You are here: HomeRSS FeedsLatest News

Angels Vision News | March 09, 2017

Thursday, 09 March 2017 21:37

Manipur Chief Electoral Officer in 11th Manipur Legislative Assembly Election First phase neihna toh kisai a complain tuamtuam omte hoihtak a, a etkai nung in CCpur District sung a om Polling Station 13 ah tuni’n Re-poll neih in om a, buaina bangmah omlou in zohsiang in om hi. CCpur District sung a Assembly Constituency 4 a Re-poll neihna munte ahihleh 56-Thanlon AC apan Polling Station 5 - 56/2-Phaijang, 56/5-Dailon, 56/21-Thanlon (A), 56/26-Songtal leh 56/35-Khajang; 57-Henglep A/C apan Polling Station 5 - 57/13-Kolhen, 57/14-Moldak, 57/15-V. Munlai, 57/18-Songphu leh 57/55-Tuilaphai banah 59-Saikot AC apan 59/64 Ngurte leh 60-Singngat A/C apan 60/4-Tonglon (P) ah neih in om hi.

Press Team te’n 59-Saikot A/C a Re-poll neihna 59/64 Ngurte Polling Station va pha in thil omdan enkhia ua, vote hoihtak a akikhiak banah buaina bangmah omlou in sunnung dak 3:00 geih in Polling booth khak in om hi. Thutut kingah dan in, Polling Day ma nitak in galvantawite apan vauna om ziak in, Polling Day ni a buaina om ding venna in nupi pawl te’n kuamah vote khesaklou uhi. Tuni a Re-poll neihna ah District Election Officer R. Sudhan, IAS leh SP/CCPur Rakesh Balwal te’n a mun ah om chilh ua, security leng naktak a sukkhauh in om a, buaina bawl kuamah muh ding omlou in vote percentage leng hoih mahmah hi. Sunnung lam in midang vote khiak sawm tamtak kisa mahle uh Sectoral Supervisor leh Returning Officer te’n voter slip toh a mi hoihtak a enkhawm in, a kituakloute sawlkhe zel ua, midang vote khiak sawm a kipei tamtak lohsam uhi. Thutut kingah dan in, 56-Thanlon A/C sung a Polling Station 6 a Re-poll neihna ah 56/2 Phaijang ah 58.2 percent Vote kikhiak in, 56/5 Dailon ah 71.3 percent, 56/21 Thanlon (A) ah 50.48 percent, 56/26 Songtal ah 80 percent, 56/27 Sumtuk ah 68 percent leh 56/35 Khajang ah 68 percent tungzou hi. 57-Henglep A/C sung a Polling Station 5 a Re-poll neihna ah 57/13-Kolhen ah 77.38 percent vote kikhia in, 57/14-Moldak ah 68 Percent, 57/15-V. Munlai ah 62.88, 57/18-Songphu ah 75 percent leh 57/55-Tuilaphai ah 90.32 percent vote kikhia hi. Tuaban ah, 59-Saikot AC huamsung a om 59/64 Ngurte ah 80.02 percent vote kikhia in, 60-Singngat A/C apan 60/4-Tonglon (P) ah 61.24 vote kikhia a, Re-poll a vote kikhe teng 70.06 percent tungzou hi’n thutut kingah hi.


