You are here: HomeColumnsZokhualMIAL AKIPAN VAK AH

MIAL AKIPAN VAK AH

Written by  Khamkhokam Guite Published inZokhual Sunday, 15 April 2018 14:20
MIAL AKIPAN VAK AH

MIAL AKIPAN VAK AH

Lampam sik-khial Pastor khat tangthu

Lettu : Khamkhokam Guite

 

 

Seatle khopi tum lampang a Khristian Camping Centre khat aa ka pisa ah ka tu hi. Inn polam ah vuah a phin sengseng a, taaknah(fir) akipan vuahmal tak keuhkeuhte ka en hi. Khua a niim demdom a, ka tolet akipan in ka omna gaal a phaizawl liantak, sing lian pipi pouna gam-mang nonglak ka muthei hi. Ka zi Deb leh ka tate 4 toh hiai mun ah kum 4 tak ka omta uhi. Hiai Camp a heutupa pen ka hi hi. Saptuam pawl tuamtuamte’n hiai mun ah Halhthakna Camp a kum khua in  kitatsatlou a kizom ziahziah  in hong nei ua, huaite ka na enkol hi.  Kei leh ka zi-le-tate a ding in ahihleh hiai mun a sep, nasep khiaklah huaipen ahi hi. Mi hoih leh hinkhua kikepsiam mahmahte baan a, gam-mang sing hing depdup in a umsuak mun a nasep sang a hoihzaw sep ding dang om in ka gingta hetkei hi.

Ahihziak in, hiaite tengteng mangsak vek ding ka hita hi.

 

Thil im khilkhial kilangta hi

Ka sepna Camp neitu -Board Member 2 hong pai in, ka pisa ah hong mu uhi. Aziak genlou in kimuh akul thu hon hilh uhi. Aziak gen kei mahle uh, ka guktheih thou hi. Agaal akipan thil thukhah theihna  dawr(online market) akipan in na’ thuak nopna damdawi(lu-na damdawi) ka thukhak sek hi. A sang-a-sing a sim in ka thukhak hi. Ni khat in huai lu-na damdawi tang 30 khawng ka ne gige hi. Kum 10 khawng huchi bang a aguk a ka nek nung in, a guk a tawpsan ahihleh ka tum gige  thou hi. Ka khaloh in a daihlouh ziak in ka innkuan khosakna un bahloh mahmah  hi. Bang chituk in tawpsan tum mahleng le, ka tawpsan zou kei a, ka khaloh in adaihlou ziak in Camp Credit Card in damdawi tuh ka thukhak khong hi. Heutute’n huai a mukhia ua, a guk a ka khosakna zumhuai mahmah puankhiak in hong omta hi.

 

Heutute’n Camp Credit Card a ka thil thukhah list hon pholh khia uhi. Damdawi tang kibang ngen…. a kibang ngen mahmah ahi hi. Mahni siamthu gen ding om mawngmawnglou hi. Ka thil hoihlou hih ahih leh, Saptuam deihlouh ahih ban ah, solkar poikhoihna leh suangkulh taan theihna ahih thu hon hilh uhi. Nipi kal 2 sung a huai Camp pawtkhiaksan ding in thu hon pia uhi.

 

Huai ni mahmah in leng lu-na damdawi tampi mahmah ka kol teektuuk hi. Ka pisa dohkan a pohdoh(drawer) sung ah leh ka Brief Case sung khawng ah tampi ka koih a, ka khekol za-ip khawng ah leng ka vom teektuuk hi. Huai ahihleh ka khovel neihsun ahita mai hi. Huchi bang a lu-na damdawi ka kiang a a-om chiang in bukim lua in ka kithei hi.

 

Heutute’n hon thumpihna ua bang gen uh ahia chih theih khiakzoh ka nei nawn kei a; hon paisan deklai ua hoihtak a ka vakhak leh khaklouh leng ka theikhe zou nawn kei hi.

 

Office akipan pawtkhia in, ka zi-le-tate omna ka ‘quarter’ ah ka lut hi. Innteek nu’n naupangte skul kai avapi zouchiah hi. Innkuan sum ka zatlouh ziak in huchi bangtak a damdawi tang nek  zongsang ka hi chih innteeknu’n athei kei hi. Kha tampi sung zuau sosan ngen mahmah ka hilh gige hi. Saptuam in zu leh khamtheih ngolveite’n a tawpsan theihna ding ua ‘kalbi 12’ a bawlte uh leng zom gige dan in ka kigen hi. Himahleh, thutak hong kilang kheta hi. Pasal dia neihtak ka hi kei a; innkuan sung a papen hihleng ka chinta kei hi. Ka innkuan maitam uh ka  chim sakta hi.

