You are here: HomeRSS FeedsLatest News

Angels Vision News | January 14, 2017

Monday, 16 January 2017 19:16

CCpur Police te'n nikum November kha apan Lamka khopi sung mun tuamtuam apan zu a matkhiakte uh tuni'n Excise khut ah pekhia in, Excise Department te'n Police toh kithuah in Mini-Secretriate huangsung ah Press/Media-te muh in hihse vek uhi. Thutut kingah dan in, CCPur District mipi'n Krismas leh Kum Thak hun nuam buaina bangmah omlou a kuapeuh in a zat theihna ding un SP/CCpur Rakesh Balwal, IPS thupiak dungzui in CCPur Police nuai a Drugs Cell & Anti Alcohol Unit te'n khopi sung a zu zuakna mun teng dapsuak vek in mun tuamtuam apan tamtak mankhia ua, matkhia a om teng tuni zinglam dak 10:00 in Lamka Police Station ah Press/Media-te muh dia phoukhia in, matkhiak a om tengteng SP/CCPur in Th. Imo Singh, Dy. SP, Excise Department khut ah pekhe vek hi. SP/CCPur Rakesh Balwal, IPS in Zu toh kisai CCPur Police in Drive a neih paitouhpih zel ding ahih dan gen in, maban ah matkhiak a om nawn leh a dan toh kituak a action lak hita ding ahih man in, Lamka khopi sung a Zu zuak kuapeuh in tawpsan ding in Press/Media tungtawn in mipite kiang ah ngetna leh theihsakna bawl hi. .Th. Imo Singh, Dy. SP, Excise Department in a gendan in, election om hun chiang in candidate te'n mi thuzohna ding in zu nasatak in zang ua, tua ziak in Election Commission of India in zu nasatak in kham a, munchih mualchih ah dan toh kituaklou a zu zuak teng mankhe vek ding in theihsakna bawl khinta ahih dan gen hi. Aman Bishnupur toh pokhawm ahihna ah, man power neilou a, CCPur Police te'n hiai bang a pan a lakna uh kipahpih mahmah ahih dan gen hi. Zu kimankhe teng SP/CCPur in Excise Department khut ah pekhe vek a, Excise Department te'n Police toh kithuah in Tuibuang a Mini-Secretriate huangsung ah hihse vek uhi. Matkhiak a om zu te ahihleh Indian Made Foreign Liquor (IMFL) full bottle 52, half bottle 32, Half Quarter 228 banah Beer bottle 66, Grape Wine bottle 290, a kigawm in Bottle 668 hi a, tuaban ah, Zu ngoute litre 637 leh zu bawlna dia kizang Tol piece 300 hi'n kigen hi.


XXXXXXXX


11th Manipur Legislative Assembly election neihna ding toh kisai in Election Commission of India in zan in Electoral Roll Final Publication suahkheta in, final publication dungzui in tutung election ah CCPur District a Assembly Constituency 6 apan Polling Station 318 ah voter 1,93,838 te'n vote khe ding uhi. Thutut kingah dan in, 55-Tipaimukh A/C ah Polling Station 5 behlap a om toh sim in Polling Station 38 om ding a, huai ah voter 17,749 (numei 8965 leh pasal 8784) te'n a vote uh khe ding uhi. 56-Thanlon A/C ah tutung in Polling Station behlap omlou in, Polling Station 38 ah Voter 17,885 (numei 8880 leh pasal 9005) te'n vote khe ding uhi. 57-Henglep A/C ah Polling Station 2 behlap a om toh sim in Polling Station 56 om a, Voter 19,164 (numei 14,797 leh pasal 14,367) te'n a vote uh khe ding ua, 58-CCPur A/C ah Polling Station 5 behlap a om toh sim in Polling Station 70 ah Voter 53,126 (numei 27,753 leh pasal 25,373) te'n vote khe ding uhi. 59-Saikot A/C ah Polling Station 5 mah behlap a om in, a kigawm in Polling Station 67 om ding a, Voter 49,899 (numei 25,530 leh pasal 24,369) te'n vote khe ding uhi. 60-Singngat A/C ah Polling Station 1 behlap a om in, hiai Constituency ah a kigawm in Polling Station 49 om ding a, Voter 26,015 (numei 13,128 leh pasal 12,887) te'n vote khe ding uhi. Churachandpur District a Assembly Constituency 6 ah Thanlon AC chihlouh Constituency dang teng ah pasal voter sang in numei voter tamzaw a, Assembly Constituency 6 ah pasal voter sang in numei voter 3,906 in tamzaw hi.


