You are here: HomeColumnsSuanlyan TungnungRefugee hinanleh

Refugee hinanleh

Written by  Suanlyan Tungnung Published inSuanlyan Tungnung Tuesday, 18 March 2014 12:46
Refugee hinanleh

~ By: Suanlyan Tungnung

 

Mumbai khopi apat Delhi zuon a train a ka tou lai in genthei kakisa a, ka nasepna mun ding ka huphul mama hi. Afghanistan, Somalia leh Myanmar a pat galtaite kung a nasem ding kahi zieh in ka lungsim ah. “Mi gilou tam mama uh, khohsahna zong neilou uh”, chia hing kigente ahing kilang zungzung hi. Bang ham a kihou ding ? Bang pen vasep a, bang va gen ding ? chivel ka buoina lienpen ahi zing hi.

 

Delhi ka tun in ka nasepna ding mun kava sui a, vangphat huoitah in ka nasepna a lienpen 2na pa khu Manipur a khanglien ana hi a, kei sepna mun ding Psychosocial department ngiel a lienpen khu Ukhrulte nungah melhoitah khat ana hi nalai hi. Ka zauna tampi huimut mang a bang a, “Tu’n vang chuh…….” chi in ka nui theita sam hi.

 

A zingni’n office ah kava ki report a, jingkal meeting kanei masang un nungah melhoi leh duongching tampi khat a hing lut uhi. Kolte ding inlah melhoi deu, eimi lah hilou, Sapte ding a lah a nah (nose) uh saudeu, a sam ulah khenkhat sansim singseng, Sapte’n brunette achite uh zong ahing lut uhi. Keizong a zumsie chitah touna pieh leh “Good morning ! I am SL from TISS, coming here for 1 month block placement” chi’n nah manlou zen in ka gen suh pielpuol hi. Alah ua khat ahoi tungtuong a, ka theilou kal nasan inzong ka enkha de o chi ka zau hi. Tambang a ngahnu melhoitah, nou ngyingei, maam hinhente, Sia Lang En Pau laphuoh a “Liak leng khum ding bang ei, a sam bang hoih – saupian diatduat” achite tam mun a bang bawl a hing om uh adiei ? chi a nuoi ah sut vai.

 

Galtai (refugee) toh kisai

Kidoupi II na a beinua in gam 21 apat palai paikhawm in Switzerland khopi Geneva ah gal leh kidouna (war and conflict) zieh a galtaite(refugee) toh kisai 1951 in ana genkhawm uhi. Tam palai paikhawm te’n 28 July in thukhun khat a hing bawlkhia ua, khum khu “the Magna Carta of international refugee law” ahing suoh hi. Tam dan khu tuni tan in Refugee Convention, 1951 akichi hi. Tam thukhun enkai ding in The United Nations High Commissioner for Refugees (UNHCR) bawlkhiet in a hing om a, kum 3 sung a tam thukhun a suoikai tapou in galtai toh kisai a buoina um jousie suhveng ding chi a tup thupipen uh ahing suohta hi.

 

Article 1A(2) of the Refugee Convention Article 1A(2) na dungzui in a galtai kichi khu, “chi leh nam, biehna, kipawlkhawmna khat ( khotang kipawlkhawmna, political party, group leh a dangdang) a member hizieh a a teenna gam a mawsah a um a, a inn lum-loulum beel ngamlou a gamdang a bitna hing sui leh a pienna gam a kinuale kia ngam nonloute”  ahi uhi.

 

Galtaite toh kisai a India dinmun

India in tambang a hamsatna tuomtuom zieh a galtai tampi enkol nanleh galtai toh kisai in dan leh thupieh kichien anei sih hi. Tam toh kisai in India in the Foreigners Act 1946 leh the Citizenship Act 1955 ana zui a, Refugee Convention 1951 toh kisai ahilou leh 1957 Protocol kichi ah suoi akai sih hi. India in azui dan tegel in a hinna humbitna ding a hing tai (fleeing persecution) leh sildang zieh a India hing beelte a khentuom sih a, a unsieng un India mi-leh-sa hilou (non-citizen) chi in a la uhi. Tambang mite’n khuolzinna toh kisai lai poimaw leh India mi-leh-sa hina lai aneilou zieh un ahing kipatna gam a thahkia (deportation and detention) thei leh matthei dan in Solkal in a koi gige hi. Hinanleh galtai chietchiet zong India solkal in a tuomtuom in a khen nalai a, khenkhat panpina pieh maimai hilou in, India mi-leh-sa hina apia a, khenkhat a pe ut sih hi. Solkal in a etkailou galtaite khu UNHCR office ah ki report in, Refugee Card ala ua, khum card pansan in UNHCR in panpina tuomtuom a bawlpieh hi. Tambang a UNHCR in card a piehte khu India solkal in agam ah a umsah a, naupangte school kaina, damlou-hitang etkolna ah solkal sang inn leh zatou inn ah athawn in a enkol hi. Hinanleh umna ding inn ape sih a, siemna sangpi nei nan uleh solkal leh solkal toh pangkhawm organization khenkhat ah na asemthei sih ua, private tuomtuom ah a semthei uhi. A umdan pen Medical Doctor siem tah hinan lechin India gam a practice phal ahisih hi. Bangzieh e ichi leh India in work permit ape sih a, work permit umlou a nasem khat pen dan toh kituoh a mat thei ahi hi. Tulai in India gam ah Afghanistan, Somalia, Myanmar, Iran, Irag leh gam tuomtuom apat galtai 20000 val a um a, tukum sung a 30000 val ding a hisap ahi hi.

