You are here: HomeRSS FeedsLatest News

Angel's Vision News | June 29, 2016

Saturday, 02 July 2016 08:10

Zomi Re-Unification Organization (ZRO) in tuni’n thusuah bawl in, revolutionatry Leader Isak Chisi Swu, Chairman, NSCN (IM) in a hunloutak a mual a liamna tung ah suun thu puang uhi.Thusuak in a taklat dan in, NSCN (IM) Chairman Isak Chisi Swu in khang 3 mawngmawng mahni angmasialna tel hetlou in ana makaih tou in, Nagate suahtakna dia a pan banah North East India a om tualsuakmite a bik in Manipur singtangmite a ding in a sih tan dong in a ginomna pangtou den hi.

 

Hiai bang a Isak Chisi Swu in a hunloutak a hon mualliam sanna pen Naga mipite leh North East pumpi a zalenna sual pawl tuamtuamte a dia manna thupitak himahleh kipiakzohnate leh a sepkhiak te’n makai thupitak ahih dan langsak a, 1997 kum a ama makaih a Government of India toh peace process pat a om a gah lou manlou a hiai bang a amualliam sanna pen poi mahmah hi’n taklang hi.

 

XXXXXXXX

 

Lead Bank office, CCpur District saina in hongtung ding July 2, 2016 in Mini Auditorium, Dorcas Hall, New Lamka ah EBC Worker-te a ding in Financial Literacy Awareness Programme om ding hi. Hiai hun zatna ahihleh sunma dak 11:00 in kipan ding a, Rev. S. Ginmalsawm, Director, Social & Development in hongkhia in, Nengkhanpau Hauzel, Chief Manager & LDM in keynote address gen in, Rev. S. Vungminthang, General Secretary, EBC in thugenna hun saulou zang in interaction session hun zat hiding hi. Hiai Financial Literacy Awareness Camp ah Thangchinkhup Guite, AGM & DDM/NABARD leh Pauneihthang Valte, Chief Manager, SBI/CCPur Branch te resource person a pang in bank tungtawn a hamphatna tuamtuam omte tel in thu tuamtuam pansan in sinsak ding uhi.

 

XXXXXXXX

 

Pu Nivang Suan Munluo Phungpi Organisation te’n Munluo Phungpi sung a UPSC, MPSC banah Class X leh Class XII a lohchinna ngahte thumsakna leh kipahpihna hun tuni sunma dak 11:00 in Chinkham Modern School, Zomi Colony ah nei uhi. Hiai hun ah mun tuamtuam a om Pu Nivang suan Munluo Phungpi apan mi hunkhop paikhawm ua, hun zatna session 2 a kikhen in, session masa pen lohchinna ngahte a dia thumsakna hun in zat in om a, session 2na pen kipahpihna hun a zat in om hi. Hiai hun ah Dominic K. Munluo, Secy, MPLO in lohchinna ngahte mellahna nei in, Munluo Phungpi Organization in kipahpih etsakna in memento leh certificate pia in, Upa CHinkham, Chief of Zomi Colony banah Dr. DK Mang Munluo leh Michael Ginzasuan, DSO/CCpur te’n hasotna thu gen in, Munluo Phungpi Organization in bawng 1 gou in mipi paikhawm te’n ann kuang lui uhi. Thutut kingah dan in, Pu Nivang suan Munluo phungpi apan in tukum in M. Thangsuansang Zou in UPSA ah lohchinna ngah in IRS piak in om a, M. Lawrence Kapkhenmang in MPSC ah lohchinna ngah in MPS piak in om hi. Tuaban ah, M. Edmund Kamminlun in Cabinet Secretriate nuai ah Asst Commissioner mu in, M Khamsuanhang in Section Officer Ist Grade a muh banah M. Ginsuanmung leh Ruth Nemliankim te’n M.Sc. Lecturer mu in, M Jacob Vanlalbuatsaiha in Bank PO mu a, tukum Class X leh Class XII exam ah mi hunkhop in lohchinna ngah uhi. Tuni a programme zatna hun ah mipi paikhawm te’n amaute a ding in Maitaam bawlsak in Upa Thongkhojang Munluo, Chief of Nivangphai in lankhia a, Pastor Khamkhansuan in Tanchinhoih gen in, Pastor leh Upa teng in lohchinna ngahte lutung ah khut nga in thumsakna nei uhi.