 

Ahihleh bangchi dan a hiai thil ka tung a hong tungthei ahi ding? Bang chidan a mite’n ‘damdawi’ achih uh khamtheih suaksak a kihihse zouvek tamai ka hi ding? chih khawng ka ngaihtuah hi. Hiai lampi suk-le-tou ka zuihna hong kipatna ahihleh houchik ahi hi. California a Bible College neuchik khat ah Bible ka sin hi. Huai mun ah ka zi Deb toh ka kimu kha uhi. Huchih hunlai in ‘lu-khing na’ (migraine) na neihziak in Doctor in na’ thuah nopna damdawi hon nesak hi.

 

Lu-na damdawi maimai eivoi!

Ka damdawi nek in ka lu-na thuaknuam sak hi. Saptuam nasepna toh kisai a mipi mai a dinte, mi hoih leh feltaktak khawng toh kithuah ka zahkai thei mahmah mai hi. Ka lu-na damdawi in huchi bang a ka zahkainate thuaknuam sak deuh in ka thei a, huaiziak in huai damdawi ka pakta’ deuhdeuh hi. Ka lu a natlouh chiang inleng huai damdawi nek ka hon ching panta hi. “ Tun ka lu na’ naikei leh leng, a hong nat ma a na veng khol kei mai vele” chi in kei leh kei siam ka kitan tawm zel hi. Banghiam tan ah zaw dik leng dikthou hi. Ahihziak in, huai na’ thuak nopna damdawi in ka taksa ah khamtheih damdawi bang in nasem panta hi. Tawpsan ka tum a, hihmahleh ka tawpsan thei nawnta kei hi.

 

Amin mahmah leng ‘lu-na damdawi’ chih ahihchiang in im ngailou a, ka ‘kham’ ziak a ka buai ngeilouh kia gentaklouh, huai damdawi ka nek chiang in ‘fit’ mahmah in ka kithei zomah hi. ‘Khamthei zongsang’ dan in ka kikoih kei a, midangte bang thou a Doctor in damdawi nek ding achih ne dan in ka kithei mai hi. Huai damdawi in halh giugiau in zing hon thou sak a; sunni tum in hunzat a nuamsak a; zanchiang in leng ihmut a tuisak hi. Huchihlai in, huai damdawi tellou a mihing chingzoulou hi a kitheihna nei in, ka kiphamoh deuhdeuh hi.

 

Zuauthei Pastor

Apolam a mite muh in pro-Pastor(Pastor-in-training) hin dan ding diktak a hing leh, maban limchitak nei bang in ka kilang hi.  Zi deih huaitak nei in, ta leng 4 ka nei hi. Khristian skul khat ah sepna ka mu a, Tuailai Pawl ‘incharge’ in hon koih zomah hi. 

 

Lungsim tawng ah ka buaina hihfel ka ut mahmah hi. Ka khankhiakna Washington lam a pem a, Pathian Thu zilna ah lut sunzom ta’ leng, ka thil chin zongsat ka tawpsan theih ka kigingta hi. Ahihziak in, ka omna lampeuh a damdawi tang ka kenzel ziak in ka omna ka suan hang in, kei ah kilamdanna taktak bangmah a om tuankei hi. Hiai Camp enkoltu in pang leng ka damna ding ahih ka gintak lai in,  mualphouna tawpkhawk in hon buahna mun ka suak sak zota hi.

 

Ka lawinu Deb in kum tampi hon ginglel ngei kei hi. Ka damdawi nek ahihleh lu-na damdawi himai in a ngai hi. Ka nek tam dan athei kei hi. Ahihziak in, ka omdan a kilamdanna ahong om touh zel akipan in hon muangmoh panta hi. TV a mi khat khamtheih saltang khat  a houlimpihna uh programme a kipan in, kei omdan toh kibang asa lua hi. A hon houlimpih a, tawpsan ding in ka kichiam hi. Ka nupa un kap kawm in thuumna ka nei ua, kibawlhoihna ‘Home’ khawng ah leng ka lutphah hial hi.

 

Ahihziak in, angei bok ah ka kik nawn zel hi.

