You are here: HomeRSS FeedsLatest News

Angels' Vision News | October 10-12, 2016

Sunday, 16 October 2016 07:56

DC/CCpur Lunminthang Haokip, IAS makaih in tuni sunnung dak 2:00 in DC/CCPur Office huangsung ah Systematic Voters Education & Electoral Participation (SVEEP) Campaign toh kisai honkhiakna leh vanzat tuamtuam hawmkhiakna om hi. Hiai hun ah DC/CCpur staff-te banah AERO/SDO teng leh Election Department a staff teng kihel ua, Campus Ambassador dia seh a om teng leng kihel uhi. Thutut kingah dan in, SVEEP Campaign ahihleh maban a 2017 election neihna ding toh kisai a mipi a tam theilam in vote a manphat dan leh gam bawl hoihna ding poimoh ahih dante a theih beh semna ding uh tupna a Centre Government in a patkhiak hi a, apaisa September 7, 2016 a campaign pat hita in, mun tuamtuam ah Gram Sabha leh College tuamtuam ah Campus Ambassador-te makaih in Special Summary Revision toh kisai Awareness Programme leng zat in ana omta hi.

Tuni a launchprogramme ah Soiminlian Lengen, MCS, Chairman, SVEEP Core Committee in vaidawnna thu gen in, aman a thugenna ah, SVEEP campaign kichi kha paita a pat hita mahleh, tuni'n mipi lak a hawmkhiak di ng vanzat tuamtuam hong tunbeh ziak a hiai programme zat a om ahih dan gen a, Special Summary toh kisai leng October 7, 2016 tan neih ding chih himahleh government in kal 2 behlap in, October 21, 2016 tan neih touh hiding a, hiai hunsung a kuapeuh in mahni min diklou hiam ahihkei leh min behlap leh paih ding nei te'n Booth Level Officer-te tungtawn a ana bawl a, January 2017 tan a kum 18 ch ing ding te'n leng Electoral Roll ah min ana khumlutsak chiat ding in ngetna leh theihsakna bawl hi. DC/CCpur in a thugenna ah, Election kichi Democracy gam a dia poimoh petmah ahih dan gen a, election kichi India khua-le-tui khempeuh in a mohpuakna uh hih buchinna ahih banah gam bawlhoihna dia hun hoih pen leh manpha pen ahiman in kuapeuh election ah kihel chiat ding in ngetna bawl a, tu hun pen Electoral Roll a min khumbeh leh bawl dik ding omte bawldikna dia hun kihong ahih man in kuapeuh in zang phatuam mahmah ding in ngen a, Christian i hih dungzui in diktatna toh panla ding in mipite ngan hi. Government in kum nawn election ding pen ngai poimoh mahmah in, kuapeuh in singthou tak a mahni vote chiat a khiat theihna ding un theihtawp suah a panla in, Polling Station tamzawte ah Webcasting koih ahih ding banah Polling Station teng ah CCTV koih suk vek hiding a, vualbanlou te'n leng vote a khiat theihna ding un polling Station teng ah ramp leh Hand Rail koih suak vek hiding in gen a, maban election ding pen Festival of Democracy chi'n minvuah hial hi'n gen hi. Programme hunsung in District Election Officer/DC, CCPur Lunminthang Haokip. IAS in Campus Ambassador teng kiang ah pamphlet tel in vanzat tuamtuam pekhia a, S. Thienlaljoy gangte, OSD (Election) in kipahthu gen in programme zou uhi.


XXXXXXXXX

All Tribal Women Union (ATWU) makaih numei pawl te'n zingchiang nitak dak 5:30 in Mualveng, Hiangtam Lamka ah 6th Schedule toh kisai Awareness Programme nei nawn ding uhi. Hiai hun ah mi tuamtuam apan 6th schedule toh kisai thugen ngaihkhiakna om in, slogun sapna leng a om ding banah mipi paikhawm te'n gam leh leitang banah makai tuamtuamte a ding in thumkhawmna nei ding uhi. Hiai hun ah gam leh leitang itna nei kuapeuh tel chiat a, i gam a dia poimoh masapen 6th Schedule toh kisai hong theih beh sem ding in ATWU in chialna bawl hi.


XXXXXXXXX


Tribal Movement pailel toh kisai sukbuai sawmna a mi dawilok pawlkhatte khutnung hidia muanmoh te'n a haltum uh Salphate Zahna Pumbuk mipi tha hatna in tuni'n tundin thak nawnna kipan a, ni 2/3 sung a zohsiang hiding hi'n kigen hi. Salphate Zahna Pumbuk ahihleh Hiangtam Lamka mipi'n singtangmite kipumkhatna ding leh maban a kalsuanna dia kalbi khat a hong hih lametna banah tribal movement pailel toh kisai a mun poimoh tak hihsak tupna a Hiangtam Lamka huamsung a om mimal tuamtuam te'n kiphaltak a sum a thoh khawmte uh zang a kibawl hi a, September 21, 2015 ni a JAC Chief Convenor H. Mangchinkhup in hongkhia in, hiai mun ah gam leh leitang a dia hinna ana pia Salpha mi 9-te hankuang leh a lim uh hoihtak a koih hi a, tuni tan in mun poimoh tak suakta hi. Vangsiat huaitak in, apaisa October 8, 2016 zingkal baihtak dak 3:00 vel in mei in kangtum dimdem hi. Meikuang hong kipatna theih hikei mahleh, changeover leh switch board a kisiatlouh ziak in electric short circuit apan hong kipan ding in bel gintak huailou a, tup mawng a kuahiam in a hal uh hiding in gintak thu kigen a, tuni tan in muanmoh matkhiak kuamah om nailou hi. JAC Against Anti-Tribal Bills in a lui sang a hoihzaw dia tungding thak hidia thupuak a bawl dungzui in tuni'n mun tuamtuam apan mipi a 100 a sim paikhawm in social work thupitak om a, mi mimal leh pawlpi tuamtuam 180 val te'n sum a neih dandan uh thoh khawm in bawl hi a, tuni'n a guh-gel teng zoh a om in, Tribal Martyr-te hankuang ding leng tuni mah in bawlzoh in om hi. Zingchiang in leng social work sutzop hiding nawn dia a, kithuahpihna sum pe nuam te'n leng Salphate Zahna Pumbuk mun ah mahni kiphal dandan piak theih lai ding hi. Thutut kingah dan in, Salphate Zahna Pumbuk pen a tung langva a bawl ahih ding banah a baang mau-daap a bawl hiding hi'n kigen hi.


XXXXXXXXX


Hongtung ding October 19, 2016 apan October 21, 2016 sung in Thanlon Sub Division sung a om Aibulon ah Aibulon Hausa Phamsa Niangchiin theihgige na in Memorial Football Tournament omding hi. Hiai hun ah Aibulon leh a kiim a khua tuamtuam 20 apan kimawlmi hunkhop paikhawm ding uh a, Langkhanpau Guite, Chairman ADCC in Chief guest a pang in tournament hongkhe ding a, T Paukhanlian Ngazam MDC in Tournament khak ding hi. Tournament hunsung in inntekpa in Thanglianpau Guite pangding a, tournament ah khatna late'n Trophy leh dangka 10,000 saang in, nihna late'n dangka 5000 sangding uhi.


xxxxxxx


Embroidery & Fabric Painting zil nuamte a ding in SBI-RSETI Temporary Office, Bijang ah ni 15 sung daih ding Free Short Term Course pailel a, hiai training ah mun tuamtuam apan puankhui lunglut mi 22 kihel uhi. training ahihleh October 7, 2016 ni a pat ding kichi himahleh General strike om ziak in October 8, 2016 (Kiginni) a pat hi a, ni 5 sung CT Lian Guite, MBA leh Mangboy Vaiphei, MBA te'n ni 5 sung entrepreneurship toh kisai sinsak ding ua, Mrs. Mangnu in ni 10 sung puan-ze tuamtuam bawl ding dan toh kisai sinsak ding hi. Tuabangkal ah, SBI-RSETI in tu October khasung in tuailai kum 18 apan kum 45 kikal mite a ding in Rural Entrepreneurship Development Programme, Basic Photography & Videography leh Beauty Parlour Management a lunglutna neite a ding in Free Short Term Course sai sawn nawn a, lunglutna nei te'n SBI-RSETI Temporary Office, Bijang ah office kai hunsung in ngaihventheih ding a, form leh thil bangkim huai mun mah ah ngah theih ding hi.


