You are here: HomeNewsLamka PostThe Lamka Post | August 11, 2018

The Lamka Post | August 11, 2018

Written by  Published inLamka Post Saturday, 11 August 2018 08:29
The Lamka Post | August 11, 2018

Parliament Monsoon session final day

Rafale thubuai ziakin Inpi nih khawlsak in om; LS in Arbitration and Conciliation (Amendment) Bill, 2018 pass

NEW DELHI, AUG 10: Rafale jet deal a nekgukna thubuai om Joint Parliamentary Committee (JPC) –te suizuisak ding ngetna toh kisai a Congress member-te’n kiphinna a neih ziak un, tuni Sintawpni in, Parliament Monsoon session pailel ni nanungpen ah pre-lunch session sung in, minute bangzah hiam sung in nihvei mahmah Rajya Sabha Inpi khawlsak in om hi.

 

Rajya Sabha a, tuni a tutkhawmna kipat apan in Congress member-te ding den ua, Rafale thubuai toh kisai in buaina bawl uhi. Tuni a, a session masapen ding makaih RS Deputy Chairman thak Harivansh in kiphinna nei member-te kiang ah Zero Hour in nna a sep ding phalsak ding in ngen a, member dangte’n mipite a dia poimoh thute genkhiak ding phalsak ding in ngen uhi. Inpi sung a buaina kal ah Zero Hour sutzop in om zel mahleh, Congress member-te a tutna mun uah ding den ua, opposition member dangte’n leng thubuai a neihte uh tangkoupih ding in Inpi umkual sung ah dianglut uhi. Zero hour a beima minute tamlou chik in a sap in Deputy Chairman in Inpi khawlsak hi.

 

Sun hun a Question Hour a dia Inpi a tutkhawmna neih ahih hun in, Congress member-te’n a thilngette mah uh tangkoupih nawn ua, amau lak a member tamtakte tutna kal awngte ah vialdian in slogan ngaihtaktak sam uhi. Hiai zoh in Chairman M Venkaiah Naidu in sun hun tan Inpi khawlsak hi.

 

Leader of oposition Ghulam Nabi Azad in a gendan in, Rafale deal kichi scam lianpen ahi a, hiai thubuai toh kisai a JPC suizuina a om ding ahi chi’n gen hi. Congress Deputy makai Anand Sharma in a gendan in, hun paisa Congress-te vaihawm sung a hichibang thubuaite honkh- iak ahihziakin, JPCprobe neih ding thupiak om zui ngal chi’n party a thilngette gen thakthak hi.

 

Tuabangkal ah, Derek O’Brien (TMC) in point of order khat tangkoupih kawm a, a gendan in, private members’bill-te taklat ahih ni a, legislative business neihlouh himhim ding ahi chi’n gen hi. Hiai toh kisai a Minister of State for Parliamentary Affairs Vijay Goel in a gendan in, DMK makai (late) Karunanidhi zahna chiamtehna a Inpi khawlsak ahihziakin, Business Advisory Committee (BAC) meeting ah legislative business neih ding pompih in om chi’n gen hi. Himahleh Derek leh Sharma te’n a gendan un, BAC meeting a hichibang kithukimna omlou hidan in gen uhi.

 

Goel in a gendan in, opposition-te’n Triple Talaq Bill pass ding a deihlouh ziak un, Inpi ah buaina bawl uhi. Chairman in a gendan in, BAC meeting ah Sintawpni a bill-te lak ding thu gen in om khin chi’n gen hi. Rafael deal thubuai ziak a Congress member-te’n buaina a bawl det ziak un nitaklam dak 2:30 tan Inpi khawlsak in om hi. Hiai zoh in Chairman Venkaiah Naidu makaih in Private members’ (Business) Resolution-te genkhawm in om hi. Political party-te lak a kituahlouhna a om ziakin Chairman Venkaiah Naidu in Triple Talaq Bill genkhawm hun ding suansak hi. Tuni a Rajya Sabha in pompihna a piak toh kiton in, Parliament in National Sports University Bill 2018 pass hi.

