You are here: HomeRSS FeedsLatest News

Angel's Vision News | August 01, 2016

Thursday, 04 August 2016 10:44

Tuni August 1 pen Autonomous District Council Day ahih toh kiton in Member of District Council te'n kumdang banglou tak in, nopbawlna hun a zang mailou in, District Hospital Morgue ah Salpha sungkuante toh hun zang in, sunnung lam in Bungmual khosak a District Council gam ah sungnou suanna nei uhi.

District Hospital Morgue a programme zatna ahihleh sunma dak 11:00 in kipan a, hiai hun ah numei pawlte banah Salpha sungkuante kimtak a kihel in Lal Hossan, Vice Chairman, ADC/CCpur in hun zatna makaih a, Saikot MDC Hlira Hmar in thumna in hun zatna lankhia in Langkhanpau Guite, Chairman, ADC/CCPur in Autonomous District Council Day zatna toh kisai pulakna nei hi. Aman a thugenna ah, August 1 pen Autonomous District Council Day dia bikhiah a om in, 1973 kum apan kum teng in a thupi theipen in zat hisek mahleh tukum in bel gam leh leitang a dia hinna ana pia Tribal Martyr-te suunna hun a zat a, a sungkuante toh hun zatkhop ding chi a thupuk om dungzui a tuni a Morgue a hiai hun zat a om ahih dan gen hi. CCpur District ah elected member te'n term 3 sung vaihawmna ana let nung un 6th Schedule deihna ziak in 1984 apan 6th Schedule om masiah election om thei nawnlou dia thupukna lak in om hi. Kum 25 nung in Manipur Government in Amendment bawl in, bangmah omlouh sang a thil khat a om pen hoihzaw sakna ziak in 2010 in election neih a om nawn in, heutu masate suulnung zui in tu in a term 2na paitou lel a, i gam in 6th Schedule a ngah theihna dia theih tawp suah a panlakna paitou lel hi'n gen hi. Bangteng ngen ngen mahle hang i gam leh leitang kepbitna dia 6th Schedule mah poimoh ahih man in, UPF leh KNO-te theihpihna toh Centre Government in 2014 kum in memorandum piaklut a om in, hiai toh kisai in New Delhi ah leng bangzah vei hiam phak hita a, dharna tanpha leng neih himahleh daltu a nasat luat ziak a hiai tan kitung pan hi'n gen hi. Manipur Cabinet in Bill 3 a pass te'n District Council thuneihna nasatak a sukha ahih man in District Council Member te'n leng theih tawp suah in pan ana la in maban ah leng panla tou den ding uh ahih dan gen hi. Hiai toh kisai in hinna manpha tak ana pia tribal martyr te District Council in zahna liantak pia in suun thu puang hi. Programme hunsung in Muallum MDC Grace Zamnu, EM/ADCC in thugenna saulou nei in, numeite dinmun niamchik a aom lai a, gam leh leitang thu gen thei dia numei hiai zah om ahih dan a muh in kipak petmah in, a panlakna uh thupi sa mahmah hi'n gen hi. Tuaban ah, Sangaikot MDC Pumtulthang leh Khousabung MDC Seilenmang te'n leng thugenna hun zang in, a tuam in salphate puandum in tuam ua, Grace Zamnu, EM/ADCC in pak piakna makaih in, MDC te'n salphate puandum a tuam in, suunna hun zat in om a, Langkhanpau Guite, Chairman, ADCC in salpha sungkuante a ding in thumsak hi. Sunnung dak 1:30 in District Council Member te'n Bungmual khosak a Autonomous District Council Complex ah hun saulou zang in, Chairman, ADCC in thil om dan pulakna saulou nei a, member leh District Council Staff te'n singnou tuamtuam suan uhi.

