You are here: HomeRSS FeedsLatest News

Angel's Vision News | September 1, 2016

Thursday, 01 September 2016 19:52

CCpur District Hospital Management Authority in Lamka Damdawi Inn huangsung a ATM Booth om theih ding dan hun sawtpek apan a ngaihtuah uh suk tangtun a omta in, tu in UBI/CCpur Branch in ATM Booth ding bawl lel a, tukha sung a zohsiang hiding hi'n kigen hi.


Thutut kingah dan in, Lamka Damdawi Inn huangsung ah ATM booth omlouh ziak in damlou enkoltute'n zan kal hiam ahihkei leh zingkal baihtak a sum zatna ding poimohna thut a neih hun chiang un buai thei mahmah ua, Damdawi Inn apan ATM Booth naipen Nehru Marg Junction a om ahihman in paisuk-paitouhna ah hun tamtak a lut sek banah deih bang in kihong ginalou hi. Hiai toh kisai Hospital Management Authority te'n ngai poimoh mahmah in, damdawi inn huangsung a ATM booth om theihna ding in bank branch tuamtuamte a houpih nung un, UBI CCPur Branch in lemsakpihna pia in, kal masa in nasep pat in om a, tu kha sung a zohsiang man a lamet thu uh gen uhi. ATM Booth ahihleh District Hospital Eastern Block ground floor mal lampang kil pen ah koih hiding a, hiai in damlou enkoltute nna dawn zangkhai mahmah ding hi'n kigen hi.

 

XXXXXXXX

 

"Tuailai, thutak leh diktatna a kibulphuh thakna" chih thupi zang a pawl kibawl Tuailai 1434 Pro te'n hongtung ding September 9 apan September 11, 2016 sung in EBC Gospel Centenary Hall, New Lamka ah Mega Workshop Programme zang ding ua, misiam tuamtuam te'n diktatna a kibulphuh thakna ding in thupi tuamtuam zang in sinsakna pe ding uhi. Mega Workshop Programme ahihleh September 9 nitak dak 6:00 in kipan ding a, hiai nitak pen lasak khawmna leh thumkhawmna hun a zat ahih ding banah Tuailai 1434 Pro saina a Spot Painting Competition, Laphuah kidemna leh Article gelh kidemna a kipahmante hawmkhiakna om ding hi.

 

Hiai hun zatna ahihleh Rev. V. Nenglian, Divisional Supdt., Lamka South Division in thumna a hongkhia in, thumkhawmna 4vei neih hiding hi. Hum masa ah EBC Central Choir makaih in lasak khawmna leh thumkhawmna om in, hun 2na a thumkhawmna leh lasak khawmna PCI Choir makaih in om nawn ding a, hun 3na a lasak khawmna leh thumkhawmna CBA Choir-te makaih a aom ding banah GBC choir-te makaih in lasak khawmna leh thumkhawmna nanungpen om ding hi. Programme hunsung in Rev. K. Kamchinkhup, Divisional Supdt., Imphal in thugenna hun zang in, Youth Co-ordinator, EBC makaih in kipahmante hawmkhiakna om ding hi. Mega Workshop ahihleh Session 3 a kikhen in, Session masapen September 10, 2016 zinglam dak 10:00 in kipan ding a, Co-host in Thangbiaklian Hangzou pang in, Upa B. Langkham, (Retd) Director, EHA in NGO toh kisai paidan dik leh pilvanna dingte sinsak ding hi. Session 2na sunnung dak 1:30 in om ding a, huai ah Co-Host in Thangzamuan Tombing pang in, Thienlaljoy Gangte, SDO/CCPur in Government Scheme tuamtuam mipite hamphatpih theih dingte toh kisai sinsak ding hi. Session 3na pen ahihleh September 11, 2016 (Pathianni) sunnung dak 1:30 in om nawn ding a, huai ah Co-Host in T. Lianchinpau pang in Upa M. Thanglianmang, DSP/CBI in Dan leh Dun toh kisai mipi nautangte theih dia poimoh tuamtuam omte sinsak in Mega Workshop zou ding uhi. Hiai Mega Workshop pen saptuam bing a sai hilou ahihman in, diktatna a kilamthakna lunggulh a neu a lian kuapeuh tel theih ding hi'n thutut kingah hi.