 

Lok Sabha ahleng Zero Hour toh tuni a ding vaihawmna sutzop in om nawn a, himahleh RS toh kibang a Congress member-te’n Rafael deal thubuai ziak a buaina a bawl ziak un Speaker Sumitra Mahajan in nitaklam dak 2 tan Inpi khawlsak hi. Hiai zoh in Kalraj Mishra makaihna toh Lok Sabha ah session kim khat a ding in tutkhawmna sutzop in om nawn hi. Hiai hun in The Arbitration and Conciliation (Amendment) Bill, 2018 toh kisai genkhawm in om hi. Bill ah Arbitration Council of India (ACI) phukhiakna ding provision leng tel hi. Hiaizoh in member-te’n kituaktak in Arbitration and Conciliation (Amendment) Bill, 2018 pass uhi.

 

Lok Sabha speaker Sumitra Mahajan in monsoon session sung a lak a om bill leh amendment-te toh kisai a thugenna a neih zoh in Lok Sabha Inpi hunchiam omlou in khawlsak in om hi.


 

 

1951 based year khek hitheilou ding: JCILPS

IMPHAL, AUG 10: Tunai zek a Manipur Legislative Assembly in kituaktak a, a pass Manipur People’s Bill, 2018 a state tualsuak mi hiloute zonkhiakna ding a 1951 base year mah zat ding in tuni Sintawpni in Joint Committee on Inner Line Permit System (JCILPS) in namkipna thak bawl hi.

 

JCILPS office, Keishampat, Imphal a press conference a JCILPS Convenor Yumnamcha Dilipkumar in a gendan in, ngaihtuah phaklouh hun a kipan kituaktak a tengkhawm singtang leh phaizang a teng tualsuak mipi tengteng in, kum 2015 a kipan kuhkaltak a panla leh kithuzaktuahna tamtak a neih nung un, kituaktak in 1951 based year toh kithuah Bill pom uh chi’n gen hi.

 

Meitei pau nasan theilou Bengali ahihkeileh Hindi pau zang Jiribam a mipi khenkhat in 1951 based year kalh leh 1971 base year toh khek lamdang ding deih uh hidan a, gen kawm a, Dilipkumar in a gendan in, base year 1951 khekna ding a panlakna khatpeuh omte pompihtheih hilou ding a, kum 1980 bullam in, pawlpi khenkhat in Inner Line Permit System zat ding in ngetna bawl khin ua, a kizom ziahziah a kum 35- 40 kikal movement neih ahihnung in, hichibang based year thukimpih in om chi’n gen hi. Pass a om khin Bill zat ahihtheihna ding a tha-le-zung tamtak piak ahihnung a, mimal khatpeuh in chiamnuih a sua ding uh phal hilou ding chi’n gen hi.  Hiai thu toh kisai a ngaihdan diklou leh theihsiamlouh neite’n chiklaipeuh a thudik genkhawmna ding a tangtak a Keishampat, Konjeng Hajari Leikai a office zuan thei ding uh hidan inleng Convenor in gen hi. Bill thu khatpeuh khek lamdangna dia, office taikan leh Thangal Bazar ahihkeileh koimun hiam a kipan tangtak a, a kisaipih ministry thuzakna in, state a namkal a tualgal tunbaih mahmah ding hidan inleng convenor in vau hi.

 

List a mipi lakh 40 val nawlkhin ahihna NRC, Assam ziak a patauhna om toh kisai a, convenor in a gendan in, Manipur tualsuak khua-le-tuite’n state ah dan kalh pawlam mite honglut a om kha uh hiam chih a etkai vek ding uh ahi chi’n gen hi.

 

Central government in Parliament ah Citizenship Amendment Bill pass sawm in panla lel a, hiai bill pass ahihleh Manipur People’s Bill, 2018 lauhuai in omsak ding a, a hun ma a bill khawlsak a hihtheihna ding a kalbi om thei tengteng lak hi ding chi’n gen hi. Government kiang ah leng, kum 2015 a Committee leh Govt. of Manipur kal a kithukimna omsa Manipur State Population Commission, a kintheihpen a phutkhe ding in ngen hi.

 

Hiai toh kisai in, Committee in Kiginni chiang in thutawp pelut ding a, Manipur mipi tengteng kiang ah JCILPS-te panlaknate nungthuap zomzel ding inleng ngen hi.

