You are here: HomeRSS FeedsLatest News

Angel's Vision News | April 06, 2016

Thursday, 07 April 2016 09:07

Krishi Vigyan Kendra (KVK) Churachandpur saina in ICAR Research Complex, Pearsonmun ah Farmers Fair leh Pradhan Mantri Fasal Bima Yojana (PMFBY) toh kisai Awareness Programme zatna om hi. Sunma dak 11:00 in Chief Guest a pang T. Khaikhomang, Chairman, Finance Committee, ADCC in Farmers Fair hongkhia in, loubawlmi leh department tuamtuam te’n stall a bawlte uh enkhia a, Guest of Honour a pang TK Simte, MCS, Asst Commissioner, Functional President a pang Dr. Narendra Prakash, Joint Director, ICAR/Manipur leh hiai program zatna Special Guest hihna toh uap M. Ginzalian, AO, Agriculture Department leh G. Thangchinkhup, AGM/NABARD te’n Chief Guest inspection neihna kithuahpih uhi. Farmers Fair ah Government Department apan KVK/CCpur, NYK/CCPur, NABARD, ATMA/CCPur leh NERCOMP banah NGO apan Widows Welfare Association, Forever Self Help Group leh Eden Farmers Club te’n stall bawl in, thil tuamtuam a neihte uh mipi muh ding in phoukhia uhi. Pradhan Mantri Fasal Bima Yojana (PMFBY) toh kisai Awareness Programme ahihleh Conference Hall a neih a om in, hiai hun ah mun tuamtuam apan loubawl mi tamtak kihel uhi.

Program hunsung in KVK in loubawl mite zat tangzang dia a bawl uh haichi tuamtuam chiin ding dan leh etkol ding dan booklet a abawl uh Chief Guest leh Guest of Honour te’n hongkhiakna nei in thugenna hun zang uhi. G. Thangchinkhup, DDM/NABARD in Pradhan Mantri Fasal Bima Yojana (PMFBY) kichi India gamsung a loubawl mite’n theihkholhlouh vangsiatna a tuah hun chiang ua a sem sent eng uh government apan a muh kik theihna ding ua Prime Minister Narendra Modi in January 13, 2016 a hon patkhiak ahih dan gen in, hiai ding in Centre Government in 17,600 crores bikhiah ahih dan gen a, M. Ginzalian, AO/Agriculture Department in hichibang scheme hoihtak government in a hon patkhiak hamphat huai mahmah ahih dan gen in, loubawl mite’n hiai pen tha thak lakna dia zat a deuh thu gen hi. Functional President a pang Dr. Narendra Prakash, Joint Director, ICAR Manipur Centre in Pradhan Mantri Fasal Bima Yojana kichi scheme toh kisai pulakna nei in, hiai scheme pen loubawl mite a ding liauliau a kibawl ahih banah Kharif Corp chiingte a ding in premium 1.5 percent leh Rabi Crop chiingte a ding 2 percent premium lel hiding ahih dan a gen banah hiai scheme pen tunung sawtlou a zat pah hita ding hi’n gen hi. Guest of Honour a pang TK Simte, Asst. Commissioner in CCpur District ah factory lian om nailou ahihman in mipite nek muhna pen loubawlna kia hilai ahihdan gen a, loubawl mite khualna a government in hiai bang scheme hoihtak hong patkhiak pen district mipite a dia hamphat huai sawnsawn ahihman in kalbi poimohtak suak a, kuapeuh in hiai pen tha thak lakna dia zang ding in hasuan hi.

 

Chief Guest a pang T. Khaikhomang in a thugenna ah, nidanglai in pi leh pute van vuahtui a kinga in lou ana bawl in kum khat kham ding ana khoukhe sek ua, tuhun in ahihleh thil omdan teng kikhek in, vuah zuk hun ding leng gen kholh theih hi nawnlou ahihman in loubawl mite’n kum teng in manna nasatak ana tuak gige uh hi’n gen hi. Loubawl mi kuapeuh in season khat sung a theihkhollouh vangsiatna a tuah hun ua lou bawlna dia sum ana sent eng uh government apan a muhkik theihna ding uh tupna a Prime Minister in hiai Pradhan Mantri Fasal Bima Yojana kichi Insurance Scheme hon patkhiak ahih dan gen a, hiai pen kuapeuh in thei a, hiai tungtawn a kuapeuh in panlak thak a deih thu gen hi.