XXXXXXXXX


Lunminthang Haokip, IAS DC/CCpur apan thusuah kimu in a taklat dan in, certificates tuamtuam Domicile, Tribe, Income leh a dangdang certificate te DC hiam ahihkeileh Additional DC in suai a kaih teitei ngai chihlouh teng SDO office ah issue hita ding hin thusuah bawl a, October 10, 2016 apan zat pat hingal ding chin leng gen hi.


xxxxxxxx


Zenhang Lamka kho-to, Tuitha Lui pang a om Zoumunnuam khua in tuni'n Zoumunnuam Community Hall ah kum 10 chinna Tin Jubilee thupitak in lawm uhi. Hiai hun ah Langkhanpau Guite, Chairman, ADC/CCpur in Chief Guest hihna toh uap in, Functional President in Chinlunthang, President, UZO GHQ pang a, Chief Host in T. Singneng, President, TPO banah Jubilee Pa in Gouzalal Tungnung, Vice-President, UZO GHQ pang a, khosung leh kho kiim apan mipi tamtak kihel in, Bawng 2 gou in Tin Jubilee lawm uhi. tin Jubilee lopna Programme ahihleh sunma dak 11:00 in kipan a, T. Kamdou, Chairman, Tin Jubilee Celebration Committee in vaidawnna thu gen in, T. Pauchinkhup, Chief of Zoumunnuam in Zoumunnuam hong piankhiak dan pulak a, mi poimoh chial a omte apan thugen ngaihkhiakna om in, lasa siam tuamtuamte apan lasak ngaihkhiakna om a, nitak programme ah D. Lunkholal Haokip, Social Worker leh Ex-Sub Tilkhojang Lhungdim te'n Chief Guest leh Chief Host hihna toh uap in, kisuklimna hun a zat hiding hi'n kigen hi. Tuni a programme zatna hun ah, Rev. Kamminthang Taitom, MELC makaih in Zoumunnuam khua a om, ana mualliamsa mi 46-te suunna hun zat in om hi. Thutut kingah dan in, Zoumunnuam khua kisat kum 2006 kum in mi 3 si in, 2007 kum in mi 3, 2008 kum in mi 2, 2009 kum in mi 3, 2010 kum in mi 4, 2011 kum in mi 5 a sih banuah 2012 kum in hiai khua ah misi omlou a, 2013 kum in mi 2, 2014 kum in mi 5, 2015 kum in 11 leh October 10, 2016 tan in hiai khua ah misi 8 om a, lusuunna thuak sungkuante a ding in rev. Kamminthang Taitom in thumsakna nei hi.Thutut kingah dan in, Zoumunnuam khua in October 2006 kum in government apan gazette order mu in, huai kum a PTC GHQ President hihna len T. Singneng in hongkhia in, Rev. Khamthang in Pathian kiang ah laankhia a, kum teng in hiai ni pen raising day ni in zang uhi. Zoumunnuam khua ahih leh nidang in tuilou in kizang a, gam neitu te'n plot 200 val suah in innmun ding in hawm ua, hiai khua ah D. Chinmunthang tenglut masapen hi'n record om hi. Tuni chiang in hiai khua ah innkuan 170, milip 900 val om a, tu kum 10 sung in khosung mipite pankhawmna tungtawn in pucca road hoihtak a neih banuah tuilian thuak gige ahih man un, NEC fund zang in retaining wall bawlna pailel a, tunung sawtlou a zoh hiding hi'n kigen hi. Programme hunsung in Functional President a pang Chinlunthang, President, UZO GHQ in souvenir hongkhia in, Chief Guest a pang Langkhanpau Guite, Chairman, ADC/CCPur in Tin Jubilee Suang kibawl hongkhia in, Pastor Lamgen, MELC in latna nei a, teltuam mi 10 te'n Jubile Dak tum uhi.


XXXXXXXXX


GAMSUNG THUTHANG

Manipur University Academic Council in University grant Commission (UGC) paidan zuihsawm a post graduate admission a ding a, ST te quota a sukniam thu ah singtangmi student pawlpi tuamtuam te'n deihlou in, Manipur University thuneitute'n Dan a khut ua kitawi uh hidan a gen in, kisimmohna ahi chi uhi. Pathianni nitak a All Tribal Students' Union Manipur (ATSUM) in press release a suahkhiak dan un, All Tribal Students' Union Manipur, All Naga Students' Association Manipur, Kuki Students' Organisation, Manipur University Tribal Students' Union, leh student pawlpi khenkhat toh meeting nei in, huai ah Manipur University thuneitute thupukna in singtangmite naktak a nelhsiah hidan a gen in, kiphinna nasatak in zuiding chi hi. Joseph R Hmar, president ATSUM leh Vareiyo Shatsang, general secretary ATSUM in suai a kaihna uh Press release in a taklat zelna ah ni 4 sung a Manipur University thuneitute'n thupukna a lak uh a zukkik kei uh leh kiphinna pat ahihding banah, hunchiam omlou singtang gam pumpi ah bandh khauhtak pat hiding chin vauna bawl uhi. Pathianni a Manipur University thuneitute kihouna ah seat reservation singtangmite a ding 31 percent himahleh 7.1 percent lel hihsak ding hin thupukna la uh a tua in 2012 kum a Central Educational Institutions (Reservation in admission) Amendment Act 2012 leh High Court of Manipur thusuah kalh ahihman in Manipur University in Dan amau ut thu a a kibawl tawm ding uh hilou ahi chi hi. ATSUM thusuak in a gendan in, Manipur University Academic Council leh mimal kitei sak mahmah te thu bawltawm zang a Parliament act zatding chia thupukna a lakna un Manipur High Court's order leh Central Educational Institutions (Reservation in Admission) Amendment Act 2012, naktak kalh kha hin gen a, singtangmite population et a UGC norms zat theihlouh ding chia thusuah omsa te ngeingaihlouhna hin leng taklang uhi. Manipur University apan Professor 4 makaih team khat in UGC official te reservation policy tungtang ah khalui September 12, 2016 in kimuhpih uh a, huai hun ah UGC in Central Universities 40 a ding March 23, 2016 a laithon khak uh etthak ngai nawnlou hin zasak uh a, tua laithon a gelh a omte mah a zat ding uh ahi chin theisak in seat reservation omzah hihkiam ding chih kigelhte zuiding in in theisak uh chi hi. Himahleh lunglut huai mahmah thil khat om ah September 12, 2016 nitaklam in Manipur University Chancellor DM Nachane in tulel a Manipur University a Vice Chancellor prof M Dhaneshwar Singh laithon/Email a khakna ah High Court of Manipur leh CEI Act 2006 kichi academic years 2014-15 leh 2015-16 a zat a om ahihman in tuamah zat hiding chin gen hi. Ahihhang in, Pathianni a Manipur University thuneitute thupukna ah seat reservation tungtang ah Parliament Act zat naksang in UGC paidan zuiding in thupukna ladaih uh a, tua dingzui in ST te seat quota ding 31 percent himahleh 7.1 percent lel zatsak hiding chia thupukna om ziak in Manipur University a kai student te a lompi a Manipur University nuse ding a leng kisakhol khinta uh hin ATSUM in press release ah taklang uhi. Reservation policy thu a kitheihsiamlouhna om toh kisai in, Manipur University Tribal Stu-dents' Union (MUTSU) in MU thuneite mohsa mahmah hi. MUTSU in, UGC paidan toh kituak a Parliament in a passed Act pansan a Varsity a Scheduled Tribes (ST) student-te a ding in 31 percent reservation paipih ding in phu uhi. Reserva-tion policy thubuai ziak a institute a admission process zekai lohna thu in Manipur University Entrance Examination Demand Committee thangpaisak mahmah a, buaina a sousan ziak in MU Vice Chancellor in a dinmun kizukkhiaksan khin in Vice Chancellor in a mun luah hin leng kigen hi.


xxxxxxxxx


Jammu and Kashmir state sung a teeng mipi tamzaw in Pakistan a om ding lunggulh hidan in kiphinna nei mahle uh Pathianni a Army te tuanna gari khat a accident hun ah Kashmir mi khat in phattuam ngaihna suahna suah a gari kilep sung a koltang Army jawan khat hunkhia hin kigen hi. Thiltunna mun ahihleh Srinagar khopi nawl a Lasjan Area a om Srinagar Bypass road hi a, Army te gari hektu in a gari hek control zou nawnlou a singkung a phutkhak ziak in kilep in, a sung ah sepaih khat koltang a, Army te'n leng hutkhiak sawm mahleh a hutkhiak pah theihlouh ziak un tua pasal in va hunkhia hin gen uhi. Hiai thiltung Mobile phone a kila kha video thehzak a om ziak in, dotna tampi piangsak a, Burhan Wani kaplup ahihziak a kiphinna khawllou a a pailai a tuabang thu hong om ahihman in mi tamtak in bildoh mahmah uh hin kigen hi. Tukum July in leng South Kashmir a om Bijbehara a teeng pasal khat in Amarnath mun a Pathian bedia kuan mi 20 te tuanna gari a kilep nung in, Curfew om mahleh curfew zahtak lou a a hutkhiak ziak in tua in mi lungsim khoih mahmah hin kigen hi.


