You are here: HomeNewsTulai LamkaTulai Lamka | July 24, 2013

Tulai Lamka | July 24, 2013

Written by  Published inTulai Lamka Sunday, 28 July 2013 23:25

ZDV Home Secy leh Finance Secy. Ki tawp

 

Suanmang@Givson S/s Home Secy, ZDV leh Chinzahau @CZ Robert. S/s Finance Secy. ZDV in zan in thusuah bawl uh a,ZDV Kamkhanpau Group apan kitawp uh hin taklang uhi. Amau a gen dan un ZDV President Kamkhanpau group in Zou nampi adia na semlou in nampi hoihna ding deihlou leh nektak zong na leng a zang hin ngawh uhi.

 

 

 

e-District Manager lakna ding interview

 

DC/Chairperson, CCPur District e-Governance Society office ah July 24, 2013 zinglam dak 11:00 in contract basis a semding e-District Manager 1 lakna ding in written test leh interview om ding a, huai a ding in applicant 11 om hin kigen hi.

 

 

 

Wheel Chair leh Hearing aid

 

New Lamka Dorcas Veng  a “Niangzen Khualbuk” ah July 25, 2013 in Thanlon bial a poihlong leh bilngong te lak a wheel chair leh Hearing aid hawmkhiak na om ding hi. Huai hun ah Vungzagin Valte Parliamentary Secy.(Hort & Sc, CADA) &MLA(Thanlon A/C) in wheel Chair 4, Tri Cycle 1 leh hearing aid 20 hawmkhe ding chih thu om hi.

 

 

 

MDC Khaipao Haokip in Free Uniform hawmkhia

 

Khaipao Haokip(MDC Khawlmun) in zan sun in Khawlmun JB School ah SSA nuai a school uniform manbei in hawmkhia hi. Khawlmun JB School ah tukum in student 60 in enrolment bawl uh a, Student 50 a ding SSA nuai a school uniform kikhuisak hin kigen hi.Khawlmun JB School a student ten free uniform hawmkhiat zawh in mid-day mealanne uhi.

 

 

 

DC office ah min piaklut ngai

 

Thusuak ki ngah dan in June 28, 2013 sun dak 12:00 tan a DIC/CCPur office a kipan PMEGP toh kisai Project la a DIC office a min pelut ten July 25, 2013 in indentity proof documents toh Maniram Sharma, IAS, Adll DC kiang ah ki report ngai ding chih thu om hi.

 

 

 

July 2013 in Malaria ziak a si 1 om

 

District Malaria Dept. apan kizadan in July 2013 sung in Malaria PF ziak in July 22, 2013 nitak dak 8:30 in District Hospital ah Kimlalbiek@Biebiek(24) d/o (L) Pauhuoplien of Saihum Village(Henglep Sub-Division) si a, Tu lel in District Hospital ah Holmang(45) s/o (L) Suohhen of Kuangkhaijang leng Malaria ziak in District Hospital ah om lel hi.District Malaria office/CCPur ah April 2013 akipan khawsik damdoi tung nawn lou a. Imphal a ten leng neituan lou uh hin gen uhi.CMO in ama Pocket apan Rs.10000/- pia in Lamka a Pharmacy tuamtuam ah khawsik damdoi zongsak a hi leleng Laitui Pharmacy ah khosik damdoi Rs.600/- man mu uh a, adang ah muzou lou uh hin kigen hi.

 

 

 

Sammet te meeting pih

 

CCPur Consumer Club pawl in Lamka khawpi sung a Sammet te meeting neihph uh a, samtan na leh Mulmet na dia kizang sakolbakteh, samsih leh Blade himhim siangthoutak a koih gige ding in genpih uh a, Mikhat tung ah blade kizang leng mi dang tung a zatlouh ding chi uhi. Sammet hun a puan kizang a vom leng tuban zang nonlou in Green.Blue leh Yellow colour zangzaw ding in thukim pih uhi.

