You are here: HomeArticlesCareer GuidanceCivil Services leh Lamkate

Civil Services leh Lamkate

Written by  Published inCareer Guidance Tuesday, 30 July 2013 10:50

~By: M. Zamchinthang

Khutdoh khat in millionaire hih ding  thu agen ek bangdan deuh in Civil Services toh kisai kon gelhnawn awle.


Manipur a District minthangpen a kigen Churachandpur District a neu mahmah hang in kilchih ah phawkphak in om hi. Huai sunga teng te nam tuamtuam bang in kikhen mahle uh siatni phatni chiangin ‘NGOUTEKHELH’ puansilh siausiau zel ahih chiang un midangte’n khat bang in mu ua, Lamka khopi etlawmsak mahmah hi. Minthanna tuamtuam anei a himahleh tutung in khat kia i gen ding uh.

Churachandpur District pen neu in a khopi LAMKA, khopi dangte chia pha kei mahleh huai sung a teeng mite lamdangtak in Pathian in vualzawl a, laisiam tamtak piangkhia in IAS apan a nuailam tampi petmah om uhi. Tu in Central Office, Parliament House, Bank leh Army Officer bang  tamtak omta ahihman in a maute kiangah dotna om veu, koi a hong kipan na hi ua chia a dot chiangun Manipur, Lamka khopi apan chiin dawng zel ua lamdang a sa thei mahmah uhi. Hiai Lamka khopi (Churachandpur) apan sepna nei leh laisiam hiai zahzah a om lamdang sa in Documentary film bawlsawm hial pawl zong ana omdan ahi.Pu Cheranamei Ex-MP in tunung chiangin Lamka ten central office luahsuak ding na hi uh a chi chiin Pu Thangzalun Khuptong in a gen kaza kha hi.I gen ot noppen ahihleh Civil Service tawh kisai ahi. Laisiam taktak kei ka hi kichite ki-elna ahihman in hiai zoute zattak taktak ua, Nam leh Gam in zong kingakna thamin nei uhi. Tulai in i siamsinte hiai lam ah nasatakin khanglou ua, 2011 in bangzah  hiam hong lawhchin uh lamet ahi.

Masawndan theihna din 2009 a final result suak a lawhchingte hiaite ahi:-

a) Hautinlal Suantak

b) Lalsiemdik Tusing

c) Stephen Doukhanlun Phiamphu

d) Thari Sitkil

Tuin hiai lam ah siamsinte lakah khanlawhna thupitak om a 2010 a Prelims result suak ah hiai a nuai a ten lawhchinna ngah uhi.

1. S.Thangzason                       2. Haulianlal Guite

3. Lalsiemdik                            4. Thari Sitkil

5. Lalrobul Fimate                    6. Zosanglur Zoute

7. Immanuel Fimate                  8. Paukhanmung Guite

9. Boipu Guite                          10. Stephen Doukhanlun

11. Hauboi                               12. Lalringum Pulamte

13. Eric Pangamte                    14. Lianminthang Samte

15. S.Thangkhanlal Ngaihte      16. Pauzakham Ngaihte

17. N.Vanlalmuan                     18. Kamlalbel Neitham

19. Lamneimang                       20. Hautinlal

21. Bawinu Suantak                  22. K.Thangminlal

23. James Hangzou                   24. Suanlianpao

 

Hiai atungate kua teng in IAS/IPS amu ding ua chih mi houlimna leh bildohnapen ahi. Lamka a minthanna mahmah bel IAS/IPS tamtak ana suangkhia khopi ahihziak ahi. Hibang Service nelhsiah theihvual hi lou a hoih in miten ngaisang deuhdeuh uhi. Siamsinte kingaihtuahle mimasate nung i thuapzou diam?. IAS/IPS Officer ahau Nam ngaihsang in om uhi. Huaiziakin 2009 result a suahlai in Bihar-te’n hihhoih mahmah ua National Newspaper-te ah ‘Bihar Brain dominates in All India Civil Services’ chi in kigelh hial hi. Bihari-te Lamka leh Imphal khawnga kawltu-tui zuak leh nektheih chi tuamtuam khawng zuak a kilohtawmte bangdan a i na koihte bawn hichibang lohchinna thupitak angahtheih uleh Lamka khopi a laisiam taktak leh melhoih taktakte kuhkaltak in pang ek mawkle hang eite’n leng hihthei na lou ding i hi hiam, Siamsinte kingaihtuah ni!!

