You are here: HomeColumnsSuanlyan TungnungIgam leh hiemngamna (Violence)

Igam leh hiemngamna (Violence)

Written by  Suanlyan Tungnung Published inSuanlyan Tungnung Tuesday, 25 March 2014 02:24
Igam leh hiemngamna (Violence)

~ By: Suanlyan Tungnung

 

I gamsung a lemna leh muonna a umthei nading, khantouna, changkangna ahing tun a, mipil-misiem ahing kibelap nading ka gel chieng in silhoi tun ding daltu (stumbling block) a kamu khat ahileh hiemngamna (violence) ahi hi. Hiemngamna kachi chieng in kitha-kimatna leh sa-le-gal a kineina (violence) maimai hilou in, buoina (armed conflict) om theina ding lunggel leh nasepna ka genna ahideu hi. ‘Hiemngamna’ kichi thumal in lien a huop mama hi.

 

Pu (L) Nelson Mandela in “Kum zabi 20 khu hiemngamna toh a kidim ding hi” achi khu a thudih ahi hi. I et vengveng chieng in gam tuomtuom ah kithana, kimatna, kisietna, kidouna leh sil mulkimhuoi tampi nichin a jahding a om hi. Hiemngamna in leitung mite a hing luonglet khumta a, kihuotna leh kimudana in ahing dimsahta hi. Kituoh thei nading lampi tuomtuom sui nanlei, igal uh hiemngamna in leitung mihingte khantouna, siemna leh pilnate a panmun khaw in, ahing nuoinet veve hi. Khenkhat in bitna leh muonna igam a ahing umkia thei nading lampi a suilai un, khenkhat te’n kisiet-kibal nading ana sui jel uhi. Tambang khovel paidan khu Lamka a zong a thu maimai a om nonlou in, 1997 in unau ki-it mama lai sa-le-gal a kinei in, iki that tuo khinta uhi. Tuni’n tam buoina in eite lah ah gu (effect/affect) bang anei ei chi enkhawm lehang ka ut hi.

 

1997 – 98 sung tomnou khat unau-sanggam kithei siemlou zieh in mit a mu theilou natna (suffering) tuni tan in ilah ah a um denta hi. Nidang a ijah khahlou naupang kisuhsietna (child abuse or molestation), nu-le-pa jatatlouna leh kep utlouna (chi nalai vang), khanglai huham leh eima tahsa leh hinna nasan itlouna lungtang eite lah ah a omta hi. Gitlouna leh thangtatna igam a omte a banban a gending hita lei atam ding hi. I gam a gitlouna bangzieh a khang adiei ? Bangma dang zieh hilou in, ana thuoh gimsa (victims) te’n gal-le-sa zieh a ana thuoh gentheina uh midang tung a atut/zah zieh uh leh I khotang hinkhuo un hiemngamna dallou a, a um dandan a apom zieh ahi hi. ‘Eimilou’ khat in ‘eimi’ akhoi khah chieng in hiemngamna ihuo ua, hinanleh ‘eimi’ khat in ‘eimi’ dang khat a khoi khah chieng in koima’n bangma kilangtah in agen ngam sih hi.

 

Hiemngamna kichi khu mipi vaihawmna (democracy) a umlou chieng in a khang deudeu a, ‘tawndan’ (culture. E.g. gun culture) khat a suohthei hi. Hiemngam tah a vaihawmna mun ah kisietna, kituolouna leh pankhawm theilouna a um gige hi. Vaihawmtu in huham tah a vai a hawm zieh in,  mipite’n zong lungsim gitlouna leh sisan suo khoh sahlouna ahing khangletpi uhi. A topna ‘sisan suona’ ma ahi jel a, a kipan kia jel ding hi. Gamsung a gitlouna leh ngongtatna atam chieng in mizawng-migentheite mama a thuohpen ahi gige ua, mihausate khutnuoi a ‘sawl tawlawn’ maimai ahing higiap uhi. A tomlam a gen in, tambang buoina lah ah bangma neilou mi khat khu mi hausa khat suoh-le-sal asuoh hi.

 

Hiemngamna toh kidim mihing lah apat kiveen ding sil hamsa mama khat ahi hi. Khenkhatte buoina apatsa kihep khiet ut in, a bitna ding un dai/bang sang tahtah, thautang butlou ding inn thupi tahtah sung ah ateng uhi. Hinanleh, hiemngamna kichi khu mihing lungsim a um ahizieh in, inn thupi, dai thupi, sum-le-pai in a dalmang thei sil ahisih hi.

