You are here: HomeRSS FeedsLatest Articles

Ka Pi, Ka Pu leh, Nasep Puan Nawtmaam Gige

Tuesday, 15 August 2017 14:09

Lettu : Khamkhokam Guite

 

Ka pu lounei mi  himahleh, ka pi in  ka pu nasep puante niteng in nawt maamsak  gige hi. Ka pu puan a nawtchiang a amaam theihna ding in, ka pi in Coke bawmhawm sung ah Buhtuinaang(starch) koih a,  table salt bawmsin bangdeuh  in huai Coke  siin dawtvang siuhseuh hi. Ka pu khekol ah huai starch tawm kha-kha in theh a, huai khit chiang in neukha a huai starch ahong hul deuhna ding in tutphah ah sawtlou zak a; huai khit chiang in, puannawtna sa in nawt maam zel hi.

 

Ka naupan chil akipan ka pi in hichi bang a ahih lam ka muh gige ziak in, khovel a pitek tengteng in huchi bang a hihvek ding uh kana sasek hi. Kum ahong pai tam chiang in, hiai ka pi thil hih lamdang sakna ka hon neipan hi. Bangziak a ka pu in  nasep puan maam zitzet kiphamoh ahi ding? Niteng phial a, a mi muhte lah, kei leh amah bang a louneimi mah,  kicheina leh omdan a phon taktakte kia lah hisi ua.

 

Ka pi in kei puante ahon nawtsak ngei kei a; huan ah, puannawtsa silh akulna leng ka thei hetkei hi.  Huai ban in, hon nawtmaam sak bang hitaleh leng, zing lam dak 9:00 akipan in nin gawp khin dia, nawtmaan ahihlam bang leng kilang nawnlou ding hi.

 

Ni khat, kum 13 vel ka hihlai in ka pi kiang ah, ka pu  puan a nawtmaam sak gigena  ziak ka dong hi. Bangziak a ka pi in ka pu’ nasep puan kuamah ahong mu-tu dile omlou leh, tomkhalou kal a niin nawnpah ding nawt maam na’ dia, tha-le-zung leh a hun sengpeih hiam chih ka thei nuam hi.

 

Ka pi hon dawnna ahihleh, ka thil zak-khak lak ah, azak nuam in, lungkhoih mahmah hi.

 

Ka pi in ka pu, khovel a pasal melhoih penpen ahi chi hi. Khovel a a lawm hoih pen ahihban ah,  a damsung a a it penpen ahi chih leng hon hilh hi. Khovel pumpi in ama pasal ahihlam theihvek uh henla; eng lua in, haza vek le uh chih a ut ziak a ka pu ahithei tan a chei a, a hoih theipen a kilatsak nuamsa lua ahihlam hon hilh hi.  

 

 “Na pu leh kuahiam khat kituak khaphut maithei ua; Pathian in khovel a pasal tengteng lak a melhoih pen dia abawl ahih chia, huai hun chiang in ahihna diktak, pasal melhoih pen lat in kilang leh ka chih ziak ei voi” chi in hon dawng hi.

 

Huai ka kihou khit un ka pu hoih tak mahmah in ka velchian  hi. Kei muh dan in ahihleh, huchi melhoih lotellou hi. Din tom bilbel a, gawng giugeu a, a liangkoulam  sang  in a tobou lam lianzaw hi. A lusip ah a sam tawmchik kia pou a; huan ah, a nuihchiang in, a ha lemte a kizopdan uh kituak hetlou muhtheih uhi. A mitbulh, a khaina omte, amai adia lian lua khat bulh a; aziak ahihleh, aman, a mit in khua amuh theihna ding kia ngaipoimoh a; thil amuhtheihna ahihnakleh, nalh leh nalhlouh lam bangmah poisalou hi. Pathian in pasal a bawl tengteng lak a, ka pu melhoih pen kuaman asak theihna ding uh ka mu himhim kei hi.

 

Huaiziak in, ni tamlou nung in ka pi ka dongh nawn hi. Ka pi kiang ah ka pu hoih tak mahmah in ka enchian a, leitung a pasal melhoih pen bang sa hetlou ka hihlam ka hilh hi.

 

A kum zah toh et a  huchi thei dia ka gintak hetlou dan in pipi hong om in, nungaknoute nuihdan bang in,  hong nui tat-tat hi.

 

 “A et ding dan diktak in na en kha kei a hi inteh, Turdhead (Ka pi in hon noutawina in ‘Turdhead’ chih in  hon sam sek hi). Pathian in pasal a bawl tengteng lak a na pu melhoih penpen ei voi.  Huai a mit kiang a kikhepte bang le, ni dang a omlou aka hia. Ha lem hilou a, ha taktak aneih lai bangle ken thei lua kei voi. Mit dum kiikiai ka muh khak lak a, na pu   mit etlawm sapen ka hi.  A mitte, ni atum dek kuan chiang a vaan dum kiikiai toh tehpih lua kei voi. A nuih chiang a lah, a mai tengteng hong vaak, hong taangkhe pimpem hileh kilawm in chin; a  aw-ging  lah  tawldam huai lua a; huai chia maw, a aw uun gemgem leng State 9 a mi tengteng  in zak ut thei lua uh ei voi” chi hi

 

Bang maw na gen? Kei theihna tan in ahihleh, ka pu putek hi gige hi. Ka pu in tangval lai khawng nei  ahihlam gingta dia, ka pi in hon deih maw? Hahaha, teuhlou mai! Ka gingta mahmah kei.

 

Ka pi in hichi bang in gen sunzom nawn hi, “Na pu etlawm dia deihlaw mahmah kei voi. Na pu puante niteng mahmah a ka nawtmaam gige na ziak  ahihleh maw: aman kei, kum hiaizah zouzai melhoih leh, etlawm lua dan a ahon kitheisak gige ziak ahi. Amah zahtak tham ching a; huaiziaktak a, niteng in ama hihna  diktak - mizahtak huaitak bang in kilang  gige leh chih deih kei voi. A huchihlouh khak ding lau lua ka hi” chi hi.

 

Ka pi thu gen ka za a, khemkhem lua ka sa hi. Ka dot khak zenzen bangleng manghilh  ka tum hi. Bang chibang a hiai pitek in, huai putek ha lem bulh khat melhoih sathei ahi ding, chih khawng ka ngaihtuah hi. Pitek leh putekte mahmah!

 

Kumte hong pailiam zel ua, ka pi leh ka pu teek khawmtou helhel zel  ka mu hi. Kum 30 vel ka hong hih in, kei ah  kilamdanna thak khat hong tung in - ka pi in ka pu nasep khekol, Coke bawm akipan starch nuh a anawt maam sak, hichi tel a  etlaawm leh nuhnop-huai ahihlam  ka phawk khia hi.

 

 [By Dr. Bo Brock; Source : www. rd.com]