You are here: HomeNewsTulai LamkaTulai Lamka | July 25, 2013

Tulai Lamka | July 25, 2013

Written by  Published inTulai Lamka Sunday, 28 July 2013 23:25

Addl DC makaih in 1st Quaterly Meeting

Maniram Sharma, IAS, Addl DC/CCpur makaih in zan in DC’s office a Conference Hall ah Distric AIDS Prevention and Control Committee (DAPCC), CONGO leh DCC (HIV-TB) 1st quarterly meeting om hi. Huai ah meeting nanungpen a thupuknate ngaihkhiatna leh 1st quarterly report ngaihkhiatna om hi. Rehab centre a omte (inmates) free a medical examination bawlding thu leh Rehab Centre a zatding Indoor leh outdoor materials thu ah Committee on NGO (CONGO) meeting  hun a genkhawm dingin thupuk uhi. Huai ban ah World AIDS Day kichi Dec 1 zat ding thu telin thu tuamtuam leng genkhawm uhi.

 

 

 

JE leh Hepatitis ‘B’damdoi    

Dist.Immunisation office ah naupang kum 1-10 kikalte ading in Japanese Encephalities (JE) kichi khuak a khawsik lutding dalna damdoi manbei in kapsak theih ding in hi. Kumlui  2012 a kikapkhinte tukum in kikap ngailou ding a, dose 1 ah mi 5 kap ngai a,a kikap dingte naupang damsiang,TB damdoi nelou a hih uh ngai hi’n kigen hi. JE dalna damdoi Sepnawnni(Tuesday), Ningani (Thursday) leh Kiginni (Saturday) tengin    zinglam dak 10:00 apan sunnung dak 1:00 tan in kikap theih ding hi. Kumlui 2012 inleng naupang tamtak JE dalna in kikap uh a, tukum in leng khawpi sungah JE natna omthei din patauhhuai chihthu om hi.

 

CMO in suty la.

Dr. HL Liensang, Chief Medical Officer, CMO, Churachandpur in mimal vai a hih ding poimoh a neih ziak in tukal sung suty la hi. CMO in order a suah kimu dan in, ama om louh sung teng, Dr. F. Thienkhogin, District AIDS Control Officer in CMO hihna len ding chi in taklang hi.

 

SBI in Govt. Transection a saitheihna ding in panla

Thanlon A/C akipan MLA ching tulela Parliamentary Secretary(Hort,SC & CADA) Vungzagin Valte in SBI/CCpur Branch leng Reserve Bank of India(RBI) in lem asak dungzui in RBI sik-le-tanga sum kemthei ding ‘Currency Chest Branch’ ahih tawh kiton SBI in govt transaction alet poimawhsa in Manipur Chief Minister tawh a genkhawm khit in Addl Chief Secretary(Finance) RR Rashmi,IAS  tawh genkhawm uh a,tuni’n Lamka hongpha in DC/CCpur a omlouh ziakin Addl DC/CCpur Mani Ram Shamr,IAS tawh  thil omdan gnekhaswm uh chihthu om hi.Valte in SBI/CCpur branch leng pha in SBI/CCpur Branch a Chief Manager S.Kaikhanthang tawh thil omdan a genkhawm ban uah Shillong a om Dy General Manager(DGM),SBI tawh leng thil omdan phone tungtawn in genkhawm uhi.

 

 

 

Vungzagin Valte in telephone tungtawn in Deepak Kumar Lalla,Dy General Manager/SBI tawh a kihouna uah  DGM in akul leh poimawh bangin aman leng panla ding hi’n gen a, SBI/CCpur Branch in govt transaction baihlam taka a handle theihna ding un kha 2 sungin officer leh staff poimawhzah koih behlap hiding chi’n gen hi. Valte in SBI/CCpur in govt transaction handle dia a lunglutna ziak thildang hilou in SBI/CCpur branch tungtawn in mipi tamzaw in loan leh hamphatna tuamtuam ngahthei ding uh hi’n gen a,mipi in a phattuampih ding uh deihna a panla hizaw chi’n Manipur Express saite kiangah gen hi. 

 

Ability Village honna ding a kisakkholhna nasa.

Center for Community Initiative, CCI in Pearsonmun khokhung ah Ability Village ding bawl a sawm uh, a hongtung ding July 27, 2013 in a suangphum honna om ding hi. Hiai ding toh kisai in tulai in kisakkholh na nasa tak in pai tou a, hall bawl dan dang te toh kibang lou deuh a, bawl sawm uh ahihdan uh gen uhi. July 27, 2013 sunnung dak 2:00 in suangphum honna om ding a, huai hun ah, Lise Grande, UN Resident Co-ordinator & UNDP Residence Representative in chief guest hihna toh uap in suangphum hon na nei ding hi. Chief Guest, Lise Grande ahihleh, UN Resident Coordinator ahih ban ah, India a ding a a lian pen ahih dungzui in, Government lam in leng state guest in puang uhi. Huai lou in, hiai ability village ding toh kisai a ki gen dan in, a village pen, eco-friendly ahih theih na ding a, singkung om te leng, a building bawl na uh daal kha ding te chih louh, a dang te, phuuk nei lou a koih a, hing sak dipdep sawm uh ahihdan uh gen uhi.

