You are here: HomeArticlesGeneralEIMI

EIMI

Written by  ZM Tonsing Published inGeneral Wednesday, 28 June 2017 01:20
EIMI

~ ZM Tonsing

 

Zinglam dak 7 lak in Indira Gandhi International Airport, New Delhi zuan di'n ka kipankhia hi. Ka cab lak ahongtun pahlouh ziak in sawtpi ka ngak nilouh a. Dak 9:30 a lengkhe di ka hihman in ka kinohgu sim mahmah a, flyover tungkhat ah sawtsimtak ka jam dedaw zawkmah ziak un ka om a lemthei taktak nawnkei. Ka taw khawngbang zau huanhuan hial in ka thei zozen hi.

 

Leenna ka tuan patna hikei mahleh New Delhi International Airport (T3) a kipan a ka lenkhiat masakna pen di ahihman in ka huphulh gusim hi. Khatvei T3 ka bohlai ua airport sung a let dan leh khe a sawtpi kipai ngoihngoih ahihdan khawng ka theihsa ahihziak in ka zekai khak di ka lausim hi. Huanah, International Airport bel Domestic Airport sang a lianzaw leh thupi zaw deuh himhim sam ahihna ah khatvei paina bel ngapthoh huai lawmlawm khollou mah hi. Himahleh ka leenna minute 30 a zekai ziak in ka tungbaih kiik lelop vanglak hi.

 

Lawm neilou, keikia ka hihziak in leenna sung a lutsuak gulgul in ka tutna di ka zongpah ngal hi. Leenna ka tuan masakni ua utna munmun a ka tutgaih laikhawng uh bang ka ngaihtuahna ah honglut a, ka nuihbang a za zozen hi. Gari kia khamtheih di i sak leh leenna nasan leng khamtheihlua ahihdan huaini'n ka theikhia. Khamluat ziak in nektheih ahong hawmte uh bang kine ngaplou hial hi. Kei bel kham ka kichih hang in ka lawmpa banghial ka hikei; lawmpa bel 'toilet' ah nihvei hiam ngut va law lala. Leenna tuankhak masakna pen ahihziak a kikham tuh hipeuhmah maithei, tuchiang a khamkhop le kingah zou nawnlou ahihman in.

 

Ka tutna di mun a ka tutzoh nung sawtlou in ka tutpih di tegel leng ahongtu uhi. Khatpa bel mel-et mai in haih vuallouh a Vaite ahihdan kithei mai a, himahleh khatpen in eilam' mel a put ziak in bangmi ahia chih theih haksa mahmah hi. Pau zawsam omlou a hun bangtan hiam ka tutzoh nung un eilam' melpu pen in Sappau zang in ka paina di mun ahon kan hi. Ke'n leng Imphal tan pai di ka hihdan ka gen aleh Meitei pau zang in ka omna mun ahonkan nawn leuleu hi. Lamka a om ka hihdan ka genzoh in "Eimi neivele maw" chi'n Eipau zang in ahon houpih chat a, huai apat Eipau ngen a kihou in ka kichibai khonung phing uhi.

 

Lamka a omna mun chihkhawng ka kikantuah ua, amah bel Motbung lak a om ahihdan hon hilh hi. Paite pau zang in hon houpih mahleh Paite pau a siam lawmlawm kei. Himahleh Eipau zang a; Eimi ahihziak in lungmuan huai in khamuanhuai tuan mahmah hi. Ahi a, leenna ka leng taktak chiang un tuh kihou manle ka om nawnkei uh, ihmut kidem mah ka bang hial uhi.

 

Ka tutpihpa ka theihngei hikei mahleh Eimi ahihziak in nuamtuam mahmah hi. Kei mah bang a ama'n leng bangtan hiam nopsak tuanna nei di'n ka gingta mawk hi. Pau neu chikchik kibatlouh ziak in leh hun paisa a i na thiltuahte uh khenkhat ziak in khat veivei kitheihsiam louhna simsim banah kituam-etna khawng om khazel mahleh ataktak a zaw kipaituam thei omlou, unau khat ihihdan uh haihvual hilou hi.

 

Lamka a veng kilkhat khawng a i lom om khakziak un kimuangsim khapah sek mahle hang mundang, a diak a gamdang khawng a i hong-om khiat chiang un kipoimohtuah chiat ihihdan uh kilang chiang mahmah hi. Eilawi bel mun khat a i omkhop zek chiang ua tam kisa in hithei kisa lawpah sekte ihi ua, tua ziak mah in khat-le-khat kal ah kitheihsiam louhna piangdek khasek hi. Zanlam a Delhi a Munirka buaina bangleng tua dan mah hi di'n ka koih. Munirka chihkhawng Eimite luahdimna khat ana hisam ahihna ah, khatvei-vei Eimi leh Eimi kikal ah kitheihsiam louhna neu chikchik piangkha pahpah hi. Tuchiang a tuh Munirka ah le Vaite tam gawpta, Vaite mehzuak khatbang eipau naksiam lotel!

