You are here: HomeRSS FeedsThe Lamka Post

The Lamka Post | August 15, 2018

Wednesday, 15 August 2018 09:11

Global security agency in nu-le-pate kiang ah ngen:

‘Blue Whale Sucide Challenge’ zoh in ‘Momo WhatsApp Suicide Challenge’ in Northeast tuailaite target

Agartala Aug 14: ‘Blue Whale Suicide Challenge’ in khovel pumpi a den suak khit nung in tu in kimawlna lauhhuai mahmah khat hidan a kigen WhatsApp ah tuailaite lak ah mahni leh mahni kithat ding a chialtu khat om nawn hidan in thusuak in taklang hi.

 

Hiai toh kisai a kigen ahihleh ‘Momo Suicide Challenge’ hi a, number theihlouh apan lim melse tak, mittang lian mahmah kikhak chih toh kisai a thubuai ahi hi. Tunaizek, August 12, 2018 inleng Tripura state sung a om Teliamura khopi sung ah tangval nou khat number theihlouh khat in WhatApp message pansan in numei melsetak leh lauhuai mahmah lim khat khak a, huai lim ahihleh ‘Link factory’ apan ‘Mother Bird’ dan a kibawl ahi chi a theihsak ahih ban ah challenge bawl in kimawl di’n sawl hi.

 

Huai ban ah number theihlou pen in call ding ahihdan ngen in call a, himahleh tangvalnou Brikeswar in a call pen pick up lou in a number block a, media-te mai ah a thil tuah genkhia hi.

 

Tuabangkal ah Argentina a numei naupang kum 12 vel a upa khat leng hiai bang kimawlna “Momo Suicide Challenge” ah ana kihel khak ziakin sihna ana tuak khata ahihdan taklat in om hi. Numei nu ahihleh number theihlouh Momo kichi khat in message khak a, huai pansan a, Momo challenge pen a kihel in a sihma in a phone ah video recording bawl in Momo ziak a si ahihdan taklang hi.

 

Momo Challenge ahihleh tulai in Japan, Colombia leh Mexico a kithang mahmah in kum 13 apan kum 19 kikal mite tuppen a nei in, Momo account leh number tanpha Facebook leh Youtube ah khahkhiak a om hi’n leng taklat in om hi.

 

“Momo Suicide Challenge” ahihleh the ‘Blue Whale challenge’ toh kibang sim in Momo in WhatApp pansan in kimawlna a kihel di’n mite chial sek a, himahleh mi a utlouh chiang in lim kilawmloutaktak leh hoihlou taktak khak a subuaisek ahihdan gen in om hi. Momo in ahihleh kimawl a kihel ding a mi a chial zoh chiang in omdan mak taktak a om di’n ngen a, hun sawtlou nung in amau leh amau kithat ding a sawl hi’n leng kigen hi.

 

‘Blue Whale Challenge’, in ahihleh participant-te kiang ah ni 50 sung nasep ding tuamtuam guan a, ni 50 a chin chiang in amau leh amau kithat ding a sawl in India gamsung ah leng mi tamtak in ana sihloh khinta uhi.

 

Momo Challenge a numei lim melsetak kikhak pen ahihleh Reddit a kipan hi a, “Mother Bird” chih in leng om hi. Hiai bang lim ahihleh Midori Hayashi in a bawl hi a, Tokyo Vanilla Gallery, Japan a takkhiak a, a na om pan himahleh hiai lim butute toh number theihlouh limkhaktu kal a kizomna om lou hi’n thusuak in taklang hi.

 

Hiai toh kisai in global security agency in nu-le-pate kiang ah a tate uh hiai apan a suahtak theihna ding ua thuhilh ding leh lim hoihlou leh melsetak a kikhak a leh ngaihsaklou ding a thu hilh di’n ngen uhi.

 

 

I-Day zatna a telchiat di’n theisak

LAMKA, Aug 14: Shyam Lal Poonia, DC/Ccpur in tuni, August 14a theihsakna a bawlna ah,31.07.2018 a DLO Meetingthupukna dungzui inzingchiang, August 15 inDistrict Level 72nd IndependenceDay lopnaPeace Ground, Tuibonga om ding hi’n taklanghi. Huai toh kiton in DLOteng in amau nuai a employeeteng hiai hun aha telkim chiatna uh hiamchih enchian a, attendancela ding leh huai penSangremsiama, BO-II,DC’s Office a pelut chiatding in theisak hi.

