You are here: HomeRSS FeedsLatest News

Angel's Vision News | May 9, 2016

Tuesday, 10 May 2016 19:24

CCpur District sung a nam tuamtuam a makaite leh Innpi te’n tuni sunma dak 11:00 in Simte Inn, Sim Veng ah joint meeting nei in, tribe tuamtuam te’n genkhawm dia agenda a puaklutte uh kikup khawmna nei uhi. Hiai joint meeting ah Kuki Inpi/CCpur, Hmar Inpui, Zomi Council leh Mizo Peoples Convention tel in nam tuamtuam makai tamtak paikhawm ua, JCILPS-te panlakna doudal ding dan a genkhawm banuah JAC Against Anti Tribal Bills te dinmun ding kikup khawmna nei ua, Bandh leh Strike om hun chiang a “saklam-khanglam” chihte om nawnlouhna dia panlak ding dan genkhawm uhi.


Tuaban ah, nam makai paikhawm te’n Land Record toh kisai banah Kidnap tungtang tel in Joint Leaders Forum bawl khiak ding dan tel in thu tuamtuam genkhawmna nei uhi. JCILPS te panlakna doudal ding dan toh kisai in nam makai paikhawm te apan ngaihdan tuamtuam lakkhawmna om in, a kinthei lam a hiai thu toh kisai genkhawm nawn ding in thupuk ua, JAC te dinmun ahihleh zingchiang zingkal dak 7:00 a JAC makaite toh KKL Complex, IB Road, Headquarters Veng ah genkhawm hiding in thupuk uhi.


XXXXXXXX

 

Jawaharlal Nehru Institute of Medical Sciences (JNIMS) in General Nursing & Mid-wifery (GNM) zousa Staff Nurse sem ding mi 219 lakna ding advertisement a suah nung in, district chih in amau district a Employment Exchange chiat a tuni apan enrolment bawl theih dia thusuah a bawl dungzui in tuni’n Employment Exchange luun zou hial hi. Hiai post ahihleh GNM zousa kum 38 nuailamte a ding hi a, post awng omzah ahihleh ST te a ding in post 80, SC te a ding in post 5, OBC (Meitei) te a ding in post 33, OBC (Meitei Pangal) te a ding in post 11 banah OBC (T/N) a ding in post 1 leh General te a ding in post 89 hi. Tuni apan in district chih ah enrolment kipan a, tua toh kiton in CCpur District Employment Exchange ah tuni’n mi 150 val in enrolment bawl in, May 13, 2016 tan a bawl theih ding hi’n kigen hi. Enrolment bawl ding khempeuh in Employment Exchange Card tawi ngai ding a, Employment Exchange a registration bawl nailou te’n bel educational certificate teng tawi in registration bawl ngal theih ding hi’n kigen hi.

 

XXXXXXXX

 

All Tribal Movement of Lamka (ATML) in thusuah bawl in, JCILPS in state pumpi huap a Public Curfew a puan un Singtang bial leh Phaijang bial ah kikhenna liantak om ahih dan muhtheih a om hi’n taklang hi. ATML thusuak in a taklat dan in, JCILPS in apaisa May 5, 2016 apan dakkal 42 sung Manipur State pumpi a Public Curfew a puan un Jiribam Sub-Division tellou in phaijang bial a district 4 kia ah zuih ahih lai in Manipur singtangbial mun khat ah leng zuih hilou ahih man in CORCOM in a tuaklou zuih ding thu piak suak lel a, hiai in Hill District leh Valley District kikal a kigamlatna liantak omta ahih dan chiangtak a langsak hi’n taklang hi. Tuabangkal ah, ATML in zingchiang nitak dak 6:30 in YPA Bungmual Unit inntekna in Public Awareness Programme a 7veina Bungmual YPA Hall ah nei ding uhi. Hiai hun ah gam leh leitang a dia hinna ana pia salpha mi 9-te suunna hun a om ding banah slogun sapna om in, K Paumuanthang, ATML Spokesperson in thugenna hun zang ding hi.

 

XXXXXXXX


Angel’s Vision in cable line etkaina toh kisai a thil paidan felzaw om theihna ding tupna a Lineman (Technician) nna sem ding lakna dia application a sap nung in apaisa May 7, 2016 (Kiginni) zinglam dak 10:30 apan in Angel’s Vision office, Hebron Veng, New Lamka ah Personal Interview nei in Lineman (technician) a sem ding mi 4 lathak uhi. Thutut kingah dan in, Lineman a sem ding lakna toh kisai in mun tuamtuam apan mi 24 in application pelut in, personal interview neihna hun ah mi 16 kihel ua, S. Khaikhopau Ngaihte, MCS, CT Lian Guite, New Lamka West MDC leh Elvis Gindam te interview board a tu in interview nouneltak a nei in sunnung dak 2:30 in zousiang uhi. Angel’s Vision in Lineman (Technician) dia a lakthakte ahihleh T. Pauliansang of V. Munhoih, T. Khanlal of V. Munhoih hi ua, amau te’n tuni’n joining report pia in nasep pan ngal uhi.


