You are here: HomeRSS FeedsLatest News

Angels' Vision News | November 17, 2016

Friday, 18 November 2016 18:09

THUTHANG LAKTOMTE

@@ ZSF GHQ in dawr tuamtuam enkhia... Lamka khopi sung ah kha 1 su ng daih ding van omlai
@ @ JAC for sadar hills in November 20, 2016 apan Economic blockade panding..... UNC leh state solkal tung ah lungkim louhthu taklang
@@ China in Pakistan toh kisumdawn tuahna puahphat sawm in kisa

 

TUALSUNG THUTHANG

Zomi Students' Federation (ZSF) General Headquarters makai te'n tuni'n Lamka khopi sung a dawr tuamtuam etkhiakna nei in, Singpi Hotel chihlouh van man khang a omlouh banah CCpur District ah kha 1 sung daih ding stock om ahih dan taklang uhi. Tuni zinglam dak 10:30 apan in K. Vanlallian, President, ZSF GHQ makaih in ZSF te'n Lamka khopi sung a dawr tuamtuam enkhia in, agency tuamtuamte godown teng leng hongsak vek in hoihtak in etkhiakna nei ua, tulel dinmun in mipi a ding nek-le-tak tuamtuam kiningching omlai ahih dan mukhia in, Singpi leh sang man chihlouh van man khang bangmah omlou ahih dan mukhia uhi. Thutut kingah dan in, UNC in Nagate omna bial a revenue district bawlkhiak ding deihlouh etsakna a apaisa November 1, 2016 apan National Highway tegel ah Economic Blockade bawl in, Manipur a ding van bangmah puaklut sak hilou a, tua ziak in Imphal leh District dangdang te'n buaina tuak panpanta in, CCpur District ah leng patauhna liantak om a, report dungzui in vanman bangmah khansak hilou a, huchikawmkal ah, Singpi-te (tea leaf) leh Maida man a khanlouh lai a Singpi leh Puri man khansak a om pen lamdangsa mahmah ua, hiai toh kisai tamtak in et thak tuak poimoh sa mahmah uh hi'n thutut kingah hi. Tuni a ZFS GHQ makai te'n dawr tuamtuam etkhiakna a neihna uah, dawr khat apan van tuamtuam hun beisa a kizuak hunkhop mukhia in, hichibang thil zuak nawnlou dia theisak in, tu in a van teng leh dawr licence kem lel uhi. Hiai toh kisai in ZSF GHQ in thil lei di ng khempeuhte pilvang dia theisak in, tulel dinmun ah kha 1 sung daih ding stock omlai ahihna ah, kuamah pataulou dia ngetna bawl in, van man khangsak a om leh ZSF makaite thuzak pha ding in theihsakna bawl uhi.

 

 


NDA Government in nekgukna leh sum lem omte sukbei ding tupna in Rs. 500 leh Rs. 1000 note a sihsak phut ziak in India gamsung mipi'n buaina nasatak tuak in, bank leh postal office-te ah niteng in sum deposit leh kheng nuam tam thei mahmah hi. Govt. in sum a sihsak ni 9 bang chingta mahleh gamsung pumpi ah sum kiningching omthei nailou a, mipi'n ni bangzah hiam thuak lai ding in kilang hi. CCpur district a ding Novemerb 12, 2016 in Imphal apan sum Rs. 2000 note 8 crore hongtung in, tuni sunnung dak 2:00 vel in hawmbei ua, sum lakhe ut tamtak thawnkik uhi. Tuni sunnung dak 2:30 in CCpur District a ding sum Rs. 2,000 note Crore 20 hong tung nawn a, zingchiang in ngeina bang in mipi lak ah hawmkhiak hinawn ding hi'n kigen hi. Thutut kingah dan in, sum hong tungte tunitaklam in CCpur Districrt sung a Bank Branch teng kiang ah hawmzak hi a, account nei thuah teng leng SBI kiang seselou in bank branch dangte ah leng lak theih veve ding hi'n thutut kingah hi.

