You are here: HomeRSS FeedsLatest News

Angel's Vision News | May 19, 2016

Thursday, 19 May 2016 21:00

Zomi Council in tuni suman dak 11:00 in PTC Conference Hall, Hiangtam Lamka ah Zomi Council Cabinet Committee (ZCCC) meeting nei in, Cabinet kekletna leh Anti-Tribal Bill 3-te toh kisai a Coordination Committee bawlkhiak ding tungtang genkhawmna nei uhi.


Hiai meeting ah ZC Cabinet Committee a member teng kihel in, May 13, 2016 ni a Zomi Council, Kuki Inpi Manipur, Hmar Inpui, Mizo Peoples Convention leh United Naga Council in joint meeting a neihna ua state-level co-ordination committee bawlkhia a, innpi te’n member 2 chiat sawl dia thupukna a bawl dungzui un Zomi Council in state-level co-ordination committee a member ding in Dr. R. Sanga leh KG Tungnung sawl ding in thupuk ua, zingchiang (May 20) a Kuki Inn, Imphal ah meeting neihna hun ah Zomi Council nuai ah tribe President teng tel ding in thupuk uhi. Cabinet Expansion toh kisai in Zomi Council Vice Chairman-te portfolio ding hiai bang in guang uhi. UZO President in Organization len in, TCU President in General Administration Department len ding a, Gangte Tribe Council President in Political Affairs, Mate Tribe Council President in Custom & Culture, PTC President in in Village Administration, Kom Union President in Women & Child Development, Thangkhal Peoples Organization President in Youth Affairs leh VPC President in Planning & Development len ding in thupuk uhi.

 

XXXXXXXX

 

JAC Against Anti-Tribal Bills in tuni’n thusuah bawl in, apaisa May 16 zankim apan May 18 zankim tan dakkal 48 sung daih ding Manipur Hill District a Total Shutdown a puan uh kuapeuh in kithuahpihna a piak ziak un kipahthu gen uhi. Thusuak in a taklat dan in, Phaijang mi te’n kha 2 sung lel kiphinna a neih uh Anti-Tribal Bill 3 hong pawtkhia in, India President in assent pe dia ni 3 sung lel nohna a neih lel un All Political Party teng in delegation sawl ding in thupukna bawl in om ngal hi. Huchi kawmkal ah, singtangmi te’n ni 261 sung vengveng kiphinna a neih uh ngaihsak ahihlouh banah awlmoh in leng neilou ua, huai in phaijang mi leh singtangmite kal ah kideidanna nasatak om ahih dan langsak hi’n taklang hi. Hiai Bill 3 te’n singtangmite hihna, singtangmite gam leh leitang banah singtangmite nek-tak zonna sukha ahih dan taklang kawm in, singtangmite a ding in political solution lou ngal pom ding dang bangmah omlou ahih dan taklang a, hiai toh kisai a mipi kuapeuh khem hai a kuamah omlou ding in ngetna bawl uhi

 

XXXXXXXXX


Board of Secondary Education, Manipur in Simte leh Gangte Pau pen Major Indian Language (MIL) a dia guanglut in tu 2016-17 Academic Session apan zat theih dia order a suah toh kiton in Simte Literature Soceity (SLS) in Class IX leh Class X te’ tawi dia a bawl textbook-te Pathian kiang a latna tuzingkal dak 7:00 in Simte Inn, Sim Veng ah nei uhi. Hiai hun zatna Simte Nam sung a pawl tuamtuam apan makai hunkhop paikhawm in, Langkhathang, Chairman, SLS in vaidawnna thu gen in Rev. H. Thangliankham in Pathian kiang ah latna nei hi.

 

Thutut kingah dan in, Simte nampi in April 25, 2015 in Government apan in Simte Language Recognition ngah in, 2016-17 academic session apan naupang te’n MIL (Simte) Subject a tawi theihna ding un Simte Literature Society in nasatak a panla in, January 30, 2016 in Pre-Primary apan Class VIII student te’ zat ding “Simte Silchiilbu (Simte Primer)” kichi honkhiak a ana omta in, Class IX leh Class X MIL (Simte) Subject ding leng Board of Secondary Education, Manipur in apaisa May 11, 2016 in posuahta in tuzingkal in Pathian kiang ah latna neih a om hi’n kigen hi. Simte Literature Society in Class IX leh Class X te tawi ding MIL (Simte) Subject a bawlte uh ahihleh Simte Siamzilbu (Simte Course Book), Simthu leh Zaila (Simte Literature) leh Simte Haam Gelhdan leh Thupuahdan hi a, Class IX student te’n tu 2016-17 Academic Session apan tawi pan ngal ding ua, Class X-te’n ahihleh kum nawn apan tawi thei pan ding uh hi’n kigen hi. Tuzingkal a programme zatna hun ah makai tuamtuam te’n thugenna hun zang in Thangkhanlal, Secretry, Simte Literatyre Society in mipi paikhawmte mai ah order simkhiakna nei hi

 

XXXXXXXX

 

All Tribal Movement of Lamka (ATML) in zingchiang (May 20) zingkal in Lamka khopi sung ah Salphate Zahna Flag vom zuakna nei nawn ding uhi. ATML in sum muhna bangmah neikei mahleh mipi kiphal leh mi phatuamngai mimal tuamtuam te’n a thohkhawm uh sumte zang in mun tuamtuam ah Awareness Programme sai zel in, huai mipite lak ah khanlohna nasatak tun zel hi’n kigen hi. Sum muhna ding dang neilou uh ahihman in, tuma lam in Salphate zahna etsakna ding in gari tuamtuam a taak ding Flag vom bawl in khopi sung mun tuamtuam a zuak ua, tu in flag kitaak tawm hiaihiaita ahihman in, zingchiang in khopi sung mun tuamtuam ah zuakna nei nawn ding ua, kuapeuh in ana leisak siausiau ding in ngetna bawl uhi.

