You are here: HomeNewsWorld NewsInternationalPhilippines typhoon ah siluang 1,744 muhkhiak hita ; Panpihna nasep zekai

Philippines typhoon ah siluang 1,744 muhkhiak hita ; Panpihna nasep zekai

Written by  Published inInternational Wednesday, 13 November 2013 14:31
Philippines typhoon ah siluang 1,744 muhkhiak hita ; Panpihna nasep zekai

MANILA/TACLOBAN, Nov12: Philippines a Typhoon Haiyan ziak a sihna tuak mihing 1,744 theihchet hita ahihdan government official thusuak in taklang a, himahleh misi zah diktak bel theihchiang hinailou a, theihchiang a hih hun a misi hiai zah sang a tamzaw lai ding a muanmawh a om hi'n thusuak in taklang hi. National Disaster Risk Reduction and Management Council thusuak in a taklatdan in, ni 4 paisa a typhoon haiyan in Philipines suahlam a nawkziak a liamna tuak 2,487 pha ahihdan taklang hi.

 


Himahleh government thusuak in a taklatna ah hiai typhoon ziak a sihna tuak mi 10,000 val ding hi'n taklang a, hiai huihpi hattak leh vuahpi ziak in mihing 660,000 val in buaina tuak uh hi'n taklang hi.

 


Philippines gam a typhoon tungsateng lak a hatpen leh huaisepen a theih a om hiai Typhoon Haiyan in khua leh inn tamtak a mutsiatte lak ah muhkhiak nailouh a om misi bangzah omlai ding hiam chih gentheih hinailou hi. Tuni Sepnawnni zingkal tan inleng panpihna leh hutkhiakna nasemte'n phakkhak nailouhna mun hunkhop neilai uh hi'n thusuak om hi. Leyte province sung a huihpi'n a nak nawkkhak diakna mun Tacloban khopi sung a mite'n nekding neilou a om uh ahihdan thusuak in taklang hi.

 


Hiai thiltung toh kisai in zan in US in Manila khopi leh Tacloban khopi ah panpihna van tuamtuam nekding an, damdawi leh tui tamtak lenna zang in nawnlutta hi. Hiai panpihna vante ahihleh American Red Cross, Salvation Army, Direct Relief leh Heart to Heart pawlte tungtawn a hawmkhiak leh sepsuah hiding hi. Philippine President Benigno Aquino in panpihna leh hutkhiakna nasem ding in sepaih tamsem sawllut beh a, himahleh lamlian, lei (bridgess) leh lenna phual (airport) tamtak a kisiat ziak in huhna nasep deihbang a kintheilou hi'n kigen hi. United Nations official thusuak khat in a taklatna ah Tacloban khopi sung munkhat a misi luang 300 - 500 kikal ding mukhia uh ahihdan taklang hi.

 


Tacloban khopi a kipan km 10 vel a gamla a om Samar province sung a tuipi kiang a om Basey khua tuikihawt ziak a piaunel in tummang/ vukmang ahihdan Samar province governor in taklang hi. Hiai khopi sung a kipan mihing 1,000 val si ding a gintak hi a, tutan in mi 2,000 val mangthang uh ahihdan theihchet hita hi'n thusuak in taklang hi. Hiai mun a tuipi tui kihawtpen 2004 a Indian Ocean a Tsunami toh kibang ding hi'n kigen hi.

 


Typhoon Haiyan hatna mun pen a kigen Tacloban ah huihpi dakkal khat a km 580 (380 miles) a hat a nung hi'n kigen hi. Misi tamna pen ding a gintak Basey khomi khat in a genna ah Typhoon in amau omna a nawkkhak ngeimanglouh ziak a lungmuangtak a om uh ahihdan gen hi. Hiai thiltung toh kisai in tuni tan in khovel gam tuamtuam 21 in panpihna peding uh ahihdan taklangta uhi. Hiai typhoon ahihleh Samar province milip 40,000 vel omna mun ah huaisepen hi'n thusuak in taklang hi. (AP/Reuters)

 

 

Read 764 times
Login to post comments