 

Damdawi zuaktute’n  Doctor hon gelhsaklouhpi a na’ thuak nopna hon leisak uleh, mat in a om ding uhi(America ah). Huai damdawi ka lei theihna ding in, zuau chi tuamtuam phuak in, Doctorte kiang ah  hon gelhsak ding un ka ngen sek hi. Ka khaloh tampi damdawi leina ding in ka zang gai hi. “Tulai a zaw hih nawnlou ka hi…” chi kawmkawm in, dingtang zoulou in, huaimah ah ka puklut zel hi.

 

Huai Damdawi ka ngolh theihna ding in Deb inleng theihtawp hon suahpih hi. Kuamah kiang a genlou in hon venpih gige hi. Deb nu-le-pa ahih uleh Missionary ahi ua. Ka pa Pastor ahi hi. Ka nupa un “Saptuam mite’n khamtheih khoih ngeilou uh” chih thuhilhna nuai a khanglian ka hi uhi. Saptuam enkoltute bang tuh khamtheih khoih gentaklouh, Saptuam sung a khamtheih khoih a omlouhna ding ua vengbittu hi vek dia ngaih ka hi uhi. Ahihziak in, kei ka hihleh hichi bang ka hita maimah hi! Saptuam mipite’n Pastor khawng khamtheih saltang ding a a hon gintaklouh luatna lam un, ka zuau gen peuh a gingta zomah uhi.

 

Ka inn luah kongtual ah ka ding hi. Innsung a ka zi kiang a ka dinmun hilh ding ka huphulh mahmah hi. Mit-hak chiangkuanglou a thil hoihlou ka na hih touhzel kigawmkhawm letdan ka ngaihtuah chiang in, hiai puakgik ka pozou nawn mahmah kei hi. Kei mimal mualphouna zawle thutuam hitaleh, ka innkuan uh ka dalhzak sak ding hi. Ka etkol tuailaite leh Saptuam pumpi ka minsesak vek ding hi. Kei mipa ziak in mite’n Saptuam a musit nasa zaw sem ding uhi. Huai mohpotu diktak ahihleh kei ka hi hi!

 

“Na chiamnuihna hi’n teh maw?”

Ka mualphouna thuguk ka hilh mi tawmchikte lak a khat, ka Pastor pa bang unle hon venpih zounawn talou hi. “Saptuam nasem, khaloh tawm chik loh ka hihziak in panpih ka ngai” chi a ka tanau naideuhte uh kiang a panpih ka ngetsekna ziak .. aziak diktak puankhiak ngai ding hita hi. Ka puakgik ahihleh zumna-le-daina  khenlam gam ahita hi. Khovel a dam utna himhim ka neita kei hi.

 

“Ittak, hong nguaina chia?” ka zi in hon chi hi.

“Ka sepna akipan hon tawpsak ua…. Saptuam sum a damdawi ka lei a mukhia ua…. Nipi kal nih sung in hiai mun I pawtkhiaksan uh angai. Hiai tanvei zuau hon hilhta ing a… ngaihdam tak le ka hi kei. Poi kasa law mahmah”.

 

Deb mel ah lamdang sakna, upzohlouhna leh pom mai haksa sakna hong lang khia hi.

 

“ Na chiamnuihna hi’n teh maw?”

 

“Hi e, ka chiamnuihna maimai ahi!” chithei hileng ka ut ngei mai! Ahihziak in, “Ka thugen ataktak ahi” aw-ling pelhpelh in ka chi hi.

 

Ka dai vengveng tuak uhi. Hehna, thangpaihna leh nupa kimak khenlam gam – sih leh hin kikal taktak ahita hi.

 

“Va pai inla, ka pisa dohkan drawer a ka damdawi tang koih tengteng vapai vek dih”.

 

A maitang a sisan om tengteng beivek hileh kilawm khop a daang dildel in, ka office dohkan drawer sung a damdawi tang ka koih tengteng ava paih vek hi. Ka khekol za-ip sung a na’ sawkna/na’ thuak nopna/ lu-na damdawi a buuk toh ka vomte la khia in ka en vungvung hi. Ka lungsim ka khek nawn ma in ka pai mang vek hi. Huchi bang a ka ‘normal’ sung in mun dangdang a ka damdawi tang selgukte leng ka pai vek hi. Damdawi tang khat le kol hetlou a om bang tuh…. Ka lungsim thovenna leh,  tangkhat ngoihngoih a ka kitheihna akikim in ka thei hi.

