You are here: HomeArticlesGeneralTai Nih A Pai Zomi Numeite

Tai Nih A Pai Zomi Numeite

Written by  Hang Khan Lian Published inGeneral Monday, 29 January 2018 18:22
Tai Nih A Pai Zomi Numeite

~ By : Hang Khan Lian | Jan 18, 2018 (Singapore)

 

Tuma kum 100, Leitung galpi masa lai in ihPu ihPa Zomi pasal tingteng 1033 galmai nawk lianding ahihloh hang, galvan seng ding leh a thaanghuaiteng hahsiang dingin tuahunlai aa ong uk Mangkang Kumpite vaihawmna tawh Europe gal maitang tengmah ah va kuankhia uh aa, Piantit pai ci-in ih minthangsak mahmahhi. Gunkhawm (Kalaywa) nuaisiah puapialna om ngeihetlo kawmkal ah hihvai ong omciang, ki patau mahmah, a hingman dingzah in kingaihsun ihhihman in, a kikhakhup tawh, a kivuibawl tawh, innluahdingte bang kipaisak ngamlo bek hilo in, tapa khat bek a nei tadang a nei nawnlodingte bang khang kibotsat ding launa tawh a ta sang a pa a paizaw zah ihihi. Lungsim nangawn aa ihgeel zawhhbatlohna gam ah kuan khia ding cih pen tua hun lai in a kingaihsun zo mahmahlo ahihi.

 

Tuabang in pasal tingteng mun leh mual theihlohna, pau leh haam theihlohna, galmai samai ah ong kuankhiat uhciang, leitungbup uknuam aa kipan a khangto gam ah a tul aa sim ava tung ihihman in, ihmuhna, ihzakna, ihtuahkhaakte in a kuankhialote tawh ong kilamdangsak pah in, athuneupen ah puansilh nikten dan bek zong siamlawh khantoh lawh ihihman in, ihkiim ihpaamte sang khuamu masa zaw ihsuak hi. Topa ong gelsakna hi aa, a sihlawh, a manlawh ih om phial ahizongin, a vekphial mah in ong tunkik uhciang, lungsim ngaihsutzia bek zong kipicing tuampah kici theihi. Mikhangto khinte ngaihsutzia, lungsim puakzia, nasep zia, sum leh paai zonzia ava mu a va thei, ava sin uh na hi gige hi.

 

Ih theihloh kal nangawn aa ong pantah khol Topa Pasian tung ah lungdamna ihko hi. Tu in kum 100 ong cingta hi. Piantit pai zawh kum 100 khit ciang:

 

Zomi numeite a lomlom in inn nasem ding in paikhiat laitak hi aa hoihtak in kankhiazo hilehang a tul aa sim ki om tham in ka umhi. Tua nangawn Tedim kampau Zomite bek ahihi. Singapore khuakhat bekbek ah tul aa sim naih mahmahta dinghi.

 

Hih ih numeinote pen tuma kum 100 lai ihpu ihpate hunlai zahmah phial in pau leh ham, mite nuntakzia, siamna leh pilna masuan aa ong paikhia hihetlo uhhi. Kawlgam kumpi ginatloh luatna hang aa piang nuntak hamsatna hang aa mi inn aa nasem ding, innteng ding aa ong paikhia uh hi aa, pilna tawh na vasem ni cih hilo in thatang tawh sum thalawh ding aa ong kuankhia uh ahihi.

 

“Innteng” ihcih mah bangin a kitheihpih ngei hetlo innkuan khat tawh, mothak lah hisamlo, pau leh ham kithei lah hilo, meltheih ngeibek lah ahilo innkuan khat tawh inn khat sung aa tengkhawm hi uh aa, a tuncil lam banguh lungneu, lungzuang aa nisim a kapkap uh ahihi. Amel hoihna uh, athacinna uh, a cii asa zolna uh, a cidamna uh in zeetna a zolzol, vankham puasim abang uh hilai hi. Nuntakna hamsat luatman ahihi.

 

Va genpih, va kuppih hilehang amauzong khitui mualtuangsa in nui bek uhhi. Khatkhatte kisim mawhlua ahihman in amau leh amau nuntakna a beisak, gui awk, innsang dawn pan aa lengkhia cihbang om aa, a sihdong aa kibawlsia dong athuak zong ih omkhin hihang.

