You are here: HomeRSS FeedsThe Lamka Post

The Lamka Post | August 24, 2017

Thursday, 24 August 2017 08:14

Congress President Sonia leh mi tuamtuam in sunthu puang

Governor leh CM tel in makai tuamtu­am in Rishang Keishing zahna pia

Imphal, Aug 23: Zan, August 22 nitak dak 8:15 vel a RIMS Hospital, Imphal a mualliam, Manipur Chief Minister lui leh veteran politician Rishang Keishing, tuni, Nilaini in a tenna mun Mantripukhri ah zahna thupi­tak piak in om hi.

 

Hiai hun in Manipur Gover­nor Dr Najma Heptulla, Chief Min­ister Nongthombam Biren Singh, Deputy CM Yumnam Joykumar Singh, minister-te, MLA-te, CM lui leh opposition makai Okram Ibobi Singh, Manipur Pradesh Congress Committee (MPCC) President TN Haokip leh top civil leh police of­ficial-te’n Rishang Keishing zahna pak pia uhi. Huai ban ah pawlpi tuamtuam a pan makaite’n leng zahna pia uhi.

 

Tuni zingtung a kipan in state sung kilchih a kipan mipite’n zahna pe ding in Rishang Keishing tenna mun Mantripukhri zuan uhi. Mani­pur Governor Dr Najma Heptualla tel in makai tuamtuam in Rishang Keishing zahna pia uhi. Governor in Rishang Keishing tapa Victor Keishing leng kimuhpih hi. Gov­ernor in sunna thuchah a, a genna ah, a hunloutak a Rishang Keish­ing sihna lungphawnhuaisa hi’n gen a, state leh mipi khantouhna dia Rishang in a hinkhua zangbei hi’n gen hi. Rishang Keishing sihna state a dia manna thupitak ahihdan gen kawm in tawlngalou a mipite a ding a nna thupitak a sepkhiakte ditzoh vual hilou ding hi’n gen hi.

 

Manipur Chief Minister N Biren Singh inleng Chief Minister lui leh Parliamentarian Rishang Keishing sunthu puang hi. Sunna thuchah ah Chief Minister in Rishang Keishing pen Manipur a Chief Minister sawt pangpen hi’n gen hi. Manipur masawnna leh khantouhna ding a Ris­hang Keishing nasepkh­iakte phawk hiden ding ahihdan gen in Rishang Keishing innkuanpihte sunpih mahmah ahihdan gen hi. Huai ban ah Ris­hang Keishing pen mip­ite a leh makai tultheilou ban ah MP upapen khat leng ahi chi’n Biren Singh in gen hi.

 

Chief Minister lui Okram Ibobi Singh in a gendan in, Manipur a nam tengteng lak a kituahna leh kipumkhat­na omsak ding Rishang Keishing in a sihdong a, a thiltup hi’n gen hi.

 

Naga Political Lead­ers’ Forum Manipur (NPLFM) in leng Ris­hang Keishing sunthu puang uhi.

 

Consumer Affairs, Food and Public Distri­bution leh Revenue Min­ister Karam Shyam in Chief Minister leh MP lui Rishang Keishing sunthu puang hi. Karam Shyam in a genna ah, Rishang Keishing sihna pen state a dia manna liantak hi­dan a gen in a tenna mun Mantripukri, Imphal West ah Rishang Keish­ing innkuanpihte kimuh­pih a, sunpih thu gen in khamuan hi. Huai ban ah makai ettontak leh a hinkhua state leh mip­ite a dia zang bei Mani­pur tapa sihna pen poisa mahmah ahihdan gen hi. Keishing pen state pum­pi, a bik in tuailaite han­thawntu ahihban ah mi­hoih, mihinpihte itna nei ban ah khotang kituahna ding deih gige mi hidan inleng gen hi.

 

Rishang in a zi Khatingla, tapa 3 leh tanu khat nusia a, hongtung ding Sintawpni chiang in a pianna khua Bungpa, Ukhrul District ah kivui ding hi.

