You are here: HomeRSS FeedsLatest News

Angel's Vision News | August 03, 2016

Thursday, 04 August 2016 10:57

Manipur State in JE natna doudalna ding in Directorate of AYUSH tungtawn in Project Belladona 200 kichi pankhia in, tuni'n Lamka Damdawi Inn ah hiai Project honkhiak a om in, zingchiang apan in Lamka Damdawi Inn Belladona 200 kichi AYUSH damdawi hawmkhiak kipan ding hi.

Hiai Project ahihleh zan a Imphal a honkhiak ahih nung in, tuni'n AYUSH Director makaih in AYUSH Team te'n Lamka hong pha in, MS Conference Hall ah hongkhiatna hong nei uhi. AYUSH Team-te ahihleh Dr, K. Lokendro Singh, Director, AYUSH, Govt. of Manipur in hon makaih a, Dr. A. Guneshwar Sharma, State Ayush Officer, Dr. L. Promita Devi, Joint Director (AYUSG) banah Dr. K. Benedict Sharma, Medical Officer (Homeopathy), Dr. Sophia, Medical Officer (Homeopathy), Dr. P. Iboton, Medical Officer (Homeopathy), Dr. Y. Lukhoi, MO leh L. Dipen Singh, Finance Manager, Directorate of AYUSH te'n hon zui in, zinglam dak 10:30 in Lamka hong tung ua, MS Conference Hall ah inaugural programme zat in om hi. Hiai hun ah AYUSH Director in hiai damdawi pen mihing leh ganhing banah laboratory ah hoihtak a etchetna hoihtak neih ahih nung in hiai project pat a om ahih dan gen in, JE damdawi hilou in, JE apan kivenna damdawi hizaw ahih dan gen hi. Hiai damdawi in side effect a neihlouh banah damdawi nek ni apan damdawi in nna sem pan ngal in, dose kimtak a nete season khat sung JE natna apan veng thei hi'n gen a, damdawi ahihleh Medical Supdt. leh CMO kiang ah piakkhiak ahih ding banah amau hoih sak dandan a hawmkhiak hiding hi'n gen a, CCPur District mipi teng kiang ah hawmsuak vek hiding a, a kul leh poimoh dungzui a 2nd Phase leng neihzom touh ngak hiding hi'n gen hi. Tuaban ah, tunung sawtlou in CCPur District ah lupna 50 om theihna AYUSH Hospital neipahta ahih dan gen in, tu August kha sung ngeingei a ground breaking neih theihna dia panlak ahih banah kum nawn August kha a pension ding ahih dan gen in, huai ma ngeingei ah AYUSH Hospital honkhiak ahih theihna dia panlak hiding in gen hi. Director in tuni'n JE dalna damdawi Belladona 200 kichi mi 35,000 a ding hon potou in, zingchiang in AYUSH OPD ah hawmkhiak pat hiding a, tunung sawtlou in PHC, CHC leh PHSC tuamtuam a hawmkhiak ding hong tun beh nawn ding hi'n kigen hi.