xxxxxxxxxx


Delhi khopi sung a Airport minthang mahmah IGI Airport ah Delhi Hospital a ding Air france lenna in hon puak van khat ah Radio actice toh kisai kigelhna Private Company a sem khat in a muhkhak ziak in, patau in Radio actice kichi huih hoihlou leh lauhhuai om thei ahi chih ziak in, buaina om mahleh a nung in, tua Radio active kigelhna Bag sung ah cancer damdawi Molybdenum - 99 - kichi om ahihdan muhkhiak a om in, lenna lengkhe ding zekai sak a omte leng ngeina bang in lengkhe thei nawn uhi. Tuabang a Radio Active kigelhna muhkhelh ziak a buaina om hun in kintak in Airport vengtu Central Reserve Police Force te hilh in om ngal ua, tua van Cargo omna Terminal 3 area teng khakbing a om in, kuamah lut leh pawt theilou ding in koih hi ua, meikang phelhtu tamtak thil deihhuailou omleh kintak a zat theih ngal ding in sawllut ahihban uah, Atomic Energy Regulatory Board a pan special team hunkhop in Radio Actice om kha hihiam chih test neingal in, National Disaster Management Authority apan team hunkhop in leng IGI airport kidelhhuan man uh hin kigen hi. Dakkal bangzah hiam sung test neih ahihnung in, nuclear ziak a radiation omte tehna 5 milli-roentgen in lauhhuai hilou ahihdan a muhkhiak ziak in tua Airport hon in omnawn a, himahleh lenna lenglut ding leh lengkhe ding tamtak in buaina tuak uh hin kigen hi.


xxxxxxxxxxxxxx


GAMDANG THUTHANG

Carribean tuipi leh a sehvel a om gam tuamtuam ah huihpi, vuahpi leh piingpei nasatak kithuah Hurricane Matthew in a nawknung in, Haiti gamsung ah tui tamtak a vung ziak in namse gawm in khosik leh sungkhoh natna uang mahmah hin kigen hi. Hurricane Matthew nunggu thuakna toh kisai in Haiti ah cholera natna hii nasatak a a kithehdalh ziak in, Hurricane Matthew om nung tuni tan in Cholera ziak in mi 13 in sihna tuakta uh a, kintak a panlak pah ahihkei meh tuidawn sian thoulouh ziak in tamsem in sihbeh laiding ua gitak in om hi. Hurricane Matthew ziak in Haiti gamsung vuak ah mi 877 in sihna tuak uh hidan a gen hi a, himahleh cholera ziak a mi 13 in a sihbeh ziak un, sihna tuakteng mi 890 tungtou hi. Haitian health ministry's cholera programme in a gendan in tulel in Haiti ah cholera natna ziak in damlou lupna ngak a om mi 62 om uh hin gen ua, damdawi inn ah nurse om mahleh Doctor muhding omlou a, damdawi leng leiding vaang mahmah hin kigen hi. UN nuai a Central Emergency Response Fund in a taklat dan un tukum sung vuak in Haiti solkal a zawng luat ziak in, tui apan piangkhia natna Chiolera ziak i mi 27,000 val damlou ua, huailak ah mi 240 si uhi. Himahleh hurricane Matthew ziak a tui lakna munte a sianthou louh ziak in tamsem in sihbeh ding ua gintak a om hin WHO in gen ua, nekding piankhak mun a haichi kichiingte lak ah percent 80 vel Hurricane Matthew in a suksiat ziak in Haiti in maban ah kialpi maituah ding hin kigen hi. France solkal in hurricane Matthew ziak a Haiti gamsung a siatna omte tunding thakna ding in sepaih 60 sawllut ding a, tui khitsiangna leh niteng poimoh thilte tonnes 32 val pawlut ding hin thupuan bawl hi.


xxxxxxxxxxxxxx


Khanawn November a US President dinmun lending kitelna omding toh kisai in Republican party apan Presidential candidate dia guan a om Donald Trump leh Democrats party apan Hillary Clinton in mipi tamtak mai a a ngaihdan uh genkhiakna leh kiselna a neih uh paitou zel in, zan nitak in leng Debate nihvei a neihna uh hiding in St Louis Missouri ah kiselna nei uhi. Hillary Clinton leh Donald Trump in debate a neih hun uah Hillary Clinton in a kikhingpih Donal trump kiang ah numei tung a kampau a neihte zang in demna nasatak in nei a, a nihtuak un kinuihsan zel mahle uh Debate masa a a ki chibai bang un bel chibai kibuklou uhi. Donald Trump in a gendan in Hillary Clinton pasal Bill Clinton bang a US gamsung a Politician kuamah numei a kibual omlou hin gen a, US President dia telching a ka om ngeingei leh Attorney General kiang ah special prosecutor ka ngen ding a, amah kiang ah Hillary Clinton in US secretary of state a letlai a gamdang makaite toh kithuzakna ding a a E Mail a zat thu ah ka mansak ding a Jail bang ka zut sakding chi hi. Debate bei in Trump in Moderator te kiang ah Clinton gen hunsung sawt sak zaw uh hidan a ngoh in a lungkim louh thu gen hi.


xxxxxxxxxxx


East Jerusalem a Israel Police headquarter kong ah Palestinian mi pasal khat in thau a khah na ah Israel mi 2 kaplum in midang 6 kapliam mahleh a nung sawtlou in Israel sepaih te'n tua thaukhahtu pasal kaplum uh hin kigen hi. Police leh mit a mute genda in, Palestinian mi kum 39 a upa Musbah Abu Sbeih in East Jerusalem a om Sheikh Jarrah mun a Israel Police Headquarter kong ah mi nautang tamtak omlai a thau khahkhum hin gen ua, kihep mang sawm in car in tai mahleh Israel sepaihte panlakna ziak in gamla lou chik ah kaplum uh chin gen uhi,. Kaplup a om Musbah Abu Sbeih ahihleh Jerusalem khopi sung a Silwan mun a teeng hi a, taimang a sawmna car Israel sepaihte'n delhzui a a kapna uah a car ah thautang lutna ma mun 50 val om hin gen uhi. Musbah Abu Sbeih ahihleh nidang in leng Facebook a Israel mohpaihna kampau leh mi thahsawm hida a thu a post khiak khak ziak in, Jail ah kha 11 taang ngei a, a nung kumlui December 2015 in khahkhiak in om hi,. Kumlui October apan a vangkim a Palestinian leh Israel kal a buaina om ziak a Israel sepaihte'n a kaplup khak uh Palestinian mi 232 a phakna hita dan a gen hi a, Palestian te'n leng Irael mite temta zang a a khoihna uah mi 32 thatta uh hin kigen hi.


xxxxxxxxxx

Angels' Vision News | October 11, 2016

New Mata a om vualbanloute kaina dia school kibawl Bliss Island School in CCpur Parents Association for Persons with Disability toh pangkhawm in Cleanliness Day (Siangthouna ni) zatna leh Swatch Bharat Mission sepsuahna in lampi hahsiang ua, sunnung dak 1:00 in inaugural programme zang uhi. Hiai hun zatna ahihleh Thangkhanlian, AE/PHED CCpur Division in Chief Guest hihna toh uap a, Bliss Island School a kai naupangte banah nu-le-pate hunkhop kihel uhi.

Chief Guest in a thugenna ah, Swacch Bharat Mission toh kisai in District Level ah District Co-ordinator om in, a nasep thupipen uh ahihleh khotang siangthouna dia Individual household Latrine leh Community Toilet a tam theilam bawlkhiak hi'n gen a, hiai toh kisai in amah level in hih theih bangmah neikei mahleh District Co-ordinator leng midanglou ahihna ah department tungtawn in panpihna theihna tamtak om ding ahih dan gen hi. Programme honkhiakna dan in Chief Guest makaih in mi tuamtuam te'n kongtual phiat masa in, Bliss Island School a kai naupangte leh nu-le-pa te'n Mata khosung a lampi tuamtuamte phiatsiang uhi.