 

Tuni Nilaini in Gov­ernor Najma, CM Biren Singh, CAF & PD Minis­ter Karam Shyam Singh leh Manipur Ex-MLAs Welfare Association-te’n Rishang Keishing sunna thuchah khak uhi.

 

BJP Manipur Pradesh inleng party of­fice ah veteran politician sihna toh kisai in con­dolence meeting nei ua, zahtak etsakna in minute 2 sung dai dide in sunna hun zang uhi.

 

Manipur Govern­ment in Rishang Keish­ing sihnung in, one-day state holiday leh ni 3 sung sunna hun puang hi. Zingchiang Ningani zinglam dak 10:30 in Rishang Keishing phawk gigena in MBC Centre Church, Chingmeirong ah State Government saina in program thupi­tak om ding hi.

 

Huailou in, Con­gress President Sonia Gandhi inleng Mani­pur Chief Minister lui Rishang Keishing sun­thu puang a, kum 70 sung mipi nasem a pang makai upa pen ban ah India’s first Parliament member leng ana hi Ris­hang Keishing sihthu in a lungphawng leh poisa mahmah ahihdan gen hi. Congress President in Rishang innkuanpihte, lawm-le-vualte ban ah Manipur mipite thumpih leh sunpih ahihdan gen in nna hoih a septe leh mipi a dia a kipiaknate khangthakte’n mangngil­hlou ding hi’n gen hi.

 

West Bengal Chief Minister Mamata Baner­jee leh Nagaland Chief Minister inleng Rishang Keishing sunthu puang uhi.

 

Rishang Keishi­ang ahihleh term 7 MLA telching a om in 4vei Chief Minister len hi. 1952 in Lok Sabha mem­ber masapen dia telch­ing inleng om hi. 1952 in Socialist Party a pan Lok Sabha member masa pen dia telching in om a, 1964 in Jawaharlal Nehru chi­alna sang in Congress party ana zom hi.

 

 

Miz CM in Dr BD Chakma kitawpna pompih

State mi diktak Chakma-te tung ah deidanna omlou: CM Hawla

AIZAWL, AUG 23: Government in Mizoram mi-leh-sa hihna diktak nei Chakma khua-leh-tui khatpeuh tung ah deidan­na bangmah a bawlkhum kei a, chi-leh-nam, sah­khua leh beh leh phung khatpeuh kikim a envek ahi chi’n 5vei Mizoram Chief Minister Lal Than­hawla in gen hi.

 

Aizawl a Helen Lowry College of Arts & Commerce honkh­iakna hun a CM Hawla in thuthaksaite kiang a, a gendan in, inkiangpih gamte a kipan dan toh kituaklou a hong pemlut a hihkeileh nam dang te’n Mizoram mi-leh-sa dik­tak leh state mite dinmun leh dikna(rights) kikim a zatkhawm ding uh gov­ernment in kipahpihlou ahi chi’n gen hi. NGO khatpeuh in Chakma namte tung a simmohna a neihkhak hial tak leh thupilua in ka koih kei a, Government in Mizoram mi-leh-sa diktak leh per­manent a teng khua-leh-tui tengteng a kikim in envek chi’n gen hi. Nam dangte tung a simmohna neih ding dan toh leng a kituak kei a, Mizo-te’n siamsinna lam leh nek­tak zonna lam a midangte sang a tungnun zawk ding a zilkhiak ding uh deih ka hi chi’n Lal Thanhawla in gen hi.

 

Tuabangkal ah Lal Thanhawla in Minister of State Dr. BD Chakma kitawpna leng pompih hi. Zan Sepnawnni a Chief Minister’s office a Congress Legislature Party meeting neihna hun ah CM in Dr Chakma kitawpna pompih a hih­dan puang hi. Mizoram Governor Lt. Gen. Nirb­hay Sharma khut ah leng Dr Chakma kitawpna a pompihna a hihdan thei­sak hi. Minister post nih awng mahleh ministry heikual ding ngaihtuah a leng neilou hidan in CM in gen hi

 

Thusuak dungzui in, Mizoram state quota pansan a MBSS zilna ding a National Eligibility Cum Entrance Test (NEET) a lohching Chakma stu­dent-te tung a medical seat piak ding nawlkhin­sak a om deihlouh lahna in, a paisa Seppatni in Minister of State for Seri­culture and Fisheries Dr. BD Chakma, a dinmun a kipan kitawp hi.