XXXXXXXX

Lingsiphai a om Mrs. Thiemneihoi (50) w/o Damtinkhup tuni sun dak 12:00 vel in JNIMS, Imphal ah Japanese Enchephilitis (JE) natna ziak in si a, nitaklam dak 4:00 vel in a luang Lamka puaktun a om in, zingchiang in Lingsiphai Hanmual ah vuiliam hiding hi. Mrs. Thiemneihoi ahihleh niteng a New Bazar a meh zuak a innsung enkol in, a sungkuante kingakna pen hi a, aman a pasal leh tanu 5 leh tapa 2 nusia in tusun in mualliam hi. A sungkuante gendan in, kal paita Ningani nitak in a lu naa sa pan in, Sintawpni in leng bazaar ah tu peihlou in inn ah om a, a pasal leh a tate'n damdawi inn a ki-ensak ding in gen mahle uh aman hong hoih mai ding ahih dan gen in, ki-etsak utlou hi. Kiginni in a lu leh a kawng naa sa in, nitak in khua phawklou in a khenchiang in hai pau dan in om a, Pathianni zingkal dak 6:00 vel in Lamka Damdawi Inn Casualty ah puaklut in om hi. Doctor te'n hoihtak a etchetna a neih nung un JNIMS a etkol ding in refer ua, sun dak 12:00 in puaksuk a om in, kintak in a sisan test ngal in JE natna ahih dan confirm hingal hi. Zan leh zanhal in bel a dinmun hoih deuh mahleh tuni'n chau deuhdeuh in sun dak 12:00 vel a si hi'n a sungkuan te'n gen uhi. Mrs. Thiemneihoih te'n vok vul in a vok buk uh leng a inn kiang chin ua om in thoukang leng tam thei mahmah a, huai apan hiai JE natna kai kha hiding in a sungkuan te'n gen uhi. Hiai toh kisai in bialtu MDC P. Kamkholal in leng Lingsiphai khua delh ngal in, a kinlam a Lingsiphai khua a fogging bawlsak dia CMO ah ngetna bawl in, panlak theih dandan in panla hi. District Rapid Action Committee te'n leng theih tawp suah a panla in, tunitaklam in Lingsiphai khua ah fogging a bawl banuah, tunitak a siluang zanhahpih nungak-tangvalte lak ah JE natna toh kisai a kiven ding dan sinsak uhi. JE outbreak om apan CCPur District ah JE confirm case a si mi 2 omta in, JE hidia muanmoh a si mi 2 mah omta hi'n kigen hi.

XXXXXXXX

Zogam Hoihnu Football club saina a PT Sports Complex, Khominthang New Lamka a Open Football Tournament pailel ah knockout match teng zohsiang ahihnung in, Quarter Final kimawl dingte leng chiang kuangta hi. Quarter Final ahihleh zingchiang August 4, 2016 in neih hiding a, huai a sun dak 12 in 11 Young star, molhoih leh Pimfuh FC Hiangtam Lamka kimawl in, sunnung dak 1:30 in Lawmta FC V Munhoih leh Kapthuom Memorial Mualvaiphei kimawl ding uhi. nitaklam dak 3 in Zoukhankhual United Kamdou veng leh Breakbulls FC Bungmual kimawl nawn ding uh a, nitaklam dak 4:30 in Athletics Brothers Club Saidan leh Knight Soccer Mualvaiphei kimawl ding uhi. Hiai tournament ahihleh July 25 a kipan hita a, tournament ah siampen hihna ngahten dangka 10,000 sang in, Runners up in Dangka 6,000 leh Best Team in Rs 2000 sang ding ua, Best keeper, Best Defender, Best Midfielder, Hero of the Tournament leh Top Scorer te kiang ah kipahman piak hiding uhi.

XXXXXXXX

Baptist Children Department Committee, Lamka North Division, EBC saina in hongtung dung August 20, 2016 in EBCC/Pearsonmun ah Sunday School heutute a ding in Counselling neih/bawl ding dan toh kisai kisinsakna om ding hi. Hun zatna ahihleh Paubiakthang Samte, Music Co-ordinator, DBCDC, Lamka North Division in makaih in zinglam dak 10:00 in kipan ding a, B. Kaichinmung Ngaihte, Chairman, DBCDC, Lamka North Division in vaidawnna thu gen in, Evan T. Damkhothang in naupangte lak a counseling bawl ding dan toh kisai Lamka North Division huamsung a Sunday School heutu paikhawmte kiang ah sinsak ding a, dotna leh dawnna hun leng om in, sunnung dak 4:00 in programme zou ding uhi.

