih omlou ahi khathei. Himahleh Innsung ah zang in pibawl leng atheilou ding ki-omlou phetlou a, mihai natom in apian na Nu leh Pa’ pau haih tuanlou hi vo. Lawm-le-vual, kholak leh polam ah i-omna mi leh sa leh gamte paubel zang mah nihang, a loutheilou leng hikha ding aih chia. Tuabang hitawk mah leh ei, Nu leh Pa’ te’n innsung beek ah chiil in pat-tah peuh leng, kuamah mahni nam, pianna Nu leh Pa’ pau-le-ham theilou ki-omlou ding hi. Tuading in a pianna a Nu leh Pa’ mohpuak na ah kinga biubiau hi, aziakbel mihing a piantung a pauthei sa a piang kuamah omlou ahihman in. A khoilian a kem piching Nu leh Pa mah ahihban ah, mundang leh polam hilou a, mahni inn sung/innlum mah ahihman in. Tua innsung a iki chiil dandan pau-le-ham ita leh naute’n atheih ding genlouh a maang himai lou hia?!

 

Kua-nam, kua-beh hi’n Hmar/Simte/Gangte/Vaiphei/Lushei/Zou/Thadou/Paite leh a dangdang Nu leh Pa’ suan kahih intuh, hon suangtu te pau-le-ham kei adia aloutheilou masa leh poimoh pen chihna himai hi. Singapore, Japan, America, Korea etc, a piang a teng a khanglian a inn-le-lou nei hitawk mahleng, kapianna Nu leh Pa, Hmar ahih in tuh Hmar pau kasiam ziahziah keleng katheih bektuh alou theilou ahi. A huchih kei lebel kei-le-kei kichiman ding kahilel a, atop chiang in a mangthang mi-le-sa, nam-le-khang kasuak lel ding. Government thil bangkim ah leng beh-le-phung hizawlou in pau-le-ham a mi tam-le-tawm in thu nakpitak in pua hi zaw hi. Amah leng Eimi eivele chi’a eimi pau a kihou theihlouh pen zumhuai in zahlak huai isa kei u maw? Isiam zoh louh top in bangtan hiam a kihou thei bek hileng thu khat, Paite tuak tuak hi ngal a bangziak a midangte pau zang a kihou di? Nak zumhuai lua hilou maw? Tuaziak khong mah hilou di, Lamka/Churachandpur District pumpi total shutdown ibawl chia Sielmat lei leh Lanva lei kikal sung ihuapzoh hamham uh. Ahih kelah huai lei nih kikal sungkia mah Churachandpur/Lamka District hizaw hia le? ngaihtuah ding tampi om hi vo. En eipau I zumpih a I koihdap sungteng, ei-le-ei kizumpih a ki koihdap ihi lel ding. Huan en eipau i tawisang louh a I kepbit louh sungteng, ei-le-ei kinelhsiah, ki su thelthang leh kisuniam I suak lel ding hi. Ka tanu tapa keimah pau ka theih sakzoh keileh, kei leh ka suan ka khak teng kuaman hon thulak louh ding ban ah Innkuan mangthang ka suak lel ding ua, a top in ka nam leh phung toh a mangthang kasuak ding uhi.

 

