You are here: HomeRSS FeedsLatest News

Angels' Vision News | September 28, 2016

Wednesday, 28 September 2016 22:14

Backward Region Grant Fund (BRGF) nuai a beneficiary tuni tan final instalment lakhe nailou te'n tuni'n KKL Complex, Headquarters Veng ah emergency meeting nei ua, final instalment ngah theihna dia panlak ding dan tel in thu tuamtuam a genkhawm in association khat bawlkhia uhi. Hiai meeting ah block tuamtuam apan 2014-15 sung a BRGF final instalment lalou mi hunkhop paikhawm ua, Nehkhohao Haokip in meeting makaih in, thil omdan pulakna nei a, mipi paikhawm te'n ngaihdan tuamtuam a neihte uh kikum khawm uhi. BRGF ahihleh India Government in district tuamtuam a om khotate ah khantouhna om theihna ding tupna a 2007 kum a hon patkhiak hi a, hiai programme tungtawn in khotang khantouhna ding in nn tuamtuam tamtak sep a om in, lohchingtak a paitouhpih ahih nung in tukum in hiai programme suk tawp in om hi.

 

Hiai programme suktawp himahleh CCpur District ah final instalment lalou tamtak omlai a, centre government apan final instalment laloute a ding fund hong pailou taktak mah hi hiam chih tanpha theibut in omlou hi. BRGF tungtawn a nna kisem himhim instalment basis a fund piakkhiak hi a, nasep patna ding in first instalment piak ahih nung un, nasep teng a zoh siang chiang un final instalment piak hipan ahihman in, midang sum leitawi zen a nna semte a ding in buaihuai mahmah hi'n kigen hi. Thutut kingah dan in, CCPur District ah Block 10 om in, BRGF tungtawn a nna sem mi 200 val om a, bangzah hiam in final instalment mu mahle uh a tamzaw te'n tuni tan mu nailou ua, 2011-12 apan final instalment mu lou leng hunkhop om hi'n kigen hi. Tuni a emergency meeting neihna hun ah beneficiary paikhawm te'n hiai toh kisai enkai ding in Association khat Demand Unpayment BRGF Instalment Association kichi phuan in vaipo ding leng telna nei ngal ua, member paikhawm te'n President ding in Nehkhohao Haokip, Vice President ding in Lalpu, General Secretary ding in David Hmangaisang, Asst. Secy ding in Neihmang banah Finance leh Information Secy ding in H. Lalboi telching ua, Adviser ding in Kula Singh leh Letkhomang Haokip kituaktak in guang uhi. 

 

XXXXXXXXX


DC/CCpur Lunminthang Haokip, IAS, Chairman, District Health Society, CCPur makaih in hongtung ding October 6, 2016 sunma dak 11:00 in BRGF Resource Centre, DC Office, Tuibuang ah District Health Society Governing Body te'n Meeting nei ding uhi. Hiai meeting ah programme tuamtuam a Nodal Officer teng banah Medical Supdt, District Hospital leh National Health Mission nuai a Block Programme Management Unit a staff-te a kihel ding ua, hun paisa a sepsuahte etkikna nei in, maban a panlak ding dan toh kisai genkhawm ding uhi. Meeting hunsung in, Medical Supdt in JSY, JSSK leh RKS toh kisai report pia in, District Malaria Officer, District TB Officer leh District AIDS Control Officer leh Nodal Officer tuamtuam te'n report pe ding ua, Block chih a Programme Manager te'n a kul leh poimoh bang a report pe thei dia mansa a om ding in Dr. VC Pau Tonsing, Member Secretary, District Health Society, CCpur in theihsakna bawl a, damtheihna lam toh kisai etkaina a haksatna tuamtuam omte kikupkhawmna leng om ding hi'n thusuak in taklang hi.


