You are here: HomeRSS FeedsLatest News

Angels' Vision News | November 19, 2016

Sunday, 20 November 2016 18:06

THUTHANG LAKTOMTE
@@ Khamtheih sal apan suahtak utna lungtang neite a ding in Lamka Damdawi Inn ah Drug Treatment Clinic honkhiak in om
@ @ Phualpi solkal in Manipur CM kiang ah RGGVY nuai a Crore 59.89 zat thelthangna toh kisai in action la ding in theisak
@@ John F kennedy birthday a Marilyn Monroe puan-ak silh US dollar 4.5 million ah Auction in om

 


TUALSUNG THUTHANG

Khamtheih sal apan suahtak utna taktak neite a ding in District Hospital in Drug Treatment Clinic kichi hongkhia in, Seppatni apan lunggulhna nei khempeuh in va naih theih ding hi. Hiai clinic ahihleh khamtheih chi tuamtuam nekthoh, dawnthoh, hiip thoh leh kikapthohte ading bik hi a, siamna tuam nei doctor leh nurse te'n hoihtak in enkai ding ua, mahni thupukna leh utna liauliau a khamtheih sal apan suakta nuamte a thil chiin zongsat utoh kituak in a ngawl theihna ding uh damdawi a thawn in piak hiding ua, kuahiam sawl luihna a va zuante bel ngaihsak hilou ding uhi. Thutut kingah dan in, Drug Treatment Clinic ahihleh Centre Government in a patkhiak hi a, AIIMS ah a masapen ding in honkhiak a om in, kum tamlou sung in state tuamtuam ah honkhiak in om a, apaisa February 23, 2016 in National Drug Dependence Treatment Centre te'n Lamka Damdawi Inn etkhiakna hong neih hun ua approval a bawlsa uh hi a, Lamka Damdawi Inn in September kha apan in nasep pan ngal in, tuni tan in hiai clinic ah mi 61 in register bawlta uh hi'n kigen hi. Hiai Drug Treatment Clinic ahihleh Seppatni apan Kiginni tan zinglam dak 10 apan sunnung dak 1 su ng kihong ding a, Dr. Chinggoman, Psychiatrist, Nodal Officer etkhiana nuai ah Dr. N Samte, MO ban ah counselor leh nurse khat duty ding ua, clinic naih ding khempeuh in passport size limlak copy 2 leh sisan testna lai kimtak a tawi uh ngai ding a, minkum lut zoh ahih chiang in clinic in I-card pia in, investigation tuamtuam nei ding a, amau toh kituak ding damdoi a thawn in piak hiding uh hi'n thutut kingah hi.

 

 

CCPur District sung a Artiste Association 4 - Zogam Artiste Association, Hmar Artiste Association, Kuki Artiste Progressive Union leh Mizo Zaimi Insuihkhawm te kigawmkhawmna Joint Artiste Fellowship te'n "Campaign Unity through Music" chih thupi a nei a Road Show a neih uh paitouhpih zel in zingchiang sunnung dak 1:00 in Kangvai khua ah a 3veina ding in Road Show nei nawn ding uhi. Hiai Road Show ahihleh YVA Kangvai Unit i n zintun ding a, physical arrangement tel in thil bangkim ah mohpuakna la ding ua, nam tuamtuam apan paikhawm lasa siam tuamtuam te'n gam ngaihla leh u-le-nau ki-itna late sa in fellowship nei khawm ding ua, Kangvai khua leh a kimvel a khuate apan U leh Nau tampi hong paikhawm ding uh hi'n thutut kingah hi. Kipumkhatna lou in singtangmite a ding in suahtakna omlou ahihman in, i gam a lasa siam tuamtuamte panlakna kuapeuh in kithuahpih chiat ding in Joint Artistes Fellowship te'n ngetna bawl uhi.

 

Manipur state solkal in 2013 kum a Police constable a semding kilakna pailel a cancel nung in, tukum in Police constable a semding lak thakna om nawn a, tua recruitment pen written test zohsiang a om nung in, tunin Manipur Police Department in, Written result suahkhia hi. Tuni a result ahihleh nidang banglou tak in Manipur Police Website ah taklat hilou a, a result thei ut peuhmah in, Babupara a Manipur Police Headquarter ah et theih ding a, district dangte a theihpih hikei mahleh Churachandpur district apan candidate 629 te'n lohchinna ngah uh hi'n thutut kingah hi.