 

SBI-RSETI in kum 18 apan kum 45 kikal tuailai sepna neiloute a dia Free Short Term training a piak uh paitou zel in, tulel in ni 30 su ng daih ding Beauty Parlour Management Course ah training pailel in, tuni'n Basic Photography & Videography training kipan hi. Thutut kingah dan in, ni 30 su ng daih ding Beauty Parlour Management training ahihleh apaisa November 4, 2016 a kipan hi a, S. Mangboi Vaiphei in ni 6 sung Entrepreneurship toh kisai a sinsak nung in trainee te'n zan in Parctical Class pan in Miss Lhainunnem in sinsakna pia a, training hunsung in threading leh facial tel in thil tuamtuam sinsak ding hi. Hiai Course ah Lamka khopi sung leh a sehvel apan mi 21 kihel ua, buaina dang a om kei leh December 1st Week in training zousiang ding uhi. Tuabangkal ah, tuni'n SBI-RSETI ah Basic Photography & Videography Course kipan in, mun tuamtuam apan mi 16 kihel ua, S. Mangboi Vaiphei, Faculty in ni 5 sung Entrepreneurship toh kisai sinsak ding a, Lalboi Samte, Guest Faculty in ni 12 sung lem lak ding dan a sinsak ding banah Letthang Doungel in ni 4 sung Videography toh kisai sinsak ding a, buaina dang bangmah a om kei leh December 1 st Week in training zousiang ding uhi.

 

Lamka Damdawi Inn report kimu dan in, tu October khasung in Lamka Damdawi Inn ah naungek 208 piang in, OPD ah damlou ki-ensak 10,000 val a om banah tulel in Blood Bank ah sisan unit 37 omlel hi'n taklang hi. Report in a taklat dan in, tu October khasung in natna tuamtuam nei OPD tungtawn a ki-ensak damlou mi 10,743 om in, huaite lak ah naungek kum 1 nuailam (Neonate) ki-ensak 270 a om banah naupaai Anti-Natal Check-up bawl mi 209 om hi'n taklang hi. Maternity Ward ah tu October khasung in naungek 208 (Pasal 97 leh numei 111) piang in, IUD (nu gilsung apan sisa a lakkhiak) 5 om a, nau-phiik 4 a om banah Still Birth 5 om a, referral leh nau piangtung si omlou in, nau neih ziak a si leng report a omlou hi. October khasung in naupaai damdawi inn a ki-admit mi 219 om in, kha bei tan in mi 205 te'n damtak in damdawi inn pawtsan uhi. Children Ward ah October khasung in natna tuamtuam nei naupang 195 (pasal 101 leh numei 82) admit a om in, kha bei tan in naupang 183 te'n damtak adamdawi inn a nusiat lai un naupang 3 damzoulou in si uhi. Neonate Ward ah naupang kum khat nuailam mi 64 (Pasal 31 leh numei 25) admit a om in, kha bei tan in naungek 56 te'n damdawi inn damtak a apawtsan lai un, naungek 4 (pasal 3 leh numei 1) damzoulou in hiai Ward ah si uhi. Surgical Ward ah damlou mi 147 (pasal 82 leh numei 65) admit in om ua, Imphal lam a etkol ding in damlou 9 refer ahih banah Octoberber khasung in hiai ward ah misi omlou a, kha bei tan in damlou 131 te'n damtak in damdawi inn pawtsan uhi. Ortho Ward ah guh lam natna nei mi 58 (pasal 33 leh numei 25) admit hi a, damlou 44 te'n damtak in damdawi inn pawtsan in tu in mi 14-te etkol in om lel ua, damlou 58-te lak ah mi 1 Imphal a etkol ding in refer in om hi. ENT Ward ah damlou 12 (Pasal 9 leh Numei 3) admit a om in, kha bei tan in mi 11 te'n damtak in damdawi inn pawtsan ua, tu in mi 1 etkol in omlel a, refer a omlouh banah si leng omlou hi'n report in taklang hi. Medicine Ward ah tu October khasung in damlou 229 (pasal 124 leh numei 105) admit a om in, kha beitan in damlou 158 te'n damtak in damdawi inn pawtsan ua, damlou 17 (pasal 9 leh numei 8) hiai Ward ah si in, damlou 30 Imphal ah etkol ding in refer in om hi. Blood Bank in Voluntary Donor-te apan sisan Unit 29 leh replacement tungtawn in Unit 103 kaikhawm in, tu October khasung a Blood Bank in mi tuamtuam apan sisan a kaihkhop teng a vek in Unit 132 phazou a, damlou tuamtuamte kiang ah Unit 132 mah pekhia a, huaite lak ah Unit 5 a thawn a apiak banuah Unit 9 ditkiklouh om hi'n Report in taklang hi. Tulel in Blood Bank ah A group Unit 12, B Group Unit 5, AB Group Unit 11 leh O Group Unit 9, a vek in sisan unit 37 omlel hi.