 

 

72nd Manipur Independence Day tuni’n lop in om

IMPHAL,AUG 14: Sanakonung, Imphal ah tuni Sepnawnni in 72nd Manipur’s Independence Day lop in om hi. Hiai hun ah Manipur Titular King Leishemba Sanajaoba in Manipur a ding in pre-merger political status ngen hi.

 

Coalition for Indigenes Rights Campaign (CIRCA)-te saina toh thupi ‘Why premerger status for Manipur’ leh motto “Celebrate The Spirit Of Freedom” pansan in 72nd Manipur Independence Day lop in om hi. Mipi aikhawmte kiang a, Titular King Leishemba Sanajaoba in a thugenna ah, tua Manipur chi a theih a om Kangleipak kichi khatvei lai in sovereign state (mahni kivaipuak) ana hingei a, himahleh independence zoh a Indian Union a gawmkhawm ahihnung in, mipite zalenna leh kivaipuaknate nuaisiah in om chi’n gen hi.

 

Manipur state buaisak, a beitheilou socio-political thubuai toh kisai Indian Union toh Manipur gawmkhawmna gah ahi chi’n Tilular King in gen hi. Tilular King in a gendan in, India mite’n zalenna a ngah ma ni uh August 14, 1947 a Manipur in independence ngah hidan in gen hi. Hon vaihawmkhum British-India government in mahni a kivaipuak theihna dikna toh “excluded state” khat dan in Manipur nusia a, India zop ding ahihkeileh sovereign state a om det ding deihtelna leitang neitu mipite khut ah nga uh chi’n gen hi.

 

Leishemba in a genzelna ah, makai khenkhatte duhgawl ziakin, kum 1947 in Indian Union ah Manipur gawmkhawm in om a, tua toh kiton in, kum 1952 a kipan in separatist movement sual in omtou den chi’n gen hi. Manipur Independence Day lopna toh kisai anti-national hilou ahihkeileh gam khat kalhna ahi kei a, Manipur mipite leh leitang tung a Indian government in giloutak a etkolna a bawlkhum deihlouhna hidan in gen hi. British-te’n independent Manipur kiang a, a piaksa uh self-respect leh thupina ngahna ding hizaw chi’n gen hi. Titular King in Manipur government kiang ah Instrument of Accession-1947 enkik thak ding leh Manipur a dia special status pekhe ding in ngen hi.

 

Program zatna hun a paikhawmte’n Manipur mipite deihdan kepbitna dia Manipu kiang a special constitutional status piakna ding a constitution of India bawllem ding in ngen uhi.

 

Titular King in Manipur khotang a buaina tuntu, thubuai nei Manipur University Vice Chancellor AP Pandey mankhe ding leh MU buaina vengsak ding in ngen hi.

 

 

BJP in state mipite kia hilou in MLA-te leng khem: Congress

IMPHAL, AUG 14: BJP in mipite kia hilou inMLA-te leng khem hidana ngoh in, tuni Sepnawnniin Manipur Pradesh CongressCommittee (MPCC)in ruling BJP governmentnaktak in soisel hi.

 

Congress Bhavan a press conference neihna hun a MPCC thupuangtu MLA Khumukcham Joykishan in a gendan in, Frame Work Agreement thubuai toh kisai genkhawm ding leh state leitang kipumkhatna humbitna dia MLA-te’n kituaktak a thupukna a bawlna ding un, August 16 in special session khat sam khin mahleh tutan in state assembly sapna notification muh ding omlou chi’n gen hi.

 

Tuni August 14 hita a, zingchiang Independence day hita a, tutan in government lam a kipan state Assembly special session sapna notification muh ding omlou chi’n Joykishan in gen hi. Hichibang lungput in, ruling BJP mkaih government in state mipite kia hilou in telching a om mipi palaite leng khem hi’n ngoh hi.