 

A pienna gam a teeng ngamlou a hing galtai khenkhat in umna ding neilou, neh-le-tah neilou in hamsa tah in hinkhuo a mang uhi. A dieh in mi vomte’n gentheina tam a tuoh deu uhi. Inn-le-lou paisan a, hamsa tah a a teenna mun uah sum-le-pai kitahsap zieh maimai hilou in, kam a genkhiet theilou gentheina tampi a tuoh belap nalai uhi. Tambang gentheina tuohte UNHCR in implementing agency YMCA, Don Bosco leh Socio-Legal Centre (SLIC) tungtawn in panpina tuomtuom sum-le-pai, training tuomtuom, tahsa leh lungsim ngaisutna panpina/etkolna (medical and psychosocial support) a pia hi. A hing kipatna uh galgam a athuoh genthei seng zieh un galtai khenkhat in lungsim ngaisutna toh kisai buoina anei ua, tahsa damlouna tampi a tunthei hi.

 

Ngahnu Duonghoi

Nipi kal khat vel kasep nua in, ka sepna mun a sepna kipia galtaite (refugeete) toh ka hing ki maingal panta uhi. A tangpi in Pangalte a hizieh un a numeite uh ka houpi ngamsih a, pasalte toh kaki gop uhi. Afghan nungahte a melhoi thei mama ua, Kol-le-Vai maimai hilou in michi’n in a enla uhi. Tamzieh ata diei mah Afghan pasalte’n a numeite uh a veng ua, houpi maimai zong a zada ua, aki neisah mama uhi. Bawlkhiel neukhat na neileh UNHCR office tung ding, police in na dih-le-dihlou umlou a ang pummat ding a hizieh in, chiemnui hat in, na lungsim ah gitlouna umsih nanleh buoina khuhpi a lutthei ahi gige hi. Tambang nungah melhoi sepsopte nasan inzong gentheina tampi ana tuoh ua, tuni tan in bitna leh muonna tahtah a neithei sih uhi.

 

Nikhat khum a melhoi diehdeu nungahnu toh alou theilou a centre khat phah khawm teitei a hing ngaita hi. Lah kihoupi ngamlou, aman lah hing maingap tuomlou ahizieh in kilawp huoi sim bang nanleh a hamsa mama hi. “A khutte vel kisih leh a tui a pawt de o, a muh san hinhen dan, lipstick lah nulou a, a mai puong hinhen dan bang toh kichei ade o, houpi suhthop leng zummaw ahing chi kha de o………………” chivel hisapna sau a tung mama hi.

 

Office a ka kilekia un ka notebook tung ah handwriting hoiloudeu in “N**i*a” chi’n amin ana kigiel a, lamdang sasim, ka ziet-kavei ka et pielpuol leh a ning tawng lam ah ana nui siuseu hi. Huphul sim, lah maingal sim in, “Na min ama ?” kachi leh, “Kei minlou koi min ka giel ding hita ?” chi’n ang nuisat hi. Numeite antenna vang a hatdeu ma hiva, et zong ki en ngamlou, houpi zong ki houpi ngamlou a chisim in a um hi. “SL, I know everything about you” ang chi a, lamdang sa dandan in kenzong, “WHAT ???” kachi poupou hi. “We have nothing to do for one more hour, let us talk. I don’t bite people. Just come and sit by me” ang chi laitah in ka maisuo bang achi diei vang theising, ka lungsim vang vanlaizawl a Musi in Aanou a khai toh kibang ding in ka thei hi.

 

Zum-le-Saili a si koima umsih chia a gei a ka tou di kisah laitah in ka Program Coordinator uh a hing lut a, “SL, nava hawna bang achi ei  ?” chia a hing doh tah in, utlou sasa in ka ding doh a, nuommaw sasim leh kisuonlana neukhat toh, “Ma’am, hoi mama e. Ka paipinu fel khopmai” ka moh chi suh guop hi.

 

Holi zieh a office ni 3 soti zong a sawt sim a bang a, maban a refugee toh kisai thu tuomtuom + iki kup khawm kia kinem kawm in, ka laigiel hingna simsah jel un chi’n kang ngen hi.

 

|||17032014|||

 

Read 894 times
Login to post comments