 

XXXXXXXX


NERCOMP/CCPur in Partner NGO dia a laklut thak Centre for Community Initiative (CCI) in a kul leh a poimoh dandan a azat ding Discover Bike khat a piak tuni zinglam dak 10:00 in CCI Office, Nehru Marg ah latna nei uhi. Hiai hun ah Centre for Community Initiative leh The Malsawm Initiative a sem staff-te banah Mr. Sukajit, Project Manager, NERCOMP/CCPur tel in staff bangzah hiam kihel ua, Pastor T. Tunson, Local Pastor, Bethel EBCC, Lailam Veng in Pathian kiang ah latna nei hi. Thutut kingah dan in, 2014 kum in CCPur District ah NERCOMP hong lut pan in, Partner NGO ding in Action for Women & Child Advancement (AWCA), Good Samaritan Foundation, MassCORD, Rural Aid Services, Rural Community Development Service, Rural Development & Research Agency, Sahei Foundation leh Social Transmission Agency lalut ua, tukum in extension bawl in NGO 3 – CBS, VEDAS leh Centre for Community Initiative la lut thak ua, amau 2020 tan contract bawl in, project paidan dungzui in behlap touh zel hiding hi’n kigen hi. Centre for Community Initiative in NERCOMP apan Discover Bike a ngah uh Thanlon Sub-Division sung a Bukpi khua pansan a Community Based Rehabilitation a neihna ua zat hiding hi’n Pauzagin Tonsing, Executive Director, CCI in gen hi.

 

XXXXXXXX

 

Kuki Student Organization (KSO) Churachandpur in Tuibuang a Mini-Secretriate kibawl lel tuni’n etkhiakna nei in, September kha sung a luah theih dia zousiang ding in theisak uhi. Tuibuang a Mini-Secretriate ahihleh August 2011 kum a kibawl pan hi a, Hyderabad pansan Avantika Company-te etkaina nuai a kibawl ahih banah Site Engineer 2 etkaina nuai a nna sep a om hi’n kigen hi. Tuni a KSP/CCPur makaih a etkhiakna neihna hun ah, inspection team te’n building kibawlte hoihtak a enkhia in, kongkhak kibawlte set theih ding khat leng a om lou ahih dan mukhia in, a kinlam a bawl hoih ding in theisak ua, kal nawn sung a bawl hoih ahih kei leh khetsiat hiding in gen uhi. Mini-Secretriate ekkhiak hun ah KSO/CCPur Spokesperson Mimin Khongsai in press/media-te mai ah agenna ah Mini Secretariat ahihleh Hyderabad pansan Avantika Company-te etkaina nuai ah August 2011 in kipan a, kha 24 sung a zawhsiang ding bikhiah himahleh tunitan zawhlouh a om in, hun paisa ah leng enkhe ngei uh hi’n gen hi. Mini-Secretariat a DLO block 1 & 2, Barrack 2 leh staff/family quarter teng September 2016 sunga zawhsiang ding in nasemtu kiang ah theisak ua, huai banah DLO block 3 & 4 leng March 2017 tan a zawhsiangding in theisak ua, hunchiam tan a contractor nasep a zohkei leh nasep khaksak ding in leng theisak uhi. Mini Secretarit bawlnang in Rs. 39.65 crores sanction lak ah tutan in 28.5 crores zat gaih hita hi’n contractor in gen hi.

 

XXXXXXXX


Lamka Damdawi Inn cheimawina ding leh huih siangthou leh namtui hoihtak a muh theihna ding lametna in LD Simte, Social Worker in mun tuamtuam apan Gam Sahei Paak kaikhawm in tuni’n damdawi inn kong ah Bung Kung ah koih hi. Hiai Gam Sahei Pak-te ahihleh LD Simte in ama mimal sum seng a Thanlon Sub-Division huamsung a om Suangpek gam a mi a zonsak hi a, zan zek in sai-ip khat hong tung in tuni’n Lamka Damdawi Inn kong a Bung kung ah koih in om hi. LD Simte in a gendan in, damdawi inn a lungkham mangbang a om te’n damdawi inn huangsung a pak kilawmtak a muh ua, a gim namtui a zak theina ding uh tupna a akoih hi’n gen a, 2014 kum pek apan ana tupsa himahleh tukum a semsuah zoupan ahih dan gen hi. Hiai Sahei Paak te’n lungkham mangbangte naktak a ahehnep theih banah damdawi inn cheimawitu ahih lam phawk thak a, kuapeuh in mawk khoih siatlou ding in ngetna bawl hi.


XXXXXXXX