XXXXXXXX


56-Thanlon A/C sung a Candidate 5 omte lak ah candidate 4 te’n Re-poll dia ngetna a piaklute uh a tamzaw sukbuchin ahihlouh ziak in lungkimlouh etsakna in Worker-te toh kithuah in tuni’n Lamka khopi sung ah Rally thupitak nei in, District Election Officcer kiang ah Memorandum pelut uhi. Hiai rally ahihleh LJP Candidate Thangkhangin, INC Candidate Dr. Chinkholal Thangsing, NPP Candidate T. Nengzakham leh Independent Candidate P. Khamsanglian te’n makaih in Worker tamtak hiai rally ah kihel ua, rally a paite Lamka Public Ground ah kingak khawm in, huai apan Tipaimukh Road zuisuk ua, Tedim Road apan SP/CCPur office kong tawm in DC/CCpur office tan khe in paitung ua, placard tuamtuam tawi uhi. Thutut kingah dan in, 56-Thanlon A/C a vote kikhiak dan toh kisai in Candidate 4 te’n lungtun huai a saklouh thu uh taklang in zan in Joint Press Release bawl ua, Press Release in a taklat dan in, BJP candidate in thagum zang a hiai bang a pan a lakna pen candidate dang te’n lamdangsa mahmah hi’n taklang a, SoO nuai a om ZRA in mipite vaulau in, a thagum a vote a khiak sak banauha kho hausate leh organization tuamtuam zang in vote 80 apan 90 percent tan tungsak teitei ding in puangsak uhi. BJP Candidate in Model Code of Conduct palsat in mipi lak ah sum a hawm banuah mun tamtak a vote a leikhiak banuah khua khenkhat ah gan gou in annkuang bawl ua, cadre te’n leng mipite sik in vote khia uhi. Tuaban ah, Polling Station khenkhat ah BJP vote lou ding te vote a khiak ding uh phalsak hilou in munkhenkhat ah gua zang in EVM khoih ua, election nanungpen ah vote percentage 43.63 a tun lai in, tutung election ah vote percentage 80.97 tungtou a, hiai in booth capture om ahih dan langsak hi’n taklang hi. Hiai bang thil a om vengvung nung in LJP, INC, NPP leh Indipendent candidate te’n 56-Thanlon A/C a Polling Station 38 om lak ah Polling Station 21 ah Re-poll ding in ngetna pelut mahle uh Polling Station 5 kia ah Re-poll dia phalsak a om pen ngaisiam theilou hi’n taklang hi. Hiai bang panlakna pen dan kalh ahih banah Model Code of Conduct kalh ahih man in Chief Election Commission in hiai toh kisai enkai thak a disqualification process patpih ding in ngetna bawl uhi. Candidate 4 te’n tuni a DEO/DC, CCpur kiang a memorandum a piaklutna uah hiai teng mah tuangsak in, DEO/CCPur in leng hiai thu pen Manipur Chief Election Officer leh Election Commission of India kiang ah khaksawn ding ahih dan theisak hi. Tuni a 56-Thanlon A/C sung a Polling Station 6 a Re-poll neihna ah leng Candidate 4 te’n kigolh nawnlou ding uh ahih dan gen in, Agent leng kuamah koihlou ua, zinghal (March 11) chiang a vote simna hun ah leng Counting Agent kuamah koih sawmlou uh ahih dan gen uhi.


XXXXXXXX


Manipur State Assembly Election Post Poll a thil tung toh kisai deihlouh etsakna in Churachandpur District Christian Goodwill Council inntekna in saptuam tuamtuam a Pastor te’n lemna leh muanna om theihna ding in zingchiang in Pastor’s Rally nei ding uhi. Saptuam tuamtuam apan rally a tel ding Pastor-te ahihleh zinglam dak 10:30 in Tuibuang Peace Ground ah kipankhia in, Kangvai, Saikot, Lamzang leh Pearsonmun chihte tawn in lampi zui ding uhi. Hiai rally ah CCPur District sung a saptuam tuamtuam a pastor teng kimtak a tel ding in CCpur District Christian Goodwill Council in chialna bawl a, rally a tel ding khempeuh te’n Pastor Uniform silh chiat a, saptuam gari tawi chiat ding in ngetna bawl uhi.


XXXXXXXX


Apaisa March 5, 2017 nitak a meltheihlouh maituam pasal bangzah hiam in Lamzang khomi 2 pimang leh naktak a asoisakna utoh kisai in Police te’n suizuina neitou zel in, mi pimangtute lak a tel mi 2 matkhiak ahih nung un zan nitak in mi 1 matbeh hinawn a, hiai toh kisai in SP CCpur Rakesh Balwal, IPS in tuni sun dak 12:00 in Lamka pansan Press/Media-te kimuhpih in thil omdan pulak hi. SP/CCpur in a gendan in, mi pimangtute lak a kigolh mi 2-te kipuanna apan ginlelh mi 4 theihkhiak beh in om a, Police-te group 4 a kikhen in zan nitak dak 11:00 apan in Elim Veng, New Lamka, Sim Veng, Gangpimual leh Chiengkonpang ah inn 4 buluh ua, huai apan ginlelh mi 1 matkhiak a om in, a dangte ahihleh kizongsan lel ahih dan gen hi. Matkhiak a om ahihleh Chiengkonpang a om Ginzomsang (40) s/o Chungkhohen hi a, tu in Police custody ah koih a omlel in, thudotna paitou zel ahih dan gen hi. Tuaban ah, apaisa March 6 nitak a kiphinna nei matkhiak a om mi 27-te zan in Court ah dinsak a om in, court in Judicial Custody a ni 15 sung omlai ding in phalsak hi’n gen hi. Tuabangkal ah, apaisa March 6 nitak a NPP Candidate pa inn mipi thangpai te’n a buluhna uah Police te’n innsung apan pasal 9 leh numei 19 hunkhia uh hi’n gen a, Addl. SP toh kithuah in innsung teng hoihtak a etchet ahih nung in galvan himhim muhkhiak omlou hi’n gen hi. Hiai toh kisai in SP/CCPur in mipite kiang ah ngetna bawl in, Lamka khopi sung ah lemna leh muanna deihlou mi om ahihna ah mipi kuapeuh pilvang chiat a Police in suizuina a neihte kithuahpih chiat ding in ngetna bawl a, kuaman thuzuau thehzak nawnlou ding in ngetna bawl hi. Mob Violence om chiang in Police te’n huai mah a buaipih uh ngai ahihman in suizuina nawngkai sak mahmah hi’n gen a, kuapeuh in mob violence pan nawnlou ding in ngetna bawl hi.