 

Saptuam tuamtuam a Dorca makaite a ding in tuni'n CMO Conference Hall ah Advocacy Meeting om a, hiai hun ah khamtheih hihte saptuam leh khotang ah inntektak a om a, a saltanna uapan pikhiak theih ding dan toh kisai kisinsakna om hi. Hiai Meeting ahihleh SHALOM leh Project Sunrise te'n a sai uh hi a, saptuam tuamtuam 11 apan dorca makai mi 20 val kihel uhi. Programme ahihleh sunma dak 11:00 in kipan a, Dr. Phirthanglien Buhril, DACO/CCpur in introductory speech gen in, Miss Lalnunpuii leh Lalruatpuii te'n HIV leh Hepetitis C toh kisai a CCPur District dinmun pulak in, Miss Esther, TI-SHALOM in Harm Reduction toh kisai sinsak in, T. Benjamin, District Supervisor, DAPCU in NACP facility tuamtuam omte pulak in hiai facility-te zang a khotang bawlhoihna dia panlak ding dan toh kisai sinsak hi. Hiai hun ah Dr. Phirthanglien Buhril, DACO/CCpur in a thugenna ah, khamtheih hihte leh HIV positive-te saptuam in tuamkoih mailou a, a saltanna uap pan suahtaksak theihna dia nu te'n pan i lak uh hunta ahi chi'n gen hi.

 

Zou Presbyterian Youth Fellowship (MYCA) in kumnawn 2017 chiang a kum 60 chinna Diamond Jubilee thupitak a lop a sawmna utoh kisai in kisak kholna paitou zel in, Diamond Jubilee Celebration Committee in Souvenir a bawl uh zingchiang in Synod Conference Hall, Zomi Colony ah hongkhiakna nei ding uhi. Programme ahihleh sunnung dak 1:00 in kipan ding a, Rev. Stephen Chinzathang, Executive Secretary Incharge Youth in Vaidawnna thu gen in, Rev. Khamminthang, ZPYF Leader in Souvenir toh kisai pulakna nei in, Rev. Khaiminlian, Convenor, Souvenir Department in hongkhe ding hi. Thutut kingah dan in, kum nawn January 2017 chiang in Zou Presbyterian Youth Fellowship in kum 60 chinna Diamond Jubilee thupitak a lop sawm in kisingsa lel ua, Diamond Jubilee cheplawkna leh ZPCS nuai a District 10 omte lak ah kimeltheih tuahna leh kitanauna hoihzaw om theihna ding tupna in August kha apan in activity tuamtuam nei in, Diamond Jubilee lop hun tan sunzom tou ding ua, tuni tan in Football Tournament leh Volleyball Tournament nei khinta in, December kha in Jubilee Gospel Live Concert nei nawn ding tuh hi'n thutut kingah hi.

 

District AIDS Control & Prevention Unit (DAPCU) in tu October kha sung a ding report suahkheta in, report dungzui in kha paita sung in CCPur District ah HIV Positive 7 muhkhiak a om hi'n taklang hi. Report in a taklat dan in, tu October khasung in ICTC tuamtuam a HIV ki-test mi 517 om in, huaite lak ah HIV Positive 6 muhkhiak hi a, amau te'n ART Centre ah registration bawl ngal in, mi 1 in damdawi ne pan ngal hi. HIV ki-test mi 517 lak ah Female Sex Worker mi 148 leh Injecting Drug User mi 142 om a, FSW-te lak ah HIV Positive muhkhiak omlou in, Injecting Drug User-te lak ah positive 1 muhkhiak hi a, tu in ART Centre ah registration bawl in damdawi bel pan nailou hi. Tu October khasung mah in naupaai HIV ki-test mi 452 om in, positive delivery 1 om a, naupaaite lak ah positive 1 muhkhiak a om in, aman leng damdawi pan ngal hi'n report in taklang hi. Tuaban ah, Co-infected (HIV leh TB) ki-test mi 11 om in, positive 1 muhkhiak hi a, tukum April apan October khasung in HIV Positive nau nei mi 49 om in, naungek-te hoihtak a test ahih nung in positive khat leng muhkhiak hilou hi'n report in taklang hi. Tuabangkal ah, OST Centre ah tuni tan in mi 1102 in registration bawlta in, mi 1090 te'n OST damdawi nei ua, mi 105 te'n treatment teng zouta uh hi'n thutut kingah hi.