 

XXXXXXXX


Divison Baptist Dorcas Fellowship, Lamka South Division EBC saina in Lamka South Division huamsung a om meithaite a ding in tuni’n EBCC Zion Veng ah ‘Bangchik mah in kon donlou kei ding a, pai leng kon paisan kei hial ding Heb. 13:5’ chih thupi zang in Meithai Fellowship om hi. Huai hun ah EBC Lamka South Division huamsung a om biakinn 20 val apan meithai 500 vel paikhawm ua, zinglam dak 10:00 in Rev. V. Nenglian, Divisional Supdt, Lamka South Division in hongkhia a, Nu Jamkhanvung, Vice President, Division Baptist Dorcas Fellowship in vaidawnna thu gen in, Nu Chiinzavung in thugenna hun zang a, Pastor E. Chinzamang, Local Pastor, EBCC Zion veng in fellowship khak in sunnung dak 3:00 in programme zou uhi.

 

XXXXXXXX

 

Zomi Mothers Association (ZMA) in naupang tagah leh genthei te a etkolna mun uh Only Grace kichi ZMA Road, Vengnuam, New Lamka a om kiphuhkhiak nung kum 10 chinna leh Pathian kiang a kipahthu genna zingchiang June 30, 2016 sunma dak 11 in Only Grace ah om ding hi. Hiai hun ah Upa G Paukhanmang, Local Chairman EBCC Vengnuam in Pathian kiang ah Program latna nei masa ding a, Ms Vungmuanching, Secretary Home Managing Board in welcome speech genna nei in, Rev S Ginmalsawm, Social Development EBC in thumsakna neiding a, Ms Joycee, President ZMA Hqtr in vote of thanks henna nri in Rev Khen P Tombing, Consultant Only Grace Home in hunkhakna neiding hi. Huaiban ah Only Grace home a ding a June 2016 sung a panpihna lutteng Kuki Women Union-Anntang bag 2, Ms Joycee and Jeremy Canada-Anntang Bag 5, SSPP Ebenezer Branch-Second Hand puan, Nisin Jesu to Whatsapp group-Secondhand puan, BCD vengnuam New Lamka-Anntang Bag 1 leh chikhum packet 3 banah NTBC Red Cross Road-Second hand puan hi a, tuabang a tagah leh liangvaite awlmohna ziak a panpihna pete tung ah Only Grace in kipahthu news tungtawn in gen uhi.

 

xxxxxxxxxxx

 

Thadou Kuki Students’ Union in Indo Global Social Service Society (IGSSS) toh pangkhawm in tuni’n KKL Complex, IB Road, Headquarters Veng ah Peace Building toh kisai Workshop nei uhi. Hiai hun zatna ah mun tuamtuam apan TKSU member hunkhop a kihel banuah student organization tuamtuam apan makai hunkhop in uap ua, programme ahihleh sunma dak 11:00 in kipan hi. Hiai hun ah Lalkhohao Chongloi, President, TKSU GHQ in keynote address gen in Paolalzom Neihsial, Associate Co-ordinator, IGSSS in worshop neihna ziak pulakna nei hi. Programme hunsung in Lalramsang Infimate, MCS, ADC/Bishenpur in “Peace without justice is only a mirage” chih thupi zang in presentation pia in, Rev. Dr. Kh. Khaizakham in “Religious perspective on Peace & Reconciliation” chih thupi zang in presentation pia a, lemna leh muanna om theihna ding in Pathian leh ei kal bawl dik masak ngai a, Pathian leh ei kali bawl dik naknak leh thil bangkim zohsa ahi dan gen hi.

 

XXXXXXXX

 

District Handloom & Textiles, CCPur saina in tuni sun dak 12:00 in Simte Inn, Sim Veng ah New Lamka Cluster-te a ding in Awareness Programme om hi. Hiai hun zatna C. Rajasekharan Singh, Asst. Director (W), WSC, Imphal in Chief Guest hihna toh uap in, Guest of Honour in Chingtam Luwang, President, Handloom Promotion Council, Manipur lah ST Lalson, Board Member, Bijang Handloom Weavers Co-operative Society Ltd. te pang ua, Functional President in Smt. Th. Ibemcha Devi, Project Manger (Handloom), District Handloom & Textile, CCPur pang in, New Lamka huamsung a om siamgan a nek zong mi tamtak hiai hun zatna ah kihel uhi. Guest of Honour a pang S.T. Lalson in a thugenna ah, niteng a siam gan a sungkuan vak te’n sepna neilou chi a kikoih niam pen tawpsan a, khopi tuamtuam a omte nasep bang in kuhkaltak in nna sem leng lohchinlouhna ding bangmah omlou ahih dan gen a, Bijang Handloom Weavers Co-operative Society Ltd in puan tuamtuam na gat khiate uh a om bangbang la dia government in a guan ahih dan gen hi. Chief Guest in a thugenna ah, puan ze tuamtuam a gat khiak a omte hoih in etlawm thei mahmah a, himahleh a puan kizangte allergy om ut mahmah ahih man in duhthusam tung zoulou ahihman in cotton puan ngen a khek hunta ahih dan gen hi.