 

Kum nawn 2017 General Election a 58/CCpur A/C a intending candidate DK Mang in tuni sunnung dak 2:00 in CCpur District BJP Office, Light House Lane ah press/media-te kimuhpih in, BJP a dia gin-omtak a pan ana laknate a pulak banah kum nawn election ah BJP ticket a din sawm ahih dan gen in, party Ticket leng kilamen mahmah ahih dan gen hi. Intendi ng Candidate DK Mang in a gendan in, 2012 kum in BJP Party zom in, Morcha teng enkaitu ding in Vice President hihna piak a om hi'n gen a, 2015 kum in Vice President (Organization), CCPur District hihna len nawn in, 2015 May kha a MDC Election ah BJP Ticket in New Lamka (East) bial ah MDC tuh in, MDC a tuh pen 2017 Election a dia foundation bawlna dan a zang ahih dan gen hi. Kum nawn election om ding ah leng kha masa in newspaper tuamtuam ah election manifesto suahkhe khinta in, protocol hoihtak a zui in, National BJP President, State BJP President, District BJP President leh CCpur Mandal President kiang ah Party ticket ngetna an ape khinta in, transperancy hoihtak a omna ding deihna in a kisaipih teng kiang ah leng copy pe tel zel ahih dan gen hi. BJP Party it leh ngaina ahihna ah, BJP a ding in theihtawp suah a pan ana la in, BJP CCPur Mandal Office luahman leng kha 6 sung piaksak a, maban election di ng toh kisai a kisakkholna in inn 400 bang siksuakta in, mipite lak ah hehpihna va ngenta hi'n gen hi. Tulel a BJP a dia pan ana lak nate leh activities tuamtuamte a neihte banah tulel a Party ticket ngen teng lak a Senior pen leh experience nei hoih pen ahihna ah Party heutute'n a recommend uh gingta mahmah ahih dan gen hi.

 

Manipur state solkal in singtangmite sukha theiding bill 3 a passed ziak a salpha mi 9 ten sihna a tuah nung uh, ni 443 a chin tak toh kiton in, Delhi khopi laizang a om Jantar Mantar mun ah singtangmite a ding kivaihawmna tuam om ding deihna in Jantar Mantar Inndongta chia kipawlkhawmte saina in protest neih in om hi. Hiai protest ahihleh niteng a a neih gige uh hi a, MTFD in protest a paipih a khawlsan nung Jantar Mantar inndongtate saina in niteng in aman theiliai teng in nam leh gam itna ziak in kiphinna neitou den uhi. Zan Nilaini nitak dak 6 in leng Jantar Mantar mun ah kiphinna neinawn uh a, huai hun ah All tribal Women union makai khenkhat tulel a Delhi a zinkhete toh protest neikhawm uh hin thutut kingah hi. Protest hun ah Miss Ngaihlian in Program makaih in, mipite'n lasak khawmna nei uh a, patna thumna Upa T. Khamkhansuan in nei in ATWU apan Nu Kimzaching, ATWU Secretary makaih in paikhawmte'n thumkhawmna leh Slogan sapna leng nei uhi.Protest hunsung in Upa T. Khamkhansuan, Thangkhanlal Ngaihte, Nianglian, President, ATWU apan thugen ngaihkhiakna om in, discussion hun leng zang uhi. Hiai hun a Hau Tunglut in a thugenna ah bangchiteng in khangtou mahle hang singtangmi kihi thouthou a, kizum pih mawk ding hilou ahihdan uangtak a gen in, kivaihawmna tuam liuliau i muhkhiak ding uh ahi chi hi. Nianglian, ATWU President in a thugenna ah eilak ah kituahlouhna khenkhat om mahleh awl a hong damding hin gen a, program zatlai suang a kiden hiam ahihkeileh Gophel a kikap chihte issue thupi lua hilou in, singtangmite suahtaakna ding a kalsuanna pen thupi zaw hin gen a, himahleh Manipur state sung a nam lianzaw Meitei te toh kal bel dam theilou ding hin gen hi. Ei leh ei kal a gamgi hon omsak sawm Meitei te ahihlam theilou a, MLA khawng tuh i hih maimah khak ding lauhhuai mahmah hin gen hi. Thangkhanlal Ngaihte in leng a thugenna ah Jantar Mantar ah buai tunglai dan in mi tam zoukei mahleh Tribal movement pen gumlou uh chihna hilou ahihman in, lungke lou in pang peuhle i tuhgah i aat ngeiding chin gen a, Sixth schedule thu nasatak a tangkoupih a ompen Sixth schedule ah i hunsak ding chihna hilou in, tulel dinmun a ei Manipur a teeng singtangmite a ding a muh baihlam pen ahih ziak a, Sixth schedule mitsuan a om phot hn gen a, Sixth schedule muhkhiak nung in, a sangzaw i tupte mualsuah pih sawm hitou zel ding chi hi. Upa T Khamkhansuan in a thugenna ah Jantar Mantar mun a banner liantak a Sixth Schedule ka deih uh chia kitaak pen salpha 9 te sihnung kum khat chinni chet a taak khiak a om hin gen a, sulphate siluang a thawn a a luan ding deihlou ahihdan leng gen hi. Programme zoh in paikhawm mipite'n Salpha 9-te suunna in Mombati de in Salphate kipiakna ngaihtuah in daai zikzek a hun zatna leng nei uh a, Thanglianlal in thumna toh hunkhakna nei in protest zou uhi. Tunitak dak 6 in leng Jantar Mantar mun mah ah Protest neinawn ding uh a, huai hun ah program dak 6 a kipan in, ATWU makaite toh kithuah khawmna nein awn ding uh hin leng thutut kingah hi.