 

 

Thangkhanlun Taiton’ luang vui in om

LAMKA, Aug 23: Sumguk ziak a soisak lup a om Thangkhanlun Tai­tom (30) s/o T Pumhang of Sahei Road, Vengnu­am, New Lamka, luang tuni, August 23 in Sim­veng Hanmual ah vuiliam in om hi. Thangkhanlun Taitom sihna toh kisai a kiphutkhia Joint Action Committee against the Killing of Thangkhanlun (JACAKT) in Manipur government a, a thil nget uh toh kisai a govern­ment toh kihoulem in huai toh kiton in JACAKT nuai a kikhaikhawm pawl tuamtuam in zan, August 22 in Simte Inn Simveng ah JACAKT phiat uhi.

 

Huai ban ah Lamka Damdawi Inn morgue a om Thangkhanlun Tai­tom luang leng vui ding a thupukna bawl ahih toh kiton in tuni sunma dak 9 in SYO-GHQ makaih in Moruge a pan a luang lakh­ia in, huai a pan Tipaimukh Road tawn in IB road a pan Tedim Road man ua, huai a pan Tawna Road zui in Sahei Road ah lut in, inn mun tun uhi. Innmun ah SYO-GHQ in SYO Simveng Unit kiang ah luang pekhia in, Assembly of God AG saptuam makaihna nuai ah sunna hun zang ua, sun­nung in SYO Simveng Unit intekna in Simveng han­mual ah kivui hi.

 

 

‘NLBC Swatch Mission’ tung­tawn in social work nei

LAMKA, Aug 23: New Lamka Baptist Church, Elim Veng in vengsung chidam leh sian­gthou ding deihna in tuni’n mass social nei uhi. So­cial work ahihleh zingkal dak 6:30 in kipan a, huai a pan pawl tuamtuam a kikhen in vengsung a nulla leh lampi nawl a loupate khoukhia in, lampi kuakna munte ah sungdim uhi.

 

NLBC saptuam in ahihleh vengsung chi­dam, siangthou leh ten­na nuamtak suahsakna ding in August 20 nipi ni kikhop hun ah ni 10 sung daih ding in NLBC Swatchh Mission 2017 a honkhiakna uh toh kiton a, tuni a vengsung a mass social a neih uh ahi. NLBC saptuam sung a Upa Bial 8 omte’n NLBC Swatchh Mission 2017 hun sung in siangthouna toh kisai in local bial Upate’n amau bialsung chiat a etkol ding ban uah inn chih in amau compound leh lampi zul enkai ding ua, NLBC in Upa bial siangthou pen 3 kiang ah NLBC Swatch Mission Upa Bial 2017 Award pia in consolation prize leng pe ding uhi.

 

 

College Teacher-te’n Black Day zang; AMCTA in Teachers’ Day boycott di’n thupuk

Imphal, Aug 23: Zan Sepnawnni in, All India Federation of University & College Teachers’ Organisation (AIFUCTO)-te chialna bang in, All Manipur College Teachers’ As­sociation (AMCTA)-te makaihna nuai ah Ma­nipur a College teacher-te’n nationwide protest- ‘Black Day’ zang uhi.