 

XXXXXXXX

 

Nationa Food Security Act toh kisai in District Supply Officer, CCpur in thusuah bawl in, NFSA nuai a beneficiary taktak hih theihna ding in Head of Family te'n lai poimoh tuamtuam pelut ding in theihsakna bawl hi. Lai poimoh tuamtuam piaklut dingte ahihleh Aadhar Card Xerox copy, income ccertificate, Domicile Certificate, Voter I-Card, Mobile Numer leh Bank Account Number hi a, beneficiary ana hikhinsa leh tua a thak a apply te'n leng a piaklut vek uh ngai ding a, November khasung tan a pelut teitei ding in M. Ginzasuan, District Supply Officer, CCPur in theihsakna bawl hi.

 

XXXXXXXX

 

Young vaiphei Association (YVA) General Headquarters in damlou mangbang a om panpih ngaite a ding in Ambulance hoihtak leikhia in, tu in Guwahati ah om lel a, buaina dang a om kei leh zingchiang in Lamka hong tung ding hi. Thutut kingah dan in, YVA GHQ in damlouhna ziak a haksatna tuak mi tuamtuamte zat ding Ambulance neih theih ding dan ngaihtuah in tukum bul in Ambulance Project Board bawlkhia ua, amau te'n Vaiphei namsung a mi phatuam ngai mimal leh pawl tuamtuam te'n sum a thoh khawmte uh zang in Ashok Leyland Company in a bawl leikhia uhi. Company in Guwahati tan tut ua, zan in Board Chairman Lalkithang makaih in Board Member Dr. Seanboi leh Thanglemlal te'n zan in Guwahati ah va la in, tuni'n hong kipankhia ua, buaina dang bangmah a om kei leh zingchiang in Lamka hong tung ding a, hun lemtang masapen ah Pathian kiang ah latna nei hiding hi'n thutut kingah hi.

 

XXXXXXXX

 

Lamka khopi a dia mineral water pekhe masapen pawl a kigen Siktu sensakna tungtawn a Vengnuam United Soccer in The 1st Siktui Vengnuam League kichi PT Sports Complex, New Lamka ah uh lamzangtak a paitou zel in, zan tan in match 28 zoh a omta in, FC Oligen te'n khatna luah lel uhi. Hiai tournament ahihleh apaisa August 17, 2016 akipan hi a, Vengnuam United Soccer (VENUS) in Vengnuam in a inntuan V. Munhoih, Kanaan Veng, Vengnuam South leh Khominthang huamsung a om football kimawlmite hanthawnna leh dopsangna ding tupna a asai uh hi a, team 12 kihel in, September 22, 2016 in zousiang ding uhi. Hiai tournament ah team 12 kihelte khatvei chiat kimawl suak in, point mu tampen in champion hihna la ding ua, champion team in kipahman in Rs. 5,000 sang in goal khum tampen (Top Scorer) leh Best Goalkeeper-te kiang ah Rs. 500 tuak piak hiding uhi. Zan tan in team tamzawte 4vei chiat kimawl suakta in, FC Oligen te'n match 5 ah point 15 laisuah in khatna ah omlel ua, Pethuel FC te'n match 5 ah point 12 laisuah in 2na a luah banuah V. Kaizanang Memorial Football team te'n match 4 ah point 9 laisuah in 3na luah lel uhi. Eimi United Soccer in leh Khimkhem FC te'n point 7 tuak laisuah in 4na leh 5na ah om in, Kanaan YC leh Khanglai te'n point 6 tuak laisuah in 6na leh 7na ah om lel ua, VASA leh Khominthang YC te'n point 4 tuak laisuah in 8na leh 9na a, a om banuah Munhoih FC in point 3 toh 10na ah om lel a, Labour FC leh Milaar Blue FC te'n point 1 tuak laisuah in a tophah ah omlel uhi. Hiai tournament ah match 66 om ding a, zan tan in goal 89 khumkhiak in omta hi.


XXXXXXXX

 

GAMSUNG THUTHANG

 

