You are here: HomeColumnsSuanlyan TungnungTup-Le-Ngiim Nei A Poimaw Pen Ama?

Tup-Le-Ngiim Nei A Poimaw Pen Ama?

Written by  Suanlyan Tungnung Published inSuanlyan Tungnung Thursday, 22 February 2018 00:40
Tup-Le-Ngiim Nei A Poimaw Pen Ama?

Suanlyan Tungnung

 

Introduction:

Singtang mite lah a poimaw mama khat ahileh guoltungtuonna ahi. I pu-le-pa te’n guoltung tuon kichi pen ana thupi ngai mama uh ahi ding a, pawi thupi tahtah ana bawl uhi. Gamsa thupi amat chieng un ana AI ua, bu-le-bal, miim-le-tang ahau mama chieng un zong ana AI uhi. Tualeh sa-le-gal amat chieng un zong ana AI ua, galhang ahina uh ana suo uhi. SA-AI, TANG-AI leh GAL -AI joute jatatna lienpi pieh ahi ban uah, ama uzong ki SIEL ngam uhi.

 

Tambang lawchinna pen amoh a hing um ahisih a, kideisah man a zong tan thei ahisih hi. Tup-le-ngiim kichien tah toh kalsuan in, mi bawllou tantan a tha seng in apang vevaw uhi. A lungkiet hun uh a um mama ding hi. Tualeh hahsat-genthei bangjat a thuoh ding uai chi koiman kituot vatehlou hi. A tup uh a muolsuo chieng un MI THUPI khat a chiemte ahi pan giep uhi.

 

Hinanleh tulai in tambang kidemna ana um sih a, kidemna leh ki-elna a tuom mama ta hi. “Tulai khang a MI THUPI hitheina ding in TUP-LE-NGIIM nei a poimaw pen ama ?” chi tuni’n suutkhawm vai chi ihi. Tam article in na lungsim a suhbuoijou (makes you ask questions) leh a tup tangtung ahi ding a, pan na lahtha a, nang-le-nang na kivel chet thei ding khu a tup thupipen ahi hi.

 

Tupna nei ding ?

Khanglaite hi in, Sangnaupang pawlpite hitaleh academic awareness (not career guidance) program a nei chieng un TUP KICHIEN NEI IN chi’n ha gen in a gen uhi. Tam pen silhoi ahi ban ah, lawchinna tunthei kalbi poimaw khat ahi hi. Tam anuai a etsahnate sim masa vai.

 

Ka gil lah puoh seusou, ka gihdan (sel) 80 Kg bang val ahi chieng in BP nei ding leh Zunhum nei ding ka hing zau mamata hi. Kei zong kipan in nichin in Morning Walk, stretching, deep breathing etc. chite bawl in ka gihna ka suh kiem sawmta hi. Ka tup pen ahileh ha khat sung a 60 Kg phah suh ding (20 Kg kiem ding) chi ahi. Hinanleh exercise hoitah a ka hing lah tah in ka ihmut ahing tui a, ka ann kam a hing tui a, tuachi’n kideh hatna zieh in 20 Kg ka kiem sam hi. Hun a hing sawt deudeu leh ka exercise lah hun zong ahing tom deudeu a, theilou kal in ka gihna 80 kg ka phakiata hi. Ka tup tung maw – tunglou ?

 

Non Government Organization (NGO) a sem ding khat in Master of Social Work (MSW) degree nei pen a poimaw maimai hilou in, maban ading a masawnna (promotion) mutheina khat ahi. Kei zong kipan in, tehnung-vuainung chilou in MSW kava sin hi. Pasian hepina toh ka hing jouthei sam a, degree thupi tah toh inn lam ka hing zuan hi. Organization tuamtuam a sep theithei sem in, a tawpna ah ka hobby maimai dan a kana nei, degree lahna ding a zong kana gel phahlou news lam ah sepna ka hing neita hi. Ahileh ka MSW bang a ka zahding hita ? Ka tup tung a diei – tunglou ? Ka sepna apat hing ki topsah taleh ka tup tung nonlou ahithei diei ?

 

Paidan tangpi khat (system) nei ding ?