XXXXXXXXX

YPA in singthouna mah pi-bawl ding chih thupi a nei in tuzingkal in YPA GHQ leh YPA New Lamka Block-te kithuah in New Lamka a om Damkam Bazar huamsung lak hahsiang in social work nei uhi. Thutut kingah dan in, Damkam Bazar huamsung a kil khat ah kum bangzah hiam paita apan niin paihkhawmna dia kizang in, hiai niin paihna mun pen mipi a dia a damtheih huailouh banah tulai a JE natna toh kisai a thoukangte omkhawmna munpi suak theih ahih man in, YPA GHQ makaih in YPA New Lamka Block makai te'n poimoh ngaih mahmah in tuzingkal in social work nei ua, mihing tha a hih zoh vual ding ahihlouh man in Mualveng a om Pa Dongpi in a JCB zangsak in, hiai kiim a niin om teng teng khuatsiang vek hi a, District Council te'n niin bua gari (tipper) zang in niin teng puak khiak vek in om hi. Zingchiang in CCPur College leh Town Hall kiim lak banah Police Station khang a zun buk kiim lak hahsiang hinawn ding a, buaina dang bangmah a om kei leh khopi sung mun tuamtuam leng hahsiang hiding hi'n thutut kingah hi. Hiai toh kisai in YPA GHQ President Khailianthang Tonsing in JCB phaltak a zangsak Pa Dongpi tung ah kipahthu a gen banah Niin Bua Gari zangsak Autononous District Council te tung ah leng kipahthu gen in, kuapeuh in singthouna mah ngai poimoh a, hiai mun pen niin paihkhawmna dia kuaman ana zang nawnlou ding in ngetna bawl hi. Tuaban ah, Damkam Bazar a Pumkhotuan Meat Mart neitu B. Kaplian in siangthouna leh damtheihna poimoh ngaih a YPA GHQ leh YPA New Lamka Block te tung ah kipak mahmah uh ahih dan Angel's Vision News tungtawn in puang uhi.

XXXXXXXXX

Vety & Animal Husbandary a Director Dr. N. Rajendro Singh leh a team te'n JE outbreak toh kisai in tuni'n Lamka hong pha in, khopi sung mun tuamtuam a phak nung un, CMO Office Chamber in Press/Media-te kimuhpih uhi. Dr. N. Rajendro Singh, Director, Vety & Animal Husbandary ahihleh Dr. Ng. Ibotombi, Principal, Disease Investigator,Vety & AH leh Dr. Ch. Jekentra Singh, Vety Officer, State Laboratory te'n hon zui ua, amau zingkal dak 7:30 in Lamka hong tung in, Gouchinkhup Veng, Bungmual leh Mualkoi a phak nung un, Director in Minister toh meeting poimoh tak a neih ziak in Imphal ah kiksuk ngal hi. Dr. Ng. Ibotombi in a gendan in, JE natna kichi huihkhua tungtawn a kilohsawn theih natna ahihlouh banah mihing leh mihing leng kilohsawn theilou ahih man in mawk patauh ding hilou ahih dan gen a, huangvulh gantate hiai natna suhattu (amplifier) a pang lel uh ahihman in kikep siangthou poimoh mahmah hi'n gen hi. JE natna kichi pen mihing a ding in sihtheihna khop tuntu natna himahleh ganhingte lak ah bel huchilou in, a veite leng a taksa uah a kilatlouh banah poi thamlou ahihman in, tuni tan JE natna toh kisai a gan a ding vaccine bawlkhiak hinailou hi'n gen hi. Hiai natna apan kivenna ding in vok vul te'n a vok buk uh hoihtak a akep siangthou ua, thoukang om theihna ding mun teng hahsiang a, thoukang kikeihsaklouh pen a damdawi hoihpen hi'n gen hi.

XXXXXXXXX

Vengnuam United Soccer (VENUS) in khosung hoihna ding gelna in phatuamngaih suah in tuni'n EBCC Vengnuam apan PT Sports Complex kikal College Road ah suanghum sung in social work nei uhi. VENUS kichi ahihleh lawmta kipawl khawm te'n 1996 kum a aphutkhiak uh hi a, kum bangzah hiam defunct dan a aom nung in puahthak a om nawn in, tu in member 20 val om lel in, kimawlna lam a sailouh kal un vengsung hoihna ding in nna tuamtuam sem in panla uhi. VENUS in phatuamngahna nna a sep uh bialtu MDC M. Gouzamang Guite, EM/ADCC in tuni sunnung lam in va enkhia in, a panlakna uh thupi sa mahmah ahih dan Press/Media-te mai ah gen in, maban a athilhihna khempeuh uah nungthuaptou zel ding ahih dan gen hi. Tuaban ah, kuapeuh in siangthouna mah ngai poimoh a, mahni inn-kiim banah nullahte i hahsiang kei leh natna chi tuamtuam in hon boh theih ahihman in, i inn-kiim leh kiang banah nek-le-tak kia hilou a, khosung-vengsung siangthouna kuapeuh in ngai poimoh mahmah ding in ngetna bawl hi. THutut kingah dan in, tuni a VENUS in College Road a lampi kuakna munte a suanghum a sungna uah Tractor 2 zang in Lanva Lui ah balu single (suanghum) la in Vengnuam Biakinn apan PR Sports Complex kikal ah suanghum gari dim 13 sung ua, hiai nasepna a sen-le-pan om teng bialtu MDC in sengsak vek a, zingchiang in Sahei Road ah sem nawn ding uhi.