Delhi solkal sung a Women and Child development minister in numei nih toh a lupkhawm lai lemlak uh video a kila thehzak ahihnung in, AAP chief Arvind Kejriwal in a dinmun apan paihkhia hin kigen hi. Paihkhiak a om minister ahihleh Sandeep kumar hi a, Kejriwal Cabinet sung a ding a Minister naupang pen ahihban ah, zan nitak dak 8 vel in Delhi Chief Minister arvind kejriwal tenna inn ah lai a kituun CD leh lemlak khenkhat piak in om a, tua CD ah a Minister te lak a khat Sandeep Kumar in numei nih a lupkhawm pih lai muhtheih ding in om hi. Hiai thu Kejriwal in ngaikhawk mahmah in Kejriwal tenna inn Flagstaff Road bungalow ah a Minister pihte toh houlim khawm in, minister for Women and Child Development, Language and SC & ST Sandeep Kumar taang a kua guan ding hiam chih ngaihtuahna nei in, Delhi Cabinet Minister ahihna apan leng tawpsak a om hin gen hi. Sandeep Kumar ahihleh kumkhat paita sung a ding a AAP in Minister thum a paihkhiakna uh hita a, kumlui in mi khenkhat kiang a thil ahihsak man dia sum ngentu Food Minister asim ahmed ahihna apan paihkhiak hi a, a nung in Law Minister Jitender Tomar in a college degree diklou leh bawltawm zang ahihdan theihkhiak a om ziak amah leng adinmun apan paihkhiak in om hi.

 

xxxxxxxxxx

 

Maharashtra state solkal in thupuan thak a bawlna uah numei sualluihtu Rapist peuhmah in kisik a a hindan luite uh paihkhe ding chia kichiamna a neih chiang un khahkhiak in om zel mahle uh tunung in, Maharashtra state ah Rapist peuhmah parole a khahkhiak hinawn lou ding uh hin kigen hi. Maharashtra state solkal in a gendan in Jail apan numei pawngsualtute khahkhiak a om chiang un a hindan ngeina mah uh a paipih nawn ziak un numei tamtak a ding in bithuai lou a, tunung in Rapist te kia hilou in tualthattute, naupang zuaksawn a kipeite leh khamtheih a sumdawngte leng a mawk a khahkhiak ahihlouhna ding un Dan thak bawlkhiak hiding chi uhi,. Hiai thupuan ahihleh zan zek a Mumbai khopi sung a lawyer Pallavi Purkayastha thattu suangkulh apan khahkhiak ahihnung a, a omna theihlouh a a kibuk mang ziak a tualthattute leh numei pawngsualtute a mawk a khahkhiak hinawn lou ding ua Dan thak bawl a om hi acondition neitak a khahkhiak a om zenzen om uh leng nidang in parole a khahkhiak ahih hunsung uh ni 90 himahleh ni 46 sunglel khahkhiak hita ding hin Maharashtra state solkal thusuak in gen hi. Maharashtra state ah ahihleh Jail taang hunkhop khahkhiak ahihnung un a omna uh theihlouh a kibumang hunkhop omta ua, 2014 kum in leng tualthahna thubuai ziak in tualthattu Sajjad Mughal kichi damsung suangkulh tangdin thutankhum himahleh a nu damlouh ziak in ni 90 sung hehpihna (Parole) dan in tukum March in khahkhiak himahleh a tuna gam theihlouh in om hi.

 

xxxxxxx

 

Mi tamtak te'n West Bengal min a genna ding ua Bengal a chih uh toh khekkhiakna ding in West Bengal state solkal in Bangla chihding ahi chi mahle uh zan in West Bengal state assembly ah hiai thu puaklut himahleh opposition party tuamtuam Left, Congress leh BJP in a deihlouh ziak in assembly house apan pawtkhia uhi. Bengal ahihleh English te hunlai a English te gen hi a, Bengali pau ah Bangla chia khek ding chih thu om toh kisai in, tu in phualpi solkal kiang ah proposal piaklut in omta a, phualpi solkal in lemsakpihna a piak hun hun in West Bangla chih hita ding hi. State assembly house a puaklut ahihhun a opposition party te'n a pawtsan nung un, Chief Minister Mamata Banerjee in Bengal min Bangla a khekding deihloute khangthu in leng ngaidam theilou ding hin gen a, Left pawl in a hunlai un hiai thu khek ana sawm ngei mahle uh tutung a Trinamool Congress in khek a sawm hun a bangziak a deihlou uh ahia chin dotna bawl hi. West Bengal ah ahihleh tulel in mi tamtak in West Bengal chih zanglou in Bengali pau in "Paschim Banga" chih zang uh a, Atal Behari Vajpayee hunlai in state minkhek sawm himahleh deihlou a, himahleh Calcutta pen Kolkata chia khek in om hi.