 

Hills leh Valley dis­trict tuamtuam a AMC­TA college unit tengteng in amau campus chiat uah badge vom belh in kiphinna zom ua, meet­ing tuamtuam leng nei ua, himahleh Manipur ah ngeina a class-te bel sukbuai hilou hi. Thu­suak dungzui in, gam­sung pumpi a univer­sity leh college teacher tengteng in amau state capital chiat ua kiphi­nna a zop ziak un, zan Sepnawnni a kiphinna om khangthu a chiam­teh tham kiphinna hi­dan in taklang hi. North East India pumpi a state tengteng a university leh college teacher-te’n leng nationwide pro­test- ‘Black Day’ zom uhi. Federation of Cen­tral University Teachers’ Association leh All India Federation of Retired University and College Teachers’ Association-te’n leng nungthuap uhi.

 

Thilnget chitua­mtuamte ahihleh- 1) AIFUCTO leh teacher body dangte toh kithu­zak a hih nung a, report suahkhe ding leh 7th UGC Recommenda­tion zatkhiak ding. 2) A kilual a 100 financial assistance piak ding leh 7th Pay scales zatkhiak ding. 3). Temporary/ Adhoc/ Part time/ Guest teacher/ Block Grant teachers leh mahni a kitoudelh teacher leh semtute a ding a Pay Scales leh Service din­mun. 4) API phiat ding leh Regfresher Course/ Orientation Course a telna ding a hun bikhiah behlap ding. 5). Pension Scheme 2004 nawlkhin leh teacher tengteng ading pension bawlsak ding. 6) 6th pay scale a kituakloute phiat vek ding chihte hi uhi. 7) Education a budget cut tawpsan ding leh 6% GDP tan a khansak ding. 8) Kintak a zukkik ding­te, HEERA, HEFA leh UGC leh AICTE hatsak ding zukkik ding, Uni­versity leh College-te tung a Graded Auton­mony zukkik ding, Ph. D registration a compulso­ry NET/SLET/SET zuk­kik ding.

 

AIFUCTO in Sep­tember 5, 2017 a New Delhi a TEACHERS’ DAY hun a Mass Court Arrest nei ding a thupukna a lak toh kiton in, AMCTA in­leng TEACHERS’ DAY, 2017 boycott ding in thupuk hi. AMCTA nuai a University leh College teacher tengteng kiang ah September 5, 2017 a Teachers’ Day lopna program uaplou ding in theihsak in om uhi.

 

 

‘Mega Trade Fair 2017’ kipan

LAMKA, Aug 23: Ccpur district a dia a khatveina ding in tuni, August 23 a pan Septem­ber 10 tan daih ding in YMA Hall, Hmuia Veng, Lamka ah Kevi Society Kohima leh Team CT Lian saina in tuni nitak­lam dak 5 in ‘Mega Trade Fair 2017’ kipan hi.

 

‘Mega Trade Fair 2017’ ahihleh Vasti Head­mistress, Songtal Govt High School in Chief Guest hihna toh uap in hongkhia hi. Hiai hun ah khovel gam tuamtuam a pan van chituamtuam zuak ahih ding ban ah tal­ent show leh dance com­petition leng om ding hi. Talent show leh dance competition ahihleh a tel ding a tamluat ziak in, August 30 tan audition round in pai ding a, Au­gust 31 a pan kidemna kipan ding hi.

 

Tuni a Mega Trade fair hongkhiak ahih toh kiton in Pathianni chi­hlouh sunma dak 9 a pan nitak dak 8:30 tan kihong gige ding a, talent show leh dance competition ahihleh nitak dak 5 in kip­an zel ding hi. Mega Trade Fair a hohnuamte a ding in entry fee Rs 20 hiding a, entry fee ticket ahihleh lucky draw system in pai ding a, Mega Trade Fair bei ni in draw ding uhi. Mega Trade Fair ah India leh foreign khutsuak van chituamtuam zuakna stall 30 val om ding hi.

 

 

Galvantawite’n Jamkholun pimang

LAMKA, Aug 23: Zan nitak dak 11:30 vel in Thingkangphai a om Jamkholun @ Thanglen­mang (25) s/o Paojathang of Thingkangphai-B, gal­vantawi pasal 3 vel in a inn ua pan thagum zang a pimang (kidnapped) uh hi’n tuni’n Jamkholun’ u Satkhohao Khongsai in police a report hi’n police a pan thutut kingah hi. Hiai thu ah Police in FIR No. 70(8)2017 CCP-PS u/s 447/365/34-IPC & 25(1-C) A Act chiamteh in suizui uhi.