 

CCpur District Sports Association (CDSA) saina in hongtung ding November 21, 2016 in Tuibuang Peace Ground ah (L) Damien Letminlun Gangte District 2nd Division League kipan ding a, opening match ah Lenlai Club leh Sanakhang FC kimawl ding uhi. Sunnung dak 12:30 in Opening Ceremony om ding a, huai ah K. Paukhansuan, Social Worker in Chief Guest hihna toh uap in, Seiboi Haokip, Social Worker leh K. Haopu Gangte, Social Worker te'n Guest of Honour leh Chief Host hihna toh hiai hun zatna uap ding uhi. Thutut kingah dan in, tukum 2nd Division League ah CCpur District sung mun tuamtuam pan team 30 kihel ding ua, Pool 5 a kikhen in Pool khat ah team 6 zel om in, league match kimawl masa ding ua, Pool Champion teng First Division ah luttou in 2nd Division Champion hihna kituh ding uh hi'n thutut kingah hi. Tuabangkal ah, hun bangtan hiam buaina tuamtuam ziak a kimawlna khawlsak a om (L) Khaikhanlian Memorial District 1st Division League kimawlna leng November 21, 2016 (Seppatni) apan in sutzop hinawn ding a, fixture kibawlsa ngeina bang a zuih hiding hi'n thutut kingah hi.

 

Kuki Students' Organization (KSO) CCpur President dia telching thak a om TL Haopu Haokip in Cabinet Expansion bawl in, 2016-19 sung a Executive Member ding guang in tuni sunnung dak 2:00 in KIC Office, Tuibuang ah laklut thak a om Executive Member-te kichiamsakna nei in, amaute a ding in thumsakna hun zang uhi. Hiai hun ah KSO CCPur vaipo dia telching thak a omte kimtak a akihel banuah KSO/CCpur nuai a om Block 5 apan President leh secretary-te leng kihel in, Thangjang Haokip, President, KIC/CCPur tel in mi poimoh bangzah hiam in hiai hun zatna uap uhi. Thutut kingah dan in, apaisa October 4, 2016 in KSO/CCpur vaipo ding kitelna neih in om a, huai ah KSO nuai a om student organization tuamtuam apan palai paikhawm te'n a 2veina ding in President ding in TL Haopu Haokip telching in, Vice President (Administration) ding in T. Letminlal Haokip a telching banuah General Secretary ding in NJ Haoneo Baite, Secretary (Education) ding in George Letthenhao Haokip banah Finance Secretary di ng in Samuel Lhungdim telching uhi. Tuni a Executive Member dia guanthak a omte kichiamsakna neihna hun ah, Haoneo Baite, General Secretary in hun zatna makaih in, Thangjang Haokip, President, KIC in hasotna thu gen a, aman Manipur ah nam tuamtuam omkhawm ahihna ah student te'n mohpuakna liantak nei uh ahih dan gen in, khentuam neilou a district mipite kituaktak a om khom pen student-te mohpuakna ahi chi'n gen hi. Nu-le-pat te'n lametna liantak nei in neih-le-lam tamtak seng in tate mun tuamtuam ah school/college kaisak mahle uh tu lel dinmun et in mi khosuak vang mahmah a, huchikawmkal ah, CCpur District ah summet bawlna ding lel a school bawl tamtak omta ahihna ah student te'n pan a lak thak uh poimoh mahmah hi'n gen a, gam bawlhoihna ding in pankhawmna mah poimoh ahihna ah, organization tuamtuamte leng kithuzak tuah a pankhawm dan hong siam mahmah ding in hasuan hi. Executive Member dia guanthak a om mi 20-te ahihleh KSO/CCPur President TL Haopu Haokip in kichiamsakna nei in, Rev. Dr. P. Chongloi, KBC Central Church in amaute a ding in thumsakna nei hi.

 