 

 

 

KNO/KRA-U min a sum khonjte vau

 

Kuki National Organisation/Kuki Revolutionary Army-United pawl in mi nautang kiang ah pawlpi minzang a sumkhon ten tuni a kipan tawpsan ding a theihsak kawm in thupiak zui lou te’n bang hiam a tuah hun un KNO/KRA in moh polou ding chi hi. SHT.George, Comander in Chief , KRA-U in zan in a genna ah mipi ten leng pawlpi min zanh a sumkhon a muhte uh soisa thei ding uh a, SoO a om a hihman in Ground rules dungzui a KNO/KRA-U in sumkhon theilou a hihdan leng gen uhi.

 

 

 

Govt. in NH-37 Puahphat sawm

 

Zan zingsang in Jiribam a kipan Imphal zuan in Oil Tanker 100 vel kipan khia uh a, Truck 25 velin Petrol , 34 in diesel, 34 in LPG pua uhi. Sunnung lam in Nungdalan area kantan thei uh a, July 24, 2013 in Imphal hongtung dinga gintak hi uhi. NH-37 a gari ki vialleh te vengtu dingin Additional Escort sawlbeh in om hi. Chief Minister O.Ibobi in NH te puahding ngai poimoh a hihdan gen a, huai toh kisai in zannitak lam dak 3:00 akipan Works Minister Kh Ratankumar, Transport Minister Okendro, Principal Secy.(Home) Dr.J Suresh Babu, Manipur DGP Y Joykumar leh Transport Union te toh meeting nei in lampi thu gen khawm uhi.

 

 

 

Army PRO lui Court ah kilang

 

Press Information Bureau(Defence Wing) a PRO sem ngei Army Colonel Ajay Choudhury leh Army Jawan lui RK Babloo tel in khamtheih z puakziak a matkhiak a om mi 6 te bail a hih nung ua masapen ding in zan in Court ah kilang uhi. Lamphel a Narcotics Drugs and Psychotrophic Substances(NDPS) court ah mi 6 te vakilang uhi.

 

 

 

MBBS Entrance exam deihlou te sousing

 

Manipur ah MBBS/BDS entrance examination -2013 om ding a deih in MBBS/BDS Entrance Examination Parents/Guardians Association member te leh Candidates te’n Lamphel a Health Directorate zan zinglam in buluh sawm uhi. Supreme Court thupiak dungzui in MBBS/BDS examna “One Nation one Exam”chih hi a,Join MBBS/BDS entrance examination deih a kiphin te’n Supreme Court thupiak zui uhen chin placard tawi in ngaihtak in kikou uhi.

 

 

 

Malaria Deptt in Saihum khua pha ding

 

Saihum khua a Malaria a damlou om chih thu zak ziak in CMO/CCPur in Malaria Deptt. A Male Health Superviser leh Multipurpose worker bangzah hiam Saihum khua phading in sawl a, Huai khua a mite lak ah khawsik om hiam chih suina ding in ASHA member te toh sisan collect a test ding in theisak hi.Malaria Deptt ten Saihum khua a Innlusi a thousilen om teng leng Damdoi in diah ding hin thusuak om hi.

 

 

 

Nagaland CM kiang ah Lamlian kisia bawlkin ding in ngen

 

Imphal Dimapur Lamlian(NH No.2) Kohima kiang a menchim ziak a lamlian feet 250 vel lei tolh khia tulai a BRTF ten a bawl uh a kinlam a nasep zawh a hih theih na ding a panla ding in Chief Minister O.Ibobi Singh in laithon in Nagaland Chief Minister Neiphiu Rio ngen hi. Chief Minister O.Ibobi in  laithon  agelh kia hilou in telephone in leng Nagaland Chief Minister houpih chih thu om hi. Manipur ah niteng vanzat poimoh nek leh taak thautui leh gas puaklutna NH No.2 a menchim ziak in ni tamkuam tak Manipur ah bangmah puaklut theihlouh in om a, menchipna mun lamlian bawl hoih pah a hih kei leh leng a pelh na ding lampi bawlsak thei ding hiam chin enkhe ding in Works Minister Dr.Kh.Ratankumar in July 24, 2013 in thil omdan enkhe dingin kuan ding chih thu om hi.

Read 1579 times
Login to post comments