You are here: HomeColumnsSuanlyan TungnungRahul Gandhi leh Arnab Goswami kihouna apat lunggeel khenkhat

Rahul Gandhi leh Arnab Goswami kihouna apat lunggeel khenkhat

Written by  Suanlyan Tungnung Published inSuanlyan Tungnung Saturday, 01 February 2014 01:57
Rahul Gandhi leh Arnab Goswami kihouna apat lunggeel khenkhat

~ By: Suanlyan Tungnung

 

Thupatna:

Tulai computer leh internet panpina toh leitung mun khat a sil tung mun dang ah a minute mama a etthei leh muthei ahing suohta hi. Bangmalou ikisah lai a tambang technology hing umta ahi chieng a ei zong isiemna leh theina nichin a belap ngaite belap a, paikhiet ngaite paikhiet a hunta hi. Tambang mipite din mun ahileh lamkai khat a ding in hamsatna tampi um ding hi. Mipite deidan leh kinepna tan a lamkaite ahing umlou chieng un, a ngaidan uh sana leh suongmantam sang in hoizaw nanleh, mipi muonna sang in mudana a tang zaw uhi. Tam toh kisai in tulai a interview kithang vengvung khat enkhawm in, igam din mun tekah vai.

 

Rahul Gandhi leh Arnab Goswami:

Tulai a media (electronic or print) a minthang mama khat ahi leh Times Now editor in chief Arnab Goswami  leh Congress vice-president Rahul Gandhi interviewna ahi hi. Arnab Goswami ahileh mipil mama khat ahi a, mi a interview chieng in ama ngaidan tunsah sawm a gen tentun leh mi sil genkhiel (sah) mat siem mama khat ahi hi. Rahul Gandhi in kum 10 sung interview tahtah a bawllou nua a, tambang  a ‘mi huphul huoi’ khat toh kihou a ut sese zong sil lamdang khat ahikia hi.

 

Tam interviewna ah Gandhi in a gen ut pen ma a gen tinten a, Goswami inzong a doh ut pen ma a dong tinten hi. 1984 anti-Sikh riot leh 2002 Gujarat riot, Prime Ministerial Candidate, Narendra Modi, empowerment, systematic change, corruption chi teng ma aha gen deu un kathei hi. Hinanleh Rahul in “empower women” chi khu question toh kituohlou simsim a bangjat vei e khat ahing gen chieng in mipi tampi sa-ih sah dan in kathei hi.

 

A interviewna uh Goswami in a genna ah “Gandhi in a lungsim munkhat ah dettah in a um hi” chi leuleu a, question direct a adawnlou pen genkha kialou jel hi. Arun Jaitley kia leuleu in,” Arnab Goswami in Gandhi hamna ding hun a pe tam talua hi” chikia jel hi. Social Network tuomtuom ah Gandhi demna tampi muding in um a, hinanleh ‘intellectual circle’ a mi muonhuoi mama khenkhat in Gandhi pandan kipapi mama ua, dih zong sa uhi. Goswami nasan inzong Gandhi kipahpi mama a “a lungsim in sil lienzaw tham a ngaituo hi” chi vawt hi.

 

BJP Prime Ministerial Candidate Pu Narendra Modi inzong 22nd October, 2007 in CNN-IBN's Devil's Advocate ah tambang interview ana nei ngaita hi. Hinanleh Pu Modi in Godhra thu toh kisai adoh zieh un, minute 5 zong ching manlou in tam interview ana pawtsanta hi. Hinanleh tutung in Rahul Gandhi in a question teng dawng kim hi. Mipi tampi’n ademna ahileh ‘direct answer’ a piehlou zieh ahi. Etsahna in:

 

Goswami: Narendra Modi nazau ama ? Kang dohna chientah leh tomkim in hing dawng in.

Gandhi: Rahul Gandhi in numeite dinmun a domsang ut hi.

Goswami: Court in Narendra Modi a siemtan nua a, bangchi dan a Gujarat buoina ama zieh hithei ding e ?

Gandhi: Ka party un numeite dinmun dopkang ding ka lunggul uhi.

Goswami: Na party un ama(Narendra Modi) Gujarat buoina zieh a hatlou sah (put him in the back foot) ding nachi uh sil dih ahina ama ?

Gandhi: Tu laitah a ibuoipi ding ahileh igam a numeite dinmun dopsang ding ahi.