 

 

GAMSUNG THUTHANG

Manipur state solkal in November 1, 2016 a Sadar hills bial teng district piching a puankhiak hiding chia thupuan a bawlsa, a thupuan zukkik a khut lumleh a batsakna toh kisai in, Sadar hills district demand committee apan kiphutkhiak JAC sadar hills in thupuan a bawlna uah hongtung ding November 20, 2016 apan hunchiam omlou Blockade khauhtak sadar hills bial teng ah puan hiding chin thusuah bawl uhi. JAC Sadar hills in thusuah a bawlna uah, Sadar hills sung a ADC nuai a member teng leh State assembly apan Congress MLA te'n Congress party apan kitawpna lai tuni sunnung dak 1 ma a pia a, tua a kitawpna lai uh tuni mah nitak lam dak 5 tan a JAC sadar hills khut a piak a omkei leh kiphinna tuamtuam pat hiding a, economic blockade khauhtak in leng zuiding chi hi. Tuabasng a kitawpdia theihsakna ngeihngaih ahihkeileh JAC sadar hills in Sadar hill a ADC office khakding a, Block congress committee leng phiat ding hin gen hi. Huai ban ah UNC President Gaidon Kamei in Manipur khangthu theichian loupi a, Manipur kichi Nagate leh Meitei te tenna mun hidan a gen a, a dangte polam mi hidan a kampau a neih toh kisai JAC sadar hills in zadah mahmah uh hin gen a, India kichi Negritos, Dravidians, Proto-Austroloids, Mongoloid leh Aryans te omna mun hi a, himahleh North east bial teng Tibeto-Mongoloids a kipan vek ahihna uah Naga leh Kuki kichite a kipatna uh kibang ahi chi hi. Naga te a ding a Kuki kichi gamdangmi ahihbang un, Manipur a teeng Nagate leng Kukite koihdan ah Kaccha Nagas hi uh a, huai lak ah Tangkhul, Mao, Paomai, Zeliangrong chihte om uh hin gen hi. Majumdar and Bhattasali (History of India, Dacca 1930 pp 6-7) a kigelhdan in, khangthu sut mite'n Kukite kichi Dravidian hunlai apan ana omkhin thamta uh hin gelh uh chin JAC sadar hills in gen ua, Manipur a Meitei te zatdan in, "The pooyas" kichi Kuki hausa nih Kuki Ahongba leh Kuki Achouba te kumzabi 33 hunlai in Nongda Lairen Pakhangba chia theih a om in, Meitei lengpa toh ana kizawl uh hin gen a, Royal Chronicles of the Meitei Kings (Cheitharol Kumbaba) in a chiamteh dan in 186 Sakabda (AD 264) Meidungu Taothingmang kichi Kuki kumpi ana om khin ahi ci hi. Tuateng ziak in, Nagate'n amau ut thu hilou a Burma a om a unau pihte uh toh kiawm khawm a sawm bang un, Kuki te'n leng a unau pihte uh toh kigawm khawm sawm uh hin gen a, a diktak in kuki te Sadar hills a teeng masa himahle uh Nagate'n thagum a Kuki te mun luah uh hizaw ahi chi hi. Tuabang a kukite'n a luahna gam uh chia nam thil a lalou a kiniam khiak tak a omlai in, UNC in Sadar Hills pen Naga issue suaksak hin ngoh a, Congress solkal in leng Sadar hills mipite zekhem hin ngoh hi. Ibobi in Sadar hills district piching a a puankhiak kei leh ui in leng a nak (bark) te sang a a keihkhak te'n nasa zaw uh ahihman in, Congress in a theih vengveng na ding a JAC sadar hills kipan ding ahi chi hi. Huailou in tulel a UNC blockade paitou lel toh kisai in, November 1 apan Manipur state sung a thautui leh vanpua garite hong tun masakna pending un, zan nitak in thautui pua tanker leh van poimoh tuamtuam pua kigawm khawm Truck 100 val Jiribam apan Imphal hongtung uh a, tuni tak in leng 100 val mah hong tunbeh dia lam -et in om hi. Tukal seppatni in ahihleh IRB leh Manipur Police Commando personnel tamtak in Oil tanker leh truck lian taktak 299 vel van pawding in Imphal nusia in jiribam lutpih uh a, himahleh, Jiribam area ah blockade thuahnih a om ziak in, truck tamzaw koltang in, tulel in assam apan Manipur zuan gari lian vangik pua 1500 vel state gamgi zul ah koltang lel uh hin kigen hi. Oil tanker zan nitak in hunkhop hongtung mahleh thautui kining ching om theih nai tuanlouh ziak in, petrol litre khat ah black in dangka 300 a zuak in om a, Petrol pump mun khenkhat ah kihong muh himahleh thautui deih mi tam petmah in Km 2 val a sau in kivualdim maimah uhi.