XXXXXXXXX


Catholic Educational Society, Manipur (CESM) saina in Salem Veng a om Don Bosco Hr. Sec. School ah All Manipur Catholic School Games, Sports , Literary & Cultural Meet a 5veina apaisa October October 7, 2016 apan neih a om zan nitak in zohsiang in omta a, zan nitak dak 7:30 in kipahman tuamtuamte hawmkhiakna leh Hun Khaka programme zat in om hi. Hiai hun zatna ahihleh DC/CCpur in Chief Geust hihna toh uap ding chih himahleh programme dang kisuang sawn om ziak in kihel theilou a, Most Rev. Dominic Lumon, DD, Archbishop of Imphal, Manipur in Functional President hihna toh uap in kipahman tuamtuamte hawmkhia hi. All Manipur Catholic School Games, Sports , Literary & Cultural Meet a 5veina ahihleh apaisa October 7, 2016 ni a Andrew Gentinlal, Commandant, STC/BSF in a honkhiak hi a, Manipur State sung a Catholic School tuamtuam 26 (CCpur District apan school 4, Senapati District apan team 6, Imphal Area apan team 7, Chandel District apan team 5, Ukhrul leh Bishnupur District apan team 2 tuak) apan student 1139, Teacher guide 91, Father 20 leh Sister 10 kihel in, sun hun in Football, Volleyball leh Basketball ah kidemna om a, Don Bosco Ground, Nghathal Ground leh STC/BSF Ground zat in om hi. Nitak hun pen Literary leh Cultural Meet hun a zat hi a, huai ah school tuamtuam paikhawm te'n Gospel Choreography leh Cultural Dance ah kidemna a neih banuah student te'n talent tuamtuam a neihte uh lahkhiakna hun in zang uhi. Zan nitak a closing programme zatna hun ah, mi tuamtuam apan hasotna thugen ngaihkhiakna om a, school tuamtuam te'n special item tuamtuam lahna a neih banuah kipahman tuamtuam Rs. 1 lakhs val man hawmkhiak in om a, St. Xavier's School, Makhan in Overall Champion hihna la in, Functional President a pang Rt. Rev. Dominic Lumon, DD Archbishop of Imphal, Manipur in piakkhiakna nei hi. All Manipur Catholic School Games, Sports , Literary & Cultural Meet ahihleh 1979 kum apan ana kipankhia hi a, hun lemtang omdan dungzui in hichibang sports neihtouh a om zel in, 1990 kum in Canchipur a All Manipur Catholic School Games, Sports , Literary & Cultural Meet a 3veina neih ahih lai in helpawl te'n Meet neihna mun ah Father Matthew Manianchira kaplum in huai nung sang hichibang sports meet sai hi nawnlou hi. Kum 24 vengveng a pai nung in suk hingthak a om nawn in, 2014 kum in St. Joseph School, Imphal ah a 4veina ding lohching tak in neih hi a, tutung a pen a 5veina hita a, kum nawn chiang in Christ Jyoti School, Mantripukhri, Imphal ah neih hinawn ding hi'n thutut kingah hi. Fr. Paul Lelen Haokip, Director, CESM in All Manipur Catholic School Games, Sports , Literary & Cultural Meet neihna toh kisai a sunglam-polam ah buaina bangmah omlou banah paisuk-paitouhna a buaina bangmah omlou a thoveng thak hun a bawlsak ziak un CCpur District mipite tung ah kipahthu gen hi.


XXXXXXXXX


Kholmun Playground ah zan nitak in ni 3 su ng daih ding Haokip Students' Organization (HSO) kum 50 chinna Diamond Jubilee lopna kipan a, tusun hun in leng programme tuamtuam zat ahih banah zingchiang in Diamond Jubilee Suang leh Souvenir honna neih hiding hi. Haokip Students' Organization Diamond Jubilee lopna ahihleh zan nitak a DC/CCPur Lunminthang Haokip, IAS in a honkhia hi a, zan nitak programme ah HSO makai ana mualliamsate sunna hun zat a om in, Dr. Chinkholal Haokip in "Career Prospects in NGOs" chih thupi zang in seminar makaih a, Haokip Celebrities leh Haokip Artiste-te apan lasak ngaihkhiakna om hi. Tusun hun zatna ah Mrs. Aichin Haokip, IPS in Chief Guest hihna toh uap in, Guest of Honour in Lalboi Haokip, Addl. SP (Traffic), Imphal pang a, Joel Haokip, MCS, SDO/Lhungtin in Functional President hihna toh hiai hun zatna uap hi. programme ahihleh sunma dak 11:30 i n kipan a, mun tuamtuam apan mipi tamtak paikhawm in, Tongmang Haokip, IRS (retd) in Haokip Students' Organization flag kaipalh a, mi poimoh chial a omte apan thugen ngaihkhiakna om in, lasa siam tuamtuamte apan lasak ngaihkhiakna om hi. Zingchiang zinglam dak 10:00 in Hunpi zatna kipan ding a, Manipur Chief Minister O. Ibobi Singh in Chief Guest hihna toh uap ding a, Haokip Bulpipa Thangjahao Haokip in Functional President hihna toh a uap ding banah Ngamthang Haokip, IFCD Minister, TN Haokip, MLA leh Yamthong Haokip, MLA te Chief Host in pang ding uhi. Programme hunsung in Chief Guest in Jubilee Monolith hongkhia in Rev. Dr. Hawlngam Haokip, President, KBC in Pathian kiang ah laan ding a, IFCD Minister Ngamthang Haokip in Souvenir hongkhia in mi poimoh chial a omte apan thugen ngaihkhiakna om ding hi.


XXXXXXXXX


Baptist Dorcas Fellowship, Bethelem EBCC in zingchiang (October 12) zing ann nekma apan in Grace Studio kong, Gouchinkhup Veng, New Lamka ah One Day Market bawl ding ua, silh-le-ten, um-le-bel banah vanzat tuamtuam mantawm chik in zuak ding uhi. Hiai One Day Market ahihleh Dorcas Pawl te'n Bethelem EBCC biakinn bawlna toh kisai a fund-drive na dan a a neih uh hi a, mipi kuapeuh in van kizuakte va leisak siausiau ding in ngetna bawl uhi.


XXXXXXXXX


All Chandel District Badminton Association inntekna in tuni'n ACDBA In door Hall ah Hill District Badminton Championship a 14veina kipan in, CCpur District apan CCpur District Badminton Association makaih in kimawlmi 50 val Chandel zuan in zinkhia uhi. Thutut kingah dan in, Hill District Badminton Championship a 14veina ahihleh tuni sunnung dak 3:30 in DC/Chandel Babby Waikhom, IAS in hongkhia a, tuni October 11, 2016 apan October 15, 2016 sung in Category tuamtuam 23 ah kidemna om in, October 15, 2016 nitak in hun khakna programme zat hiding hi'n thutut kingah hi. CCPur District Badminton Association (CDBA) makaih a CCpur District apan kimawl dia kuankhete ahihleh CDBA Office, Community Hall, Hiangtam Lamka ah kingak khawm in, huai ah Rev. laldawngliana, Sr. Executive Secretary, Manipur Presbyterian Synod in hasotna thu gen in, thumsakna nei a, Hiangtam Lamka Hausa G. Thangkhosuanmung, EM/ADCC in Flag-off in kha khia hi.


XXXXXXXXX


District Youth Affairs & Sports Officer (DYASO) CCpur saina in tuni'n Tuibuang Peace Ground Indoor Hall ah Boxing kimawlna a lunglutna nei kum 14 nuailam pasal leh kum 17 nuailam pasal leh numeite a ding in District Level Inter School Trail Selection om hi. Hiai hun ah school tuamtuam apan kimawlmi 45 vel paikhawm in, sunma dak 11:00 in Trail Selection pat in om a, Imphal apan official bangzah hiamte makaih in neih in om hi. Thutut kingah dan in, kum 14 nuailam pasal ah boxing kimawlmi 19 in application pelut in, hoihtak a kibeihsak ahih nung un State Level a ding in mi 10 telkhiak in om a, Kum 17 nuailam pasal ah mi 12 in application pelut in, huaite lak ah mi 7 telkhiak in om hi. Kum 17 nuailam numei ah mi 11 in application pelut in, mi 8 telkhiak hi a, telkhiak a omte zingchiang in CCpur District ai-oh in Khuman Lampak, Imphal ah State Level Inter School Trail Selection ah kihel ding uh hi'n thutut kingah hi.