XXXXXXXX


JNV Tuinom a Class VI entrance exam result puankhiak a omta in mi 80 in lohchinna ngah uhi. Thutut kingah dan in, Entrance Exam ahihleh apaisa January 9, 2016 a neih a om hi a, huai ah student 945 kihel in, Block chih in amau block headquarters chiat ah exam pia uhi. Lohchinna ngah te’n May 9, 2016 apan May 27, 2016 tan in JNV Tuinom ah Admission Form lak theih ding a, form la khempeuh in May 31, 2016 tan a apiaklut teitei uh ngai ding hi’n thutut kingah hi. Tuabangkal ah, 2016-17 Academic Session a ding Class IX Entrance Exam leng June 19, 2016 in neih hiding a, candidate teng a hun lap dia kuan chiat ding in Principal Incharge, JNV.Tuinom in theihsakna bawl hi. Class CI Entrance Exam Result ahihleh Angel’s Vision Office, New Lamka ah leng et theih ding hi.


XXXXXXXX


Deptt. of Science & Technology, Manipur sensakna tungtawn in Manipur State sung a Private leh Government School a kai Class IX student te’n “The 19th DST Science Excursion” nei ding in zinkhia ua, exercusion a tel ding in Ccpur District ah school 6 apan student 12 telkhiak in om uhi. CCpur District apan Excursion a tel dia telkhiak a om student-te ahihleh Blue Star Academy, Sim Veng; S. Peter’s School, New Lamka; VK Tawna High, New Lamka; Ebenezer Academy, New Lamka; Manipur Boarding School, P. Gelmol leh Kangvai Sec. School, Phougakchao Ikhai apan hi ua, department in Imphal tan a tunna ding uh arrangement bangmah bawlsaklou ahihman in, M. Gouzamang Guite, EM/ADCC in awlmohna liantak toh Imphal tan a tunna ding uh ngaihtuahsak a, zan zingkal dak 6:00 in a tenna inn ah khak khiakna program saulou zat in om hi.

 

Hiai hun ah, bialtu MDC in excursion ah student a siam tungtuante kia telkhiak a om uh ahih dan uh gen in, deihsakna sangpen pia a, district ai-oh tel ahihman un pilvangtak a gamtang a, theihbeh tamtak toh hong tungkik ding in hasuan a, Pastor Dr. M. Gousuan, Local Pastor, EBCC/Khominthang in amaute a ding in thumsak hi. Thutut kingah dan in, “The 19th DST Science Excursion” a tel ding in Manipur pumpi ah school tuamtuam apan student 65 telkhiak a om in, amau Guwahati a ataam sung un Regional Science Centre, Khanapara; Cane & Bamboo Factory, Jagi Road; Indian Institute of Technology (IIT), Guwahati; Assam State Museum leh Assam Zoological and Botanical Garden telin mun poimawh tuamtuam 16 pha ding ua, May 12, 2016 in hong tungkik nawn ding uh hi’n thutut kingah hi.


XXXXXXXX


Baptist Youth Fellowship, Pethuel EBCC in apaisa May 7, 2016 (Kiginni) zingkal in Lamka Damdawi Inn a Children Ward a damlou a om naupangte vehna leh thumsakna nei uhi. Hiai hun ah BYF member tamtak paikhawm in Local Pastor banah saptuam upa hunkhop in kithuahpih ua, Pastor K. Pumsuanthang, Local Pastor, Pethuel EBCC leh saptuam upa te’n Children Ward a naupang damlou etkol a omte khat khat in thumsak uhi. Thutut kingah dan in, BYF Pethuel EBCC in damdawi inn a om damloute veh a thumsakna neih ding chih year plan a aguan uh sepsuahna dia Missionary Day (May 7) ni a Lamka Damdawi Inn Children Ward a om naupangte vehna va nei uh hi’n kigen a, Children Ward a etkol a omlel naupang 30-te BYF Pethuel EBCC in Rs. 100 chiat in veh uhi.