XXXXXXX


District Task Force – Immunization in tuni zun dak 12:00 in TK Simte, AC to DC office chamber ah meeting nei in, Mission Indradhanush Phase III zat ding dan leh National Switch Day zat ding dan toh kisai genkhawmna nei uhi. Hiai meeting ah TK Simte, AC to DC banah Lalthanzam, BO (HQ), CMO/CCPur, DFWO, MSF leh DIC-te kihel ua, Dr. VC Pau Tonsing, DFWO/CCPur in National Switch Day toh kisai pulakna nei hi. Aman a gendan in, Zeng dalna damdawi Trivalent OPV kap a om sek pen Bivalent OPV a khekna dia government in program a bawl hi a, April 25, 2016 apan Bivalent OPV zat pat hidia program kibawl hi’n gen hi. Mission Indradhanush toh kisai a genkhawmna uah, 2015 kum in Phase I leh Phase II zoh ahih nung in April 7 apan April 14, 2016 sung a Phase III Round khatna neih hidia centre in bikhiah a bawl himahleh CCpur District in tuni tan fund a muh nailouh ziak ua zingchiang a pat hitheilou ding in gen ua, fund om hunhun a nasep pat hiding in gen uhi.


XXXXXXX


Dept. Of Science & Technology nuaia Autonomous Government Agency, Manipur Renewable Energy Development Agency (MANIREDA) in Lamka Police Station kong apan DC/CCpur tenna inn tan Solar Street Light a thuah khit nung un tuni’n Police Station sak apan Tedim Road ah fitting pan nawn uhi. Thutut kingah dan in, kha masa in MANIREDA te’n Lamka Police Station apan DC/CCpur tenna inn kikal ah Solar Street Light 40 vel thuah in kha masa in zousiangta in, Peace Ground apan Lamka Police Station kikal leng zousiang in nitak teng in vak phingphengta hi. Tu in Lamka Police Station apan Lanva Lei kikal ah thuah pan in, a zohna chiang chiang uh vak ngal zel a, Lamka khopi sunbg etlawm tuan mahmah hi’n kigen hi.

 

XXXXXXX


Manipur Tribal Movement Road Construction te’n tuni sunnung dak 3:00 in ZOLLS Office, Gouchinkhup Veng, New Lamka ah Lamka pansan Press/Media-te kimuhpih in, Guite Road bawlna toh kisai a nasep dan pulakna a neih banuah sum dinmun toh kisai mipi theih ding in report pia in, nasemte leh gari zat man piakkhiakna nei uhi. Hiai hun ah MTMRC member teng kimtak in kihel ua, G. Nengdouthang, Chairman, MTMRC in mipi leh saptuam tuamtuamte kithuahpihna ziak a tuni tan nasepna sutzop theih a om ahih dan gen in, maban ah sep ding tamtak omlai ahih dan gen a, tu in sum dinmun toh kisai giautauna nasatak om ahih dan gen in mipi lam apan kithuahpihna nasa zaw sem poimoh ding ahih dan gen hi. Thathang Langel, Secretary, Works in tuni tan nasepna toh kisai pulakna nei in, tu in kilometer 2 leh metre 200 vel ah suanghum sungzoh in omta a, suanghun kisungna tengteng a vek in kilometer 3 leh metre 300 lak vel phata hi’n gen hi.

 

Tu in vuah a zuk nasat luat ziak in buannawi a tam mahmah ziak in, nasepna a kizang Tipper 3, truck 1 leh Tractor 1 te’ sep ding om nailou phot ahih man in inn lam ah sawlkik in om phot a, kho keu hunhun chiang in amau nasep pan nawn ding uh ahih dan gen a, tu in JCB in side drain khut lelel in, zan tan in metre 800 tan zouta hi’n gen hi. Thangkhanlun Samte, Finance Secretary, MTMRC in sum dinmun toh kisai mipi theih ding in report pia in, lampi bawlna ding in mimal leh pawl tuamtuam banah saptuam tuamtuam apan sum Rs. 12,04,529 lut in, senna lam ah gari zatman leh driver-te nitha in Rs. 6,70,200 bei in thautui leh nek-le-tak man ah Rs. 5,12,195 bei in tulel in MTMRC khut ah Rs. 22,134 omlel hi’n gen a, niteng in sum Rs. 45,000 vel bei zou hi’n gen a, gari zatman leh driver-te nitha piakkhiakna nei ngal hi. Thanga Tonsing, Spokesperson, MTMRC in leng thugenna saulou nei in, mipite pangkhawm a, tua bang a nna i septouh zel uleh i lampi bawl uh gamdangte lampi toh a kilamdanna om tuanlou ding ahih dan gen hi.

XXXXXX