 

 

Guv in Imphal-Khongjom Tourist Project hongkhia; Manipur kichi ‘Pathian omna paradise’ bang ahi: Guv

IMPHAL, AUG 14: Manipur Governor Najma Heptulla in tuni Sepnawnni in state khangthu a mun poimoh Kangla ah Government of India’s Swadesh Darshan Scheme nuai a project masapen ‘Development of North East Circuit: Imphal and Khongjom’ hongkhia hi. Hiai hun ah Chief Minister N. Biren Singh leh Union Minister of State for Tourism (Independent Charge) K.J. Alphons-te leng tel uhi.

 

Mun poimoh nih; Kangla Fort, Imphal leh Khongjom, huap project ahihleh Union Ministry of Tourism nuai ah Rs. 72,22,82,607 veng seng in sepkhiak in om hi. Hiai hun a, Governor Najma Heptulla in a thugenna ah, gamsung a iconic city list a Imphal leng telsak ding a Prime Minister Shri Narendra Modi kiang ah ngetna pia ahihdan gen hi. Tuni a program zatna hun a leng tel Union Minister of State for Tourism (Independent Charge) K.J. Alphons kiang a leng, hiai thu a Prime Minister thuzoh ding a ngen ahihdan gen hi. Program zat sung in, Heptulla in Union Minister kiang ah Prime Minister kiang a ngetna laithon a khak copy khat leng pen gal hi. Historical leh cultural poimoh hau mahmah leh sporting talent tamtak nei gamsung ah hichibang khopi dang om theilou ding chi’n Heptulla in gen hi.

 

Kalapani Cellular Jail record a Maharaja Kullachandra min maihkhak a, a omna thu toh kisai awlmoh kawm in, Heptulla in Central Government a, a kisaipih thuneite kiang ah hiai thu enkai ding inleng ngen hi. Khovel Kidoupi II hun in, kidouna khauhtak leh poimohtak nih sual in om a, a khatpen ahihleh Western Front (France) hi a, huai ah Hitler zoh in om a, a dang khatpen ahihleh Eastern Front (Imphal/Kohima) ahi chi’n gen hi.

 

Kum teng a Western Front a war memorial en ding a tourist a sang a simte’n France veh zel ding uh ahihdan gen kawm a Governor in a gendan in, government in tourist munpi khat dan a Imphal khopi dopsang hileh France veh a zin tourist phazah toh kibang Imphal a leng hong zin ding uh ahi chi’n gen hi. Huai kia leng hilou in, Indian National Army (INA) makai Netaji Subhash Chandra Bose in World War-II hun in Moirang a India leitang ah a masapen ding in INA flag kaipalh ahi chi hi.

 

Manipur in tawndan lam a gou hauhsakna leh etlawmna chiteng toh vualzawlna nei hidan a gen kawm in, Heptulla in Manipur kichi ‘Pathian omna paradise’ bang ahi chi’n gen hial hi. Heptulla in Central Government kiang ah, tourism sector tungtawn a khantouhna tut ahihtheihna dia state kiang a hun lemtang peding in ngen hi. Heptulla in a genzelna ah, sakhi lamsiam ‘Sangai’ kichi North East region a freshwater lake lianpen Loktak Lake tung a kilaam Keibul Lamjao National Park kia ah muhtheih in om chi’n gen hi. Hiaite ban ah, Manipur kichi modern polo pianna mun leh UNESCO’s Intangible Cultural Heritage of Humanity a Nat Sankirtana telsak a om ahihdan gen a, huai kia leng hilou in, numei vanzuak 4000 vel nei Ima Market kichi khovel a numeite market lianpen ahi chi’n gen hi.

 

Kikawmtuahna lam toh kisai a Heptulla in a gendan in, airline company tamtak in Imphal leh New Delhi kal ah direct flight pankhin uh chi’n gen hi.

 

Chief Minister N. Biren Singh inleng state mipite kiang ah tourism sector khanna ding a bouruak thovengtak bawlkhe ding in ngen hi. State sum dinmun khansakna ding a tourism kichi sector poimoh khat ahihdan phawkhiak poimoh a, tourism khantouhna in sepna tamsem bawlkhe ding a, mipite a ding a nekzonna hoihzaw bawlkhe ding ahihdan gen hi.