GAMSUNG THUTHANG

India phualpi solkal in 2005 kum apan India gamsung a khota tamtak tel a meivak tunlouhna mun te a meivak tunsak vekding chia thupuan a bawl sepsuahna pailel ah, Manipur state sung a Rajiv Gandhi Grameen Vidyutikaran Yojana (RGGVY) nuai a project sepsuahna ding a sum sanction a om te lak ah dangka Crore 59.89 veldingte zatna theihlouh a om ziak in, phualpi solkal in Manipur Chief Minister Okram Ibobi Singh kiang ah a kisaipih thuneitute tung a action lading in theisak hi. Peoples Chronicle in a taklat dan in, Department of Personnel, Union Ministry of Personnel, Public Grievances and Pensions in hiai toh kisai in a gelhthoh in October 26 in Manipur CM a ding lai khat pia uh a, tua phualpi solkal apan laithon tungtawn in, Joint Redressal Council (JRC), Manipur in tukum August 31 in India Prime Minister kiang ah Rajiv Gandhi Grameen Vidyutikaran Yojana (RGGVY) nuai a tender bawltu M/s Shyama Power (India) Pvt Ltd, Haryana leh Manipur state power department in nasep ding ginatak a semlou uh ahihthu zasak hin gen hi. Phualpi apan Manipur CM a ding laithon in a taklat zelna ah, Churachandpur, Bishnupur, Imphal East leh Imphal west a ding nasepna piak a om hun in, First leh second lowest bidder te nawlkhin a om uh hin gen a, tua ziak in, state exchequer ah dangka Crore 13.82 vel mangthang hin taklang hi. Tua kia hilou in, nasepna bangkim pat a om nung in leng dangka Crore 7.26 mangthang hin gen a, Imphal West vuak ah Power Department in dangka Crore 10 thelthang sak in, tua te voucher tuamtuam 57 pansan a piakkhiak himahleh, challan bangmah omlou hin gen uhi. State solkal in Imphal West ah additional dan in zatna diktak zui in dangka Crore 3.70 zang uh a, Churachandpur ah crore 11.73 zat a om in, bishnupur ah crore 2.37 zat in om hi. Himahleh Imphal West ah invoice tempering tel in sum diklou tak a kizang dangka Crore 11.13 om hin tua laithon in gen a, CAG in leng Manipur ah Rajiv Gandhi Grameen Vidyutikaran Yojana (RGGVY) sepsuana ding a sum kizang te lak ah dangka crore 59.89 om hin taklang a, tuateng ban ah, Senapati leh Ukhrul district a ding a RGGVY works toh kisai a tender sap a omzah crore 90 lak ah M/s Shyama Power (India) Pvt Ltd, Haryana in NIT (notice inviting tender) tellou in nasep pan uh a, High court in interim order dan in 2008 in thusuah bawl mahleh pending a omlai hin gen a, M/s Utkal Galvanizers Ltd, Odisha a ding a November 19, 2007 a work piak a om toh sim in, tua work piak a om nihte'n singtangmite dikna leh tanvou nelsiah a om hin taklang a, kintak a M/s Shyama Power (India) Pvt Ltd, Haryana in District nih a a nasepsate uh enkik thakding leh a kituahpih bang uh gawtna peding in phualpi solkal in CM Ibobi theisak uhi.

 

Manipur state solkal inSadar hills bialteng district piching a puankhiak a sawm thu ah United Naga council in Nagate tenna bial a district kichi dinsuah chih om theilou ding hidan a gen a, Manipur state sung lutna Highway nihte blockade a bawl ziak un, Manipur ah niteng poimoh kitaksapna nasatak om hi. Manipur a niteng poimoh anntang, Chini, Chi, phulun leh a dangdang kitaksapna liantak om kal ah a diak in thautui taksapna nasapen in, Imphal khopi ngial ah thautui neikha Petrol leh Diesel Pump ah line saupipi a kivual in thautui deih a ngak pumdim maimah uh a, niteng phial in security venbitna khauhtak toh oil tanker gari bangzah hiam Imphal khopi hong lut thei mahle uh Manipur a thautui kitaksapna a zia om deuh nai tuanlou lai hi. Nagaland apan Imphal khopi kawmtuahna Highway ahihleh Nagate tam a teeng ziak un, Manipur state solkal in tua dimapur line tawn in vanpua gari escort ngam nailou a, Jiribam apan Imphal zotna lamlian tawn in niteng poimoh thilte leh thautui puaklut himahleh kining chih om thei nailou lai hin kigen hi. Imphal khopi sung a Petrol pump khenkhat ah School naupang pua Van chihlouh piak phal hilou ua, khenkhat ah mi a tamluat ziak in, thautui deih a nisa nuai a kivualte kiphut buai louhna ding in Police tanpha Duty sak in om uhi. Imphal khopi sung ah thautui taksapna liantak om in, Pump tamzaw kikhak mahleh Black a leitheih ding tamtak muhtheih a om hidan a gen hi a, Black ah litre 1 Rs. 300 leh 400 kikal a lei in om hi. Diesel leng Black ah leitheih din tamtak om a, himahleh litre 1 ah 150 apan 200 kikal man hin kigen hi. Thautui man kia hilou in ann huanna ding a kizang LPG gas leng vaang mahmah a black a zuakte'n cylinder khat 2000 in zuak uhi. Zan in Manipur a ding Oil Tanker gari 27 venbitna toh Imphal tan tut in om a, tunin leng tanker tamsem Imphal khopi tut a om gintak thu gen in om hi. Tuzing baihtak in, Mantripukhri apan CRPF venbitna toh tanker hunkhop in Assam zuan in kipan khia uh a, himahleh hong tunkik hun ding uh bel theih hilou hi. Tunin leng Imphal ah Petrol pump tuamtuam ah thautui hawm himahleh PCTC Petrol pump ah thautui hawm ahihlai in, sunnung dak 1 in a ziak theihlouh in pump neitute'n thakhat a Petrol pump a khak ziak un, thautui deih a ngak mipi tamtak pumbuai gawp in kiphinna tanpha nei uh a, state solkal in Petrol pump dangte sang a thautui tamzaw tua pump a pia hidan in gen mahleh nitum tan a a kihon tuan nawnlouh ziak in, mipi thangpai mahmah uhi. Apaisa 2011 kum in leng July 31 nitak apan Sadar Hills Districthood Demand Committee (SHDDC) in National Highways 39 (Dimapur-Kohima-Imphal) leh National Highway 53 (Imphal-Jiribam-Silchar) a blockade bawl a Naga group - United Naga Council (UNC) in leng Naga te tenna bial a District dang bawl ding deihlou a a kinangtuah ziak un, ni 93 sung vingveng Economic Blockade om man in, van man nasatak a khang in Thautui Diesel litre khat in 150 val man man hidan a gen hi a, Gas cylinder khat in 2500 val man hin kigen a, Manipur solkal in blockade sung in dangka crore 260 val mansuah zou hin leng kigen hi. Tutung a leng a issue kibang ahihna ah blockade in ni bangzah a daihdia chih gen ngam ding hilou hin kigen hi.