XXXXXXXXX


Paite Tribe Council (PTC) General Headquarters in tuni sunnung dak 1:30 in SP/CCpur Office Chamber ah SP thak Rakesh Balwal, IPS vaidawnna hun zatpih in Paite Puamdum silhsak uhi. PTC GHQ te ahihleh L. Pumlianpau, President, PTC GHQ in makaih in, John K. Ngaihte, Secretary, PTC GHQ tel in member bangzah hiam in kithuahpih ua, PTC GHQ President in Churachandpur SP dia hong join na tung ah PTC GHQ in kipahpih mahmah uh ahihdan gen in, PTC GHQ kivaipuak dan leh paidan te gen a, hunlem tang amuh hunhun a PTC GHQ Office pha ding in chial hi. SP thak Rakesh Balwal, IPS in hiai mun ah SP lendia hong paima a, mun tuamtuam a posting na mun ah Churachandpur district apan government nnasem post lian pipi len mi bangzah hiam tuakta a, district mipite laisaimna lam ah khanghat mahmah uh chih mi a tuahte apan thei ahihdan gen a, Churachandpur district sung ah muana lemna leh muanna banah dan leh thupiak etkaina toh kisai a kithuahpihna pe ding in ngen a, CCpur District hoihna dia theihtawp suah ding ahih dan gen hi. SP/CCpur Rakesh Balwal, IPS ahihleh Jammu & Kashmir mi hi a, 2012 kum in IPS mu in, kum 2014-2015 sung in SDPO Moirang hihna a let banah March 2016 in Additional SP, Thoubal hihna len in, CCpur SP hihna len ding in apaisa September 21, 2016 in joining pia hi'n kigen a, Superintendent of Police a dia a kaisan nung a a posting masakna pen hi'n leng kigen hi. Hiai hun ah PTC GHQ President makaih in PTC cabinet member te'n SP/CCpur thak Rakesh Balwal, IPS vaidawnna in Paite Puandum silhsak uhi.


XXXXXXXXX


Zan nitak lam a Outer Manipur tribals forum (OMTF) leh Joint Action Committee Against Anti-Tribal Bills (JACAATB) in joint press release a suahkhiak un a taklat dan in tulel in phaizang mite'n Schedule Tribe a lut a sawm uh naktak a daal ding uh hin tua Joint Press release in taklang hi. Hmar Inpui, Thadou Inpi Manipur, Mizo People Convention, United Naga Council leh Zomi Council kikhaikhawmna OMTF leh Joint Action Committee Against Anti-Tribal Bills (JACAATB) in a taklat zel dan un, Meitei te ST a lut a sawm pen uh bangmah dang hilou in, singtangmi suakle uh singtang gam teng laksak vek a sawmna ziak ua ST hihding lunggulh uh hin gen ua, singtangmite dikna leh tanvou omte tangkoupihna pailel toh kiton in, Meitei te ST a om ut a kiphinna a neih uh singtang mite'n naktak a deihlou uh ahihdan Prime Minister kiang tungding in joint Memorandum leng piaklut a om hin taklang hi. Singtang gam buaina toh kisai a tuni tan kampau khat leng neilou Singtangmi MLA leh MP 1 tung a Boycott puan a om leng lakkhiak a om nailouh ban ah kiptak a paitou lai hin tua Press release in gen a, boycott a kipuan lai a boycott ngeingaihlouh ziak a a tung ua banghiam tung om leh khase theilou ding uh a, OMTF leh JAC in mohpawlou ding hi. Boycott puan a om MLA leh MP kithuahpihna pia organisation hin mimal hitaleh amaute Anti tribal dan a pom hiding uh a, a risk a kipuak uh ngaiding chi hi. tukum July 18 a OMTF leh JAC in joint meeting a neihna ua thupukna bang in, kumlui August 31 a Congress solkal in singtang gam sukha theiding Bill deihhhuailou tak 3 a pass ziak a Congress party tung a Boycott puankhum a om leng paitou zel a, Congress solkal bang a singtang mite sukha theiding a panla regional hin national Party hitaleh singtanggam ah congress boycott a om bang in, amau party leng boycott hiding chi hi. Mimal hin Organisation hin Political pary khat peuh hitaleh singtangmite khem tu peuhmah singtang gam ah mun neihsak hilou chin leng tua joint Press release in taklang hi. Singtanggam buaina om nung kum khat val paita mahleh Centre hin state solkal hitaleh tuni tan ngaihsak a omlouh ziak in, poisakthu puang uh a, OMTF leh JAC in pupa khang apan i luahsa gamte leh singtangmite bitna ding ngaihtuah in panla den ding a, Manipur solkal toh kikhenkhiakna ding in Separate administration kichi om ma teng a om theihna ding a panla den ding hin tua joint press release in taklang hi.