 

XXXXXXXX

 

State Bank of India in kum 210 sung mipi a dia nna a sep uh phawkthakna in SBI/CCPur Branch in tuni sunnung dak 2:00 in Saikot HYA Hall ah Loanee-te toh Town Hall Meeting nei uhi. Thutut kingah dan in, tulel in CCpur District pumpi ah SBI/CCPur Branch apan PMEGP Loan leh Agriculture loan la himahleh tuni tan dinlou mi 300 val om in, huaite lak ah mi tamzawte Saikot leh a sehvel apan hi ua, Rs. 3 crores val tang lel hi. Loan din theilou te’n a dit theihna ding un 30 percent discount bawlsak in kong zapi honsak ua, hiai bang hamphatna om ahih lam a theihna ding uleh baihsamtak a loan a dit theihna ding uh ngimna a hiai bang programme sai a om hi’n kigen hi. Tuni a programme zatna hun ah mi deihbang in paikhawm kei mahle uh, a paikhawm om sunsun te’n hamphatpih mahmah in, hichibang hamphatna bawlsak a omna tung ah kipak petmah uh hi’n kigen hi.

 

XXXXXXXX

 

All Manipur Tribal Women Union (AMTWU) makaih numei pawl te’n tuzingkal dak 7:30 in District Hospital Morgue ah Lamka pansan Press/Media-te kimuhpih in zanhal a Manipur Chief Minister O. Ibobi Singh a kimuhpihna uleh a kimuhpihna ziak uh pulakna nei uhi. Mrs. Nianglian, Convenor, AMTWU in a gendan in, Manipur singtangmite buaina toh kisai a Manipur Chief Minister in bang ngaihdan nei hi hiam chih theih utna ziak a Manipur Chief Minister kimuhpih uh ahih dan gen a, dakkal 1 phial kihouna a neih hunsung ua a gen pipen uh ahihleh Manipur Government in singtangmite Constitutional Rights a suk pichin masiah kiphinna khawlsanlou ding uh ahih dan va gen ua, bangchi zongteng in Bill pen bawl thak hileh leng singtangmite a dia a zatna ding bangmah omlou a, singtangmite poimoh pen Manipur apan a tuam a kivaihawmna ahih dan gen uh hi’n gen hi. Manipur CM in hiai Bill 3 te’n singtangmite sukhalou ding ahih dan theisak mahleh AMTWU in pom theilou uh ahih dan theisak in, sukhalou taktak ahihleh bangziak a Bill dang pass beh ngaih ahia? bangziak a singtangmite a dia hinna pia salphate gal a kalsuanlou a, tuni tan singtangmite buaina ngaihsaklou a om hiam? chihte ah dotna bawl ua, singtangmite leh phaijangmite kikal a kideidanna omlou ahih leh hiai buaina kintak a suveng a singtangmite a ding liauliau a constitution in a piak 6th Schedule recommend dia ngetna leh theihsakna bawl uh ahih dan gen a, tu in New Delhi ah hiai toh kisai a centre government toh kihou nawn ding ahih na uah, Manipur Chief Minister in bang ngaih dan nei hi hiam chih thei nuam a hong pai uh ahih dan leng gen uhi. Mrs. Nianglian, Convenor, AMTWU in a genzelna ah, All Manipur Tribal Women Union kichi mimal khat ngaihdan a pai hilou ahih dan leh banghiam tupna a kiphutkhia hilou ahih banah Pathian apan mi 2 leh 3 in theihsakna a muh dan dungzui ua kalsuan uh ahih dan gen a, kuamah apan lamet neilou leh mahni mimal metna zong a kalsuan ngeilou leh kalsuan ngeingeilou ding ua, sih tanpha a Manipur singtangmite suahtakna dia kalsuan ding uh ahih dan gen hi. Manipur Chief Minister toh kihouna ah leng thu dang bangmah gen hilou ahih banah thukimna bawl dia kuan leng hilou ahih dan kuapeuh in theihpih ding in ngetna bawl hi.

 

XXXXXXXX