 

Huailou in, zan nitak dak 8 vel in Light House kong Te­dim Road ah Honda DIO MN02B/3799 (Blue & White) gukmang a om hi’n Demminthang Touthang (36) s/o (L) Ngamkholet of Bijang in Police ah report hi. Hiai thu ah Police in FIR No. 69(8)2017 CCP-PS u/s 379 IPC bulh in sui­zui uhi.

 

Tua ban ah August 21 in Ngamsei Vaiphei of Simveng in a inn huang­sung a tui-pump khat Rs. 4,500/- vel man a koih gutate’n gumang ua, hiai thu police a report bawl in Police in FIR No. 68(8)2017 CCP-PS u/s 379 IPC chiamteh uhi.

 

 

Guktak-laktakna toh kisai genkhawm

LAMKA, Aug 23: Lamka khopi sung leh a sehvel a tulai a guktak-laktakna uang mahmah toh kisai in tuni, Au­gust 23, 2017 sunnung in DC Bungalow, IB Road ah hiai tungtang genkhawmna om hi. Hiai hun ah kho hausa leh Village Authority member-te tel in, Dis­trict Administration lam a pan Shyam Lal Poo­nia, DC/Ccpur, Rakesh Balwal, IPS, SP/Ccpur, Thienlaljoy Gangte, AC to DC, Ccpur leh Thang­boi Gangte, SDO/Ccpur kihel ua, khopi sung leh a sehvel a khamtheih hih zongsan ban ah guktak­na hong uang mahmah toh kisai tungtang genkhawm uhi. Hiai hun ah District sung a guk­takna toh kisai a matkh­iak a omte District Jail a koih ding thu leh guk­takna toh kisai peuhmah police a report bawl ding chihte genkhawm mahle uh thupukna kichian la theilou uhi. District Administration lam in khua leh veng teng in a zuih ding guideline a bawlkhiak ding in thu­kim uhi.

 

 

Nagaland CM in Naga Hoho makaite kimuhpih

A baihtheipen a Naga solution a om poimoh ahi:TR Zeliang

DIMAPUR, AUG 23: Tuni Nilaini a Kohima a Naga Hoho makaite toh houlimna a Naga­land Chief Minister TR Zeliang in a gendan in, Naga tengteng a mau gam leitang a kituaktak a, a khosak theihna ding un, a baihtheipen a Naga so­lution a om poimoh ahi chi’n gen hi.

 

Sukveng theihlouh ding buaina bangmah a om kei a, a kisaikhakpih tengteng aw lak vek a hihtheihna ding in, mip­ite a kipan ngaihdan leh suggestion-te i nget teitei ding uh ahi chi’n Chief Minister TR Zeliang in President Chuba Ozukum makaih Naga Hoho del­egation member 7te toh houlimkhawmna hun ah gen hi.

 

Nagaland Chief Minister thak ding a mohpuakna la leh Naga Civil Society tengteng khazak khat nuai a gawnkhawm vek ding a panla TR Zeliang kipah­pihna ding in, tuni Nilaini in Nagaland Civil Secre­tariat a CM official Cham­ber ah CM kimuhpih uhi. Nagate buaina sukvengna ding a final solution tang­tun a hihma ngei a Naga helpawl tengteng telsak vek hiding a gen kawm a, TR Zeliang in a gendan in, Naga peace process i chih maban a 2018 Elec­tion om ding , political hamphatna ding lel a lak­louh teitei ding, a thu leh kha a chihtakna pansan a neih teitei ding poimoh ahi chi’n gen hi.