 

Sum note sihsakna toh kisai a Supreme Court apan Kal khat sung a phualpi solkal in dotna khauh taktak nih vei a maituahna ding in, Supreme Court in phualpi solkal kiang ah sum note sih sakna toh kisai tuni tan a minautangte haksatna sukveng theih a om nailouh thu ah kongtual a kiphinna tanpha om khak ding lauhpih mahmah ahihdan gen hi. Chief Justice of India TS Thakur in sum 500 note leh 1000 note sihsak a omna toh kisai deihlou pawlte'n petition a khiak pansan ua a genna ah, sphualpi solkal in 500 note leh 1000 note sisak mahleh 100 note sihsak a omlouh ziak in bang lohsawm hiam chin dotna bawl a, Bank leh ATM kong a mipi tamtak sum lakhe ut leh koih ut pumdim te haksatna bang loh sawm hiam chin leng dotna bawl hi. Sum note sihsak a om nung ni 10 val paita mahleh tuni tan a mipite haksatna dawn zangkhai theihna ding lampi om nailouh ziak in, mipi genthei tak a Bank kong a sun nitum a kivual te'n a tawp chiang a thangpai a gamsung pumpi a kiphinna a pat khak ding in Supreme Court in lauhpih mahmah hin gen a, Attorney General Mukul Rohatgi in leng sum note print na kia hilou in gamsug pumpi a ATM omna mun lakh val ah sum note thak ATM in a sim theihna ding a bawlthak ngaivek ding ahihman in, mipite buaina vengthei pahlou ding hin gen a, tua in hoihlam sang a siatna leh gamsung venbitna tanpha a ding a lauhhuai a tun khak ding lauhhuai a sakthu gen hi.

 