XXXXXXXXX


SHALOM saina in CMO Conference Hall ah MACS nuai a Targetted Intervention-te a ding in Hepetitis B leh C banah Overdose Management toh kisai kisinsakna tuni'n kipan a, zingchiang in zousiang ding uhi. Hiai training ahihleh SHALOM in FHI360 leh DAPCU toh pangkhawm a asai uh hi a, MACS nuai a om TI-NGO tuamtuam LRRC, SHALOM, PPO leh MSF apan Project Manager, Outreach Worker leh Nurse-te kihel in, tuni'n Dr. Seni, Medical Officer, District Hospital in Overdose Management toh kisai sinsak a, theihna a tawm luat ziak a khamtheih overdose a si tamtak om ahih dan gen in, hiai teng sukbeina dia I kisin siam uh poimoh mahmah ahih dan gen a, khamtheih overdose-te etkol ding dan sinsak hi. MSF apan Dr. Gillian in Hepetitis hong kipat dan tangpi gen in, Dr. Jeetesh in Hepetitis natna om dan, kilohsawn dan leh Hepetitis in sin (liver) a suk khan dan nouneltak in sinsak hi. Training ahihleh zingchiang in leng sutzop hi ding hi.


XXXXXXXXX


Hongtung ding October 1, 2016 sunma dak 11:00 in CMO Conference Hall ah Department tuamtuam te' a ding in Dengue toh kisai Intersectoral Meeting om ding hi. Hiai meeting ahihleh State leh District NVBDCP te kituah a asai uh hi a, CCpur District sung a department tuamtuam apan head of department leh staff-te kihel in, State Consultant te'n Dengue natna apan kiven ding dan toh kisai sinsak ding uhi. Thutut kingah dan in, tu kum 2 paita apan in CCpur District ah Dengue Outbreak om ziak in tamtak in haksatna tuak in, hiai natna ziak a sihna tanpha tuak leng om ahihman in, outbreak omlou a, hiai natna apan kuapeuh a kiven theihna ding un department chih in hiai meeting ngai poimoh a tel chiat ding in Dr. Liankhawjam Guite, District Malaria Officer, CCpur in ngetna leh theihsakna bawl hi.


XXXXXXXXX


Churachandpur District sung a lasa siam tuamtuamte kipawlkhawmna Joint Artiste Association te'n hongtung ding October 15, 2016 in Mini-Auditorium, Dorcas Hall Campus, New Lamka ah Fellowship thupitak a neihna ding utoh kisai in tuni sunnung dak 4:30 in Lengtonghoih Studio, Vengnuam, Hiangtam Lamka ah a 2veina ding in rehearsal nei ua, mun tuamtuam apan lasa siam tamtak paikhawm uhi. Hiai Fellowship ahihleh Hmar Artiste Assn, Kuki Artist Progressive Union leh Zogam Artiste Association te' inntekna a sai hiding a, lapawl 3 chiat a sak ding banuah CCpur District sung a nam tuamtuam apan lasa siam tamtak a kihel ding banuah saptuam tuamtuam a La-pute leng kihel in, a mun a tel theiloute khualna in cable TV tungtawn in LIVE in khah khiak hiding a, mun tuam gam tuam a om te'n leng a et theihna ding un Internet tungtawn in Live Streaming leng bawl hiding hi'n kigen hi. Hiai Fellowship in a tuppen ahihleh mun tuamtuam a om singtangmite lak ah laa tungtawn a kipumkhatna hong om theih ding tupna ahih dungzui in, hiai hun ah khua khat tui khat a tengkhawm u-le-nau laizomte lak ah innkuan khat hihna thukzaw sem a pholhsuah ahih theihna ding in gam ngaihla leh la tualleng a tam theilam sak hiding in kigen hi.


