You are here: HomeArticlesGeneralA Minpu Lel A Khristian!

A Minpu Lel A Khristian!

Written by  ZM Tonsing Published inGeneral Monday, 29 January 2018 17:48
A Minpu Lel A Khristian!

~ By : ZM Tonsing

 

Tangthupha vak in i gammial ahon tanvak nung kum 118 bang phata hi. Hiai Tangthupha in i niamna leh tuantualna ua kipan hon hunkhia in hon domsang a; i lam-et batlouh mun-le-mual, neih-le-lam, pilna-siamna leh kong bangkim ah hon pi galkai hi. Khalam a dia tangtawn hinna i ngah kia hilou in, salam mahmah ale nakpitak a hiai Tangthupha hamphatpih ihihdan uh haihvual ahi kei.

 

Nidang lai, ipu-ipa' hun a khosak dan leh tu, ei khang a i khosakdan uh nakpitak in kilamdang a, teh di hile hangleng tehvual hilou ding hi. Kei bangleng naupang chik hilai mahle'ng ka neulai leh tunichiang a nek-le-dawn, silh-le-ten, khosak dan leh kong tuamtuam ah kilamdanna tampitak om hi. Innka tau a daileng, taw siakna dia inn bang a kizang maupekte kuautan zok in taw siak; innka dia kizang gawphelte tung a taw tat zok in tawsiak khin hiziau. Dailenbuk chihte om selou, dainawl peuh khawng a daileng, vok leh ui te'n ek ne nuam a hong ngak uh. Hichibang khawng a hunzat kum tam kivei naikei mahleh tunichiang in hichi bang hih ki-om nawnlou a, zawng leh genthei tawp kichite'n le dailenbuk kinei chiat hi.

 

Huanah, bawng ek lak a kelkum tou, mat chiang a kisik sak futfut lai khawng naichik bang mahleh tunichiang in Zoudawn ah leng naupang kelkum tou muh di a om nawnkei. Kangtalai chihte om lai mahleh 'tolhta-nam' chi a nahtang hawng (nahtangkung tuamtu) tung a taw kawt zezu leh nin nianua zen a kitholh muh di om nawnlou hi. Zoudawn tel in i minam leh gamsung uh tuh khantouhna husa in naktak in ahon zap a, hiai bang dinmun a om di'n  ipu-ipa te'n hon koih uh a gintak huaikei. Ei leng ipu-ipate' sulnung zui a, singbul-suangbul banah dawi-le-kau khawngpeuh ana betou ngitnget lai hile hiai bang dinmun ah ki-om nai hetlou ding hi. Huaiziak in, hiai khantouhna tuh Tangthupha ziak liuliau ahi hi.

 

Ahi a, hiai Tangthupha in khalam kia hilou, salam mahmah ah leng kikhekna nakpitak ahon tut kawmkawm in lehlamtak ah, pausiatlouh di’n kipahpih huai lawmlawm khollou houh a dia aw chihtheih hun om mawk hi. I pupa hun a tawndan, sa biak leh nopbawlna tuamtuamte Tangthupha ziak in paih leh khekkhiat in om a, hiai khovel khantouhna hattak sung a pi lut a i om ua kipat in i minam sung uah ki-itna leh kilainatnate mang hiaihiai in, ahoihlam hi'n hoihlou lam hileh kikhekna nasatak i tuak uhi.

 

Van leh van kikhektuah (barter system) a, mahni neih bangbang toh lungkim leh kipaktak a hunzatlai nite'n lenmual a khumta. Golhgukna, nekgukna, chihtaklouhna leh angmasialnate'n hon tuam a, sum deihtakna guam kawkhuk ah i lut uhi. Mihinpihte itna leh khaw-ngaihna om nawnlou, mahni punna leh metna di ahihnak leh midang sih leng poisalou in mimal punna leh hamphatna di kia delh in hinkhua i zangta uhi.