 

 

 

 

PHED in Khominthang a ding tuilawng phum

LAMKA, Aug 23: Public Health Engineer­ing Department (PHED), Ccpur Division panlakna a Khopi sung tuidawn ding kiningching piakna ding nasepna paitou zel in tuni, August 23, 2017 in PT Sports Complex, Kho­minthang ah Water Res­ervoir a tui zawllutna ding tuilawng phum in om hi. Hiai nasepna Thangkhan­lian, AE, PHED Ccpur Division in enkai a, JCB khat zang in Department in tuilawng phum ua, PT Sports Complex a Water Reservoir tan tui zawllut ahih hun ah Khominthang Area in tuihek-tui kiching ngah theita ding uhi.

 

Nasepna ahihleh North Eastern Council (NEC) tungtawn a Spe­cial Development Fund nuai a Improvement of Distribution of Water Supply nuaia Ccpur Dis­trict a dia hong pai fund zang a khopi sung tuinek lakna Zone–III, Khuga Dam a pan kizawlkhia hi a, Khuga Dam a tui khit­siangna Filter Unit a pan Tedim Road zultawn a pan zawllutsuk hiding hi’n thutut kingah hi.

 

 

ZPYF in Khanglaini Volleyball Tournament zousiang

LAMKA, Aug 23: Zou Presbyterian Church Synod (ZPCS) nuai a Zou Presbyterian Youth Fel­lowship (ZPYF) in La­kutpi zatna ding toh kisai a ZPCS Compound, Zomi Colony ah ‘Khanglaini Volleyball Tournament’ a sai uh tuni’n closing cer­emony nei uhi. Sunnung dak 1 in hun zatna kipan a, hiai hun ah chief host, guest of honour, func­tional president leh chief guest in H Kapneithang, Chairman, DJCC; S Lamthang, Lailam Veng; P Thangsuanhau, District Project Officer Caritas Indi/DSSS Imphal leh Upa Kamlianthang of T Munnuam pang uhi.

 

Hiai hun zatna H Lalkhawm in makaih a, Rev Kaimuanlal, Leader ZPYF in vaidawnna thu gen in, Upa Chinkhen­pau, Chairman Lakutpi Committee in hunkhak in Khanglaini Volleyball Tournament Final Match kimawlna kipan hi.

 

Khanglaini Volley­ball Tournament ahihleh August 21 a kipan hi a, hiai hunsung in Zou Pres­byterian Church Synod (ZPCS) nuai a unit tua­mtuam a pan pasal Team 18 leh numei team 11 tel ua, final match ah pasal team ah PYF Lailam Veng A leh PYF Lailam Veng B kimawl ua, numei team ah PYF Central leh PYF S. Vengnuam kimawl uhi. ZPYF Lakutpi Commit­tee in ahihleh kum nawn January kha a Lakutpi zatna ding toh kisai a fund raise-na ding a Khanglaini Volleyball Tournament a sai uh hi a, hiai toh kisai mah in mun tuamtuam ah Lakutpi First Audition round nei ua hiai hun ah mi 50 val kihel uhi. Hong­tung ding September 16 in Jubilee Hall, ZPCS Com­pound, Zomi Colony ah mi 27 in Lakutpi Second Au­dition round neinawn ding ua, huai hun a telkhiak a om mi 10 in Gospel music album bawl ding uhi.

 

 

YPA Dorcas Veng in theihsakna bawl

LAMKA, Aug 23: Young Paite Assn (YPA) Dorcas Veng Unit in khamtheih zuak leh guktakna toh kisai in mipi theih ding in thu­suah bawl uhi. Thusuak dungzui in, YPA Dorcas Veng Unit in khosung chidamna ding leh gu­ta-lata a pan bitna ding awlmohna a panlatou zel in, August 22, 2017 a Executive Meeting thu­pukna dungzui in Dor­cas Veng sung a khotang tokbuaithei leh nautang lungphawngsak thei dia kuamah gamtat phal­louh ahihdan taklang hi.