 

Sa-le-gal a kinei leh kidou lah kihi samlou, lungmuong tah a tengkhawm zong kihi tuomlou ahizieh in igam ah tahsa leh lungsim ngaisutna a damthei sih hi. Nidang a ana umlou ‘sex clip’, nausen piengpan kipai mang, chivel zong ahing um a, gui-oh (suicide), guhtat-lahtat (burglary) leh ‘ransom’ zong nidang sang in a tamzaw hi. Nidang a kikawm dieldielte kigal-et (threat) dan bang in kimudana khat toh hinkhuo aki mangta hi. Lutang na, sungna, tahsa hatlou leh zaw (general weakness), dipkuot nei, thasie, tahsa pumpi na, ann dulou, jan ihmut kituplou leh tahsa damlouna tuomtuom igam ah akithang mama hi. Nehguh-tahguhna, khamthei-guithei zongsahna, numei leh pasal kingai thanghuoina, chi-le-nam a kikhenna leh ‘ken ne vang in, nang ngawl in’ china lungsim ikhotang hinkhuo ah a umta hi. Tamte bangma dang zieh a hing um ahisih a, sa-leh-gal bang a ina kidouna gasuo - sisan suo ding a kimansa lungsim hiemngam inei den zieh uh ahi hi. Tulai a khangtha te’n tam lungsim ipaimang thei sih leh khangsawn momnoute zong eima bang in ahing umtou nalai ding ua, khang kibansamte isuoh ding uhi.

 

Buoina (armed or unarmed conflict) gamkhat a sawtpi a hing um chieng in agam sung sum-le-pai dinmun (economic) zong a sie hi. Sum leh thuneina neizawdeu kichi te’n aneiloute muding silk hat poupou atamthei pen a nehmang pieh ua, aneiloudeu te’n zong sum muna ding ahi phot leh dihloutah a gamtat khoh a hingsa sih uhi. Sangkai a siemna zilte’n zong dihtatna neilou tah a lekha/ lai hing simtou in, a tamzawte’n degree nei, siemna-pilna neilou in bangmalou a suoh veve uhi. Khenkhat in solkal leh private company ah sepna hoitah hing mu nanleh lungmuong tah in ane tuomsih uhi. Kituoh-kilemna sang a ‘power’ deina hing uong semsem in, power neina ding in zahthei-zahmaw ahing kimang a, a gasuo khu atung a igente ma ahing hi veve jel hi. Hiemngamna, thagum-thatang toh mi khenkhat in thuneina ahing tawi chieng un thudih in mun aneisih a, mipi zong kidaang koi in, Sapte’n khangluilai a ana zah uh, “Might is Right” chi ahing hita hi.

 

Ita-inaute tambang khotang hinkhuo toh a ahing khanglet ding ideina ama ? Hiemngamna, kihau-kibal, kitha-kimat chite igam ah idei nalai ama ? Ahilou leh lungmuonna, thudih toh vaihawmna, khantouna, hausatna, damtheina, ki-itna chite deilou nam suohbei ita ama ? Sietna toh kidim khotang hinkhuo i deilou leh igam leh nam khanmaw bawh thei a poimaw a, a bul abal a phungkal doh a poimaw hi. Mi hapi a lutta, Mars a hinna sui a akuonlai a, eite ngiemkiet suhsuh ding chizong lunggel thei khat a ding in sil zumhuoi mama sil ahi hi.

 

Khotang hinkhuo damtheilou heng lamdang a, adamlounate damsah ahithei nading in eima mimal chiet ngaisutna heng lamdang masa pen vai. I pien-ikhan a ina gaisut khahlou, a hithei ding a ikoilou sil khenkhat zong geldoh ngai kasa hi. Hiemngamna, gitlouna kichi khu eima innsung kikoldan leh eima mimal utna toh hing um, khotang hinkhuo dihlou zieh a hing uong deudeu ahi a,  khovel in ahing puohdoh dan in gelda lei ka ut hi. Hiemngamna  khu ngaisutna/lungsim apat hing pieng, mimal umdan a hing kilang doh, sil buoihuoi tampite zieh a hing piching gitlouna ahi hi. A supiching a pang khu eima mimal khantouna innsung leh khotang hinkhuo ahi thei a, hinanleh eima mimal lunggeel ah akinga pen hi.

 

Ei singtang mite’n tam buoina suhveng nading in siemna-pilna leh experience ihau khopmaita uhi. Buoina umlouna ding in tam itheinate a mun leh a huntah  a zahsiem khu a damdawi khat ahi. Buoina khat poupou a umding daalthei (preventable) ahi a, dalthei ahina ding in lamkaite maimai mawpuoh ahisih hi. Lamkaite’n buoina, kisietna a umding adei sih ua, kilemna a umthei nading in pan nasatah in ala uhi. Hinanleh mipite’n lamkaite a thuoplou chieng un bangma aphatuom dieh sih a, lamkaite’n zong mipi hoina dei a dangtahte a thuoplou chieng un bangma a phatuom sih hi. Mipi leh lamkaite a pankhawmlou chieng un buoina neunou khat zong lienpi ahing suoh thei hi.

 

Panlah theina dang khat ahileh i lungsim a kiletsahna leh kihatsahna ineite heng lamdang a ngai hi. Kami – kasa khat guollel dan a akilah ding kadeilou zieh a buoina umsa kava tohthou kia khu guolzawna ahisih a, chimawna hing tuntu, gentheina hing guontu, gam-le-nam ading a damtheilouna, zawngkhalna hing tuntu ahi zaw hi. Ka mi-kasate kituoh nading leh ahing pieng nalai ding khangsawnte mavang ding ka khuol leh guollel dan a kaki lah (seen as loser)  pen guolzawna manpha ahizaw ding hi.

 

|||20032014|||

 

Read 762 times
Login to post comments