You are here: HomeColumnsKimbawi' PaAizawl, Shillong leh Lamka - I

Aizawl, Shillong leh Lamka - I

Written by  Kimbawi’ Pa Published inKimbawi' Pa Friday, 19 August 2016 01:10
Aizawl, Shillong leh Lamka - I

Kimbawi Pa

 

Shillong a kipan Aizawl a kisuan dia kisa, Aizawl ah ki-om leh Beer, chih bang kimu lou di, chia Shillong a Beer am mahmah in ka om hi. Himahleh Aizawl ka tun nung kha khat lel pai pan in ‘Wine Store’ a hon hong ua, a lei na di card bawl in a lei theih hi. A zuak tung lam in a zuakna mun a tawm a, a lei ut a tam ua, ki-line dendon a ngai hi. Himahleh veng sung mite’ deihlouh sasa in veng tuamtuam ah a zuakna a hon beh zel ua, tuni chiang in a zuakna neitute a khawng nuam in a buai pian sim uhi. Aizawl a beer ngawl di iki sak vial leh ngolh malak in Shillong leh Silchar sang in a kiman zaw a, dawn peih louh lam ah ita. Rum/Whisky chihte le huai bang mah in a man a tawm zaw hi.

 

Zu thu gelh sawm hi zenzen lou ka hi, huai in hon pan mah le’ng.  Aizawl leh Shillong a kibatna mahmah tuh tuailai pasal laizial tep a tam mahmah tuak hi. Lamka ah ahih leh khamtheih dang tam mah leh tuailai laizialtep a tawm vanglak hi. Shillong ah sum khal zat a haksa mahmah a, Aizawl leh Lamka ah a buai huai kei hi. Shillong a meh di haichi zuak te’n a vuai dek le a man tawm in a zuak ut tuan kei ua, manta, ankam, etc. khawng a koih gawp mai uhi. Aizawl ah ahih leh kigini bazar khawng ah sunnung a hih nak leh discount a bawl pah ua ‘zoh duh sale’ chi’n a meh zuakte uh a kikoupih pah uhi.

 

Aizawl ah eilam meh a tam mahmah a, maiteh, ankam, belawiteh, chihte kumtawn in a hing (fresh) muh di a om hi. Mainou bang le om gige tuk ahi a, hilele a man a tawm ngei khol kei. Hiai kagelh lai (August 12) tan gawtuai leh baibing season ahi. Hiai tegel a hong bei dia, zawngtah season in a hon zui dia, zawngtah zoh in khangkhuh leh singthupi season a hong kipan ding hi. A gam ua anphui gam dim himahleh a man tawmlua, chih hun a om khol kei hi. Maiteh a duh mahmah mai ua, ne ne mai uh a hih tuak. Ka in luahna neitu nu’n ka in kiang uah maiteh lei a bawl a, gah le gah man lou in a nemai uhi. Bazar ah le a man a tam gige.

 

Meh bawl a siam kei ua, an huan bang le Meiteite leh Thadoute bang in a siam kei ua, Pressure Cooker a phit top mai uh ahih tuak. Belawiteh leh maiteh khawng Aizawl dan a akhak pih di tam hileh Lamka nupi, a neizou deuh te’n a huan lim thei mahmah di uhi. Maiteh a huan uleh maiteh kia hi mai, belawiteh a huan ule lah huchi thou. Mainou, manta, allu, samphok, singzual, lengmasel, begap, begul, chihte toh le a huan khol kei maimah uhi.  Maian/behlawi in a meh top mai uhi. Lamka lam a kimulou ‘tungrung’ a chih uh, sising ngoute leh aisa a um khawm uh lim kava sa maimai hi. Sa hi’n hai nah hileh a huan peuh uh ‘chhumtawp’ ahi pen mai.

 

Aizawl ah lampi a tam kei a, a motor park-na di uh a om tuam thei tuan kei a, lampi a kawchik mahmah hi. Sikulpuikawn a kipan Zodin Square tan, Bara Bazar akipan Millennium Centre tan leh Chanmarikawn tan, leh Chanmari a kipan Chaltlang leh Ramhlun a kikhen in hiaite motor paituam na om sun ahi deuh pen hi. Lampisik ah motor a park ua, double parking-na deuh bang a om a lampi a kawchik sak mahmah a, traffic jam ahi deuh gige hi. Huailah chu ‘Aizawl a motor tam zia’ chia kiphatna di tak in a zang zawmah uhi. Ka in luahpih nu uh khatvei a hong hoh a, ‘hmarchhak state a motor changkang berber te omna chu Aizawl ani’ a hong chi khanglang hi. Tuni tan a motor changkang kamuh khak khat a om a, HONDA car a sauté ahi. Toyota, Ford, chihte om mah leh car neu deuh ngen ahi. Wagon R, i10, chihte a tangpi in a tam a, i20 muh di aom zeuhzeuh. Shillong chu tuklou tak ahi. Aizawlte kichangkang mahmah ua, a sunggil i theihleh a houhluat nakhat anei uhi.. Ei, mikhual a valut, mikhual a inluah a va om a kihi hi, hilele i van neih sun khawng a theih uleh khelh a kisuanglah het kei mawk uhi. Insung a amuh di ua tuibuk, ciggarettes, kuva, chihte i koihkhiak leh a sawk mai uhi. Hiai thu ka gen leh Vaiphei nupa khat bang in ‘pressure cooker’ nasan hong khel uh ahi, achi uhi. Ei mi nu khat in le ‘nau an nasan a hong sawk uh’ a chi lai hi. Kichangkangsak tak in ahou mahmah uhi. Kou bang le puannawtna ka in luahpih te un a hong khel thithe lai uhi.