XXXXXXXX


Young Mizo Associatio (YMA) Chiengkon Branch in Bengaluru pansan a NGO kibawlkhia Ek Prayaas toh kithuah in tuni'n Chiengkonpang Community Hall ah Hepatitis B & C Free Screening Test nei uhi. Huai hun ah Chiengkonpang leh a sehvel a om khua leh veng tuamtuam apan mi 100 vel paikhawm ua, awareness hoihtak pia in paikhawm teng a thawn in Hepetitis B leh C a thawn in test sak uhi. Hiai hun a Positive muhkhiak a omte tunung sawtlou in treatment piak ding dan toh kisai counselling neihpih in, a man tawm theipen a treatment lak theihna dia panlak pih ding uh hi'n thutut kingah hi.


XXXXXXXXX


Evangelical Baptist Convention, Lamka South Division nuai ah Division Baptist Children Department in tuni'n New Lamka Baptist Church, Elim Veng ah Sunday School Sinsaktute a ding in Orientation- nei uhi. Programme ahihleh hunbi nih a kikhen in, hunbi masa zinglam dak 10:00 in kipan a, Pastor G. Sanglian, Local Pastor, NLBC in thumna in hongkhia in, N. Thangkhanhnun, Chairman, DBCD in vaidawnna thu gen hi. Programme hunsung in Jonathan, Member DBCD in Lamka South Division huamsung a om kho tuamtuam apan Sunday School heutu paikhawmte mellahna nei a, sunnung dak 1:00 in hunbi 2na pan nawn ua, Rev. B. Chinkhengoupau, Child Co-ordinator, EBC in hasotna thu gen in, Rev. V. Nenglian, Divisional Supdt., Lamka South Division in sinsaktu paikhawmte a ding in thumsakna nei hi. Orientation hun ah Lamka South Division huamsung a khua 25 apan sinsaktu 350 val paikhawm ua, hunbi masa ah "Kum toh kizui a naupang mizia leh sinsak ding dan" chih thupi zang in sinsakna nei a, hunbi 2na ah "Naupang sinsakna gahsuah" chih thupi zang in sinsakna nawn a, heutu paikhawm te'n phatuampih mahmah uh hi'n kigen hi.


XXXXXXXX


Tulai in khopi sung leh a sehvel ah guta laang nak mahmah in tuzing kal in Elim Veng mipi'n van tuamtuam gu mi 2 mankhia uhi. Van tuamtuam gu matkhiak a omte ahihleh Kamsuankap (40) of Hiangtam Khunou leh Siamthanmuan (35) s/o Suakvung of Nghathal mankhia ua, a lawmpa uh Mangminlian (30) ahihleh midang a buaipih kal un ana kihem mang hi'n kigen hi. Matkhiak a om tegel ahihleh vengsung mipi'n hichibang hih nawnlou dia a kichiamsak nung un khah khia uhi. Thutut kingah dan in, tuzingkal dak baihtak dak 3:00 vel in Kamsuankap leh a lawmpa Mangminlian (30) of Nghathal in Jamsuan Road leh Tawmna Road Junction a lampi kiang a T. Vumzalang te zawngtah gu dia kisa lai inn nei te'n theikhia in delh ua, guta nih te lampi tuam tuak ah atai ziak un Kamsuankap kia mankhia ua, a lawmpa Mangminlian bel man zoulou ua, hiai lawmta tegel in thousilen khuam zang a zawngtah a loh sawmlai uh theihkhiak a om hi'n kigen hi. Matkhiak a om Kamsuankap ahihleh Hiangtam Khunou a om, tulel a Lailam Veng a asungkuan ua khosa uh hi a, matkhiak ahih hun in aman Khelthum, puan-ak 5 leh Zomi Puandum khat silh a, ni khat a No. 4 Rs. 300 man kikap gige hi'n kipuang hi. Vengsung mipi'n Zawngtah gu Kamsuankap a buaipih lai un lampi ah meihol pua pasal khat hong pai in, ginlelh thu a thudotna a neih uleh a meihol puak pen a guk ahih dan thei khia in man ngal uhi. Meihol gu matkhiak aom ahihleh Siamthanmuan (35) s/o Suakvung of Ngahthal hi a, aman College Veng a om a sanggam nu theihlouhkal a, a inn kong ua kikoih meihol bag khat bazaar lam a zuak dia a puakkhiak ahih dan theihkhiak in om a, aman nikhat in Rs. 400 man No. 4 kikap gige hi'n kipuang hi. Guta 2-te Elim Veng mipi'n thuhilhna hoihtak a neih zoh un khahkhia uhi.


