You are here: HomeNewsLamka PostThe Lamka Post | March 24, 2014

The Lamka Post | March 24, 2014

Written by  The Lamka Post Published inLamka Post Monday, 24 March 2014 15:10

Lagao kimawl mi 2 Police in jail ah koih
LAMKA, March 23: Zan sunnung dak 1 vel a SP/CCPur makaih a Police team in New Bazar Bus parking ah lagao kimawlna munpi buluh ua, huai ah Henneilam Vaiphei (40) s/o (L) Khaidou of Appolo Veng leh Paugousut Thomte (21) s/o (L) Khenpau of Mualsan mankhia uhi. Mat a om mi nihte tuni’n Imphal Jail ah koih ding in pawsuk uhi. Hiai thu ah Police in FIR No. 41(3)2014 CCP PS U/S 13 PG Act bulh hi.


Police Station kong traffic point apan Tedim Road bawlna kipan
LAMKA, March 23: Election code of conduct suahma tham a, District incharge Minister Phungzathang Tonsing panlakna tungtawn a Lamka khopi sung abik in Lamka Police station kong a traffic point a kipan Lanva lei tan Tedim Road paver machine zang a lamlian tuang black topping bawl ding gelsa a om bang in tuni’n PWD nuai a contractor in nasep pan hi. Hiai lamlian bawlna ding ah Tronglaobi a 'Hot mixed plant' a kipan Alkatara huanminsa tripper gari in non a, huai alkatara minsate machine sung a guanglut in machine zang in lamlian tuang bawl uhi. Paver Machine in a zawhna sateng roller in gawimai tawm hi. Lamka khopi sung a lamlian poimawhpen Tedim Road kibawllel mipite a ding ahihziak in kuapeuh gari taivelte’n nasemtute subuaithei ding leh amau a ding a dongkholh ding a gari park-lou ding leh kuapeuh in kithuahpih chiat ding in contractor in ngen hi.

 

 

Gospel Movie CD Album hongkhia
LAMKA, March 23: Grace Bible College(GBC) in keyboard project phuhvuhna dia a bawl Gospel Movie CD Album “Khrist toh bangkim” kichi tuni sunnung dak 1:00 in EBCC Dorcas veng biakinn ah Rev. S. Vung Minthang, General Secretary, EBC in honna leh latna nei hi.
      

EBC General Secretary in hiai hun a, a thugenna ah, milim toh muhtheih ding movie hoihtak GBC Student-te'n a bawlkhiak uh  pahtakhuai a sak thu gen a, saptuam makaite'n leng gamdang a mite bangchi khosak uh hiam chih enkhia a vakvel hunta hi’n gen hi.  Tua banah tualsung saptuam sung kia buaipihlou a gamdang toh ki-update poimoh ahihdan leh mobile phone zang a Pathian thu khahkhiak a et hunta hi’n gen hi. Saptuam in laibu zattang zang a bawl khen a tuailai lehkhasiam Pathian nna sep lunglutte gamdang ah sawlkhiak hun mahmahta hi’n gen hi.  
    

Rev. Dr. Ginsianthang, Principal, GBC in a genna ah, GBC kichi kum 1981 a tup kichiantak nei a heutu masate’n ana phuhkhiak uh hi a, tuni chiang in kum 33 bang chingta a, hiai hun sung in GBC ah graduate 837 omta hi’n gen hi.  Tua banah GBC leng Album bawlna lam ah khangtou mahmah a, kum 2000 in Audio CD bawl a, 2003 in CD album bawlnawn in 2007 in CD album mah bawl a, tu’n Gospel movie CD album hoihtak bawlkhethei nawn hi’n gen hi. Mipite kithuahpihna ziak a GBC hiai tan tung ahihna ah kipahthu gen hi.


 

KKP General Conference 8veina zangzou
LAMKA, March 23: Mizoram Presbyterian Church (Presbyterian Church of India)Manipur area nuai a Khristian Khanglai Pawl (KKP) General Conference 8veina New Lamka Bethel Veng ah March 21, 2014 nitak in "Lal Jesu tawh" chih thupi a nei in programme kipan hi.  Tuni sunma dak 10:30 in mipi biakna kikhop om a, hiai ah Rev. Lalbiaknia, Administrative secretary, Manipur Area, Mizoram Synod in thugen hi. Sunnung dak 1 in Variety programme-cum-Seminar nei ua, Rev. Genlianpau, i/c Sharonphai bial in thugen a, Rev. Summinlian, resource person a pang in “Khristian Khanglai pawl kikaihhuaina” chih pansan in seminar makaih hi.  KKP General conference hunsung in bial tuamtuam 30 val a pan in lapawl siamtaktak ngaihkhiak hi a, tunitak in khawmpi zousiang uhi.