 

xxxxxxxxx

 

India gamsung mun tuamtuam a numei tamtak khem a kizuakna mun a piluttu nupa khat zan in Police in mankhia uhi. Police thusuak in a gendan in, mat a om nupate ahihleh Delhi a teeng hi ua, amau numei tamtak nungak tuungpan tel in Delhi khopi ah sepna hoihtak piakding chin khem uh a, a nung in kizuak sak zel uh chi uhi. Nupa te'n ahihleh kum 20 paita sung a tuabang a thilchin a neih sung un numei 5000 vel kizuakna mun a pilut uh hin leng Police thusuak in gen hi. Mat a om nupate ahihleh kum 50 a upa Afaq Hussain leh kum 45 a upa Saira Begum hi uh a, amau Delhi khopi sung a kizuakte omna mun GB area a kizuakna toh kisai a Kingpin hin leng kigen hi. Mat a om nung un Police in kizuakna munpi thum enkol uh ahihdan leng theikhia uh a, minihte mat ahihnung un amau panpihtu midang 5 leng matkhiak theih in om uhi.

 

Tua nupa te'n ahihleh Nepal, Bengal, Jharkhand leh Andhra Pradesh apan nungak tamtak kaikhawm uh a, sepna piakding chih a hih ziak in numei tamtak in tua nupate kiang zuan uh a, himahleh nupate'n innnuai a om kokhuk toh kibang ah koih in ann leng ginatak in pelou uh a, kizuak a utma teng uh khahkhiak a omlouh ziak un kizuakna mun ah numei tamtak koltang kha uhi,. Numei kizuakna mun a a pilutte uh ahihleh a tangpi in dangka 50,000 apan Lakh nih kikal mansak uh hidan a gen hi a, nupate ahihleh 1999 kum a kizuakna inn khat apan kimu kha a kiteeng hidan in leng kigen hi.

xxxxxxxxxxxx

GAMDANG THUTHANG

Africa continent sung a om Gabon ah zan nitak in President dinmun lending kitelna om ah Ali bongo in Jean ping zou hidan a gen himahleh, Jean Ping in leng a mah vualzou hidan a a gen ziak in, Jean ping gumtute leh Ali Bongo gumtute kal ah kisattuahna om in, Parliament building tanpha hal in om hi. Thiltunna mun ahihleh Gabon capital Libreville hi a, Jean ping in amah vote tute vote khenkhat gukmang a om ziak a Ali Bongo chingkha hidan a a gen ziak in, mipi sousang in kisattuahna om a, vaihawmna innpi Parliament building tanpha halsiat ahihban ah, tuzingkal tan a leng buaina in venlam nawtlou a kitual sualna a om lai ziak in tuzing in mi 2 in sihna tuak uhi. Gabon's opposition leader Jean Ping in tuni a a gendan in, President guard leh Police te'n a Party headquarter zan nitak zan khovak a a buluh ziak in mipi toh kal ah kinawktuahna om in, mi 2 si uh hin gen a, Jean ping in Gabon gamsung a buaina toh kisai a mawk a veng ding dinmun a omlouh ziak in gam tuamtuam kiang ah Gabon buaina a kigolh a thudik a vaihawmna neihsak ding in ngetna nei hi.

 

Gabon kitelna result ahihleh zan nitaklam a puankhiak a om hi a, puankhiak ahihhun ah Ali Bongo in a kikhingpi Jean Ping tung ah vote tawm chik a tamzaw a vualzou hin gen uh a, kallui kiginni a vote kikhe teng lak ah Ali Bongo in 49.80 percent mu in Jean ping in 48.23 percent mu a telching in om hi. Himahleh tua vote result puankhiak a om phet in Jean Ping in a china ding vote te tamtak gukmang a om hidan a a gen ziak in, mipi thangpai te'n Parliament building tanpha hal uh hin kigen hi. Gabon President dinmun ahihleh tutung a telching thak a om Bongo pianna pa omar in kum 40 sung a letnung in, 2009 kum in a tapa Bongo telching hi a, huai hun in leng result puankhiak a om diklou hidan a gen in mipi sousangna nasatak om a, mi hunkhop in sihna a tuahban uah building tamtak luh a om in, Gabon gamsung a sumsinna munpi Port gentil a French Embassy leng hal in ana om ngeita hi.