 

A phutkhaak uh hamsatzia gen zawhding hilohi. Piantit paite aa tawh tehkak theih ding zong hilohi. Adang takei leh Piantit paite a lom in om khawm uh aa, lunglen cih omlo zawdeuh ding, aduhduh uh huanthei, nethei, thu leh la, lunglenna kikum khawm thei zawdeuh laiding uhhi. Hih ih numeino inntengte pen ong tunzawh kha 6 kha 7 sung kua mahtawh kimusaklo, kiho saklo, khasum ngahlo uhhi. An nangawn a kham a ngahloh ni uh tamtuak aa, zankim aa ihmu kha pan zingtung phalvak aa tho, ihmut ciim ing a ci kuamah omlo uhhi. Simmawh veve Mangkangte simmawh noptuak zawdeuh aa Sennupite, Vainupite, Zomi nupite simmawh vanglak noptuak hetlohi.

 

Sente, Vaite simmawh bel thuakzo zawdeuh ing. Kalungtang bawhsat ong bangsak, kasin hinglai ong khu sak, a lu leh a pum kakhennop honkhat in hih a mipih numeino teng a simmawh pau niloh teng ahihi. Ih sanggamnu Piang Ngaih Don ong kithahsak sungin hon khat in fb pan amau muhna, upmawh atuamtuam simmawhna kammal vive ong gelhkhia uh aa, khat bangin, “Kei zong Singapore ah na sem ngei ing in, Singapore aa inntengte a inntekte luppihloh khat zong omlo dinghi” ci-in aki luppih sim ama kiang aa report kipia, numei ginalo kizuak makai bangliang in ong gen aa, “Kawlgam aa, na khutnuai aa nasem, lai-atte na bawl bang aa kibawlsa nahiam” ci-in ka dawngkik kha dektakhi.

 

Ih gennop bulpi in a bangding aa kisimmawh sawnsawn sese ihihiam? Ih nuntak bang kilamdang luanai ihihiam?

 

“Innteng” cih limlim kisapnading aa deihhuaipen hilo ahihman in, kei bangin bel “No pen mihauteng in no om nading inn hoih nono na lei in, amau sun thapai nasep vakuan uh in, tua amau inn hoih nono teng aluah aa om, innteng taktak na hizaw uhhi ci in thapiakna in ka neihi.

 

Ih nuntakzia ihlaih zawh masiah ih ngaihsutzia, ihsan zia laihzo lehang puaknop tuam hi. Thusia teng ihkaihkhopna lam in ihgennop bulpi ih tunkei dektak hi.

 

2017 kumbul lam in Zomi Innkuan Singapore Makaipipa in, innteng numeinote kiang ah viber tungtawn in dotna khat ong khahkhia aa, “Tulaitak leh abeisa aa Nu leh Pa inn aguan, inn a lamsak bangzah ih omhiam?” Ong cih leh, tawm vei sung in 25 bang ong phaziau hi.

 

June 18, 2017 Pate’ Ni mah in kikhawm aa ongpaite tung ah “Pate nusiatsa bangzah ih om aa?” kacih leh 30 kiim khawng ong pha uhhi.

 

Hih thunihte tungtawn in ihgen nop ihkikum dinghi.

 

Zomite pen tapasal (pasal) a thupisak mahmah ngeina a nei minam khat ihihi. Bangzahta in numei pasal liangko kikim nading, Biakna lampan ahi aa ngeina lampan ahizong ih kikupkup hang beh leh phung tawh om ihihman in, kikalsuan beh zo peuhmahlohi.

 

Tapasal aneilo numeite a pasal si leh a nuakiksak ngeina neite ihihi. A pasal tawh a lamh neih leh lam nangawn kipialo zahdong ihihi.

 

Tanute inn leh lo gamh luahsak ding ci aa ihkikup hang, behdang phungdang khat tawh ong kiteng hileh cihna mun ihtun ciang kikup beh theihin om nawnlo hi. Pasian ong piaksa ihngeina zuihsa khat hizel ahihman in ngaihsut, khensat hamsa mahmah zel hi.

