You are here: HomeArticlesInterviewInteraction with Gospel Singer Boijang Haokip

Interaction with Gospel Singer Boijang Haokip

Written by  The Lamka Post Published inInterview Tuesday, 09 September 2014 02:22
Interaction with Gospel Singer Boijang Haokip

Gospel singer Boijang Haokip a hihleh 1984 kum in Naajang khua ah piang hi. Unau pasal 5 leh numei 2te lak ah a lianpen zomtu hi a, haksatna tuamtuam ziak in laisimna lam ah class XII tan tung in aban sunzom theilou dinmun ah ding mahleh tuni chiang in ei singtangmite lak a Pathian lasa minthang leh mite lungkuai zoutak hongsuak hi.

 

LKP: Pathian lasa a hichibang dinmun na tan theihna din Album bangzah na bawlkhe khinta a? Na lasakte lak ah na deih tungtuan a om hia?

Boijang: 2009 kum a recording ka patkhiak a kipan tuni tan in Album piching 2; ‘Mi Lungset thiem Pathien’ Vol-1 leh 2 ka khahkhe khinta a, tun a thumna ding ka bawl lel hi. Hiai pen a hihleh tukum November khasung a khahkhiak zoh ka lamen hi. Recordings ka bawlkhiak single teng sim in bel la 40-50 kikal a tung zouta ding.

 

Ka lasak teng lak ah Rev. Chongkhupa in a phuah ‘Ngaihlutna/hmangaihna Pathien’ kichi hoih kasa in kei toh leng ka kituak pen hi’n kathei hi.

 

LKP: Na lasakte lak ah nang phuah a omkha hia?

Boijang: 2009 Album title dia kazat, ‘Mi Lungset thiem Pathien’ kichi kei phuah ahi.

 

LKP: Lasak lam ah midang ngaihsang nanei hia? Na neih leh a ziak non hilh thei diam?

Boijang: Pathian lasate lak ah Jeff Akai thupi kasa in ka ngaisang pen. A ziak bel, a nungtolhna a kipan Jesu Khrist lam zuan in chihtakna toh Pathian phatna la honsa hi. Amah lasakte’n gamsung leh nam sung ah khangdong tuailai tampite khalam bawlhoih zou mawk hi. Huaibanah, a la siamna tuh kuamah phaklouh ahi.

 

Zawlla leh gamngaihla lam ah Mr Thangzalien siam kasa pen hi. Amah lasakdan a nop tuak petmah a, a niam a sang chihte tawllou in sathei mawk hi. Huaibanah amah aw in mi hip lai hin kathei.

 

LKP: Politics lam ah kua na ngaisang a le?

Boijang: Politics toh kisai gen ding tam theikei mahleng KNO General Secretryb Helen Kipgen mithupi leh ngaihsang huai mahmah ahi.

 

LKP: Album 2 na bawlkhiaksate bangzah vel na zuakkhia a le?

Boijang: Copy 2000 tuak vel ka zuakkhia.

 

LKP: Thugen a Pathian nasemte lak ah la??

Boijang: Tulel a Ngahmunnuam a om NTBC Pastor Seilam thupi kasa in ka ngaisang hi. Aman khalam a hinna detdou tak a neih ziak in mi lak a, a thugente leng hing hi.

 

LKP: Zogam Artist Association (ZAA) in tulai a, a buaipih mahmah Nation Wide Music Festival ding toh kisai in bang ngaihdan nanei a?

Boijang: Ei lak a huchibang a Pathian phatna leh pahtawina thupitak om ding ken leng kana thei a, pha kasa petmah hi.

 

Hiai toh kisai a ka gennop a hih leh, Pathian lasa a mun tuamtuam a omte, nam leh pau tuamtuamte’n pau tuamchiat in la sa mahleng i biak Pathian khat ahi a, phatna i piakkhawm in phattuamna thupitak nei ding hi.

 

Tuabanah, Kuki Gospel Artust Assiciation (KUGAA) panlakna toh kisai kon kupnop a hihleh, Kuga in Gospel leh Love Song stage khat kikop theilou himhim ding in panla hi. Pathian la leh Zawlla I chih chiang in tehvual hilou hi. A ziak bel Zawlla pen mahni kitawisangna leh mihingte kilungkim sakna maimai ahi a, hiai leitung mah ah mangthang ding hi, himahleh Pathian phatnalate bel tangtawn in dai nawnlou ding hi.