 

 

Weaver Census nei, I-Card leh Aadhaar Link chiat di’n theisak

LAMKA, Aug 10: Bungmual Handloom and Handicraft Society saina in tuni, August 10, 2018 sunma dak 10 a pan in YPA Hall, Bungmual ah Weaver Census a ding in minkhumna om a, hiai hun ah member tamtak paikhawm in, Weavers Census a ding in min khumlut uhi.

 

Bungmual Handloom and Handicraft Society in ahihleh August 2, 2018 a Shyam Lal Poonia, IAS, DC/Ccpur in Village Authority, Siamganmi leh Civil Society Organization tuamtuam theih ding a theihsakna thusuah a bawl, Hyderabad pansan, M/S Karvy Data Management Services Limited (MDMSL) in Department of Textiles, Commercy & Industry, Government of Manipur kithuahpihna toh district sung a, a 4veina National Handloom Census kichi February 2017 a pan nei a

siamganmite’ data a kaihkhawm hun uah khua/veng tamtak ah siamganmi tamtak maihkhak a om ziak in M/S Karvy Data Manage- ment Services Limited, Hyderabad in Directorate of Handloom & Textile, Ma- nipur a pan official-te’n siamganmi min khumlut nailoute khualna a khua/veng tuamtuam ah data a kaihkhawm uh ahi.

 

Tuni a YPA Hall, Bungmual ah District Handloom & Textile a pan S Thangminlian, Designer; Nem Rosy- lin, Cluster Development Executive CDE; Thianneihoi Haokip, Designer tu ua, hiai hun ah siamganmi 110 in min khumlut ua, tuni a min khumlut manloute a ding in zingchiang August 11, 2018 sunma dak 10:30 in hiai mun mah ah min khumlutna om nawn ding hi.

 

Weavers Census toh kisai a Nu Nianglian kiang ah Weavers I-Card bawl a, tunitan a I-Card leh Aadhar Card link lou-te central ah min khumlutlouh a om ding ahihna ah link bawl nailoute’n zingchiang a I-Card leh Aadhar Card link bawl chiat ding inleng vaisaitute a pan thutut kingah hi.

 

 

ADCC Chairman telna a Presiding Officer ding min pia

LAMKA, Aug 10: CEO/ADC Ccpur in August 6, 2018 a letter No. 1/4/ADCC/2010/143 tungtawn a theihsakna a bawl dawnna in, Langkhanpau Guite, MDC, 10-Tuivai ADC Constituency chihlouh ADCC member dangte’n ADCC Chairman telna ding a Chairman tuhsawmlou uh ahihdan August 7, 2018 in ADCC member 14 in gelhthoh in CEO/ADCC theisak uhi. ADCC Chairman telna ding a President Officer ding leng guang (propose) dia theihsak a om bang in President Officer ding in Grace Zamneiching, MDC, 23-Muallum ahihkeileh Ngamhao Touthang, MDC, 14-Tuibong hithei ding ahihdan leng theisak uhi. July 25, 2018 a ADCC meeting ding bandh ziak a dal a om toh kibang a bandh leh thiltung deihhuailou ziak a ADCC Chairman telna hihbuai a omlouhna ding leh thovengtak a ADCC Chairman telna neih ahihtheihna ding a ADC Office Tuibong a Chairman telna sailou ding leh District Council Town Office, Hiangtam Lamka a sai ding inleng ngen uhi.

 

CEO/ADCC kiang a ngetna pia ADC Ccpur member 14-te ahihleh Lalrilien, MDC/Saikot; Pumtulthang, MDC/Sangaikot; Grace Zamneiching, MDC/Muallum; Hausuanthang, MDC/ Singngat; M Gouzamang Guite, MDC/ New Lamka East; Chintwahlian @ CT Lian, MDC/New Lamka West; G Thangkhosuanmung, MDC/Hiangtam Lamka; Ngamhao Touthang, MDC/ Tuibong; Khaikhomang, MDC/Lanva; G Suanchinpau, MDC/Lungthul; Lang- khanpau Guite, MDC/Tuivai; Lal Hossan, MDC/Vangai; Th Jamchinthang, MDC/Thanlon leh Chungpa Kom, MDC (Nominated) hi uhi.

