You are here: HomeArticlesGeneralMim Kut

Mim Kut

Written by  vungzamuan valte Published inGeneral Saturday, 23 September 2017 00:48

Vungzamuan Valte

 

Kut kichi festival chihna ahimai a, festival ichih chiangin innsung, khawsung, vengsung leh gamsung a hunnuam zatna danin koihtheih ding hi. Himahleh, atangpi thu in festival tengteng in kipatna (origin) nei chiat uhi. Festival tamzawte ahihleh biakna toh kisai ahi ua, sungkuan a biakna, khawsung a biakna, nampumpi huap a biakna, gampumpi huap a biakna leh sakhawpumpi huap a biakna hunnuam ichithei ding hi.

 

Mihingte taksa a om ihi ua, gamsate leh ganhing dangte toh kinaichik a hinna neite ihi uhi. Huaiziakin, sa kichi chu mihingte genna ahitangpi a, khua ichih chiangin ikim ikiang a khuai leh tui, gam leh sing, mual leh guam, huih, nisa, vuah leh khawvak khawng tengteng genna ahi a, huchih ziakin I pupate hunin KHUAVANG chi in a siamtu dan in koih mai uhi (Khuavang honsiam nahi, Khuanu hon ruat kahi uh etc). Khuavang, Khuanu, Khuavannuai, Khawvel, khua, khawte, Khawnim, Khawsia, Khawpha chi in I kim leh kiang a thil omte leh a omdante genna in inei tangpi sek uhi (nature).

 

Huaiziakin, Sa toh Khua I genkhawm chiangin SAKHUA hongsuak dan hipen leh kilawm hi. Huchidan a I pipute`n ngaihdan leh gindan aneih ziak un, a sabiak uh NATURE worship kichi hi. A hoih leh hoihlou, damna hiam, natna hiam hon tun thei ding khawng khenkhia ua dawi leh kau (siatna) gamhuai kichi khawng setan chihdan ahi mai ding ua; Khuanu, Khuavang, Lasi kichite khawng damna leh vualzawlna tun theitu dan in koih leuleu uhi.

 

Mihingte isih nungchiang in khagau (soul) nei ihihdan thei ahingei ding ua, hiai kha pen misikhua apat a damlaite kiang ah hong lengla sek danin koih uhi. Misikha te`n a damlaite leh a sungkuante ahong veh hun pen hunchiam nei chihdan hikei mahleh, a khawsakdan uleh vuahtui kiakdan toh kituakin, haithak a neih hun khawng uh hideuhse hi. Misikhate lungleng mahmah in misikhua ah om hidan in koih ua, a lunglen uh khitkhiakna dan leh, a damlaite va vualzawlna danin kum khat in khat vei va veh zelzel dan un koih uhi.

 

Haithak masa pen nek leh tak kinamtakna masa ahi a, kiallap pen dingin MIM chingtangpi uhi. Mim pen buh/ann taktak dan a kumkhua a nek dingin bel hautak in neihzoh haksa mahmah ding hi. Vaimim gauhun toh kituak kawikawi ahihna ah hiai hun pen MIM kichite apian hun ahi a, mim hi in, vaimim hitaleh, mim ahi tuaktuak uhi. Haithak hunin mehding chituam tuam tung lemlum ua, tangmai, mazel, muvom leh a dangdang tampitakte banah, gamlak khawng ah thei chituamtuam piang tam mahmam mai hi. Hiaihuntak ahi MIM KUT a om hun.

 

A tangpi thu in JULY, AUGUST leh SEPTEMBER lakvel ahi hiai MIM KUT a kizat hun. I pupate hunin calendar hiam niteng chiamtehna hiam neilou ahihna uah, kum khat in hiaihun a zang uh chihmanthu ahi a, ani, akha, ahun chihdan omsese khollou hial hi. Gammang kawmbupi lak a khawsa ahihna uah, a hinkhua uh vuahtui kiak hunin kaihuai zou mahmah mai a, kum khenkhat in July kha in mun khenkhat ah Mim kut neithei ua, kum khenkhat in August in, kum khenkhat leh mun khenkat ah September khabul lam asuak thei veve hi. MIM KUT pen innsungkuan biakna toh kisai ahihna ah innsungmite kiman dan ah zong kinga mahmah thou hi. Ahia, Mim leh Vaimim tungnailou (gaunailoupi) a bawldan chu omlou ahi him hi.