 

Tapa a neilote a pasal a sihleh a nung lamte’n a kivuini mah in ciahpih kik aa, tulamlam teh tuataktak bel hehpih huai, cikziat huai kisa ciatsam ahihman in, a Zi in pasal dang a neihkik kei leh a sihdong omsak lehang cihciang kisangzo mialmial hi. Tanu bek a neih leh zong a tanu pasal neih dong om thei buangleh cih ciang ahihi.

 

Tua khitteh ee, tua inn leh lo kua in ngahding? Cih dotna a omteh, a beh a phung in ngahding cih hiziau aa, sung aa piang tanute’n ngahlo in a gamla aa behpa khat in ngahding himawk hi. Hihval kisuan beh zolo hi. Pupa’ ngeina cih hiziau hi.

 

Hizahta aa palsat zawhloh ding ngeina kawmkal ah, sandan athak, pomdan athak khuavak thak khat ong taang khia hi.

 

Tul aa sim sum thalawh innteng ihcihte a vekpi phial in nu leh pa vaak, nu leh pa inn leh lo lamsak, sanggam ulehnau pilna sinsak, pa om nawnlote pa taang aa matang, nu om nawnlote nu taang aa gamtang ahi uhhi.

 

Amau tangthu dong lehang lunglut huai mahmah uhhi. Innkuan bup, unau bup aitaang aa kipia khia, sanggam teng sang kahsak, boarder koih, college kahsak, Laisiangtho sang kahsak, zanglo leisak, bawngkap leisak, innlam nasep khat kipat zawh nading sumbul zonsak, sanggamte Malaysia, Thailand ah om, sum thalawhna kician neilo huhkul, innlam aa te damlo zato kah, sum leitawi lohzo nailo, sanggam pasal kician, a gina mel omlo, nu leh pa tekta nasem zolo, nu leh pa kikhen sanggamte ending omlo, nu leh pa jubilee laksak…cihbang hi uh aa, a ngah sunsun uhzong a zang ngam, a duh uh zong a ne ngam hilo uhhi.

 

Khakhat khatvei bek a pusuak thei tamzaw uhhi.

 

Hizahta aa a kipiakkhiat uhhang, amau lian en hilehang laitan sangpi a sin uh hilo uh ahihman in simmawh lam aa late aa ding simmawh huai mah uhhi.

 

Ahihhang amau tawh sunglut in nungta khawm taktak lehang simmawh nading malkhat zong omlo, phaakzawh hetlohte ahi uhhi. Nu’ taang Pa’ taang aa ong kuankhia ahihmah bangun angah sunsun uh atam hetloh hang hum tinten, sik tinten, gil gaak liang mah in ciil thei uh ahihman in zatcing sak mahmah lel uhhi.

 

Mihau, mipilte innsung zekpi ahihmah bang un vanhoih vanthak khempeuh zangthei, lenthei uh aa, anlim nono huanthei in, atawmpen mangpau, senpau tawh a utteng uh gentheilel uhhi.

 

Akhangto khinte innkuansung omzia, tate pattah dan, lenglado dan, tutdan khawldan, innsung siangtho sakdan hici zaw leh cih omlo zah in ongthei uhhi. Hihteng bek zong a sin aa kuansak ding hilehang sum tampi beikul ding ahihi.

 

Asum apaai ding naneihzawhnak uhleh natate a pantah theilua ding, anlim nono a huan theilua, innsung innpua a siangtho sak, mipil mihaute zia a bangsak theilua uh ahihi. Pasian in Zomi numeite ong pattah sak nahi gige hi. Asawtlo in amau sinkhaak, tuahkhaak teng Zogam ah zong ihzat hun ong tungding hi.

 

Tu aa te sang aa athupi zaw pawlkhat om lai hi. Biakna lam

 

Innteng numeino pawl khat pen ZIS ong kikhop uhciang inn aa a naucinte uh ong keng thei uhhi. Nipi sang kahsak uh aa, alawmte tawh latom nono, Laisiangtho taangtomnono sakhawm, simkhawm uhhi. Nuam samahmah uh hilaihi.