XXXXXXXXX

CCpur Dist. a Japanese Encephalitis (JE) leh hitang-khawsik natna outbreak nasatak a om toh kisai in thil omdan enkhe ding in zan in Health Commissioner makaih in Medical team te'n Lamka Damdawi Inn hong pha uhi. Medical Team te ahihleh Praveen Kumar Singh @ P. K. Singh, IAS, Commissioner (Health & FW) Govt. of Manipur in hong pha in, Dr. O Ibomcha Singh, Director, Health Services; Dr. Sashee Kumar Mangang, Jt. Director, State Epidemiologist ; Dr. K. Rajo Singh, Dir.(State Family Welfare Service) leh Dr. L. Gojendra Singh, State Malaria Officer te'n honzui ua, Dist. hospital a MS Conference Hall ah Dist. Medical Deptt-te kimuhpih in, panlak ding dan kikum uhi. Hiai meeting ah Lunminthang Haokip, IAS DC/CCpur banah Dr. Thangchinkhup Guite, CMO/CCpur; Dr. J. Son Goukham Samte, Med. Supdt.; Dr. Vumchinpau Tonsing, DFWO; Dr. Liankhojam, Malaria Officer; Seiboi Mate, DPM./NRHM leh Angelyn Vaiphei, DM/IDSP te tel uhi. Health Commissioner in agendan in, outbreak hun in JE dalna damdawi kapchi hilou in phatuamlou ding chi a, theihlouh a veisa kikap kha bang hileh damtheihna dia hatsatna tunzaw ding hi'n gen hi. Govt. of India norms dungzui in vaccination naupang leh piching kaptheih dingin kikhen a, tulel a damdawi kizang ahihleh rountine immunization ahihban ah light vaccine hi a, kum 15 nuailam-te kapna ding chi a, piching adi'n bel gentheih hilou chi a, damdawi kikap sangin fogging lam pibawl poimawh zaw chi a, huai tawh kiton machine 3 piakbeh ding hi'n gen hi. JE dalna kikap in kha 1 phakma 27 percent veng thei a, kha 1 nung in bel 85 percent veng thei hi'n gen hi. Tuaban ah, tulel a JE dalna damdawi hong peite routine immunization ahih banah naupang kum 15 nuailamte a dia kinawl ahih man in kum 15 tunglamte a ding in huchipi a phatuamlou ding ahih dan gen hi. JE apan kivenna hoihpen ahihleh thoukang kikeihsaklouh ahihman in, vaccine kikap sang in fogging in mi tamtak humbit zo ding ahihman in, Fogging lam hahbawl hiding in gen a, tunung sawtlou in CCPur District a ding Fogging machine 3 piakbeh ahih ding banah damdawi kiningching a om hunhun chiang a khopi sung teng kap suak vek hiding in gen hi. Kum teng in CCPur District mipi'n theihkholh louh in natna hii leng tuamtuam tuak-phut sek a, Dist. hospital in natna chet (test) na ding vanzat kiningching a neihlouh ziak in confirm case ahihma a sihna tuak leng hunkhop ana om manzel a, hiai toh kisai panlak theih dan omlou hiam chi a Press/Media-te dotna ngaikhawm mahmah in, a kinlam in Dist. hospital ah 'Micro-Biologist' khat koihsak hiding in gen a, Micro-biologist om hunhun chiang in laboratory diagnosis machine 'ELISA' leng koih ngal ding ahih dan gen hi. Tu in Hitang-khawsik toh kisai in Lamka Damdawi Inn ah damdawi leng kiningching koih ahihman in, damloute pataulou ding leh damdawi leng athawn a laktheih ding in gen a, Fogging toh kisai in Commissioner in a kinlam a damdawi (pyrethrum) banah diesel leh petrol kiningching peding ahih dan a gen banah JE natna pan kiven nangin naungek kha 9 apan kum 15 kikalte chiklaipeuh in District Immunization Office ah kaptheih ding hi'n gen hi. Tutan in CCPur Dist. ah JE suspect 17 lak ah confirm positive 3 om a, huailak ah mi 2 damsuah hi'n kigen a, mi 2 case chet manlouh in si uh a, adang teng case confirm hinailou in hi'n kigen hi.