 

NSCN (IM) a ding a Home Minister Kilo Kilonser Rh Raising in a genna ah Framework agreement tungtawn in India leh Nagate'n kitanauna thak neita uh chi hi. Hiai thu ahihleh thuthak saitu tuamtuam in Camp Hebron a NSCN (IM) home Minister, Rh Raising in a kimuhpih hun a a gen hi a, 2015 kum a India leh NSCN (IM) in Framework Agreement suai a kaih pen uh, Nagate khangthu pansan a kibawl hi a, huaibel Nagate kichi india ah omlou in Burma ah leng om tuanlou ua, amau leh amau kivaihawm uh ahi chihna ahi chi hi. NSCN (IM) Home Minister Rh Raising in a genzelna ah India solkal in Framework agreement ziak in Nagate amau leh amau a kivaihawm mah uh ahihdan pompihna pia hin gen a, Nagate a ding a Flag tuam leh passport tuam chihte om theihna ding in India solkal in pompihna peta a, Indo-Naga issue final puankhiak a om chiang in hiai thu puankhiak khawm hiding chi hi. Aman a genzelna ah Naga te kichi India a om hilou ua, Indian Union a lut uh ahihdan suai khatvei leng kaih a omlouh ziak a, India a omlou ah ahi uh chi hi. Final peace accord puankhiak chiang in Nagate'n Passport tuam leh flag tuam neiding uh chih himahleh kivenbitna, security, khotaang kivaipuakna leh sum leh pai zonna ah India leh Nagate a pankhawm uh ngai hin gen hi. Nagate tenna bial a leinuai hauhsakna omte leng India in a masakna pen ding in theihpihna peta a, huai kawmkawm in tua hauhsaknate neitu leh kemtu Naga te ahihdan leng India in pompih chi hi. British te hunlai in Nagate amau leh amau kivaihawm mahle uh, British te'n India a pawtsan nung un, Nagate vaihawmna bei in, india leh Burma khutnuai ah Nagate omkha ua, himahleh tu in Nagate hun kipan nawnta in, Pathiam in lem a sakleh Nagate'n zalenna mupahta ding uh ahi chi hi. NSCN (IM) Home Minister Rh Raising in a genbehna ah, nagate'n a tup uh a tangtun na ding un lampi ah daal theiding a lian hin a neu hita leh bangreng om lehleng Nagate a tup uh a lohchinna ding in kuaman daal zoulou ding chi hi. Nagate tulel in Pathian vualzawlna naktak in dong ua, suahlam, tumlam, simlam leh mallam hitaleh koimun peuh ah a thil hihte uah lohching in, maban ah leng lohching touzel ding uh a, nagate a ding a khovak kipan dek ahihziak in, Naga mipite'n leng Nam khat bawlkhe ding in kisak hun mahmahta a, lungsim ngaihtuahna hoihlou a neihte uh paihkhia a, kim leh kiang a teeng namdangte toh kingeihlouhna omte leng a thu a genveng hunta ahi chi hi. India leh Nagate kal a kikaptuahna om hun a thil kisiate leng tunding thak sawmna pailel a, koimun peuh a lohching mahle Pathian amasa pen a i koih ding uh ahi chin NSCN (IM) Home Minister Rh Raising in naga mipi te kiang ah ngetna nei hi. Nagate gamkhat a om ding i hih taak man in, Nagate tenna bial ah science and technological schools, colleges leh universities, medical colleges leh universities, sports universities, religious universities, cultural institutions chihte tunding ngai hin gen a, huai hileh Nagate lungsim ngaihtuahna a khantouhna hon tut kia hilou in, taksa leh khalam ah punna tamsem hontun ding hin gen hi.

