You are here: HomeColumnsKimbawi' PaMDC/ADC Election Om Nawn Di Kha????

MDC/ADC Election Om Nawn Di Kha????

Written by  Kimbawi’ Pa Published inKimbawi' Pa Tuesday, 12 May 2015 11:59

~ By: Kimbawi’ Pa


MDC kitelna di thu facebook tungtawn in ka na enkha hi. Full Power piak a omlou, chia phun kawmkawm in a ut a tam mahmah un ka thei hi. Manipur singtang gam chiatchiat a Churachandpur district MLA hau pen hi’n ka thei hi. MLA 6 i nei uhi. Singtang gam district dangte, Tamenglong in 3; Senapati in 4 Sadar Hills toh kigawm in hiam nei un ka thei a; Ukhrul in 3 hiam mah hi’n ka thei a, Chandel in 2 nei in ka thei hi. Himahleh i MDC seat neih zah uh a kibang mawk hi. I MLA neih uh proportion et in ei district in MDC seat a lehnih bang nei thei mai le kilawm ka sa hi. Himahleh hitheilou hi mai di’n ka gingta a, hihsak theih mai di’n hoih le ka sa mahmah hi.

 

Tua MDC kitelna di toh kisai a ka buaina anuai ate ahi.

 

Kum sawt tak MDC neilou a i om nung un 2010 in MDC i nei nawn ua, tu’n a term uh a bei toh kiton in election neih a hong hun nawnta hi. Term masa a MDC election (selection?) a chingte Congress ngen phial ahi uhi. Himahleh tua election om di ah Congress ticket a ding di a tam het kei hi (ei context et in). Independent ngen in term masa a chingte a ding sepsup mai uhi. Lamdang sakna lianpi ka nei a, theihsiam haksa ka sakna chiang a om mahmah hi.

 

Congress deih a, uncontest ngen phial a ching a, MDC term khat i neih nung ua tua Congress ticket deih khat le a omlouh thu lamdang sak louh vual ahi kei hi. Ka zakdan in MDC luite’n ‘Ibobi Congress solkal in full power hon pe utlou,’ chia nuaksan deuh uh hi’n a kigen cih ka za viat hi.. Ahihleh full power deih in Central a Congress solkal a din lai a P. Chidambaram leh Sonia Gandhi in a hong veh lai ua elected a hihna uh certificate surrender ngam lou uhi ahi di uh? Independent in a luite ching vek nawn le ule bang phusuah tuan di un i gingta uh. Lamet ngam di ahi diam?

 

Election a kitel a, selection tellou a hih hileh tua a luite bang hong ching nawn lai hile uh bang semsuah tuan di un i lamen di ua le? Congress party min a Central solkal a hih lai ua bawn bangmah a phutsuah kei ngal uleh Independent a ching in bang a phusuah tuan di uh? Mipite’n lametna i nga ngam uhia? Amaute dem leh gensiat ka tup ahi kei. Ka thupatna bang a MLA neihdan proportion dungzui a MDC tam deuh neih di bek phukhia hile uh huai kia le phatuam di’n ka gingta hi.

 

Tutung in term masa a bat kei leh mi thak leh mel thak hong kilang ngei di’n ka gingta hi. Himahleh ‘kua pat ahia, akpi pat’ chih mah hong bang ngei di un ka gingta lai hi. A inkuan khawsakna uh bawllem a sum leh pai mah deihna a hon nei kei di uh, chih kua a gen thei? A kipilsak a hiai thu gelh ka hi kei hi. A diktak a Congress nuaksan a, Independent a din in omzia a nei tuan diam? 6th Schedule provision muhna dia panla di tua i MDC neihsate uh kia ahi kei uh. Singtang gam MLA-te’ mohpuakna ah lianpi a kinga lai hi. Huai dia hangsanna nei a om kei ua; i MDC neihsate un le a nei tuan sam kei kei uhi. Hiai tak ahi ma i sawn theihlouhna uh.

 

England a Gladstone Prime Minister a hih lai in Irish Free Rule piak sawm in Bill thum vei mahmah a pawlut a, House of Commons a apaisuak zoh louh ziak in 3 vei mahmah a kitawp hi. Ei lawi hile i ngam di uam? MLA/MDC/State Cabinet minister maimai in i ngam het kei uh. A Bill pawluttu di le kuamah i om kei zawmah uhi. Huai lai a England gam thupidan a lamdang hi. Himahleh Gladstone in a deihsak mahmah Irelandte’n amau a kivaihawmna di Bill a puaklut a paisuak zohlouh ziak in Prime Minister tutphah a khelah kei hi. Ka phuahtawm ahi kei, na gintak kei ua, i lak ua politiciante hi’n i heutute uh demna dia hiai thu ka gelh hi dia no’n gintak uleh History of England ah ana en un, zuau ka gen kei.

 

Meghalaya state sual suahtu Captain Williamson Sangma tangthu bang ah le a kichian mahmah di. Huai thute hiai a ka gelh a ngai nawn kei. Andhra Pradesh state piankhiatdan bang na theih ut uleh history laibu ah na mu di uh. Himahleh ei lak a elected member a neupen a kipan a lianpen tanpha tanpha in i mipite uh khualna ziak a adinmun uh khah ngam lou a akhiaklah luat uh thumak tak ahi.

 

Mizoram UT hun lai a Peoples’ Conference (PC) Party a Chief Minister Brig. Thenphunga Sailo pen Brigedier tan a sepaih sap lian, huai bang a lian himahleh tenna in amah a neilou, Chief Minister a akiak a kipan Chief Minister Bungalow a mahni in zotna di neilou a inkuan Mizoram CM omsun ahi. Ut a kikhual hileh in leh a mun CM a hih sung in a nei mahmah di hi. Himahleh Mizoram masawnna dia panlak poimoh sa zaw in amah a kimangngilh zaw hi.

 

Bangteng hileh politician sang a statesman tasam zaw hita hi’n ka kithei hi. Mipite’n bang ngaihdan i nei ua, chih ken ka gen thei kei. Mipite’n i makai di uh bang chibang i deih ua, huai ah a kinga hi.

 

Ko’n genbeh ding a, a tung a gensa, Congress lah muang lou, Independent a ding di ngen in a hong kisa uhi. BJP lah bel ngam lou, galsai ngen hi di un ka gingta hi. BJP in Central solkal a let nak uleh a khauh pai nuam pah uhi. Ken bel amau solkal pahtakna khat ka nei sim hi. Huai bel tu’n hiai ah ka gelh kei di. Himahleh eilawi Congress pahtak thoh i bang mawk ua, huai di kia hilou a politics paidan leh a huih dik zui zel tuh eilawi a dia pilhuai hong suak di’n ka ngaihtuah hi.

 

Huai teel in, huai a hoih kei, chi ka hi kei. Lungsim a om bangbang k’on gelh ahi a, free vote a hih nak leh mahni deihtelna hangsantak a mipite’n tel di’n hoih ka sa hi. Sum leh pai leh hamphatna mai deih in kuamah vote ken. Tua a power neih lel un bangmah thupi a ‘tohloh’ tam kei di. Na sia leh pha theihna ah kinga inla, huai kipi sak in. Huai hileh i gam leh nam a di’n a hoihzaw di hi.

Read 1015 times
Login to post comments