 

 

 

TKSU-GHQ in DC/Ccpur boycott; Aug 15 ma a suankhe di’n ngen

LAMKA, Aug 10: Kuki Inpi Manipur in general strike a puan ni a Shyam Lal Poonia, DC/ Ccpur thilhih dan leh nasep dan toh kisai in Thadou Kuki Students’ Union (TKSU) in lungkimlouh thu taklang uhi.

 

August 8-9 a dakkal 24 sung KIM in Kukite tenna area teng uap a general strike a bawl uh ahihleh 1990 a kipan NSCN-IM helpawlte’n Kuki mi 900 val that a tenna khua 360 a haltumsak ban ah mi lakh 1 val inn-le-lou neilou a omte tung a state leh central government in tunitan thudik a vai a hawmlouh ziak a lungkimlouh taklatna hidan in taklang hi. Himahleh DC/Ccpur in KIM general strike zahtaklou in district sung a department teng social work neihpih hi.

 

Tua ziak in KIM in a kisaipih thuneite kiang ah DC/Ccpur kintak a suankhe ding in ngen mahleh tuni tan hiai toh kisai in panlakna bangmah omlou hi.

 

Tua ziak in Ccpur district sung a Kuki area teng ah tuni, August 10 a kipan Mr. Shyam Lal Poonia, DC/Ccpur ‘boycott’ puang ua, DC Office a office kaitheilou ding leh a tenna inn (offical Bungalow) a pan leng office nna toh kisai semtheilou ding in ahihdan TKSU in taklang hi.

 

DC/Ccpur office khak ahih toh kiton in DC office staff-te leng office kailou ding in theisak ua, hiai theihsakna zahtaklou staff-te tung a thiltung om leh amau mohna hiding hi’n taklang uhi.

 

August 15, 2018 tan a DC/Ccpur suankhiak ahihkeileh TKSU in Kuki Civil Soceity dangte toh kithuzak a kiphinna khauhzaw pan ding hidan inleng taklang uhi.

 

 

ADCC palaite’n Guv kipahpihna thilpiak pia

LAMKA, Aug 10: Langkhanpau Guite, Ex-Chairman, ADC Ccpur leh a team-te’n tuni, August10, 2018 in Raj Bhawan, Imphal ah Manipur Governor Dr. Najma Heptulla kimuhpih ua, hiai hun ahAugust 1, 2018 a India President Ram Nath Ko- vind a pan Outstanding Parliamentarian Award 2013 a sang kipahpihna in pak hoihtak va pia uhi. Hiai hun ah July 27, 2018 a ADC Ccpur Chairman in kitawpna a piaknung a Vice Chairman in in-charge Chairman len leh Executive Committee omlou ahihman in a baihtheilam a Chairman kitelna saisakding inleng ngen uhi.

 

 

ATSUM makaite’n Press Briefing nei

Total Shutdown in hindan ngeina nawngkaisak

LAMKA, Aug 10: All Tribal Students’ Union, Manipur (AT- SUM) in Manipur University buaina hihveng pah ding phutna a dak- kal 48 sung Manipur Hill district teng a total shutdown a puan ziak un tuni, August 10, 2018 in hindan ngeina nawngkai- sak mahmah a, Imphal leh district headquarters tuamtuamte kal a kikawmtuahna leng khawl hi.

 

ATSUM in ahihleh Manipur University Vice Chancellor, AP Pandey tung a ngohna tuamtuam bawl a, kitawp ding a phutna ziak a ni 70 bang University nasepna paizom theilou a om pen State leh Centre government ban ah kiphinna neite’n siamsinte khualna a hihveng kin dia phutna a total shutdown a bawl uh ahi. ATSUM in Total Shutdown a bawl ahihleh ANSAM, KSO-GHQ leh HSA-GHQ inleng nungthuap uhi.