 

Lainattu

Ka hihna diktak ka kipuankhiak mengmeng leh kei a dia hoih zaw dia ka gintak ziak in ka Pastor uh ka phone ngal hi. Pindan lehlam ah ka lawinu Deb inle amah guaitu(sponsor) phone in a houpih  hi.

 

Ka Pastorpa un thathoh chitak in “Dave, na aw zak nuam na e. Bang thu om a hia?” a hon chi hi.

 

Thil omdan ka hilh hi. Ka kihou tung ua a phurna aw tuh ka kihou tawplam un ahihleh, a zoi ngiaingiai in ka thei hi. Phone a tawp toh kiton in tomkha ka mitsi zual hi. Pastorpa thugen khat ahihleh, “Poi na maizen e maw! Ka hong hoh ngal ding aw” chih ahi hi.

 

Bang chita?

Pastorpa’n hon pampaihlou a hong naih dek ei tel voi. Deb guaitute’n le maw, hon taisanlou a hong hoh tum zomah uhi! Hing-le-dam taak leng hilou a ka kitheih lai un, hon it a hon hehpihtu ding omlai uhi!

 

Ka Pastorpa uh a hong tung phei ngal hi. “Na khawl mah dih, zuau tampi non hilh ziak in lungkimlou sim lengle, thil bangkim ziak neilou a tung ngeilou hi ve aw. Pathian in bang ding hiam a ahon sapna hi maithei hi. Nipi Ni chiang in hong kikhawm ngeingei phot mai dih. Hinkhua kikai-awk taktak ngen omkhawm hive hang aw maw?” hon chi hi.

 

Hinkhua kikai-awk taktak ngen omkhawm …..? Nipi Ni a biakinn a kikhawm sek, Pathian’ misiangthoute, kei ziak a hinkhua  - besam zunlouh khaubang nok hon omkhawm hong hita uh ahi di chu!

 

Huchi in, im theih vual hi nawnta lou hi. Hon guaitute tengteng kiang ah ka hihna diktak ka hilh hi. Khenkhat a heh mahmah ua. Lamdang sakna leh hehpihna a dim leng om tham uhi.

 

Ka seppih heutu khat in ka liang a hong kawi kawm in “ Na lungsim nat ding dan k’on theihsiam pih mahmah a; hiai thil na sihpih ding hilou in, na damna ding hi zaw ding ahi. Nang hon ittu innkuan hoih tak nei chin a, Pathian panpihna in na vualtungtuang ngeingei ding hi”, chi in hon khamuan hi. A pau-kam hoih kei a ding in a manpha mahmah hi.

 

Innkuan kikhenna

Nitaklam hong hih in ka tate kiang ah thil omdan tengteng ka hilh hi. A lohngaihna a thei kei ua; a lau ua; a heh mahmah bok uhi. Ahihziak in, hon hawlou uh hi in ka thei hi.

 

“Kikhen di chihna …..maw?”

 

Ka ta, kum 13 mi’ dotna ahihleh, kei kia a ka dawn theih vual hilou in ka thei hi. Ka lawinu, Deb in khamtheih tawpsan tum a ka beih sung a ka pate inn a tuam om ding in hon deih hi. Khamtheih tawpsan tum a ka beih taktak chiang a - khamtheih in kei hon leh beih  nasat ding dan a theikhol hi. Huai hun chiang a ka tate uh a etkol ban a, kei hon enkol zoulou ding ahi, chih kithei  hi. Kikhen, kimak ding thu ahihleh gen hetlou hi.

 

Ka nu-le-pate’n ka tanchin ana theih chiang un a lungsim uh a phawng nasa’ mahmah hi. Ahihziak in, theihtawp suah a hon panpih tum uhi. Huchi in, ka nu-le-pate inn lamzuan in ka paita hi.

 

Mite theih a kilawm ding in ‘damdawi’ chi sek mahle hang, lungsim sung gil a I theih kiukiau ding ahihleh, lu-na damdawi ah kani/opium/No 4 telsak ua, huai ngai ka hi phiangsan hi. Tawpsan tum in gumgotang in ka balsialnuai hi. Amah, a damdawi in  honna leh dou dan bang tuh nasatak ahi hi. Ka innpi ua lupna pindan a lumtak leng hilou in ka kithei a, tutna pindan a sofa tung ah ka lum hi. Kho-ul pawt neunuau, law ek ek, ihmut theihlouh leh lung-amte tengteng pangkhawm in hon sualhuan uh hi in ka thei hi. Ka gawng giugeu hi. Lupna akipan ka thoutou thei hamham a, thil tengteng bangmah hilou a ka theihvek nung in, pulpit a tamveipi kana sermon sek : mikhialte I hih lai un, eite a ding in Khrist a si….. chih thu midangte a ding hilou in, kei mahmah a ding na hitah e, chih ka lungsim ah hong lang hi. 

