You are here: HomeColumnsSuanlyan TungnungA Zi Neih Ni A Hong Tun Chiang In !

A Zi Neih Ni A Hong Tun Chiang In !

Written by  Suanlyan Tungnung Published inSuanlyan Tungnung Tuesday, 16 September 2014 01:52
A Zi Neih Ni A Hong Tun Chiang In !

~ By: Suanlyan Tungnung

 

Naupang chik himah leng hichi khop a ka lungleen hun kathei ngaikei himhim hi. Jing ninou hong suah ding bang ka ngai ngam kei a, ihmulou in jankhua in ka lupna tung ah ka kingaihtuah vungvung a, khat veivei bang Pasian ka mohsa mawk hi.

 

Ann nejoulou khop in ka puaknat pen ahong lian hiaihiai a, huchi kawm in singtang lou lam manoh in ka kuankhia hi. Nidang a ka Ulian toh ka tutna munte uh ka en a, khamzoh vuallouh in ka biang ah khitui a hong luang zungzung hi. Nidang a nuikhawm helhel a ka paina munte uh a dai zikzik a, ka nung leh ka ma a paiding kuamah a om nonkei hi. Ka lunggel hong thuakpih ahi diam chih kathei kei. Himahleh huaini in ni a hong suakkei a, vuah a hong zu mawk hi. Ka lungsim in “Leengkulte kiteenni a vuah zu ut kichi a dik mah ahidi maw !” chih bang a hong om a, itna kichi kei ading in gentheihna toh kithuah thil manpha mahmah ana hita hi.

 

Lou a nnasem kakisak lai natawm in ka nunluite sial in, keikia in thousi-thouvai lak ah kana ding deeduu khajel hi. “Ka Ulian toh kaki teeng dia, Christian innkuan nuamtak ka bawl khawm ding uh” chi a kana lunggeelte tuni in a thawn a suakta hi. Lamka a laisim a a omlai khawng, hun neilou sasa a kei  a hon ngaihluat ziak a inn ahong pai lai khawng peuh ka phawk thakthak hi. Huailai in ken itna kilatna lianpen tuh gin omna ahi kana chi a, kana gin om petmah hi. Kei singtang, lou nnasem ka hihna ah ahong pai sunsun chiang in kana tut pih kholkei a, ‘ka gimlua, ana pai phot mai dih’ ka chi jel hi. Ka kiang a khawl ut ngoihngoih kawm in a pai jel hi. Thamlou in kum tampi kaki ngaih sung un khat vei mah le ‘kon it, kon ngai’ kachi ut kei bilbel mawk hi. Ama adia ka gin om zoh nak leh gen ngai seselou a ka it dan a theih ding in kana koih a, himahleh hun sawtpi a hong pai nung in, huai hunlai a ka ngaihdan ana dik khinlou ahidiam ka hong chi phiing hi.

 

Ka Ulian inle hon itlua ahi ding chih ngaihdan ka neihna hun bang a om a, hong it hileh tuni in midang in moupuan asilh kei dia, ken ka silhzaw di chikhawng in ka suangtuahna a kisual jel hi. A hon it dan ka theih hun a tam mahmah a, himahleh naupang chik ka hih apat kingai ka hih ziak un ken huaite ‘ahiding mah’ in kana koih hi. Tulai a lawm kingaite dan in khatvei le a hong sawk kei a, a hong enlah kei hi. Ka heh san gige a, himahleh ama heh ka mu ngaikei hi. A pian apat khatvei le singtang lou khou khalou/ngailou himahleh kei a hon it luat ziak in singtang  a louvat, mangkhoh, buhtuh chih khawng a hong huh jel a, a tha it thei mahmah hi. A khut khawng a dulh het hut a, ka itna  pung deuhdeuh in, ka ngaihna a lian tuan mahmah hi. Himahleh ama theih a ngailua dan a kilat ka ut het kei mawk hi. Ka lawmte’n a hon mohsak mahle uh ken a diklouhna himhim kamu kei. Kon it, kon ngai va kichih le poimoh kasa kei. Ka gin omna in thu gen huntawk in kathei hi. Ama adia ka gin omna kaki saktheihpih a, ama omlouh chia ngailua himahleng ka kiang a ahong khawl chiang in itna thu ka kum theikei mawk hi. A chang chiah ka hehsan a, a khonung in kisik mah leng a lungtang a nat ding bang in ana khinta hi. Ka Ulian in a hon it mahmah chih ka thei a, himahleh aman ka it lam a theikei.