 

“Anu apate un phal uh maw” kacihleh “Phallua kisa Christian suaksak un, ong ci uhlai ei” ci uhhi. Hihtung pan aa ka muhkhiat khat in Singapore aa milian, mihau, innteng cialzo inn 500+ bang aa om ihihman in, ei’ tungtawn in a nungta Pasian ong mu uhhenla, Christian ongsuak le uh, hih valkaan aa Mission nasepna hoih omlo, hih valkaan aa Pasian Thugen theihna kongvang kihong omlo cih ong musakhi. Thu umlote tung aa Mission Thu pulakzia a siam athei, a semtakpite’n thusinna ong neihpih thei le uhteh lunggulh huai, iplah huai, pammaih zong kasahi. Pasian ong deihna khat hi mahmah dingin zong ka umngam lelhi.

 

Ngeina lam

 

Tu in ahihleh akhauh mahmah beh leh phung ngeina nei Zomi innkuan 1000 kiim bangin tanu tapa khenna lungsim pua nawn kei in ka umhi. Go leh gamh aa ihneih, ih kisaktheihpih mahmah inn leh lo cihte tanute luahsak lohding kamkek ngam nawnin ka um kei hi. Amau lamsa ahihi.

 

Sanggam pasalte mahmah in zong amau sangkahsak, pilna sinsak, gualtung a tuangsak a sanggam numeite, simmawh, haza ngam in ka um keihi.

 

Ih Zongeina cihcih, numei pasal khenluat ngeina, beh leh phung thupisak luat na suangtum- lungtang, thusiamna, kipiakkhiatna tawh ong satkham uh ahihi. Mipil misiamte laihzawhloh, cihna ding atheihloh uh hih ngeina hoihlo pen upmawh hetlohna lampan ong lumlet ziau ahi uhhi.

 

Tuatengmah ka lunghimawh ahihman in, “Tu aa na inn lamlamte uh no numei nahih uhteh, luah khalo ding cih na thei uhhiam?” ci-in kadong hi. “Thei mah ung” ong ci uhhi. “Na sanggam pasalte un luahding aa no bang numei dang khat ong ki innteksak dinghi, nathei uhhiam?” nangawn kacihi. “Theimah” hilel hi.

 

Gamsung gampua ong kisimmawh pau luatna te ee leh, kacihleh, “Ka Nu ka Pa uh innlum lolum aa a omding, a gil uh vah ding, ka sanggamte uh mipil misiam suakding” ong cihsan ziau uhhi. Ko tuate tawh buailo! cilai uhhi.

 

Sia JM Paupu in, “Na hihna uh ong kigen leh na hihna uh ahihman in dawn kik kullo aa, na hihlohna uh ong kigen leh na hihlohna uh ahihman in awlmawh kullo hi” ci hilo hiam, hilai!

 

Ih miinam bup kalsuanna ah, tangtawng aa kipan Pasian’ ong gelkholhsakna khat om niloh cih kician kasahi. Tuabang aa Pasian geelna sung aa gamtangkhate, Pasian’ zatte tawh nuntakkhop zong nuam kasa aa, tuate tawh ihnek bangbang ihhawm thiamthiam zong lim kasa hi.

 

Kobel  ong kikoko tawh kahnuih pilhpelh kawmsa in hih la na awiawi ung

Lungkhamnate ahon tuamciang, Kipahna nate ahon beiciang

 

Kazuihsiam ahilo tuanglam kazuih lai in, Ka Topa in a hong sinsak na hizaw

 

Honpi nate ka gelciang in,Kei mah lelngel in theihsiam a haksa ngei Hizong kei aa ding a gualzawhna leh Amah muanding hong sinsak ahizaw.

Kan zawhlon aa kangaihsutte, Palzawhloh aa ka ngaihsutte, Amuannate ka muhna ding hizaw, Amah aa ding ahaksa omlo ee.

 

A mipihte aa kipan,a inntekte dong in a etneu, a simmawh, a koko, a kipii muh hetlo Zomi numei inntengte leh sihna dong athuak ihsanggam numeite hih kong laigelh khiat tawh zahtakna kapia hi.

 

Note in Pasian gelna sung aa vanzatgilte na hi uhhi.

Read 519 times
Login to post comments