You are here: HomeColumnsSuanlyan TungnungBang Na Loh Dia ….????

Bang Na Loh Dia ….????

Written by  Published inSuanlyan Tungnung Monday, 15 June 2015 21:49

~ By : Suanlyan Tungnung

 

Thil bangkim pilna-siamna, neih-leh-lam ahihkei leh thuneihna toh pai thei gigelou hi. Khat veivei mihing in abawl tawm daan (law) toh kituak kholkei mahleh mahni sia-leh-pha theihna toh hehpihna ziak liauliau a liahkhuh theih thil diklou bangle om hileh kilawm hi. Himahleh, a diklou thil kichi himhim, hehpihna toh ngaihdam himahleh thil dik a suak thei tuankei.

 

Ka khua uh inn 300 bang a pha a, nuam kasa petmah uhi. Nungak tangval bangle atam a, ‘singdang kuamah eng tuanlou’ chih dan in nuamsa tak in sawtpi kana teeng khawm uhi. Himahleh 1997 gal buaizoh in a nuam taktak thei nawnkei hi. Khosung ah zu kham a kisual, kikou husa leh kidelh tuah vengvung chihte niteng in a hong om phialta hi. Saptuam in a septheih teng sem in, Non-Government Organization (NGO) tuamtuam in workshop/seminar/training chih khawng a vangkim in hong bawl sek mahle uh ka khosung uah zu leh khamtheih hih zongsang a tam deuhdeuh mawk hi.

 

Nikhat tuh saptuam lamkaite, hausa-upa vaihawmte leh youth club a lamkaite’n khosung puahthak nading a pan lak thak ding dan kihou khawmna kanei uhi. Khosung hoih ding deih mahmah khat ka hih ban ah youth club a lamkai khat ka hihna toh zu leh khamtheih doudal ding ahih dan ka gen aleh member paikhawm te’n hoih asa mahmah ua, zuih pah ding in ka thupukta uhi. Ka thupukna lak ua khat ahih leh zu leh khamtheih zuak a om aleh sum tamkhop fine sak ding, a zuak teitei lai ua leh khosung apat etsan (excommunicate) ding chih ahi.

 

Himahleh zukham a kisual abei tuanlouh ziak in, ni khat youth club in, kei lamkaihna in zu zuak sek a ka theihte uh inn dapna (check) ka bawl uhi. Zuak dia kiseelgu zu ka muhte uh bawkhia in, a zuak tute Village Authority office a hong ki report ding in thu ka pejel uhi.

 

Khosung apan gamlalou, dainawl deuh ah bii-inn khat a om a, huaite’n le zu zuaksek uh achih ziak un ka dap tei uhi. Innsung ka lut tak un numei naupang kum 8 ding hu khat leh pasal naupang kum 5 ding hu khat ana kimawl uhi. “Bawi, na pa omlou hia ?” chia ka dot leh “Omlou” chi’n numei pen in a hong dawng hi. Kenle “Bawi, nou zu zuak maw?” chi’n naupang tuh ka dong nawn hi. Aman “Zuaklou” chi’n a hong dawng nawn a, anau toh marble a kap uhi. A innsung ka et dek ua leh anu lupna tung a naungeek toh lum a hong pau a “Ana damlou ing a, ka nau le a ngapkei bok a ana lum kahi. Zu zuakte zong nahi uh maw ?” chi’n hehpih huaitak in a hong paukhia hi. Inn neinu ahihleh nidang a tuailai lak khawng a kilang gige leh fel mahmah ka lawmte khat zi ana hi a, a pasal in kum 2 hiam paita in ana sihsanta hi. Meithai ahih toh damlou-genthei ahih lai zawkmah toh ka hehpih tha a suak mahmah hi. Huchih lai in, naupang kimawlte lak a khat in a marble mang a zonna lam ah anu zu phual/ seelguuk ahong subua a, polythene a kituunsa zu tamkhop ahong dawk seuhsouhta hi. “Apa’n (apasal) a hon omlouh san nung a sum muhna lah neilou, inn-leh-lou neilou, meithai-tagah ihih chia hehpihtu ding natawm kineilou ahih chia ana zuak kha kahi. Janzek a ka sum neih sunsun Rs. 500 toh kana lak aleh damlou den ing a, ana zuak manlou kahi. Hiai teng chauh ahi inn sung a ka neih, damdawi genlouh nek ding anntang natawm kanei kei………….”a chih toh kiton in kham vuallouh in a khitui a hong luang hi. A haksat ding dan et mai inle a theihtheih hi.

 

Khosung a saptuam om ngal a meithai-tagahte gentheihna phawk banlou, lamkaite’n lah theilou, solkal a panpihna neu chikchik a muh ding ua lawm omte natawm mulou a, ata naupang chik 3 toh khosa hiai numei in zu a zuak aleh a hiding mah hileh kilawm kasa mawk hi. Himahleh khosung lamkaite thukimna sepsuah ding kei mahmah khut ah a kingata hi. Ka sia-leh-pha theihna in a hong phal kei, mulou lem kineih ding lah tuailai bangzah hiam toh kahi a, thupiak (zu zuakte VA office a sap a, sum liausak ding, a zu uh buaksak vek ding) semsuahlou thei lah kahi tuan kei. Huchi’n a polythene a kituun zu ka en jel a, inn neinu ka en jel a, ka lawmte ka en jel a, kuamah a paukhia ka om kei uhi.

Read 790 times
Login to post comments