XXXXXXXX

Churachandpur District in mawltual hoih a neih sunsun Lamka Public Ground hun sawttak puahlouh leh zuunlouh a aom nung in, mi phatuamngai tuamtuamte panlakna tungtawn in NEC Fund zang in puahthakna nasep paitou zel a, buaina bangmah omlou a nasepna lamzangtak a apaitouh zel leh 2018 tan in CCPur District in khopi dang bang in mawltual hoihtak neitak ding hi. Hiai nasepna ahihleh June khatawp lam a pat a om hi a, nasep taktak ahihleh July 2nd Week a pat a om hi'n kigen a, niteng in nasemtu mi 60 vel in group 5 a kikhen in tha-ittak in nna sem gige uhi. Zan leh tuni'n nasemtu te'n JCB 1 leh Tipper 2 zang in gallery lui a lei om teng nawnkhia in, groung khanglam pang ah sung ua, nasemtu pawlkhat in khanglam fencing bawl san lel in, khanglam fencing teng tukal sung a zoh hiding in gen uhi. Thutut kingah dan in, Lamka Public Ground bawlna ding in North Eastern Council (NEC) in Special Contractor V. Guite @ Vungkhum Guite min in Rs. 4.8 Crores sanction a, VIP Gallary hoihtak as om ding banah mi 5000 vel tut theihna ding gallery leng bawl ahih ding banah kimawlmite a ding in changing room leh Office banah toilet hoihtak leng om ding a, vualphaloute a ding in leng ramp tanpha leng koih hiding hi'n kigen hi. Tuaban ah, ground sung ah carpet phah hilou ding a, himahleh loupa hoihte suan dim vek hiding hi'n leng kigen a, a hoih theipen a bawlsawm a panlak ahih dungzui in nasep leng deihbang in kin theilou a, zat theih taktakna ding in kum 2 vel lut lai ding hi'n nasemtute'n gen uhi. CCPur District in ground hoih a neih sunsun Lamka Public Ground pen district mipite a ding in poimoh mahmah mahleh district in MLA leh Minister a neih apan tunitan puahlouh leh zuunlouh in om nilouh a, vuahzuk hun chiang in nawi chihtak a nawi in, Phalbi hunlam chiang in khut petmah a, ground sung a kimawlte mel leng muh theihlouh ding khop in om hi. Hiai toh kisai in kimawlna lam a lunglutna nei leh khangthakte awlmohna liantak nei mi phatuamngai pawl tuamtuamte hahpanna tungtawn in CCPur District in khangthu a dia chiamteh tham chiang ding khop mawltual hoih nei ding dinmun in omta a, hiai in khopi sung a cheimawi ding banah kimawl siam tamtak sekkhiakna munpi suak ding ahihman in mipi'n a zoh kal ngaklah thei mahmah uh hi'n thutut kingah hi.

XXXXXXXX

GAMSUNG THUTHANG


Tukum monsoon vuahtui tamtak a kiak pattak toh kiton in, Maharashtra state sung a om leipi kumlui mahmah khat zan nitak in tuilian in a tuahkhiak ziak in tua lei apan gari hunkhop taikhia in, mi 20 valdingte a omna uh theihlouh in tuni tan omlai uhi. Thusuak in a gendan in tuilian in a tuahkhiak lei (bridge) ahihleh Mumbai leh Goa kal kawmtuahna lamlian in a totkhak Savitri luitung a kidoh hi a, British te hunlai apan kidoh ahih ziak in tua leipi kumlui mahmah ta hi. Mumbai khopi apan Km 84 a gamla Raigad district ah zan nitak in vuahtui tamluat ziak a lei poimoh mahmah a tuahkhiak nung in, khomial lai a taituah car leh Bus khenkhat tua lei kichim ah taikhia in luipi sung ah tuahlut ua, tu in mi 20 valte omna theihlouh a om ziak in naktak in a zonna neih in omlel uhi. Transport department thusuak in a gendan in, Maharashtra state transport bus nih leh a sung a tuang mi 22 te omna theihlouh a mang hin gen a, zan nitak dak 11 vel a Mumbai khopi nusia a kipan khia himahle uh a tunna mun ding uh tuni tan a a tunlouh ziak un, tua lei kichim ah taikhe kha hiding un gintak thu gen uhi. Tu in miming zonna ah hutkhiakna nasem pawl mi 80 vel longneu toh kigingsa in om uh a, gari a omna theihlouh a mangte zoinna ding in Coast guard pawl in Cheetak helicopter khat sawllut in luidung ah kivialleh sak uh chihthu om hi. Tui in lei kidoh a taihkhiak na toh kisai in tuzingkal in telephone tungtawn in Prime Minister Narendra Modi in Maharashtra Chief Minister Devendra Fadnavis thuzak in panpih theihna chiteng a panpih ding in thuchiam bawl a, gari bangzah mawngmawng taikhia uh hiam chih theih ahihnai louh ziak in mi bangzah in sihna tuak uh hiam chih leng theihchet hinai lou lai hi.

