You are here: HomeArticlesGeneralLaipilna leh Sepneilouna (Education leh Unemployment)

Laipilna leh Sepneilouna (Education leh Unemployment)

Written by  Dr PhilipThanglienmang Published inGeneral Tuesday, 20 June 2017 23:22
Laipilna leh Sepneilouna (Education leh Unemployment)

 

 

 

Laigiel Dr PhilipThanglienmang Ph.D. (JNU)

 

Kum 40-50 peisa hun lai in BA, IA passte pen kumpi/solkal in nasep a pe pai hi. BA/IA te guoh hilou in Tan/Pawl 5-6 passte in zong kumpi nasep a mu paipai hi. Pawl/Tan 10 passte pen School principal tanpha in a kaisangthei uh hi.  Tangval LUNNEU kum 25 achingta a, aneulai patsa in a nu leh pate’n Mission school hoi kichi khat ah a na kaisah ua, a nei sunsun teng uh toh pan un, sum leh pai tampi seng in, a tapa uh laisiem leh pilna dingin a na pang toutou uhhi. Tv. Lunneu in pawl 10, 11, 12 ahing ong/pasta a,  tuazaw in khopi lien khat a nasep hoi khat mu nadingin lunggel in Engineering zil dingin a’ng kisata hi. A pa pen mihausa seng ahi sih a, himalehzong ama’n suitheithei na ah a tapa laisim be nadingin sum leh pai a sui kawikawi Engineering college khat ah a admit/henglutta hi. Kum 4(li) a zil zaw in Bachelor of Engineering First class in ahing zo hi.

 

Tuachi’n Company tuomtuom ah nasep sui in a vah kawikawita hi. Ahivangin, koima company in ama pen nasep pieh dingin a dei sih hi. Azieh ahileh, ama’n degree sangtah anei vangin ‘Job-ready’ engineer nailo hiteh, ci’n a na kinuol zel hi. A nu leh pa tegel hinkhuo nuom deu mansah swamp lungtupna muolsuo zouta lo in a hing omta hi. Lungkie leh lungda in a hinkhuo a mangta mai hi!.   

 

Lunneu mawna a om sih a, heisunga dihlou ahi ei?, chia ahing kisui chiengin Indian Educational system kichinzoulo zieh ana hi chi’n a kimukheta hi. Sangnaupangte pen a neulai patsa un, nasep silbawl toh kituoh kilawm pilna siemna lam na kihil lou hizaw hi. Indian Industry Federations leh pawl tuomtuomte sui leh mukhiet dungzuiin India gam sungah mihing million 12 kum simsiel in sepna suithei dingin ahing pusuoh zel uhhi. Hinanleh mihing taza hing pawtkhe lah ah 75% te pen ‘job-ready’ lou (million 9) ahi uh hi, chi’n a kimukhie hi.

 

Nu leh pate’n sum tampipi seng a atate uh sang/school a’ng kaisah u’a, lai siem dingin  a’ng simsah u’a, BA/MA tan a’ng sawntou uhhi. Himaleh, India gam sung school/sanginnpi/college tengah mihing hinkhuo sunga man/zah ding siemna tahtah, khutsiemna, nehsuina, sumlawna lamsang a kihilchienna a sih uhhi. Degree maimai toh sepna kimutheita lou hi, chi khu koipou in I thei chiet uhhi.

 

Tam bang dahuoi ahi I Education system uh. School a kisimte leh hinkhuo a kizang/kimangte kibangta lou, kituohta lou valong!. School curriculum/syllabus kisimte leh practical life a kizangte kibangta lou!. Tua ahimanin mihing/sangnaupang million a million in kum simsiel in a pass/ong u’a degree sangtahtahpipi tawi in omta maleh uh zong, ‘employment ready lou’ ahiman un, nasep mulou  nempi om zel uh ahi.

 

PeopleStrong leh Confederation of Inidan Industry (CII) tegel in India Skills Report siem dungzui un, kum 2022 chiengtanin India ah siemna nei mihing million 700 a tulmaw/poimawta ding hi, chi’n a gen uhhi. Economy khanlet dungzuiin laipil mi tampi a omta a, ahivangin nasemthei dingin siemna nei ‘job-worthy’ ahi sih uhhi.

 

Skill training lamsang ah kanang mama nalai hi. Kum 2022 tan chiengin mihing million 500 tan siemna zilsah ding India kumpi in tup leh ngim in anei uhhi.          

 

The Aspiring Minds in India gam sunga ‘Employability report’ study a bawlna ah  kum 2015 in 615 collegete apatsa hing pass/ong engineering student 1,50,000 lah ah 80% (za lah a sawmgiet) te pen nasep piehtahlou in a om hi, chi’n agen hi.

 

Bang zieha hichi lawmlawm ahita diei?

i. Khopi a teng mihausate, mineizoute tate in private/mission school hoi penpen ah lai a sim u’a, mineizouloute’n kumpi/Government school hoilou pouah a sim u’a, pilna siemna zong namni/chini ahing piengdoh hi.
ii. Anina ah, gam sunga sangsiete/teacherte training hoitah a kibawl lou zieh.
iii. Athumna ah, political interference/politisiente kigollut zieha corruption/nehguh-tahguh uong in school education hoithei lou ahi.
iv. Alina ah, schoolte sumsuina leh summetbawlna(business) dinga kizah zieh.
v. Angana ah, laihil/teacher tahsap/kisap zieh.
vi. Aguhna ah, syllabus/laisimte hinkhuo toh kituoh a kisiem lou zieh leh pumsim/rote-learning) a sim zieh.
vii. Asagina ah, Industry/Companyte leh Academia/University/College te kithuzahlou zieh.

 

Bang bawl ding ahiei?

1. Industry/Companyte leh Academia/University/College te kithukhawm a laihil/syllabus dingte industry/company sunga nasepte/siemnate toh kituoh kibanga asiemkhawm ding uh.
2. Siemna tuomtuomte lakhawm a school/college curriculum/laihil ding te siemtup guoltup ding.
3. Laihil/syllabus lomkhawmlou ding pawl 12 azaw chienga a lampi tuomtuom a khenkhietpi ding.
4. Pawl 12 zaw chienga alunglut na lam leh ahi nuom na lampi a pui zel ding.
5. Laipilna lam toh Laisu/pienpi pilna lam hoitah khuoltuppi ding ama lunglutna leh tempaina lam etpi ding.  
6. Mihing pienpi siemna pilna lam, pienpi khutsiemna lam, lungsim ngaituo siemna lam leh mihing siemna chi tuomtuomte thupi ngai ding tualeh zahsiem ding.
7. Politisiente mawngmawng laihilna lamsang a kigollutsah lou ding.

 

 

 

Read 234 times
Login to post comments