XXXXXXXXX


GAMSUNG THUTHANG

Meitei te'n Schedule tribe a omding lunggulh a Schedule tribe demand committee a phuhkhiak nung un, ST demand committeein Manipur state solkal kiang ah a thak in Meitei te ST lut thei mah uh ahihdan criteria omte phualpi solkal kiang ah khanawn October 2016 sung ngei a pelut ding in theihsakna bawl nawn uhi. schedule Tribe demand committee saina a public meeting hun ah mipi paikhawm te'n Meitei te Schedule Tribe a a lutna ding un State solkal in Phualpi solkal kiang ah Meitei te Schedule tribe a lut thei mah uh ahihdan lemsakpihna a thot ding ban ah, October khasung ngei a, State Government in Meitei te ST a a lutding uh toh kisai lai poimoh bangkim a piaklut sak poimoh ding hin gen uh a, nohna leng bawlnawmn uhi. Scheduled Tribe Demand Committee, Manipur in thupuan a bawlna uah Manipur state solkal in a kinthei lam a Meetei te Schedule Tribe a guan lut ahihtheihna ding a panla ding in nohna nei uh a, Schedule Tribe Demand Committee of Manipur in ahihleh 2011 kum in Meitei te ST a guanlut ahihtheihna ding un Governor of Manipur leh Chief Minister tungtawn in Prime Minister Office tungding memorandum ana thehlut uh a, a nung in PMO in tua memorandum kipelut pen Home Ministry leh Tribal Ministry bah forward in, huai khit in, Ministry of Tribal Affairs in 2013 kum in Manipur state solkal kiang ah Meitei te ethnography leh socioeconomic survey reports pelut ding a theihsakna pia hin kigen hi. Kumlui August 5 in leng Scheduled Tribe Demand Committee, Manipur in thupuan a bawlna uah Manipur state solkal in a kinthei lam a Meetei te Schedule Tribe a guan lut ahihtheihna ding a panla ding in nohna nei uh a, June 2, 2015 a joint secretary, Government of India, Ashok Pai in state solkal kiang a lai a khakna ah 'Streamlining of Procedure for Scheduling of communities as STs" kichi thulu zang in, Ministry of Tribal Affairs in kum masa February 2014 in system thak zang uh a, tua dungzui in, ST muhtheihna ding in Task Force dinkhiak hiding a, Task Force in State Government palai, State chih a Tribal Research Institute leh Central Ministries/ Departments ban ah National Commission for Schedule tribes kikuppih in ST muhtheihlouh ding leh muhtheih dingdan genkhawm ding uh chi laithon a khakna a tel hin STDCM Chairman Laishram Lokendra Singh in gen hi. Hiai thu ah Meetei te ST a guanlut ahihtheihna ding un naktak in kiphinna om mahleh bandh bawl hilou a, school naupangte leng zat a omlou uh hidan a gen in, state solkal in a ngaihsak louh ziak ahi chin ST demand committee in gen ua, Registrar General of India (RGI) leh National Commission for Schedule Tribes (NCST) ah state solkal in bangmah thuzak ngeilou hidan a state solkal ngohna nei in, Meetei te'n ST a nget nung uh kum 5 paita mahleh Manipur state solkal in kam khat leng National Commission for the Scheduled Tribes ah theisak ngeilou chin Lokendro in gen hi.