XXXXXXXX


Lions Club a D-322D huamsung a District Governor hihna len lel Lion Dr. Sunilkanta Dhar, MJF in tuni zinglam in Lamka hong pha in, Saulim Restaurant, New Lamka ah Lions Club CCPur Greater a member-te toh kithuah khawmna nei uhi. Lion Dr. Sunilkanta Dhar ahihleh Lion H. Manikumar Singh leh Lioness M. Swarupini Devi, Regional Chairperson tel in Lions Club Imphal leh Lions Club Moirang apan mi 9 in hon zui ua, kithuahkhawmna hun saulou a neih zoh un sunma dak 11:30 vel in Imphal ah kiksik nawn uhi. Hiai hun ah Lions Club CCPur Greater a Chairman hihna len lel Langkhapau Guite, Chairman, ADCC in vaidawnna thu gen in, Lions Club CCPur Greater in mipite a dia phatuam ding thil bangzahhiam semkheta uh ahih dan gen hi. Dr. Sunilkanta Dhar in Lions Club kichi khovel a philantrophic organization lianpen ahih dungzui in Lions Club min a thil kisemkhe teng mimal hamphatna ding ahihlouh dan member te’n mipite a theihsiamsak poimoh mahmah ahih dan gen a, Lions Club in sanitation toh kisai awareness programme a tam thei lam sai a, mipi a tam theilam in siangthouna a poimoh dan a theih uh poimoh mahmah hi’n gen hi. Lion Dr. Sunilkanta Dhar, District Governor ahihleh Tripura mi hi a, ama etkaina nuai ah District 30 vel om hi’n kigen hi.


XXXXXXXX


Young Paite association (YPA) Ghq makaihna in zan Pathianni in YPA New Lamka Block leh YPA Lamka Block toh kithuah in YPA Hall Singngat ah YPA Singngat Block vehna program zang uhi. YPA Singngat Block vehna hun ah tulel in YPA singngat Block nuai ah Unit 4 Bethel Veng Unit, Mission Veng unit, Station Veng unit lh Zion Veng unit om hin Vungzadong, President YPA singngat Block in gn a, YPA kichi zan zek a kiphut khia hilou in, makai masate’n Pathian lau kawm a tup leh ngiim hoihtak toh ana phuhkhiak uh ahi chin Lianmuanthang Valte, secretary YPA New Lamka Block in gen a, sing a bul a kip a, foundation a hoihleh a muanhuai bang in YPA leng tup le ngim hoihtak toh kiphutkhia ahih ziak in, pawlpi detdou ahi chi hi. Pathian in Nam khat a hon bawl ahih ziak in Nam hihna kisak theihpih zaw in zuak keini chin mipi paikhawmte mai ah gen a, saptuam I awlmohna zahzah toh YPA awlmoh hile khotang chidam ding ahi chi hi. YPA Lamka Block President in ahihleh, YPA tup leh ngiim t poimoh ngaih kawm in tlawmngaihna mah I pibawl ding uh cin gen a, lusun te dahpih dan siam in, gamsung buaina toh kisai in leng a tampen I hihna uah active part lak ngai ahihdan gen hi. Maban a MLA kiteelna om ding a mipite cihtak leh chihtaklouh kilang ding a, kum 5 a ding a 5000 chikhawng a I kizuakte ziak a gamsung sia ahihdan thei in, gamsung awlmohna toh kuamah kizuak keini chi hi.

 

Paukhanmawi Guite Secretary, YPA Ghq in a genna ah, YPA danbupi khekthak a om in, huai ah 2015 ammendment dungzui in Unit teng in kitelna a neih chiang un April in neizelta ding ua, Ghq ahihleh June kha in neih hiding chi hi. Chinngaihpau President YPA Ghq in leng a thugenna ah Van, Gari leh building neih ziak a YPA kihilou hin gen a, chihtakna ziak a YPA hat ahihdan thei in, chihtakna mah pibawl thakni chin mipi paikhawmte chialna bawl hi. YPA in gamsung a thangtatna leh sianthouna ngai poimoh in Thangtatna a kiamna ding in Dress code tanpha bawlkhiak hi a, Damdawi inn hahsiang thouna leng neih ahihban a, khopi sung hasiangna leng nih a om hin gen hi. YPA in lailam a khantouhna om zawksemna ding in kum 3 paita apan Award pia uh hin leng gen a, gamsung buaina toh kisai in, khenkhat in MLA ki-candidate sawm hidan in demna bawl mahle uh Minister dinmun piak hileh leng sanglou ding hin gen a, YPA tup leh ngiimte lak a khat gamsung khantouhna kichi etkaina ah YPA in pan a laksate nungtolh lou a paitou pih zel in, tuni tan MLA 2 YPA in boycott a puan uh leng lakkhiak hi nailou hin gen hi.


xxxxxxxxxxxx