 

Ka hihtheih khamkham in huaithu mukphun siausiau in ka gen sek hi. Ka hinna ah huai thu in gen hon nei panta in ka thei hi. Opium/No 4 ngol ka vei ma, kum sang tampi in, Pathian in hon  itna ziak a a tapa kei adia kiluikhiakna in sem khia in, aman pezouta hi. Pathian leh mihingte lak a ka thu im zumhuai tuntunte thei gaivek kawmkawm in, kei hon zumpihlou in hon it thouthou  hi. Huai kia mahmah ka masuan leh lamet omsun ahita hi.

 

Khamtheih ngolvei maimai himah leng le, hon theichiantu in hon it lailai hi. Huai itna ziak mah a, ka mihing hihpihte’n leng, kei ittaklou pa hon it uh ana hi hi. Nidang in ahihleh, ka thuguk mite’n theile uh, min selaw kha ding chi in ka lungkham sek hi. Tu’n ahihleh, imzoh vual ding ahihlouh ziak in, ka thoveng zaw lehlam hi. Zuau gen leh thil im khelkhual neih akipan suahtakna ahihleh, damna kalbi masa ana hi hi. Mahni hihna bangbang a kilat ngamna ahihleh, mahni kizumpihna tung a vualtung tuanna ana hi hi.

 

Leiba hau luate panpihtu!

Neu kha kha in ma ka sawn hiaihiai hi. Khamtheih  tawpsan ka tup ziak a khamtheih in hon vuak kikna abei taktak ma in ka zi-le-tate toh ka tengkhawm nawnta uhi.  Taksa lam ah hatlou in, damkol mahleng le, lungsim lam ah ahihleh ka damsiangta hi. Nasep ding bang leng ka zong thei nawnta hi. Ahihziak in, ka nna sep dia hon genpih uh khelkhel ahihleh, ka lawinu toh ka genkhawm ua, ka nuikhe kha guih uhi.

 

Leiba hauh luat ziak a mangbang chimohte’n houlimpihtu (counselling) kiphamoh sek uhi. Huchi bang haksatna tuakte houlimpihtu ding in kei mipa : zuau gen a mite sum tampi ba a, leiba ditlouh hau mahmah pa khelkhel hon goih tum uhi!

 

Huchi bang a hon goih tumtute’n ka tanchin a theihlouh ziak uh hilou a, a hon nak theih chian luat ziak ua, hon goih tum uh ahi zaw hi. “I maw…” chi uhi, “Na maituah dingte’n nang bangbang a, a haksatna uh pal galkai kiphamoh lua ngen uh ei voi…!” hon chi mai uhi. Huai nna tuh ka sem zomah hi.

 

Ka innkuan dinmun uh lungdon huai mahmah hi. Ka omna masa Camp sum a ka damdawi lei zouzai sum sen tengteng ka khaloh akipan khateng in ka dit a ngai hi. Inn neuchik khat, kinehtak mai in ka luah ua; solkar in migentheite a vaakna  uh an ne in(food stamp) sawt sim mahmah ka khosa uhi.

 

Khamtheih hihte hutkhiakna nna semtute Celebrate Recovery achih uah ka lut nawn hi. Ka koltanna akip zia leh huai akipan kitalkhe dia panlak nasat a ngaihdan imlou a ka puanzak nasat peuh chiang in mite’n lamdang honsa deuhdeuh uhi. Lamdang honsa tute mah, huai thang ah ka awknawn kha ding chih hon venpih a, hon tungding tute a hong hi uhi. Ka thilhih hoihloute imlou a ka puankhiak ahihleh, kei a ding in damna ahong hi hi.

