You are here: HomeColumnsSuanlyan TungnungDamdawi Inn A Thiltung Toh Kisai Ngaihdan

Damdawi Inn A Thiltung Toh Kisai Ngaihdan

Written by  Suanlyan Tungnung Published inSuanlyan Tungnung Friday, 13 September 2013 12:46

10th September, 2013 a thiltungte itheih chiat uh ka gingta hi. Minister Pu  Phungzathang in Churachandpur District Hospital a vehna thu hilou in, aveh  lai a security personnel on duty with full uniform kivuak thu ka genna ahi. Mit  a mute gendan in “Helpawl kipekhia khenkhat damdawi inn a hong hoh uh. Zu  akham ziak un thuneitute’n damdawi inn veng ding a akoih VDFte’n ana man  uhi. Huaitak in, mat a ompa lawmte Assam Rifles’ camp (amau base le hithou)  ah paitou in sepaih uniform a hong silh ua, ARte etkaina nuai ah BOLERO  number plate omlou khat toh ahong kuansuk uhi. Damdawi inn huangsung a  lut in, VDF lamte ahong vua ua, a lawmpa uh ahong pikhia uhi. Huailaitak a  duty a om police leh IRB te’n bangmah lohlou in apaisak uhi. Huaikia hilou in  SP vasam un chi in akikou uh” chih ahi hi.  

 

I gam enthak lehang ut huai kasa  mahmah hi. Nidang ZNC khawng in  bandh abawllai in Lamka a teenglou  namdangte’n bangmah a gen ngamkei  ua, igam ah letna (power and authority)  chikhat inei vanglak uhi. Hun hong  paitouh jel in vengchih phial ah nam  tuamtuam dimta hi. Huai kawmkal ah  1997 lai in, ei ki innteek sak mahmah  namte kidou, kithat tuah leh inn kihalsak  in Lamka kidouna phual isuah  uhi. Tuni tan in kidouna lungtang beilou  chih dialah hilou, bei chih dialah  abeilou abatna chiang tam mahmah  in, ipangkhawm thei naikei lai uhi.

 

Huai advantage a la ahih mel uh theihlouh  in phaizang helpawl kipekhete  singtang gam ah solkal in ahong koih  mawk hi. Amau (solkal) thuneihna ahih  ziak in, bangpi gentheih ding omlou  ahiphot hi. Singtang mite ipu-leh-pate  uapan a lemna deihte ihi ua, ana kidou  in kigal mahle hang zi-leh-ta, sung-lehpu  a kineite ihi uhi. Ei asung a teeng  mipite kituahlouh ziak a hiaibang hong  om adiam chi ut a hiai teng hong gen  masa kahi.

 

Jan a thil tung toh kisai in kupnop  tampi kanei hi. Himahleh poimoh diak  kasak khenkhat kikum khawm ni.  Underground kichi himhim in  kichiamna(oath) anei a, zuih leng a zui  uhi. Himahleh huai kichiamna amau  pawlpi paidan toh kisai deuh ahih ban  ah mihing hinna natawm apoimoh aleh  lak ding chih ahilai hi. Huai utlou a,  mainstream a lut ut chidan a kipekhia  hiai helpawlte omna mun dik kasa kei  himhim a, mi tampi’n le dik nasaklouh  ding uh ka gingta hi. Manipur ahih  leh phaijang leh singtang in akikhen  a, phaijang helte (surrendered valley  UGs)phaijang ah om uhenla, singtang  mite singtang mah ah omle uh ahoih  ding hi. Phaijang helte’n singtang mite  it leh jahtatna neilaw ding in ka gingta  kei. Singtang mite’n le phaijang helte  kipaktalua ding in ka gingta tuankei hi.  Huaiziak in, kituahna a omtheihna ding  in phaijang helte tu a a omna mun uh  46th AR Camp apat apawt uh poimoh  kasa.