A tung a etsahna kigente et in lawchinna ichi khu tup-le-ngiim tangtunsah maimai ahisih chi ithei hi. Tualeh tup-le-ngiim khat a tangtun chieng leh adang khat nei jel ding china asuoh hi. Gendan tuomkhat in gen talei lawchinna ichi pen hun tomnou sung ading ahi a, tomlou kal a hing bei jel, a tuom pattha jel ngai hileh a kilawm hi. Tualeh tup-le-ngiim (goal) ibawl chieng in ei siemna, hatna, damtheina, nei-le-lam ki ngaituo khalou thei jel hi. Tamte zieh in tup-le-ngiim khat toh dinkhawl pen lungkietna bulpi a suohthei a, lawsapna hing tuntu in zong a pang thei hi. Tup-le-ngiim neilou ding china hi kawilou, nei tahluat ding, ahivang a, i tup khat i tangtun chia singnou zong tui i buoh a akhanlet banga i lawchinna pen bang chileh kembit a anou selthei ding chi ngaisut toutou ngai hi.

 

Ahileh tup-le-ngiim kichien sese neilou in, lawchinna ding in eima bawlthei dandan in paidan tangpi (system) khat nei lei bang achi diei ? System ahileh goal banglou hi. Tam tan ka tun teitei ding chia tunna ding lemguotsa umlou ahizieh in hingzing theina (sustainability) nei hi. Paidan tangpi khat nei pen nichin a ziltou thei, belap thei, lahkhiet thei, puophat thei ahia, chiindan (lifestyle) suohsah thei ahi nalai hi.

 

Zingmawng lupna tung a na thawkhiet apat zan na lup tan a na umdan tangpi teng gielkhe lechin na “system” na thei ding hi. Khum na “system” ah bang a um ei – um maimai, lawmte toh pawt, social media a lut, bawlding theilou a kholai vah ? A hilouleh na “system” ah lekha sim, newspaper sim/ en, inn nna sem, lekha giel, etc. chivel a um ei ? Nichin a na bawl taangpi khat a um ding a, khum khu na lifestyle a hing suoh ding hi. Tup-le-ngiim kichien tah leh sang tah nei inlen, na lifestyle khu UM MAIMAI hileh lawchinna kichi na mujou na diei chi ki ngaisut huoi mama hi.

 

Na hinkhuo zahdan tangpi peizie (system of lifestyle) tungtawn in nangma leh nangma study kibawl hitalechin, bang lam ah na awn deu ei, bang lam na lunglut ei chi na kithei khe ding hi. Tuan a na awnna lam penpen toh kisai sep thei, bawl thei bang a um ei chi kansui hing hoikha ding hi. I lunglutlouna le hi tempeina lou lamtah a tup-le-ngiim ngei chipen, koite chidan khat hileh hikhin veklou hi.

 

Thukhitna:

Lawchin ut mi nahileh “system” hoi na nei a ngai masa hi. Tami system najui thei chieng in goal neu nounou (temporary goals) na neite’n na lawchin tahtah na ding a khahtan jousih ding hi. Tup-le-ngiim kichientah neisih un chi ka hisih a, hinanleh na tupna a tangtun theina ding in “system” kichien tah khat na hindan/khandan in nei in chi ut kahizaw hi. Indian Administrative Service na tum a, na hing lawching sam hi. Hinanleh system hoitah na neilou leh khum lawchinna pen nang a ding in innsung, gamsung sietna ahing hiding ban ah na mi-le-sate a ding in zumna, minsietna ahing hi nalai ding a, nang a ding a lungtang nat kipatna ahing hi ding hi. Na nichin hinkho Mandan mi lawching dingte hindan ahi nai chi nang-le-nang na kithei a, tu na dinmun apat a hoizaw a na heng thei leh na “system” hing hoi semsem van in, lawchinna hing nai deudeu ding hi.

 

I pu-le-pate lawchinna pen tha-le-zung hat ahideu hi. Tulai khang ah lawchinna ding in hat vengvung zong a ngai seng sih a, a hiding bangtah a khohei-gamtat a poimawta hi. “System” hoitah na nei chieng in na tup thupipen – IAS, IPS, MCS, MPS, Professor, Manager, Mahajon etc., ah lawching sih lechin zong na damsung in mi lawching khat na suoh veve ding hi.

 

|||11052017|||

Read 593 times
More in this category: « Whose fault is it anyway ?
Login to post comments