 

Mim kut pen khawzang a nopbawlna ahi kei a, Hausa thuneihna leng a om kei hi. Innsungkuan a sihna manna om sek ahihna ah, a paimasate phawkgigena dan ahi hi. Pipute, nu leh pate, sanggam ngaihte ahon mualliamsan sate, misikhua apat hong kiknawn ua, innsung ah hong teng kik tei dan un koih uhi. Huchi in, haithak a limchi chi (a hoih hoih) tengkhia ua, dohdan tung ah (Alter) koihkhawm ua, hiai ah na nek ding uh, noute hon vualzawlna ziak a hiai haithak khawng hong piang ahi, chi in kipahthu gen uhi. Hiaihun in innsungmite kuamah pawpawt (vakhia/zinkhia) omlou uhi, zek in nei ua, tang bok uhi.

 

Huchia, zinleng misikhate avak nung un, a ni 2 ni in (ne taktak dan a koih di; ne chu hilou), kipahthu genna dan in vok gou uhi. Voksa pen sungkuanmite chauh in a nek ding uh ahi hi. Hiai a sungkuanmite ichih bel, tu leh tate chihna ahi, inntuansa hitaleh, pasal nei a kuante hitaleh. Innkuan kimuhkhawmna hun hoihtak ahi a, pupen ( a upa pen) in atu-atate vualzawlsakna nei bok hi. Huchi in, pupen leh upate zahna kichituh ua, kithuhilhna hun poimohtak leng ahi hi. Awl in a HAITHAKTE uh lakhia ua, innveng leh atu-atate kiang uah hawmzak sek uhi (deihsakna thilpiak).

 

Hiai Mim kut zatdan pen I gintak keileh KHUPCHING TOH NGAMBAWM tangthu sim le uchin a chiang mai ding hi. Khupching a sih khitnung in misikhua ah Ngambawm va pai a, khupching guhvuak a om va mu hi. Nekding lah omlou ahih chiangin, gilkial dangtak in vul ningniang mahmah hi. Ngambawm in hehpih mahmah ahihna ah, misikhua apat a khua uah paikik vengveng a nekding tampi puak tektuk hial hi. Huchi`n Khupching hong halh huaihuai mai a, hong hoih hulhul mai hi…chihdan ahi.

 

Ngambawm in kumteng in hiai haithak hun zang gige a, a ittak Khupching a dingin ahoih phapha lankhe gige sek dan ahi hi.

 

Huaiziakin, JULY, AUGUST leh SEPTEMBER khate misisun hun ahi a, misi la sak hun ahi a, kah la sak hun ahi a, I pupate danin hiai hunsung a kitenna neih ding sianglou (zek) danin koih uhi. Tunitan in hiai kha 3 sung a kiteng teitei kitamlou hial ding hi. Singtang ah nesep awlmoh huntak ahihna toh, vuahtui tamlai ahi a, tuilian bang om ut ahihna toh, khaw tuamtuam a pat kinaihtuah haksa ahihna ah, hunpi (kitenna) neih leh zat bel remchang lou mah ahi hi.

 

Mim Kut a poimohna mahmah khat leuleu bel, i pipute ngaihdan in, kuahiam khat in vangtahhuai takin azi hiam, a pasal hiam sun hitaleh, misi sun hun kumkhat danin koih uhi. Mim Kut ahong tun nawn chiangin misikha pen khakkiakna dan bawl ua, huchi in pasal hiam, nupi hiam, lusunna tuaknu'n/tuakpa'n neithak thei pan ahi hi. Zehtang chihdan in kumkhat sung zineih hiam, pasal neih hiam remchang lou suak hi. Tuaziak mah ahi, tunitan in, kuahiam khat in azi/apasal asun hun kumkhat leng chingmanlou a zi/pasal aneih chiangin " chi law law tel, kum khat le phanailou a" kichi tangpi sek hi. Aziak omdan ahi hi, Mim Kut zatnawn hun tan bek ngak zoh ngaidan ahi hi.

 

A paimasate phawkthakna, zintunna, nektak a vakna, a vualzawlna uh ngetna, khawhar taka omhunte ahihziakin, I pupate`n hiaihun pen tang (zek) mah ahi uhi. Tulai a I KHAWHAR Late uh, sisunna a ki-sasekte’ tampitak a origin om ding mah ahi hi.

Read 136 times
Login to post comments