XXXXXXXXX


Lead Bank Office, CCPur District in Gouchinkhup Veng Village Authority toh pangkhawm in tuni sunma dak 11:00 in TCYA Hall, Gouchinkhup Veng ah Financial Literacy Awareness Camp nei uhi. Hiai hun zatna ah Gouchinkhup Veng leh a sehvel apan mi tuamtuam tamtak paikhawm in, New Lamka (West) MDC CT Lian Guite in Chief Guest hihna toh uap a, mipi kuapeuh in Bank tuamtuam omte a phatuam theipen a zat ahih theihna ding in kisinsakna om hi. Hiai hun ah Thang Khan Kham, Chairman, Gouchinkhup Veng VA in vaidawnna thu gen in, Chief Guest apan thu gen ngaihkhiakna om a, aman a thugenna ah, eimite sum zatna kisiamlou a, i muhna sang a i zatkhiak a tamzawk gige ziak in mimal hi'n pawlpi hitaleh i khan ding bang a kikhang theilou ahi chi'n gen a, bank tuamtuam ah manager-te kimuhpih haksa mahmah ahihman in hichibang Financial Literacy Awareness Camp-te ah mipi a tamthei lam tel in, manager-te kimeltheihpih leng maban hun ah phatuam mahmah ding ahih dan gen hi. Programme hunsung in, Nengkhanpau Hauzel, Chief Manager & Lead District Manager, CCPur District in Financial Management leh Planning toh kisai banah Stand Up India 32 kichi scheme toh kisai sinsak in, Pauneihthang Valte, Chief Manager, SBI/CCpu r Branch in Bank toh kisai a Cyber Crime omte gen in, Aadhar Card leh Mobile Seeding toh kisai banah pensioner-te a dia theih tuak tuamtuam omte gen a, Mangtinlal Haokip, Branch Manager, UCO Bank in Basic Banking Facilities toh kisai sinsak hi.


XXXXXXXXX


GAMSUNG THUTHANG

Imphal apan Jiribam zotna lamlian ginatak a puahlouh a om ziak a gari tamtak a tai ngam nawnlouh nung un, Rongmei Naga Youth Organisation, RYNO Manipur in October 3 in Manipur state solkal kiang ah hiai lampi ni 7 sung a puahding in theisak mahle uh state solkal in tua ngetna a limsak louh ziak in, Imphal apan Jiribam zotna lamlian NH 37 ah tuni tak zankim apan hunchiam omlou bandh omding hin Rongmei Naga Youth Organisation in thuthaksaite mai ah gen uhi. Thuthaksaite mai a Rongmei Naga Youth Organisation President Singamlung Dangmei in a gendan in, National Highway 37 in a totkhak Luangkao leh Kaiphundai kikal Km 4.5 kise nak diak hin gen a, tua mun ah gari tamtak a tai ngam nawnlouh kia uh hilou in, Vangik pua gari lian leh passenger pua garite a ding in tai ngaihna omlou a, gari taituahte a ding a haksatna a tut kia hilou in, tua bial a teeng mipite'n a kum a kum a haksatna genvuallouh tuakta uh ahihman in solkal kiang ah tua lamlian Km 4.5 lel bawlding a nget himahleh limsak a omlouh ziak a, Bandh bawl a om hin gen hi. Work minister Ranjit in Imphal leh silchar kawmtuahna NH 37 bawl hiding chi mahleh, nasep pat a om tuanlou hin gen a, bawl hoih a hihma teng bandh khauhtak koih hiding chin Rongmei Naga Youth Organisation President in gen hi.


xxxxxxxx


Manipur University a Post graduate student admission a ding a Manipur University Academic Council in UGC guidelines zuih hiding chia thupukna a lak uh toh kisai in, tunin MU academic Council in a thupukna laksa uh velthak in, tulel a MU sung a buaina tuamtuam omte genkhawmna nei mahle uh, hiai thu kaihkhawm ahihtan in thupukna bangbang la uh hiam chih theihzui hinailou hi. Post graduate Admission a ding a MU Academic council in 2006 kum a Parliament Act pansan a seat bikhiah ding kibawl zah zuih a sawm ziak un, lungkimlou in Seppatni sunnung dak 2 in Manipur University a kai student 200 val dingte'n a lompi in MU huangsung nusia uh a, MU Academic Council in thupukna a laksa uh a zukkik mateng uh MU a laisim dia lut nawnlou ding uh hin Manipur University Tribal student Union in thusuah bawl uhi. Singtangmi student tamtak in Manipur University huangsung a nutsiat dek kuan un MU Bus stand ah kingak khawm masa uh a, huai ah placard tuamtuam tawi in lamlian zuihna nei mahle uh Police team khat in Singjamei area a lamlian zuihna a neih ding uh a phallouh ziak un, huai ah Police toh kinan tuahna om zek hin kigen hi. Manipur University a tulel a Vice Chancellor incharge kiang a MUTSU in laithon a piak uh, Thangtinlen Haokip, president MUTSU leh Gaininguang Kamei general secretary MUTSU in suai a kaihna ua a taklat dan un, MU a kai singtangmi student te sik leh taang in Manipur University Tribal Students' Union (MUTSU) in ST apan student te tung a vaihawmna diklou tak ompen pom thei nawnlou uh hin gen ua, MU campus sung a kideidanna leh singtang gam pumpi a kidei danna omte thuakzoh nawn vual ding hilou hin taklang uhi. Manipur University a seat reservation thubuai hong kipatna ahihleh October khabul a Academic Council in 2006 Act of Parliament zuih hiding chia thupukna a lak ziak uh hi a, huai dungzui in ST te a ding in quota 7.5 percent hi a, Schedule Caste te a ding in 15 percent leh Other Backward classes te a ding in 27 percent hiding chih hi a, himahleh Manipur state sung a milip omzah et in Singtangmi tamtak om ahihna ah 2012 kum in Manipur High Court in St te quota ding in 31 percent bikhiah a, tua zuih a om louh ziak a singtangmi student MU a kaikhate thangpai a Mass exodus kichi a lompi a pemkhiakna a neih uh hin kigen hi. MU a kai singtangmi student tamtak te MU apan a pawt uh toh kiton in, Khuman Lampak a Youth Stadium ah kikulh in buaina venhun ding ngak in omlel uhi.


xxxxxxxxx


Delhi khopi sung a Airport minthang mahmah IGI Airport ah Delhi Hospital a ding Air france lenna in hon puak van khat ah Radio active toh kisai kigelhna Private Company a sem khat in a muhkhak ziak in, patau in Radio actice kichi huih hoihlou leh lauhhuai om thei ahi chih ziak in, buaina om mahleh a nung in, tua Radio active kigelhna Bag sung ah cancer damdawi Molybdenum - 99 - kichi om ahihdan muhkhiak a om in, lenna lengkhe ding zekai sak a omte leng ngeina bang in lengkhe thei nawn uhi. Tuabang a Radio Active kigelhna muhkhelh ziak a buaina om hun in kintak in Airport vengtu Central Reserve Police Force te hilh in om ngal ua, tua van Cargo omna Terminal 3 area teng khakbing a om in, kuamah lut leh pawt theilou ding in koih hi ua, meikang phelhtu tamtak thil deihhuailou omleh kintak a zat theih ngal ding in sawllut ahihban uah, Atomic Energy Regulatory Board a pan special team hunkhop in Radio Actice om kha hihiam chih test neingal in, National Disaster Management Authority apan team hunkhop in leng IGI airport kidelhhuan man uh hin kigen hi. Dakkal bangzah hiam sung test neih ahihnung in, nuclear ziak a radiation omte tehna 5 milli-roentgen in lauhhuai hilou ahihdan a muhkhiak ziak in tua Airport hon in omnawn a, himahleh lenna lenglut ding leh lengkhe ding tamtak in buaina tuak uh hin kigen hi.


xxxxxxx

GAMDANG THUTHANG

US President dinmun lending kitaitehna paizel ah US Republican apan candidate Donald Trump in kampau khenkhat a zatte ziak a thubuai a neih ziak in, tu in buaina liantak tuak ding dinmun ah om panta hi. Republican Candidate Donald Trump in Muslim te tung a kampau a zatte leh numei khenkhat selphouna kampau a zatkhakte ziak in, US house of representatives speaker Paul Ryan in leng tuni in Donald Trump gumlou ding hin thupuan bawl a, Republican legislators tamzaw in leng a candidate uh himahleh a kampau zatte ziak a deihlou uh ahihdan thupuan a bawl souhsouh ziak un, Democrats Candidate Hillary Clinton in vualzoh theihna chance liantak neizaw hin kilang hi. Republican Party in hiai tungtang ah bangmah comment pekai mahle uh Paul Ryan kizukkhiakna in gen nei mahmah ding hidan a gen hi a, trump in a utut hih hen, a kampau leh gamtat dante tu khovel a om nawnkei a, US khangthu ah leng a om nawnkei chi hi. Paul Ryan kampau in Republican Party te Trump gupna a piakna uapan kizukkhe ding a green signal piakna bangtuk a ngaihtheih hin thusuak khenkhat in gen ua, Republican senators 332 val in trump gupna a piak uh leng khawlsan uh hin kigen hi.