 

Tagah-meithai leh dai kilkal a mite itna leh khaw-ngaihna a om nawnkei a, "pumbuk a numei vualzou, lui mun a pasal vualzou" chih paunak a i neih uh tuh zat theih nawnlouh a suakta. Khristian kichi mahle hang itna leh hehpihna neilou, mizawng leh gentheite khotuahlou a, amaute hamphatna di leh tan dite neksak guigui thei Khristian-te ihihman un nek di neilou a 'meikuang paisuak'  imi-isate lak ah om lai kha ding hi.

 

Hiai Tangthupha deihlou i hikei himahleh ipu-ipa' hun a khotang leh minam chidamtak a om a, mahni neih bangbang toh lungkim leh kipaktak a hinkho zatlai nite a ngailou om dia hia? Ei khawng in bel sau i thei ban kei a hive’n, upa leh taltak lam deuhte'n hiai ki-elna sangtak khovel, mahni hamphatna di delh a thunei kituhna, i minam sung bouruak hoihlou takmai tuh ning mahmah di un a gintak huai.

 

Guta-lata omlou, kimuanmohna himhim omlou a, gam kuankhe di bangleng inn kalh chihte om selou, kongkhak khak zok in huangvulh-gantate lutlouhna dia singkhuah toh delhkip a sun khua a lungmuangtak a inn taihsan theihlai hunte kuan a ngailou mah dia? Innsak-innkhang, tanau-laina kinekngaih a, meh chituam deuh mehni khua a kikholh chitchit lai hunte kan a nuam a om dia hia? Tua lah a houpen a gen a tang-al nasan lei ngaita!

 

Nidang in nekgukna kichi omlou i chi kei himahleh, tu hun toh teh in ana hichi maingal lawmlawm khollou hi. Khelhna leng ana om tham ding ahihziak in khelhna tung ah sum hilou in thudik in vai a hawm a, thudik mah tuh ana vualzou zel hi. Makai leh heutu chihleng om tham mahleh mahni mimal punna leh hamphatna dia makai hilou in, mihinpihte suahtakna di leh amaute’ hamphatna dia makai hi zaw uhi. Ipu-ipate Khristian ana kichi kei mahle uh tua ei, Khristian kichite sang a Khristian sahkhua ana zui kha zaw houh a di ua aw chihsim in om hi.

 

Zu-le-sa dawn in amau khomtek in nuamsa mahmah mahle uh zu kham ziak kisia-kibal a, kisualzak chihte om khollou ding uhi. Ei lawi lah zu kham zek chiang a khovel a hatpen bangmai a mi muhteng banchou, mi toh kisiat, kisual di kia lungsim a om toh kibang. Lemna himhim deihlou. Zingkal lam Biak inn a hun zang a, nitaklam chia zu mun a hun zang bei zel Khristian-te ihi uhi. Zu kia hilou in hiai khovel khelhna – mit utna, sa-utna leh thanghuaina chikim tok ki-Khristian sak mahmahte ihi tel uhi. Numei-pasal kal thangtat bang tuh zumna himhim a ngailou, alou theilou, paidan thak dan a ngai top!

 

I minam sung uh thuneih utna, dikloutak a vaihawmna, kineksiatna leh angmasialna'n vaihawm himahleh ipu-ipa' hun a hichibang chiin dan hoihloute omlou a, ki-itna leh khawngaihna toh dialdial leh diamdiam a ana khosa uh ahi chih thei banlai a, tua i om dante uh khek leh bawlhoih theih ahi chithei lai ihihman un hampha ihi uh. Tu hun a kikhekna omlou a, hiai bang dan a i om touh nilouh ua le bel khangsawn hong om lai di te'n i ngeina leh paidan uh ahi chi a ahon ngaihzam maimah khak di uh lau huai petmah hi. Khristian sahkhua bangleng zuih leh kisinsakna himhim omlou, nekgukna toh Khristian sahkhua paikhawm ahon sak khak ua le bel “A Minpu Lel A Khristian” kihitou denlai diing hi.

 

© ZM Tonsing | 29012018

Read 551 times
Login to post comments