GAMDANG THUTHANG

Khovel pumpi a melhoih pen hidan a chiamteh a om kha ngei, Marilyn Monroe in a damlai a US president ana hingei John F Kennedy pianni champha 45na a lopna a a puan ak silh Bevery Hills ah Auction a zuakkhiak a om in, huai ah tua Marilyn Monroe puan ak tual silh US dollar 4.5 million a zuak in om hi. Tua kicheina puan-ak ahihleh khut a kikhui leh crystal 2,500 a kizem hi a, a tuung i US dollar 2 million leh 3 million kikal a khot theih ding in a zuaktu Julien's Auctions pawl in gingta mahle uh, zuakkhiak a om taktak hun a US dollar 4.5 million a khot in om hiTua kicheina puan ahihleh Marilyn Monroe in a silh lai in kigaak mahmah hidan a gen hi a, 1962 kum a John F kennedy in US President dinmun a letlai a a pianni champha 45na Madison Square Garden a a zat hun ah, a nungaknu Marilyn Monroe in nalh theipen a kichei a a silh hin gen uhi. Tua Marilyn Monroe puan-ak ahihleh 1999 kum in Auction a zuakkhiak masak in om a, huai hun in, business men Martin Zweig in US dollar 1.3 million in lei a, himahleh tua puan-ak pen Marilyn Monroe in President John F Kennedy kiang a Happy Bir thday la a sakkhumna chih ziak in, a deih tam petmah in, tukum in US dollar 4.5 million tungtou hi. Marilyn Monroe in puansilh khenkhatte leng a man tam thei mahmah in "Some Like it Hot" cocktail dress kichi US dollar 4,50,000, a zuak hi a, Rose Tattoo gown leng US dollar 1,25,000 a zuak ahih banah, a khedap Ferragamo shoes kichi US dollar 34,000 a zuak a om in, a ngawng oh "Niagara" negligee kichi leng US dollar 59,000 a zuak in om hi.

 

South Sudan gamsung buaina in venlam nawt theilou a galvan zalentak a zuak a om ziak in, US in UN security council tungtawn in, kintak a South Sudan gamsung a galvan puaklut leh zuakding khamna khauhtak puan ahihkei leh a lompi a kithahna tanpha tungthei gige hidan ac gen in, galvan khaamna bawlding in kisa lel hi. South sudan gamsung buaina ahihleh South Sudan's President Salva Kiir leh a deputy lui Riek Machar kal a vaihawm ding kituhna ziak a tualgal huaisetak piangkhia hi a, 2013 apan South dudan gal a kipat nung in, kumlui in kilemna chikhat UN panlakna tungtawn in neithei mahle uh Machar in South sudan usia a gamdang pansan a buaina a bawl lai ziak in, tuni tan kikap tuahna vengthei nailou lai hi. Adama Dieng, UN special adviser on the prevention of genocide in kallui in South Sudan buaina toh kisai enkhe ding in South Sudan gamsung vehna nei a, huai hun ah aman a muhkhiak dan in, galvan zalentak leh baihlam tak a bazaar peuh a leitheih ding a om ziak in, a lompi a kithahna genocide tanpha tungthei ding dinmun a om hin gen a, hiai thu ah US solkal kang ah UN security council a Arms embargo nei ding a nohna peding a panpihna a ngetnung in, US in le ng pomsak in, tu in UN Security Council ah US in hiai thu pawlut in, thauvui thautang khaamna bawlding in US in nohna neita hin kigen hi.

 

Iraq gamsung a khopi lianpen nihna Mosul khopi apan ISIL te nohkhiak sawm a Iraq sepaih te'n beihpi a suah uh toh kisai in, Iraq sepaihte leh Kurdish thautawi pawl kigawm te'n mailam a nawt zel uh toh kiton in, kikap tuahna a koltan khak ding lau in Mosul khopi a teeng minautang tamtak Mosul khopi pawtsan in Syria ah galtai panta uh chihthu om hi. Thusuak in a gendan in, khalui October khasung vuak in leng Mosul khopi a teeng minautang 14,000 velding te;n Syria gamsung zuan a galtai khin uh hin gen a, November kha pailel ah mi 8000 vel Syria gamsung a Hasakah kichihna mun lut uh hin leng gen hi. Mosul apan galtai tamtak te Syria a lutnung un, mi 5000 vel dingte Syria gamsung a ISIL te munpi Raqqa khopi kiang ah kibu uh a, mi dang tamtakte ahihleh Deir Az Zor, Aleppo leh Idlib, a kikhen zak in, refugee camp ah omlou uh chi hi. Syria gamsung a damlou kemtu Medical Agency tuamtuam in leng tulel in Syria gamsung mun tuamtuam ah Iraq mi hunkhop damlouhna tuakte kemkha uh hin gen ua, himahleh Hasakah mun a al-Hol refugee camp a galtaite a ding huhna ahihleh UN in venbitna toh kisai a hoih nailouh ziak in pawlut thei nailou lai hi. al-Hol camp in ahihleh galtai 15,000 velding omsak thei hidan a gen himahleh tulel in, mi 50,000 val om zou ding ua gintak hi a, gamgi zul ah galtai tamtak Syria gamsung lut theilou a a koltang lai ziak un, UN in tua galtai koltang tamtakte bitna ding ngaihtuah in buai mahmah uhi.