 

Huai ban ah zu, khamtheih zuak leh guktak-laktak phal hilou leh khosung a nitak duty leng om ding ahihna ah, vengsung mi leh pawlam mi kuamah nitak sawt­nung a hih ding poimoh lua neiloute mawk vial­vaklou di’n theisak uhi. August 19, 2017 zankal a guta pawlkhat in Eb­enezer Academy a luh uh naktak a mohpaih in, a kisaipih thuneitute’n hiai bang a gamtangte a kintheilam a mankhiha a, a kituahpih bang ac­tion la dia ngetna bawl in hiai theihsakna ne­ingaihlou a, matkhiak a omleh a tung a ac­tion lak a om bangbang khase theilou ding leh kuama’n mimal, pawl leh nam vai a latheilou ding uh ahihdan taklang uhi.

 

 

IMI toh kisai in ASHA Facilitator-te’n Orientation nei

LAMKA, Aug 23: August 21-29 sung a Intensified Mission In­dradhanush (IMI) sep­suahna ding toh kisai a National Health Mission nuai a ASHA Facilitator-te’n PHC Area tuamtuam ah Orientation a neih uh tuni’n Saikot PHC Area ate’n neinawn uhi. Tuni sunma dak 10:30 in Samulamlan NHM Block nuai a Saikot PHC area sung a AHSA facil­itator-te’n Synod Hall, IB Road ah orientation programme nei ua, hiai ah resource person Dr. VC Pau Tonsing, DFWO/ DTFI leh Dr Vanlalkun­gi, Saikot PHC M/O incharge in Intensified Mission Indradhanush (IMI) sepsuahna a AHSA worker-te’n amau area sung a House to House Survey a neih hun ua, Survey Form ah report gelh ding dan sinsak uhi.

 

Hiai hun ah Dr. Kim Simte, CMO, CCpur in damtheihna a diak a nau­pang leh numei naupaai laite chihdamna ding toh kisai ASHA worker-te’n mohpuakna liantak nei ahihlam kimangngilhlou a, nasepsuah dia kipia bangbang kuhkal leh gin-omtak a semsuah chiat ding in ngen hi.

 

Intensified Mis­sion Indradhanush (IMI) sepsuahna ding in AHSA worker-te’n amau area sung a naupang leh nupi naupaai omzah kimtak a record in, immuniza­tion course zoulou a taw­psan leh immunization pan nailoute hoihtak a chiamteh in September khasung ngei in DFWO kiang report pelut ding uhi. Immunization ahi­hleh October, November, December leh January kha sung a neih hiding hi. Zingchiang August 24 in Sagang PHC Area sung a ASHA Facilitator-te’n Sagang PHC ah nei ding ua, August 26 in Henglep PHC Area in Bijang Com­munity hall ah nei ding uhi.

 

 

Lalpuithluaii Foundation School in ‘L’amour in August zang

LAMKA, Aug 23: Lalpuithluaii Foundation School, Bungmual in tuni, August 23, 2017 in a school uah “L’amour in Au­gust” kichi zang uhi. Hiai hun Atul Bagai, IAS, Senior Regional Coor­dinator, Compliance Assistance Program, UNEP leh Foundation First Patron leh a zi, Dipa Singh Bagai, IAS ban ah Ashok in guests of honor hihna toh uap in, Science Model, Art Wall, LFS Down the Ages leh “On Waste Management” chih toh kisai exhibition nei uhi.

 

Class IV student-te makaih in School Prayer genna om a, Class V student leh teacher-te’n School Song sakna makaih in, Cultural Dance, Boys Band leh Chicken Dance lahna om hi. Nursery Sec­tion a pan Group Song, ABC’s Song, Eyes Eyes Eyes, Johnny-Johnny leh I’m A Little Tea-Pot lahna om a, Class A student-te a pan Action Song, I Put My Right Hang, Why Not Me chih leh Class I student-te a pan Let it Go, Mickey Mouse dance ban ah Class II student-te a pan Manipur Action song leh Cho­reography lahna om hi.

 

Class III student-te Macarena la in laam ua, Class IV student-te “Mein Hoon” chih la a laam in, Class V student-te’n “Anouba Jug­ki” chih la in laam lak uhi. Class X a pan Niangthiankim in Masterpiece chih la sa in, Khual Zahtakhuaite a pan thugenna om a, Class V stu­dent-te’n National Anthem sakna makaih in hun zangzou uhi.