 

Kum 2015 a patkhiak North East Circuit: Imphal and Khongjom project zohsiang leh honkhiak a om, state a dia melsuang chiamtehna dang khat ahi chi’n CM Biren in gen hi. Panlakna liantak khenkhat light leh sound show chihte Imphal khopi a unique selling point or unique selling proposition (USP) hi ding uh chi’n gen hi. North East region pumpi a hichibang thil a masapen ahi chi’n gen hi.

 

Chief Minister in a genzelna ah, project zohsiangna in visitor tamsem hiplup ding a, old kingdom of Manipur khang tangthu toh kisai zilbeh ding lunggulh khualzinmite taksap poimohte pekhe ding chi’n gen hi.

 

State government in Swadesh Darshan 2018-19 nuai a project hithei dingte toh kisai in proposal thak leng pelut khin chi’n gen hi. Huaite lak ah Loktak Lake a Eco leh Ethnic Park a infrastructure khantouhna ding, Mapithel a adventure sports leh eco-tourism leh Sadu Chiru-Kangmong-Kanto a eco-tourism facility chihte tel uhi. Hiai toh kisai a Central government in state kiang a kithuahpihna a piak ngei leng CM in a lamet thu gen hi. Tourist tamsem hip thei ding Bishnupur district in tourist infrastructure tamsem bawlkhiakna ding a hihtheihna nei ahi chi’n gen hi.

 

K.J. Alphons in a thugenna ah, hun sawttak North East nelhsiah in ana om a, himahleh tu’n North East State-te a bik in Manipur in Centre leh State a government thak toh khantouhna mitsuan lel chi’n gen hi. Project hoihte a dia fund pekhe ding in Centre mansa in om chi’n gen hi. Hiai hun in KJ Alphons in tourism project honna toh kisai a Prime Minister Narendra Modi a kipan thuchah simkhia hi.

 

 

Nursing enrolment bawl hun ding bikhiah

LAMKA, Aug 14: National Health Policy kichi patkhiak ahih toh kiton in nurse sinzou, sepna nei leh neilou teng in M/s FINO PayTech Private Limited tungtawn a enrolment bawlthak ding chih ahih toh kiton in Ccpur leh Pherzawl District a ding in August 16-18, 2018 kikal sung in Administrative Block, District Hospital ah sunma dak 10 a pan registration bawltheih ding hi. Huai ding in Medical Superintendent in Nursing Officer, enrolment bawl dingte bikhiah bawl in August 16, 2018 in District Hospital a sem Nursing Officer-te’n bawl ding ua, August 17, 2018 in CMO nuai leh private a sem Nursing Officer-te’n bawl in, August 18, 2018 in Nurse sinzou himahleh sepna neiloute’n bawlthei ding uhi.

 

 

DC/Ccpur lim (effigy) hal

LAMKA, Aug 14: Thadou-Kuki Students’Union (TKSU) GHQ inShyam Lal Poonia, IAS,DC/Ccpur tung a lungkimlouhlatsakna lehCcpur district a pan suankhiakding phutna intuni, August 14 in mipi’nTuibong ah DC office lutnalampi ah sit-in-protestnei in DC’ lim (effigy) haluhi.

 

TKSU-GHQ in ahihleh August 8-9, 2018 a Kuki Inpi Manipur (KIM) in dakkal 24 sung total shutdown a puan hun ua DC/Ccpur in Swachh Bharat Mission sepsuahna a district sung a Govt Dept teng Cleanliness Drive a neih lungkimlouhna a boycott a puankhum uh ahi.

 

KIM in ahihleh 1992 leh 1997 kikal sung a NSCN-IM in Kuki mi, nautang 900 val a thah ban ah khua 360 val haltum a om a, Kuki mi lakh 1 val belh ding neilou a galtai a omte tung a state leh centre government in kum 25 tan a leng thudik a vaihawmna a bawllouh ban ah Nagate toh Final Peace Accord bawl dia a kisak uh lungkimlouh latsakna a Total Shut-down a puan uh ahi.