xxxxxxxxxxx


Syria galpi toh kisai in ceasefire a puksiatnung a ding a minautang tam in a thuak khakna pen uh Aleppo khopi kituhna toh kisai in, huhna pedia kuan Aid convoy te bomb khiak khumna leh minautang poi khoihlou te tenna mun a bomb khiak khumna toh kisai in, UN security Council a permanent member gamte lak a khat France in Aleppo khopi kituhna toh kisai War crimes om theiding hiam chih suizui hoihsa hin gen hi. France solkal in ahihleh Russia leh Syria solkal pangkhawm a Aleppo khopi a bomb nasatak khiakkhum a omna in, war crimes piangsak hin gen a, damdawi inn tanpha hawi a omlouh thu ah lungkim lou ahihdan gen in, UN security Council a member tuamtuam te'n meeting a neih hun uah genkhawm hiding chi hi. Aleppo khopi a milip tamtak omte humbit sawm naksang a, bomb nasatak a kikhiak khum kichi pen khelhna liantak hin France solkal thusuak in gen a, October 19 a Russia President Vladimir Putin in Paris khopi a veh hun ah hiai thu leng genkhawm hiding chi hi. Russia tnungthuap Syria sepaihte'n aleppo khopi kituhna ah mallam pang thuneihkhum thei in, opposition galkap te panmun khopi laizang tan ah nohkik zou mahle uh, Rebel te'n Aleppo khopi sung mah a om simlampang a Sheikh Said district kichi Syria sepaihte khut apan laksak uh a, a thuneihna uh keklian uh hin thusuak in gen hi. US leh Russia in Syria galpi beitheihna dia ceasefire a puan uh Khalui september 22 a a puksiat nung in, Russia leh Syria solkal apan kidouna lennate'n bomb a khiak khumna uah minautang 290 val in sihna tuakta uhi.


xxxxxxxxxxx


Turkey Capital Istanbul ah World Energy congress khawmpi neih a om in, huai ah tulel a tumlam gamte toh a kal kise mahmah Turkey President leh Russian President Puntin in kihouna nei in, huai ah Natural gas kipiak tuah dingdan kikum uh hin kigen hi. Turkey leh Russia ahihleh kum khat val paita a Turkey in Syria toh a gamgi zul ua Russia lenna a kapkhiak sak nung in, a kal uh kise mahmah a, himahleh Turkey vaihawmtu khekkhiak sawm na a lohsap nung in, Turkey in tua coup sawmna pen tumlam gamte tawsawn hidan a ngoh in, a kal un siatlam nawt semsem hi. Tutung a Istanbul khopi a World Energy summit ah leng turkey leh European union a kikhaikhawm gam tuamtuam te kiang a Gas laklutna ding pipeline bawlding tungtang ah Russia in Turkey gupna pia hin kigen a, tua thu sepsuah ahihleh Russia apan Gas tamtak Turkey leh EU gamte kiang tungding in pipeline zang in zawltung hiding hi. Russia leh turkey kal in hoihlam nawt nawnta chih himahleh, Syria gamsung vaihawmtu Assad gum a Russia a panlai in, Assad vaihawmna zungkalh sawm in turkey in panla a, himahleh tumlam gamte toh Turkey kal in siatlam a nawt deuhdeuh ziak in, Russia leh turkey kal in hoihlam nawt panta hin kigen hi.


xxxxxxxxxx


Angels' Vision News | October 12, 2016


Manipur Chief Minister O. Ibobi Singh in tuni'n Churachandpur District hong pha in, Kholmun Playground a Haokip Students' Organization Daimond Jubilee lopna uap in, Jubilee suang hongkhia hi. Haokip Students' Organization (HSO) kum 60 chinna Diamond Jubilee lopna ahihleh apaisa October 10, 2016 ni tak a kipan hi a, zan sun leh nitak in kisuklimna tuamtuam neih ahih nung in, tuni 'n a nipi ni zat in om a, district tuamtuam apan mi tamtak paikhawm uhi. Hun zatna ahihleh Manipur Chief Minister O. Ibobi Singh in Chief Guest hihna toh uap in, Haokip Bulpipa Thangjahao Haokip, Functional President in pang a, IFCD Minister Ngamthang Haokip, Saikot MLA TN Haokip leh Saikul MLA Yamthong Haokip te'n Inntekpa hihna toh hiai hun zatna uap uhi.

Programme ahihleh sunma dak 11:30 in kipan mi poimoh chial a om mi 6 te'n Diamond Jubilee Dak tum in, Rev. Dr. Hawlngam Haokip, President, KBC in Jubilee Monolith Pathian kiang ah laankhia in, Chief Guest a pang Manipur CM O. Ibobi Singh in Jubilee Monolith hongkhia a, Haokip Bulpipa Thangjahao Haokip in Jubilee Baloon khahkhia in Hall Programme zat in om hi. Hall Programme ah inntekpa a pang TN Haokip, MLA in vaidawnna thu gen in, DK. Thangboi, Jubilee Secretary in report tomkim pia in, District tuamtuam apan hiai hun zang dia hong pai Cultural Troup te'n nam laam tuamtuam lahna nei in, Yamthong Haokip, MLA in kipahthu gen in programme zou ua, mipi paikhawm te'n sunnung lam in Cultural Programme nuamtak in zang uhi. Nitak dak 6:00 in Diamond Jubilee lopna programme khakna hun zat in om a, Langkhanpau Guite, Chairman, ADC/CCpur in Chief Guest hihna toh uap in, Lal Hossan, Vice Chairman, ADC/CCpur Guest of Honour a apang banah Functional President in Onjamang Haokip, Ex-MLA in Functional President hihna toh hiai h un zatna uap a, HSO MR & Miss Contest om in, tungjang Haokip, General Secretary, Haokip Peoples Council in HSO Flag kaikhia in, Pro Pastor Lalboi Haokip in Diamond Jubilee lopna programme khak hi. Tusun hun a programme zatna hun ah, Ngamthang Haokip, IFCD Minister in Jubilee Souvenir hongkhia in thugenna hun zang a, suahpih leh suahpih kikal a kisiatna tengteng i tawpsan ua, kituaktak a pumkhat a i om khawm uh hunta ahih dan gen hi. Programme hunsung in Thangsei Haokip, President, Kuki Inpi, Manipur tel in mi tuamtuam apan thugen ngaihkhiakna om in, Chief Guest in a thugenna ah, Manipur ah nam tuamtuam om mahle hang, gam khat a omkhawm i hihna uah kuamah kikhen thei omlou a, kitheisiam tuah leh ki-itna toh kituaktak a i omkhawm uh poimoh ahi chi'n gen hi. Manipur kichi gam hoih leh nuam mahmah ahih man in India Prime Minister lui Pt. Jawaharlal Nehru in Switzerland of India chi'n ana minloh hial a, hiai pen suk tangtun ahih theihna ding in kuapeuh kituaktak i om khawm uh poimoh ahi chi'n gen hi.


XXXXXXXX


Churachandpur District sung a Surgeon Doctor hoih pen pawl a kigen Dr. T. Hatzaw, MS (AIIMS), Senior Consultant Surgeon in nna tuamtuam a sepkhiate kipahpih etsakna in Manipur Chief Minister khut apan pahtawina sang hi. Hiai pahtawina ahihleh Manipur state sung a Surgeon Doctor tuamtuamte kipawlkhawmna The Association of Surgeon of India, Manipur Chapter te'n apaisa October 8 leh October 9, 2016 in JENIM Auditorium, Imphal a Annual Conference a neihna hun ua Manipur Chief Minister Okram Ibobi Singh in a piak khiak ahi hi. Dr. T. Hatzaw in ahihleh Medical lam ah qualification tamtak nei in, Lamka Damdawi Inn ah Medical Supdt. hihna hun bangtan hiam a let nung in 2009 kum in a sepna apan pension hi. A pension nung in Kangpokpi Christian Hospital ah Medical Supdt. hihna kum 4 sung len in, hiai damdawi inn pukse ding lai tungding in kum 1 sung a bat tamtak a neihte uh a ditsiang pih banah semtute khalouh leng a hunhun a piak theih dia koihsak in tuni chiang in paihoih mahmahta a, April kha in tawpsan hi'n kigen hi. Dr. T. Hatzaw in a nasepna a tawpsan nung in genthei, haksa leh liangvaite panpihna ding in Gouchinkhup Veng, New Lamka ah Ebenezer Polyclinic kichi bawl in, tu in mi tamtak in phatuampih mahmah uh hi'n kigen hi.