 

Shutdown toh kisai in tuni, August 10 sunma dak 11:30 in ATSUM leh ANSAM a pan makaite’n KSO Ccpur Administrative Office ah media briefing bawl in, ni nih sung shutdown bawl a om, paisuak ding leh bang- mah phattuamna muh ding a om keileh naksem a paipih a, Economic Blockade tanpha bawl hiding ahihdan gen uhi.

 

AC Thotso, Gen Secy., ANSAM in Manipur Hill area ah bangmah buaina omkei mahleh phaizang a buaina ziak a siamsinna hoihtak a pai theilou in, huai in hill district tanpha a nawngkaina tun leh singtangmite a dia Separate Hill University neih poimoh ahihdan langsak hi’n gen hi. Manipur University kikhak ziak a singtangmi student tamtak in a career ua nawngkaina liantak tuak uh ahihdan leng gen hi. MU buaina veng- mai thei dinmun a omlou in siamsinte a dia buaina liantak tun ahih ziak in state leh centre government ban ah kiphinna neite’n siamsinna sutzop ahih theihna dia pan a lak ding uh deihna a ATSUM in total shutdown a puan hidan a gen in, Total Shutdown gupna pete tung ah kipahthu gen hi.

 

Andria Sinruwng, Finance Secretary, ATSUM in a genna ah, Vice Chancellor deihlouh ziak a student tamtakte’ career buaisak ding hilou a, pawl tuamtuam toh leng hiai thu genkhawm a omta ahihdan gen in, Government in Independent Enquiry bawl dia mohpuakna a piakte ahihman in huai dia mun leh hun piak masak poimoh ahihdan gen hi. Huai ban ah, MU thubuai toh kisai siamsinte hamphatna ding liauliau a saifel hileh chih a deihthu leng gen hi.

 

Vareiyo Shatsang, President, ATSUM in a genna ah, Manipur University a regular class pat ding ATSUM deihpen hi’n gen a, Vice Chancellor, AP Pandey paikhiak ding toh kisai ngaihdan, ATSUM in pompihlou ahihdan gen in, dan toh kituak a thukhenna a om theihna dia hunlem piak poimoh ahihdan gen in, hiai pen State leh Centre Government ban ah kiphinna nei a University paidan ni 70 val buaisak, kiphinna neite’n a theihchiang mahmah ding uh ahi chi hi.

 

Manipur University nuai a affiliate institution tuamtuam 86 leh 6th semester result ngaklel student 28,000 val in kiphinna ziak a buaina tuak uh hidan in gen a, singtangmite’n issue khat a pankhawm dan siam poimoh ahihdan gen in, huai dia kibatlouhna tuamtuamte koihkhiak hun neih poimoh leh issue toh kisai a theihsiamlouh neite’n leng kithuzaktuah a pan lakkhawm dansiam poimoh hi’n gen hi.

 

Dakkal 48 sung daih ding ATSUM in total shutdown a puan ahihleh tuni zingtung a kipan in zingchiang, August 11, 2018 zankim tan daih ding hi a, Total shutdown pen Zomi Students’ Federation (ZSF) GHQ in kipahpih mahle uh strike tuamtuam ziak a mipi’n buaina tamtak a tuah uh ngaihkhawk ziak leh ATSUM a constituent member ahihlouh ziak un nungthuaplou phot uhi.

 

 

 

CFMG Chairman thak di’n Lt. Gen Shokin guan in om; Aug 20 chiang in Nagate’n vualzohna lawm mai thei

KOHIMA, AUG 10: Naga helpawlte toh permanent peace solution tunpih ahihtheihna ding a kum 2001 a phuhkhiak a om Ceasefire Monitoring Group (CFMG) incumbent ChairmanD.K. Pathak in August 9, 2018 a, a pension tohkiton in, Assam Rifles Director General lui Lt. GenShokin Chauhan in CFMG Chairman thak len ding hidan in Union home ministry in thusuah bawl hi.