 

Eimite’n i omna munmun ua mi thuzoh theihna (influencing power) hoihtak nei ihi uh chih ka muhdan ahi. I om dan leh gamtatdan, nek-le-dawn chihte natan ah Vaite hiam ahikeileh mundang a tualsuakmite' bildoh kihisim maimah hi. Ka lawm Vaite khat in le van a leidek chiang in ahon zotlouh tawp inle avan lei di keikia hon kan mawk hi. Ama van di tungtang a kei ka va kigolh mawkpen thuval lua bangsim mahleh ama'n noulam vante nalhthei, nou vanlei siamna hi uh chi in van a lei dia chia kei hoihsak leh hoihsaklouh honkan pahpah hi. Ke'n hoih ka sak ahihnakleh tuh aman hoihsa kholkei lele leitop!

 

Eimite hichi bangkhop a kihihna ah koimun-koimun ah i om ta zong in i heisuk-heitouhna uah pilvan kisam mahmah hi. Mikhat hoihlouh leh ginatlouh ziak maimai aleng i nampi in a minsia khuthei a, mi'n sangtak a honmuh lai bangmahlou suakthei hi. Tuamahbang in, mikhat hoihziak lel aleng i nampi in minhoih leh minpha khuthei veve hi. Mi hon muhdan leh i nampi' lungput di mimal' khut ah kinga lian mahmah hi.

 

Kum bangzah hiam concert thawmging zalou a i om nung un ZAA te malakna nuai ah Citywide Concert neih in hong om a, huai ah ka va teltei hi. Nuam vasa zaak tuh ka hipeuh mah dia sing in ka va kising ek-ek sam hi. Ka sam va singpulh tamlaw deuhzek ka diam ah ka tal bang kolhtuan diak in ka thei a! Lamka ah concert omlouhna kum 10 phial bang chingta di'n ka gingta hi. Huaiziakin khangthak khenkhat bangtuh concert a ahohkhak patna khawng uh hi maithei.

 

Hiai concert ahoihna leh ahoihlouhna gen sawm ka hikei a, kum bangzah hiam nung a hichibang concert thupi honsai ZAA-te pahtak huai uh ka sa. Thil himhim ahoihna om leh hoihlouhna leng om chih nial vuallouh thudik ahi. Khenkhat in hichibang concert hiam ahikeileh 'social gathering' khawng sai ahihchiang in khamtheih-guihtheih banah ah numei-pasal kal a thangtatna dia hun lemchang ahi achi ua, a diklou ka chikei himahleh atumloute a di'n va siat teitei na di thu om tuanlou a; a se-utte a di'n le hiaihun sese lou ah leng siattheih veve hi.

 

Huai banah, khenkhat leuleu in Pastor in thumna a hun hong; kuapeuh nuamtal a, amau ut-le-dah a a om nung ua Pastor mah in Pathian kiang a kipahthu gen a hunkhakna bawl chi'n gen-le-sak nei neuhneuh uhi. Dikthou mah e! Himahleh, tagah-meithai leh dai kilkal a mite' tan di nasan neksak guigui a, nekgukna leh dikloutak a kilamkhia neih-le-lamte leng Pathian vualzawlna chi'n Pathian kiang a kipahthu gen a lat ahihchiang in kuamah a paukei uh! Huaitoh kilam danna om ka sa kei.

 

ZAA-te gum a, amau mai-etna a ka gen ahi kei. ZAA a panna nei ka hihlouh banah Album bangzah hiam bawl di zen a laasiam ka hihlouh kia hilou in laa khat-le-nih khawng record bawl dia laa sathei leng ka hikei lai zaw mah! Ka gennop tak tuh kidem a kigensiat-siat sang in kipahtawi tuahdan siamni. Tutung concert bang nidang toh kibanglou, siangthou leh thovenglua chih kei muhdan ahi. Kei theihna tan ah nidang a concert om chiang a buaina bawl leh gari nuai, mun lemlou chik khawng a numei-pasal kilawmloutak a om muhkhiat ahi kei. YPA Hall mai a ka tutlai in tangvalnou bangzah hiam hong kibohtuah dekzual uh chihkhawng lel ahi keitheih. Huaile kihoulem pah uh,mit a ka muh ahi. Sure!

 

Nidang lai Eimi te kihi nawnlou, tu khangthak hun hita a, kong bangkim ah kikhekna muhtheih in om hi. Nuamlua. Nidang lai dan hileh huai leenna ka tuanpihpa bangle kihih geugau di hinapi'n tua bel hon khamuanpen suakta hi. Imphal Airport ka tun ua pat kimu nawnkei mahle ung leenna sung a ama ziak a khamuangtak a om thei ka hihman in ka kipak petmah a, Eimi mah toh leenna sung a tutkhop anopdan ka theisuah deuhdeuh hi.

 

© ZM Tonsing | 26062017

Read 168 times
Login to post comments