You are here: HomeRSS FeedsLatest News

Angel's Vision News | April 14, 2016

Thursday, 14 April 2016 22:14

Manipur Tribal Road Construction in kithuzak tuahna hoihzaw se mom theihna ding tupna in CBA HQTRS office, Gouchinkhup Veng, New Lamka ah room khat luah thak in tuzingkal in honkhiakna leh latna nei uhi. Hiai hun zatna JAC Chief Convenor H. Mangchinkhup tel in MTMRC makai teng kimtak in kihel ua, S. Zamdoupau, Vice Chairman, MTMRC in hun zatna makaih hi.

Chinlunthang, President, UZO GHQ in MTMRC te’n office tanpha hong thei dia pan a lakna uh thupi sa mahmah in, Lamka mipite a ding kia hilou a Manipur a om singtangmite a dia hiai bang a kal a suanna uh phat huai a sakthu gen in MTMRC-te Information Centre ding hongkhia a, Rev. Dr. Sut Khan Thang, Executive Secretary, CBA in Pathian kiang ah latna nei hi. Program hunsung in G. Nengdouthang, Chiarman, MTMRC in Information honkhiak a aomna ziak pulakna nei in, hiai Information Centre pen panpihna pe ut banah lampi bawlna toh kisai a ngaih dan tuamtuam neite toh kikup khawmna mun dia zat hiding ahih dan gen hi.

 

XXXXXXXX


Tuni sunma dak 11:30 in District Hospital Seminary Hall ah ART Plus Centre honna leh State AIDS Clinical Expert Panel (SACEP) Meeting om hi. Hiai hun zatna Lal Hossan, Vice Chairman, ADCC in Chief Guest hihna toh uap in ART Plus Centre hongkhia a, Dr. Y. Premchandra Singh, Nodal Officer, ART Plus Centre in vaidawnna thu gen in, SACEP Meeting a poimoh dan pulakna nei in, CCpur District a SACEP member dia guan a omte mellahna nei hi. SACEP member dia guan a omte ahihleh Dr. Lalbiakdiki, Physician, Dr. Neison Kom, Paeditrician, Dr. Rohini Kumar, Paeditrician, Dr. Kimboi Tonsing, Gynaecologist leh Dr. Tiken, Dermotology hi ua, tuni a meeting neihna hun ah amaute leng kihel uhi.

 

Hiai hun ah Imphal apan Dr. Bhagyabahati, Heado of Dewpartment (Madicine), RIMS, Dr. Prof. Ksh. Birenda Singh, RIMS, Dr. N. Kameshwar Singh, Project Director, PCoE, JNIMS leh Dr. RK Rosie, Hy. Director, MACS banah Dr. Y. Nabachandra, Nodal Officer, ART Plus leh Dr. HL Liensang, MO, ART Centre/CCpur tel in SACEP member teng Meeting ah kihel uhi. Thutut kingah dan in, tulel in India gamsung pumpi ah ART Plus Centre 42 kia om in, tuni a honkhiak a om ART Plus Centre/CCpur leng Manipur State a dia a masapen hi’n kigen hi. ART Plus kichi ahihleh ART damdawi in a zoh nawnlouh PLHIV-te nek dia kibawl hi a, tuni a meeting neihna hun ah SACEP member te’n ART Plus damdawi enkhawm in, a piak ding dan toh kisai genkhawmna nei ua, PLHIV bangzah hiam kiang ah leng CD4 Count test leng nei uhi.


XXXXXXXX


Kumlui August 31, 2015 nitak apan Manipur singtang gam a buaina om hun a liamna tuak G Thangkaplian, Gouzakham leh Muansiam te'n tuni a Chief Convenor, JPO kiang tungding laithon a khak uh kimu in a taklat dan in, August 31 nitak a thiltung ziak a mi 9 si a, midang tamtak in liamna atuahna tungtang uah liam leh bai nasa diak te'n damsung a zi leh ta vaak zou nawnlou a, zawngkhal dending mi bangzah hiam omlai uh ahihdan taklang uhi. Hospital a etkol ahihlai un DC/CCpur apan panpihna dangka 10,000 leh JPO apan dangka 5000 ngah uh a, himahleh liamna tuak tamzawte tuni tanpha a ki-enkol tou den lai in, kikepna ding sum leh pai poimoh den uhi. A liamna te uh etkai saka om bang un, niteng nek leh taak ngah na ding leng poimoh uh hin tua mi thum te'n gen uh a, tuni tan nek leh taak a huhna bangmah mulou uh ahihman in, a haksatnate uh JPO in ngaih poimoh sakding in leng ngetna nei in, maban ah ki-etkolna ding poimoh tou den ding ahihman un JPO in a kinthei lam a huhna peding in leng ngetna neingal uhi.