 

Ka kingaih chil un zaw ka it thei kei mah. Huaite khawng ka lawmte kiang ah ka gen jel a, ka pasal dia en theilou ka hih dan bang kana genkha jel hi. Ka thugente ana za ngei a, a hon dong a, himahleh ken bangmah in ka dawng kei hi. Lehkhathon sim thanop huai taktak, a hon itdan kia hilou in, maban a khosak dingdan a suangtuah dan bang a hong gelh sek hi. Kenzaw khatvei mahmah le lehkhathon ka khak ngaikei a, khak le ka sawm kei bok hi. Soti a hong pai chiang bang in “Lehkha khong ki khakkhak ngailou, inn lam bangle hong pai zihzeh ngailou, nalai sim a poimoh pen ahi chih nathei hia ?” kana chi jel a, aman “Kon it dan na theih hun a hong om na ding” chi’n a hon dawng lel hi. “Na lawm polhte lak a pasal hiaipa, hiaipa….. lungsim a hoihkei, a hihtheih a leh kipolhpih dah lechin bang achi dia ?” chi’n a hon thuhilh jel a, himahleh ken ka ngeingaih ut hetkei hi. A gen bang in ka lawm pasal khenkhat in lungsim hoihlou a hong nei ua, kisiatna bulpi a hong suak maimah hi.

 

Kum hongpai jel in, nungak piching khat ka hong hita sam a, leengla bang ka hong nei tam deuhdeuhta hi. Amah le a college kaina ah buai ahi dia inn lam a hong pha vang mahmahta hi. Lamdang tak in ka Ulian kei a dia gin om gige a hihdan a lawmte’n a hong hilh jel uhi. Kei a dia tangval, khamtheih kichi himhim a buallou, laisiam leh biakna a lunglut khat hichi khop a pang ahih leh ken le it ka hih dan ka langsak dia, ama a dia kiletsakpih tham nungak khat ka hiding chi’n pan kalata hi. Himahleh a kikhelta. Nidang a ka kampaute bang, ka omdante bang, a laithon ka thuk kik utlouh dante bang a ngaihtuah chiang in ka Ulian in amah ka itna a theisiam nonkei hi. It tatak thei di’n a hon gingta kei a, a hong lungke panta hi. Ken huai hunlai in lungkia a hihlam bangmah ka theikei a, bangmah kana gen kei hi. Aman “Lucy, hon it theilou mahmah na hih ka gingta, hon it a hon ngai theilou na hih a, nang hon subuai maimai khat ka hih aleh hon gen mai ve” chi’n a hon dong hi. Ka it luat khat in hichi dan kampau a hong zat in gen ding natawm kathei kei a, “nang thu thu, nang chih dandan himai” kana chih san gaih hi. Ka gen ut a tam petmah a, himahleh ka genthei kei. Huchi’n kikhen siang lah hilou, lah kingai hituanlou a sawtpi ka om nung un ka mullit mahmah thu a hong thangta hi.

 

Tuni’n ka Ulian in zi a hon neihsanta hi. Kei dikna gen ding hileng a tam mahmah dia, ama mohna bangle ahi maithei hi. Himahleh ka gen ut khat ahihleh mi khat toh ki it, kingai ihih aleh gin omna maimai thil hithei ahikei hi. Na tangval/nungak ngaihpen in it na hihdan a theih (feel) angai hi. Himahleh taksa kipumpiak ding chihna hituanlou in na kampau, na omdan, amah toh hun na zatkhawm dan uapat na itdan a lat a ngai hi.

 

Ka Ulian in hong ngai mahleh midang pasal ahita a, ken ngai mahleng ka numeipih khat pasal ahihtak ziak in bangmah gen theih ka nei non kei hi. Ki mohsak leh ki diksak le a phatuam nonkei. Ka hih theih omsun tuh nidang mah bang a amah ka itna ka latsaklouh ding ahipen hi. Khenkhat in “Unfulfilled love is romantic” a chih dan un, ka hun luite uh geel kei a di’n hun nuampen a hong suakta hi. A diak in ka Ulian zineihni a hong tun chiang in kei a di’n “unfulfilled love is romantic” chih ka phawk khe thakthak hi.

 

|||15092014|||

Read 758 times
Login to post comments