 

Leh (and) chihna chiamtehna ‘&’ a state government department uah a zang uang mahmah uhi. Mizoram a ka om masak in a department motor te ua E&F, P&E, chihte bang kabuaipih mahmah hi. Eilam in Forest Deptt. ichih uh amau Environment & Forest chi uh ana hi a; ei lam a electrict department ‘Power’ i chih uh Power & Electricity ana chi laizang uhi. Ei lam a Information & Piblic Relations pen IPR i chih mai uh amau I&PR a chi sese uhi. A tam mai, UD&PA, A&T, F&CS, etc. School leh college government ate a gelh chiang un Government in a pan zel uhi. E’n Singngat Govt. High School chi’n i gelh ua, amau Govt. Mizo High School, Govt. Aizawl College, Govt. Hrangbana College, chihte in a gelh uhi.  Sita (Late) chih bang a min tawp ah a gelh ua, ei lam in (L) Nengzapau chia i gelh uh a mau Vankhama (L) chi’n a tawp ah a koih uhi. MLA leh MP-te Local Area Development Fund (LADF) pen fund chilou in Scheme a chi ua, LADS chi’n a gelh uhi.

 

A mibang loute uh, mitdel, piangsual, adg. Sumdawna di’n a nak zat mahmah uh. Lamka a CCPur cinema Hall kong a sa lane naihna di a mitdel la hong sasek pa bang Lunglei Bazar bang ah ka omlai in ka mu thethup a, tu’n le Aizawl ah ka mu khakha lai hi. Bazar Bungkawnphei bang ah lasa, la play, Hawai in Guiter zut a akiang ua sum koihna di carton box koih in a kivual uhi. Ahi a, amau lamte hiai bang a khutdohte sum piak a taima mahmah zel uhi. Bara Bazar a waiting shed kiang a khutdoh khat, sound track a lasa pa bang a siamkei mahmah mai a, kapaikhak chiang in kava nuiphuh khanak hi.

 

Sum zon ahihleh a peih bilbel uhi. Khawlai a thei tuamtuam suk zuak bang; lengthei zing zuak bang, ice-cream zuak bang, Rosgulla leh Gulab Zamun zuak bang, gawtuai sengpi a paw vuvu bang, kawnggak ok a, a ban ua tawnzau bat a nitumtum a lampi kiang a ding bang; zawngtah lom a pum dim a pai bang; memory card leh sim lehkha bawm a tawi a kikoupih bang, khai a tam lua, sum zong tak uh ahi. Sohchiar, singpi, sang, chana, kuva, adg. khawlai a khai a dim in a om lai hi.

 

Himahleh a lamdang mahmah khat hiai ahi. National newspaper leh Employment News, chihte subscribe i hih kei ngal leh khawlai a lei di a kimu het kei hi. Amau local paperte uh tan in lei dia kizuak a om himhim kei.

 

Huanhai leh thei lam ah a kitoudelh sim mahmah ua, nahtang, lemon (nimbu), hatkora, avocado (amau butter fruit, achi uh), hiaite a gam ua piang hoih mahmah ahi. Grape le ahilai. Tu’n ‘Oil Palm’ achi ua, huai le loh ching mahmah in a kigen nawn hi.

 

Kim leh kiang sianthouna lam angai poimoh mahmah ua, a etton huai mahmah uhi. Shillong ah Khasite a insung uleh amau compound ah a siangthou mahmah uhi. Puan a sawp uh lel le nawt kek phial di khop in a nawt mai ua; a compound sung ua pan kaite bang brush in a nawtnawt peih uhi. Himahleh a fencing ban uh ngaihsak a sawm kei hial uh. Aizawl ah ahihleh a inkong ua lamlian bang a phiatphiat peih uhi. Lamka ah bel i compound sung tak ngial ule i hahsiang zou kei lai uh.

 

Pau thei hi le uh lui ganhing lak ah aisa leh tengkol genthei kisa pen di un kaging ta hi. Aisa bang a man a tam mahmah a, 5 (nga) bang Rs. 150/- khawng in a zuak uhi. Tengkol pen a man a tam kei vang lak.

 

Thil man a tam theih na dia kichihmuh a hau mahmah uhi. Suaklu zunkhum damdawi dia hoih, pava nou khat Rs, 20/-. Aisa leh nahtang-um, sinna a dia hoih; apple ‘theihrisel’ kg. a Rs. 150/- - Rs. 200/-, chihte khawng ahi. A sau law kha dia hiai teng k’on gelh himhim.

 

Khatna, chihdan in gelh mah le’ng a ban ka gelh peihna diam ah, hilai dan eive.

Read 1092 times Last modified on Friday, 19 August 2016 02:16
Login to post comments