 

e-Dist Manager lakna din written test

DC’s office a Conference Hall ah zan sunnung  in contract basis a semding e-District Manager 1 lakna ding in written test om a, applicant 11 omlak ah  10 tel uhi. DC/CCpur omlouh ziakin tuni in personal interview  om theilou a, tunung a hun lemtang masapen ah  neih hidin kigen hi.

 

 

 

District Anganwadi Worker/Helper Association te'n rally nei ding.

Churachandpur District Anganwadi Worker/Helper Association in a hongtung ding July 30, 2013 in Rally nei ding uhi. Hiai ding toh kisai a association lam apan thu kiza dan in, district a anganwadi worker/helper ten a honorarium ding uh kha 14 a muh louh ziak ua, lungkim louh lah na a Public ground apan DC office tan rally nei ding uh hidan in gen ua, huai hun a association member a tel lou aom leh, a tung thu uh ngaihtuah ding hidan in gen uhi.

 

 

 

BADP 2013-14 final ding hun kisuan

Langkhanpau Guite, Chairman, ADC & DRDA makaih in ama’office chamber ah zan in ‘Dist Level Screening Committee on Border Area Development Programme (BADP)’ review meeting leh ‘BADP annual action plan 2013-14’ genkhawm in finalised ding uh chih himahleh lemtanlouhna om ziakin hunchiam omlou in postponed in om hi.

 

 

 

DAPCC, CONGO leh DCC (HIV-TB) te'n meeting nei.

District AIDS Prevention and Control Committee, DAPCC, CONGO leh DCC (HIV-TB) ten zan zinglam dak 11:30 in DC office Conference hall ah, 1st Quarterly Meeting nei uhi. Meeting hun a Ms. Jacintha Lazarus, IAS, Deputy Commissioner, Churachandpur in a makaih ding kichi himahleh, Imphal a meeting a a tel ziak in hiai meeting a tel thei lou in, Maniram Sharma, IAS, Additional Deputy Commissioner, Churachandpur in meeting makaih hi.  Meeting hun ah, hun paisa a DAPCC ban ah, HIV/AIDS toh kisai a nna sem kha ten report piak na a neih ban uah, World AIDS Day zat na ding toh kisai, Rehab Centers a inmates te a ding a free medical examination ding toh kisai leh thu poimoh tuam tuam gen khawm na nei uhi. Official lam apan thu kiza dan in, Rehab Center toh kisai ahihleh, DC toh gen khawm ding chi a a gen ban uah, World AIDS Day, December 1, ding toh kisai ahihleh, AIDS toh kisai, November kha a pan campaign neih ding chi a thupuk na a bawl ban uah, World AIDS Day ding toh kisai a football tournament sai a, a nipi ni, December 1, a final match neih ding chi in thupuk uhi.

 

Khamtheihleh chiindan hoihlou doudal

Hmarveng Welfare Defence Committee in July 25, 2013 akipan in Hmarveng khawsung ah khamtheih –Zu, No. 4,nganja, dendrite leh hamdawi khamtheih himhim zuak leh puaklut kham bikbek hi’n puang uh a, sum a kimawlna gambling chi tuamtuam leng phal hinawnlou chi’n puang uhi.Huailou in numei tawh thanghuai taka om leng phal hinawnlou a, thusuak kalh a gamtang a om leh Hmarvenf Welfare Defence Committee in dan a bawl bangin action lakkhum hiding chihthu om hi.

 

CCPur Govt. High School ah Headmistress thak in Join

 Mrs L.Tocheiyang Kom in zan in CCpur govt H/S ah Headmistress leh DDO lenkhawm ding in ZEO/CCpur kiang ah  joining report pia  hi. Mrs L.Tocheiyang Kom ahihleh Kangvai H/S ah Sr Graduate teacher apan Headmistress in  promotion mu a,  Kangvai H/S a Headmistress lenlai CCpur H/S a hong kisuan hi’n kigen hi.

 

Student 8 in Document summit ngai

National Foundation for Communal Harmomy (NFCH) te’n CCpur district a namkal buaina ziaka tagahte laizilna dia panpihna sum a piak uh  student 62 in lakhin uh a, hileleng mi 8 in document kimlouh ziakin la nailou uh a, July 29, 2013 tan in  tukum  a current study certificate a submit uh ngai ding hi.Student 8 te- Thongsianmung d/o or guardian of (g/o) Niangkhodim of Dorcas Road, New Lamka; Niangzokim d/o (late) Thangkhosei of Suongpi; Chinglunkim d/o (late) Chinkhantuang of Dorcas Road, New Lamka; Lallianmang s/o (late) Henpau of Lingsiphai; Khamthienlal g/o Lalneikim of Zoar Veng, Bungmual; Niangbiaklian d/o (late) Thangkhansuan of Bible Hill, Rengkai; Sailianjohn g/o Nemhoihniang of T.Singtam leh Thangminlal s/o (late) Seikholun of Sangaikot hi uhi.