XXXXXXXX


Civil Pensioners' Welfare Association te'n tuni'n Synod Hall, IB Road ah General Body Meeting a 32veina leh 2017-19 sung a vaipo ding kitelna nei uhi. Programme ahihleh sunma dak 11:00 in kipan a, Upa S. Lalngailian in hun zatna Pathian kiang ah latkhiakna nei in, HL Hminga, President in vaidawnna thu gen a, Election Officer-te makaih in pensioner paikhawm te'n 2017-19 sung a Officer Bearer ding mi 6 telkhiakna nei uhi. Thutut kingah dan in, tulel in Civil Pensioners Association ah member 449 omlel in, tu kum paita sung in member 20 te'n sihna tuak in, tuni a programme zatna hun ah Upa S. Vungsing makaih in member paikhawm te'n suunna hun zang uhi. Civil Pensioners' Welfare Association 2017-19 sung a Office Bearer dia telkhiak a omte ahihleh T. Singneng, Upa L. Ginkhojam, Upa S. Vungsing, Upa S. Thangkhochin, Upa HL Hminga leh Upa K. Songkhotuan hi ua, amau kal nawn January 21, 2017 zingkal dak 7:00 in Executive Member ding guanna nei ding uhi. Programme hunsung in Auditor te'n Audit Report pia in Association pai hoih zawk ding dan toh kisai kikum in, Upa L. Ginkhojam, Secretary apan report ngaihkhiakna om a, HL Hminga, President in kum 8 val vengveng office dia a inn phaltak a ana zangsak T. Singneng kiang ah kipahpihna etsakna in Memento leh Rs. 5000 Association sik-le-tang in piakkhiakna nei hi.


XXXXXXXX


GAMSUNG THUTHANG

Gujarat state sung a teeng naupang kum 14 lel a upa khat in hektu omlou lenna a bawl in, leinuai a kiphum bomb thangkam zongsuah thei leh suse thei hidan a gen ahih ziak in, Gujarat Council on Science and Technology in a thil bawlkhiakte toh kizopna neihpih sawm in Crore 5 in kilemna suai kaihpih uhi. Kum 14 a upa pasal naupang ahihleh Harshwardhan Zala hi a, class 10 simlel ahihban ah bomb thangkam hihpuak ziak a Army tamtak in sihna a tuah gigete uh Newspaper a a simkhak sek nung a , kumlui apan bangchileh leinuai a kiphum bomb thang kikam te zongsuah a hihse theiding hektu omlou lenna bawlkhiak theih ding hiam chih zonna neih kipan in, a thil muhkhiak dan bangzah veihiam a test nung in, leinuai a bomb kikam te zongsuah theiding in bawlkhe thei a, galmun chet ah zat hi naikei mahleh phatuam mahmah ding hin kigen hi. Tua bomb thangkam zongsuah theidsing Drone mukhetu Harshwardhan in a gendan in, a tuung in Robot bawlkhiak ding ka lunggulh a, himahleh a gikluat ding ziak in, bomb thangkam sikpuak thei veve ding ahihdan ka muhsuah nung in, hektu omlou lenna pansan a zonsuah theih dingdan ka ngaihtuah chi hi. Harshwardhan in ahihleh Gujarat khopi Ahmedabad a Vibrant Gujarat Summit om hun ah Gujarat state solkal ai-oh in Gujarat Council on Science and Technology toh Memorandum of Understanding (MoU) kichi kilemna bawl in, dangka crore 5 huding suai kai uhi. A thilbawlkhiakte toh kisai in a final stage leh final prototype bawlna ding a Lakh 5 vel a poimoh ziak in, Gujarat solkal in sensak uh a, tu nung in, tua bomb thangkam zongkhethei ding drone bawlna man tengteng Gujarat solkal in sensak ding uh a, a thil muhkhiak kipahpihna in crore 5 peding uhi. Hektu omlou lenna bawlna toh kisai in, hektu omlou lenna a kithah infrared sensor kichi in leinuai a thil kiphumgu om aihdan a theih chiang in, Gram 50 a gik detonator zang in tua bomb pen bangchi bang bomb hitaleh leng hihse ngal ding hin kigen hi.