XXXXXXXX


Lamka khopi sung a dan leh thupiak hoihzaw omna ding tupna a District Magistrate in zan apan Hebron Veng huamsung ah Public Curfew a puan, tuni’n dakkal 7 sung khahkol in om a, Public Curfew khahkol ahih sung in buaina zak ding bangmah omlou hi. Thutut kingah dan in, apaisa March 5 leh March 6 ni a meltheihlouh maituam pawlkhat in numei khat tel a mi 3 a pimang a naktak a asoisak ziak un mipi sousang mahmah in, zanhal (March 7) nitaklam in mipi thangpai te’n NPP Candidate Phungzathang Tonsing tenna inn buluh in innsung vanzat tamtak susia in compound sung a two wheeler 3 kikoih halsiat in om a, Police te’n Tear Gas leh Mock Bomb zang in mipi thangpaite hawldalh ua, mi 10 vel in liamna a tuah banuah mi 27 mat in om uhi. Dan leh thupiak hoihtak om theihna ding in zan in District Magistrate in Hebron Veng huamsung ah Public Curfew puang ngal in lut leh pawt ding kham bikbek ua, thawmging a daih deuh toh kiton in tuni zingkal dak 6:00 apan sunma dak 11:00 leh sunnung dak 1:00 apan dak 3:30 sung Curfew khahkol hi. Curfew khahkol hunsung in buaina thawmging zak ding bangmah omlou a, hiai bang dinmun ahih touh zel leh public curfew lakkhiak hiding a, himahleh hiai thu puankhiak ahih tan in District Magistrate apan bangmahj thu zak hilou hi.


XXXXXXXX


District Hospital Blood Bank officer in Vanglai Sporting Allies (VASA) toh kithuah in tuni’n Blood Bank ah “Blood connect us all” chih thupi zang in Voluntary Blood Donation leh Awareness camp nei uhi. Hiai hun ah VASA member hunkhop kihel in, Dr. Ksh. Jayanta, Blood Bank Officer in sisan piak a poimoh dan toh kisai sinsak in VASA member mi 7 in damlou genthei leh haksate a ding in a sisan manphatak uh Blood Bank ah pia uhi. Hiai hun ah Blood Bank officer in mihing hinna humbitna dia sisan a poimoh dan leh nang leh ken leng huai a dia dinmun poimoh nei ahih dan nouneltak in pulak hi. Aman a thugenna ah, CCPur District in kha teng in sisan Unit 120 apan 150 kikal poimoh gige a, Blood Bank in replacement ngailou damlou kuapeuh in a hunhun a sisan a ngah theih uh poimoh ahih dan gen a, sisan kipiakna tungtawn a natna tuamtuam baihsamtak a kikai theih ahihman in, damlou te’n sisan siangthou mah a ngah theihna ding un mipite mohpuakna ah kinga ahi chi’n gen hi.


XXXXXXXX


YPA Zion Veng Unit in zan in inn khat apan van tuamtuam gu pasal khat man in, thudotna hoihtak a neih nung un YPA Khominthang Unit khut ah pekhia uhi. Van tuamtuam gu matkhiak a om ahihleh Thangboi of Khominthang hi a, aman inn khat apan puan, khedap, bucket leh nylone pipe a guk lai vengsung mipi’n a matkhiak uh hi’n kigen hi. Thutut kingah dan in matkhiak a om Thangboi ahihleh vengsung mipi’n warning 5 vei val matkhiak a omta in, warning leng tam veitak peta mahle uh a thil hih sunzomtou zel hi’n kigen a, YPA Zion Veng Unit in thuhilhna hoihtak a piak nung un YPA Khominthang Unit khut ah pekhia ua, YPA Khominthang Unit in kum 2 sung Khominthang siik thei nawnlou ding in thu pia uh hi’n thutut kingah hi.


XXXXXXXX