 

LKP: Zawlla leh Pathian la kal kupnop a om lai hia?

Boijang: Zawlla pen a sia i chipah kei. A ziak bel, Pastor khat in leng a zi/nungak a ngaihna thu pen la a sathei mah ahi. Himahleh huchibang la-te kuapeuh in thuakzoh haksa sa a, lampi diklou a hon pitu dia I zat khak chiang in ei a dia sia ahi lel hi.

 

Huaibanah, Zawlla pen kuahiam tanu/tapa pahtawina lel ahih ziak in leitung mah ah bei ding a, Pathian la pen bangkim hihthei tangtawn Pathian pahtawina a hih ziak in bei nawnlou ding hi. Huchibang kawmkal ah, I pahtakdan bel kikhai mahmah hi. Kuahiam khat zawlla sa dia state a, a hong dinkhiak chiang in mipite kipak in khut beng in kikou zuazua ua, himahleh Pathian lasa dia hongdingkhete bel khutbetna leh kipahna aw ging a vaidawn hilou uhi.

 

LKP: Kikthak zual leng, na career toh kisai a na panlakna leh haksatna na tuahte non kum thei diam?

Boijang: La siamsa a piang kahikei, himahleh lunglutna taktak kana nei hi. Bangchileh la kisiam ding hiam chih mite kana dong zel a, amau a kipan hasotna dungzui in Henglep, Naajang khua a ka omlai un ka lou giahna lam uah tui lak a gawltan kidiah a lasak chih bang nakpitak in kana hihkha hi. Mi hausatakte bang a training hoihtak lazou hikei mahlengtuni chiang in Pathian zaar zou in hiaitan ka hongtung thei hi.

 

Haksatna lam gen ding chileng Gospel singer 1 hihna ah haksatna leh khemna tamtak in a hon tuam ton a om sek hi. A bik in innkuan khosak haksatna ziak bang, innsung mite a kipan chiklai peuh a support ngah gige louh ziak bang in lungkiak ton om thei tham hi.

 

LKP: Na innsung mite lak ah nang chihlouh lasiam dang na om uh hia?

Boijang: Hi om, a tung in bel ka innkuante kei sang a siamzaw ngen ah ua, ka pa ngial mi lungsim kuai thei tak a lasak a siam hi, kei bel min leng ‘la satheilou pa’ honna chih uh kahi. Himahleh Pathian pahtawina dia ka aw zang ut a theihtawp suah a kei leh kei kong kizil touh chiang in tun bel ka innkuante lak ah a siampen ka tuhzouta hi.

 

La siamna leh lasakna toh kisai a ka genbeh ut a hihleh, tamtakte’n omchim thoihna ding bang, sum leh pai a hauhsak ziak bang, melhoih leh minthanna lunggulh ziak bang in la ana sa uhi. Huaite gen ding chileng kei bel kuamah  in melhoh a hon chi ngeikei ua, neih leh lam ah leng suanthamching kahikei. Himahleh chihtak tak a phatna ka piak Pathian in kei toh kihun lel in a hon tawisang veve hi.

 

LKP: Mipite leh maban a la honsa tou ding khangdawng tuai lasiamte lak ah thukhah nop nanei hia?

Boijang: Lasak kichi thil nuam mahmah ahi, himahleh vanlam thilte mangngilh a leitung nopsaknate tam petmahta a hih manin maban a la honsa dingte I theih dia hoih tuh Zawlla leh Pathian la kikal koi zawl tel ding? A tel dikte a din kipahna thuguk gensenglouh leh tangtawn nopna bukim neihtheih ahi.

 

Jesu nei a amah phawkte mah nopsa ahi ua, leitung nopsakna zongte’n bel a lungkimna uh a muh ma un hanmual ah a laim mangsan zel uhi.

 

Bio Data:

Full Name: Jangkholal Haokip @ Boijang Haokip

Father’s Name: Paongam Haokip

Mother’s Name: Lhingzahat

Date of Birth: 15th August, 1984

Marital status: Married

Profession: Gospel singer

Native Village: Naajang village, Henglep sub-division

Present address: Join Veng, Tuiboung

 

Read 1065 times
Login to post comments