xxxxxxxxx

Atal Behari Vajpayee hunlai apan luikhiak a om himahleh tuni tan a paisuak theilou Goods and Services Tax (GST) bill kichi Lok Sabha a a paisuak khitnung in tunin innpi tungnung zaw Rajya sabha ah luikhiak in om nawn hi. Hiai thu kaihkhawm ahihtan in Goods and Services Tax (GST) bill a paisuak leh paisuaklouh theih hikei mahleh Goods and Services Tax (GST) bill a paisuak ngeingei leh Goods and Services Tax (GST) sang a sangzaw a laak a om Tax tuamtuam auto, entertainment, paints leh industrial chemicals te tulel a 24 per cent apan 26 per cent kikal; tax lak a om pen hihniam hiding a, 17 per cent leh 18 per cent kikal in kaihniam hiding hi. GST Bill a paisuak nung in, tax khenkhat ah solkal in manna ngahding a, himahleh Maruti Suzuki, Asian Paints leh Pidilite Industries in hamphat pih in, telecom, electricity leh banking lam ah bel solkal in tax ah punna ngahding hi. Goods and Services Tax (GST) bill a paisuak chiang in Tax lak a om teng a vek a et in tulel in service Tax lak a omlel 14.5 per cent himahleh pungtou ding a 17 per cent leh 18 per cent in service tax punsak hiding hi.

xxxxxxxxxxx

Gujarat a Gir-Somnath district ah bawng humbit dinga kipawlkhawm 'gau-rakshak' pawlin Dalit tuailai mi 4 a soisak ziak uh leh Jat nam te a ding a seat reservation bikhiah sakding ngetna ziak a kiphinna tuamtuam om nung in, tua bouruak sangtak nihte maituahna ah Gujarat state Chief Minister Anandiben Patel tung a mohsakna kampau tamtak om ziak in Anandiben Patel in a mohpuakna zoulou hidan a gen in zan in kitawp ahihdan puangkhia a, tua a kitawpna leng BJP in pomsak uh hin thusuak in gen hi. Anandiben Patel in kitawp ahihdan Facebook tungtawn a a puankhiak nung in, amah thakheng ding zonna BJP in nei ngal uh a, hiai thu kaihkhawm ahihtan in CM thak ding guanna neih hikei mahleh Gujarat state Health Minister Nitinbhai Patel in Gujarat CM hihna leen theiding dinmun a om in, a min gendawk in om hi. Gujarat state sung a thiltung nihte ahihleh khalui in bawngsa pua hidan a ngoh in, bawnggoh khaamtu hidan a pawl kibawl tawm khat in Una khawpi ah Dalit mi 4 gari apan kaikhia in naktak in sun tanglai in mipi muhding in soisa uh a, tua thiltung tawh kisai in police official 4 tawpsak hi uh a, huhamtak a gamtatna a kigolh mi 16 matkhiak a om hi'n Union Home Minister Rajnath Singh in Lok Sabha session ah gen mahleh Gujarat CM in a mohpuakna zoulou leh Dalit mite humbit sawm lou hidan in ngohna om hi. Dalit mite'n state sung a tamveitak nam sangzawte apan a thuak beh lailai ziak un Dalit Panthers pawlin Gujarat state pumpi ah bandh puang in tuni tan tua kiphinna khawllou in paizom touzel lai hi. Thusuakin agendan in Dalit mi 4 in bawngsa apuak ziak un Gau Rakshak pawlin Una khawlai ah mankhia uh a, chiang leh kawnggak zang in mipi muh in zep uhi. Dalit mi 4 soisakna mobile tungtawn a kila video clip khat internet a khahkhiak ahih in Gujarat state sung muntuam tuam ah buaina om a, tuni'n leng Ahmedabad a Amraiwadi ah mipi hawlzakna di'n police te'n teargas zang uhi. State acting DGP V.M. Pargi in police panlaknate tuni a agendan in mi 16 matkhiak hita a, ni 30 sung in chargesheet bawlkhum ding uh a, mawhna nei a theihkhiakte gawtna khauh thei pen piak hiding chi hi. Jats namte kiphinna toh kisai leng Gujarat state solkal in a ngaihsak louh ziak in a vangkim in kiphinna om a, kumnawn a Gujarat state sung a state assembly election om ding ah Party dangte'n tua thiltung nihte meilet ding ua gintak ahih ziak in, BJP in Anandiben Patil kitawpna pomsak lou theilou uh hidan a genpawl om hi.