 

India phualpi solkal in Reserve Bank of India toh kithuah a sum 2000 note thak a bawl uh, bangchileh a lem leh a tak kitheikhen ding hiam chih puankiak a om ah, tua sum note thak tui a sukkhak chiang in a rong ke thei a, a lemte ahihleh ke theilou hin gen uhi. 2000 note bawlthak a om nung kha khat leng pai naikei mahleh India gamsung ah a lem tamtak om man hidan a gen hi a, phualpi solkal in tua sum note thak ah Mahatma Gandhi lem a lai ah tuangsak in, a nunglam ah India in Mars tan tungdia a kapkhiak Magalayaan lemlak koih in om a, a laizang ah RBI kigelhna silver kikoih in sum note dangte sang in neuzaw hi. Hiai thu toh kisai a Economic Affairs Secretary Shaktikanta Das in a gendan in, sum note thak pen hoihtak a kepdia bawl ahih dungzui in, a rong leng tui in a sukkhak chiang a kethei ding a kibawl hin gen a, kuaman leikawm ah seel thei nawnlou ding uh chi hi. Himahleh zanzek a Police te'n Rajasthan state sung a 2000 note lem a matte uh bel a rong ke theilou hin gen a, silver a kibelhna ah RBI chi omlou hin gen a, mipi kuapeuh in 2000 note a lem leh a tak ahihdan a theihna ding un a rong ke theidia bawl in om chi hi. Sum note lem leh a tak theihchet sawmna ziak a test bawl hun ah pink rong pen a kiak ngeingei leh leng kuamah buailou ding in theisak a, pink colour pen a ngeina mah a hong om nawnding ahi chi hi.

 

Tuzingkal baihtak dak 4:30 velding in New Delhi khopi leh a sehvel ah zinling hat lolou om a, a nung sawtlou in zinling dangkhat om nawn mahleh si leh liam kuamah omlou uh hin kigen hi. Indian Meteorological Department in a gendan un, zinling ahihleh tehna magnitude 4.4 a hat hi a, tua zinling om nung in, a nungzui Magnitude 3.6 a hat om nawn mahleh zinling ziak a building kisia omlouh ban ah, sihna tuak leh liamna tuak kuamah omlou uhi.

 