XXXXXXXXX

GAMSUNG THUTHANG


Tukum tuuktui a kiak ziak a Manipur state sung a kikawmtuahna lamlian tuamtuam te lak ah Imphal apan Tamenglong kal kawmtuahna leh Khongsang apan tamenglong kal zotna lamlian naktak a a kisiat ziak in, Tamenglong assembly Constituency apan Minister hihna ana leen ngei Samuel Jendai in, state solkal in a ngaihsak louh ziak hidan a ngoh in, Manipur State chief Minister hihna apan O Ibobi a kitawpding ahi chi hi. Tuuktui a luan pat toh kiton in, Tamenglong zotna lamlian ki naksiat mahmah in, gari neu TATA sumo leh Pick Up khenkhat taisuak thei hamham mahle uh gari lian leh vanpuakna dia kizang Truck te a ding in tai ngaihna omlou hi. Lamlian a kisiat luat ziak mah in damdawi leh niteng poimoh thilte taksapna lian mahmah hin gen ua, Manipur Chief Minister O Ibobi in singtang gam leh phaizang a kibang a khantouhna development om hidan a a gente zuau pumlum ahihdan chiang huntawk hin BJP Manipur Pradesh a Executive Member banah Tamenglong AC apab MLA dia telching a om ngei Samuel Jendai in gen a, mipite a ding a thil hoih bangmah semkhe lou Chief Minister a hihna apan a kitawpding ahi chi hi. Tamenglong bial a teeng mipite lak ah 85 percent veldingte solkal apan huhna a kinga hi uh a, himahleh kikawmtuahna lamlian naktak a kisia a gari lian te a dfing a tai ngam huailou ding khop a a kisiat ziak in, tuabial ah niteng poimoh a lutding bangtak a lut thei nawnlou hin leng kigen hi. Tamenglong lamlian dinmun enkhe ding a kuan Jendai in a genzel dan in, tukum Municipal election dek kuan a vote zonna dan a Congress party in Thangmeiband leh Thongju a lamlian omte black topping a bawl theih uh leh bangziak a kikhentuamna lungsim neitak a Tamenglong lamlian bawl a omlou hihiam chih dotna bawl a, tua ziak mah a singtangmite'n separate administration ngen uh ahi chin gen hi. Lamlian a siat kia hilou in Manipur state sung a District tuamtuam ah state solkal nuai a department tuamtuam Education, SDO, Electricity leh Public Works Department a semtu kining ching ngeilou hin gen a, Tamenglong district ah leng semtu kitaksapna liantak om ahihman in District apan MLA dia telching a om in a mohpuakna thei a, mipite haksatna a ngaihven ding ahi chi hi.

xxxxxxxxxxxxx

Kallui Sintawpni apan India khopi tuamtuam te lak a IT Hub chih a om Bengaluru khopi a vuahtui naktak a a kiak ziak in Bengaluru khopi sung a mun niamna munte ah tui tamtak vung in hindan ngeina nawngkai sak zou mahmah chihthu om hi. Vuahtui tamluat ziak in hawktui in mun niamna munte zuan in luang uh a, Bengaluru khopi sung ah a diak in Kodichikkanahalli leh Bilekahalli munte ah tui tam mahmah in innsung tanpha ah hawktui tamtak luanglut hin tua mun a teengten gen uhi. Vuahtui tamluat ziak a enna innsung tanpha tui a luanlut kia hilou in, kikawmtuahna lamlian te ah tui a tamluat ziak in Delhi khopi nawl a om Gurgaon mahbang in traffic Jam leng thupi mahmah a, Fire department in khopi sung a tui a vung na munte ah longneu ssawllut in tuilian ziak a haksatna tuakte hutkhiakna nna sem uhi. Mun khenkhat a tui vungna mun ah mi khenkhat in nga beng uh a, dil (lakes) khenkhat a tui omte leet a tui a luan ziak in mun tamtak ah tui in singkung khenkhat zungkalh in tua te'n kikawmtuahna buaisak mahmah hin kigen hi.