xxxxxxxxxxxxx

Madhya Pradesh state sung a om Barwani district ah Narmada luipi khaktan a Dam kibawl Sardar Sarovar dam kichi thuneitute'n a tui luankhiakna khaktan a tui tamtak a a kholkhawm ziak un, tua Dam kiang a teeng mi tamtak in tui tamluat ziak a Dam a leet a Dam tui in a tenna inn uh leh a neih leh lam te uh a taihmang khak ding lau in, kallui kiginni apan kiphinna apat uh tuni tan leng sunzom toulai uhi. Sardar Sarovar dam a sluice gate khaktan a om a full reserve capacity tan tungdia tui tamtak kholkhawm ahihthu ah tunin leng Social activist minthang taktak tel in mi tamtak in kiphinna neinawn uh a, kintak a tua Dam a tui kholkhawm a omte khahkhiak ahihding ahi chin phutna nei uhi. Sardar Sarovar dam a tui kholkhawm a om ziak in nidang in tui om zah metre 122 a sang a om himahleh tu in metre 139 in sang a, tui tamtak kholkhawm a om ziak in mun liantak tui in tuum ta hin gen uhi. Kiphinna neite lak a khat kum 60 a upa Shanta Bai kichi Pipri khota a teeng in a gendan in, Sardar Sarovar dam a tui khahkhiak a omlouh a, full capacity a kholkhawm a om ngeingei leh a gam leitang Acre 12 a lian leh tenna inn 100 vel tui in tuum ding hin gen a, Madhya Pradesh, Gujarat leh Maharashtra a khota 244 veldingte leng tui in tuum theiding dinmun a om hin gen hi. Tui bangtan hiam a saang a khol a hihtaak ziak in innkuan 45,000 val in buaina tuak panta uh a, himahleh Dam enkai tute'n mipite kiphinna ngaihsak naksang in compensation leng bangmah piak nei nailou uh hin kigen hi.

xxxxxxxxxxxx

GAMDANG THUTHANG

Syria tualgal toh kisai in solkal lam leh rebel lam in galte douna ding a huih sianglou Chlorine gas zang uh hidan a ngohna tamtak omte naktak in nial mahle uh thuthaksaite leh Organisation for the Prohibition of Chemical Weapons (OPCW) in Syria galpi a Chlorine gas zat a om ahihdan chiangtak a thei uh hin tunin a thak in taklang uhi. OPCW in a taklat dan un, huihsianglou Chlorine gas kizat dan tangpi ahihleh Helicopter pansan a barrel bomb khiak ahih hun a khiakkhawm a om zel hin gen a, mit a mutu 32 apan a thil muhkhiak te uh ngaihkhiakna neih a hih hun in leng Helicopter in bomb a khiak hun a chlorine gas gim nam mahmah ahihdan 29 vei zakha uh hin taklang uhi. Tuabang a Syria sepaihte'n chlorine gas a zat tungtang uah UN in ngaikhawk mahmah in a kituakbang a Syria solkal tung a action khauhtak lakkhum hiding hin tunin thupuan bawl ngal uhi. Hiai huih hoihlou Chlorine gas kizatna theihkhiak a hong omna ahihleh opposition galkap rebel thautawi pawlte hatna mun Idlip bial a Russia helicopter khat kapkhiak a om nung a thiltung hi a, Russia in amah thilhih hidan in puangkei mahleh zan nitak zan khovak a helicopter zang a Chlorine gas telna bomb tamtak khiak a om nung in, numei 18 leh naupang 10 tel a mi 33 damdawi inn a puaklut a omte apan Chlorine gas kizang ahihdan theihkhiak a om hin kigen hi. 2011 apan Syria galpi kipatnung in Chlorine gas kizatna thubuai 161 vei omta a, Syrian American Medical Society (SAMS) in hiai toh kisai a taklatna uah, chemical attacks 161 vei omna lak ah mi 1,491 si in huih hoihlou ziak mah in mi 14,581 in liamna tuak uh chi hi.