 

Lunkhohao Haokip @ Haoneu, President, TKSU-GHQ in a genna ah, DC/Ccpur boycott bawl a om in Independence Day zatna huamtellou ahihdan gen in, kiphinna pen DC Shyam Lal Poonia deihlouh ziak a neih a om ahihdan gen in kuapeuh in Independence Day zatna hoihtak a uap ding in ngen a, himahleh Independence Day zatna hun a Shyam Lal Poonia melmuh ahihleh, Kukite’n pawtsan ding uh hi’n gen hi. Huai ban ah Ccpur district a pan Shyam Lal Poonia suankhiak ahihma kiphinna sunzom ding uh ahihdan leng gen hi.

 

 

Peace Ground ah I-Day zatna om ding

LAMKA, Aug 14: District Administration, Ccpur makaih in zingchiang, August 15 in Peace Ground, Tuibong ah District Level 72nd Independence Day zatna om ding a, huai ding toh kisai in kisakkholhna bangkim mansiangta hi.

 

Independence Day zatna ding mun Peace Ground ah sunma dak 9 in invitee leh parade contingent-te tung masa ding ua, sunma dak 9:15 in Kabib K, IPS, SP/Ccpur tung ding hi. Huai zoh dak sunma 9:30 in chief guest, Shyam Lal Poonia, IAS, DC/Ccpur tung in parade contingent-te inspection bawl ding a, tua zoh in sunma 9:40 in National Flag kaipalh in march past in zom ding hi.

 

Sunma dak 11:10 in Chief Guest in thugen in prize tuamtuam pekhe ding a, dak 11:40 in stall kibawlte inspection bawl ding hi. Sunma dak 11:50 in cultural item lahna om ding a, sunnung dak 12:20 in exhibiton football match om ding a, huai ah District Administration XI vs Civil Society XI team kimawl ding uhi.

 

Huai ban ah nitaklam dak 5 in DC/Ccpur official bungalow ah DLO leh Official-te’n Independence Day dinner nei ding uhi.

 

 

SKL-2018 Sub-Committee bawlkhia

LAMKA, Aug 14: Songtal khosuakte leh Songtal it leh ngainate a ding in hongtung ding December 17 a pan December 22, 2018 sung in Songtal khua ah ‘Songtal Khawmpi Lian - 2018” chih minvuah in Khawmpi Mega Conference om ding hi. Khawmpi hunsung in kimawlna, cultural event ban ah Songtal maitam dohna leng om ding hi.

 

Huai ding toh kisai in July kha in Songtal khua ah Songtal khawmpi lian committee dinkhiak in om a, khawmpi committee nuai ah Lamka pansan a poimoh bang a vaisai ding in August 12, 2018 in Songtal Hausa, G. Thiankholian’ tenna inn, Zogam Road, New Lamka ah SKL-2018 Sub-Committee dinkhiak in om a, huai ni mah in Sub-Committee a office bearer kitelna nei uhi.

 

Sub-Committee office bearer-te ahihleh Chief Adviser: G. Thiankholian; Chairman: G. Nangchinkhup; Vice Chairman: M. Kamzalian; Secretary: Muanthang Ngaihte; Asst. Secy: Joel Tonsing; Finance Secy: M. Moithansang; Treasurer: Thangthianmuan hi ua, member ding in mi 9 leh adviser ding in mi 30 guang uhi.

 

 

Manipur police personnel 15 in medal sang ding

IMPHAL AUG 14: 72nd Indian Independence Day programmezat ahih hun chiang in Manipurapan Police personnel 15 in PoliceMedals for Meritorious Service 2017 lehPresidents’ Police Medals for DistinguishedService medal sang ding uhi.Manipur police department in ataklatdan in hiai bang kipahmante ahihlehSuperintendent of Police (NAB) WBasu Singh in piakkhiakna nei ding ahichi’n gen uhi.