Uttar Pradesh state sung a Bareilly mun a sum 500 note leh 1000 note tamtak halsiatsa a om muhkhiak a om banah, kallui kiginni a Ganga luipi tung a sum 500 leh 1000 note tamtak tuitung a kilaam muhkhiak a om nung in, tu in leng Kolkata khopi sung a thilzuakna munpi sawngtung a van hoihlou koihkhawmna mun ah Sum 500 note leh 1000 note bohkek a omsa sai-ip dim nih muhkhiak in om nawn hi. Sum note tamtak bohkek a omsa muhkhiak a omna mun ahihleh Kolkata khopi sung a Golf Club Road a thilzuakna munpi hi a, niin lom paihna garbage dump khat ah sum 1000 note leh 500 note tamtal sai-ip dim nih muhkhiak in om hi. Thil omdan theihphet in Police in sum tamtak muhkhiak a omna mun delh ngal in, mipi paikhawmte'n a sukthaang louhna ding koih khe pah uh a, tu in sum note taktak hihiam chihleh fake note hihiam chih suina pailel hi. Tua mun a teeng mipi paikhawm te'n a gendan un, PM Modi in black Money chih thupi a nei a, muhna diklou sum tamtak muhsuah a sawmte hoih mahmah hin gen ua, sum kibotse te leng muhna diklou tak a muh ahihziak a kuahiam khat in a paih uh hiding a gintakthu gen in, sum paihtute'n leng botkek mailou in, kholak ah paai le uh kuahiam nekding neilou khat in a phattuam ngei gintak thu gen uhi.

 

 

GAMDANG THUTHANG

China in Asia tumlam gamte leh Africa gam tanpha a sum dawnna leh a gamsung a pan a bawlkhiak vante a puakkhiak theihna ding in Pakistan a Gwadar port ah longkhawlna a bawl khahkhiakna neihna hun Pakistan gamsung a top civil leh military official tamtak in a uap nung un, tu in tua longkhawlna mun kia hilou in Balochistan tawn a pai Highway ah China a kipan van tamtak Pakistan ah puaklut gige in omta hi. Pakistan leh china in kisumdawntuahna lam naktak a puahphat a sawm uh toh kiton in, Pakistan Prime Minister Nawaz Sharif in China in Pakistan gamsung pansan a sumdawnna leh van tuamtuam thotkhiakna a neih dingte Pakistan in theihtawp a kithuahpih leh venbitna hoihtak pe ding ahihdan chiam hi. China leh Asia tumlam gamte ban ah Africa gamte toh kisumdawn tuahna ding lampi leh longkhawlna mun ban ah gamdangmite (Chinese) Pakistan in venbitna hoihtak pe ding hidan inleng thusuak in taklang hi. Hiai kisumdawntuahna lampi ahihleh helna leh hiamgamna in a tuamchipna mun Balochistan province sung tawn a pai ahi hi. Ni bangzahhiam paisa inleng hiai lampi a truckte beih in ana omta a, himahleh Pakistan in bel Islamic State helpawlte'n Pakistan simtumlam a Chinese project tuamtuamte hihbuaina ding ngimna a, a nasep uh hidan in ngoh uhi. China in ahihleh Pakistan gamsung ah China-Pakistan Economic Corridor project nuai a lamlian leh power plant bangzahhiam bawl a, huai tungtawn in tunung a China in Pakistan leh Asia tumlam gamte kiang a US dollar 46 billion invest tum hi. China leh Pakistan in ahihleh hun sawttak a kipan in India mitsuan a neikawm in gamsung vaihawmna leh galvan lam a kizopna hoihtak ana neita uhi. Gwadar longkhawlna munpi ahihleh Arabian Tuipi a suakkhia hi a, Asia simlam, Central Asia leh Asia tumlam gamte toh kisumdawn tuahna ding a mun poimohtak suak hi. China in ahihleh Arabian Tuipi leh Indian Ocean tawn a thoveng leh zalentak a kiveitheihna ding lampi ana zong den a, tu in Pakistan panpihna tungtawn in Asia tumlam gamte leh Africa gamte toh kisumdawn tuah theihna ding lampi hoihtak ngahta hi.

 

India leh Pakistan gamgi zul ah India sepaihte'n nasatak a Pakistan sepaihte panmun a galkap ziak un, Pakistan solkal in Pakistan sepaih 7 in sihna tuak uh hin thupuan bawl uhi. India in hiai toh kisai in galvan lauhuai zang lou himhim uh hin thupuan bawl mahle uh, Pakistan sepaihte'n Line of Control dung a om Bhimber sector ah India sepaihte thaukhahna ziak in Pakistan sepaih 7 si uh hin Pakistan Military thusuak in gen a, India in tuabang a a gamtat a tawpsan keileh Pakistan in thukkik ding hin vauna leng bawl ngal hi. Hiai thusuah diktak hihiam chih theih hikei mahleh langnih tuak in 120 mm heavy mortars zang in nasatak in kigalkap uh a, 2003 nung a ding a galvan thupi mahmah zang a gamnih kal kigal kap tuahna thupi pen hilai dan a chiamteh in om hi.