Mibang a tam leng hilou, a om sun teng in mahni pau I kepbit keileh kuaman hon kepbit saklou ding ahihdan phawk hun mahmah hi. Mihingten itam ihinpih ua, himah leh Ngasa in a tam a sihpih chih thupil limtak a ngaihtuah thak kisam hi hang. Mizah phazoukei mahleng bangzah hiam bel kiphasam, ahihziak in a mangthang tampi ki-omta ahih dan leh a poidan theih thak deih huai mahmah non hi. A omlou i-omsak zoh ke leng a omsa mahni pau-le-ham pibawl a sukmang louh teitei tuh pichinna leh khantouhna kalbi masa ahihdan lungsim ah thaksak in tuadi’n kalsuan leng bang apoina om ei ta? Paite nahihleh Paite pau nathei hia chih, kam-mal in nakpitak in hon dawtliam a, na kasak ban ah adamtheilou ngaihtuahna ah khasiat na leh zumhuai sakna in kadim hi. Paite kahih buang leh Paite pau chu kidawt selouh a katheih ngeingei ding a pomsa kasak lai in a theilou a mangthang om ihihdan ka phawk thak a poi petmah hi. Gam khat, nation khat ichi hia, ahihkei leh atuam a mahni kivaihawmna/sovereignty neihnang intuh ibeh-le-phung te uh kisak theihpih phanphan sang mah in, pau-le-ham mah pibawl leng a lampi a gek zaw de aw? India/Bharat ah beh-le-phung bangzahta omding hiam kitheiseng lou hi. State tampi leh a tuamtuam leng om tham, pau-le-ham, tawndan beh-le-phung leng simseng louh om veve hi. Hitamahleh a lompi a honkhaikhomtu huaite’ beh-le-phung ahi koi ah aki chi a, a omkei himhim a thil hitheivual leng ahikei. Ahihhang in pautuam, namtuam ki neih chiat siuhseuh mahleng a lompi mah a hon ka’nkhawmtu Hindi/English pau/language ana hilel hi. Tuabang in gam/nation teng  ah leng hivek ahihman in, beh-le-phung inelhsiah ding chihna hilou in, tuasang mah in pau-le-ham ngaihkhok zawk a kepbit leh pibawl zawk bang achi de aw chi ut ihi zaw.

 

Igensa bang in siamtak leh naal tak a izat-theih louh top in, kamnih kamthum beek itheih ngal ding hilou maw! Theilou chih bikbek tel zaw akisam khat leh a poikhat ei ah om hikha ding hi. Midangte pau lah siam/thei a keimah pianpih pau-le-ham ka theihlouh na in bangmah tan hontun tuan kei dia zumhuaina, zahlakna leh sim-mohna phet kahih ban ah adiktak in manthatna bulpi ahi zaw chih kaki muhsuah kei a di’n pilhuai khading hi. Ka innsung a namdang leh midang pau in vai ahawm in tuh, Nu lem leh Pa lem kahi dia, tua nulem leh palem suan-le-pak te tuh direct a mangthang khin hipah geih lel hi. Computer, technology leh pilna siamna neih ngailou a kachiil theih Ta’ le Nau te a pianpih uh pau-le-ham, malnih malthum ka theihsak zohkei intuh Nu leh Pa huut kahi mai hi. Midang, namdang leh amaute pang bel a, haksapi, zumpipi, gentheipi leh nelhsiah komkom a hinkhua kazat ding mah hi’n teh. Kei, Paite kahi a, ahihziak in Paite pau louleng paudang bangzah hiam thei nimnem sam kei ve!!!. Nang napianpih pau-le-ham na thei hia? Midangte pau theizaw maw le? Nu leh Pa te’n itate, Ei pau nelhsiah a midangte a pibawl a ngai thupi sak zaw ding maw? Ahihkei leh Ta leh naute’n I pianna Nu leh Pa pau (original/mother tounge) sang a namdang/midang te pau kipahpih a tawisang zaw di??! Nang thu hi, na ut-ut zang inla na ut-ut kitheih ou! Himahleh  Mangthang vakichih tel hial ding zaw!!!!!. “Achihleh napau (Hmar/Paite/ Thadou/Mizo/Gangte/Vaiphei/ Simte/Zou leh a dang dang) nathei hia leh” ?...

 

[ UNESCO te suidan in India gamsung ah pau-mangthang thei dinmun a om pau 190 val om a, tualak ah a mangthang pah thei ding pau 100 vel a om chi uhi. Huchi ahihleh abiik in ei-‘PAITE’ pau bang dinmun in a om dia? pilvan mahmah kisam hi ].

Read 359 times
Login to post comments