xxxxxxxxxxxxxx

Jammu and Kashmir state sung ah tuni in Pakistan tawsawn helpawlte leh Indian Army te nasatak in kikap tuah uh a, huai ah sepaih nih si in, helpawl a tel minih leng kaplup in om uhi. Army thusuak in a gendan in, Jammu and Kashmir state sung a Kupwara district sung a Nowgam Sector ah kallui July 30 lakvel in Pakistan apan helpawl hunkhop honglutte kibu uh ahihdan intelligence zak ahihnung un, Army in tua gammang lak operation bawl uh a, operation a neih hun uah helpawlte'n Army te ana kap thuk ziak un kikap tuahna nasatak piang in huai ah Army nih in sihna tuak in, helpawl a tel mi 2 leh kaplup hi ua, Army jawan khat kapliam in om hi. Kaplup a om helpawl nihte taksa tung apan AK rifles nih leh Under Barrel Grenade Launcher khat muhsuah in om hi. Hiai thiltung ahihleh kalkhat sung a helpawlte toh Nowgam sector a nih vei kikap tuahna omna hita dan a gen in om hi.

xxxxxxxxxxx
Zan Pathianni zingkal dak 5 vel a Mumbai khopi sung a om innsawng sawng 3 a sangkhat a ziak theihlouh a thakhat a a kichip guih ziak in, tuni tan in tua innsawng kichim a sihna tuakzak punbeh touzel in mi 8 in sihna tuakta in midang 20 veldingte innsawng kichim kawm ah koltanglai uhi. Thiltunna mun ahihleh Mumbai khopi sung a Bhiwani kichihna mun a JB nagar area hi a, zan zingkal dak 5 a tua innsawng a kichip phet in Fire department leh National Disaster Response Force in thiltunna mun delh ngal in, hutkhiakna nasem semzui ngal uh a, huai ah mi 8 sisa a muhkhiak a om in, midang 12 damtak a hutkhiak theih in om uhi. Tuni in leng hutkhiakna nasep sutzop himahleh vuah tamtak a zuk ziak in hutkhiakna nasep duhthu sam bang in kin theilou a, nawngkai sak mahmah hi.

xxxxxxxxxxxxx

GAMDANG THUTHANG


Khalui July 15 a Turkey gamsung a mipi deihtelna zang a vaihawmna omlai phukkhiak sawm a sepaih tamtak in coup patkhiak sawm mahle uh a lohsap nung un, Turkey slkal vaihawmtute'n sepaih heutu tamtak a dinmun uapan a paihkhiak nung un, tu in sepaih lam enkai ding in Turkey solkal nuai a Minister hunkhop guan in om uhi. Thusuak in a gendan in, Turkey solkal phuksawm a military Coup pankhe tu hidan a ngoh a om Business men toh kizopna nei military officer 1,389 vel ahihna uapan paihkhiak hita uh a, amau mun luah a Supreme Military Council enkai ding in tu in Turkey solkal in deputy prime ministers banah justice, foreign leh interior ministers te guangthak uh hin gen hi. Turkey solkal in sepaih te etkaina toh kisai in, President leh Prime Minister in a utut uh Army, Air force leh Navy commander a guang theiding in phalna piak hi ua, Sepaih lam etkaina himhim defence ministry nuai ah koih vek a om in, Military Hospital om teng leng Health ministry in enkai ta ding hi. Hiai mohpuakna thak ahihleh zan Pathianni a Turkish President Recep Tayyip Erdogan in a puankhiak hi a, President guard tu MIT intelligence agency leh chief of general staff's headquarters leng President etkaina nuai ah koih in omvek hi. Tua Dan thak bawl a omte zat chet hinaikei mahleh tunung zek chiang in Turkey parliament ah a paisuakna ding in vote lak hiding hi. Turkey gamsung a President paihkhiak sawm a Coup a lohsap nung in, Turkey solkal in mi 18,699 vel a hentangna lak ua, mi 10,137 te mat hi ua, zan a sepaih mat a omte lak ah 758 khahkhiak a om uh toh kiton in, tuni tan in khahkhiak a om zah sepaih 3,500 phata hi.