Hiai toh kizoitawn in Churachandpur District Students Union (CDSU)-te panlakna hoih ka sa mahmah hi. District sunga laisiamna lam a hihhoih tungtuante ‘Award’ piak ding achih un nasatak in student-te thathousak a, amaute lak ah ki-elna thupitak hong piang ding in ka um hi. District pumpi huap in Quiz khawng hon sai zawmahle uh a kipatna himai lou di hia? Ngoutekhelh Puan i silhkhawm siausiau bang un laisiamte zar zaw kizoukhawm diamdiam eive. CDSU-ten education toh kisai in “Our Challenge is our Future” chih mangngilh lou in pan hon la taktakle uh uthuai law petmah hi.

Tulel a Deputy Commissioner, Pi Jacintha Lazarus IAS thupi leh phattham ching ka sa mahmah hi. Ahong kipatna South India a khopi liante lak a khat Chennai hinamah inchin chitak in mizawngte awlmoh petmah hi. Genbeh zual laile, huai lam mite diktat mahmah lai un chin, thei (fruits) leh meh zuakte bang in nitaak a lampi kianga puankhuh a ataisan uleh zingkal a angeiteng mah ana omlaina mun akipan a hong kipan melhoihtak, nungak ahi. Nungaknou khat ka hi chia kizahpih mai lou in, thudik paipih a, amihinpihte it a, laisiamna ngaisang a, Careers and guidance saina ding sum bang leng sanction ziahziah ahihman in, ama omsung in aphatuam theipen in zangle uthuai petmah hi.

District khat a teng unau khat hiai lam ah i pankhawm kei uleh poi saulaw ding ahi. Tukum in Prelims zoute incentive 1 lakh kipia zong a thei thukte’n hon gen uleh khotualte hibang tampi a om ziak uh hidan a gen pawl om uhi.

2009 Civil Service final result ah Churachandpur district leh Assam state pumpi ki-el thei phial hi. Churachandpur district apan in mi li in passed ua, IAS/IPS mu chiah om kei mahleh Central Service tuamtuam piak in om ua, tu kum a exam thak zong om uhi.

2009 kum in Assam state pumpi ah mi 5 kia passed ua huaite lak ah khat kia’n IAS muzou hi. Alunglutte’n i phattuampih khakleh chi in ama tanchin gen sau zekle Assam state pumpi a IAS mu om sun Mr. Narayan Konwar S/o (L) Haram Konwar ahi. Eite mah bang a singtang mi mi zawng mahmah school hoih a zong kaizou lou himahleh Assam a Tiwa tribe-te lak a IAS zou masapen hong suak maimah hi. Amah Cl-V ahih in apa’n sihsan a school hoih a leng kaizou lou in Morigaon ah class X tan zou a, 2001 in Ghanakanta Barooa Mahavidyalaya (Morigaon) ah Graduate (Pol. Sc.) a, tua zoh in Guwahati University apan post graduate zoukhia hi. Akhua uh Assam gam kil khat ahihman in kumteng in tui lian in tokbuai gige a, tunitan in Electric zong painai lou hi. Himahleh Mr. Konwar, zawnna leh tenna mun in zil kei mahleh tuate’n dal zoulou in Assam a kipan IAS Passed khat kia om a tua pen amah kia hi maimah hi.

Siamsinte aw, tupna giltak na neih a, na peih taktakleh nang zong Mr. Konwar bang in na lohchingthei hi. Na siamsinna New Delhi, Bangalore, Hyderabad, Shillong, etc. a, kua ma’n nang college kai a om na hihlam leng phawkpha lou uh himahleh room neuchik a kikhum a, chihtak suah a laisim a na hong panleh: “tangtung a khaw om selguk theih ahikei” chih gelh bang in, Civil Service result hong kipuankhiak hun a  Mr. Konwar banga Newspaper teng a na min suahkhiak a om, na min munteng a houlimna a kizang ding ahihchiang a, uthuai sa lou na hi hiam!! Na ut a, na tup taktakleh hi thei mahmah ahi.

Siamsinte aw, na tup taktak uleh Mr. Konwar zawnna, sum leh pai neih louh, college hoih a kai zohlouh khawng  in adalzohlouh bangin nang zong tuate in kisubuai ken. Lamka khopi ah zong College hoih taktak - Rayburn College, V.K. Tawna College leh a dang tamtak dingkheta ahihman in, paulap ding bangmah omnawn lou ahita, huaiziak in nang a kinga ahi.

Read 1229 times
Login to post comments