 

Top government official-te’n leng hiai thu toh kisai theihpih kawm a, a gendan un, maban ni khat ahihkeileh ni nih sung a formal order suahkhiak a om ding hidan in gen uhi. Nagaland a Naga helpawl khenkhat NSCN (IM), GPRN/NSCN leh NSCN (R) –te toh ceasefire neih ahih sung a ground rule bohsiat ahihlouhna ding in CFMG chairman in dinmun poimohtak luah hi. Centre leh NSCN (IM)-te kal a peace agreement hoihtak a, a paitouh lel laitak leh helpawl dangte toh leng kilemna bawlna ding a kimuanna a om laitak in hiai appointment hong piangkhia ahi. Army officer khat in mohpuakna a lak toh kiton in, helpawlte’n a panlak dingdan hoihtak in enkhe lel uhi.

 

Kum 2016 in CFMG chairman ding in 1979 batch IPS officer, D.K. Pathak guan in om a, hiai hun in Modi government in helpawl lianpen NSCN (IM) toh peaceful solution a om ding lametna liantak toh khangthu a chiamteh tham framework agreement suaikai hi. Tu in CFMG chairman thak Lt Gen Chouhan in, Naga helpawlte toh a bik in, Naga peace talks in dinmun poimohtak a lutpih laitak in peace dialogue enkai ding hi. Naga helna kichi India a helna sawtpen hi a, tuni’n kihouna in conclusive stage tunpih a, govern- ment in final call bawl ding chauh in samta hi.

 

Kum 2016 in Pathak in Lt Gen (retd.) N.K. Singh munluah a, police officer khat in CFMG chairman post a let masakna pen hilai hi. A tangpi in army officer-te’n hiai post luah uhi. Naga helpawlte’n mohpuakna thak len Gen Chouhan toh meeting masapen neih ding ngak lel uhi.

 

Tuabangkal ah, Prime Minister Modi’s in tunitak dak 5:45 in special cabinet meeting sam a, huai ah Naga Frame-work Agreement toh kisai in final agreement 16th August 2018 chiang a bawl ding in thupuk ua, hiai thupukna Parliament monsoon session pailel 19th August chiang a bill khat dan a pass hi ding a, 20th August 2018 chiang in Naga-te’n vualzohna lawm theita ding uh hi’n thusuak khenkhat in taklang a, himahleh official thusuak bel kimulou hi.

 

 

Thoubal ah Agri minister in KVK Seed Hub leh Office building hongkhia

IMPHAL, AUG 10: KVK, Thoubal Khangabok ah Seed Hub leh office building of Krishi Vigyan Kendra, Thoubal ah tuni’n Agricultulture minister V Hangkhanlian in hongkhia hi.

 

Minister in hiai hun zatna a, a gendan in tuni a hiai bang Seed Hub leh KVK office honkhiak a om in loubawlmite a ding bik a hamphatna tun ding leh amau leh mau a kitoudelh theihna hiding ahi chi hi. Kum teng phial in Manipur state in tuilian thuak gige a, hiai in loubawlmite haichi nasatak a suse zel ahihna ah agriculture product kiamsakzou ahi chi hi.

 

Himahleh India Government in hiai bang buai- na apan suahtak ahih theihna ding a panla in, kum 2022 tan a loubawlmite income a lehnih a, a pun thei- hna ding ngaihtuah ahihna ah loubawlmite kuapeuh hahpan a pang a, pankhawmdan siam ding leh food security a dia technologies leh method chi tuam deuh patkhiak sawm di’n ngen hi.  Hiai hun zatna ah Sing, Capsicum, Carombola leh Chow Chow Bori product tamsem piankhiaksak ahih theihna ding tupna in booklet hawmkhiak in om hi.

 

Programme hun in Additional Chief Secretary (Agri.) Government of Manipur Letkhogin Haokip, IAS, Di- rector, ICAR-ATARI-Zone VII, Umiam Barapani, Meghalaya Bidyut C. Deka leh Director of Agriculture, Manipur Ph. Rajendra Singh-te’n President leh Guests of Honour hihna toh uap uhi.

 

Inaugural programme ahihleh Krishi Vigyan Kendra, Thoubal, Department of Agriculture, Manipur-te makaihna nuai a sai a om hi a, huai hun ah KVK staff, loubawlmi leh mi poimoh tamtak kihel uh hi’n thusuak in taklang hi.

 

 

 

 

…more detail : Here

Read 393 times Last modified on Saturday, 11 August 2018 08:41
Login to post comments