xxxxxxxxx

Israel in khakhat val paita apan Palestinian mite zinkhiak ding phallou a gakna a bawl nung in, tu in tua gakna khauh zawsem a a hihkhauh ziak in, Gaza strip apan Palestinian makai Olympic a zinkhiak sawmte kuamah zinkhe thei omlou uh hin kigen hi. Israel in tuabang a Palestinian mite tung a gakna a bawl khauhsak mahleh a guk a zinkhia hunkhop bel om veve uh hidan a gen hi a, himahleh Palestinian Olympic team a makai dia seh a om Issam Qishta bel a zinkhiak ding naktak a daal in sepaih tanpha vengsak uh chihthu om hi. Palestinian Olympic committee a Secretary General Munther Masalmeh in a genna ah Israel in Issam Qishta a zinkhiak ding a phallouh ziak in Ilympic a Palestinian team te toh kimu theilou ding chihna suak hin gen a, hiai thu toh kisai in., Israel Foreign Ministry thupuangtu Emmanuel Nahshon in bel Issam Qishta a zinkhiak ding Israel in ngaihtuah sak hin gen a, himahleh thuchian bel theih hilou hi. Israel in Palestinian mite zinding gakna a bawl ziak ahihleh khatvei thu a saang tamtak in Jordan a zinkhiak a sawm ziak uh hin kigebn hi. Tutung Brazil Olympic ah ahihleh Palestinian min in mi 22 kihel ding uhi.

xxxxxxxxx

Greece gamsung a Greek kumpite ana kivuisekna mun Athens khopi sung a Greek Burial site kichihna mun ah zan zek in mihing guhvuak tamtak tohkhiak a om in, huaite hoihtak a velchet ahihnung un, chain a a khut leh khe uh kigaak ahihdan theihkhiak a om ziak in, thillui suitu Archaeologists pawl in a lompi a kithahna hiding in muanmoh thu gen uhi. Guhvuak muhkhiak a omte ahihleh a vek in mi 80 vel hidan a gen hi a, muhkhiak a om hun un siik a kikhih belh uh ahihdan theihkhiak in om hi. Hiai thu Archaeologists pawl in hoihtak a a suinung un, a lompi a kithahna hiding in gingta mahleh bangchik hun leh bangziak a a lompi a thah a om hiding uh hiam chihbel suikhe thei nailou uhi. Archaeologists Dr. Stella Chryssoulaki in a gendan in, a vekpi un a sihdan uh kibang mahleh hoihtak a vui a omna un Archaeologists te lungbuaisak hin gen hi. Thusuak khenkhat in bel tua guhvuak muhkhiak a omte BC 632 hunlai a 'Cylonian Affair' kichi aristocratic Cylon in a zi pianna pa paihkhiak sawm a Coup a sawmlai hun a thiltung hidin gintak thu gen uh a, DNA tests bawl in omleh thuchian pawtding ahi chi uhi.

xxxxxxxxxxxxx

Tangkang Volcano om mun mahmah na gamte lak a khat Hawaii tuikulh gam ah 2013 nung a ding a tangkang apan tuisa tak kikhohkhia Lava kichite kawl apan tuipi sung a a luanlut na ding in, tangkang thupitak khat om in huai ah tangkang omna mun a leinuai apan hong pawtkhia lava kichite Pacific tuipi sung a luanglut hin kigen hi. Tangkang omna mun ahihleh Hawaii tuikulh gam a taang minthang mahmah Hawaii Volcanoes National Park a om Kilauea kichihna mun hi a, May khatawp lam a tangkang thupitak om nung in, tua tangkang tuni tan bei nailou in a vangkim in omden lai a, tangkang apan tuisa kikhohkhia lava tem eel 6 val a luan nung un tuipi ah luanglut hin Geologist te'n gen uhi. Tua Lava te ahiuhleh khopi sukha thei dingdan a omlouh ziak in lauhhuai lou hidan a gen hi a, himahleh khualzin mite kiang ah tua tangkang omna kiimnai ah omlou ding a theihsak in om uhi.

xxxxxxxxxxxxx