xxxxxxxxx


Tukum November kha sung in south east asian regional co-operation (SAARC) summit Pakistan ah om ding chih himahleh India leh Pakistan kal in siatlam a nawt semsem ziak in, Prime Minister Narendra Modi in november kha a SAARC summit Pakistan a om ding ah tellou ding hin thupuan bawl hi. Tuabang a India PM in SAARC Summit a kihellou ding hidan a thupuan a bawl toh kiton in, SAARC a kikhai khawm gam tuamtuam te lak ah India leh Pakistan chihlouh Afghanistan, Bangladesh leh Bhutan in leng SAARC summit a hun suan ding deih uh a, a mun leng Pakistan a om leh kihellou ding uh hidan a thupuan a bawl ziak un, SAARC a kikhaikhawm gam te lak ah Pakistan vuak pangkha suak maimah hi. India gamsung a Kashmir phaizang a Uri mun a Pakistan tawsawn helpawlten Indian Army te munpi gamgi kantan a hong buluh a Army 18 a thah na uah, India in phuba lak a sawmna pailel in, huai ah Pakistan kichi helpawl tawsawn tug am ahihdan khovel pumpi theih ding in tangkoupih lai hi. India in Pakistan toh a kal a kizopna hihtan chet kei mahleh India in Pakistan toh a kal uh etthakna nei in, Indus Waters Treaty tungtang ah leng sisan leh tui luangkhawm theilou hidan in gen ngeita a, hiai thu ah Pakistan Foreign Minister Sartaj Aziz in Indus Water Treaty a India a kizukkik ngeingei leh kidouna chikhat kipan hiding a ngaihtuah theih hiding chin ana gen ngeita hi. Uri mun a Army Camp buluhna toh kisai in, Prime Minister Narendra Modi in India in chikmah chiang a Uri buluhna mangngilh ngeilou ding ahihdan gen hi. Pakistan in hiamgamna a thonkhia a, India in Software a thonkhia chi hi. Terrorist 4 in Jammu & Kashmir state sung Uri a army camp a buluhna ua India sepaih 18 kaplup ahihnung ua Prime Minister Narendra Modi in mipi lak a, a thugenna masapen ah, "Pakistan mipite, noute dou ding in ka kiman uh. Hangsanna suah unla zawnna i dou ding ua kua'n zonna a beisak masa a chih i en ding uh. Unemployment beisakna ding ah kua'n vualzohna a ngah masa a chih i en ding uh" chi hi. Himahleh PM Modi in Pakistan vau kawm in, sepaih 18-te kipiakna chikmah chiang a mangngilh hingeilou ding leh khovel pumpi in Pakistan tuamkoih ding ahihdan India in chiansak semsem ding ahihdan gen hi. Prime Minister Modi in hiamgamna ma a India khukdin ngeilou ding ahihdan gen in Indian Army-te'n terrorist 110 thatta hidan in gen hi. Huai ban ah terrorist-te'n hun paisa in 17vei India buluh sawm mahle uh lohsam ua, Uri a khatvei lohching uh hidan in gen hi. India leh Pakistan in zalenna ngah ton mahleh India in software thonkhia a, Pakistan in hiamgamna thonkhia hi'n PM Modi in gen hi. Hiamgamtak a gamtang mite thugenkhiakte thulak mahmah Pakistan makaite a kipan in khovel in lam-et ding nei tawm mahmah hin gen hi. Pakistan Prime Minister Nawaz Sharif in Uri buluhna toh kisai bangmah suichian omlou a India in kintak a Pakistan ngoh hidan in gen hi. Himahleh hiai thiltung suizuite'n Uri a kaplup a om terroist 4-te galvan zat leh nek ding a puakte uh Pakistan a kipan ahihdan theih a om hi'n gen uhi. Tu kum July kha a terrorist Burhan Wani thah ahih a kipan in Kashmir ah buaina sousangtak om a, huaiziak in India leh Pakistan kal ah kingiktuahna leng sousang mahmah hi. India in ahihleh Jammu & Kashmir buaina ziak a mi 87 sihna leh midang 10,000 val liamna toh kisai pen Pakistan in thagum suah ding a mipite a tawsawn ziak hidan in ngoh hi.


xxxxxxxxxx


Madhya Pradesh khopi Bhopal ah khosikpi natna chikhat Dengue kichi natna veitu 13 muhkhiak thak a om ziak in, tuni tan in Bhopal khopi sung vuak ah dengue natna veitu mi 93 phata hi. Bhopal khopi sung vuak a Dengue natna veitu 93 om taak ziak in, Dengue case tam om kum pen hidan a chiamteh in om a, tamsem in leng veibeh theilai ding dinmun ah om uhi. Tulel in Bhopal ah dengue natna nei om uh hiam chih testna mun centre 5 lel om a, huai leng sisan test sak te'n ni 3 ni 4 bang a result a ngak uh ngai hin kigen hi. Kallui kiginni in leng Dengue toh kibang natna veikhat Jay Prakash Hospital ah etkol ding a puaklut in om a, a ni 3 nung in sisan test neihsdakna result ah Dengue vei ahihdan muhkhiak in om hi. tu in leng Dengue natna vei hidia muanmoh mi tamtak te sisan test neih in om a, ni 3 nung a tua test result pawtding ahihman in Dengue case tamsem om behdia gintak in om hi. Bhopal ah Dengue khosik natna nei mi 93 om ahihdan chet himahleh Dengue ziak a sihna tuak omlam bel theih hinailou hin kigen hi.