XXXXXXXX


Tipaimukh Road a passenger leh van tuamtuam pua a tiatuahte kipawlkhawmna Tipaimukh Road Area Transport Development Association (TRATDA) in tuni'n KKL Complex, Headquarters Veng ah kum 28 chinna Raising Day lopna leh General Body Meeting nei uhi. Hiai hun zatna ahihleh V. Hangkhanlian, Vice President, BJP Manipur Pradesh in Chief Guest hihna toh uap in, Functional President in Lalhmangpui Fimate, MDC Pherzawl pang in, Th. Jamchinthang Simte, MDC Thanlon in Guest of Honour hihna toh hiai hun zatna uap hi. Zinglam dak 10:00 apan in member te'n General Body Meeting nei in, huai ah maban pai ding dan toh kisai kikum ua, member paikhawm te'n registration fee Rs. 25,000 lak a omsek pen tukum apan Rs. 50,000 hita ding in thukim uhi. Sunnung dak 12:30 in Raising Day lopna hun kipan in, huai ah S. Lalpi, Chairman, TRATDA in vaidawnna thu gen in, lasa siam minthang Naemi Haokip, Jems Arjun Zou leh Bliss Lhingboi te apan lasak ngaihkhiakna om a, mi poimoh chial a omte apan thugen ngaihkhiakna om hi. Thutut kingah dan in, tulel in TRATDA nuai ah gari nei leh driver-te sim in member 115 vel om in, gari passenger pua a tai 50 leh van tuamtuam pua a taituah gari 30 vel om a, TRATDA etkaina nuai ah niteng in passenger pua gari 15 vel in Lamka nusia in, gari 15 vel mah hong tung uh hi'n kigen hi. Chief Guest a pang V. Hangkhanlian, Vice President, BJP Manipur Pradesh in a thugenna ah, state government in kikawmtuahna ding transport facility hon piak theihlouh lai a, ei leh ei kipanpih tuah a hiai bang panlakna pen thupi mahmah ahi chi'n gen a, tu in Centre ah BJP in vaihawmta ahihman in, huaite toh semkhawm thei ding in pan la thei leng bang a chi ding chih pen kuapeuh ngaihtuah ding in deih huai a sakthu gen a, huai ding in kuapeuh ana kisa ding in mipite kiang ah ngetna bawl hi. I vek ua i pankhawmna un i gam, i khua, i tuam nuam sak ding ahi chi'n gen hi.


XXXXXXXX


Hongtung ding October 14 apan October 16, 2016 sung in Lutheran Youth Fellowship, MELC Behiang in Behiang MELC ah kum 50 chinna Golden Jubilee lopna leh Kumtawp Khawmpi nei ding uhi. Hiai khawmpi ahihleh October 14 (Sintawpni) nitak in Rev. T. Kamminthang, Divisional Supdt in hongkhe ding a, khawmpi hunsung in Pro Pastor M. Thangboi Zou, Bial Pastor, Behiang Division, Rt. Rev. Dr. Hangminthang, Bishop, MELC, Pastor Khup Do Khen, Director of Ministries, MELC leh P. Tunzamang, Chairman, Lutheran Youth Fellowship GHQ te'n Tanchinhoih genna hun zang ding uhi. October 15 (Kiginni) zinglam dak 10:00 in Jubilee Biakna kikhop ah Rev. T. kamminthang, Divisional Supdt. in Golden Jubilee Suang hong in Pathian kiang ah latna nei ding a, teltuam mi 50 te'n Jubilee Dak tum ding uhi. Programme hunsung in Pastor Khup Do Khen, Director of Ministries, MELC in Golden Jubilee Souvenir hongkhe ding a, Rt. Rev. Dr. Thangminthang, Bishop, MELC in siamsinna lam a Class X apan a tunglam a lohchinna ngahte a ding in thumsakna nei ding hi. Khawmpi hunsung in MELC Behiang Division huamsung a om Lutheran Youth Fellowship tuamtuamte apan lapawl ngaihkhiakna om in, October 16, 2016 nitak in Pastor T. Kamminthang in Jubilee lopna leh Khawmpi khakna nei ding hi.


XXXXXXXX


All Tribal Women Union (ATWU) makaih numei pawl te'n All Tribal Movement of Lamka (ATML) toh kithuah a khopi sung mun tuamtuam a 6th Schedule toh kisai Awareness Program a neih uh paitou zel in, zan nitak dak 6:00 in Simte Inn, Simveng ah nei nawn uhi. Hiai hun ah mun tuamtuam apan mipi tamtak paikhawm in, I gam in tu leh tu a 6th Schedule a poimoh dan toh kisai leh 6th Schedule om zia kichian tak a kisinsakna om hi. Programme hunsung in mi tuamtuam apan thugen ngaihkhiakna om in, gamsung siatna apan suaktakna ding leh gamsung tungding thak ding dan toh kisai tel in thu tuamtuam gen ua, mipi paikhawm te'n thu leh la ah kithuahkhawmna nei in, Pathian kiang ah phualpi solkar in kivaihamna tuam 6th Schedule hong piak theihna ding in mipi paikhawm te'n thumkhawmna nei ua, 6th schedule leh gamsung tungding thakna ding toh kisai in Mrs. Kimzaching makaih in slogan tuamtuam saam uhi. Thangbiaklian Hangzo, Moderator, TRVM in a thugenna ah, tulel a gamsung kivaihawm dan leh kipii dan dik nawnlou in mipi'n haksatna tamtak kithuakta a, hiaite sukdik leh bawl hoihna dia lampi thak sial ngai ahi chi a, lampi ding zuihtheihna dia kuapeuh in pala ding in chialna bawl hi. Mrs. Nianglian, President, ATWU in a thugenna ah, i gamsung ah thudik gen ngam kuamah omlouh ziak in gamsung naktak in sia a, hiai teng bawlhoihna ding in Pathian toh i kizopna uh et thak poimoh mahmah ahih dan gen hi. Tulai a gamsung ah diktatna in vai a hawmlouh ziak in, district mipi te'n state government apan lam chi tuamtuam ah hahsatna kituak a, hiai te apan suahtakna ding leh gamsung tungding thak na dia 6th Schedule lou ngal lampi dang omlou ahih man in, mipi kuapeuh pangkhawm a pan i lak uh hun mahmahta ahi chi'n gen hi.

xxxxxxx

GAMSUNG THUTHANG

Manipur state Assembly election om hunding a naih deuhdeuh toh kiton in, Congress party apan MLA ban ah Congress party sung a ding a mi poimoh bangzah hiam in Congresss a nutsiat nung un, Tadubi Assembly Constituency apan telching a om lel Congress apan MLA Francis Ngajokpa in maban ah Congress tawpsan ding a gen in om nawn hi. Hiai thu ahihleh Maram cetre Ground mun a Francis Ngajokpa leh amah gumtute kimuhkhawm hun a, Francis Ngajokpa gumpawlte'n Congress Party taisan a Party dang min a tuhding a a sawl ziak uh hin kigen hi. Francis Ngajokpa ahihleh 49 (ST) Tadubi Assembly constituency apan telching a om hi a, Congress a ding a mi poimoh mahmah te lak a khat ahihban ah, Minister dinmun tanpha leng leen khangei hin kigen hi. Maram Centre Ground mun a kikhopna ah mipi paikhawm te'n a gendan un, Tadubi Constituency sung a Francis Ngajokpa telching a omding a lunggulh lai leh Congress a nutsiat ngaiding hin gen a, Congress Party Ticket zang a election a tuh teitei leh bel Francis Ngajokpa tung a gupna a piaksa uh zukkik ding uh hin vauna bawl in thutawp pia uhi. Tua meeting hunsung mah in mipi paikhawmten maban election ah 49 (ST) Tadubi A/C apan Congress party min a candidate himhim vote louding uh hin thupuk ua, francis leng telching a omding a lunggulh lai leh Congress party apan a kitawp ding banah, MLA ahihna apan a ki-awngsut ding ahi chi uhi. Francis Ngajokpa in hiai meeting hun uap ding chih himahleh amah worker te'n Congress apan a kitawpma siah kimuhpih louding uh ahihdan a theihman ziak in, Sekmai apan kilehkik in Imphal zuan hin kigen hi. Naga Peoples' Organisation secretary K Daniel Katomai in a gendan in, Congress party kichi singtangmite bawl gentheitu Anti-Tribal hi a, a nasep khempeuh uah singtangmite suksiatna ding ngen tup a nei uh hin gen a, singtangmi makaite'n Congress party boycott a puan ziak un, tutung election ah Congress himhim vote hilou ding a, Tadu AC ah nam 8 om mahleh Maram te tampen ahihna uah Maram te thupukna in gennei mahmah ding hin gen hi.