xxxxxxxxxxxxx

Syria gamsung vaihawmtu Assad phukkhiak sawm a kisa US in a nungthuap rebel thautawi pawlte'n ISIL te kiang a Manbij khopi nusia a kihem kheding a a theihsak nung un, tu in Rebel te'n Manbij khopi thuneihkhum sawm a beihpi a suahna uah Manbij khopi 70 percent veldingte thuneihkhum zouta uh hin thusuak in gen hi,. Manbij khopi ahihleh Syria leh Turkey gamgi zul a om hi a, ISIL te'n a thuneihkhum uh khopi ahihban ah Turkey toh kikawmtuahna a ding a lampi poimoh mahmah in a totkhak ahih ziak in Rebel pawl in tua khopi US nungthuapna toh lakkik teitei sawm in nasatak in ISIL te beihpi suahlel uhiTu in Manbij khopi sung mun lianzaw tham laksak thei nawnta mahle uh khopi sung ah mi tamtak kikaptuahna ziak in koltang lai uh a, zan Pathianni sung vuak in leng kikaptuahna kal ah minautang 2400 vvelding te'n khopi nusia in taikhia uh chihthu om hi.

xxxxxxxxxxxxxx

Afghanistan gamsung a khopi lianpen Kabul ah tuzing baihtak in Taliban te'n truck a kikoih bomb hattak a sukpuak na uah Police khat in sihna tuak hin kigen hi. Afghan Foreign Ministry thusuak in a gendan in, Taliban helpawl te'n Truck a kikoih bomb zang a a khoihna mun uh ahihleh Kabul International Airport kiang a om gamdangmi te'n giahna ding a a zatsekna mun uh North gate Hotel kichi hi a, Thiltung toh kisai Afghanistan gamsung a news broadcaster lianpen TOLO News in a gendan in, sepaih tamtak in khauhtak a venbitna a piak uh North gate hotel ah Taliban pawl in bomb a sukpuak hun un gamdangmi contractor hunkhop om mahle uh vangphat huai tak in mi khat lel si in, Hotel sung a omte bangmah chilou uh chi hi. Bomb puahnung sawtlou in Taliban pawl in hotel sung lut sawm in thaukhah mahle uh Hotel vengtu security te felna ziak in, Talibal helpawl apan mi 3 kaplup in om uh chi hi. Buluh a om North Gate hotel ahihleh US sepaih munpi Bagram air base apan gamla lou chik a om hi a, bomb puak a hat luat ziak in Kabul khopi ah tuzing dak 8 tan meilakna mun a kisiat ziak in meivak lou hin gen uhi. Hiai thiltung ahihleh July 23 a Kabul khopi a bomb nih a kizom a puak a mi 80 val in sihna a tuahnung ua, Taliban pawl gamtatna huaise pen hidan a chiamteh in om hi.

xxxxxxxxxxxxxx

Kalnih val paita apan Armenia gamsung a thautawi pasal bangzah hiam in mat a om opposition makai khahkhiak a hihding deihna ziak a salmat hunkhop nei a, a hentang nung un, zan in sepaihte khut ah tua thautawi te a kipiakkhiak ziak un, tua buaina vengthei khongkhong hin kigen hi. thautawi pasal hunkhop in salmat tamtak a hentang na mun uh ahihleh Armenia khopi Yerevan sung hi a, Police compound khat a lut a, a sung a om police bangzah hiam thuneih khum a a hentang nung un, Armenia solkal in kallui kiginni tan a tua thautawi te kipe kheding in theisak uhi. Himahleh thautawi te a kipiak khiak utlouh ziak un, zan in sniper zang in thautawi te lak a khat kapliam in om a, huainung tuzingkal in tua thautawi te kipekhia in kikaptuahna om manlou in buaina vengthei hi. Tua buaina ahihleh khalui July 17 apan kipan hita a thautawi mi 31 in opposition makai mat a om khahkhiak ahihding deih in Police compound ah lut in Police a sem mi 4 thuneihkhum uh a, a nung in Ambulance gari a tuang mi 4 thuneihkhum nawn uhi. Police leh thautawi te kal a kikan tuahna om nung in, kallui kiginni in leng tua thautawi pawlte gupna in Yerevan khopi sung a Baghramyan Avenue ah mipi tamtak kipun khawm in lamlian zuihna nei ngeita uhi. Armenia President Serzh Sargsyan ahihleh a gamsung ua sum leh pai muhna lam haksatna leh nekgukna ban ah tukum bul a Armenia leh Azerbaijan in a kituh uh Nagorno-Karabakh region a khahsuah ziak in Armenia gamsung ah amah deihlou pung hulhul in, a thil hihdan leh vaihawmdan opposition party in a kalh ziak un, opposition makai mansak in tuni tan in suangkulh ah khum a, tuadan a battouh zelleh President paihkhiak sawm a kiphinna tanpha om ding hin mi tamtak in gntak thu gen uhi.

xxxxxxxxxx