xxxxxxxxxx


GAMDANG THUTHANG

Hun bangtan hiam Israel President dinmun anal en ngei Shimon Peres in zan zek apan stroke a neihnung in dam lam manoh hidan a gen himahleh tuzing kal in a kietkolna mun damdawi inn ah ihmu lum sa in muhkhiak in om hi. Shimon Peres ahihleh a sihhun in kum 93 in upa a, a sihna ziak diktak theih hikei mahleh stroke ziak mah hiding in gintak thu kigen hi. Shimon Peres in sihna a tuah toh kiton in US President Obama in suunthu puang in, Israel a ding a manna thupitak hin genhi. Shimon Peres enkoltu doctor te lak a khat Rafi walden in a gendan in, Shimon Peres ahihleh tuzing dak 3 vel a ihmu pan hin gen a, himahleh dakkal tamlou chik a ihmut nung in, phawn khiak zoh nawnlouh a om in, si paisuak chi hi. Shimon Peres bel tukha September 13 apan Tel aviv khopi gei a damdawi inn khat ah major stroke a neih ziak a puaklut a om hi a, a sung lam ah sisdan a pawt ziak in, doctor te'n operation bawl mahle uh phatuam zou taktak lou in ICU ah etkol in omden hi. Shimon Peres in Israel politics ah kum 40 val kibual kha a, Cabinet member dia tamveitak telching a om khit banah Labour Party prime minister ding in 7 vei telching in leng om hi. Israel President a a pan tawpna pen ahihleh 2007 apan 2014 sung President dinmun a letnung in Israel Politics khawlsan sawm in kisa a, 1993 kum a Israel Prime Minister Yitzhak Rabin leh a phamta Palestinian leader Yasser Arafat in interim peace deal adding a suai a kaih ziak un Nobel Peace Prize piak in leng ana om ngei hi.


xxxxxxxxx


Europe gambuppi sung a gam tuamtuam ah Muslim galtaite huatna a pun semsem toh kiton in, zan nitak in leng Germany ah Muslim te huatna ziak a thilhih hidia gintak bomb sukpuakna om hi. Thiltunna mun ahihleh Germany gamsung a Dresden mun a Muslim te biakbuk khat a German Islam Conference kichi 10th anniversary zatna hun omlai tak a thiltung hi a, himahleh bomb puak pen a hat luat louh ziak in, kuamah si leh liam om lam theih hilou hi. Police thusuak in a gendan in, tua thiltung ahihleh muslim te huatna 'xenophobic' attack toh kisai hin gen ua, Germany East leh west a omlai a kigawm nung uh Unification of germany a piannung kum 26 chinna hun German President Joachim Gauck in uap ding hidan a a puankhiak khitnung a thiltung hin leng gen uhi. Germany gamsung a Muslim galtai tampipi lut sak a om uh toh kisai in, Far rights pawl in kumlui 2015 sunglel in Saxony ah galtai mi 106 khoih uh a, tukum June tan in leng Germany a lutsawm asylum seekers 50 valding te a ziak mumal omloupi a khoih leh vuak in om khinta uhi.


xxxxxxxxx


Afghanistan gamsung Kunduz province sung a om Kunduz khopi nawl a check point khat ah zan nitak in Afghan sepaih a pang minih in tua check gate ah Taliban helpawlte toh kithutuak a a lawmte uh ihmu a omlai a bukapna uah Afghan sepaih 12 si uh hin kigen hi. Hiai thiltung ahihleh zan zek a suicise bomber zang a US leh afghan sepaih convoy a kizuite beih a om nung ua thiltung hi a, Kunduz governor thupuangtu Mahmood Danish in thiltung toh kisai a genna ah, Kunduz khopi nawl a Zazhil Khoman kichihna mun a check point ah Afghan sepaih nih in checkpoint sung ah Taliban helpawlte lutsak in, a lawmte uh ihmu lai thau in bankap uh a, huai Ah a lawm dangte uh ihmu a omlai mi 12 kaplum in kihemmang uh chi hi,. Thiltung toh kisai in, Taliban pawl in amau khutnung hidan in puang uh a, afghan solkal chouna dan a a hih uh hin leng kipuang uhi. Kunduz khopi ahihleh 2001 kum a US makaih NATO in Taliban vaihawmna a phukkhiak nung uh kumlui in Afghan sepaihte khut apan Taliban in thuneihkhum nawn uh a, Afghhanistan gamsung mun tuamtuam a Taliban pawl in afghan sepaihte a beihna uah kumlui 2015 sung vuak in Afghan sepaih 5000 si in, midang 15,000 val liam uh a, tua dan a bat leh kumlui sang a tukum sung ah Taliban khut a sihna tuak tamzaw lai ding hin NATO in patauh thu gen uhi.

xxxxxxxxx