xxxxxxxxxxx


District Health Society, CCPur saina in tuni sunma dak 11:00 in CMO Conference Hall ah PHC/CHC tuamtuam a Medical Officer Incharge-te a ding in Maternal Death Review (MDR) toh kisai training om hi. Hiai hun ah Seiboi Mate, DPM/CCPur in vaidawnna thu gen in, CMO/CCPur in Inaugural Speech gen a, ama a thugenna ah, kum teng in India gamsung ah nupi naupaai Lakh 28 val om in, Lakh 26 vel te’n damtak a nau a neih lai un nau neih ziak a si 67,000 val a om banah naungek kum chinglou a si hunkhop omzou hi’n gen a, hiai toh kisai India Government in ngai poimoh mahmah in, hiai toh kisai beisak theihna ding in Program tuamtuam pankhia a, huaite lak ah Maternal Death Review leng telkha hi’n gen hi. Thutut kingah dan in, hiai training pen PHC leh CHC a Medical Officer Incharge banah Block Program Management Unit staff-te leh ASHA Fecilitator-te a ding hi a, himahleh Mission Indradhanush toh a hun a kituah khak ziak in Medical Officer Incharge tamzawte kihel theilou ua, Dr. Sylvia, State Nodal Officer, MDR in Maternal Death Review toh kisai sinsak hi.


XXXXXXXX


YPA Lamka Block in tuni’n Lamka Damdawi Inn Maternity Ward a nau nei khin sisan chauh ziak a etkol a om Mrs. Ngai Mary (20) w/o Tuankhanlam a ding mi phatuam ngaite tungtawn in sisan Unit 2 pia uhi. Mrs. Ngai Mary ahihleh Selbung khua, Myanmar a om hi a, nau nei ding in Singngat a om a sungkhat bel in hun bangtan hiam a ki-etkol nung in tu Seppatni in Lamka Damdawi Inn pungtun in om a, doctor te’n a dinmun a siat ziak in huai ni mah in emergency operation bawl in, nau leng hoih tak in neihsak in om a, himahleh sisan a chauh ziak in tuni tan a dinmun hoih khe thei taktak lou in om hi. Mrs.Ngai Mary leh a sungkuan te’n Lamka ah sungkhat laina neilou uh ahih man in, YPA Lamka Block makaite kiang ah thil omdan tun in Block heutute’n theih tawp a panla in tuni’n sisan Unit 2 pia uhi. Mrs. Ngai Mary a dia phatuamngai tak a sisan pete ahih uleh YPA Central Lamka Unit apan Miss Mawinunthari (20) d/o H. Sanglian of Salem Veng leh tulel a YPA Lanva Unit a President hihna len lel Thianlungmuan (34) s/i T. Vunglal hi uhi.


XXXXXXXX


Tuni sunnung dak 2:30 in KKL Complex, Headquarter veng ah Joint Action Committee against Anti Tribal Bills in Lamka pansan thuthaksaite kimuhpihna nei in, huai ah Delhi a zinna lam uh Report na leng nei uhi. Hiai Press meet hun a JAC convenor H Mangchinkhup in a gendan in, JAC apan member 3 in apaisa March 30, 2016 in New Delhi zuan in zinkhia uh a, Delhi khopi a tunnung un, March 31, 2016 in Centre for Study of Soial systems, Jawaharlal Nehru University in a sai uh, One Day National seminar on Tribals and constitutional safeguards:The question of Land rights in India, seminar ah kihel in presentation piakna leng nei uhi. Huai hun ah Jairam Ramesh MP, Rajya Sabha in keynote address genna nei a, North East a om, a diak in Manipur a singtang mite'n a tuam a kivaihawmna tuam a neih uh poimohdan uangtak a gen a om hin JAC Convenor in gen hi.

 

JAC team apan mi 3 te Delhi khopi a om sung mah un April 9, 2016 in JAC leh Manipur Tribals' Forum Delhi kithuah in Arunachal House Delhi ah Consultative meeting nei uh a, huai ah Hmar, Kuki, Naga leh Zomi apan palai hunkhop kihel in maban kalsuan dingdan kikup khawmna nei uhi. Huai teng kia hilou in, JAC team te'n ahihleh Delhi khopi ah RN Ravi, Chairman Joint Intelligence Committee leng kimuhpih uh a, Nitin Gadkari, Union Minister of Road Transport and Highways and Shipping leng kimuhpih in huai ah Manipur Tribal Movement Road Construction Committee tungtawn a lamlian puah ding a panlaknate tung ah kipahthu genna va nei in, Tuivai lui apan Sipuikawn Tipaimukh Road leng bawlsak ding in ngetna va nei uh a, huai banah Manipur singtanggam a District headquarter teng, a kikawmtuah theihna ding in Ring Road kichi leng fund omdan dungzui a bawlsak ding in ngetna nei uhi. Huailou in JAC team in ahihleh Delhi a om sung mah un Tarun Vijay, Rajya Saba MP leh Nephiu Rio MP leng kumuhpih in, Manipur singtang mite a ding a kal a suanna uh phathuai a sakthu uh leng gen uhi. JAC team te ahihleh zan nitak in Delhi apan Lamka hongtung kik uhi.


xxxxxxxx