 

A dawn dan pen kituoh mongmonglou chithei mama ahi. Hinanleh a interview a bul apat i-et chieng in, Goswami in a ut teng dong in, bang teng gen nanleh Rahul Gandhi in a gensa maban teng gen in, a khawlna apat sa’n a sunzom kia jel hi. Hinanleh Rahul Gandhi in anti-Sikh riot tungtang a ngaidam a nget utlou pen a mawsah in um a, khenkhat in ‘Prime Minister leh Congress President mawpuoh ahi’ achi khum jel uhi.

 

Bangteng hileh Goswami in bawlkhiel kasah nakhat ahileh Gandhi in empowerment, youth participation, systematic change chivel a gen lai in bawzui henlen, bang nachi bawlsawm e, bang na china e chivel nguntah in dong leh hoizaw ding in ka gingta hi. A thang kam Gandhi in thei ahidan thang kam pa Goswami in theilou adiei chi bang ngaidan kanei mawh hi.

 

Zilding leh theiding a kilawm:

Tam interview apat zilding a hoi kasah mama khenkhat a um hi. Eilam a lamkai a ijah uh MP, MLA leh MDC; nam lamkai, sangnaupang lamkai, philanthropic organization lamkai, numei lamkai, biehna lamkai etc., kichite tam bang in thudohna kinei jel leh hoi ding in ka gingta hi. Gandhi in a genna ah “Prime Ministerial candidate kichi India danbu ah a umkha sih a, MP teng in a teel ding uh ahi……. Power khu mi khat-le-ni khut a a umlou ding ahi………….” achi tinten hi. Eilah ah koiman i doh ngamlou zieh ata diei mah thuneina khu mi khat-le-ni khut a um bang kasa sim mawh a, mipi thuneina umlou hileh kilawm hi.

 

Gandhi in a question toh kituohlou in dawng nanleh a thugente khu thugil mama ngen ahi hi. Eilah a lamkaite kidong hita leh bangchi bang dawnna ahing pe ding uai ? “India in khanglaite lah ah power tampi anei a, hinanleh aki zang sih hi. Khum power teng kizang hitaleh India gam khangtou mama ding hi…..khantouna khu a ngiempen (grass root level) apat ahing kipat ding ahi” achi khu dih kasa mama hi. Eilam ah khanglaite power lamkaite’n bangchi lam ah izang ei chi ettha ngai hi. Ei thunei nading ahi nah phot leh adih leh adihlou umlou a khanglaite leh mipite zah chipen khangsawnte a ding a sietna bulpi ahi hi.

 

“Narendra Modi na zau ama ?” chi tamvei tah adoh lai in ama innsung a asil tuohte, ahing khantou dan leh a mihina a genkhum giep hi. Tam dawnna in a dohna ‘dawntahlou’ asuo hi. Tualeh a lung duoidan zong a kilang hi. Eilah bang hitaleh kiletsahna leh kibawlthei sahna neukhat beeh pang a dawnna ipieh ding ka gingta tinten hi. Thamlou in a jahda ding khat uh dong hitalei bang ang law di uai chi koi e a gen ngam ?

 

A topna ah Gandhi in “Question tahtah khantouna ding, khanglaite sepna muna ding, zawn-le-ngau suhbei nading etc. na hing dong sih a ‘superficial questions’ (a pawtham) maimai nahing dong giap hi” chi khum nalai hi.

 

Thukhitna:

Election khat a hing um leh a pawtham maimai in nam i-ngaina ua, sep ding bawlding khat a hing um chieng in mipi phattuom nading igen teng sepsuolou in a um jel hi. I gam khu nang leh kei a ahi a, a pawtham maimai a it ding in a pamai taluo hi. Gam it, mipi khuol ikichi ngal leh inasep in thu hing gen leh ut huoi mama ding hi. Sangkai naupang te’n gam a it leh lai hoitah a asim ding, a tup a hing tangtun ding. Solkal a mipi thatang a kiteldoh te’n zong mipi ading a poimaw masapen lampi, tuineeh, electric chite hoitah a ahing umsah ding, solkal in khantouna ding a fund tuomtuom ahing piehte ahiding bangtah a sepkhiet ahithei nading a pan ahing lah ding uh, solkal nasemte’n zong asepna ua gin um tah a mipite khuol kawm a ahing sep ding uh ahi hi. Tam khu lungsim tawng a gam-le-nam itna ahi hi.

 

|||30012014|||

Read 881 times
Login to post comments