 

 Assam Rifles te’n FRIENDS OF  THE HILLS PEOPLE chi in a omna  munteng uah kisathei tak in atak uhi.  Solkal in hiai underground kipekhete  kem dia muang petmah in, amau (AR)  etkolna nuai ah akoih uhi. A muanhuai  uleh muanhuailouh uh kathei kei a,  SoO nuai a signatory khat ZRO/ZRA  lamkaite inn bangjah hiam bang luhkhinta  uh chihbang news ah muh in a  om hi. Intelligence report Indian Union  adia lauhhuai bang hiam amuh ziak  khawng uh ahi diam chih bel keibang  a minautang kuamah athei a omkei.  Tutung Hospital Incident bang a  zukham thulimlou khat report dandan  a gamtang uh ahidiam chih ngaihdan  bang a omthei hi. A mi kepte uh hospital  a omdan kilawmlou tak a om,  security te’n amat ualeh thuchian kan  masalou a, amau (surrendered UGte)  toh mi vo dia hong kuan chih bangle  FRIENDS OF THE HILLS PEOPLE  vailou lua hi in kathei hi. Ui hai in aliing  teng boh chihdan ahihle bel lauhhuai  mahmah ding hi. Huaiziak in, state  solkal in security dan a alak VDFte  vawdia ARte gamtat dan awimoh huai  mahmah chihlouh gending kathei kei.  Organization tuamtuam in mohpaih  taka hi.

 

Huaini in igam a mipi sik-leh-tang  a ding dia iteel uh Minister leh MLAte  ban ah District enkai dia mun poimoh  taktak luah District Level Officer tampi  hospital veh in a om uhi. Huaikia hilou  in nam lamkai, philanthropic, NGO,  Women leh student organization  tuamtuam a lamkaite ban ah damtheihna  lam a eite hong enkol doctorte,  nursete, paramedicalte leh mipi tampi  a omkhawm uhi. Huaite zahna neuchik  neilou a, mipi lak a a duty bawl security  personnel khat vuak a ahong om in  gen tampi nei hi.

 

Mivaw dia hong kuan hilou in, I milian  neih sunsunte that dia hong hoh  hitale uh bang achi dia ?  Security personnel khat vuak  a a om theih a leh mipite dinmun  lauhthawng huai mahmah chihna ahi.  Hospital sung a civilian mohna neilou  khat hongvua uh hitaleh bang achi  dia chih bang ngaihtuah tham ching  mahmah hi. A tomlam a gen in hiai  telawi in jah leh lauh neilou ahi uh chih  akilang hi. Hichi tuk a aki muanngamna  uh ARte’n a gamtatna teng ua  akithuahpih gige ziak uh adiam chih  bangle ngaihdan dangkhat ahinawn  hi. Ahihkeileh, igensa bang a, Lamka  mipite kituahlouh dan atheihluat ziak  ua gamtang ngam uh adiam ? Kuamah  theihlouh in mi bangzah bang  alohta ding ua ?  Ngaihsun detdet lehang thil tampi,  adik leh diklouh thutuam, suangtuah  theih in a om mawk hi.

 

Hiai thiltung in ministerpu leh akaih  zatamte’ TOUR suminse mahmah in  kathei hi. District pumpi enkai a om  Deputy Commissioner Pi Jacintha  Lazarus, IAS ading bang inle minsiat  huailua hi. Huaikia hilou in security toh  kisai enkai deuh SP Pu Mangkhogin  Haokip, IPS ading bang in security  lapse abatna chiang a om mawk hi.  Himahleh amau mohna om in kathei  kei, adinmun a a omkhak ziak lel uh  hi in kathei hi. Mipi thangpai kisa  khenkhat in Lamka Police Station Officer  in-charge (OC) a mohsak simna  ua, ken bel pahtak huai kasa mahmah.  “Man unla, vua un” chi in order suah  taleh AR lamte toh hospital sung a  duty sepaih dangte ahong kikap tuah  mel uh kuan athei a ! Huaiban ah hiai  TOUR minthang bangchi tuk in a buai  dia chih bang ingaihtuah aleh aman  (OC pa’n) buaina tampi ahong omding  dal hizaw in kamu hi.

 

Bangteng hitaleh hiai bang buaina  atun nawnlouhna ding leh mipite lungmuang  tak a ahin theihna ding in District  Level a thuneite, mipi palai dia teelkhiat  a omte leh mipite mahmah in pan lak a,  migilou (ichimai dia), mi buluh, mi duty  bawllai subuaite dan toh kituak tak a  gawt hile uh hoih petmah ding hi. Huchidan  bang hiam a omkei aleh maban ah  kuamah in bangmah hong loh ngamlou  chidan in ahong gilou deuhdeuh thei  ua, panpihtu ding neilou khat ahong  khoihkha ding uh chih alauh huai hi.  

Read 1260 times
Login to post comments