 

xxxxxxxxxxxxx

 

Yemen gamsung buaina toh kisai a sihna tuakzah United nations in a taklatna uah tuni tan in Yemen gamsung buaina ziak in mi 10,000 in sihna tuakta uh hin gen hi. UN thusuak in a gendan in, kha 18 paita a Yemen gamsung a Houthi leh Hadi makaih solkal te kal a buaina om nung in, zan zek in mi 6000 vel si uh hidan a suhkhiak himahleh tuasang a tamzaw in, tuni tan in mi 10,000 val sita uh a, sihna tuakzah leng punbeh dia gintak in om chi hi. UN humanitarian co ordinator Jamie McGoldrick in a genna ah, mi tamtak Yemen buaina ziak a sihna tuakte official tak a vuilouh a om ziak un sihna tuakteng 10,000 sang a tamzaw thei hin gen a, official khenkhat leh Aid group khenkhat in zan zek a Yemen buaina ziak a sihna tuakzah mi 6500 hidan a a gente uh sang a tamzaw tham ahi chi hi. Yemen gamsung buaina ziak in Yemen gamsung apan mi Lakh 2 vel in gam tuamtuam ah galtai theihna phalna ngen uh a, milip Lakh 9 vel ding te Yemen gamsung mun tuamtuam ah galtai in innlum zuan ngam nailou ua, Yemen gamsung a teeng mihing million 26 om lak ah million 14 vel in nekding ginatak neilou in omlel uhi.

 

xxxxxxxxxx

 

Turkey gamsung a sepaih thahatna toh vaihawm sawmna a lohsap nung in zan nitak in Turkey sepaihte'n Coup sawmna a kigolh hiding a gintak Police chief lui mankhia in thudotna neilel uhi. Turkey state-run Anadolu news agency in a gendan in, mat a om Police chief lui ahihleh Huseyin Capkin hi a, Izmir khopi a mat a om hidan in gen hi. Turkey Coup a lohsap nung in tuni tan in, Istanbul Governor Huseyin Avni Mutlu tel in Governor 8 mat in omta uh a, Turkey solkal kalh a propaganda theh chih ziak in Journalist 35 leng mat in omta uhi. Turkey coup ahihleh 1960 apan 5 vei Coup sawm a omna hita dan a gen himahleh sepaih heutu khenkhat in Turkey President paihkhiak sawm in naktak in kipei mahle uh a gel kholh sa bang ua thil a pailouh ziak in, Turkey President sepaih thahatna toh vaihawm khum zoulou in lohsam uhi.

 

Turkey gamsung ah ahihleh nidang in leng Coup bangzah veihiam ana omkhinta a, May 27, 1960 in Sepaih heutute'n Turkey President, PM leh midang hunkhop man in a tung uah zekhemtu hidan a ngoh in thuneihna la ua, March 12, 1971 in Turkey in sum lam buaina nasatak a tuah hun lemtang a la in Military te kigolh in thuneihna la uh a, huainung September 12, 1980 in Turkey gamsung a party nih Left leh Right wing pawlte kal a buaina om ziak in, sepaihte'n thagum in vaihawmna la ua, huaihun in mi tamtak mat a om in, tamtak khailup in leng om uhi. February 28, 1997 kum in Turkey gamsung a Welfare Party kichi dinkhiak a om ah, sepaihte'n tua party theihpih ding a mipi solkal vaihawm tute a theihsak nung un, PM in bangmah ngaihtuahna mumal neithei lou chih ziak a a dinmun apan a kitawp ziak in sepaih te'n vaihawmna la uh a, tutung in leng Turkey solkal in a vaihawmna uh paw zoulou hidan a gen in sepaih heutu khenkhat kipawl khawm in coup sawm mahle uh lohsam uhi.

 

xxxxxxxxxxx

 

Zan in Turkey solkal leh Kurdish thautawi pawlte'n ceasefire nei thei khongkhong ta uh chihthu puanzak himahleh tuni in turkey solkal in turkey kichi helpawlte nuai a kun ngeilou hidan a gen in, thuthang tuamtuam omte thuzuau ahi chi hi. Hiai thu ahihleh US solkal in turkey Military leh Kurdish thautawi pawlte kal ah ceasefire om hidan a a gen nung a, Turkey President Erdogan in nialna a bawl hi a, Kurdish thautawi pawlte'n Turkey solkal kiang ah kilemna om theihna ding in ceasefire puang ding in ngen mahle uh Turkey solkal utlou chi hi. Turkey solkal in ISIL leh Kurdish thautawi pawlte hihchimit hiding chia thupuan a bawl toh kisai in US in Turkey solkal kiang ah kUrdish thautawi pawlte khoih sang in ISIL te mitsuan a ISIL te beihna toh kisai focus a nei zawding in theisak a, Kurdistan Worker's Party (PKK) te khoih na in gah suanglou ding chi hi.

 

xxxxxxx