 

Hiai toh kisai Presidents’ Police Medals for Distinguished Service sang dingte ahihleh Inspector Rk Tejbir leh inspector Shyamchoron Singh Asemte hi ua, Police Medal for Meritorious Service 2017 a di’n Deputy Inspector General IK Muivah of Manipur police department, Deputy Commandant Th Bijananda Singh, Assistant Commandant A Basanta Sharma, Inspector Pamreingam Longpinao, Inspector Chabungbam Subol Singh, Inspector Nongthombam Ingocha Singh, Head Constable Y Roshankumar Singh, Havildar Md Rashid AH, Havildar S Sanatomba Singh, Havildar Md Anuwar Shah, Rifleman T Abhiram Singh, Rifleman Md Kayamuddin leh Rifleman L Miralkumar Singh-te hiding uhi.

 

Huai ban ah excellence in police training 2015-16 chih pansan in additional SP Laishram Priyadarshini leh Subedar Md Riyajuddin-te’n leng medal sang ding uhi.

 

 

National Deworming Day toh kisai in workshop nei

LAMKA, Aug 14: District Health Society, Ccpur saina in tuni, Au- gust 14 sunma dak 11 a pan in Synod Hall, IB Road ah ‘One Day Orientation Workshop on National Deworming Day 2018’ zat in om hi.

 

Hiai hun ah Ccpur District sung a ZEO leh ADC nuai a government school, private leh mission school ban ah Aganwadi Worker-te leh officer-te leh school representative-te tel ua, Shyam Lal Poonia, IAS, DC/Ccpur & Chairman, District Health Society, Ccpur in special guest hihna toh uap hi.

 

Hiai hun ah Dr Kim Simte, CMO/Ccpur & District Mission Director in vaidawnna thugen a, Special Guest in One Day Orientation Workshop on National Deworming Day 2018 hongkhia hi. Workshop hun ah Dr Tongjakai, Pediatrician in Technical and Operational Strategies toh kisai sinsak a, Seiboi Mate, DDM in Compling, Reporting leh Monitoring System toh kisai sinsak in, hun tawp ah Vung Mary, DCM in kipahthu gen in hun zangzou uhi.

 

Programme zoh in ZEO leh ADC nuai a government school, private leh mission school ban ah Aganwadi Worker-te’n CMO Campus a Medical Store Room a pan naupang nek ding hutlou (Albendazole) tablets la uhi. Hutlou Albendazole ahihleh naupang kum 1 a pan kum 19 kikalte nek ding hi a, ZEO leh ADC nuai a government school, private leh mission school-te’n amau school chiat ah naupang-te nesak ding ua, school kailou naupangte ahihleh ICDS Project tungtawn in Aganwadi Centre-te ah neksak hiding uhi.

 

Hiai hun a DC/Ccpur in a genna ah, damtheihna toh kisai a naupangte maban ding khualna a tuni a workshop neih a om kuapeuh in ngai poimoh a, damdawi piakdan toh kisai a buaina neite’n workshop hunsung a dotna bawl a genkhawm ding in ngen hi. Huai ban ah naupang-te gam a dia gou ahihna ah damtheihna, pilna siamna toh kisai a hoihtak a etkai ahihkeileh gam in manthatna leh siatna tuahlohthei ahihdan theih poimoh hi’n gen hi. Deworming lohchingtak a district sung a neih zoh ahihtheihna dia kuapeuh in ngai poimoh a, mohpuakna kipia bangbang semsuah chiat ding in ngen hi.

 

 

Touthang Ngamlien in President’s Tatrakshak Medal (Gallantry) sang

NEW DELHI, AUG 14: Independence Day 2018 hun toh kiton in, President of India in nasem hoih tungtuan Indian Coast Guard personnel-te kiang ah President’s Tatrakshak Medal (PTM) (Distinguished Service) 1, Tatrakshak Medal (TM) (Gallantry) 5 leh Tatrakshak Medal (TM) (Meritorious Service) 2 pekhia hi.

 

Tatrakshak Medal (Gallantry) sangte ahihleh- 

(i) DIG Venurajan Anbarasan (0321-D)

(ii) Comdt(JG) Touthang Ngamlien (0693-X)

(iii) Dy Comdt Alexander Pradeep(0961-J)

(iv) Amit Sanchan Kanojiya, U/Adh(QA), 04466-Z

(v) Neeraj Kumar, Nvk(QA), 13218-S

 

 

 

 

…more detail : here

 

 

 

 

 

RELATED

The Lamka Post | August 14, 2018