xxxxxxxxxx


Jammu and Kashmir in khokheeng nasatak kum 40 nung a a tuah nawnna hiding in tu in khokheeng nasatak om a, tui taksapna leng nasatak a om hin kigen hi. Kumlui apan monsoon vuahtui a kiak ginatlouh ziak in, Jhelum luipi a tui omte leng tawm mahmah a, kum nih paita in tua Jhelum luipi ah tui tamluat ziak in tuilian tanpha om mahleh kumlui 2016 sung a monsoon vuahtui a kiak ginatlouh ziak in, Jhelum luipi a tui omte naktak a kiam in, ngaman a nekzong te leh Kashmir phaizang a teengte tuilakna tanpha buai thei ding dinmun ah omlel hi. Kumdang in phalbi khovot hun ah Kashmir phaizang ah vukkia nasatak muhding in om gige mahleh tukum in bel khovot suukpi laitak himahleh vukkia muhding omlou hn kigen hi. Kumdang a Kashmir phaizang a vukkia te et utna ziak lel in leng khualzinmi tamtak in Kashmir phaizang ah zin gige mahle uh, tukum in leng khualzinmi leng naktak a kiam hin gen uh a, kumdang in Kashmir phaizang ah October kha in vuahtui kezah 100mm himahleh kumlui 2016 in bel vuahtui ketawm mahmah in, 3.6mm lel kia hin kigen hi.


xxxxxxxxxx


India in tuinuai long Submarine a neihte lak ah French solkal in a design nihvei tuinuai a lutsak a omna hiding in, Khanderi Scorpene-class diesel-electric attack submarine kichi Mumbai khopi nawl a om Mazagon Dock Shipbuilders Limited munpi ah tuinuai a lutsakna neih in om hi. Hiai submarine ahihleh France company Direction des Constructions Navales leh India solkal in Mazagon Docks a tuinuai long kithuah a 6 a bawlte uh lak a khat hi a, tuinuai long 6 bawlna a vek a zohsiang ahih chiang in, US dollar 3 billion beiding hin kigen hi. Tulel in ahihleh Indian Navy in tuinuai long Submarine 13 nei in, Nuclear submarine 2 nei a, himahleh First class submarine neilou hin kigen hi. India in tulel in First Class submarine Kalvari kichi bawlkhinta mahleh tuipi tung ah etkhiakna neih hipan a, tunung zek chiang in Navy te zatding in laklutna neih hiding hi. Khanderi submarine tuinuai a lutsak a om hun ah Union Minister of State for Defence Subhash Bhamre leh Chief of the Naval Staff Admiral Sunil Lanba leng kihel uhi. Khanderi submarine first class scorpene submarine ahihlouh hang in, Staelth a kibawl hi a, tuitung a omlai hin tuinuai a om hun hita leh chiklai peuh a Torpedoes leh tube-launched anti-ship missiles kapkhe gige theidia bawl hi a, tu in tuinuai lutsak himahleh tukum December tan etkhiakna neih hilai ding a, December tan a muanhuai huntawk sak a om leh December in INS Khanderi chih min zang in Navy te zatding in laklut hiding hi.