 

Kha bang zah hiam nung in Pastor Jim in Saptuamte kiang a ka tanchin gen ding in hon kun hi. Saptuamte, ka meltheih maimai leng hilou, sualna taisan a thil hoih hih dia ka thuhilh gigete mai ma a, “Huai hunlai in damdawi tang nek zongsat ziak a buaina gensenglouh nei kawm in, Saptuam nna kana sem a….”chih ding  haksa ka sa mahmah mai hi. Ahihziak in, ka thil hih hoihlou teng ka kipuan ngai ding ahita hi. Huchi in, Saptuamte maituah kawm in, im neilou in ka tanchin ka hon genta hi. Hon simmohlou kia hilou in, hon hehpih ua; thudik ka hilhziak in hon ngaina deuhdeuh uhi. Keileng ka thoveng huai mai hi.

 

Ka lawinu Deb toh Celebrate Recovery pawl pang bel in, ka Saptuam uah khamtheih zongsangte hutkhiakna nna ka sem uhi. Saptuam Upa Committee te’n leng hon lunglut pih mahmah uhi. Camp akipan hawlkhiak ka hihthu Pastor Jim ka hilh nung kum 4 ahong pai nung in, Pastor Jim in a office ah hon sam hi.

 

“Hun pumlum a sep ngai Pastor dinmun  awng pah ding in akilang a, hong ki-ngen ve Dave, khamtheih hihte houlimpih thei ding mi kiphamoh law mahmah a, hiai Pastor nna huchi bang mite sep ding chitak ahi. Nong kinget ngeingei k’on na lamen ding aw” hon chi hi.

 

Ka va kingen hi.

 

Hinkhua kikai-awkte Pastor!

Poulsbo khua a Restore Church ah kum 4 mahmah Pastor nna sem in ka omta hi. Khamtheih hihte hunkhepawl 2 ka bawl khia a, khamtheih hihte tampi mahmah ka enkol hi. Amau dinmun ka theisiam a, amau leng a dinmun uh ka theihsiampih chih atheihziak un ka kiang ah atangnel un, a maingal ua; ka sepna ding diktak ana hi hi. Aziak nei in Pathian in hiai lampi haksatak mai hon palgalkai sak ana hi hi.

 

Ahihziak in, khamtheih ka hih ziak a kei kia hilou a, ka zi-le-tate’n damsung lamsuk lamtou tampi azuihloh uh bel poi ka naksak lomahmah hi. I itpente leh ei hon itpenpente zuau hilh in thil a khoihpoi dan thei dek panpan chauh kana hi hi. Huai mial thuk tak leh sahtak akipan hon lakhetu ahihleh, zuau hilh in hilh keita leng zong kilamdanglou a hon it thouthou Pathian thil hihtheihna kia mahmah ahi hi. Ngolveina ahihleh mikhial leh mi dik kilamdanna hiam, kichiziatna ding hilou in, mahni kithunun theihlouh ziak a utlou pipi a huaisang a beidot huai zaw dinmun a puklutna ahi hi. Huai dinmun akipan hutkhiak ahi, apoimoh leh a haksatna laitak.

 

Khamtheih hihte’n a tawpsan theihna ding ua kalbi 12 achihsek ua poimoh mahmah ahihleh, zuau genlouh ahi hi. Huai laitak ahi, atung a kana hihkhelhna. Khamtheih akipan talkhe thei dia ka kigintak lai in, nasatak a kol-awk khin kana hita hi. Zuau pangbel a ki-imlou in, ka zi leh Saptuamte kiang ah ka hihna diktak hilh in, panpih ngai ka hihlam na theisak zaw khaleng, hon panpihtu ding om ding uhi. Zuau pang bel a kibu kawm  a khamtheih ngol ka veithu ka im chiang in, hon panpihtu dingte khut ka hensak ana hi a, a tuam in kei kia in ka thuak a, a mangbat huai dan a thuah nih kholdiak hi. Saptuam ahihleh khamtheih hih zongsangte belh ngamlouh leh misiangthoute kia om khawmna hilou in, banglam peuh a panpih ngaite belh ding leh belh theih Saptuam hizaw leh ka chi hi. Huchi bang Pastor hih leng ka tuppen ahi hi.

 

Bang peuh khamtheih himhim zongsatna ahihleh mial lak ah a khang dawng in, angeih penpen hi. Huaiziak in, Pathian in “Vak hong omta hen” achih ahihleh koulawi khamtheih saltangte a ding ana hi hi. Khamtheih ziak a haksatna na neih leh, mial lak lam manoh in a tuam in pai kenla, vak lam zuan in pai in aw.

 

[Gelhtu : David Beddoe, Poulsbo, Washington]

 

 

 

Pastor David Beddoe

Read 204 times
Login to post comments