 

Exhibition ah Class IV stu­dent-te’n “Save Lanva River for Everyone of Us” chih pansan in gamlim bawl ua, Hologram, Bal­loon Barometer, Anenometer, Wind Vane, Automatic Switch Wa­ter Pump, Vacuum Cleaner leh Hy­drometer chihte Model a bawl in lakkhia ua, Class V student-te’n a bawl uh Water Purification Plan in Lamka Town, Solar System, Model Drone, Model of Generator leh Model car control chihte lahkhiak in om hi.

 

 

 

 

 

NEWS TOMKIM

 

Samaritan Hospital in Free Medical Camp nei ding

LAMKA, Aug 23: Bjiang, Electric Veng, Lamka a om Samaritan Hospital in DSSS / CBIRDAT / DAPCU leh Bijang Welfare Assn (BWWA) toh pangkhawm in hongtung ding August 26, 2017 sunma dak 10:30 a kipan sunnung dak 2:30 kikal in Samaritan Hospital, Bijang ah ‘Free Medical Camp’ nei ding uhi. Hiai hun ah damlouhna chituamtuam neite a thawn in ki-etsak theih ding hi.

 

 

Red Cross Road black-top kipan

LAMKA, Aug 23: Lamka khopi sung a lampi bawlna sutzop a om in tuni, August 23, 2017 in Red Cross Road black-topping kipan hi. Red Cross Road ahihleh hun bangtanhiam paisa a pan kibawl himahleh vuah zuk ziak a nasepna khawl hi a, tuni a nasepna pat ahih toh kiton in lampi kuaknate (pot hole) bawlhoih in alkatara (bitumen) sung uhi.

 

 

Omna theihlouh a om Chinzasiam, Punjab ah om

LAMKA, Aug 23: Chennai a restaurant a sem Chinzasiam (31) s/o (L) Daikhohau of Bethel Veng, New Lamka, a lawmte toh kisukbuai ziak in Lamka zuan in hong pai a, July 20, 2017 a Guwahati hongtung a, bus a Lamka zuan a hong pai hidan a gen himahleh hongtunglou hi. Guwahati hongtunnung a thuzak theihlouh a om ziak in a sungkuante patau in Guwahati a om eimite’n ana buaipih ban uah Police ah leng report bawl in om hi. Zon theihna teng zon ahi­hnung a leng muh ahi­hlouh ziak in mang hidia gintak in om a, himahleh thuzak theihlouh a om­nung ni 27 nung August 18 in a u Nianglunching mobile phone tungtawn in damtak a om ahihdan a suangkuante theihsak in om uhi.

 

Thutut kingah dan in, July 20 a Guwahati a pan Lamka a pai dia Chinzasian a kisaklai in meltheihlouh pawlkhat in pikhia in naktak in vua ua, a mobile phone laksak uhi. Huainung in vaite khat in tuakkha in a hihna hoihtak a dong in Pubjab ah tonpih a, a li­amnate leng kemdam in, tu’n hoihlam a nawttak ziak in ak farm khat en­kolsak hi. Mobile phone a neihlouh ziak in a ma­hajon-pa phone in u hou­pih a, a u in a innkuante hon hilhsawn hi’n thutut kingah hi.

 

 

SUNNA:

Chingkhovung (82) w/o (L) V. Zenkhopau of Vengnuam, New Lamka, tuni, August 23 in damlouhna ziak in si a, tuni mah in New Lamka YPA hanmual ah kivui hi. RIP.

Nuamneiniang (27) w/o Suanminlun of Sugnu, tuni, August 23 sunnunglam in damlouhna ziak in si a, zingchiang in kivui dinng hi. RIP.

 

 

 

 

…for more detail : here

 

 

 

 

 

RELATED

The Lamka Post | August 22, 2017

The Lamka Posst | August 23, 2017