xxxxxxxxx


Hyderabad khopi a teeng pasal khat in a tenna innsung ah Ganja (Marijuana) nou tamtak a chiin ziak in, Police in tua inn neitu man uhi. Police thusuak in a gendan in, Nganja nou tamtak chiin ziak a mat a om ahihleh Syed Shahed Hussain hi a, aman a tenna inn Manikonda a Bedroom thum omna apartment sung ah nganja nou tamtak bel a chiing hin gen uhi. Police in a matkhiak hun un, Nganja Kg 9 pha dektak toh, Nganja nou bel 40 a kichiing lai leng musuah uh a, amah kipuanna apan in, internet tungtawn in innsung ah Nganja kung chiing dingdan zil hin gen a, Nganja te a zuak theih hun in customer te kiang ah pekhe zel chi hi.


xxxxxxxxxx


GAMDANG THUTHANG

New Zealand gamsung a teng Pata khat tuipi tung a ngaman ding a a kuankhiak nung uh kha 1 val a paining a a omna uh theihlouh a om nung in, tu in a kipatkhiakna mun uh New Zealand apan Km 1200 val a gamla Australia ah muhkhiak in om uhi. Thusuak in a taklat dan in, New Zealand a teeng Alan Langdon leh a tanu kum 6 a upa ahihleh Tasman tuipi tung a ngaman dia kuankhia hi uh a, himahleh vangsiat huaitak in a ngamatna mun uah huihpi hattak nung in, tuipi tung ah ni 27 sung vingveng a nih ua hun zang uh hin gen a, tuabang a tuipi tung a genthei tak a a khosak nung un, tua patate tukal January 11, 2017 in Sydney longkhawlna mun tungthei khongkhong uh a, New Zealand mallam pang a Christmas hunnuam zat a sawm uh a thawn a bei hithet hin kigen hi. Tu in tua miming minihte zonna nasatak a neih a omlel leng khawlsak ngal a om ban ah, tu in Australia solkal panlakna in a tenna gam uh New Zealand khakkik ding dan ngaihtuah in omlel hi.


xxxxxxxxx


A paisa 1998 kum a US gamsung a Florida state sung a om, Jacksonville a damdawi innkhat a naungek khat gukmang a om tuni tan muhlouh a om nung in, South Carolina ah damtak a om ahihdan theihkhiak in om hi. Damdawi inn apan gukmang a om naungek numei ahihleh tu in kum 18 in upa ta a, a min dia Kamiyah Mobley chih min phuahsak a om banah Walterboro, South Carolina mun a muhkhiak a om hin Jacksonville Sheriff's Office thusuak in gen a, DNA test tungtawn a gukmang a om naungek mah ahihdan chet a om hin gen uhi. Tua numei ahihleh a ngeklai a gukmang a om hi a, 1998 kum in tua naungek gukmang a om ahihdan theihphet in, Police in Jacksonville khopi sungteng dapkual in, rel leh gari taite tengteng khatkhat in etkhiakna nei mahle uh mukhe zoulou uhi. Himahleh Police in hiai thu khawllou a a suizui nung un, gukmang a om naungek pianni toh kibang geih a piang Jacksonville damdawi inn a omte DNA test a neihna uah theikhia uh a, naungek gutu Gloria Williams tung ah kidnapped case thubuai bulhkhum a om in, mat in om ngal hi.


xxxxxxxxxx


2015 kum a South Carolina a Charleston kichihna mun a mivom te biakinn kailai mi 9 thahna toh kisai a muanmoh pipen leh mat a om Dylann Roof tung ah court in thukhenna nei in, huai ah siding in thutankhum hi. Tualthattu Dylan Roof tung ah ahihleh thubuai chi tuamtuam 33 bulhkhum in om a, thubuai neih ziak leh tualthah ziak a US gamsung a siding a thutankhum a om masakna pen hilai ding in leng kigen hi. FBI in Dylan roof a mat nung un, a kipuanna ah mi vom te mi 9 a thahna in nidang bang a kideidanna chi a tuh nawnding gintakna liantak a neih ziak a, tuabang thil hih kha hin gen a, a thilhih toh kisai in siding a thutankhum ahihtan in leng kisikna khatleng ka neikei chi hi.


xxxxxxxxxxx