xxxxxxxxx


Indian Army te'n Line of control kantan a Pakistan taw sawn helpawl te bei a surgical strikes a neihnung ua, PM Modi in mipi mai a thugenna a neih masakna pending in, Lucknow khopi ah Dusshera hunpi zatna ah thugenna nei hi. PM modi in hiai hun a gendan in, mihing hinkhua a ding a melma lianpen tuh helna hi a, gamgi a neihlouh banah suksiat ding thil om peuhmah enlah ahihman in helna kichi mihing melma ahi chi hi. Mihing melma lianpen ahih dungzui in india mipite'n leng tua melma douding i hi uh hia ahihkeileh thuhilhna pelou a thawnkik sak maiding chin mipite chouna bawl hi. PM modi in a thugen madeuh in Union Home minister Rajnath Singh in PM Narendra Modi in gumtak a surgical strike a neih ziak in, khovel pumpi theih ding in India kichi gam hatlou hilou ahihdan chetna pia hin gen hi. Surgical strike toh kisai in Rahul Gandhi in PM Modi in amah minhoih sawm a thugen hin gen a, Arvind Kejriwal in leng kipahpih kawm in, a chetna omte ensak ding in ngetna nei hi. PM Modi in Lucknow khopi a phak toh kiton in, kum dang banglou tak in Ramlila mun ah a paikhawm ut mipi tamtak lutsak a omlou in mi 2000 lel lutsak hi ua, amaute leng Special Protection group (SPG) ten hoihtak a a velchet nung ua a lutsak pat uh hin kigen hi.


xxxxxxxxxx


Maharashtra state sung a Talegaon khota ah pasal naupang kumchinglou khat in numei naupang kum 5 lel a upa khat a pawngsual sawm ziak a mipi kiphinna nasatak om ah, kiphinna in venlam sang a siatlam nawtzaw ding dinmun a om ziak in, Police in zuau thuthang thehzak ahihlouhna ding in mobile internet leh bulk messaging service teng ninih sunbg zat theihlouh ding in khaksak uhi. Tua ki pawngsual sawmna thubuai toh kisai in, Maharashtra government, in ni 15 sung ngei a kumchinglou numei pawngsual sawm pasal tung ah chargesheet bulhkhum hiding in thupuan bawl uh a, thiltung in siatlam a nawt sawm ziak a Police tamsem sawllut a om nung un, tu in buaina leng a dan om deuhta hin gen uhi. numei kum 5 a upa pawngsual sawmtu pasal ahihleh tu in Police in man in FIR gelhlut in om a, a tung ah IPC leh Protection of Children from Sexual Offences Act (POCSO) nuai ah thubuai bulhkhum in om hi.


xxxxxxxxxx


GAMDANG THUTHANG

Myanmar gamsung a Rohingya muslim te tenna bial Rakhine state ah Myanmar leh Bangladesh gamgi zul a Myanmar Police te outpost ah meltheihlouh Rohingya Muslim hidia gintak te'n Police 4 velding temta zang a a thah nung un, Myanmar solkal in sepaih sawllut in tualthattute zonna a neihlel ah mi 24 in sihna tuakta uh hin kigen hi. Bangladesh toh gamgi zul a om Rakhine state sung a Maungdaw kichihna mun ah Myanmar Army leh Police in Joint operation a neihna uah mi 7 kaplup hi ua, a vek un Rohingya Muslim te ngen hi uh hin kigen hi. Pathianni a Police te outpost buluh ahihnung Myanmar solkal in nitak dak 7 apan zinglam dak 6 kikal sung Maungdaw leh khopi dang thum ah state of Emergency puang in curfew puang uh hin kigen hi. Rohingya Muslim te ahihleh tulel in Myanmar gamsung ah 1.3 million vel om zou ding a gen hi ua, Bangladesh apan kipan leh Bengali hidan a ngaihtuahna om ziak in Myanmar solkal in gam mi hihna nasan pe utlou in gamdang apan guklut uh hidan in tuamkoih hi. Myanmar gamsung a kumpi vaihawmna apan Democracy deih a kiphinna 2011 apan hong kipat phet in Myanmar gamsung a Bhudhism sahkhua zuite leh Rohingya Muslim kal ah kingeihlouhna piang in tualgal tanpha piang a, huai hun in Bhuddhist siampu thangpai te'n Rohingya Muslim te 280 that in midang 1,40,000 valte a tenna inn ua om theilou ding in hawlkhia uhi. Buddhist-Muslim namkal buaina ziakin Burma Rakhine state akipan kum 2 sung in Rohingya Muslim 100,000 velin gamdang zuan uh hin thusuak khenkhat in gen ua, tutung a thiltung toh kisai leng Human rights watch group pawl in hoihtak a enzui lel uh hin kigen hi. Rohingya Muslim-te'n Burma gamsung a pawtsan theihna ding un Myanmar (Burma) sepaihte'n leng vauna toh thuah in sawlkhia uh a, Myanmar naval boat tuamtuam zang in Muslim minautangte puakkhiak himahle uh mihing zuak a kipei (human trafficker) te kiang ah piakkhiak in om zel uh hi'n leng taklang hi. Rakhine state spokesman Win Myaing in Myanmar sepaihte kigolhna tungtang thuzuau hi'n gen a, Muslim minautangte zuan a naval boat taite'n ngabengmite hutkhiak sawm hidan in gen hi. Myanmar ah Buddhist milip 50 million vel om in Rohingya Muslim 1.3 million khawsa mahle uh, Myanmar solkal in Muslim-te' Myanmar gammi hihna pelou a, tua ziakin kumteng in Rohingya Muslim tamtak hawlkhiak in om uhi.

xxxxxxxxxx


South Korea apan Mobile phone bawltu company minthang mahmah Samsung in mobile phone series tuamtuam a bawlkhiakte lak uah Samsung Galaxy Note 7 kichi lenna sung a puakzak thei leh tui a lut chia thil lamdangpi a piankhiak sak theih ziak in, Samsung Company in Galaxy note 7 kichi himhim zuakkhiak hinawnlou ding chin thusuah bawl uhi. Samsung thusuak in a taklat dan in, Samsung Galaxy note 7 ana leikha leh zanglel te'n leng kintak a a phone uh switch off ngal ding in theisak ua, Samsung Samsung Galaxy note 7 hawmkhiaksa kaihkhawm nawnna ding in US dollar 17 billion val luikhiak khit a om hin leng taklang hi. Samsung thusuak in a taklat zelna ah khovel pumpi a Samsung thil bawlkhiak hawmzak tute'n Samsung Galaxy note 7 hawmkhiakna lam khawlsan ding in leng theisak ua, series dang toh khektuah na leng khawlphot ding in zasak uhi. Samsung Galaxy note 7 original leh Original lou khektuahna toh kisai leng khawlsan hita hin Samsung in gen ua, kivenbitna dia lampi hoihpen tuh switch on nawnlouh himhim ding hin gen uhi. Samsung Galaxy note 7 ahihleh lenna sung a tuangkha passenger te'n a puak hun uah meikhu omsak thei hin chetna bangzah veihiam omta a, khakhat paita sung in leng US apan lengkhia lenna a tuang passenger khat in a puaklai puankawm a a koih himahleh meikhu nasatak piangsak in, Singapore apan india zuan a leeng lenna khat a tuang pasal khat in leng Samsung Galaxy note 7 a puak hun in meikhu tamtak piangsak in meikuang omsak man dektak a, huai nung lenna a tuang dingte'n lenna sung ah Samsung Galaxy note 7 a puak ding uh phalsak in om nawnlou uhi.


xxxxxxxxxx


South Africa gamsung a khopi lianpen Johannesburg ah University minthang mahmah khat ah student tamtak in University a kai man a thawn hihsak ding deih a kiphinna tuamtuam a pat ziak un, police leh student te kal ah kinawk tuahna nasatak piang hin kigen hi. Hiai buaina ahihleh kalkhat val paita apan kipan hi a, tua buaina ziak a Johannesburg thuneitute'n Witwatersrand University a khaksak uh honkik sawm a student tamtak in kiphinna a pat ziak un, tunin leng kiphinna nasatak om in, huai ah Police in kiphinna nei student te hawldalhna ding in, tear gas leh rubber bullet tanpha zat khum uh a, kiphinna neite lak ah makai poimoh nih hidan a gen a omte leng Police in man uh hin kigen hi. Kumlui in leng tua University a kai student tamtak in President Jacob Zuma kiang ah University fee khansak thu ah lungkim louh thu gen in, sum chengkhat leng la lou ding in ngetna ana nei khinta uhi.


xxxxxxxxxx