Cycle spoke in a khepi het-tan
LAMKA,  March  23: Lalkhohau (7) s/o Seikam of Singngat, zan sunnung dak 2:30 vel in Singngat ah Cycle a tailai a khepi veilam guh Cycle spoke in het-tan kha a, tu’n Lamka Damdawi inn ah etkol in om hi.      

 

Left and Secular Alliance
LSA in C Doungel&Dr M Nara-te gum ding
IMPHAL, March 23: Congress party hilou leh BJP leng hilou party 10te kigawmkhawmna pawlpi Left and Secular Alliance(LSA) in Pathianni in Outer Parliamentary constituency luahtu ding NCP candidate C Doungel leh Inner seat luahtu ding CPI candidate Dr M Nara gum uh ahihdan puangkhia uhi.


Allian convenor Ksh Santa in Pathianni in thuthaksaite kiang ah Left and Secular Alliance in Manipur a Congress leh BJP candidate-te zohkhiat teitei ding tup pipen a nei ahihdan theisak hi. Ksh Santa in agenzelna ah, Manipur Outer seat a JD-U in Lien Gangte aguanna thu uh Alliance in niallou ahihdan gen hi. Abultung akipat a Left and Secular Alliance member hihna neite ahihleh- CPI, CPI (M), JD (S), JD (U), Shiv Sena, Bahujan Samaj Party (BSP), All India Forward Block (AIFB) leh Peoples Democratic Alliance (PDA).-te hi uhi. Himahleh tu in PDA leh JD-U-te'n  Alliance gamlatsan tadih phot uhi.(NNN)



Triangular fight for Nagaland lone seat
Nagaland seat khat kituhna ah party 3 kibei ding
DIMAPUR, Mar 23:   Nagaland a Lok Sabha seat khat om sun kituhna kil thum pansan in beih in om hi. Kiginni in nomination paper thehlutna nanungpen neihna hun ah Congress, Naga People's Front (NPF) leh Socialist Party of India-te chihlouh party dang kuamah nomination paper thehlut omllou uhi.


Kiginni in Socialist Party of India candidate Akhie Achumi in nomination paper thehlut hi. Tuabangkal ah Naga People's Front (NPF) candidate chief minister Neiphiu Rio leh Congress party candidate Nagaland minister lui KV Pusa-te Nagaland a seat khat omsun kituhna ah hat mahmah tuak ding un gintak huai hi. April 9 in Nagaland ah Lok Sabha Polls neih in om ding hi. Alunglut huai mahmah khat ahihleh Nagaland a SC Jamir makaih Congress ministry ah KV Pusa leh Neiphiu Rio-te senior cabinet minister tuak hikha zomah uhi. 2013 Nagaland assembly polls ah Pusa vuallel hi Rio leh Pusa-teAngami tribe akipan tuak hi uhi.(NNN)


 
PLA cadre innocent in IPS officer killing case
IPS officer thahna thu ah Court in PLA cadre Kunje khahkhia
IMPHAL, Mar 23: Kum 25 sung vingveng IPS officer Miss Vandana Malik (IPS) thahna thubuai toh kisai  suizui ahihnung in Imphal Court in tualthattu hiding  a muanmoh PLS cadre min thaimangsak hi. Hiai toh kiton in Court in PLA cadre khahkhe ding in theisak hi.


April 8,1989 in Imphal West District Konthoujam Lamkhai mun ah muanmoh kai PLA cadre-te'n ambush abawlna uah IPS officer Miss Vandana Malik (IPS) kaplumkha uhi. Ambush bawl ahihni in Lamphel Police Station (now under Imphal West district officer-incharge(OC) Miss Vandana Malik leh a team-te'n venbitna peding chi'n High School Leaving Certificate (HSLC) examination centre khat zuan uhi.Nitaklam dak 3 lakvel ding in, muanmoh kai helpawlte'n ana lamtan ua, amun ah Miss Vandana Malik kaplup in om a, constable dang 4 naktak in liam uhi. Police-te zat sten-gun khat, .38 revolver khat leh galvan tamtak helpawlte'n laksak uhi.


Thuguk muhsuah ahih toh kiton in PLA cadre 5- N Saratchandra, Thokchom Kunje alias Tolen, M Inaoba alias John, L Tombi alias Surendro leh Ch Subhash alias Dolen-te mat in om ngal ua, anung sawtlou in Manipur Government in hiai thubuai toh kisai CBI khut ah pekhia hi.September 15, 2011 in Assam ah police-te'n Thokchom Kunje mankhia in Sajiwa Jail, Imphal mun ah khum uhi. Theihpihtu 50 leh lai poimoh tuamtuam 107 toh hiai thubuai suizui in om a, IPS officer thahna thubuai toh kisai in Thokchom Kunje in kigolhkhakna bangmah neilou chi'n Court in amin thaimangsak hi.(NNN)

Read 1362 times Last modified on Monday, 24 March 2014 15:19
Login to post comments