 

Pastor Quarter honna omding

Khominthang(New Lamka) a EBC Pastor’ quarter ding pucca building kibawl July 28, 2013(Pathianni) zinglam dak 10.00 in biakinn compound ah honna om ding hi.  Huai tawh kiton in biakinn ah haithak latna programme leng om ding a, huai ah Rev Vungminthang, General Secretary,EBC in thugen ding hi.

 

Airtel fee pelou te action lak hi ding

 Mid-day Meal scheme function hoihsem ding ngimna in ZEO leh ADC/CCpur nuai a govt Aided School a Headmaster/Headmistress teng kiangah July 2011 in Airtel post paid connection piak hi uh a, due omlai teng akintheipen in  DI of schools/CCpur kiang ah piak ngai ding a, a ngaihsakloute tung ah a kituahpih bang action lak hiding chi’n ZEO/CCpur in thusuah bawl hi.

 

Myanmar a India Ambasador

Myanmar a India Ambassador Gautam Mukhopadhaya in ni 3 sung Manipur a om ding in July 29, 2013 in Imphal hongpha ding a,  huai hun ah India leh Myanmar kalthu tawh kisai thu poimawh tuamtuam omte Manipur Chief Secretary DS Poonia,IAS tawh meeting ah genkhawm ding uhi. Top official 2te meeting na ah   Additional Chief Secretary (Planning), Principal Secretary (Commerce & Industires ) leh Principal Secretary (Home)  leng tel ding uhi.

 

Petrol in kal 1 daih ding

zan zingsang in NH-37 tawn thautui pua Oil Tanker 100 phial  hongtung uh a, huai ziakin July 13 akipan Dimapur lampi siatna liahkhuh thei dingin kilang a,Manipur ah  kalkhat sung daih ding thautui om hi’n kigen hi.  Indian Oil Corporation, Imphal  thusuakin a gendan in Manipur ah tulelin petrol kilolitre 634,  diesel kilolitre 2771 leh  cooking gas kilolitre 167 om a, khonvaktui ahihleh  kilolitre 1,750 om a, nikhat a  kilolitre 100 vel poimawh ahihman in sawt daihlou ding chi uhi.  

 

Myanmar Army kiang ah pekhia  

Leimakhong a Army HQ ah zan akipan in  Indian army leh Myanmar army –te’n  ni 3 sung om ding ‘3rd Indo-Myanmar Regional Border Committee Meet’nei uh a, huai ah Lt Gen AK Sahni, SM, VSM, General Officer Commanding, Spears Corps in Myanmar army-te khut ah ‘Bailey Bridges(lei)’ 7 bawlna ding van poimawhte  pekhia hi. Red Shield Division saina  a meeting ah Myanmar army lam apan North West Command, Maj Gen Soe Lwin makaih in delegation teamte leh Indian army-te kimu uh a, gam 2te kal ah kipanpihtuah ding leh helpawl doukhawm ding thu tawh kisai telin thu tuamtuam  genkhawm  uh chihthu om hi.   

 

Railway nasepna a tel mi 3 pimang in om

Helpawl hidia gintak galvantawi te’n Nungba sub-divn a Nungkao mun ah Jiribam-Tupul railway line a nasem  Coastal Project Limited company  official 3 pimang uh hi’n  kigen hi.Pimang a omte Alok Kumar Roy(mechanical engineer), Narshima Patra (foreman) leh Basant Gohain (supervisor)  hi uh a,  July 18, 2013 nitak dak 11.50 velin “JDF group” hi a kigente’n a pimang uh hi a, tatkhiakna ding in  sum tamtak ngen uhi. 

 

Thautui pua pawl lungkimlou

Imphal-Jiribam lamlian(NH No. 37) bang dinmun hihiam chi’n All Manipur Petroleum Products Transporter’s Association pawlin tuni’n enkha uh a, Nungba leh Nungdolan kikal BRO in a nasepna uh muh ding a omlouh ziakin All Manipur Petroleum Products Transporter’s Association pawlin Nungba-Nungdolan kikal Manipur govt in akinlama a bawl kei ua leh Imphal-Jiribam lamlian tawn in thautui pawlut tuanlou ding uh chi’n govt vau uhi. Imphal-Dimapur lamlian(NH No. 20) a Kohima kianga Heritage mun ah menchim sautak om ziakin Oil Tanker leh vanpua Gari himhim tuni tan in leng paisuak thei vuallou hi.Huaiziakin security venbitna nuai ah vanpua leh Oil tanker-te Imphal-Jiribam lamlian zui phot ding uh chih ahi hi.Tuni zingsang in Jiribam akipan  Oil tanker 55 leh Gas Bullet Tanker 39 vel Imphal hongtung uh a, tuni mah in Oil tanker 98 leh Gas Bullet Tanker 36 in security escort tawh kithuah in Imphal akipan Jiribam lam zuan uhi.

 

Read 1475 times
Login to post comments