You are here: HomeNewsWorld NewsInternationalMalala in Nobel Peace Prize tangkhalou, OPCW in ngah

Malala in Nobel Peace Prize tangkhalou, OPCW in ngah

Written by  Published inInternational Monday, 14 October 2013 13:52

MIRANSHAH, Oct 12: Pakistani Taliban thusuak in a taklatdan in tuailai education activist khat thah ana sawm uh Malala Yousafzai in Nobel Peace Prize a tankhaklouh lungdampih mahmah uh ahihdan taklang uhi. Tehreek-e-Taliban Pakistan (TTP) in kum paisa 2012 October 9 in Malala school bus a pailai ana kap ua, a ngawng leh lutang kapkhak in om mahleh Britain a etkol ahihnung in hong damkik a, huai a kipan in khovel pumpi a naupang leh numeite laisimsak ahihna ding a khovel pumpi a palai bang a ngaihtuah in omta hi.

 


Tehreek-e-Taliban Pakistan (TTP) thupuangtu Shahidullah Shahid in a taklatna ah kum 16 lel mi Malala in Nobel Peace prize a ngahna dingthu omlou a, hiai prize ngahna ding toh kisai a sepkhiak bangmah neilou mah ahi chiin taklang hi. Tua banah European Parliament in Ningani a Malala kiang a Sakharov human rights prize ana piak leng Pakistani Taliban pawl in zadah mahmah uh ahihdan leh Malala in Islam sahkhua kalh a thu a gen ziak a tumlam gamte'n kipahpih a, hiai prize a piak hidan in ngawhna bawl hi.

 


Tu kum a Nobel peace prize ngahdingte lak ah Malala genkhak himahleh final selection ah khinkhiak in om a, 1997 a chemical galvan douna ding ngimna a phuhkhiak a om Organisation for the Prohibition of Chemical Weapons (OPCW) kichi kiang ah Nobel Peace Prize piak in om hi. OPCW kiang a hiai prize piak a omna ziak thupipen a kigen ahihleh Syria tualgal huaisetak lak a khovel a muanna leh lemna omding deihna ziak a lubuk phal a chemical galvan hihsiatna ding a pan a lakna ziak hi'n kigen hi.

 


Ni kum a Nobel Peace prize ahihleh European Union kiang ah kidouna ziak leh Cold War ziak a continent sehkhen a omte kigawmsak zou chih ziak a piak in om hi.

 


Nobel prize ahihleh Swedish industrialist Alfred Nobel in 1901 a kipan ana patkhiak hita hi. Tukum a medicine, physics, chemistry leh literature a prize ngah dingte min puankhiak khit hita a, kalnawn Seppatni chiang in Nobel economics award ngahding puankhiakna om ding hi'n kigen hi. (AFP)

 

 

Read 739 times
Login to post comments